សឿន សំណាង - La Reine Media

ជនជាតិឥណ្ឌា មានមោទកភាពចំពោះនាយករដ្ឋមន្ត្រីថ្មីរបស់ ប្រទេសអង់គ្លេស ដែលធ្លាប់ត្រួតត្រាឥណ្ឌា

ជនជាតិឥណ្ឌាជាច្រើន មានការត្រេកអរ និងមានមោទកភាពចំពោះលោក រីស៊ី សុណាក់ (Rishi Sunak) ជាហិណ្ឌូសាសនិក និងជា ជនជាតិអង់គ្លេសដើមកំណើតឥណ្ឌាតំបន់ Punjab ដែលបានក្លាយជា នាយករដ្ឋមន្ត្រីអង់គ្លេស ដែលជាចក្រភពធ្លាប់បានត្រួតត្រាលើ ប្រទេសឥណ្ឌា រាប់រយឆ្នាំ។

«ខ្ញុំពិតជាសប្បាយរីករាយខ្លាំងណាស់។ ចក្រភពអង់គ្លេស ធ្លាប់ត្រួតត្រាលើ ឥណ្ឌា ជាង 300 ឆ្នាំ។ ពេលនេះ ជនជាតិដើមកំណើតឥណ្ឌាម្នាក់ កំពុងគ្រប់គ្រង ប្រទេសអង់គ្លេស» Krishna Kumar បុគ្គលិកផ្នែកបច្ចេកវិទ្យាម្នាក់នៅ ប្រទេសឥណ្ឌា និយាយកាលពីថ្ងៃទី 25 តុលាដូច្នេះ។

លោក រីស៊ី សុណាក់ អាយុ 42 ឆ្នាំ ចាប់កំណើត និងធំឡើងនៅ Southampton គឺជានាយករដ្ឋមន្ត្រីទីបីរបស់ អង់គ្លេស នៅក្នុងឆ្នាំ 2022 នេះ។ ឪពុកម្ដាយរបស់លោក កើតនៅក្នុងសហគមន៍ជនជាតិឥណ្ឌា នៅ អាហ្វ្រិកខាងកើត ដែលមានដូនតានៅ Punjab ភាគខាងជើងប្រទេសឥណ្ឌា។ លោក សុណាក់ បានរៀបការជាមួយ Akshata Murty ដែលជាពលរដ្ឋឥណ្ឌា និងជាកូនស្រីរបស់មហាសេដ្ឋី Narayana Murthy ស្ថាបនិកនៃក្រុមហ៊ុនបច្ចេកវិទ្យា Infosys។

ឥណ្ឌា បានរម្លឹកខួប 75 ឆ្នាំនៃទិវាឯករាជ្យពី ចក្រភពអង់គ្លេស កាលពីខែសីហា ប៉ុន្មានសប្ដាហ៍មុនពេលក្លាយជាខឿនសេដ្ឋកិច្ចធំជាងគេទី 5 ក្នុងពិភពលោក នៅពេល GDP បានឡើងខ្ពស់ជាង អង់គ្លេស។

Basavaraj Bommai អភិបាលរដ្ឋ Karrnataka ភាគខាងត្បូងនៃ ប្រទេសឥណ្ឌា ឱ្យដឹងថា ប្រជាជនដែលធ្លាប់ស្ថិតក្រោមការត្រួតត្រារបស់ ចក្រភពអង់គ្លេស មិននឹកស្មានដល់ថា ជនជាតិដើមកំណើតឥណ្ឌា បានឡើងកាន់អំណាចនៅ អង់គ្លេស។ វាសនាបានកែប្រែទាំងស្រុងហើយ។

«កូនរបស់ ជនជាតិឥណ្ឌាបានងើបឡើង, ប្រវត្តិសាស្ត្រវិលវង់នៅអង់គ្លេស» គឺជាប្រធានបទសំខាន់នៃកម្មវិធីព័ត៌មាននៅលើទូរទស្សន៍ NDTV។

លោក រីស៊ី សុណាក់ និងភរិយា និងមហាក្សត្រអង់គ្លេស Charles ទីបី

លោក រីស៊ី សុណាក់ ឡើងដឹកនាំ ប្រទេសអង់គ្លេស នៅក្នុងគ្រាដែល សមភាគីឥណ្ឌា គឺលោក ណារិនដ្រា ម៉ូឌី កំពុងបង្កើនល្បឿនក្នុងការលុបបំបាត់ស្លាកស្នាមសម័យអាណានិគម។

នាយករដ្ឋមន្ត្រីឥណ្ឌា កាលពីថ្ងៃទី 24 តុលា បានអបអរសាទរនាយករដ្ឋមន្ត្រីថ្មីរបស់ អង់គ្លេស និងមានបំណង «ប្ដូរផ្លាស់ទំនាក់ទំនងជាប្រវត្តិសាស្ត្ររវាងប្រទេសទាំងពីរ ឱ្យទៅជាទំនាក់ទំនងដៃគូទំនើប»។

