សឿន សំណាង - La Reine Media

យន្តហោះដឹកមនុស្សជាង 170 នាក់ ឆាបឆេះម៉ាស៊ីនពេលស្ថិតលើកម្ពស់ជាង 900 ម៉ែត្រ

(ឥណ្ឌូណេស៊ី)-យន្តហោះដឹកមនុស្សចំនួន 175 នាក់ របស់ក្រុមហ៊ុនអាកាសចរណ៍ Lion Air ត្រូវវិលត្រលប់មកចុះចតនៅ ហ្សាការតា វិញ ក្រោយពីបានហោះឡើង ដោយសារតែម៉ាស៊ីនមួយគ្រឿងរបស់វាឆាបឆេះ។

ជើងហោះហើរ JT330 របស់ក្រុមហ៊ុនអាកាសចរណ៍ Lion Air ដឹកអ្នកដំណើរ 169 នាក់ និងបុគ្គលិក 6 នាក់ បានហោះឡើងពី រដ្ឋធានីហ្សាការតា ប្រទេសឥណ្ឌូនេស៊ី នៅម៉ោង 17 និង 13 នាទី ថ្ងៃទី 16 តុលា។ អ្នកបើកបររបស់យន្តហោះ Boeing 737-800 បានដឹងថា ម៉ាស៊ីនមួយគ្រឿងរបស់យន្តហោះនេះ «ដំណើរការមិនប្រក្រតី» នៅពេលហោះឡើងដល់កម្ពស់ជាង 900 ម៉ែត្រ នេះបើតាមក្រុមហ៊ុន Lion Air របស់ ឥណ្ឌូណេស៊ី។

ប្រហែលកន្លះម៉ោងក្រោយមក យន្តហោះនេះក៏បានចុះចតដោយសុវត្ថិភាព និងមិនមានអ្នករងរបួស។ ក្រុមហ៊ុន Lion Air មិនទាន់ប្រកាសឱ្យដឹងអំពីមូលហេតុនៃហេតុការណ៍ឆេះម៉ាស៊ីននេះនៅឡើយ ខណៈដែលក្រុមវិស្វករកំពុងត្រួតពិនិត្យយន្តហោះ។ ចំណែកក្រុមហ៊ុន Boeing វិញ បានបដិសេធការស្នើសុំការបកស្រាយអំពីបញ្ហានេះ។

យន្តហោះ Boeing 737-800 របស់ក្រុមហ៊ុនអាកាសចរណ៍ឥណ្ឌូណេស៊ី Lion Air

ក្រុមហ៊ុន Lion Air ធ្លាប់ជួបគ្រោះថ្នាក់អាកាសចរណ៍ម្ដងរួចហើយចំពោះយន្តហោះប្រភេទ 737 Max របស់ Boeing កាលពីឆ្នាំ 2018។ យន្តហោះ Boeing 737 Max កាលណោះបានធ្លាក់ទៅក្នុងសមុទ្រក្រោយពីហោះឡើងបាន 13 នាទី ពីព្រលានយន្តហោះនៅ ហ្សាការតា។ អ្នកដំណើរ រួមនឹងបុគ្គលិកទាំងអស់នៅលើយន្តហោះនេះ បានបាត់បង់ជីវិត៕

October 27, 2022

អ៊ីឡុន ម៉ាស (Elon Musk) ប្ដូរការណែនាំខ្លួនឯង ទៅជា «ម្ចាស់ Twitter»

ខ្លឹមសារព័ត៌មានណែនាំខ្លួននៅលើគណនីបណ្ដាញសង្គម Twitter របស់ មហាសេដ្ឋីអាម៉េរិក អ៊ីឡុន ម៉ាស ត្រូវបានប្ដូរទៅជា Chief Twit។

ការកែប្រែថ្មីបំផុតខាងលើរបស់ នាយកប្រតិបត្តិនៃក្រុមហ៊ុន Tesla ត្រូវបានធ្វើឡើងក្រោយពីមានព័ត៌មានថា លោកនឹងទិញ Twitter នៅថ្ងៃទី 28 តុលា។ ក្រៅពីនេះ លោក ម៉ាស ក៏បានបង្ហោះវីដេអូខ្លីមួយបង្ហាញអំពីវត្តមានរបស់លោកនៅក្នុងទីស្នាក់ការកណ្ដាលរបស់ Twitter ផងដែរ ដែលនេះបានទាក់ទាញអ្នកចូលមើលយ៉ាងច្រើន។

យោងតាម Business Insider ឥរិយាបថនេះអាចជាសញ្ញាបង្ហាញថា លោក ម៉ាស មានផែនការធ្វើជា CEO របស់ Twitter។ CNBC កាលពីពាក់កណ្ដាលខែឧសភា ក៏បានព្យាករដូចគ្នានេះ និងថា វានឹងកើតឡើងនៅពេលការទិញដូរ Twitter តម្លៃ 44 ពាន់លានដុល្លារ បានសម្រេចជាស្ថាពរ។

