នាយករដ្ឋមន្ត្រី Pedro Sanchez ដកស្រង់ស្ថិតិរបស់វិទ្យាស្ថានមួយ បានឱ្យដឹងថា រលកកម្ដៅដ៏ខ្លាំងក្លានៅ អេស្ប៉ាញ ថ្មីៗនេះ បានសម្លាប់មនុស្សជាង ៥០០ នាក់។
តួលេខមនុស្សដែលបានស្លាប់នៅក្នុងរលកកម្ដៅដែលអូសបន្លាយពេល ១០ ថ្ងៃ ត្រូវបាន នាយករដ្ឋមន្ត្រីអេស្ប៉ាញ Pedro Sanchez លើកឡើងកាលពីថ្ងៃទី ២០ កក្កដា ដោយយោងតាមស្ថិតិរបស់វិទ្យាស្ថានសុខាភិបាល Carlos III ដែលបានប្រកាសមុននោះ ២ ថ្ងៃ។
«ខ្ញុំអំពាវនាវដល់ប្រជាជន ឱ្យមានការប្រុងប្រយ័ត្នខ្ពស់» លោក Sanchez ថ្លែងដូច្នេះ និងសង្កត់ធ្ងន់ថា «ស្ថានភាពអាកាសធាតុអាក្រក់ភ្លាមៗគឺជារឿងជាក់ស្ដែង»។
ក៏ប៉ុន្តែ វិទ្យាស្ថានសុខាភិបាល Carlos III ខាងលើ បានបញ្ជាក់ថា តួលេខនោះគ្រាន់តែជាការគណនាដោយផ្អែកលើទិន្នន័យចម្រុះនានា មិនមែនជាតួលេខផ្លូវការ។
អំឡុងពេលពីថ្ងៃទី ៩ ដល់ ១៨ កក្កដា «គឺជារដូវក្ដៅដ៏ខ្លាំងក្លាលើកទីបី បើគិតទៅតាមរង្វង់នៃឥទ្ធិពល និងពេលវេលាដែលអូសបន្លាយ» រាប់ចាប់ពីឆ្នាំ ១៩៧៥ ក្នុងនោះមាននៅក្នុងឆ្នាំនេះម្ដង, ឆ្នាំ ២០១៥ ម្ដង និងឆ្នាំ ២០០៣ ម្ដង។ នេះបើតាមអ្នកនាំពាក្យរបស់ នាយកដ្ឋានឧតុនិយមអេស្ប៉ាញ AEMET Beatriz Hervella។
អេស្ប៉ាញ និងប្រទេសជាច្រើននៅ អឺរ៉ុប ទើបតែបានឆ្លងកាត់រលកកម្ដៅដ៏ខ្លាំងក្លាកាល ធ្វើឱ្យសីតុណ្ហភាពនៅក្នុងតំបន់ខ្លះឡើងដល់ ៤៥ អង្សាសេ កាលពីសប្ដាហ៍កន្លងទៅ បណ្ដាលឱ្យមានហេតុការណ៍ភ្លើងឆេះព្រៃជាច្រើនករណី៕
