សឿន សំណាង - La Reine Media

សហរដ្ឋអាម៉េរិក សម្រួលនីតិវិធីសុំទិដ្ឋាការពិសេស សម្រាប់ ជនជាតិអាហ្វហ្គានីស្ថាន

ចាប់ពីសប្ដាហ៍នេះ ជនជាតិអាហ្វហ្គានីស្ថាន ដែលសុំទិដ្ឋាការនឹងមិនត្រូវតម្រូវឱ្យបំពេញឯកសារទៅតាមទម្រង់ដោយឡែក ដើម្បីឱ្យពួកគេទទួលបានគោលនយោបាយពិសេសក្នុងការចូលទៅកាន់ទឹកដីរបស់ សហរដ្ឋអាម៉េរិក។

ក្រសួងសន្តិសុខមាតុភូមិអាមេរិក ថ្ងៃទី ១៩ កក្កដានេះ បានឱ្យដឹងថា អាជ្ញាធរប្រទេសនេះនឹងសម្រួលនីតិវិធីសុំទិដ្ឋាការ (វីសា) ពិសេសសម្រាប់ ជនជាតិអាហ្វហ្គានីស្ថាន ក្នុងនោះ អ្នកស្នើសុំទិដ្ឋាការគ្រាន់តែបំពេញ និងដាក់ពាក្យទៅតាមទម្រង់ឯកសារតែមួយគត់។

ក្នុងសេចក្ដីប្រកាសរួមមួយ រដ្ឋមន្ត្រីការបរទេសអាម៉េរិក Antony Blinken និង រដ្ឋមន្ត្រីសន្តិសុខមាតុភូមិអាម៉េរិក Alejandro Mayorkas ឱ្យដឹងថា ចាប់ពីសប្ដាហ៍នេះ ជនជាតិអាហ្វហ្គានីស្ថាន ដែលសុំទិដ្ឋាការនឹងមិនត្រូវតម្រូវឱ្យបំពេញឯកសារទៅតាមទម្រង់ដោយឡែកដូចមុនទៀតឡើយ។ នេះគឺជាគោលការណ៍ពិសេសដែលពួកគេទទួលបានក្នុងការចូលទៅកាន់ សហរដ្ឋអាម៉េរិក ក្រោយពីរបបប្រជាធិបតេយ្យនៅ អាហ្វហ្គានីស្ថាន បានដួលរលំ និងជំនួសដោយ របបតាលីបង់ ដែលប្រកាន់តឹង។

ការសម្រួលនីតិវិធីសុំទិដ្ឋាការនេះ នឹងជួយបង្កើនប្រសិទ្ធភាពក្នុងការកាត់បន្ថយឧបសគ្គ និងពន្លឿនដំណើរការនៃការផ្ដល់ទិដ្ឋាកា ជូន ជនជាតិអាហ្វហ្គានីស្ថាន ដែលភាគច្រើនចង់ចាកចេញពី របបតាលីបង់ សព្វថ្ងៃ៕

July 19, 2022

ការសាងសង់ផ្លូវល្បឿនលឿនដំបូងគេរបស់ កម្ពុជា សម្រេចបាន ៩៥ ភាគរយហើយ

(ភ្នំពេញ)-ផ្លូវល្បឿនលឿន ភ្នំពេញ-ព្រះសីហនុ គ្រោងនឹងត្រូវដាក់ឱ្យប្រើប្រាស់ចាប់ពីថ្ងៃទី ១ ខែតុលា ឆ្នាំ ២០២២ ដោយមិនតម្រូវឱ្យបង់ប្រាក់ក្នុងការធ្វើដំណើររយៈពេលពេញមួយខែ នេះបើតាម រដ្ឋមន្ត្រីក្រសួងសាធារណការ និងដឹកជញ្ជូន។

ក្នុងដំណើរត្រួតពិនិត្យវឌ្ឍនភាពនៃការសាងសង់ផ្លូវល្បឿនលឿន ភ្នំពេញ-ព្រះសីហនុ នៅថ្ងៃទី ១៩ ខែកក្កដា ឆ្នាំ ២០២២ ឯកឧត្តម ស៊ុន ចាន់ថុល ទេសរដ្ឋមន្ត្រី និងជា រដ្ឋមន្ត្រីក្រសួងសាធារណការ និងដឹកជញ្ជូន បានឱ្យបញ្ជាក់ថា ការសាងសង់ផ្លូវនេះសម្រេចបាន ៩៥% ហើយគ្រោងនឹងត្រូវដាក់ឱ្យប្រើប្រាស់ចាប់ពីថ្ងៃទី ១ ខែតុលា ឆ្នាំ ២០២២ ដោយមិនតម្រូវឱ្យបង់ប្រាក់ក្នុងការធ្វើដំណើររយៈពេលមួយខែ។

