សឿន សំណាង - La Reine Media

ឥណ្ឌូណេស៊ីត្រៀមស្ថានីយបញ្ចូលថាមពលរថយន្តអគ្គិសនីសម្រាប់កិច្ចប្រជុំកំពូលអាស៊ាន

ក្រុមហ៊ុនអគ្គិសនីឥណ្ឌូណេស៊ីនឹងផ្គត់ផ្គង់ស្ថានីយបញ្ចូលថាមពលចំនួន 100 គ្រឿង សម្រាប់បម្រើដល់រថយន្តអគ្គិសនី និងម៉ូតូអគ្គិសនីប្រមាណ 400 គ្រឿង ដែលនឹងត្រូវប្រើប្រាស់ក្នុងកិច្ចប្រជុំកំពូលអាស៊ាន (ASEAN) នៅប៉ុន្មានខែខាងមុខ។

ក្រុមហ៊ុនអគ្គិសនីឥណ្ឌូណេស៊ី (PT PLN) ប្រកាសថា បានសហការជាមួយសាខាអគ្គិសនីខេត្ត Nusa Tenggara ខាងកើត (NTT) ត្រៀមជាស្រេចស្ថានីយបញ្ចូលថាមពលសម្រាប់រថយន្តអគ្គិសនី (SPKLU) ដើម្បីបម្រើដល់កិច្ចប្រជុំកំពូលរបស់សមាគមប្រជាជាតិអាស៊ីអាគ្នេយ៍ (ASEAN) 2023 ដែលនឹងធ្វើឡើងនៅ Labuan Bajo ស្រុក Manggarai ខេត្ត NTT។

អគ្គនាយិកា PT PLN តំបន់ NTT លោកស្រី Fintje Lumembang កាលពីថ្ងៃទី 12 មីនាបាននិយាយថា «PLN នឹងផ្គត់ផ្គង់ SPKLU ចំនួន 100 គ្រឿងសម្រាប់បម្រើដល់រថយន្តអគ្គិសនីចំនួន 275 គ្រឿងដែលត្រូវប្រើប្រាស់ក្នុងការដឹកក្រុមមន្ត្រីតំណាងប្រទេសនានា ក៏ដូចជាបម្រើដល់បេសកកម្មរក្សាសន្តិសុខ និងការគ្រប់គ្រង»។

ដើម្បីចូលរួមបេសកកម្មអមដំណើរ និងល្បាតនៅក្នុងអំឡុងកិច្ចប្រជុំខាងលើ PLN ក៏នឹងប្រើប្រាស់ម៉ូតូអគ្គិសនីប្រហែល 105 គ្រឿងផងដែរ។

យោងតាមផែនការ កិច្ចប្រជុំកំពូលអាស៊ាន 2023 លើកទី 42 នឹងត្រូវបានធ្វើឡើងនៅ Labuan Bajo ក្នុងខែឧសភាខាងមុខ។ ចំណែកកិច្ចប្រជុំកំពូលបន្ទាប់គ្រោងនឹងធ្វើឡើងនៅរដ្ឋធានីហ្សាការតានៅខែកញ្ញា 2023៕

March 13, 2023

BYD សម្ពោធបើកការដ្ឋានសាងសង់រោងចក្រផលិតរថយន្តអគ្គិសនីនៅប្រទេសថៃ

កាលពីថ្ងៃទី 11 មីនា ក្រុមហ៊ុនផលិតរថយន្តល្បីឈ្មោះរបស់ចិន BYD បានសម្ពោធបើកការដ្ឋានសាងសង់រោងចក្រផលិតរថយន្តអគ្គិសនីដំបូងរបស់ខ្លួននៅប្រទេសថៃ ដែលនេះគឺជាសកម្មភាពថ្មីបំផុតរបស់ក្រុមហ៊ុនផលិតរថយន្តចិន ដើម្បីពង្រីកទីផ្សាររបស់ខ្លួននៅអាស៊ីអាគ្នេយ៍។

រោងចក្រដែលស្ថិតនៅក្នុងតំបន់របៀងសេដ្ឋកិច្ចភាគខាងកើតប្រទេស និងនៅក្នុងខេត្ត Rayong នេះ គ្រោងនឹងក្លាយជាមជ្ឈមណ្ឌលផលិត និងចែកចាយរថយន្តអគ្គិសនីសម្រាប់ប្រទេសថៃ និងបណ្ដាប្រទេសជិតខាង ក៏ដូចជាតំបន់អាស៊ីអាគ្នេយ៍ និងបណ្ដាតំបន់ដទៃទៀត។

គិតត្រឹមឆ្នាំ 2022 ក្រុមហ៊ុន BYD លក់រថយន្តអគ្គិសនីបានលើសពី 1.86 លានគ្រឿង កើន 208.6% បើធៀបនឹងឆ្នាំ 2021។

កាលពីឆ្នាំមុន BYD បាននាំ Atto 3 ដែលជារថយន្តអគ្គិសនីដ៏ពេញនិយមរបស់ខ្លួន ចូលទៅកាន់ទីផ្សារថៃ។ Liu Xueliang អគ្គនាយកផ្នែកលក់របស់ BYD ប្រចាំអាស៊ី-ប៉ាស៊ីហ្វ៊ិក បាននិយាយថា ការសម្រេចចិត្តនេះរបស់ BYD គឺដើម្បី «បំផ្ទុះ» ការប្រើប្រាស់នៅប្រទេសថៃ។ ក្នុងរយៈពេល 42 ថ្ងៃ បន្ទាប់ពីចាប់ផ្ដើមលក់ BYD ទទួលបានការបញ្ជាទិញរថយន្ត Atto 3 ចំនួន 10,000 គ្រឿង។

