សឿន សំណាង - La Reine Media

ប្រទេសចិន៖ អតីតប្រធានាធិបតី ជាំង ហ្សេមីន ទទួលមរណភាពហើយ!

សារព័ត៌មាន Xinhua ដែលជាទីភ្នាក់ងារសារព័ត៌មានរដ្ឋចិន នារសៀលថ្ងៃទី 30 វិច្ឆិកា 2022 នេះ បានប្រកាសថា អតីតប្រធានាធិបតីចិន លោក ជាំង ហ្សេមីន (Jiang Zemin) បានទទួលមរណភាព ក្នុងជន្មាយុ 96 ឆ្នាំ។

គេហទំព័រផ្លូវការរបស់របស់ Xinhua បានប្ដូរទៅជាពណ៌ខ្មៅនៅវេលាម៉ោង 14 និង 40 នាទី ថ្ងៃទី 30 វិច្ឆិកា (ម៉ោងក្នុងស្រុក) នៅពេលចុះផ្សាយថា លោក ជាំង ហ្សេមីន ទទួលមរណភាពនៅវេលាម៉ោង 12 និង 13 នាទី (ម៉ោង 11 និង 13 នាទី នៅ កម្ពុជា) នៅក្នុងទីក្រុងសៀងហៃ ដោយសារជំងឺមហារីកគ្រាប់ឈាម បើទោះជាមានការប្រឹងប្រែងក្នុងការជួយសង្គ្រោះ។

Xinhua ក៏បានដកស្រង់សារលិខិតរបស់ គណៈកម្មាធិការមជ្ឈិមបក្សកុម្មុយនិស្តចិន (CPC) ផ្ញើជូនចំពោះបក្ស កងទ័ព និងប្រជាជនចិនទាំងមូល ក្នុងនោះមានឃ្លាសរសេរថា «សមមិត្ត ជាំង ហ្សេមីន គឺជាមេដឹកនាំឆ្នើម មានកេរ្ដិ៍ឈ្មោះល្អ ត្រូវបានបក្ស កងទ័ព និងប្រជាពលរដ្ឋចិន ទទួលស្គាល់ថា ជាមនុស្សម្នាក់ដែលដើរតាមលទ្ធិម៉ាក្សនិយមដ៏អស្ចារ្យ ជាអ្នកបដិវត្តន៍វណ្ណអធនដ៏មហាអស្ចា្យ…ជាអ្នកយុទ្ធសាស្ត្រយោធា និងអ្នកការទូតចាស់វាស្សា»។

លោក ជាង ហ្សេមីន ចាប់កំណើតនៅថ្ងៃទី 17 សីហា 1926 នៅទីក្រុង Yangzhou ប្រទេសចិន។ លោកគឺជាអតីតអគ្គលេខាធិការបក្សកុម្មុយនិស្តចិន ពីឆ្នាំ 1989 ដល់ឆ្នាំ 2002, ជាប្រធានគណៈកម្មាធិការយោធាមជ្ឈិម ពីឆ្នាំ 1989 ដល់ឆ្នាំ 2004 និងជាប្រធានាធិបតីចិន ពីឆ្នាំ 1993 ដល់ឆ្នាំ 2003។ លោកចាប់កំណើតនៅថ្ងៃទី 17 សីហា 1926 នៅទីក្រុង Yangzhou ប្រទេសចិន។

ប្រធានាធិបតីចិន លោក ស៊ី ជីនពីង និងលោក ជាំង ហ្សេមីន ក្នុងពិធីសមាជរបស់បក្ស កាលពីឆ្នាំ 2017

មេដឹកនាំចិន លោក ជាំង ជាំង ហ្សេមីន ចាប់ដៃជាមួយព្រះអង្គម្ចាស់ Charles ក្នុងពិធីប្រគល់ទីក្រុងហុងកុងទៅឱ្យ ប្រទេសចិន វិញ នៅថ្ងៃទី 01 ខែកក្កដា ឆ្នាំ 1997

November 30, 2022

ក្រុមហ៊ុន Total Eren គ្រោងបង្កើនការវិនិយោគលើវិស័យថាមពលបៃតងនៅ កម្ពុជា

ក្រុមហ៊ុន Total Eren នឹងបង្កើនការវិនិយោគទៅលើថាមពលកកើតឡើងវិញនៅ កម្ពុជា ស្របពេលដែល អគ្គិសនីកម្ពុជា ក៏កំពុងជំរុញការអភិវឌ្ឍថាមពលពន្លឺព្រះអាទិត្យ ដើម្បីចូលរួមចាប់គោលដៅបន្សាបកាបូននៅឆ្នាំ 2050។