សារព័ត៌មានណែនាំខ្លួននៅលើគណនីបណ្ដាញសង្គម Twitter របស់ មហាសេដ្ឋីអាម៉េរិក អ៊ីឡុន ម៉ាស ត្រូវបានប្ដូរទៅជា Chief Twit

មុននោះ Reuters បានឱ្យដឹងថា មហាសេដ្ឋីអាម៉េរិកដើមកំណើតអាហ្វ្រិកខាងត្បូង នឹងទិញបណ្ដាញសង្គម Twitter ទៅតាមពេលវេលាដែលបានកំណត់។ យោងតាមកិច្ចព្រមព្រៀង ការទិញដូរ Twitter ក្នុងតម្លៃ 44 ពាន់លានដុល្លារអាម៉េរិក នេះ ត្រូវតែសម្រេចឱ្យបាននៅក្នុងថ្ងៃទី 28 តុលា។ មិនដូច្នេះទេ ភាគីទាំងពីរនឹងត្រូវឡើងតុលាការ Delaware ដើម្បីបន្តការកាត់ក្ដី។

កាលពីខែមេសា 2022 លោក ម៉ាស ប្រកាសថា សម្រេចបានកិច្ចព្រមព្រៀងទិញ Twitter។ ប៉ុន្តែ ខែកក្កដា 2022 លោក ម៉ាស បែរជាប្រកាសដកខ្លួន ដោយចោទថា បណ្ដាញសង្គមនេះបានរំលោភលើកិច្ចព្រមព្រៀង។ ខែកញ្ញាកន្លងទៅ លោក ម៉ាស ក៏បានប្ដូរចិត្ត ដោយថា លោកនឹងនៅតែទិញ Twitter ក្នុងតម្លៃដូចមុន។

ភាគហ៊ុនរបស់ Twitter បានឡើងថ្លៃ 3% ក្នុងថ្ងៃទី 25 តុលា ឡើងដល់ 52.95 ដុល្លារ/ហ៊ុន ប៉ុន្តែ នៅតែទាបជាងបន្តិចធៀបនឹងតម្លៃ 54.2 ដុល្លារ/ហ៊ុន ដែលត្រូវបានលោក ម៉ាស ស្នើទិញកាលពីខែឧសភា៕

October 27, 2022

ណាតូ ប្រកាសថា មិនអនុញ្ញាតឱ្យលោក ពូទីន ឈ្នះសង្គ្រាមនៅ អ៊ុយក្រែន

អគ្គលេខាធិការនៃអង្គការណាតូ Stoltenberg ប្រកាសថា មិនអនុញ្ញាតឱ្យលោក ពូទីន ឈ្នះសង្គ្រាមនៅ អ៊ុយក្រែន ហើយថា នឹងជួយដល់កងកម្លាំងរបស់ ទីក្រុងកៀវ រហូតដល់អស់ការចាំបាច់។

«ជាមូលដ្ឋាន មិនអាចសន្និដ្ឋានបានចំពោះសង្គ្រាមនេះ។ ខ្ញុំមិនមានការសន្និដ្ឋានថា សង្គ្រាមនឹងអូសបន្លាយដល់ពេលណា គ្រាន់តែចង់អះអាងថា យើងខ្ញុំនឹងជួយដល់ អ៊ុយក្រែន រហូតដល់អស់ការចាំបាច់។ យើងមិនអាចបណ្ដោយឱ្យលោក វ្ល៉ាឌីមៀ ពូទីន ឈ្នះសង្គ្រាមនេះ» អគ្គលេខាធិការនៃអង្គការណាតូ Stoltenberg

ឆ្លើយក្នុងកិច្ចសម្ភាសនៅឯកិច្ចប្រជុំជាមួយ នាយករដ្ឋមន្ត្រីរូម៉ានី Nicolae Ciuca នៅទីស្នាក់ការកណ្ដាលរបស់ ណាតូ នៅ ព្រុចសែល ប្រទេសបែហ្សិក កាលពីថ្ងៃទី 26 តុលា។

លោក Stoltenberg យល់ថា ការឈ្នះសង្គ្រាមរបស់ រុស្ស៊ី «នឹងជាគ្រោះមហន្តរាយ សោកនាដកម្មសម្រាប់ ជនជាតិអ៊ុយក្រែន ហើយក៏ធ្វើឱ្យសម្ព័ន្ធមិត្តណាតូ ងាយរងគ្រោះជាងមុន»។