ទោះជាយ៉ាងណាក៏ដោយ នៅមានមតិខ្លះមិនទាន់ជឿជាក់លើពេលវេលាដែលនាយករដ្ឋមន្ត្រី រីស៊ី សុណាក់ អាចរក្សាបានតំណែងនេះ។ «នេះគឺជានាយករដ្ឋមន្ត្រីទីបីរបស់ អង់គ្លេស ក្នុងមួយឆ្នាំ។ ដូច្នេះ យើងមិនដឹងថា គាត់នឹងកាន់តំណែងនេះបានប៉ុន្មានម៉ោង ប៉ុន្មានថ្ងៃ ឬប៉ុន្មានសប្ដាហ៍ឡើយ»៕

October 26, 2022

ស្ថានភាពជំងឺកូវីដ-19 នៅ កម្ពុជា ប្រកាសនៅក្នុងថ្ងៃទី 26 ខែតុលា 2022

កម្ពុជា បានរកឃើញអ្នកឆ្លងកូវីដ-19 ករណីថ្មី ចំនួន 0 នាក់ ក្នុងអំឡុង 24 ម៉ោង នៃថ្ងៃទី 25 ខែតុលា ឆ្នាំ 2022។

ក្នុងអំឡុងពេលដដែល ក៏មានអ្នកជំងឺកូវីដ-19 ចំនួន 06 នាក់បានជាសះស្បើយ និង មិនមានករណីស្លាប់ថ្មី ដោយសារជំងឺនេះនៅឡើយ។

គិតត្រឹមព្រឹក ថ្ងៃទី 26 ខែតុលា ឆ្នាំ 2022 កម្ពុជា មាន អ្នកឆ្លងកូវីដ-១៩ សរុប ៖ 137,979 នាក់, អ្នកជាសះស្បើយសរុប ៖ 134,914 នាក់ និងអ្នកស្លាប់សរុប ៖ 3,056 នាក់។

October 26, 2022

ក្រសួងការងារប្រកាសអំពីថ្ងៃឈប់សម្រាកក្នុងឱកាសបុណ្យអុំទូក បណ្ដែតប្រទីប និងសំពះព្រះខែ អកអំបុក

ក្រសួងការងារ និងបណ្តុះបណ្តាលវិជ្ជាជីវៈ នាព្រឹកនេះ បានចេញសេចក្ដីជូនដំណឹងមួយស្ដីពីការអនុញ្ញាតឱ្យកម្មករនិយោជិត ឈប់សម្រាកក្នុងឱកាសបុណ្យអុំទូក បណ្ដែតប្រទីប និងសំពះព្រះខែ អកអំបុក ដែលប្រព្រឹត្តទៅនៅក្នុងខែវិច្ឆិកាខាងមុខ។

នៅក្នុងសេចក្ដីជូនដំណឹងនេះ ក្រសួងការងារ និងបណ្តុះបណ្តាលវិជ្ជាជីវៈ បានប្រកាសឱ្យម្ចាស់ឬ នាយករោងចក្រ សហគ្រាស អនុញ្ញាតឱ្យកម្មករនិយោជិតទាំងអស់របស់ខ្លួន ឈប់សម្រាក ដោយមានប្រាក់ឈ្នួល ក្នុងឱកាសព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក រយៈពេល 3 ថ្ងៃ គិតចាប់ពីថ្ងៃទី 7-9 ខែវិច្ឆិកា ឆ្នាំ 2022។

ករណីរោងចក្រ សហគ្រាសដែលត្រូវប្រព្រឹត្តទៅជាប្រចាំ មិនអាចបញ្ឈប់បាន ត្រូវតែរៀបចំឱ្យមានការធ្វើការផ្លាស់ប្ដូរវេន ដោយបុគ្គលិក កម្មករ និយោជិត មានសិទ្ធិទទួលបានប្រាក់បំណាច់បន្ថែម។

ព័ត៌មានលម្អិត សូមអានសេចក្ដីជូនដំណឹងរបស់ ក្រសួងការងារ និងបណ្តុះបណ្តាលវិជ្ជាជីវៈ ខាងក្រោម ៖

October 26, 2022

ចិន អភិវឌ្ឍរថភ្លើងអណ្ដែត (Maglev Levitation) អាច «ហោះ» ក្នុងល្បឿន 1,000 គីឡូម៉ែត្រ/ម៉ោង

ក្រុមអ្នកជំនាញចិន អភិវឌ្ឍប្រព័ន្ធសាកល្បងមួយដែលអាចបង្កើនល្បឿនរបស់រថភ្លើងនៅក្នុងផ្លូវបំពង់ ឡើងដល់ 1,000 គីឡូម៉ែត្រ/ម៉ោង លឿនជាងរថភ្លើងប្រភេទអណ្ដែត (Magnetic levitation transport ឬហៅថា maglev) នាបច្ចុប្បន្ន។