រោងចក្រថ្មីរបស់ BYD នៅប្រទេសថៃ គ្រោងនឹងចាប់ផ្ដើមការផលិតនៅឆ្នាំ 2024 ហើយអាចផលិតបាន 150,000 គ្រឿង/ឆ្នាំ។

រាជរដ្ឋាភិបាលថៃ កន្លងមកបានដាក់គោលដៅផលិតរថយន្តអគ្គិសនីឱ្យបាន 30% នៅក្នុងចំណោមរថយន្តដែលបានផលិតក្នុងប្រទេសនេះនៅត្រឹមឆ្នាំ 2030 ដើម្បីចូលរួមកាត់បន្ថយការបំភាយឧស្ម័នផ្ទះកញ្ចក់របស់ពិភពលោក៕

March 13, 2023

អាជ្ញាធរចិនកែប្រែអណ្ដូងរ៉ែដែកទៅជាឧទ្យានជាតិបៃតង (វីដេអូ)

កាលពីថ្ងៃទី 12 មីនា មនុស្សជិត 100 នាក់បានទៅចូលរួមព្រឹត្តិការណ៍ដាំកូនឈើនៅក្នុងឧទ្យានជាតិអណ្ដូងរ៉ែ Huangshi ជាទីដែលធ្លាប់ជាអណ្ដូងកណ្ដាលវាលធំជាងគេបំផុតនៅអាស៊ី។

ថ្ងៃទី 12 មីនា គឺជាទិវាដាំរុក្ខជាតិនៅប្រទេសចិន។ នៅទីក្រុង Huangshi នៃខេត្ត Hubei ប្រទេសចិន មនុស្សជិត 100 នាក់បានទៅចូលរួមព្រឹត្តិការណ៍ដាំកូនឈើនៅក្នុងឧទ្យានជាតិអណ្ដូងរ៉ែ Huangshi។ ឧទ្យាននេះត្រូវបានស្ថាបនាក្បែរអណ្ដូងរ៉ែដែកមួយដែលមានអាយុកាលរាប់សតវត្សរ៍ និងត្រូវបានគេហៅថា អណ្ដូងរ៉ែដែក Daye។

តំបន់ខាងលើធ្លាប់ជាអណ្ដូងរ៉ែកណ្ដាលវាលធំជាងគេក្នុងទ្វីបអាស៊ី។ ក្រោយឆ្នាំ 1958 សំណល់ថ្មជាង 360 លានតោនត្រូវបានចាក់ចូលក្នុងអណ្ដូងរ៉ែនេះ។ បន្ទាប់ពីសេដ្ឋកិច្ចបានរីកចម្រើន និងការទាញយករ៉ែអស់រយៈពេលច្រើនទសវត្សរ៍ Huangshi ក៏ត្រូវបានដាក់បញ្ចូលទៅក្នុងបញ្ជី «ទីក្រុងអស់ធនធានធម្មជាតិ» កាលពីឆ្នាំ 2009។ ដើម្បីកែលំអបរិស្ថាន អាជ្ញាធរ និងប្រជាជននៅមូលដ្ឋានក៏ចាប់ផ្ដើមដាំដើមឈើនៅទីនេះ តាំងពីទសវត្សរ៍ឆ្នាំ 1980។

«ក្រោយពីបានដាំដើមឈើជាច្រើនប្រភេទ យើងឃើញថា រុក្ខជាតិមួយប្រភេទដែលហៅថា locust សមស្របបំផុត ព្រោះវាអាចសម្របខ្លួនជាមួយនឹងបរិស្ថានក្ដៅ។ ចាប់ពីពេលនោះមក យើងចាប់ផ្ដើមសម្រុកដាំកូនឈើប្រភេទនេះក្នុងទ្រង់ទ្រាយធំ» Xiao Meng សន្តិសុខប្រចាំឧទ្យានជាតិ Huangshi ឱ្យដឹងដូច្នេះ។

ឧទ្យានជាតិអណ្ដូងរ៉ែ Huangshi (Huangshi National Mine Park)

បច្ចុប្បន្ន តំបន់អណ្ដូងរ៉ែត្រូវបានកែប្រែឱ្យទៅជាឧទ្យានវប្បធម៌បៃតង។ លោក Meng បន្ថែមថា «យើងបានដាំដើមឈើនៅទីនេះជិត 40 ឆ្នាំហើយ។ ឪពុកខ្ញុំធ្លាប់ជាកម្មករអណ្ដូងរ៉ែ។ ប៉ុន្តែ តាំងពីជំនាន់របស់គាត់ មនុស្សម្នាចាប់ផ្ដើមដាំរុក្ខជាតិនៅទីនេះ៕

March 13, 2023

ក្លឹប PSG មានបញ្ហាហិរញ្ញវត្ថុ! អនាគតរបស់ Messi អាចប្រែប្រួលឆាប់ៗនេះ

ក្នុងស្ថានការណ៍ដែលកំពុងទទួលរងហានិភ័យនៃការពិន័យ ដោយសារការបំពានច្បាប់យុត្តិធម៌ផ្នែកហិរញ្ញវត្ថុ ក្លឹប PSG បានប្រាកដជានឹងធ្វើការសម្រេចចិត្តចុងក្រោយដ៏គួរឱ្យភ្ញាក់ផ្អើលទាក់ទងនឹងអនាគតរបស់ Lionel Messi។