ផ្លូវល្បឿនលឿន ភ្នំពេញ-ព្រះសីហនុ ត្រូវបានបើកការដ្ឋានសាងសង់កាលពីថ្ងៃទី ២២ ខែមីនា ឆ្នាំ ២០១៩ ដោយមានទុនវិនិយោគរបស់ក្រុមហ៊ុនសាជីវកម្មស្ពាន និងថ្នល់ចិន (CRBC) ពី ប្រទេសចិន តាមរយៈក្រុមហ៊ុន Cambodian PPSHV Expressway Co.,Ltd ប្រមាណ ២,០០០ លានដុល្លារអាមេរិក និងហិរញ្ញប្បទានឥតសំណងពី រដ្ឋាភិបាលចិន ប្រមាណ ១៥០ លានដុល្លារ។

គម្រោងផ្លូវល្បឿនលឿននេះ មានប្រវែងសរុបជាង ១៩០ គីឡូម៉ែត្រ ក្នុងនោះវាមានទទឹងតួផ្លូវ ២៤.៥ ម៉ែត្រ និងក្រាលបេតុងកៅស៊ូ (AC) កម្រាស់ ១០ សង់ទីម៉ែត្រ។ គន្លងផ្លូវធ្វើចរាចរណ៍ចែកជា ៤ គន្លង (២ គន្លងទៅ ២គន្លងមក)។ ផ្លូវនេះអនុញ្ញាតឱ្យយានយន្តគ្រប់ប្រភេទ អាចបើកបរក្នុងល្បឿនរហូតដល់ ១០០ គីឡូម៉ែត្រ/ម៉ោង និងកន្លែងខ្លះអាចបើកបរ ក្នុងល្បឿនដល់ ១២០ គីឡូម៉ែត្រ/ម៉ោង។

ផ្លូវល្បឿនលឿន ភ្នំពេញ-ព្រះសីហនុ មានស្ពានតូចចំនួន ៥ កន្លែង, ស្ពានធំ និងស្ពានមធ្យមចំនួន ៨០ កន្លែង។ ផ្លូវនេះក៏មានស្ពានរំលងផ្លូវចំនួន ២០ កន្លែង, ចំណតឈប់សម្រាកចំនួន ៣ កន្លែង, ចំណតរថយន្តចំនួន ១កន្លែង, មណ្ឌលប្រតិបត្តិការ និងថែទាំផ្លូវចំនួន ៤ កន្លែង និងបញ្ជរបង់ប្រាក់ចំនួន ៩ កន្លែង៕

July 19, 2022

គ្រឿងអលង្ការតម្លៃរយលានដុល្លារត្រូវគេប្លន់យកយ៉ាងសម្ងាត់ ក្រោយពិធីតាំងពិព័រណ៍បានបញ្ចប់

(សហរដ្ឋអាម៉េរិក)-គ្រឿងអលង្ការ និងត្បូងមានតម្លៃខ្ទង់រយលានដុល្លារអាម៉េរិក ដែលជាកម្មសិទ្ធិរបស់បណ្ដាក្រុមហ៊ុនចូលរួមដាក់តាំងបង្ហាញក្នុងព្រឹត្តិការណ៍តាំងពិព័រណ៍លក់រាយ California កាលពីពេលថ្មី ៗនេះ ត្រូវបានចោរលួចយកទៅបាត់ នៅពេលកំពុងដឹកក្នុងរថយន្តមួយគ្រឿងឆ្ពោះទៅទិសខាងជើងដើម្បីទៅកាន់ Los Angeles។

ករណីលួចនេះបានកើតឡើងនៅព្រឹកព្រលឹម ថ្ងៃទី ១១ កក្កដា ក្នុងទីក្រុង Frazier Park នៅពេលរថយន្តឯកទេសរបស់ Brink Co’s ដែលដឹកគ្រឿងអលង្ការ និងត្បូងមានតម្លៃទាំងនេះ ទៅកាន់ឃ្លាំងមួយកន្លែង។

អ្នកស្រី Brandy Swanson ប្រធានក្រុមហ៊ុន International Gem & Jewelry Show ដែលជំនាញក្នុងការរៀបចំពិធីតាំងពិព័រណ៍លក់រាយនៅ សហរដ្ឋអាម៉េរិក បានឱ្យដឹងថា គ្រឿងអលង្ការ និងត្បូងប្រហែលពី ២៥ ទៅ ២០ ប្រអប់ របស់ ១៨ ក្រុមហ៊ុន ដែលបានចូលរួមដាក់តាំងក្នុងពិព័រណ៍នៅ San Mateo ភាគខាងត្បូងនៃទីក្រុង San Francisco ត្រូវបានគេលួចយកទៅបាត់ស្រមោល។ វត្ថុមានតម្លៃទាំងនេះត្រូវបានដឹកទៅកាន់ឃ្លាំងមួយ មុនពេលបន្តនាំយកទៅទីតាំងពិព័រណ៍មួយកន្លែងផ្សេងទៀតនៅ Pasadena។