ក្រុមវិស្វករចិន ដែលធ្វើការនៅក្នុងគម្រោងនៅភាគកណ្ដាលប្រទេស បានឱ្យដឹងថា ពួកគេបានឆ្ពោះទៅរកការសាងសង់ប្រព័ន្ធចរាចរណ៍ប្រភេទអណ្ដែត (maglev) នៅក្នុងបំពង់ដែលមានការកកិតកម្រិតទាប និងមានល្បឿនលឿន តាមរយៈការបូកផ្សំរវាងបច្ចេកវិទ្យាផ្លូវដែក និងអវកាសចរណ៍ នេះបើតាំ SCMP ចេញផ្សាយកាលពីថ្ងៃទី 24 តុលា។

ក្រុមវិស្វករមកពីក្រុមហ៊ុនវិទ្យាសាស្ត្រ និងឧស្សាហកម្មអវកាសចរណ៍ចិន (CASIC) សង្ឃឹមថា ពួកគេអាចដំណើរការរថភ្លើងអណ្ដែតនៅក្នុងបំពង់ដែលមានបរិយាកាសស្ដើងបំផុត ដែលនេះមានន័យថា រថភ្លើងនឹង «ហោះលើផ្ទៃដី» ក្នុងល្បឿនស្មើនឹងយន្តហោះ។ បច្ចេកវិទ្យានេះនឹងជួយដោះស្រាយបញ្ហាពីរធំៗនៅក្នុងវិស័យដឹកជញ្ជូនតាមផ្លូវដែក រួមមានការកកិតរវាងកង់រថភ្លើងជាមួយនឹងផ្លូវដែក និងកម្លាំងកកិតរវាងខ្យល់ជាមួយនឹងរថភ្លើង។

ផ្លូវរថភ្លើងអណ្ដែតក្នុងបំពង់ប្រវែង 2 គីឡូម៉ែត្រនៅទីក្រុង Datong ក្នុងខេត្ត Shanxi ប្រទេសចិន យកលំនាំតាមគម្រោង Hyperloop របស់មហាសេដ្ឋីអាម៉េរិក អ៊ីឡុន ម៉ាស។ CASIC ឱ្យដឹងថា ខ្លួនកំពុងកាន់កាប់កម្មសិទ្ធិបញ្ញាចំពោះផ្លូវរថភ្លើងអណ្ដែតនៅ Shanxi នេះ។

ក្រុមហ៊ុន CASIC កំពុងអភិវឌ្ឍផ្លូវរថភ្លើងអណ្ដែតក្នុងបំពង់ នៅទីក្រុង Datong ក្នុងខេត្ត Shanxi ប្រទេសចិន

Zhao Ming ប្រធានផ្នែកបច្ចេកវិទ្យា maglev នៅ CASIC និយាយថា រថភ្លើងអណ្ដែតថ្មីនឹងមានសុវត្ថិភាព និងស្ថិរភាពដូចយន្តហោះ។ យោងតាមលោក Zhao Ming គម្លាតរវាងទីក្រុងធំៗនៅ ប្រទេសចិន ឡើងដល់ជាង 965 គីឡូម៉ែត្រ ដូច្នេះគេត្រូវការមធ្យោបាយដែលអាចធ្វើដំណើរក្នុងល្បឿន 1,000 គីឡូម៉ែត្រ/ម៉ោង។

ក៏ប៉ុន្តែ Lu Fang ដែលជាវិស្វករនៅសាកលវិទ្យាល័យចរាចរណ៍ប៉េកាំង ឱ្យដឹងថា គម្រោងខាងលើមានហានិភ័យច្រើនទាក់ទិននឹងបច្ចេកវិទ្យា មានដូចជា រថភ្លើងអាចឃ្លាតចេញពីផ្លូវដែក ឬដាច់ហ្វ្រាំងជាដើម។ ក្រៅពីនេះ ការចំណាយខ្ពស់ក្នុងការស្ថាបនាហេដ្ឋារចនាសម្ព័ន្ធសម្រាប់រថភ្លើងអណ្ដែតក្នុងបំពង់ល្បឿនលឿននេះ ក៏ជាឧបសគ្គមួយផងដែរ៕

October 26, 2022

អាចម៍ផ្កាយមួយដុំ ប្រវែងជាង 740 គីឡូម៉ែត្រ កំពុងហោះសំដៅមកកាន់ផែនដី

អាចម៍ផ្កាយខ្នាតធំមួយដែលមានអង្កត់ផ្ចិតប្រហែលពី 305 ទៅ 740 ម៉ែត្រ នឹងហោះមកក្បែរផែនដីនៅថ្ងៃទី 01 វិច្ឆិកាខាងមុខ។