យោងតាមប្រភពព័ត៌មាននៅប្រទេសបារាំងនាថ្មីៗនេះ ក្លឹប PSG កំពុងប្រឈមនឹងការពិន័យទាក់ទិននឹងបញ្ហាតុល្យភាពហិរញ្ញវត្ថុពី UEFA ដោយសារតែបញ្ហាមូលនិធិប្រាក់បៀវត្សរ៍របស់ពួកគេកំពុងរីកធំ។

បើសិនមិនអាចធ្វើឱ្យមានតុល្យភាពនៃខ្ទង់ប្រាក់ចំណូល-ចំណាយ ក៏ដូចជាការកែសម្រួលប្រព័ន្ធរកប្រាក់ចំណូលរបស់ក្រុមកីឡាករនោះទេ ក្លឹប PSG នឹងត្រូវបានហាមឃាត់ មិនឱ្យចូលរួមប្រកួតនៅពានរង្វាន់ Champions League ចាប់ពីរដូវកាល 2024/2025។

ក្នុងកាលៈទេសៈនោះ ទំព័រ L’Equipe ថ្មីៗនេះក៏បានបង្ហើបឱ្យដឹងថា PSG កំពុងត្រូវបង្ខំឱ្យមានការសម្រេចចិត្តសំខាន់មួយដែលគ្មាននរណាចង់ធ្វើ។ ជាក់ស្ដែង PSG ត្រូវបានគេយល់ថាបានផ្អាកការចរចាទាំងស្រុងជាមួយនឹង Messi ទាក់ទងនឹងកិច្ចសន្យាថ្មី។

កាលពីរដូវកាលឆ្នាំ 2021 El Pulga បានចាកចេញពី Barcelona និងបានទៅទាត់ឱ្យ PSG តាមទម្រង់ ទិញដូរដោយសេរី។ ប្រាក់ចំណូលរបស់ M10 ក៏បានឡើងជិតដល់មួយលានអឺរ៉ូ/សប្ដាហ៍។ ក៏ប៉ុន្តែ PSG ទំនងជាត្រូវបង្ខំចិត្តទុកឱ្យម្ចាស់ពានរង្វាន់បាល់មាសចំនួន 7 គ្រាប់នេះ ចាកចេញពីក្លឹប ក្រោយរដូវកាលបាល់ទាត់បានបញ្ចប់នាពេលដ៏ខ្លីខាងមុខ ដើម្បីធ្វើតាមគោលការណ៍របស់ UEFA។

កន្លងមក PSG តែងតែបង្ហាញថា ខ្លួនចង់ឱ្យ Messi បន្តទាត់នៅអឺរ៉ុប។ យ៉ាងណាក៏ដោយ ក្នុងកាលៈទេសៈបច្ចុប្បន្ន ក្រុមមេដឹកនាំរបស់ PSG យល់ថា ពួកគេនឹងជួបបញ្ហាអាក្រក់ បើសិនត្រូវចំណាយច្រើនសម្រាប់ការរក្សា Messi។ ចំណែក M10 ក៏ប្រាកដជានឹងមិនទទួលយកការកាត់បន្ថយប្រាក់បៀវត្សរ៍ដើម្បីបន្តឈរជើងនៅ Parc de Princes។ ដូច្នេះ ភាគរយនៃការចាកចេញពីក្លឹប PSG របស់ Messi មកដល់ពេលនេះគឺមានកម្រិតខ្ពស់៕

March 13, 2023

តារាសម្ដែងស្រីម៉ាឡេស៊ី ដណ្ដើមបានពានរង្វាន់តួឯកស្រីឆ្នើមបំផុតនៅ Oscar 2023

Michelle Yeoh បានក្លាយជាតារាសិល្បៈអាស៊ីដំបូងគេដែលបានឈ្នះពានរង្វាន់តួឯកស្រីឆ្នើមជាងគេនៅក្នុងព្រឹត្តិការណ៍ Oscar 2023។

ពិធីប្រគល់ពានរង្វាន់ Oscar លើកទី 95 ត្រូវបានធ្វើឡើងនាព្រឹកថ្ងៃទី 13 មីនា (ម៉ោងនៅកម្ពុជា) ក្នុងនោះ ខ្សែភាពយន្តរឿង «Everything everywhere all at once» បាននាំមុខគេក្នុងបញ្ជីចំណាត់ថ្នាក់ ដោយមាន 11 បេក្ខភាព។

ដោយការសម្ដែងបានយ៉ាងល្អនៅក្នុងខ្សែភាពយន្តខាងលើ Michelle Yeoh ក៏បានក្លាយជាអ្នកសិល្បដើមកំណើតអាស៊ីដំបូងគេដែលបានឈ្នះពានរង្វាន់ Oscar ស្ដីពីតារាស្រីសម្ដែងជាតួឯកឆ្នើមបំផុត។ Michelle Yeoh បានយកឈ្នះលើ Cate Blanchett នៅក្នុងការដណ្ដើមយកពានរង្វាន់នេះ។