រថយន្តមួយគ្រឿងរបស់ក្រុមហ៊ុនសន្តិសុខ Brinks

យោងតាមប្រកាសរបស់ Brink វត្ថុមានតម្លៃដែលត្រូវគេលួចនេះ មានតម្លៃមិនដល់ ១០ លានដុល្លារ ប៉ុន្តែ អ្នកស្រី Swason បានកំណត់តម្លៃជិត ១០០ លានដុល្លារ។ បច្ចុប្បន្ន ភាគីខាងក្រុមហ៊ុនការពារសន្តិសុខ មិនទាន់មានប្រតិកម្មអ្វីនៅឡើយ ទាក់ទិននឹងហេតុការណ៍នេះ។

ទាក់ទងនឹងប្រកាសរបស់ Brink អ្នកស្រី Swason បកស្រាយថា ក្រុមហ៊ុនមួយចំនួនដែលបានចូលរួមតាំងពិព័រណ៍ តែងតែមានចេតនាប្រកាសតម្លៃទាបជាងធៀបនឹងជាក់ស្ដែងដើម្បីកាត់បន្ថយការចំណាយលើថ្លៃធានារ៉ាប់រង។

បច្ចុប្បន្ន សមត្ថកិច្ចមិនទាន់ដឹងច្បាស់ថា ក្រុមចោរបានចូលគ្រប់គ្រងរថយន្តដឹកគ្រឿងអលង្ការនេះបានដោយវិធីណា ហើយក៏មិនដឹងថា ក្នុងរថយន្តនេះមានកាមេរ៉ា ឬប្រព័ន្ធកំណត់ តាមដានទិសដៅដែរ ឬយ៉ាងណានៅឡើយ៕

July 19, 2022

ស្ថានភាពជំងឺកូវីដ-១៩ នៅ កម្ពុជា គិតត្រឹមវេលាទៀបភ្លឺ ថ្ងៃទី ១៩ ខែកក្កដា ២០២២

កម្ពុជា រកឃើញអ្នកឆ្លងកូវីដ-១៩ ករណីថ្មី ចំនួន ២២ នាក់ទៀត ក្នុងអំឡុង ២៤ ម៉ោងនៃថ្ងៃទី ១៨ ខែកក្កដា ២០២២ ដែលទាំងនេះសុទ្ធតែជាករណីឆ្លងក្នុងសហគមន៍។

ក្នុងអំឡុងពេលដដែល ក៏មានអ្នកជំងឺកូវីដ-១៩ ចំនួន ១៧ នាក់ទៀត បានជាសះស្បើយ និងមិនមានករណីស្លាប់ថ្មីដោយសារជំងឺនេះនៅឡើយ។

គិតមកទល់ពេលនេះ កម្ពុជា មានករណីឆ្លងសរុបចំនួន ១៣៦,៤៩៩ នាក់, ករណីជាសះស្បើយចំនួន ១៣៣,៣១៩ នាក់ និងករណីស្លាប់សរុបចំនួន ៣,០៥៦ នាក់។

July 19, 2022

ការព្យាករ «ដ៏គួរឱ្យភ្ញាក់ផ្អើល» ៖ តម្លៃប្រាក់អឺរ៉ូ ជិតចុះទាបជាងប្រាក់ដុល្លារអាម៉េរិក

ការព្រួយបារម្ភអំពីវិបត្តិសេដ្ឋកិច្ចសកល និងហានិភ័យនានាដែលកើនឡើងកាន់តែខ្ពស់នៅ ទ្វីបអឺរ៉ុប កំពុងតែរុញរូបិយប័ណ្ណដុល្លារអាម៉េរិក ឱ្យឡើងខ្ពស់ ហើយបើយោងតាមក្រុមអ្នកជំនាញនៅ Wall Street ប្រាក់ដុល្លារអាម៉េរិក នឹងមានតម្លៃខ្ពស់ជាងប្រាក់អឺរ៉ូ ក្នុងពេលឆាប់ៗនេះ។

បន្ទាប់ពីមានការឡើងថ្លៃខ្ពស់បំផុតកាលពីពាក់កណ្ដាលដើមឆ្នាំ ក្នុងអំឡុងជាង ១ ទសវត្សរ៍កន្លង ប្រាក់ដុល្លារអាម៉េរិក កំពុងត្រូវបានទិញចូលច្រើនពីសំណាក់ក្រុមអ្នកវិនិយោគ ដោយពួកគេចាត់ទុកថា រូបិយប័ណ្ណដុល្លារអាម៉េរិក គឺជា «រូងលាក់ខ្លួនដ៏មានសុវត្ថិភាព» ដើម្បីគេចពីផលប៉ះពាល់ដែលកើតពីការដាំក្បាលចុះរបស់ទីផ្សារភាគហ៊ុន។ ក្រៅពីនេះ ការដែលទីផ្សាររំពឹងលើលទ្ធភាពងើបឡើងវិញរបស់សេដ្ឋកិច្ចនៅ សហរដ្ឋអាម៉េរិក ក៏បាន និងកំពុងជួយជាកម្លាំងដល់ ប្រាក់ដុល្លារអាម៉េរិក ផងដែរ។