អាចម៍ផ្កាយដែលត្រូវបានគេដាក់ឈ្មោះឱ្យថា 2022 RM4 ហោះហើរក្នុងល្បឿន 84,490 គីឡូម៉ែត្រ/ម៉ោង គ្រោងនឹងហោះកាត់ពីមុខផែនដីក្នុងគម្លាត 2.3 លានគីឡូម៉ែត្រ ឆ្ងាយជាងប្រហែល ៦ ដង បើធៀបនឹងគម្លាត 384,472 គីឡូម៉ែត្រ រវាងផែនដី និងព្រះចន្ទ។

បើទោះជាហោះហើរក្បែរផែនដី ប៉ុន្តែ 2022 RM4 នឹងមានលទ្ធភាពតិចតូចណាស់ក្នុងបង្កគ្រោះថ្នាក់ដល់ពិភពលោក។ ក្រុមអ្នកវិទ្យាសាស្ត្រគណនាឃើញថា អាចម៍ផ្កាយនេះនឹងហោះកាត់ពីមុខផែនដីនៅក្នុងខែវិច្ឆិកា 2022។

យោងតាមអ្នកវិទ្យាសាស្ត្រ Gretchen Benedix មកពីសាកលវិទ្យាល័យ Curtin អត្រានៃការហោះមកបុកផែនដីរបស់អាចម៍ផ្កាយដូច 2022 RM4 គឺ 1/100,000 ឆ្នាំ អាស្រ័យលើទំហំរបស់ពួកវា។

អាចម៍ផ្កាយ 2022 RM4 មានប្រវែង 740 ម៉ែត្រ ខ្លីជាងបន្តិច បើធៀបនឹង 828 ម៉ែត្រ របស់អគារ Burj Khalifa

អាចម៍ផ្កាយគឺជាដុំថ្មអវកាសដែលគោចរជុំវិញព្រះអាទិត្យ។ អង្គការណាសា បានរកឃើញថា ក្នុងប្រព័ន្ធព្រះអាទិត្យបច្ចុប្បន្នមានអាចម៍ផ្កាយចំនួន 1,113,527 ដុំ។ ពួកវាវិលជុំវិញព្រះអាទិត្យ និងប្រមូលផ្ដុំនៅតំបន់អវកាសចន្លោះពីពិភពអង្គារ និងពិភពព្រហស្បតិ៍ (Jupiter)។ អាចម៍ផ្កាយភាគច្រើនមានប្រវែងចាប់ពី 10 ម៉ែត្រ ដល់ 529 ម៉ែត្រ៕

October 26, 2022

នាយករដ្ឋមន្ត្រីអង់គ្លេសដើមកំណើតឥណ្ឌា សន្យាគាំទ្រអ៊ុយក្រែនជានិច្ច

នាយករដ្ឋមន្ត្រីអង់គ្លេស រីស៊ី សុណាក់ (Rishi Sunak) កាលពីថ្ងៃទី 25 តុលា បានពិភាក្សាតាមទូរស័ព្ទជាមួយ ប្រធានាធិបតីអ៊ុយក្រែន ក្នុងនោះ លោកបានសន្យាថា ការគាំទ្ររបស់ ទីក្រុងឡុងដ៍ នឹងមានជានិច្ចចំពោះ អ៊ុយក្រែន ហើយខ្លាំងក្លាជាងពេលណាៗទាំងអស់។

«នាយករដ្ឋមន្ត្រីបានថ្លែងថា ប្រធានាធិបតី ហ្សេឡែនស្គី អាចជឿជាក់បានថា រដ្ឋាភិបាលរបស់លោកនឹងបន្តរក្សាសាមគ្គីភាពជាមួយ អ៊ុយក្រែន» អ្នកនាំពាក្យមួយរូបនៅ 10 Downing Street (អាសយដ្ឋាននៃការិយាល័យនាយករដ្ឋមន្ត្រីអង់គ្លេស) បានឱ្យដឹងដូច្នេះ។ មេដឹកនាំទាំងពីរក៏បានឯកភាពគ្នាក្នុងការបន្តដាក់សម្ពាធលើ រដ្ឋាភិបាលរបស់លោក ពូទីន តាមរយៈទណ្ឌកម្មសេដ្ឋកិច្ច។

ចំណែកភាគី អ៊ុយក្រែន វិញ ប្រធានាធិបតី ហ្សេឡែនស្គី ក៏បានឱ្យដឹងថា លោកជឿជាក់ថា «តួនាទីដឹកនាំរបស់ អង់គ្លេស ក្នុងកិច្ចការពារប្រជាធិបតេយ្យ និងសេរីភាព» នឹងកាន់តែខ្លាំងក្លាជាមុន។