នៅលើវេទិកា Michelle Yeoh រំភើបខ្លាំងរហូតដល់ហូរទឹកភ្នែក ពេលទទួលពានរង្វាន់ Oscar 2023 ដ៏មានតម្លៃនេះ។ Michelle Yeoh គឺជាតារាសម្ដែងស្រីអាស៊ីដំបូងគេ និងជាតារាសម្ដែងស្រីសញ្ជាតិម៉ាឡេស៊ីដំបូងគេដែលបានក្លាយជាបេក្ខភាពសម្រាប់តំណែងតួឯកស្រីឆ្នើមជាងគេនៅ Oscar។

ក្នុងខ្សែភាពយន្ត «Everthing everywhere all at once» Michelle Yeoh សម្ដែងជាតួអង្គជនអន្តោប្រវេសន៍ចិនមួយរូបឈ្មោះ Evelyn Wang ជាម្ចាស់ហាងបោកអ៊ុតសម្លៀកបំពាក់មួយកន្លែងដែលជួបបញ្ហាច្រើនក្នុងជីវភាព។ ក្នុងរឿងនេះ Ke Huy Quan សម្ដែងជាតួអង្គប្ដីដ៏ល្ងង់ខ្សោយរបស់ Evelyn Wang។ ពួកគេរួមដៃគ្នាអនុវត្តភារកិច្ចសង្គ្រោះ។

អ្នកស្រី Michelle Yeoh ក្នុងពិធីប្រគល់ពានរង្វាន់ Oscar 2023

មុននោះ ដោយសារសម្ដែងជាតួអង្គ Evelyn Wang តារាសម្ដែងជនជាតិម៉ាឡេស៊ីដើមកំណើតចិន Michelle Yeoh ក៏បានឈ្នះពានរង្វាន់តារាសម្ដែងស្រីឆ្នើមបំផុតនៅក្នុងពិធីប្រគល់ពានរង្វាន់របស់សមាគមតារាភាពយន្តអាម៉េរិក (SAG Awards) លើកទី 29 ផងដែរ។

https://www.youtube.com/watch?v=pPoYhwaZ9rg

អ្នកស្រី Michelle Yeoh សម្ដែងជាតួអង្គ Evelyn Wang ក្នុងភាពយន្តរឿង «Everthing everywhere all at once»

Michelle Yeoh កើតឆ្នាំ 1962 បានឈានជើងចូលក្នុងវិស័យសិល្បៈ បន្ទាប់ពីបានគ្រងមកុដបវរកញ្ញាឯកម៉ាឡេស៊ីឆ្នាំ 1983។ អ្នកស្រីធ្លាប់ចូលរួមសម្ដែងក្នុងខ្សែភាពយន្តល្បីៗរាប់សិបរឿង មានជាអាទិ៍ Police Story 3: Supercop, Holy Weapon, Yes, Madam ។ល។ អ្នកស្រី Michelle Yeoh ក៏នឹងមានវត្តមាននៅក្នុងរឿង Avatar 3, Avatar 4, Avatar 5។ល។

Michelle Yeoh ក្នុងរឿង «Tomorrow never dies»

Michelle Yeoh ចាប់ផ្ដើមល្បីឈ្មោះនៅសហរដ្ឋអាម៉េរិក បន្ទាប់ពីបានសម្ដែងជាតួអង្គ «Bond girl» ជាគូនឹង James Bond របស់ Pierce Brosnan ក្នុងរឿង «Tomorrow never dies» កាលពីឆ្នាំ 1997។ ខ្សែភាពយន្តបន្តបន្ទាប់មកទៀតក៏បានជួយឱ្យ Michelle Yeoh ល្បីឈ្មោះទូទាំងពិភពលោក។ អ្នកស្រីទទួលបានការគាំទ្រច្រើនក៏ព្រោះតែសមត្ថភាពក្នុងការប្រើប្រាស់ក្បាច់គុន៕

March 13, 2023

ទីក្រុងដែលលិចក្រោមទឹកសមុទ្រ Pavlopetri មានអាយុកាលចាស់ជាងគេបំផុតលើពិភពលោក

(ក្រិក) – មូលហេតុដែលបណ្ដាលឱ្យ Pavlopetri ដែលជាទីក្រុងបុរាណអាយុប្រហែល 5,000 ឆ្នាំ ត្រូវលិចក្រោមទឹកសមុទ្រ នៅតែជារឿងអាថ៌កំបាំង។

ការរកឃើញនានារបស់បុរាណវិទូ មានជាអាទិ៍ ទីក្រុងវង្វេងដាន កំណប់បុរាណ ឬសាកសពកប៉ាល់បុរាណជាដើម តែងតែទាក់ទាញចំណាប់អារម្មណ៍របស់ក្រុមអ្នកវិទ្យាសាស្ត្រ។ Pavlopetri ដែលជាទីក្រុងបុរាណអាយុប្រហែល 5,000 ឆ្នាំ ត្រូវលិចក្រោមទឹកសមុទ្រ ក៏ជាទីចាប់អារម្មណ៍របស់អ្នកស្រាវជ្រាវ។ នេះបើតាម IFL Science។