សន្ទស្សន៍ WSJ Dollar (សន្ទស្សន៍តាមដានការវិវត្តរបស់ប្រាក់ដុល្លារអាម៉េរិក ធៀបនឹងបណ្ដុំនៃរូបិយប័ណ្ណចំនួន ១៦ ផ្សេងទៀត) បានឡើងខ្ពស់បំផុតក្នុងអំឡុង ២០ ឆ្នាំ កាលពីសប្ដាហ៍កន្លង និងកើន ២.៥% ក្នុងខែនេះ។ អត្រាប្ដូរប្រាក់ដុល្លារអាម៉េរិក/ប្រាក់អឺរ៉ូ ក៏ឡើងដល់ចំណុចខ្ពស់បំផុតរាប់ចាប់ពីឆ្នាំ ២០០២។

ក្រុមអ្នកវិភាគនៅ Wall Street បានព្យាករថា រូបិយប័ណ្ណដុល្លារអាម៉េរិក នឹងឡើងថ្លៃជាបន្តទៀត ក្នុងគ្រាដែលហានិភ័យនៃវិបត្តិសេដ្ឋកិច្ចសកលកាន់តែឡើងខ្ពស់។ អ្នកជំនាញរបស់ Morgan Stanley បានព្យាករថា ប្រាក់ដុល្លារអាម៉េរិក នឹងឡើងខ្ពស់ ហើយ ប្រាក់អឺរ៉ូ នឹងត្រូវបានជួញដូរក្នុងតម្លៃត្រឹម ៩៧ សេននៃរូបិយប័ណ្ណដុល្លារអាម៉េរិក នៅចុងខែកញ្ញាខាងមុខ។

ការឡើងថ្លៃរបស់ ប្រាក់ដុល្លារអាម៉េរិក គឺជា «កាំបិតមុខពីរ» ចំពោះអ្នកប្រើប្រាស់ និងអ្នកជំនួញនៅ សហរដ្ឋអាម៉េរិក។ ប្រាក់ដុល្លារថ្លៃជាងប្រាក់អឺរ៉ូ នឹងជួយជំរុញសកម្មភាពទិញដូរក្នុងប្រទេស ប៉ុន្តែវាក៏ប៉ះពាល់ដល់ប្រាក់ចំណូលរបស់បណ្ដាក្រុមហ៊ុនពហុជាតិ។

ប្រាក់ដុល្លារឡើងថ្លៃ ក៏ជះឥទ្ធិពលមិនល្អដល់មុខទំនិញនានា ព្រោះថា មុខទំនិញទាំងនោះតែងត្រូវបានកំណត់តម្លៃជាប្រាក់ដុល្លារអាម៉េរិក។ ប្រការនេះប៉ះពាល់ដល់បណ្ដាទីផ្សារដែលទើបលេចធ្លោ និងកំពុងជំពាក់បំណុលដែលកំណត់តម្លៃដោយប្រាក់ដុល្លារអាម៉េរិក៕

July 19, 2022

សហភាពអឺរ៉ុប អនុម័តកញ្ចប់ទណ្ឌកម្មទី៧ ប្រឆាំងនឹង សហព័ន្ធរុស្ស៊ី

កាលពីថ្ងៃទី ១៨ កក្កដា ក្នុងសន្និបាតរដ្ឋមន្ត្រីការបរទេសរបស់ សហភាពអឺរ៉ុប (EU) ក្រុមមន្ត្រីតំណាងប្រទេសនានា បានឯកភាពគ្នាលើកញ្ចប់ទណ្ឌកម្មទី ៧ ដើម្បីប្រឆាំងនឹង រុស្ស៊ី ក្នុងនោះមានទាំងវិធានការទណ្ឌកម្មសំដៅលើអង្គការ និងបុគ្គលជាច្រើនបន្ថែមទៀតរបស់ រុស្ស៊ី ក៏ដូចជាការហាមនាំចូលមាសពីប្រទេសនេះផងដែរ។