លោក រីស៊ី សុណាក់ វ័យ 42 ឆ្នាំ កាលពីម្សិលមិញ បានឡើងទទួលតំណែងនាយករដ្ឋមន្ត្រីនៃ ចក្រភពអង់គ្លេស និងក្លាយជាជនជាតិអង់គ្លេសដើមកំណើតឥណ្ឌាដំបូងគេដែលកាន់តំណែងនេះ។ លោកក៏ជានាយករដ្ឋមន្ត្រីដំបូងគេដែលកាន់តំណែងនាយករដ្ឋមន្ត្រីនៅក្នុងរជ្ជកាលស្ដេច Charles ទីបី ផងដែរ៕

October 26, 2022

ផ្សារទំនើបនៅ អូស្ត្រាលី ប្រើប្រាស់យន្តហោះគ្មានមនុស្សបើកបរដើម្បីប្រគល់ទំនិញ

Coles ដែលជាបណ្ដាញលក់រាយមួយក្នុងចំណោមបណ្ដាញផ្សារទំនើបធំបំផុតពីររបស់ អូស្ត្រាលី ថ្ងៃទី 25 តុលានេះ ប្រកាសថា នឹងចាប់ផ្ដើមប្រើប្រាស់យន្តហោះគ្មានមនុស្សបើក (drone) ដើម្បីប្រគល់ទំនិញចាប់ពីខែវិច្ឆិកាខាងមុខ។

បណ្ដាញផ្សាយទំនើប Coles របស់ អូស្ត្រាលី ថ្ងៃនេះប្រកាសថា ចាប់ពីថ្ងៃទី 02 វិច្ឆិកា 2022 ពួកគេនឹងប្រើប្រាស់យន្តហោះគ្មានមនុស្សបើកដើម្បីប្រគល់ទំនិញដល់ដៃអតិថិជននៅតំបន់ Ormeau ក្នុងរដ្ឋ Queensland។

Coles និងប្រើប្រាស់យន្តហោះរបស់ក្រុមហ៊ុន Wing ដើម្បីដឹកជញ្ជូនទំនិញប្រហែល 500 មុខ មានដូចជា នំប៉័ង ផលិតផលស្រស់ អាហារ ផលិតផលថែរក្សាសុខភាព។ល។ ក្នុងនោះ ទំនិញនឹងត្រូវបានដាក់នៅក្នុងថង់ និងភ្ជាប់ពីខាងក្រោមដ្រូន មុននឹងហោះទៅប្រគល់ឱ្យអតិថិជន។

លោក Simon Rossi ប្រធានក្រុមហ៊ុន Wing បានឱ្យដឹងថា ដ្រូននេះហោះកម្ពស់ 70 ម៉ែត្រ និងល្បឿន 110 គីឡូម៉ែត្រ/ម៉ោង ដើម្បីដឹកទំនិញស្រាលៗ និងមានការប្រញាប់។

ទំនិញនឹងត្រូវបានដាក់នៅក្នុងថង់ និងភ្ជាប់ពីខាងក្រោមដ្រូន មុននឹងហោះទៅប្រគល់ឱ្យអតិថិជន។

បច្ចុប្បន្ន ការដឹកទំនិញតាមដ្រូនត្រូវបានអនុវត្តនៅតំបន់ Ormeau ហើយផ្សារទំនើប Coles នៅតំបន់នេះក៏ទទួលការបញ្ជាទិញទំនិញត្រឹមតែពីម៉ោង 8 កន្លះ ដល់ម៉ោង 16 កន្លះប៉ុណ្ណោះ។

មុនពេលដំណើរការសេវាកម្មរបស់ខ្លួននៅ Queensland ក្រុមហ៊ុន Wing ក៏បានធ្វើការសាកល្បងសេវាកម្មនេះនៅ រដ្ឋធានីកង់បេរ៉ា កាលពីខែមីនា 2022 និងដឹកជញ្ជូនទំនិញបានជាង 5,000 លើករួចហើយ។

ក្រោយពីការដាក់ឱ្យដំណើរការនៅ Ormeau បណ្ដាញផ្សារទំនើប Coles និង Wing នឹងសហការគ្នាពង្រីកសេវាកម្មទៅកាន់តំបន់ដទៃទៀត៕

October 25, 2022

កម្ពុជា និង អេមីរ៉ាតអារ៉ាប់រួម ចរចាកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយ

ពិធីប្រកាសបើកការចរចាជាផ្លូវការ លើកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយកម្ពុជា-អេមីរ៉ាតអារ៉ាប់រួម (Cambodia-UAE CEPA) ត្រូវបានធ្វើឡើងនាព្រឹកថ្ងៃទី 24 ខែតុលា 2022 នៅ រដ្ឋធានីអាប៊ុយដាប៊ី នៃ ប្រទេសអេមីរ៉ាតអារ៉ាប់រួម។