នៅព្រឹកថ្ងៃទី 30 វិច្ឆិកានេះ ក្នុងវេទិកាស្ដីពីឱកាសថ្មីសម្រាប់ថាមពលកកើតឡើងវិញ និងការពង្រឹងបណ្ដាញអគ្គិសនីនៅ កម្ពុជា ប្រធានគម្រោងហិរញ្ញវត្ថុនៃក្រុមហ៊ុន Total Eren លោក Gregory Thomassin បានលើកឡើងថា ក្រុមហ៊ុននេះកំពុងស្វែងរកឱកាសដើម្បីបង្កើនការវិនិយោគលើវិស័យថាមពលបៃតងនៅ កម្ពុជា។ លោកបន្តថា មុននេះ Total Eren បានវិនិយោគលើឧទ្យានថាមពលពន្លឺព្រះអាទិត្យមួយ ទំហំ 74 មេហ្គាវ៉ាត់ លើផ្ទៃដី 60 ហិកតា នៅ ខេត្តបាត់ដំបងរួចហើយ។

ស្ថានីយអគ្គិសនីដើរដោយថាមពលព្រះអាទិត្យ របស់ Total Eren នៅ ខេត្តបាត់ដំបង

យោងតាម ក្រុមប្រឹក្សាអភិវឌ្ឍកម្ពុជា មួយរយៈចុងក្រោយនេះ កម្ពុជា បានទទួលសំណើ និងអនុម័ត ក៏ដូចជាផ្ដល់វិញ្ញាបនបត្រជូនដល់ក្រុមហ៊ុនមួយចំនួនដែលមានគម្រោងផលិតផ្ទាំងសូឡានៅ កម្ពុជា។ គិតមកដល់បច្ចុប្បន្ន កម្ពុជា មានការវិនិយោគលើវិស័យថាមពលព្រះអាទិត្យចំនួន 7 គម្រោង ដែលបាន និងកំពុងតភ្ជាប់បណ្តាញផ្គង់ផ្គត់អគ្គសនី។

អគ្គនាយកអគ្គិសនីកម្ពុជា ឯកឧត្តម កែវ រតនៈ បានឱ្យដឹងថា ថាមពលកកើតឡើងវិញនៅ កម្ពុជា កំពុងត្រូវបានអភិវឌ្ឍន៍ជាបន្តបន្ទាប់ ហើយ កម្ពុជា នឹងសម្រេចឱ្យបាននូវគោលដៅកាត់បន្ថយការបំភាយឧស្ម័នផ្ទះកញ្ចក់ តាមដែលអាចធ្វើទៅបាននៅឆ្នាំ 2050 ក្នុងនោះ កម្ពុជា ប្ដេជ្ញាផលិតអគ្គិសនីបៃតងឱ្យបាន 2 ជីហ្គាវ៉ាត់៕

November 30, 2022

BMW ចំណាយ 2 ពាន់លានដុល្លារដើម្បីសង់រោងចក្រផលិតថ្មសម្រាប់រថយន្តអគ្គិសនី

រោងចក្រផលិតថ្មផ្ទុកថាមពលសម្រាប់ឡានអគ្គិសនីរបស់ក្រុមហ៊ុន BMW នៅ Debrecen គឺជាគ្រឹះសំខាន់នៅក្នុងកិច្ចប្រឹងប្រែងក្នុងការប្រកួតប្រជែងជាមួយនឹង Tesla។

BMW AG កំពុងតែបង្កើនទ្វេដងនូវខ្ទង់ប្រាក់វិនិយោគទៅលើរោងចក្រនៅ ហុងគ្រី ពោលគឺឡើងដល់ 2.1 ពាន់លានដុល្លារអាម៉េរិក។ ក្រុមហ៊ុននេះនឹងសាងសង់រោងចក្រដំឡើងថ្មតង់ស្យង់ខ្ពស់មួយទៀតដែលបង្កើតការងារបានជាង 500 កន្លែង។

យោងតាម BMW ការដែលដាក់រោងចក្រដំឡើងថ្មនៅទីក្រុង Debrecen របស់ ប្រទេសហុងគ្រី នេះ នឹងជួយឱ្យពួកគេមានភាពងាយស្រួលសម្រាប់កម្មភាពដឹកជញ្ជូនដើម្បីផលិតរថយន្តអគ្គិសនីជំនាន់បន្ទាប់។ ទាំងរថយន្ត ទាំងថ្ម គ្រោងនឹងត្រូវបានផលិតចាប់ពីចុងឆ្នាំ 2025 នៅរោងចក្រថ្មីនេះ។

រោងចក្រថ្មីនៅ Debrecen គឺជាគ្រឹះសំខាន់ក្នុងការប្រឹងប្រែងរបស់ BMW ដើម្បីប្រកួតប្រជែងនឹងក្រុមហ៊ុនផលិតរថយន្តអគ្គិសនី Tesla របស់ លោក អ៊ីឡុន ម៉ាស។ ដោយមានរោងចក្រថ្មី (ផលិតរថយន្តអគ្គិសនី) BMW កំណត់គោលដៅកាត់បន្ថយការចំណាយបានពាក់កណ្ដាលទៅលើសម្បករថយន្ត និងបង្កើនពេលវេលាផ្ទុកថាមពលរបស់ថ្ម ព្រមទាំងបង្កើនល្បឿនក្នុងការបញ្ចូលថាមពលថ្មីឱ្យបានលឿនជាងបច្ចុប្បន្ន 30% ធៀបនឹងម៉ូដែលសព្វថ្ងៃ។