សង្គ្រាមនៅ អ៊ុយក្រែន មិនមែនបានចាប់ផ្ដើមពីខែកុម្ភៈ 2022 ឡើយ ប៉ុន្តែ កើតឡើងតាំងពីឆ្នាំ 2014 ពេលដែលលោក ពូទីន បានរឹបអូប ឧបទ្វីបគ្រីមៀ ហើយ រុស្ស៊ី ចាប់ផ្ដើមគ្រប់គ្រងតំបន់ Donbass នៅភាគខាងកើតនៃ ទឹកដីអ៊ុយក្រែន។ «អ្វីដែលបានកើតឡើងកាលពីខែកុម្ភៈ គឺជាភាពតានតឹងដែលបានកើនឡើងពេញលេញ ជាសង្គ្រាមទូទៅ» អគ្គលេខាធិការនៃអង្គការណាតូ Stoltenberg និយាយដូច្នេះ។

លោក Stoltenberg អះអាងថា កងទ័ពរុស្ស៊ី កំពុងបរាជ័យនៅ អ៊ុយក្រែន ក្នុងគ្រាដែលកងទ័ពរបស់ ទីក្រុងកៀវ កំពុងមានថាមពលខ្លាំងឡើង។

យោងតាមលោក Stoltenberg សង្គ្រាមស្ទើរតែទាំងអស់ សុទ្ធតែត្រូវបានបញ្ចប់នៅឯតុចរចា ហើយអ្វីដែល អ៊ុយក្រែន អាចសម្រេចបាននៅលើតុចរចា គឺអាស្រ័យទាំងស្រុងលើកម្លាំងនៅឯសមរភូមិ។ ដូច្នេះ ណាតូ គួរតែបង្កើនកម្លាំងរបស់ពួកគេនៅលើតុចរចា តាមរយៈការផ្ដល់ជំនួយយោធាដល់ អ៊ុយក្រែន។

ភាគីខាងរុស្ស៊ី មិនទាន់មានការអធិប្បាយអ្វីនៅឡើយ ទាក់ទងនឹងការលើកឡើងរបស់ អគ្គលេខាធិការនៃអង្គការណាតូ ខាងលើ៕

October 27, 2022

កាណាដា ច្រានចោលសំណើ «ផ្ដាច់ទំនាក់ទំនង» ជាមួយរបបរាជានិយមអង់គ្លេស

សភាជាន់ទាបកាណាដា បានច្រានចោលសំណើរបស់ បក្ស Bloc Quebecois ក្រោយពីបក្សនេះនិយាយថា ដល់ពេលដែលត្រូវកាត់ផ្ដាច់ទំនាក់ទំនងជាមួយនឹងរបបរាជានិយមអង់គ្លេស។

សំណើផ្ដាច់ទំនាក់ទំនងជាមួយនឹងរបបរាជានិយមអង់គ្លេស ដែលលើកឡើងដោយបក្ស Bloc Quebecois ត្រូវបានច្រានចោលនៅក្នុងការបោះឆ្នោតសភាជាន់ទាបកាណាដា កាលពីថ្ងៃទី 26 តុលា ដោយទទួលបានការគាំទ្រចំនួន 44 សំឡេង និងប្រឆាំងចំនួន 266 សំឡេង។

ការបោះឆ្នោតខាងលើត្រូវបានធ្វើឡើងបន្ទាប់ពី Yves-Francois Blanchet មេដឹកនាំបក្ស Bloc Quebecois កាលពីថ្ងៃទី 25 តុលា យល់ថា ស្វាមីភក្ដិជាមួយនឹងរបបរាជានិយមនៅបរទេស មិនត្រឹមតែហួសសម័យនោះទេ ប៉ុន្តែថែមទាំងត្រូវចំណាយច្រើនទៀតផង។ លោក Yves-Francois Blanchet និយាយថា ការប្រគល់អំណាចថ្វាយមហាក្សត្រ Charles ទីបី នៅលើកនេះគឺជាឱកាសដើម្បីឱ្យ កាណាដា អាចផ្ដាច់ទំនាក់ទំនងជាមួយរាជានិយមអង់គ្លេស។

យោងតាមលោក Yves-Francois Blanchet សមាជិកបក្ស Bloc Quebecois ត្រូវបាន «បង្ខំឱ្យស្បថថាស្មោះត្រង់នឹងរបបរាជានិយមអង់គ្លេស» ហើយមានអារម្មណ៍ថា សម្បថរបស់ពួកគេគឺជារឿង «គ្មានន័យ»។ លោកសង្កត់ធ្ងន់ថា ក្រុមតំណាងរាស្ត្រ Bloc Quebecois ស្បថដោយមានភក្ដីភាពចំពោះតែ ប្រជាជន Quebec តែប៉ុណ្ណោះ។

តំណាងរាស្ត្រច្រើនរូបរបស់ កាណាដា ចោទប្រកាន់ថា លោក Blanchet លើកឡើងនូវបញ្ហាដែលមិនទាន់ទង ហើយកំពុងរកវិធីទាក់ទាញចំណាប់អារម្មណ៍។ ពួកគេយល់ថា ប្រជាជនកាណាដា កំពុងបារម្ភអំពីបញ្ហាដទៃ មានដូចជា សេដ្ឋកិច្ច អាកាសធាតុ និងការថែទាំសុខភាព។