ឯកឧត្ដម ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្មកម្ពុជា និង ឯកឧត្តមបណ្ឌិត ថានី ប៊ីន អាម៉េត អាល់ ហ្សេយូឌី រដ្ឋមន្ត្រីទទួលបន្ទុកពាណិជ្ជកម្មអន្តរជាតិនៃក្រសួងសេដ្ឋកិច្ចអេមីរ៉ាតអារ៉ាប់រួម បានចូលរួមជាអធិបតី នៅក្នុងពិធីខាងលើ ដែលមានវត្តមានរបស់ក្រុមការងារពាក់ព័ន្ធរបស់ភាគីទាំងពីរ នេះបើតាម ក្រសួងពាណិជ្ជកម្មកម្ពុជា។

កិច្ចព្រមព្រៀង Cambodia-UAE CEPA មានបញ្ចូលការចរចាលើការធ្វើសេរីភាវហូបនីយកម្មទំនិញ សេវាកម្ម ការជំរុញការវិនិយោគ និងការចរចាលើបញ្ញត្តិសំខាន់ៗ រួមមាន៖ ពាណិជ្ជកម្មតាមប្រព័ន្ធអេឡិចត្រូនិក របាំងបច្ចេកទេសពាណិជ្ជកម្ម អនាម័យនិងភូតគាមអនាម័យ កម្មសិទ្ធិបញ្ញា កិច្ចសហប្រតិបត្តិការសេដ្ឋកិច្ច និងសហគ្រាសធុនតូចនិងមធ្យម ជាដើម។ល។

រដ្ឋមន្ត្រីក្រសួងពាណិជ្ជកម្មកម្ពុជា បានឱ្យដឹងថា Cambodia-UAE CEPA មានលក្ខណៈពិសេសសម្រាប់ប្រទេសទាំងពីរ ដោយសារកិច្ចព្រមព្រៀងនេះនឹងបន្តពង្រឹងមិត្តភាពដែលមានស្រាប់ជាប្រពៃណីរវាងប្រទេសទាំងពីរ និងលើកកម្ពស់ទំនាក់ទំនងដែលកំពុងរីកចម្រើនរវាងពិភពអារ៉ាប់ និងអាស៊ាន។

«យើងសូមស្វាគមន៍នូវកិច្ចពិភាក្សាជាមួយគ្រប់ភាគីពាក់ព័ន្ធ ដែលមានឆន្ទៈក្នុងការពន្លឿនចរាចរណ៍នៃទំនិញ ធានាខ្សែច្រវាក់ផ្គត់ផ្គង់ និងស្វែងរកឱកាសក្នុងការបណ្តាក់ទុនរួមគ្នា សម្រាប់ផលប្រយោជន៍ទៅវិញទៅមក» ឯកឧត្តមបណ្ឌិត អាល់ ហ្សេយូឌី ក៏បានលើកឡើងដូច្នេះ។

យោងតាម ក្រសួងពាណិជ្ជកម្មកម្ពុជា ដំណើរការចរចាជុំទីមួយសម្រាប់ Cambodia-UAE CEPA នឹងប្រព្រឹត្តទៅចាប់ពីថ្ងៃទី 24-26 ខែតុលា ឆ្នាំ 2022 ក្នុងនោះ ភាគីកម្ពុជា នឹងដឹកនាំដោយ លោកជំទាវ តឹករ៉េត កំរង រដ្ឋលេខាធិការក្រសួងពាណិជ្ជកម្ម ចំណែកភាគី អេមីរ៉ាតអារ៉ាប់រួម នឹងដឹកនាំដោយ ឯកឧត្តម ជូម៉ា ម៉ូហាមេដ អាល់ កាត (Juma Mohammed Al Kait) អនុរដ្ឋមន្ត្រីទទួលបន្ទុកពាណិជ្ជកម្មអន្តរជាតិនៃក្រសួងសេដ្ឋកិច្ចអេមីរ៉ាតអារ៉ាប់រួម ព្រមជាមួយនឹងមន្ត្រីពាក់ព័ន្ធ នៃប្រទេសទាំងពីរ៕

October 25, 2022

មហាសេដ្ឋីឥណ្ឌា ជូនពរកូនប្រសាដែលជិតបានធ្វើជា នាយករដ្ឋមន្ត្រីអង់គ្លេស

មហាសេដ្ឋីឥណ្ឌា Narayana Murthy ជូនពរ និងជឿជាក់ថា កូនប្រសា Rishi Sunak «នឹងប្រឹងប្រែងអស់ពីសមត្ថភាព» ដើម្បីប្រជាជននៅពេលបានឡើងធ្វើជានាយករដ្ឋមន្ត្រីរបស់ ចក្រភពអង់គ្លេស។

«ជូនពរ Rishi។ យើងមានមោទកភាពចំពោះកូន និងជូនពរកូនជោគជ័យ។ យើងជឿជាក់ថា Sunak នឹងប្រឹងប្រែងអស់ពីកម្លាំងកាយចិត្តដើម្បីប្រជាជនចក្រភពអង់គ្លេស» មហាសេដ្ឋី N.R. Narayana Murthy ស្ថាបនិករបស់ក្រុមហ៊ុនបច្ចេកវិទ្យាឥណ្ឌា Infosys នាថ្ងៃនេះបានឱ្យដឹងដូច្នេះ។