BMW មានផែនការបញ្ចេញរថយន្តអគ្គិសនី 150,000 គ្រឿងជារៀងរាល់ឆ្នាំពីរោងចក្រនៅ Debrecen។ នេះនឹងក្លាយជារោងចក្រថ្មីដំបូងរបស់ពួកគេនៅ អឺរ៉ុប ក្នុងអំឡុង 2 ទសវត្សរ៍កន្លងមកនេះ៕

November 30, 2022

អតីត CEO របស់ផ្សារជួញដូរប្រាក់ឌីជីថលគ្រីបតូ FTX ៖ «ខ្ញុំនៅសល់តែ 100,000 ដុល្លារគត់ ក្នុងគណនី

នៅក្នុងពេល «ឡើងដល់កំពូល» Sam Bankman-Fried ដែលកាលណោះគឺជានាយកប្រតិបត្តិរបស់ FTX មានទ្រព្យរហូតដល់ 26 ពាន់លានដុល្លារអាម៉េរិក ប៉ុន្តែបច្ចុប្បន្ន នៅសល់តែ 100,000 ដុល្លារប៉ុណ្ណោះ។

មួយរយៈចុងក្រោយនេះ ព័ត៌មានស្ដីពី Sam Bankman-Fried អតីត CEO របស់ផ្សារជួញដូរប្រាក់ឌីជីថលគ្រីបតូ FTX ដែលទើបតែបានប្រកាសក្ស័យធន តែងទទួលបានចំណាប់អារម្មណ៍ច្រើនពីសាធារណជន។ ថ្មីៗនេះ នៅលើទំព័រ Axios កាលពីថ្ងៃទី 28 វិច្ឆិកា Bankman-Fried ឱ្យដឹងថា ទ្រព្យបច្ចុប្បន្នរបស់គាត់ថយចុះនៅត្រឹម 100,000 ដុល្លារគត់ ក្រោយការដួលរលំរបស់ FTX។

មុននោះ នៅក្នុងពេលប្រាក់ឌីជីថលគ្រីបតូមានការពេញនិយមខ្លាំង Sam Bankman-Fried មានទ្រព្យរហូតដល់ 26 ពាន់លានដុល្លារអាម៉េរិក និងធ្លាប់ជាមហាសេដ្ឋីវ័យក្រោម 30 ដែលមានទ្រព្យច្រើនជាងគេលើពិភពលោក នៅក្នុងវិស័យប្រាក់ឌីជីថលគ្រីបតូ។

អតីត CEO និងជាស្ថាបនិករបស់ FTX បានរងផលប៉ះពាល់ធ្ងន់ធ្ងរកាលពីដើមខែវិច្ឆិកា នៅពេលទ្រព្យរបស់គាត់ធ្លាក់ចុះពី 15.6 ពាន់លានដុល្លារ មកនៅត្រឹម 1 ពាន់លានដុល្លារក្នុងរយៈពេលតែមួយថ្ងៃ បន្ទាប់ពីមានព័ត៌មានថា ផ្សារជួញដូរប្រាក់ឌីជីថល FTX ត្រូវការជំនួយសង្គ្រោះ។

បច្ចុប្បន្ន ស្ថានភាពហិរញ្ញវត្ថុរបស់អតីតមហាសេដ្ឋីរូបនេះ ពិតជាដុនដាបខ្លាំងណាស់ ព្រោះថា «គ្រប់យ៉ាង» របស់គាត់គឺភ្ជាប់ទៅនឹង FTX ជាក្រុមហ៊ុនដែលទើបតែបានប្រកាសក្ស័យធន។

FTX បានចុះឈ្មោះសុំក្ស័យធន ចំណែក Bankman-Fried ក៏បានលាលែងពីតំណែង CEO របស់ក្រុមហ៊ុន FTX កាលពីថ្ងៃទី 11 វិច្ឆិកា ក្រោយការប្រឹងប្រែងជួយសង្គ្រោះ ប៉ុន្តែមិនបានសម្រេច។

ឯកសារកាលពីថ្ងៃទី 19 វិច្ឆិកា បង្ហាញថា FTX កំពុងជំពាក់បំណុលសរុបជាង 10 ពាន់លានដុល្លារអាម៉េរិក ក្នុងនោះមានម្ចាស់បំណុលធំចំនួន 50 ម្ចាស់ ដែលមានតម្លៃជាង 3 ពាន់លានដុល្លារ។ អតិថិជន និងអ្នកវិនិយោគប្រហែល 1 លាននាក់ និងស្ថាប័ន បានក្លាយជាជនរងគ្រោះរបស់ FTX៕

