UN - La Reine Media

ចិនបញ្ជូនយានទៅយកសំណាកដីតំបន់ងងឹតរបស់ព្រះចន្ទ

សឿន សំណាង — Sat, 04 May 2024 16:43:34 +0000

យាន Chang’e 6 ហោះឡើងជាមួយនឹងរ៉ុក្កែត Long March 5 ពីមជ្ឈមណ្ឌលបាញ់បង្ហោះផ្កាយរណប Wenchang លើកោះ Hainan កាលពីវេលាម៉ោង 16និង27នាទី ថ្ងៃទី3 ខែឧសភា ម៉ោងនៅកម្ពុជា។

ក្នុងការហោះហើរ 53ថ្ងៃ យានអវកាស Chang’e 6 នឹងឆ្ពោះទៅកាន់តំបន់ទំនាបនៅប៉ូលខាងត្បូង Aitken (SPA) ដែលស្ថិតក្នុងតំបន់ងងឹតរបស់ព្រះចន្ទ ជាទីដែលមិនអាចមើលឃើញពីផែនដី។ នេះបើតាមទីភ្នាក់ងារអវកាសចិន (CNSA)។

បេសកកម្មនេះនឹងរើសយកសំណាកដី និងថ្មចំនួនពីរគីឡូក្រាមពីតំបន់ចុះចត និងនាំយកមកកាន់ផែនដីដើម្បីវិភាគលម្អិត។ ដំណើរការរើសយកសំណាកដីព្រះចន្ទនឹងត្រូវបានគាំទ្រដោយផ្កាយរណប Queqiao-2 ដែលត្រូវបានបាញ់បង្ហោះកាលពីខែមីនា និងកំពុងគោចរជុំវិញព្រះចន្ទ រង់ចាំយាន Chang’e 6។

នោះនឹងជាសំណាកដីព្រះចន្ទដំបូងដែលត្រូវបាននាំយកមកកាន់ផែនដី បន្ទាប់ពីបេសកកម្ម Apollo របស់អាម៉េរិក និង Luna របស់អតីតសូវៀត កាលពីប្រាំទសវត្សរ៍មុន។

យានចុះចត និងយានយកសំណាកនឹងចុះចតក្នុងភាគឦសានលើតំបន់ទំនាប SPA ជាទីដែលមានភូមិសាស្ត្រស្មុគស្មាញ និងមានតម្លៃខ្ពស់ផ្នែកវិទ្យាសាស្ត្រ។ បន្ទាប់ពីបានរើសយកសំណាកដី និងថ្ម យានយកសំណាកនេះនឹងហោះត្រលប់ទៅកាន់គន្លងតារាវិថីព្រះចន្ទ ដើម្បីប្រគល់ឱ្យម៉ូឌុលដែលនៅចាំទទួលក្នុងអវកាស មុននឹងនាំយកសំណាកទាំងនេះមកកាន់ផែនដី។

កាលពីឆ្នាំកន្លង អ្នកវិទ្យាសាស្ត្រមួយក្រុមនៅប្រទេសចិន បានកំណត់ទីតាំងចំនួនបីដ៏មានសក្ដានុពលសម្រាប់ការចុះចតរបស់យាន Chang’e 6 នៅក្នុងតំបន់ទំនាប SPA ដែលជារណ្ដៅយក្សទំហំ 2,500 គីឡូម៉ែត្រ និងជម្រៅ 8គីឡូម៉ែត្រ កើតឡើងក្រោយពីករណីធ្លាក់អាចម៍ផ្កាយកាលពីរាប់ពាន់លានឆ្នាំមុន។

យោងតាមទិន្នន័យដែលបានសង្កេតពីចម្ងាយ តំបន់ទំនាប SPA សម្បូរទៅដោយសារធាតុគីមី និងមានអាយុកាលយូរ។ យានរបស់ចិននឹងជ្រើសទីតាំងសុវត្ថិភាពបំផុតដើម្បីចុះចត នៅពេលហោះបន្ទាបខ្លួនបន្តិចម្ដងៗ។