Pavlopetri ស្ថិតនៅតំបន់ Peloponnesus ភាគខាងត្បូងប្រទេសក្រិក និងមានអាយុកាលប្រហែល 5,000 ឆ្នាំ។ អតីតទីក្រុងនេះត្រូវបានរកឃើញដំបូងដោយអ្នកស្រាវជ្រាវ Folkion Negris កាលពីឆ្នាំ 1904។ មកដល់ឆ្នាំ 1967 បុរាណវិទូ Nicholas Flemming មកពីសាកលវិទ្យាល័យ Southampton បានស្រាវជ្រាវលើទីក្រុងក្នុងយុគសម័យសំរឹទ្ធនេះជាថ្មី។ Flemming អធិប្បាយថា ទីក្រុងនេះត្រូវលិចក្រោមទឹកប្រហែលពី 3 ទៅ 4 ម៉ែត្រ។ ឆ្នាំ 1968 Flemming និងសហការីពីសាកលវិទ្យាល័យ Cambridge ក៏បានបន្តស្រាវជ្រាវដានទីក្រុងលិចទឹកនេះក្នុងរយៈពេល 6 សប្ដាហ៍។

ក្រុមរបស់ Flemming ឱ្យដឹងថា ទីក្រុងនេះមានទំហំប្រហែល 300 ម៉ែត្រ x 150 ម៉ែត្រ។ ទីក្រុង Pavlopetri មានអគារដាច់ដោយឡែកយ៉ាងតិច 15 អគារ ព្រមទាំងមានទីលាន, ផ្លូវចំនួនប្រាំ, ចេតិយចំនួនពីរ និងកូនផ្នូរខ្មោចយ៉ាងតិច 37។ អ្នកវិទ្យាសាស្ត្រក៏បានរកឃើញថា ទីក្រុងក្រោមទឹកនេះបន្តពង្រីកខ្លួនទៅទិសខាងត្បូង រហូតដល់កោះ Pavlopetri ជាកន្លែងរក្សាបំណែកជញ្ជាំងនានា និងវត្ថុបុរាណផ្សេងៗទៀត មានដូចជា វត្ថុធ្វើពីដីឥដ្ឋ ដាវធ្វើពីថ្ម រូបសំណាកធ្វើពីសំរឹទ្ធអាយុកាលប្រហែលពីឆ្នាំ 2800 ដល់ 1180 មុនគ្រិស្តសករាជ។ ប៉ុន្តែ អគារនានារបស់ទីក្រុងលិចទឹកនេះ ភាគច្រើនស្ថិតក្នុងសម័យ Mycenae ពីឆ្នាំ 1650 ដល់ 1180 មុនគ្រិស្តសករាជ។

ឆ្នាំ 2009 ក្រុមអ្នកស្រាវជ្រាវរបស់ក្រិក និងសាកលវិទ្យាល័យ Nottingham បានរកឃើញ សំណង់ទំហំ 9,000 ម៉ែត្រការ៉េថែមទៀត។ ពួកគេក៏រកឃើញវត្ថុបុរាណជាច្រើនផ្សេងទៀតដែលបញ្ជាក់ថា ជនជាតិ Mycenae រស់នៅក្នុងទីក្រុង Pavlopetri ហើយទីក្រុងនេះមានមនុស្សរស់នៅពេញមួយយុគសម័យសំរឹទ្ធ ប្រហែលពីឆ្នាំ 3000 ដល់ឆ្នាំ 1100 មុនគ្រិស្តសករាជ។ ក្នុងសម័យនេះ ទីក្រុង Pavlopetri មានប្រជាជនប្រហែលពី 500 ទៅ 2,000 នាក់។

មូលហេតុដែលនាំឱ្យទីក្រុង Pavlopetri ត្រូវលិចក្រោមទឹកសមុទ្រ មកដល់ពេលនេះនៅតែជារឿងអាថ៌កំបាំងនៅឡើយ។ អ្នកជំនាញខ្លះជឿថា គ្រោះរញ្ជួយដីដែលកើតឡើងប្រហែលក្នុងឆ្នាំ 1000 មុនគ្រិស្តសករាជ ឬឆ្នាំ 375 មុនគ្រិស្តសករាជ បានពន្លិចទីក្រុងនេះ៕

March 13, 2023

U-20 World Cup 2023 កំណត់បានក្រុមជម្រើសជាតិទាំង 24 ដែលត្រូវចូលរួមប្រកួត

វគ្គផ្ដាច់ព្រ័ត្ររបស់ U-20 World Cup 2023 កំណត់បានក្រុមទាំង 24 ដែលនឹងត្រូវចូលរួមប្រកួតដណ្ដើមពានរង្វាន់ជើងឯកលើកនេះ ក្នុងនោះមានទាំងតំណាងចំនួនបួនរបស់ទ្វីបអាស៊ីផងដែរ។

អាស៊ីគឺជាតំបន់ចុងក្រោយដែលបានរកឃើញបណ្ដាតំណាងរបស់ខ្លួនដែលត្រូវទៅចូលរួមវគ្គផ្ដាច់ព្រ័ត្ររបស់ U-20 World Cup 2023។ ដោយសារម្ចាស់ផ្ទះ U-20 ឥណ្ឌូណេស៊ីមិនអាចឡើងដល់វគ្គពាក់កណ្ដាលផ្ដាច់ព្រ័ត្រ តំបន់អាស៊ីក៏មានតែ 5 ក្រុមជម្រើសជាតិប៉ុណ្ណោះដែលនឹងត្រូវចូលរួម World Cup ក្នុងនោះមានបួនក្រុមដែលបានចូលដល់វគ្គពាក់កណ្ដាលផ្ដាច់ព្រ័ត្រ U-20 អាស៊ី 2023។

