អគ្គលេខាធិការនៃ អង្គការណាតូ (NATO) យល់ថា អ៊ុយក្រែន ត្រូវសម្រេចចិត្តដោយខ្លួនឯងថា គួរតែទទួលយកតម្លៃណាមួយសម្រាប់សន្តិភាពជាមួយ រុស្ស៊ី សូម្បីតែបញ្ហាធ្វើសម្បទានទឹកដី។
«សន្តិភាពគឺជារឿងដែលអាចទៅរួម ប៉ុន្តែ សួរថា អ្នកបានត្រៀមខ្លួនដើម្បីចំណាយទៅលើអ្វីសម្រាប់សន្តិភាព? អ្នកត្រៀមលះបង់ទឹកដី ឯករាជ្យ អធិបតេយ្យចំនួនប៉ុន្មានដើម្បីសន្តិភាព?» អគ្គលេខាធិការរបស់ ណាតូ Jens Stoltenberg ថ្លែងនៅក្នុងកិច្ចសន្ទនា Kultaranta នៅ ប្រទេសហ្វាំងឡង់ កាលពីថ្ងៃទី ១២ មិថុនា ដោយនិយាយអំពីបញ្ហានៅ អ៊ុយក្រែន។
លោក Stoltenberg មិនបានផ្ដល់អនុសាសន៍ឱ្យ អ៊ុយក្រែន ទទួលយកប្រការណានោះទេ ដោយនិយាយថា «ភាគីទាំងឡាយត្រូវចំណាយខ្ពស់បំផុតទើបលើកឡើងនូវការសម្រេចចិត្តបែបនោះ» ខណៈដែល ណាតូ និង បស្ចិមលោក កំពុងបន្តផ្ដល់អាវុធឱ្យ អ៊ុយក្រែន ដើម្បី «មានប្រៀប» ក្នុងការចរចារកកិច្ចព្រមព្រៀង។
អគ្គលេខាធិការណាតូ លើកជាឧទាហរណ៍របស់ ហ្វាំងឡង់ ដែលជាប្រទេសធ្លាប់ធ្វើសម្បទានតំបន់ Karelia ទៅឱ្យ សូវៀត ដើម្បីជាផ្នែកមួយនៃកិច្ចព្រមព្រៀងសន្តិភាពក្នុងសង្គ្រាមលោកលើកទីពីរ ដោយយល់ថា នេះគឺជា «មូលហេតុមួយដែលជួយឱ្យ ហ្វាំងឡង់ ឈានជើងចេញផុតពីសង្គ្រាម ក្នុងនាមជាប្រទេសដែលមានឯករាជ្យ និងអធិបតេយ្យភាពទឹកដី»។
ប្រកាសរបស់លោក Stoltenberg ត្រូវបានលើកឡើងនៅក្នុងគ្រាដែលមានមតិកាន់តែច្រើនយល់ថា លោកខាងលិច នឹងដាក់សម្ពាធឱ្យ អ៊ុយក្រែន ទទួលយកការចរចារកសន្តិភាពជាមួយ រុស្ស៊ី។ នៅក្នុងពេលដែល សហរដ្ឋអាម៉េរិក និង អង់គ្លេស អះអាងជាសាធារណៈថា «អ៊ុយក្រែន អាចនឹងឈ្នះ» នៅក្នុងសង្គ្រាមជាមួយ រុស្ស៊ី CNN បែរជាចេញផ្សាយថា ក្រុមមន្ត្រីនៅ វ៉ាស៊ីងតោន, ទីក្រុងឡុងដ៍ និង ព្រុចសែល កំពុងប្រជុំបន្ទាន់ដើម្បីពិភាក្សាអំពីបទបញ្ជាឈប់បាញ់ និងកិច្ចព្រមព្រៀងសន្តិភាពដោយមិនមានតំណាងរបស់ ទីក្រុងកៀវ។
ប្រធានាធិបតីអ៊ុយក្រែន វ៉ូឡូឌីមៀ ហ្សេឡែនស្គី ក៏បានថ្លែងថា ភាគីខ្លះកំពុងព្យាយាម «ជំរុញពួកយើង» ឱ្យបង្កើតកិច្ចព្រមព្រៀង នៅពេលសាធារណជននៅក្នុងបណ្ដាប្រទេសបស្ចិមលោកដែលគាំទ្រ អ៊ុយក្រែន កាន់តែហត់នឿយនឹងសង្គ្រាម។
ប្រធានាធិបតីបារាំង លោក ម៉ាក្រុង បានបដិសេធការជំរុញឱ្យលោក ហ្សេឡែនស្គី បោះបោះទឹកដីមួយផ្នែកដើម្បីប្ដូរយកសន្តិភាព ដែលជាគំនិតរបស់អតីត រដ្ឋមន្ត្រីការបរទេសអាម៉េរិក Henry Kissinger ដែលបានលើកឡើងកាលពីខែកន្លង។ យោងតាមលោក Kissinger ប្រទេសអ៊ុយក្រែន គួរតែទទួលយកការវិលទៅរក «ស្ថានការណ៍មុនសង្គ្រាម» ពោលគឺ អ៊ុយក្រែន ត្រូវបោះបង់ការប្រកាសបូរណភាពទឹកដីចំពោះ ឧបទ្វីប Crimea, តំបន់ Donetsk និង Lugansk។
រុស្ស៊ី បានរឹបអូសយក Crimea តាមរយៈការធ្វើប្រជាមតិកាលពីឆ្នាំ ២០១៤ ខណៈដែល បណ្ដាតំបន់ដែលប្រកាសឯករាជ្យជាឯកតោភាគីនៅភាគខាងកើតនៃ ប្រទេសអ៊ុយក្រែន (Donetsk និង Lugansk) ក៏ទទួលបានការគាំទ្រពី ទីក្រុងមូស្គូ មុនពេល កងទ័ពរុស្ស៊ី បើកយុទ្ធនាការយោធានៅ អ៊ុយក្រែន។
លោក ហ្សេឡែនស្គី ធ្លាប់បានផ្លាស់ប្ដូរគោលជំហរមួយចំនួនស្ដីពីកិច្ចព្រមព្រៀងសន្តិភាពជាមួយរុស្ស៊ី។ ក្រោយការប្រកាសថា ត្រៀមខ្លួនរួចរាល់សម្រាប់ចូលរួមកិច្ចចរចាកាលពីចុងខែកន្លង លោក ហ្សេឡែនស្គី ក៏អះអាងថា «នឹងមិនមានការផ្លាស់ប្ដូរអ្វីទាំងអស់ សម្រាប់ ទង់ជាតិអ៊ុយក្រែន» ដែលបក់នៅលើទឹកដី Donbass៕