November 30, 2022

ប្រទេសនៅបាល់ទិច អំពាវនាវដល់សម្ព័ន្ធយោធាណាតូ អនុញ្ញាតឱ្យ អនុយក្រែន វាយប្រហារចូលទឹកដីរុស្ស៊ី

ក្នុងកិច្ចសម្ភាសនៅខាងក្រៅកិច្ចប្រជុំរបស់ក្រុមរដ្ឋមន្ត្រីការបរទេសណាតូ នៅ Bucharest កាលពីថ្ងៃទី 29 វិច្ឆិកា រដ្ឋមន្ត្រីឡេតូនី Edgars Rinkevics បានអំពាវនាវដល់ ណាតូ «អនុញ្ញាត» ឱ្យ អ៊ុយក្រែន ប្រើប្រាស់អាវុធដែលផ្គត់ផ្គង់ដោយលោកខាងលិច ដើម្បីវាយប្រហារចូលជ្រៅទៅក្នុងទឹកដីរបស់ រុស្ស៊ី។

ឆ្លើយតបនឹងទំព័រ Bloomberg រដ្ឋមន្ត្រីការបរទេស Rinkevics ស្នើថា អ៊ុយក្រែន គួរតែប្រើប្រាស់អាវុធដើម្បីវាយប្រហារទៅលើគោលដៅដែល មូស្គូ ប្រើប្រាស់ក្នុងការវាយប្រហារដោយមីស៊ីលសំដៅលើហេដ្ឋារចនាសម្ព័ន្ធរបស់ អ៊ុយក្រែន។

«យើងគួរតែអនុញ្ញាតឱ្យ អ៊ុយក្រែន ប្រើប្រាស់អាវុធសំដៅលើគោលដៅដាក់មីស៊ីល ឬព្រលានយន្ត (របស់ រុស្ស៊ី)» លោក Rinkevics ថ្លែងដូច្នេះ។

រដ្ឋមន្ត្រីការបរទេសរបស់ ប្រទេសឡេតូនី លោក Edgars Rinkevics

រដ្ឋមន្ត្រីឡេតូនី បន្ថែមថា ណាតូ «មិនគួរខ្លាច» ភាពតានតឹងដែលនឹងកើនឡើងឡើយ បើទោះ ក្រុមមន្ត្រីនៅ មូស្គូ ធ្លាប់បានព្រមានច្រើនលើកថា ការផ្ដល់អាវុធទៅឱ្យ អ៊ុយក្រែន ពីសំណាក់បស្ចិមលោក នឹងកាន់តែធ្វើឱ្យសង្គ្រាមអូសបន្លាយពេលយូរ។

បច្ចុប្បន្ន ភាគីខាងរុស្ស៊ី និង ណាតូ មិនទាន់មានប្រតិកម្ម ឬអធិប្បាយអ្វីនៅឡើយ ទាក់ទងនឹងការលើកឡើងរបស់ រដ្ឋមន្ត្រីការបរទេសឡេតូនី។

យោងតាម RT ឡេតូនី និងបណ្ដាប្រទេសនៅតំបន់បាល់ទិច គឺជាភាគីដែលគាំទ្រយ៉ាងខ្លាំងក្លាចំពោះ ទីក្រុងកៀវ នៅក្នុងសង្គ្រាមរវាង រុស្ស៊ី និង អ៊ុយក្រែន។ មន្ត្រីកំពូលៗរបស់ប្រទេសទាំងនេះ បានទៅកាន់ អ៊ុយក្រែន ច្រើនលើកមកហើយ ដើម្បីសំដែងការគាំទ្ររបស់ពួកគេ។

ប្រទេសទាំងឡាយនៅតំបន់បាល់ទិច រួមមាន អេស្តូនី, ឡេតូនី និង លីទុយអានី គឺសុទ្ធតែជាសមាជិករបស់ ណាតូ ហើយប្រទេសទាំង 3 នេះក៏មានព្រំដែនជាប់នឹងទឹកដីរបស់ រុស្ស៊ី ផងដែរ៕

November 30, 2022

ស្ថានីយអវកាស Tiangong របស់ ចិន ចាប់ផ្ដើមដំណើរការពេញលេញ ពេលយាន Shenzhou 15 បានហោះទៅដល់

រ៉ុក្កែត Long March 2F នាំយានអវកាស Shenzhou រួមនឹងអ្នកអវកាស 3 រូប ពីមជ្ឈណ្ឌលបាញ់បង្ហោះផ្កាយរណប Juiquan នៅតំបន់សមុទ្រខ្សាច់ Gobi នៅវេលាម៉ោង 22 និង 08 នាទី ថ្ងៃទី 29 វិច្ឆិកា (ម៉ោងនៅ កម្ពុជា) ឡើងទៅកាន់ស្ថានីយអវកាសចិន Tiangong។