នៅ កាណាដា ការផ្ដាច់ទំនាក់ទំនងជាមួយរបបរាជានិយមអង់គ្លេស ទាមទារឱ្យមានការធ្វើវិសោធនកម្មច្បាប់រដ្ឋធម្មនុញ្ញ ដោយមានការគាំទ្រទាំងស្រុងពីសភាខេត្តទាំង 10 រួមនឹងសមាជិកសភាជាតិ។

ក្រោយពី មហាក្សត្រីអង់គ្លេស Elizabeth ទីពីរ បានចូលទិវង្គតកាលពីថ្ងៃទី 08 កញ្ញា មហាក្សត្រ Charles ទីបី ដែលជាអ្នកស្នងរាជសម្បត្តិ និងឡើងគ្រងរាជកាលពីថ្ងៃទី 10 កញ្ញា បានក្លាយជាមេដឹកនាំរបស់ ប្រទេសអង់គ្លេស កាណាដា អូស្ត្រាលី នូវែលសេឡង់ និងបណ្ដាប្រទេសផ្សេងទៀតនៅក្នុង សមាគមប្រទេសជាតិខំមិនវែល (commonwealth of nations)។

ក្រៅពី កាណាដា ក៏មានប្រទេសមួយចំនួនទៀត ដូចជា អូស្ត្រាលី និង នូវែសេឡង់ ជាដើម ធ្លាប់និយាយដល់លទ្ធភាពក្លាយជាសាធារណរដ្ឋ ប៉ុន្តែមិនបានចាត់ទុកថា នេះគឺជាគោលដៅបន្ទាន់៕

បណ្ដាប្រទេសដែលចាត់ទុកស្ដេចអង់គ្លេស ជាមេដឹកនាំ

បណ្ដាប្រទេសនៅក្នុង សមាគមប្រទេសជាតិខំមិនវែល (commonwealth of nations)។

October 27, 2022

រុស្ស៊ី ធ្វើសមយុទ្ធនុយក្លេអែរសងសឹក ៖ ពូទីន តាមដានយ៉ាងយកចិត្តទុកដាក់ (វីដេអូ)

ប្រធានាធិបតីរុស្ស៊ី ពូទីន បានតាមដានសកម្មភាពធ្វើសមយុទ្ធរបស់ កងទ័ពរុស្ស៊ី ដែលមានទិដ្ឋភាពវាយប្រហារសងសឹកដោយអាវុធនុយក្លេអែរ តាមរយៈការបាញ់មីស៊ីលប្លោងច្រើនប្រភេទ ក្នុងនោះមានទាំងមីស៊ីលអន្តរទ្វីបផងដែរ។

រដ្ឋមន្ត្រីក្រសួងការពារជាតិរុស្ស៊ី Sergey Shoigu បានឱ្យដឹងថា គោលបំណងនៃសមយុទ្ធនេះគឺដើម្បីពិនិត្យអំពីកម្រិតនៃការត្រៀមខ្លួនរបស់ «កងកម្លាំងវាយប្រហារយុទ្ធសាស្ត្ររបស់ រុស្ស៊ី» ក្នុងការប្រើប្រាស់អាវុធនុយក្លេអែរទ្រង់ទ្រាយធំ ឆ្លើយតបនឹងការវាយប្រហារនុយក្លេអែររបស់សត្រូវ។

វិមានក្រឹមឡាំង ឱ្យដឹងថា កងកម្លាំងកំញើញនុយក្លេអែរនៅលើគោក លើសមុទ្រ និងលើអាកាសបានចូលរួមសមយុទ្ធនេះ។

ក្នុងសមយុទ្ធ មីស៊ីលប្លោងអន្តរទ្វីប Yars ត្រូវបានបាញ់ចេញពីព្រលានយានអវកាស Plesetsk នៅតំបន់ Arkhangelsk គ្រាដែលមីស៊ីលប្លោង Sineva ត្រូវបានបាញ់ចេញពីសមុទ្រ Barents និងបានវាយចំគោលដៅនៅលើឧបទ្វីប Kamchatka នៅតំបន់ចុងបូព៌ារបស់ ប្រទេសរុស្ស៊ី។

ហោះទម្លាក់គ្រាប់បែកយុទ្ធសាស្ត្រ Tu-95 ច្រើនគ្រឿងរបស់ រុស្ស៊ី ក៏បានចូលរួមធ្វើសមយុទ្ធយោធានុយក្លេអែររបស់កងទ័ពលើកនេះផងដែរ៕

October 27, 2022

មហាសេដ្ឋិនីប្ដូរភេទថៃ ទិញស្ថាប័នបវរកញ្ញាចក្រវាល (Miss Universe)

ទូរទស្សន៍ JKN18 បានផ្សាយថា មហាសេដ្ឋិនីប្ដូរភេទរបស់ ប្រទេសថៃ Anne Jakrajutatip ទិញស្ថាប័នបវរកញ្ញាចក្រវាល ដែលមុននេះគឺជាកម្មសិទ្ធិរបស់ អតីតប្រធានាធិបតីអាម៉េរិក និងក្រុមហ៊ុន IMG។