យាន Chang’e 6 ទំនងជាអាចរកឃើញ និងនាំយកថ្មី basalt ដែលជាកម្អែរភ្នំភ្លើងដែលបានត្រជាក់នៅតំបន់ទំនាបខាងលើ។ អ្នកវិទ្យាសាស្ត្រអាចវាស់ស្ទង់អាយុកាល សមាសធាតុ និងរបៀបកកើតរបស់វា។ តាមរយៈការប្រៀបធៀបថ្មដែលនាំយកពីតំបន់ភ្លឺរបស់ព្រះចន្ទ ពួកគេនឹងអាចរកឃើញតម្រុយដែលទាក់ទងនឹងមូលហេតុដែលនាំឱ្យមានតំបន់ងងឹត និងតំបន់ភ្លឺនៅលើឋានព្រះចន្ទ។

The post ចិនបញ្ជូនយានទៅយកសំណាកដីតំបន់ងងឹតរបស់ព្រះចន្ទ first appeared on La Reine Media.

រោងចក្រដំឡើងរថយន្តតូយ៉ូតានៅកម្ពុជា សម្ពោធបើកដំណើរការជាផ្លូវការ

សឿន សំណាង — Thu, 02 May 2024 00:00:53 +0000

នាថ្ងៃទី2 ឧសភា 2024 នេះ រោងចក្រដំឡើងរថយន្តរបស់ក្រុមហ៊ុនតូយ៉ូតា នឹងត្រូវបានសម្ពោធបើកដំណើរការជាផ្លូវការ ក្រោមអធិបតីភាពរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា។

រោងចក្រដំឡើងរថយន្តតូយ៉ូតានៅកម្ពុជា គឺជាក្រុមហ៊ុនបុត្រសម្ព័ន្ធរបស់ Toyota Tsusho Corporation របស់ជនជាតិជប៉ុន និងក្រុមហ៊ុនខ្មែរ គង់ នួន គ្រុប ដែលក្នុងនោះ ក្រុមហ៊ុនជប៉ុនមានភាគហ៊ុន 90% និងក្រុមហ៊ុនខ្មែរកាន់កាប់ 10%។

ក្រុមហ៊ុន តូយ៉ូតា ស៊ុយស៊ូ មេនូហ្វេកឈឺរីង បានទទួលវិញ្ញាបនបត្រចុះបញ្ជីគម្រោងវិនិយោគពី ក្រុមប្រឹក្សាអភិវឌ្ឍន៍កម្ពុជា សម្រាប់ការបង្កើតរោងចក្រផ្តុំ និងដំឡើងរថយន្តតូយ៉ូតា ដែលមានទីតាំងក្នុងតំបន់សេដ្ឋកិច្ច ពិសេស រ៉ូយ៉ាល់ គ្រុប ភ្នំពេញ។

រោងចក្រនេះមានសមត្ថភាពដំឡើងរថយន្តចំនួនពីរប្រភេទ រួមមាន ទីមួយជាប្រភេទ SUV ម៉ាក FORTUNER និងទីពីជាប្រភេទ Pick-UP ម៉ាក HILUX។

រោងចក្រដែលមានទុនវិនិយោគជាង 36លានដុល្លារអាមេរិក និងមានបុគ្គលិកសរុបចំនួន 150នាក់នេះ មានសមត្ថភាពដំឡើងរថយន្តចំនួន 1,320គ្រឿងសម្រាប់ឆ្នាំ 2024។ រថយន្តដែលរោងចក្រនេះត្រូវផ្គុំដំឡើងគឺ រថយន្ត FORTUNER ចំនួន 290គ្រឿង និងរថយន្ត HILUX ចំនួន 1,030គ្រឿង។

បច្ចុប្បន្ន កម្ពុជាមានរោងចក្រផ្គុំ និងដំឡើងរថយន្ត សរុបចំនួន 6 បូករួមទាំងរោងចក្រតូយ៉ូតា។ ក្នុងនោះ រួមមានជាអាទិ៍ រោងចក្រផលិតរថយន្ត Ford, Hyundai, KIA, និង GTV ជាដើម។

The post រោងចក្រដំឡើងរថយន្តតូយ៉ូតានៅកម្ពុជា សម្ពោធបើកដំណើរការជាផ្លូវការ first appeared on La Reine Media.