បួនក្រុមដែលជាតំណាងរបស់អាស៊ី ទៅចូលរួម World Cup លើកនេះ រួមមាន U-20 អ៊ីរ៉ាក់, អ៊ូសបេគីស្ថាន, កូរ៉េខាងត្បូង និងជប៉ុន បន្ទាប់ពីបានឈ្នះនៅវគ្គ 8 ក្រុមចុងក្រោយនាពេលថ្មីៗនេះ។ បួនក្រុមខាងលើនេះ រួមនឹង ឥណ្ឌូណេស៊ី (ព្រោះជាម្ចាស់ផ្ទះ) នឹងឡើងទៅប្រកួតនៅវគ្គផ្ដាច់ព្រ័ត្រ U-20 World Cup 2023 ដែលធ្វើឡើងក្នុងអំឡុងពេលពីខែឧសភា ដល់មិថុនាខាងមុខ។

ក្រុមបាល់ទាត់ជម្រើសជាតិអាយុក្រោម 20 ឆ្នាំ ទាំង 24 ក្រុម ដែលនឹងត្រូវឡើងទៅប្រកួតដណ្ដើមពានរង្វាន់ U-20 World Cup 2023

ទ្វីបអាស៊ី និងអឺរ៉ុប គឺជាតំបន់ដែលមានតំណាងច្រើនជាងគេចូលរួមប្រកួតនៅ U-20 World Cup 2023។ តំបន់អាម៉េរិកខាងត្បូងមានបួនក្រុមត្រូវចូលរួម គឺ U-20 ប្រេស៊ីល, កូឡុំប៊ី, អេក្វេទ័រ និង អ៊ុយរូហ្កាយ ខណៈដែលតំបន់អាម៉េរិកកណ្ដាល និងខាងជើងមានបួនក្រុមគឺ ដូមីនីក, ក្វាតេម៉ាឡា, ហុងឌូរ៉ាស និងសហរដ្ឋអាម៉េរិក។

តំបន់អឺរ៉ុបដែលមានប្រាំក្រុមត្រូវចូលរួម U-20 World Cup 2023 រួមមាន អង់គ្លេស, បារាំង, អ៊ីស្រាអែល, អ៊ីតាលី និង ស្លូវ៉ាគី។ ចំណែក U-20 អ៊ុយក្រែនដែលជាម្ចាស់ជើងឯក U-20 World Cup 2019 មិនអាចឆ្លងផុតវគ្គជម្រុះ។ នៅក្នុងវគ្គផ្ដាច់ព្រ័ត្រកាលពីបួនឆ្នាំមុន U-20 អ៊ុយក្រែន បានយកឈ្នះលើ U-20 កូរ៉េខាងត្បូង ក្នុងលទ្ធផល 3-1។

ទ្វីបអាហ្វ្រិកដែលមានបួនក្រុមត្រូវចូលរួមប្រកួតនៅ U-20 World Cup 2023 គឺ ហ្កំប៊ី, នីហ្សេរីយ៉ា, សេណេហ្គាល់ និង ទុយនីស៊ី។ វគ្គផ្ដាច់ព្រ័ត្របស់ U-20 World Cup 2023 នឹងធ្វើឡើងចាប់ពីថ្ងៃទី 20 ឧសភា ដល់ 11 មិថុនា ឆ្នាំ 2023 នៅប្រទេសឥណ្ឌូណេស៊ី។ ពិធីចាប់ឆ្នោតចែកពូលនឹងធ្វើឡើងនៅថ្ងៃទី 31 មីនា 2023 ក្នុងនោះ 24 ក្រុមត្រូវចែកជា 6 ពូល៕

March 13, 2023

រដ្ឋាភិបាលឥណ្ឌាជំទាស់រឿងទទួលស្គាល់អាពាហ៍ពិពាហ៍របស់មនុស្សភេទដូចគ្នា

អាជ្ញាធររបស់នាយករដ្ឋមន្ត្រី Modi បានដាក់ឯកសារឡើងទៅតុលាការកំពូលរបស់ឥណ្ឌា ដើម្បីច្រាលចោលសំណើរបស់គូស្នេហ៍ភេទទីបី (LGBT) ដែលស្នើសូមឱ្យទទួលស្គាល់អាពាហ៍ពិពាហ៍របស់មនុស្សភេទដូចគ្នា។

ក្រសួងយុត្តិធម៌ឥណ្ឌាជឿថា បើទោះជាទំនាក់ទំនងក្នុងសង្គមអាចមានរូបភាពច្រើនយ៉ាង ប៉ុន្តែអាពាហ៍ពិពាហ៍ដែលស្របច្បាប់គឺសម្រាប់គូស្នេហ៍មានភេទផ្ទុយគ្នា ហើយរដ្ឋមានផលប្រយោជន៍ស្របច្បាប់នៅក្នុងការរក្សាប្រការនេះ។

«ការណ៍ដែលមនុស្សភេទដូចគ្នារស់នៅក្នុងនាមជាភរិយាស្វាមី និងមានទំនាក់ទំនងផ្លូវភេទ មិនអាចប្រៀបប្រដូចទៅនឹងនិយមន័យគ្រួសាររបស់ឥណ្ឌា ដែលរួមមានភរិយា ស្វាមី និងកូន» ឯកសារពីក្រសួងយុត្តិធម៌មានឃ្លាសរសេរដូច្នេះ។ តុលាការមិនអាចត្រូវបានគេស្នើឱ្យ «ប្ដូរផ្លាស់គោលនយោបាយបង្កើតច្បាប់របស់ប្រទេសជាតិដែលបានចាក់ឫសជ្រៅទៅក្នុងបទដ្ឋានសាសនា និងសង្គម»។