នាព្រឹកថ្ងៃទី 26 តុលានេះ Anne Jakrajutatip (CEO របស់ក្រុមហ៊ុនផ្សព្វផ្សាយ JKN Global Media) បានទិញស្ថាប័នរៀបចំកម្មវិធីប្រលងបវរកញ្ញាចក្រវាល Miss Universe និងក្លាយជាម្ចាស់ភាគហ៊ុនតែមួយគត់របស់ស្ថាប័ននេះ។

មុននេះមិនយូរប៉ុន្មាន Anne Jakrajutatip បានបង្ហាញបំណងទិញស្ថាប័នខាងលើ និងលើកកម្ពស់គុណភាពឱ្យបានល្អជាង ធៀបនឹងពេលស្ថិតនៅក្រោមការគ្រប់គ្រងរបស់អតីតប្រធានាធិបតី ដូណាល ត្រាំ និងក្រុមហ៊ុន IMG។ ដើមឡើយ Miss Universe គឺជាកម្មសិទ្ធិរបស់មហាសេដ្ឋី ដូណាល ត្រាំ ប៉ុន្តែ ត្រូវបានក្រុមហ៊ុន IMG ទិញចាប់ពីឆ្នាំ 2015។

កាលពីខែកញ្ញា New York Post ឱ្យដឹងថា លោក Ari Emanuel ដែលជា CEO របស់ Endeavor (ម្ចាស់ក្រុមហ៊ុន IMG) កំពុងជួបបញ្ហាហិរញ្ញវត្ថុ ចង់លក់ស្ថាប័ន Miss Universe ក្នុងតម្លៃ 20 លានដុល្លារអាម៉េរិក។

ក្រោយពីត្រូវបានលក់ឱ្យ Anne Jakrajutatip ស្ថាប័ននេះក៏ត្រូវបានពន្យារព្រឹត្តិការណ៍ Miss Universe ទៅដើមឆ្នាំ 2023 ហើយទីតាំងប្រារព្ធកម្មវិធីនេះគឺទីក្រុង New Orleans រដ្ឋ Louisiana សហរដ្ឋអាម៉េរិក។

មហាសេដ្ឋិនី Anne Jakrajutatip ឆ្នាំនេះមានអាយុ 40 គឺជាម្ដាយរបស់កូន 2 នាក់។ Anne Jakrajutatip កើតក្នុងគ្រួសារដើមកំណើតចិន នៅ រាជធានីបាងកក ប្រទេសថៃ។ Anne Jakrajutatip បានទៅសិក្សាផ្នែកទំនាក់ទំនងអន្តរជាតិនៅ អូស្ត្រាលី ក្នុងវ័យ 16 ឆ្នាំ។ ឆ្នាំអាយុ 21 លោក Anne Jakrajutatip បានត្រលប់មកប្រទេសថៃ និងចាប់ផ្ដើមប្រើប្រាស់សម្លៀកបំពាក់នារី។ ឆ្នាំអាយុ 36 ឆ្នាំ មហាសេដ្ឋិនី Anne Jakrajutatip ក៏បានសម្រេចចិត្តវះកាត់ប្ដូរភេទ៕

October 26, 2022

អង្គការមនុស្សធម៌ជ្រើសរើសមនុស្សជាង 2,000 នាក់ ដើម្បីថតរូបអាក្រាតកាយ

(អូស្ត្រាលី)-អង្គការមនុស្សធម៌ផ្នែកជំងឺមហារីកស្បែកមួយសង្ឃឹមថា នឹងទាក់ទាញអ្នកស្ម័គ្រចិត្តប្រហែល 2,500 នាក់ ដើម្បីមកថតរូបអាក្រាតកាយសម្រាប់គម្រោងសុខភាពសាធារណៈ។

Skin Check Champions ដែលជាអង្គការមនុស្សធម៌គ្រប់គ្រងបន្ទប់ពិគ្រោះជំងឺស្បែកដោយមិនគិតថ្លៃនៅ អូស្ត្រាលី សហការជាមួយកំពូលជាងថតរូបអាម៉េរិក Spencer Tunick អំពាវនាវរកអ្នកស្ម័គ្រចិត្តរាប់ពាន់នាក់ ឱ្យមកចូលរួមបង្កើតស្នាដៃអាក្រាយកាយនៅលើឆ្នេរសមុទ្រនៅ Sydney នាថ្ងៃទី 26 វិច្ឆិកានេះ ដើម្បីលើកកម្ពស់ការយល់ដឹងអំពីជំងឺមហារីកស្បែក។