រដ្ឋមន្ត្រីក្រសួងការបរទេសឆែក ដែលជាប្រធានប្ដូរវេនរបស់ EU បានឱ្យដឹងថា សហភាពអឺរ៉ុប ត្រូវការកំណត់ឡើងវិញនូវទំនាក់ទំនងជាមួយ ទីក្រុងមូស្គូ បន្ទាប់ពីមានសង្គ្រាមនៅ អ៊ុយក្រែន។ យោងតាមរដ្ឋមន្ត្រី Lipavsky នៅចំពោះមុខសកម្មភាពថ្មីៗនេះរបស់ រុស្ស៊ី បណ្ដាគោលការណ៍ និងវិធីប្រព្រឹត្តរបស់ EU ចំពោះ រុស្ស៊ី ទៅតាមមូលដ្ឋានចាស់ គឺលែងត្រូវបានអនុវត្តទៀតហើយ។ សហភាពអឺរ៉ុប ត្រូវការពិនិត្យយុទ្ធសាស្ត្រយូរអង្វែង នៅក្នុងការទប់ទល់នឹង ទីក្រុងមូស្គូ។

នៅក្នុងកិច្ចប្រជុំ វិធានការដាក់ទណ្ឌកម្មថ្មីចំពោះ រុស្ស៊ី ជាមូលដ្ឋាន ត្រូវបានធ្វើបច្ចុប្បន្នភាពទៅតាមគោលការណ៍មុននោះ និងពុំមានការរឹតបន្តឹងណាមួយទាក់ទិននឹងបញ្ហានាំចូលថាមពល។

រដ្ឋមន្ត្រីការបរទេសហុងគ្រី Szijjarto យល់ថា កញ្ចប់ទណ្ឌកម្មថ្មីមិនរួមបញ្ចូលទណ្ឌកម្មដែលទាក់ទិននឹងបណ្ដាធនាគារ Gazprombank របស់ រុស្ស៊ី។ ប៉ុន្តែ មានការកែប្រែមួយចំនួន ដូចជា ការហាមនាំចូលមាសពី ប្រទេសរុស្ស៊ី និងការរឹតត្បិតលើការជួញដូរផលិតផលដែលត្រូវបានប្រើប្រាស់ក្នុងវិស័យឧស្សាហកម្មយោធា និងការពារជាតិ។ល។

កញ្ចប់ទណ្ឌកម្មថ្មីនេះក៏បានបន្ថែមបុគ្គលចំនួន ៤៨ នាក់ និងអង្គការឯកជនចំនួន ៩ ស្ថាប័នរបស់ រុស្ស៊ី ទៅក្នុងបញ្ជីទណ្ឌកម្មចាស់ ក្នុងនោះក៏មាន ឧបនាយករដ្ឋមន្ត្រីម្នាក់របស់ រុស្ស៊ី និងមេដឹកនាំនយោបាយជាច្រើនរូបផ្សេងទៀត។

ជាងនេះ EU ក៏បានអនុម័តលើការសម្រេចចិត្តបែងចែកថវិកា ៥០០ លានអឺរ៉ូ ពីមូលនិធិសន្តិភាព សម្រាប់ជួយដល់ អ៊ុយក្រែន ដើម្បីបង្កើនសមត្ថភាពការពារប្រទេសជាតិ នៅក្នុងសង្គ្រាមបច្ចុប្បន្ន៕

July 19, 2022

ព្រៃឈើជាង ១៧,០០០ ហិកតា ត្រូវភ្លើងឆេះខ្ទេច ខណៈពលរដ្ឋរាប់ម៉ឺននាក់ត្រូវភៀសខ្លួន ព្រោះមេឃក្ដៅខ្លាំង

ប្រទេសបារាំង កាលពីថ្ងៃទី ១៨ កក្កដា បានឆ្លងកាត់រលកកម្ដៅកម្រិតខ្ពស់ នៅពេលសីតុណ្ហភាពនៅតំបន់ខ្លះឡើងដល់ជាង ៤០ អង្សាសេ ទន្ទឹមនឹងបញ្ហាភ្លើងឆេះព្រៃនៅភាគនិរតីនៅតែបន្តរាលដាល ធ្វើឱ្យព្រៃជាង ១៧,០០០ ហិកតាត្រូវឆេះខ្ទេច និងបង្ខំឱ្យប្រជាជនជាង ៣២,០០០ នាក់ ត្រូវភៀសខ្លួនជាបន្ទាន់។

យោងតាមប្រភពព័ត៌មានពី ប្រទេសបារាំង ក្នុងថ្ងៃទី ១៨ កក្កដា សីតុណ្ហភាពឡើងដល់ជាង ៤០ អង្សាសេ បានកើតឡើងនៅតាមបណ្ដោយឆ្នេរសមុទ្រភាគខាងលិច ជាប់នឹងមហាសមុទ្រអាត្លង់ទិករបស់ បារាំង ដែលអូសបន្លាយពីភាគពាយព្យ ចុះមកភាគនិរតី ក្នុងនោះ សីតុណ្ហភាពនៅទីក្រុង Nantes ឡើងដល់ ៤២ អង្សាសេ និងតំបន់ Biscarrosse ឡើងដល់ ៤២.៦ អង្សាសេ។ សីតុណ្ហភាពក្បែរ ៤០ អង្សាសេក៏ត្រូវបានកត់ត្រានៅក្នុងទីក្រុងរាប់សិបផ្សេងទៀតក្នុងតំបន់ Bretagne និងនៅ រដ្ឋធានីប៉ារីស ផងដែរ។