នៅម៉ោងប្រហែល 22 និង 18 នាទី យានអវកាស Shenzhou 15 ដែលដឹកអវកាសចរ 3 រូប បានផ្ដាច់ខ្លួនពីរ៉ុក្កែត។ អ្នកអវកាស Fei Junlong (ប្រធានក្រុម), Deng Qingming និង Zhang Lu បានចាប់ផ្ដើមចូលចតនៅឯស្ថានីយអវកាស Tiangong នៅវេលាម៉ោង 4 និង 42 នាទី ព្រឹកនេះ។ ម៉ោង 6 និង 33 នាទី ក្រុមអវកាសចរ Shenzhou 14 បានបើកទ្វារទទួលស្វាគមន៍ដំណើរមកដល់របស់ក្រុម Shenzhou 15។ ដូច្នេះ បច្ចុប្បន្ន នៅក្នុងស្ថានីយអវកាស Tiangong របស់ ប្រទេសចិន មានអ្នកអវកាសសរុប 6 នាក់។

បេសកកម្មរបស់ Shenzhou 15 បង្ហាញថា ស្ថានីយអវកាសចិន ចាប់ផ្ដើមដំណើរការពេញលេញ។ ក្រុម Shenzhou 15 នឹងធ្វើការពិសោធជាង 100 ដោយប្រើប្រាស់ទូវិទ្យាសាស្ត្រចំនួន 24 ដែលត្រូវបានរចនាឡើងជាពិសេសនៅក្នុងបណ្ដាម៉ូឌុល Wentian និង Mengtian របស់ស្ថានីយអវកាស Tiangong។

Shenzhou 15 គឺជាបេសកកម្មចុងក្រោយក្នុងចំណោមការបាញ់បង្ហោះចំនួន 11 លើកដើម្បីស្ថាបនាស្ថានីយអវកាស Tiangong ហើយក៏ជាការហោះហើរចុងក្រោយដើម្បីដាក់ឱ្យស្ថានីយនេះដំណើរការពេញលេញ៕

November 30, 2022

ផ្លូវល្បឿនលឿនភ្នំពេញ-សីហនុ ផ្ដល់ឧបករណ៍ ETC-OBU ដើម្បីប្រើគន្លង ETC ដោយឥតគិតថ្លៃ បំណងចូលរួមទប់ស្កាត់ការកកស្ទះចរាចរណ៍នៅបញ្ជរបង់ប្រាក់

«ទទួលយកឧបករណ៍ ETC-OBU ដោយឥតគិតថ្លៃ ដើម្បីប្រើប្រាស់គន្លង ETC សម្រាប់ចេញចូលផ្លូវល្បឿនលឿនភ្នំពេញ-ក្រុងព្រះសីហនុ (ចាប់ពីថ្ងៃទី 28 វិច្ឆិកា ឆ្នាំ 2022 ដល់ 01 មករា 2023)» ប្រកាសរបស់ក្រុមហ៊ុនគ្រប់គ្រងផ្លូវល្បឿនលឿនភ្នំពេញ-ក្រុងព្រះសីហនុ ផ្សាយនៅព្រឹកថ្ងៃទី 30 វិច្ឆិកា 2022។

ដើម្បីចូលរួមទប់ស្កាត់ការកកស្ទះចរាចរណ៍នៅបញ្ជរបង់ប្រាក់ ក៏ដូចជាផ្តល់ភាពងាយស្រួល ជូនដល់បងប្អូនអ្នកបើកបរ នៅលើផ្លូវល្បឿនលឿន ក្រុមហ៊ុនផ្លូវល្បឿនលឿនភ្នំពេញ-ក្រុងព្រះសីហនុ បានរៀបចំជាការផ្តល់ជូនពិសេស នូវការបំពាក់ឧបករណ៍ ETC-OBU ជូនដល់បងប្អូនប្រជាពលរដ្ឋដោយឥតគិតថ្លៃ ចាប់ពីថ្ងៃទី 28 ខែវិច្ឆិកា 2022 រហូតដល់ថ្ងៃទី 01 មករា 2023 ខាងមុខនេះ នៅគ្រប់បញ្ជរបង់ប្រាក់ទាំង 8 ទីតាំង នៃផ្លូវល្បឿនលឿន។

ក្រុមហ៊ុនផ្លូវល្បឿនលឿនភ្នំពេញ-ក្រុងព្រះសីហនុ បានឱ្យដឹងថា «ដើម្បីទទួលបានឧបករណ៍ ETC-OBU សូមបងប្អូនភ្ជាប់មកជាមួយនូវអត្តសញ្ញាណបណ្ណម្ចាស់យានយន្ត បណ្ណសំគាល់យានយន្ត ឬវិញ្ញាបនបត្រត្រួតពិនិត្យបច្ចេកទេសយានយន្ត (ឆៀក)»។