នៅក្នុងសេចក្ដីសម្រេចជាប្រវត្តិសាស្ត្រមួយកាលពីឆ្នាំ 2018 តុលាការកំពូលឥណ្ឌា បានកែប្រែច្បាប់ដែលដាក់ទោសព្រហ្មទណ្ឌចំពោះគូស្នេហ៍ភេទដូចគ្នា ដោយបានលុបចោលការហាមប្រាមចំពោះទំនាក់ទំនងផ្លូវភេទរបស់មនុស្សភេទដូចគ្នាដែលមានតាំងពីសម័យអាណានិគម។

នៅក្នុងប៉ុន្មានខែចុងក្រោយនេះ យ៉ាងហោចណាស់មានញត្តិចំនួន 15 ត្រូវបានដាក់ឡើងទៅតុលាការកំពូល ដើម្បីស្នើសូមឱ្យទទួលស្គាល់អាពាហ៍ពិពាហ៍របស់មនុស្សភេទដូចគ្នា ក្នុងបំណងបង្កើតឱ្យមានមូលដ្ឋានច្បាប់សម្រាប់ការប្រឈមមុខជាមួយនឹងរដ្ឋាភិបាលរបស់នាយករដ្ឋមន្ត្រី Narendra Modi។

បច្ចុប្បន្ន ទ្វីបអាស៊ី ភាគច្រើននៅតែដើរយឺតជាងលោកខាងលិច នៅក្នុងការទទួលស្គាល់អាពាហ៍ពិពាហ៍របស់មនុស្សភេទដូចគ្នា។ ទំនាក់ទំនងស្នេហារវាងមនុស្សភេទដូចគ្នានៅតែត្រូវបានចាត់ទុកថាជារឿងខុសច្បាប់នៅក្នុងប្រទេសមួយចំនួនទ្វីបនេះ ក្នុងនោះមានជាអាទិ៍ ប្រទេសម៉ាឡេស៊ី និងជប៉ុនជាដើម។

នៅក្នុងលិខិតផ្ញើទៅកាន់តុលាការកំពូលកាលពីថ្ងៃទី 12 មីនា 2023 រដ្ឋាភិបាលឥណ្ឌាបានអះអាងជាថ្មីថា សេចក្ដីសម្រេចរបស់តុលាការកាលពីឆ្នាំ 2018 មិនមែនជាការទទួលស្គាល់សិទ្ធិស្របច្បាប់ជាមូលដ្ឋានចំពោះអាពាហ៍ពិពាហ៍មនុស្សភេទដូចគ្នាទៅតាមច្បាប់របស់ប្រទេសឥណ្ឌាឡើយ ហើយការផ្លាស់ប្ដូរណាមួយទាក់ទិននឹងរចនាសម្ព័ន្ធច្បាប់គឺសុទ្ធតែត្រូវអនុម័តដោយសភា មិនមែនតុលាការនោះទេ៕

March 13, 2023

ក្នុងករណីរត់ជាន់គ្នាស្លាប់ជាង 100 នាក់នៅកីឡដ្ឋានរបស់ឥណ្ឌូណេស៊ី មន្ត្រីពីររូបត្រូវជាប់ពន្ធនាគារ

សារព័ត៌មាន Reuters បានផ្សាយថា តុលាការនៅ Surabaya ប្រទេសឥណ្ឌូណេស៊ី កាលពីថ្ងៃទី 10 មីនា 2023 បានកាត់ទោសដាក់ពន្ធនាគារចំពោះមន្ត្រីគ្រប់គ្រងបាល់ទាត់ពីររូបរបស់ប្រទេសនេះ ក្រោយពីបានរកឃើញថាពួកគេជាប់ទោសស្ដីពីការធ្វេសប្រហែស បណ្ដាលឱ្យមានសោកនាដកម្មរត់ជាន់គ្នាស្លាប់នៅឯកីឡដ្ឋាន Kanjuruhan ក្នុងតំបន់ Manlang កាលពីខែតុលា 2022 ក្នុងអំឡុងការប្រកួតបាល់ទាត់រវាងក្លឹប Arema និង Persebaya Surabaya។

ហេតុការណ៍ដ៏អាក្រក់នៅឯកីឡដ្ឋាន Kanjuruhan បានកើតឡើងនៅពេលស្ថានការណ៍ជ្រួលច្របល់ក្រោយការប្រកួត ពេលដែលមនុស្សម្នាដណ្ដើមគ្នារត់ បន្ទាប់ពីប៉ូលិសបានបាញ់ផ្សែងបង្ហូរទឹកភ្នែកសំដៅហ្វូងមនុស្សបណ្ដាលឱ្យទស្សនិកជន 135 នាក់បាត់បង់ជីវិត និងជាច្រើននាក់រងរបួស។

ចៅក្រម Abu Achmad Shiddqi Hamsya បានឱ្យដឹងថា Abdul Haris (មន្ត្រីបាល់ទាត់ដែលចាត់ចែងការប្រកួតខាងលើ) ត្រូវបានកាត់ទោសដាក់ពន្ធនាគារមួយឆ្នាំកន្លះ ដោយសារការ «ធ្វេសប្រហែស ធ្វើឱ្យមនុស្សច្រើននាក់ស្លាប់ និងរងរបួស»។