ក្នុងថ្ងៃនេះ (១៩ កក្កដា) កម្ដៅខ្ពស់នឹងបន្តកើតមាននៅ ប្រទេសបារាំង ប៉ុន្តែ វាផ្លាស់ទីបន្តិចម្ដងៗទៅកាន់បណ្ដាខេត្តនៅភាគខាងកើត។ ចំណែក ទីក្រុងប៉ារីស ថ្ងៃនេះ សីតុណ្ហភាពអាចឡើងដល់ ៤១ អង្សាសេ។

អាកាសធាតុក្ដៅខ្លាំង ធ្វើឱ្យភ្លើងព្រៃដែលកំពុងឆេះ កាន់តែមានសភាពធ្ងន់ធ្ងរ។ ក្នុងខេត្ត Gironde នៅភាគនិរតី ភ្លើងព្រៃបានដុតបំផ្លាញព្រៃឈើអស់ជាង ១៧,០០០ ហិកតា និងបានបណ្ដាលឱ្យប្រជាជន ក៏ដូចជាទេសចរជាង ១៦,០០០ នាក់ទៀត ត្រូវភៀសខ្លួន។ រាប់ចាប់ពីថ្ងៃទី ១២ កក្កដា មានប្រជាជនជាង ៣២,០០០ នាក់ បានរត់ចោលផ្ទះ និងទីតាំងបោះតង់លម្ហែកាយ។

ក្រុមមន្ត្រីបារាំង បានបញ្ជូនកម្លាំងជិត ២,០០០ នាក់ និងប្រើប្រាស់យន្តហោះពន្លត់អគ្គិភ័យស្ទើរតែទាំងអស់ដើម្បីចូលរួមពន្លត់ភ្លើងព្រៃ ប៉ុន្តែ មិនទាន់គ្រប់គ្រងស្ថានការណ៍បាននៅឡើយ៕

July 19, 2022

WHO ប្រកាសអំពីរលកនៃ «ការផ្ទុះឆ្លងវីរុសថ្មីស្រដៀងអេបូឡា (Ebola)»

អង្គការសុខភាពពិភពលោក (WHO) កំពុងព្រមានអំពីការផ្ទុះឆ្លងរាលដាលនៃ វីរុសម៉ាប៊ឺក (Marburg) ក្រោយពី ហ្កាណា (Ghana) រកឃើញករណីស្លាប់ដំបូងៗដោយសារវីរុសនេះ។

នេះគឺជាលើកដំបូងដែលវីរុសមួយប្រភេទដូចទៅនឹង វីរុសអេបូឡា (EBOV/Ebola) ត្រូវបានរកឃើញក្នុងប្រទេសនៅ អាហ្វ្រិកខាងលិច និងជាលើកទីពីរដែលវាបង្ហាញខ្លួនក្នុងតំបន់នេះ។

ក្នុងឯកសារមួយដែលត្រូវបានប្រកាសកាលពីថ្ងៃទី ១៧ កក្កដា WHO បានឱ្យដឹងថា ការវិភាគសំណាកដែលបានពីអ្នកជំងឺ ២ រូបដែលស្លាប់នៅតំបន់ Ashanti ភាគខាងត្បូងប្រទេសហ្កាណា បង្ហាញថា វិជ្ជមាននឹងវីរុស ម៉ាប៊ឺក។ អ្នកជំងឺទាំង ២ នាក់នេះសុទ្ធតែមានរោគសញ្ញាដូចជា រាក ក្ដៅខ្លួន ក្អួតចង្អោរ ហើយក៏ស្លាប់ មួយថ្ងៃបន្ទាប់ពីបានចូលព្យាបាលនៅមន្ទីរពេទ្យកាលពីចុងខែមិថុនា។ ក្នុងចំណោមអ្នកជំងឺខាងលើ ម្នាក់មានអាយុ ៥១ ឆ្នាំ និងម្នាក់ទៀតមានអាយុ ២៦ ឆ្នាំ។

បច្ចុប្បន្ន មនុស្សយ៉ាងហោច ៩០ នាក់ដែលប៉ះពាល់ផ្ទាល់ជាមួយអ្នកជំងឺខាងលើ ត្រូវបានកំណត់អត្តសញ្ញាណរួចហើយ និងកំពុងស្ថិតក្នុងការតាមដានរបស់ក្រុមមន្ត្រីសុខាភិបាលក្នុងស្រុក និង WHO។ WHO ក៏កំពុងជួយដល់ ហ្កាណា ក្នុងការទប់ស្កាត់ការឆ្លងរាលដាលរបស់វីរុសនេះ។