Scott Maggs (ឆ្វេង) ស្ថាបនិករបស់ Skin Check Champions

«យើងខ្ញុំកំពុងឆ្ពោះទៅរកមនុស្សយ៉ាងតិច 2,000 នាក់ មកចូលរួមគម្រោងដើម្បីតំណាងឱ្យ ជនជាតិអូស្ត្រាលីជាង 2,000 នាក់ ដែលបានស្លាប់ជារៀងរាល់ឆ្នាំដោយសារជំងឺមហារីកស្បែក» Scott Maggs ស្ថាបនិករបស់ Skin Check Champions បានឱ្យដឹងដូច្នេះ។

ស្នាដៃរបស់ កំពូលជាងថតរូបអាម៉េរិក Spencer Tunick ថតនៅ អូស្ត្រាលី

ពេលវេលានៃការជួបជុំថតរូបអាក្រាតកាយរបស់ Skin Check Champions ត្រូវបានធ្វើឡើងដំណាលគ្នានឹងសប្ដាហ៍ស្ដីពីមហារីកស្បែកអូស្ត្រាលី ហើយ Maggs ក៏បានអំពាវនាវឱ្យគ្រប់គ្នាទៅពិនិត្យស្បែក។ Maggs បានបង្កើតអង្គការ Skin Check Champions កាលពីឆ្នាំ 2010 ក្រោយពីមិត្តរបស់គាត់គឺ Wes Bonny បានស្លាប់ដោយសារជំងឺមហារីកស្បែកក្នុងវ័យ 26 ឆ្នាំ។

ស្នាដៃរបស់ កំពូលជាងថតរូបអាម៉េរិក Spencer Tunick

អង្គការ Skin Check Champions ទទួលបានការគាំទ្រច្រើនពីមហាជន ក្នុងនោះមានទាំងមហាសេដ្ឋី Richard Branson ផងដែរ។

អ្នកថតរូបជំនាញ Tunick ធ្លាប់បានបង្កើតរូបអាក្រាតកាយទ្រង់ទ្រាយធំចំនួន 100 លើកនៅទីសាធារណៈ នៅពាសពេញពិភពលោក ចាប់ពី Munich ដល់ Mexico City ជាទីដែលលោកធ្លាប់បានថតរូបមនុស្សអាក្រាតកាយ 18,000 នាក់។ ខុសពីវិចិត្រករដទៃដែលប្រើថ្នាំពណ៌ ជក់ ដែកខ្មៅ ផ្ទាំងក្រណាត់ជាដើមដើម្បីបង្កើតគំនូរ Tunick បែរជាយកពណ៌ស្បែករបស់មនុស្សមកច្នៃប្រឌិតទៅវិញ នេះគឺជាសមត្ថភាពដ៏អស្ចារ្យរបស់គាត់៕

October 26, 2022

បណ្ដាប្រទេសដែលមាន «កំពូលសេដ្ឋី» ច្រើនជាងគេក្នុងពិភពលោក

«កំពូលសេដ្ឋី» គឺជាក្រុមមនុស្សដែលមានទ្រព្យសម្បត្តិតម្លៃចាប់ពី 100 លានដុល្លារអាម៉េរិក ឡើងទៅ ជាទំហំទ្រព្យដែលអនុញ្ញាតឱ្យពួកគេមិនបាច់ពិចារណាវែងឆ្ងាយនៅពេលចំណាយ។

បច្ចុប្បន្ន ពិភពលោកមាន «កំពូលសេដ្ឋី» ជាង 25,000 នាក់ នេះបើតាមការស្រាវជ្រាវរបស់ក្រុមហ៊ុនប្រឹក្សាអង់គ្លេស Henley & Partners។

លោកស្រី Abby Maxman ប្រធានអង្គការ Oxfam សហរដ្ឋអាម៉េរិក បាននិយាយថា «នេះគឺជាដំណាក់កាលផ្ទុះការកើតមាន «កំពូលសេដ្ឋី» ច្រើនមិនធ្លាប់មានពីមុនមក»។

ឈរលើកំពូលតារាងស្ដីពីបណ្ដាប្រទេសដែលមាន «កំពូលសេដ្ឋី» ច្រើនជាងគេក្នុងពិភពលោកគឺ សហរដ្ឋអាម៉េរិក ដោយមាន ពលរដ្ឋ 9,730 នាក់ មានទ្រព្យដែលមានតម្លៃចាប់ពី 100 លានដុល្លារឡើងទៅ។ ប្រទេសចិន និង ឥណ្ឌា ឈរលំដាប់ទី 2 និងទី 3 ក្នុងនោះ ចិន មាន 2,021 នាក់ និង ឥណ្ឌាមាន 1,132 នាក់។ ឈរលំដាប់ទី 4 គឺជា អង់គ្លេស ដោយមាន «កំពូលសេដ្ឋី» ចំនួន 968 នាក់ ខណៈដែល អាល្លឺម៉ង់ មាន 966 នាក់ ឈរលំដាប់ទី 5។