Abdul Haris បានចាត់ចែងការលក់សំបុត្រច្រើនជាងសមត្ថភាពរបស់កីឡដ្ឋាន បណ្ដាលឱ្យមានហេតុការណ៍រត់ជាន់គ្នា។ ចំណែក Suko Sutrisno (បុគ្គលិកសន្តិសុខរបស់ក្លឹប Arema) ត្រូវជាប់ពន្ធនាគារមួយឆ្នាំ ដោយជាប់ទោសពីបទធ្វេសប្រហែស។ ពួកគេក៏ត្រូវបានសហព័ន្ធបាល់ទាត់ឥណ្ឌូណេស៊ី ហាមចូលរួមសកម្មភាពដែលទាក់ទងនឹងបាល់ទាត់ អស់មួយជីវិត។

ហេតុការណ៍ដ៏អាក្រក់នៅឯកីឡដ្ឋាន Kanjuruhan បានកើតឡើងនៅពេលស្ថានការណ៍ជ្រួលច្របល់ក្រោយការប្រកួត ពេលដែលមនុស្សម្នាដណ្ដើមគ្នារត់ បន្ទាប់ពីប៉ូលិសបានបាញ់ផ្សែងបង្ហូរទឹកភ្នែកសំដៅហ្វូងមនុស្ស

ចំណែកមន្ត្រីប៉ូលិសបីនាក់ផ្សេងទៀតដែលបានបាញ់ផ្សែងបង្ហូរទឹកភ្នែកសំដៅលើមនុស្សម្នាក្នុងហេតុការណ៍ខាងលើ ក៏កំពុងត្រូវបានពិចារណាលើទោសកំហុស មុនពេលចេញសាលក្រមចុងក្រោយ៕

March 11, 2023

ក្រុមហ៊ុនមេរបស់ Facebook បង្កើត «បណ្ដាញសង្គមថ្មី» ដើម្បីប្រជែងនឹង Twitter

Meta ដែលជាក្រុមហ៊ុនមេរបស់ Facebook កំពុងរៀបផែនការអភិវឌ្ឍបណ្ដាញសង្គមថ្មីមួយទៀតដែលផ្ដោតលើអត្ថបទ ក្នុងបំណងប្រកួតប្រជែងជាមួយ Twitter របស់មហាសេដ្ឋី Elon Musk។

«យើងកំពុងសិក្សាស្រាវជ្រាវបណ្ដាញសង្គមវិម្ឈការឯករាជ្យ ផ្ដោតទៅលើការចែករំលែកព័ត៌មានក្នុងទម្រង់អត្ថបទ។ យើងជឿថាមានឱកាសក្នុងការស្ថាបនាបរិស្ថានដោយឡែក អនុញ្ញាតឱ្យអ្នកនិពន្ធ និងបុគ្គលល្បីឈ្មោះបង្ហោះព័ត៌មានបានទាន់ពេល» អ្នកនាំពាក្យរបស់ Meta កាលពីថ្ងៃទី 10 មីនា និយាយដូច្នេះ។

គម្រោងដែលមានឈ្មោះកូដថា P92 នេះ ត្រូវបានអភិវឌ្ឍទៅជាកម្មវិធីទូរស័ព្ទ (App) ដាច់ដោយឡែក ប៉ុន្តែអ្នកប្រើប្រាស់អាចចូលប្រើដោយគណនី Instagram។ សកម្មភាពនេះនឹងជួយឱ្យ Meta ទាក់ទាញអ្នកប្រើប្រាស់មួយចំនួនពីបណ្ដាញសង្គម Twitter ជាក្រុមដែលចង់ចាកចោល ឬបានចាកចោលបណ្ដាញសង្គមរបស់ Elon Musk ដោយសារតែការកំណត់ថ្មីមួយចំនួន។

ប្រភពព័ត៌មាននានាបានឱ្យដឹងថា P92 ត្រូវបានគ្រប់គ្រងដោយនាយកប្រតិបត្តិរបស់ Instagram លោក Adam Mosseri។ នេះគឺជាផ្នែកមួយនៅក្នុងកិច្ចប្រឹងប្រែងរបស់ Meta ដើម្បីពង្រីកខ្លួនចេញពី Facebook, WhatsApp និង Instagram និងដើម្បីវាយលុកទីផ្សារដែលកំពុងគ្រប់គ្រងដោយ Twitter។

Facebook, Instagram និង Twitter គឺជាបណ្ដាញសង្គម។ ក៏ប៉ុន្តែ Facebook ត្រូវបានបង្កើតឡើងក្នុងគោលដៅជួយឱ្យមនុស្សតភ្ជាប់ទំនាក់ទំនងនឹងគ្នា ដោយមានបំពាក់មុខងារជាច្រើន មានជាអាទិ៍ មុខងារសរសេរ status, បង្ហោះរូបថត វីដេអូ និងលេងហ្កេមជាដើម។ ចំណែក Instagram វិញ គឺជាបណ្ដាញសង្គមចែករំលែករូបថត។ រីឯ Twitter ត្រូវបានអភិវឌ្ឍសម្រាប់ការបង្ហោះសារខ្លីៗ។

បច្ចុប្បន្ន មិនទាន់ដឹងច្បាស់ថា Meta ចាប់ផ្ដើមអភិវឌ្ឍគម្រោង P92 នៅពេលណា ហើយបានចាប់ផ្ដើមដំណើរការអភិវឌ្ឍហើយ ឬនៅ៕

March 11, 2023

Author: សឿន សំណាង