លោក Narayana Murthy គឺជាឪទុកបង្កើតរបស់លោកស្រី Akshata Murthy ភរិយារបស់លោក Rishi Sunak ដែលជាអ្នកត្រូវបានបោះឆ្នោតជ្រើសតាំងជាប្រធានបក្សអភិរក្ស ហើយនឹងត្រូវបានមហាក្សត្រ Charles ទីបីតែងតាំងជានាយករដ្ឋមន្ត្រីក្នុងថ្ងៃនេះ។

លោក Sunak អាយុ 42 ឆ្នាំ ចាប់កំណើតនៅក្នុងទីក្រុង Southampton និងមានដើមកំណើតជាជនជាតិឥណ្ឌា នឹងក្លាយជានាយករដ្ឋមន្ត្រីដើមកំណើតឥណ្ឌាដំបូងគេនៅ អង់គ្លេស និងជានាយករដ្ឋមន្ត្រីវ័យក្មេងបំផុតរបស់ប្រទេសនេះក្នុងរង្វង់ 200 ឆ្នាំ។

ការដែលលោក Sunak បានក្លាយជា នាយករដ្ឋមន្ត្រីអង់គ្លេស នៅក្នុងរដូវបុណ្យពន្លឺរបស់អ្នកកាន់សាសនាហិណ្ឌូ ធ្វើឱ្យ ប្រជាជនឥណ្ឌា មានការត្រេកអរខ្លាំង។ នាយករដ្ឋមន្ត្រីឥណ្ឌា Narendra Modi បានឱ្យដឹងថា លោកសង្ឃឹមថា ទំនាក់ទំនងទ្វេភាគីរវាង ឥណ្ឌា និង អង់គ្លេស នឹងត្រូវបានកែលំអបន្ថែមទៀត។

បច្ចុប្បន្ន លោក Sunak មិនទាន់មានការអធិប្បាយណាមួយទាក់ទងនឹងការជូនពររបស់ឪទុកក្មេកនៅឡើយ។ យោងតាមទស្សនាវដ្ដី Forbes លោក Murthy មានទ្រព្យប្រមាណ 4.5 ពាន់លានដុល្លារអាម៉េរិក។ ភរិយារបស់លោក Sunak គឺលោកស្រី Akshata Murthy ជាពលរដ្ឋឥណ្ឌា និងមានភាគហ៊ុន 0.93% ក្នុងក្រុមហ៊ុន Infosys តម្លៃប្រហែល 721 លានដុល្លារអាម៉េរិក៕

October 25, 2022

បច្ចេកវិទ្យាថ្មីរបស់ អាម៉េរិក អាចស្កេនខួរក្បាលដឹងថា «គ្រប់គ្នាកំពុងគិតអ្វី» ឬ «បានដឹងអ្វី»

(សហរដ្ឋអាម៉េរិក)-ក្រុមអ្នកវិទ្យាសាស្ត្រអភិវឌ្ឍកម្មវិធីបកស្រាយការគិតដែលមានសមត្ថភាពអាចរៀបរាប់រឿងរ៉ាវដែលមនុស្សម្នាក់ស្រមៃនៅក្នុងខួរក្បាល។

វិធីសាស្ត្រអានការគិតនានាមុននោះតែងទាមទារឱ្យមានការបំពាក់អេឡិចត្រូតជ្រៅក្នុងខួរក្បាល។ ប៉ុន្តែ Alexander Huth អ្នកវិទ្យាសាស្ត្រផ្នែកសរសៃប្រសាទប្រចាំសាកលវិទ្យាល័យ Texas Austin រួមនឹងមិត្តរួមការងារ បានអភិវឌ្ឍកម្មវិធីអានការគិតថ្មីមួយដែលយោងទៅលើបច្ចេកទេសស្កេនខួរក្បាលពីខាងក្រៅម្យ៉ាងដែលហៅកាត់ថា fMRI នេះបើតាម Science Alert ចុះផ្សាយកាលពីថ្ងៃទី 24 តុលា។ លទ្ធផលនៃការស្រាវជ្រាវថ្មីនេះត្រូវបានប្រកាសនៅលើមជ្ឈមណ្ឌលទិន្នន័យ bioRxiv។

កម្មវិធីអានការគិត fMRI តាមដានលំហូរឈាម និងអុកស៊ីសែនក្នុងខួរក្បាល។ ដោយសារតែកោសិកាខួរក្បាលដែលកំពុងធ្វើការត្រូវការថាមពល និងអុកស៊ីសែនច្រើនជាងធម្មតា ដូច្នេះព័ត៌មានពី fMRI ផ្ដល់នូវវិធីវាស់ស្ទង់ដោយប្រយោលអំពីសកម្មភាពរបស់ខួរក្បាល។