វីរុសម៉ាប៊ឺក ត្រូវបាន WHO បរិយាយថាជាជំងឺគ្រុនឈាមមួយប្រភេទកើតឡើងដោយសារវីរុសដែលមានសមត្ថភាពឆ្លងរាលដាលខ្ពស់ដូចទៅនឹងវីរុស EBOV ដែលបង្កជំងឺអេបូឡា។ វីរុសម៉ាប៊ឺក អាចឆ្លងពីសត្វមកមនុស្ស តាមរយៈការប៉ះពាល់ធាតុរាវរបស់រាងកាយសត្វ និងឆ្លងរាលដាលពីមនុស្សទៅមនុស្ស។

អ្នកឆ្លងជំងឺនេះនឹងធ្លាក់ខ្លួនឈឺភ្លាមៗ ដោយមានអាការរោគ ក្ដីខ្លួនខ្លាំង ឈឺក្បាលខ្លាំង និងពិបាកក្នុងខ្លួន។ អ្នកជំងឺអាចមានរោគសញ្ញាចេញឈាមក្នុងរង្វង់ ៧ ថ្ងៃបន្ទាប់ពីបានឆ្លងវីរុសម៉ាប៊ឺក។

ស្ថាប័នសុខាភិបាលរបស់ ហ្កាណា បានណែនាំថា «ប្រជាជនគួរតែចៀសវាងល្អាងដែលមានសត្វប្រចៀវរស់នៅ ហើយត្រូវចម្អិតសាច់ឱ្យបានឆ្អិតល្អមុនពេលបរិភោគ»។

អត្រានៃការស្លាប់ដោយសារឆ្លងវីរុសម៉ាប៊ឺក គឺចាប់ពី ២៤% ដល់ ៨៨% អាស្រ័យទៅលើប្រភេទវីរុស នៅក្នុងការផ្ទុះឆ្លងរាលដាលមុននោះ ប៉ុន្តែ បច្ចុប្បន្នពុំទាន់មានវ៉ាក់សាំង ឬវិធីព្យាបាលផ្លូវការណាមួយសម្រាប់ជំងឺនេះនៅឡើយ។

យោងតាម WHO ការផ្ទុះឆ្លងរាលដាលដំបូងនៃវីរុសម៉ាប៊ឺក ត្រូវបានរកឃើញនៅក្នុង ប្រទេសអាល្លឺម៉ង់ កាលពីឆ្នាំ ១៩៦៧។ ចាប់ពីពេលនោះមក ក៏មានការផ្ទុះឆ្លងរាលដាលរប៉េះរប៉ោះដែលត្រូវបានគេរកឃើញនៅ អង់ហ្គោឡា, សាធារណរដ្ឋកុងហ្គោ, កេនយ៉ា, អាហ្វ្រិកខាងត្បូង និង អ៊ូហ្កង់ដា។ ប្រទេសដែលមានអ្នកស្លាប់ច្រើនជាងគេដោយសារវីរុសម៉ាប៊ឺក គឺ ប្រទេសអង់ហ្គោឡា ដោយមានអ្នកស្លាប់ចំនួនជាង ២០០ នាក់ កាលពីឆ្នាំ ២០០៥៕

July 19, 2022

តម្លៃប្រេងនៅ អាស៊ី កើន ក្នុងថ្ងៃទី ១៨ កក្កដា ដោយសារប្រភពផ្គត់ផ្គង់ត្រូវបានរឹតបន្តឹង

ក្នុងការជួញដូរនាថ្ងៃទី ១៨ កក្កដា តម្លៃប្រេងនៅ អាស៊ី មានការកើនឡើង ដោយសារតែ ប្រាក់ដុល្លារអាម៉េរិក ធ្លាក់ថ្លៃ និងប្រភពផ្គត់ផ្គង់ត្រូវបានរឹតបន្តឹង ដែលនេះបានជួយទប់ទល់នឹងក្ដីបារម្ភអំពីឱនភាពសេដ្ឋកិច្ច រួមនឹងលទ្ធភាពនៃការដាក់បម្រាមគោចរទាក់ទិននឹងបញ្ហាកូវីដ-១៩ នៅ ប្រទេសចិន។