ចំពោះគន្លងនេះ បងប្អូនអាចបញ្ចូលសមតុល្យទៅក្នុងផ្លាកលេខសម្គាល់យានយន្តជាមុន តាមកម្មវិធីធនាគារក្នុងទូរស័ព្ទដៃ (Mobile Banking) នៃគ្រឹះស្ថានហិរញ្ញវត្ថុ និងធនាគារដៃគូ របស់ក្រសួងសាធារណការ និងដឹកជញ្ជូន។

បច្ចុប្បន្នមានគ្រឹះស្ថានដៃគូ ចំនួន 7 ដែលបានដាក់ឱ្យប្រើប្រាស់ នូវកម្មវិធី Mobile Banking ដើម្បីបញ្ចូលសមតុល្យទឹកប្រាក់ តាមរយៈផ្លាកលេខសម្គាល់យានយន្ត ក្នុងនោះរួមមាន៖ ធនាគារ ជីបម៉ុង (Chip Mong Bank), ធនាគារ អេស៊ីលីដា (ACLEDA Bank), ធនាគារ វឌ្ឍនៈអាស៊ីចំកាត់ (ABA Bank), ធនាគារវីង(Wing Bank), ធនាគារ វឌ្ឍនៈ (VATTANAC Bank), ធនាគារកាណាឌីយ៉ា (Canadia Bank) និង លីហួរវេរលុយ។

សូមចូលទៅកាន់គេហទំព័រដែលអាចប្រើប្រាស់ធនាគារទូទាត់កម្រៃប្រើប្រាស់ផ្លូវល្បឿនលឿនភ្នំពេញ-ក្រុងព្រះសីហនុ បានតាម https://ew.mpwt.gov.kh ។

បន្ថែមពីលើជម្រើសការប្រើប្រាស់គន្លងផ្លូវ ETC បងប្អូនក៏អាចជ្រើសយកការចេញចូលតាមគន្លង ANPR ផងដែរ ដែលតម្រូវអោយបញ្ចូលសមតុល្យជាមុនទៅក្នុងផ្លាកលេខដូចគ្នា។

*ទំនាក់ទំនង៖ ⁃ ព័ត៌មានពីសេវាកម្ម៖ 1399, ព័ត៌មានទូទៅ៖ 1275

November 30, 2022

សារព័ត៌មានអង់គ្លេស និយាយថា មហាសេដ្ឋីចិន Jack Ma កំពុងរស់លាក់ខ្លួននៅ តូក្យូ

មហាសេដ្ឋីចិន Jack Ma កំពុងតែរស់លាក់ខ្លួនដោយសប្បាយ កាត់បន្ថយវត្តមាននៅទីសាធារណៈក្នុងរយៈពេលជិត 6 ខែកន្លងនៅ រាជធានីរបស់ ប្រទេសជប៉ុន នេះបើតាម Financial Times។

Financial Times ដែលមានទីស្នាក់ការកណ្ដាលនៅ ក្រុងឡុងដ៍ ប្រទេសអង់គ្លេស និងជាកម្មសិទ្ធិរបស់ក្រុមហ៊ុន Nikkei ជប៉ុន កាលពីថ្ងៃទី 29 វិច្ឆិកា បានចុះផ្សាយថា ក្នុងអំឡុងជិតកន្លះឆ្នាំដែលបានរស់នៅក្នុង រាជធានីតូក្យូ មហាសេដ្ឋី Jack Ma រួមនឹងគ្រួសារទៅកាន់តំបន់សម្រាកលំហែកាយនៅជាយក្រុងជាញឹកញាប់ ហើយជួនកាលទៅកាន់ សហរដ្ឋអាម៉េរិក និង អ៊ីស្រាអែល។

នៅ តូក្យូ ស្ថាបនិករបស់ Alibaba រស់នៅដោយស្ងាត់ស្ងៀម ចៀសវាងការចាប់អារម្មណ៍របស់សាធារណជន។ មហាសេដ្ឋីចិនរូបនេះ មានចុងភៅ និងក្រុមអង្គរក្សផ្ទាល់ខ្លួន។

លោក Jack Ma ប្រើប្រាស់សេវាកម្មនៅក្លឹបមួយចំនួននៅខណ្ឌ Ginza និងតំបន់ហិរញ្ញវត្ថុ Marunouchi។ ក្នុងនោះ ក្លឹបនៅ Ginza គឺជាទីកន្លែងសម្ងាត់សម្រាប់ក្រុមអភិជនចិន នៅពេលពួកគេស្នាក់នៅ ឬបំពេញបេសកកម្មរយៈពេលយូរនៅ រាជធានីរបស់ ជប៉ុន។

ប្រភពព័ត៌មានឱ្យដឹងថា មិត្តភ័ក្ដិរបស់លោក Ma នៅ ប្រទេសចិន និយាយថា មហាសេដ្ឋីរូបនេះចាប់ផ្ដើមទម្លាប់គូរគំនូរដើម្បី «សម្លាប់ពេលវេលា»។ អ្នកខ្លះថា លោក Ma កំពុងពង្រីកផលប្រយោជន៍ផ្នែកជំនួញរបស់គាត់នៅ ប្រទេសជប៉ុន។ លោក Ma បានផ្ទេរអំណាចក្នុងការគ្រប់គ្រងក្រុមហ៊ុន Alibaba និង Ant ទៅឱ្យមនុស្សជំនាន់ថ្មី។