វិធីស្កេនខាងលើកន្លងមកមិនអាចកត់ត្រាសកម្មភាពរបស់ខួរក្បាលទៅតាមពេលវេលាជាក់ស្ដែង ភ្លាមៗ ព្រោះថា រលកសញ្ញាអគ្គិសនីដែលកោសិកាខួរក្បាលបញ្ចេញ ផ្លាស់ទីលឿនជាងឆ្ងាយ ធៀបនឹងល្បឿនរបស់ចរន្តឈាមនៅខួរក្បាល។ ក៏ប៉ុន្តែ ក្រុមអ្នកស្រាវជ្រាវនេះបានរកឃើញថា ពួកគេនៅតែអាចប្រើប្រាស់វិធីនេះដើម្បីបកប្រែអត្ថន័យក្នុងការគិតរបស់មនុស្សគ្រប់រូប បើទោះមិនអាចបកប្រែពាក្យនីមួយៗបានច្បាស់។

នៅក្នុងការស្រាវជ្រាវថ្មី ក្រុមអ្នកវិទ្យាសាស្ត្របានស្កេនខួរក្បាលរបស់ស្ត្រីម្នាក់ និងបុរសពីរនាក់ដែលមានវ័យចាប់ពី 20 ដល់ 30 ឆ្នាំ។ ពួកគេស្ដាប់ហ្វាលសំឡេង និងកម្មវិធីវិទ្យុផ្សេងគ្នាដែលមានរយៈពេល 16 ម៉ោង ចែកជាច្រើនពេល។ បន្ទាប់មក ក្រុមជំនាញផ្ដល់លទ្ធផលនៃការស្កេនខួរក្បាលទៅឱ្យកម្មវិធីកុំព្យូទ័រមួយដែលមានឈ្មោះថា «ប្រព័ន្ធបកស្រាយ»។ ប្រព័ន្ធនេះធ្វើការប្រៀបធៀបសញ្ញាសំឡេងជាមួយនឹងសកម្មភាពរបស់ខួរក្បាលដែលពួកគេបានស្កេន។

ក្រោយមក ប្រព័ន្ធបកស្រាយនេះអាចប្រើប្រាស់កម្មវិធីកុំព្យូទ័រ fMRI ដើម្បីបង្កើតជាសាច់រឿងដោយយោងទៅតាមខ្លឹមសារដែលបានស្កេននោះ។ សាច់រឿងដែលបានបង្កើតឡើងនេះស្រដៀងខ្លាំងទៅនឹងរឿងរ៉ាវដើមក្នុងហ្វាលសំឡេង ឬកម្មវិធីវិទ្យុ។ ដូច្នេះ ប្រព័ន្ធបកស្រាយខាងលើអាចសន្និដ្ឋានដឹងអំពីសាច់រឿងដែលគ្រប់គ្នាបានស្ដាប់ ដោយយោងទៅលើសកម្មភាពខួរក្បាលរបស់ពួកគេ។

ក៏ប៉ុន្តែ ប្រព័ន្ធបកស្រាយនេះក៏មានកំហុសមួយចំនួន ដូចជាការប្ដូរផ្លាស់សព្វនាមរបស់តួអង្គ និងការប្រើប្រាស់បុរិសៈទីមួយ និងបុរិសៈទីបី។ «វាដឹងបានយ៉ាងច្បាស់នូវអ្វីដែលបានកើតឡើង ប៉ុន្តែមិនដឹងច្បាស់ថា អ្នកណាកំពុងធ្វើ» អ្នកវិទ្យាសាស្ត្រ Huth ថ្លែងដូច្នេះ។

នៅក្នុងការពិសោធបន្ថែម ប្រព័ន្ធបកស្រាយនេះបានបកស្រាយបានយ៉ាងស៊ីចង្វាក់នូវសាច់រឿងរបស់ខ្សែភាពយន្តគ្មានសំឡេងដែលអ្នកចូលរួមបានមើល។ ប្រព័ន្ធបកស្រាយនេះថែមទាំងអាចរៀបរាប់ឡើងវិញនូវរឿងរ៉ាវដែលអ្នកចូលរួមការពិសោធស្រមៃនៅក្នុងខួរក្បាលទៀតផង។

ក្នុងចក្ខុវិស័យយូរអង្វែង ក្រុមស្រាវជ្រាវខាងលើមានផែនការអភិវឌ្ឍបច្ចេកវិទ្យាថ្មីដើម្បីប្រើប្រាស់សម្រាប់អ្នកមិនអាចនិយាយ ក៏ដូចជាអ្នកមិនអាចប្រើប្រាស់កុំព្យូទ័រ៕

October 25, 2022

Author: សឿន សំណាង