នៅវេលាម៉ោងប្រហែល ១៣ និង ៥០ នាទី (នៅ កម្ពុជា) តម្លៃប្រេង Brent ប្រគល់ក្នុងខែកញ្ញា កើន ២.៥៤ ដុល្លារអាម៉េរិក (២.៥%) និងត្រូវបានលក់ក្នុងតម្លៃ ១០៣.៧ ដុល្លារ/ធុង។ ចំណែកប្រេង WTI ប្រគល់ក្នុងខែសីហា ឡើងថ្លៃ ២.៣១ ដុល្លារ (២.៤%) និងលក់ក្នុងតម្លៃ ៩៩.៩០ ដុល្លារ/ធុង។

កាលពីសប្ដាហ៍កន្លង តម្លៃប្រេង Brent និង WTI បានធ្លាក់ថ្លៃមកនៅទាបបំផុតបើគិតតាមសប្ដាហ៍នៅក្នុងអំឡុងប្រហែលមួយខែកន្លង ដោយសារតែការបារម្ភអំពីវិបត្តិសេដ្ឋកិច្ច។ ទន្ទឹមនឹងមូលហេតុខាងលើ ការដែលតំបន់ជាច្រើននៅ ប្រទេសចិន បន្តស្នើឱ្យធ្វើតេស្តកូវីដ-១៩ ក្នុងទ្រង់ទ្រាយធំ ក៏បានបណ្ដាលឱ្យមានក្ដីបារម្ភអំពីតម្រូវការប្រើប្រាស់ប្រេងសាំងថតចុះនៅប្រទេសនេះផងដែរ។

ក៏ប៉ុន្តែ ព្រោះតែប្រភពផ្គត់ផ្គង់នៅតែត្រូវបានរឹតបន្តឹង ដូចនេះ តម្លៃប្រេងក៏មិនអាចបន្តធ្លាក់ថ្លៃ។ ដំណើរទស្សនកិច្ចរបស់ ប្រធានាធិបតីអាម៉េរិក ទៅកាន់ មជ្ឈិមបូព៌ា ពិសេសគឺ អារ៉ាប៊ីសាអូឌីត មិនទទួលបានផ្លែផ្កាអ្វីទាក់ទងនឹងបរិមាណប្រេង។ អង្គការនៃបណ្ដាប្រទេសនាំចេញប្រេង (OPEC) មិនបានសន្យាលើការបង្កើនបរិមាណប្រេង។

July 18, 2022

សៀមរាបឈរលើទីក្រុងសេអ៊ូល ក្នុងបញ្ជីចំណាត់ថ្នាក់ «ទីក្រុងទេសចរណ៍ល្អជាងគេក្នុងពិភពលោក»

ទីក្រុងសៀមរាប របស់ កម្ពុជា ជាប់ចំណាត់ថ្នាក់ទី ១៥ ក្នុងចំណោមទីក្រុងទេសចរណ៍ល្អបំផុតទាំង ២៥ នៅក្នុងពិភពលោក នេះបើតាមទំព័រ Tourist + Leisure ចេញផ្សាយកាលពីសប្តាហ៍កន្លង។

ដោយទទួលបានពិន្ទុ ៨៩.៦៦ ទីក្រុងសៀមរាប បានឈរលើ ទីក្រុងសេអ៊ូល (Seoul) នៃសាធារណរដ្ឋកូរ៉េ (កូរ៉េខាងត្បូង) ដែលទទួលបាន ៨៩.៣១ ពិន្ទុ។ ក្នុងបញ្ជីចំណាត់ថ្នាក់នេះ សៀមរាប ឈរបន្ទាប់ពី ទីក្រុងក្យូតូ របស់ ប្រទេសជប៉ុន (៨៩.៧៧)។

ចំណែកទីក្រុង អូហ្សាកា (Oaxaca) របស់ ប្រទេសម៉ិកស៊ិក វិញ ជាប់ចំណាត់ថ្នាក់លេខ ១ ដោយទទួលបាន ៩២.៩៦ ពិន្ទុ។ ទីក្រុងជួបហ្សាណា (Ljubljana) របស់ ប្រទេសស្លូវេនី ស្ថិតនៅលេខរៀងទី ២៥ ដោយទទួលបាន ៨៨.៤៩ ពិន្ទុ។

នៅប្រទេសជិតខាងរបស់ កម្ពុជា ទីក្រុងឈៀងម៉ៃ របស់ ប្រទេសថៃ ជាប់លេខ ៧ ខណៈ ហាណូយ របស់ វៀតណាម ជាប់លេខ ២០។

ការស្ទង់មតិនៅលើទំព័រ Tourist + Leisure អ្នកបោះឆ្នោតត្រូវបានស្នើឱ្យវាយតម្លៃលើ សណ្ឋាគារ ភោជនីយដ្ឋាន បេតិកភណ្ឌវប្បធម៌ ភាពទាក់ទាញ និងវិធានការការពារជំងឺកូវីដ-១៩ ជាដើម របស់ទីក្រុងទេសចរណ៍នីមួយៗ នៅលើសកលលក៕

July 18, 2022

Author: សឿន សំណាង