មូលនិធិ Jack Ma និងក្រុមហ៊ុន Ant មិនបានឆ្លើយតបនឹងសំណើសុំបកស្រាយអំពីព័ត៌មានខាងលើនេះនៅឡើយ។

លោក Jack Ma អាយុ 58 ឆ្នាំ ធ្លាប់ជាមហាសេដ្ឋីលំដាប់ទីមួយនៅ ប្រទេសចិន។ លោក Ma គឺជាស្ថាបនិករបស់ Alibaba និង Ant Gourp ជាក្រុមហ៊ុនដែលមានវឌ្ឍនភាពឡើងដល់ចំណុចកំពូលក្នុងវិស័យឯកជន និងធ្លាប់ត្រូវបានវាយតម្លៃខ្ពស់ជាងបណ្ដាក្រុមហ៊ុននៅ សហរដ្ឋអាម៉េរិក លើកលែងតែ Apple, Amazon និង Google។

ក៏ប៉ុន្តែ អាជ្ញាធរចិន កាលពី 2 ឆ្នាំមុន បានចាប់ផ្ដើមបញ្ចេញឥរិយាបថរឹតបន្តឹងទៅលើបណ្ដាក្រុមហ៊ុនបច្ចេកវិទ្យា ក្នុងនោះ ក្រុមហ៊ុន Ant Group របស់លោក Ma ក៏ត្រូវបានផ្អាកដំណើរការ IPO ដែលមានតម្លៃ 37 ពាន់លានដុល្លារអាម៉េរិក ទៅតាមបញ្ជាផ្ទាល់របស់ ប្រធានាធិបតីចិន។

Alibaba ក៏ត្រូវបានអាជ្ញាធរចិន ពិន័យ 2.8 ពាន់លានដុល្លារអាម៉េរិក ដោយចោទថា បានរំលោភច្បាប់ប្រឆាំងការរកស៊ីផ្ដាច់មុខ។ មុននោះ លោក Ma ត្រូវបានគេសំគាល់ឃើញថា ជំទាស់នឹងការកំណត់ស្ដីពីបច្ចេកវិទ្យា និងហិរញ្ញវត្ថុរបស់ ប្រទេសចិន។

ចាប់តាំងពីពេលនោះមក លោក Jack Ma ហាក់បាត់ខ្លួនពីការតាមដានរបស់សាធារណជន ហើយកន្លែងស្នាក់នៅរបស់លោកបានក្លាយជាប្រធានបទដែលមានមនុស្សចាប់អារម្មណ៍ច្រើន៕

November 30, 2022

អាយុទើបតែ 30 សោះ ទទួលបានមរតកជិត 16 ពាន់លានដុល្លារពី Red Bull

Mark Mateschitz ទទួលមរតកជិត 50% នៃភាគហ៊ុន Red Bull ពីឪពុក Dietrich Mateschitz និងក្លាយជាមនុស្សដែលរស់ក្នុងទំនាន់សហស្សវត្សរ៍ មានទ្រព្យច្រើនជាងគេនៅ អឺរ៉ុប។

ជាកូនរបស់មហាសេដ្ឋី Dietrich Mateschitz ដែលបានទទួលមរណភាព ទើប Mark បានទទួលមរតក 49% នៃភាគហ៊ុន Red Bull ដែលឪពុករបស់គាត់ជាសហស្ថាបនិក។ ចំណែកភាគហ៊ុនដែលនៅសល់គឺជាកម្មសិទ្ធិរបស់អ្នកជំនួញជនជាតិថៃ Chaleo Yoovidgya។

ការស្នងមរតកជាភាគហ៊ុននៃក្រុមហ៊ុនផលិតភេសជ្ជៈប៉ូវកម្លាំងធំជាងគេលើពិភពលោក រួមនឹងក្រុមប្រណាំងឡានប្រភេទ Formula One (F1) ចំនួន 2 នាំឱ្យ Mark Mateschitz មានទ្រព្យសរុបឡើងដល់ 15.7 ពាន់លានដុល្លារអាម៉េរិក នេះបើតាម Bloomberg Billionaires Index។ បើគិតតាមទិន្នន័យជាក់ស្ដែង មកដល់ថ្ងៃទី 29 វិច្ឆិកា 2022 លោក Mark Mateschitz គឺជាអ្នកមានជាងគេលំដាប់ទី 90 នៅលើពិភពលោក ដោយមានទ្រព្យ 16.4 ពាន់លានដុល្លារអាម៉េរិក។ គាត់ក៏ជាមហាសេដ្ឋីដែលមានទ្រព្យច្រើនជាងគេនៅ ប្រទេសអូទ្រីស។