«កំពូលសេដ្ឋី» ទាំងនោះ ភាគច្រើនគឺជាស្ថាបនិកក្រុមហ៊ុនបច្ចេកវិទ្យា និងក្រុមហ៊ុនពហុជាតិសាសន៍ អ្នកជំនួញក្នុងវិស័យហិរញ្ញវត្ថុ និងអ្នកស្នងមរតក។ ក្នុងរយៈពេល 20 ឆ្នាំមកនេះ ចំនួន «កំពូលសេដ្ឋី» បានកើនឡើងទ្វេដង។

ក្រុមអ្នកស្រាវជ្រាវព្យាករថា ចំនួន «កំពូលសេដ្ឋី» នឹងកើនឡើងលឿននៅ ទ្វីបអាស៊ី និង អាហ្វ្រិក ក្នុងប៉ុន្មានឆ្នាំខាងមុខ ហើយអាចយកឈ្នះលើ អាម៉េរិក និង អារ៉ុប នៅឆ្នាំ 2032៕

October 26, 2022

ទីផ្សាររថយន្តអគ្គិសនីនៅ សហរដ្ឋអាម៉េរិក «ផ្ទុះ» ការពេញនិយមជាថ្មី

ក្រោយមួយរយៈពេលនៃការយឺតយ៉ាវក្នុងការផ្លាស់ប្ដូរ ទីផ្សាររថយន្តអគ្គិសនីនៅ សហរដ្ឋអាម៉េរិក នាប៉ុន្មានត្រីមាសចុងក្រោយនេះ បានបង្ហាញសញ្ញាវិជ្ជមានឡើងវិញ។

ពលរដ្ឋអាម៉េរិក បានទិញរថយន្តអគ្គិសនីជាង 2 សែនគ្រឿងក្នុងត្រីមាសទីបីឆ្នាំនេះ។ ប្រការនេះបានបង្ហាញថា ទីផ្សាររថយន្តអគ្គិសនីនៅ សហរដ្ឋអាម៉េរិក កំពុងឈានចូលដល់ដំណាក់កាលប្រកួតប្រជែងខ្លាំងក្លា។ ពិសេស Tesla លែងនៅជាឈ្មោះតែមួយគត់ទៀតហើយ។

ទំព័រ Marketwatch បានឱ្យដឹងថា រថយន្តអគ្គិសនី 2 សែនគ្រឿងខាងលើ គឺមានន័យថា កើន 67% ធៀបនឹងត្រីមាសទី 3 ឆ្នាំ 2021។ Tesla លែងមានកំណើនខ្ពស់ខ្លាំងដូចមុនទៀតហើយ ទាក់ទងនឹងបរិមាណរថយន្តដែលបានលក់ចេញ ប៉ុន្តែនៅតែនាំមុខគេក្នុងទីផ្សារអាម៉េរិក។ ក្នុងចំណោមរថយន្តអគ្គិសនីដែលត្រូវបាន ពលរដ្ឋអាម៉េរិក ទិញនៅក្នុងត្រីមាសទី 3 ឆ្នាំនេះ មានរហូតដល់ 64% ជារថយន្ត Tesla ប៉ុន្តែ ថយចុះបន្តិច ធៀបនឹង 70% កាលពីត្រីមាសទី 3 ឆ្នាំកន្លង។

ដោយមានល្បឿនដូចបច្ចុប្បន្ន 3 ឆ្នាំទៀត រថយន្តអគ្គិសនី Volkswagen របស់ អាល្លឺម៉ង់ នៅ សហរដ្ឋអាម៉េរិក អាចកើនដល់ប្រហែល 1.4 លានគ្រឿង នេះបើតាម ទំព័រ CNN។ បន្ទាប់មកគឺ Renault-Nissan-Mitsubishi ហើយ Geely របស់ ចិន ក៏អាចយកឈ្នះលើ Tesla ស្ដីពីបរិមាណរថយន្តលក់ចេញ។

Tesla នៅតែជាអ្នកនាំមុខគេនៅក្នុងទីផ្សារអាម៉េរិក

ស្ថិតិមួយនាពេលថ្មីៗនេះបានបង្ហាញថា ចំនួន ពលរដ្ឋអាម៉េរិក ដែលបានទិញរថយន្តអគ្គិសនី ហើយវិលទៅរករថយន្តសាំង ឬម៉ាស៊ូត បានថយចុះ 17% ក្នុងមួយឆ្នាំមកនេះ។ តម្លៃសាំងកើនឡើង និងរថយន្តអគ្គិសនីមានរូបរាងស្អាតៗ ក៏ដូចជាមានជម្រើសច្រើនជាងមុន គឺជាកត្តាជំរុញសំខាន់ដែលនាំឱ្យអតិថិជនពេញនិយមរថយន្តអគ្គិសនី។