លោក Dietrich Mateschitz និងកូនប្រុស Mark Mateschitz

មុននោះ កាលពីថ្ងៃទី 22 តុលា សហស្ថាបនិករបស់ Reb Bull លោក Dietrich Mateschitz បានទទួលមរណភាពក្នុងអាយុ 78 ឆ្នាំ។ យោងតាម Fortune លោក Mark Mateschitz បានក្លាយជាមហាសេដ្ឋីដែលស្ថិតក្នុងក្រុមមនុស្ស «រស់ឆ្លងសហស្សវត្សរ៍» (អ្នកកើតក្នុងអំឡុងទសវត្សរ៍ឆ្នាំ 1980 ដល់ពាក់កណ្ដាលទសវត្សរ៍ឆ្នាំ 1990) ដែលមានទ្រព្យច្រើនបំផុតនៅ អឺរ៉ុប និងទី 4 ក្នុងពិភពលោក៕

November 30, 2022

សហរដ្ឋអាម៉េរិក អនុម័តការលក់អាវុធតម្លៃ 1 ពាន់លានដុល្លារដល់ កាតា

មន្ទីរបញ្ចកោណ អនុម័តការលក់យន្តហោះគ្មានមនុស្សបើក (UAV) ខ្នាតតូច និងប្រព័ន្ធប្រឆាំងអាវុធប្រភេទនេះក្នុងតម្លៃ 1 ពាន់លានដុល្លារ ទៅឱ្យ ប្រទេសកាតា។

«ការជួញដូរដែលត្រូវបានស្នើឡើងនេះនឹងបង្កើនកម្លាំងរបស់ កាតា នៅក្នុងការទប់ទល់នឹងការគំរាមកំហែងនាបច្ចុប្បន្ន និងអនាគត ដោយមានការផ្ដល់នូវសមត្ថភាពបាញ់ទម្លាក់យន្តហោះគ្មានមនុស្សបើក ដោយប្រើប្រាស់ទាំងកម្លាំងនៃចលនវត្ថុ ទាំងអេឡិចត្រូនិច» ការិយាល័យសហការផ្នែកសន្តិសុខការពារជាតិ (DSCA) នៃ ក្រសួងការពារជាតិអាម៉េរិក ប្រកាសកាលពីថ្ងៃទី 29 វិច្ឆិកាដូច្នេះ។

ក្រសួងការបរទេសអាម៉េរិក មុននោះ បានអនុម័តការលក់អាវុធខាងលើទៅឱ្យ កាតា ហើយ DSCA បានបញ្ជូនសំណើនេះឡើងទៅកាន់ សភាអាម៉េរិក ដើម្បីអនុម័តបន្ត។

«ការចំណាយសរុបនៃកម្មវិធីនេះគឺ 1 ពាន់លានដុល្លារអាម៉េរិក។ ការជួញដូរដែលបានស្នើឡើងនឹងជួយគាំទ្រដល់គោលនយោបាយការបរទេស និងគោលដៅសន្តិសុខជាតិរបស់ សហរដ្ឋអាម៉េរិក តាមរយៈការលើកកម្ពស់សន្តិសុខរបស់ប្រទេសស្និទ្ធស្នាលមួយ» DSCA អះអាងបន្ថែម។

ការជួញដូរអាវុធដែល សហរដ្ឋអាម៉េរិក កំពុងអនុម័តសម្រាប់ កាតា មានយន្តហោះ UAV ខ្នាតតូច Coyote Block 2 ចំនួន 200 គ្រឿង រួមនឹងបណ្ដាទម្ររបស់ប្រព័ន្ធ Coyote, ប្រព័ន្ធប្រយុទ្ធអេឡិចត្រូនិចប្រឆាំងអាវុធគ្មានមនុស្សបើកបរ (CUAEWS) និងឧបករណ៍ពាក់ព័ន្ធ។

ក្រៅពីនេះ ការជួញដូរអាវុធខាងលើក៏មានទាំងប្រព័ន្ធប្រឆាំង UAV FS-LIDS ដែលមានសមត្ថភាពស្វែងរកឃើញ UAV ខ្នាតតូច ហោះទាប និងយឺត រួមនឹងការបែងចែកប្រភេទ និងចាប់ទម្លាក់ដោយប្រើប្រាស់អេឡិចត្រូនិចផងដែរ។

ប្រកាសរបស់ DSCA ត្រូវបានធ្វើឡើងក្រោយពីក្រុម Houthi នៅ Yemen ដែលគាំទ្រដោយ អ៊ីរ៉ង់ ត្រូវបានចោទប្រកាន់ជាច្រើនលើកថា បានប្រើប្រាស់ UAV វាយប្រហារលើគោលដៅនានានៅ តំបន់ឈូងសមុទ្រពែក្ស៕

November 30, 2022

Author: សឿន សំណាង