ទំព័រ Business សរសេរថា ពាក់កណ្ដាលត្រីមាសទី 2 របស់ឆ្នាំ 2021 និងឆ្នាំនេះ ចំនួនគ្រួសារដែលបានទិញរថយន្តអគ្គិសនីមួយគ្រឿង ហើយទិញរថយន្តអគ្គិសនីមួយគ្រឿងបន្ថែមទៀត បានកើនពី 48% ឡើងដល់ 65.3%។ នេះគឺជាតួលេខប្រកបដោយក្ដីសង្ឃឹមសម្រាប់ក្រុមហ៊ុនរថយន្តអគ្គិសនី។

ក្នុងចំណោម ពលរដ្ឋអាម៉េរិក 4 នាក់ គឺមានម្នាក់បញ្ជាក់ថា រថយន្តបន្ទាប់របស់ពួកគេគឺជារថយន្តអគ្គិសនី ដែលនេះគឺជាតួលេខខ្ពស់ឆ្ងាយ បើធៀបនឹងអ្នកចាប់អារម្មណ៍ប្រមាណតែ 16% កាលពី 3 ឆ្នាំមុន នេះបើតាម Bloomberg៕

October 26, 2022

XPeng បង្ហាញកំណែរថយន្តហោះអគ្គិសនីថ្មី ជិតដូចទៅនឹងកំណែសម្រាប់ផលិត

ក្រុមហ៊ុនបច្ចេកវិទ្យាចិន XPeng បានប្រកាសបង្ហាញកំណែថ្មីបំផុតរបស់រថយន្តហោះរបស់ខ្លួន ដែលជិតដូចទៅនឹងកំណែសម្រាប់ផលិតផ្លូវការ នៅក្នុងព្រឹត្តិការណ៍ទិវាបច្ចេកវិទ្យាថ្មីបំផុតរបស់ពួកគេ។

ក្នុងព្រឹត្តិការណ៍ទិវាបច្ចេកវិទ្យា 1024 ប្រចាំឆ្នាំលើកទីបួន (XPeng 1024 Tech Day 2022) ដែលត្រូវបានធ្វើឡើងនៅ Guangzhou ប្រទេសចិន ក្រុមហ៊ុន XPeng បានប្រកាសបង្ហាញកំណែថ្មីបំផុតនៃប្រភេទរថយន្តហោះ ដែលហោះឡើង និងចុះចតត្រង់ ប្រើអគ្គិសនី (eVToL) ដែលអភិវឌ្ឍដោយក្រុមហ៊ុនផលិតរថយន្តហោះធំជាងគេនៅ អាស៊ី XPeng Aeroht។

មិនដូចទៅនឹងរថយន្តហោះជំនាន់ទី 6 ដែលត្រូវបានក្រុមហ៊ុននេះប្រកាសកាលពីឆ្នាំកន្លង XPeng លើកនេះបានបង្ហាញនូវផលិតផលមួយដែលជិតដូចទាំងស្រុងទៅនឹងកំណែសម្រាប់ផលិត និងលក់ក្នុងទីផ្សារ។ XPeng ឱ្យដឹងថា ការសាកល្បងរបស់រថយន្តហោះថ្មីនេះបានសម្រេចជាស្ថាពរនូវការហោះហើរដំបូង។

យោងតាម XPeng កំណែថ្មីបំផុតរបស់រថយន្តហោះនេះត្រូវបានកែប្រែពីស្លាបកង្ហារទទឹងពីរកាលពីឆ្នាំកន្លង មកជាស្លាបកង្ហារច្រើនជាងមុន ហើយភាពស្មុគស្មាញក្នុងរចនារូបរាងក៏ត្រូវបានកាត់បន្ថយដើម្បីកែលំអកម្រិតសុវត្ថិភាព និងភាពជឿជាក់សម្រាប់ការហោះហើរ។

កាលពីខែកក្កដា ប្រធាន និងជានាយកប្រតិបត្តិរបស់ XPeng លោក He Xiaopeng បានចែករំលែងវីដេអូមួយលើបណ្ដាញសង្គម បង្ហាញថា អ្នកបើកបរអាចបញ្ជារថយន្តហោះនេះដូចទៅនឹងពេលពួកគេកំពុងបើកបររថយន្ត។

នៅក្នុងព្រឹត្តិការណ៍ទិវាបច្ចេកវិទ្យា 1024 ប្រចាំឆ្នាំលើកទីបួន ក្រុមហ៊ុន XPeng ក៏បានបង្ហាញអំពីបច្ចេកវិទ្យាថ្មីៗបំផុតរបស់ខ្លួន ក្នុងនោះមានដូចជា ប្រព័ន្ធបើកបរស្វ័យប្រវត្តជំនាន់ថ្មី XNGP និង រ៉ូបូតតាក់ស៊ី ជាដើម។ល។

បណ្ដាផលិតផលរបស់ XPeng ដែលត្រូវបានបង្ហាញនៅក្នុងព្រឹត្តិការណ៍ទិវាបច្ចេកវិទ្យា 1024 ប្រចាំឆ្នាំលើកទីបួន (XPeng 1024 Tech Day 2022) ៖

October 26, 2022

Author: សឿន សំណាង