ចិនបង្ហើបឱ្យដឹងអំពីស្ថានីយស្រាវជ្រាវលើឋានព្រះចន្ទគំរូដំបូង

សឿន សំណាង — Fri, 26 Apr 2024 15:50:59 +0000

ស្ថានីយស្រាវជ្រាវព្រះចន្ទដែលមានរូបរាងដូចទៅនឹងគ្រាប់ស៊ុត ក្នុងនោះមានកន្លែងសម្រាប់អ្នកអវកាសធ្វើការពិសោធ និងកន្លែងសម្រាប់ជីវភាពប្រចាំថ្ងៃ។

ក្រុមអ្នកវិទ្យាចិនទើបតែបានបង្ហើបឱ្យដឹងអំពីគំរូដំបូងនៃស្ថានីយស្រាវជ្រាវលើឋានព្រះចន្ទ។ ស្ថានីយដែលមានឈ្មោះថា Moon Pot និងមានរូបរាងដូចទៅនឹងគ្រាប់ស៊ុតនេះ ត្រូវបានរចនាឡើងដោយក្រុមអ្នកស្រាវជ្រាវមកពីសាកលវិទ្យាល័យវិទ្យាសាស្ត្រ និងបច្ចេកវិទ្យា Huazhong University។

លោក Li Bin ដែលជាលេខារបស់សាកលវិទ្យាល័យខាងលើ ឱ្យដឹងថា តាមរយៈការបង្កើតស្ថានីយស្រាវជ្រាវមួយលើឋានព្រះចន្ទ អវកាសចរនឹងមានកន្លែងសម្រាប់ស្រាវជ្រាវ និងធ្វើកិច្ចការប្រចាំថ្ងៃ ព្រោះស្ថានីយនេះផ្ដល់សុវត្ថិភាព និងអាចរស់នៅបាន។

បច្ចុប្បន្ន ក្រុមអ្នកវិទ្យាសាស្ត្រកំពុងផ្ដោតទៅលើការរចនាម៉ូដសម្រាប់ Moon Pot ដើម្បីអាចសាងសង់បានដោយការបោះពុម្ពបែប 3D ដែលប្រើប្រាស់វត្ថុធាតុដែលត្រូវបាននាំយកមកពីឋានព្រះចន្ទដោយយាន Chang’e 5។

យោងតាមអង្គការអវកាសចិន (CNSA) បេសកកម្មអវកាសនាពេលអនាគតដែលរួមមាន Chang’e 7 (2026), Chang’e 8 (2028) នឹងបង្កើតរូបមន្តមូលដ្ឋានសម្រាប់ស្ថានីយស្រាវជ្រាវព្រះចន្ទដំបូងរបស់ចិន។

The post ចិនបង្ហើបឱ្យដឹងអំពីស្ថានីយស្រាវជ្រាវលើឋានព្រះចន្ទគំរូដំបូង first appeared on La Reine Media.

ក្រុមហ៊ុន Beijing Municipal Construction ស្វែងរកឱកាសវិនិយោគនៅកម្ពុជា

សឿន សំណាង — Wed, 24 Apr 2024 16:05:31 +0000

នារសៀលថ្ងៃពុធ ទី24 ខែមេសា ឆ្នាំ2024 ដោយមានការអនុញ្ញាតដ៏ខ្ពង់ខ្ពស់ពីឯកឧត្តមរដ្ឋមន្រ្តី លោកជំទាវ កុយ សុដានី រដ្ឋលេខាធិការប្រចាំការ នៃក្រសួងសាធារណការ និងដឹកជញ្ជូន បានទទួលជួបពិភាក្សាការងារជាមួយគណៈប្រតិភូក្រុមហ៊ុន Beijing Municipal Construction Group Co.,Ltd (BMCG) ដែលដឹកនាំដោយលោក Zhai Yongshan នាយកគ្រប់គ្រងទូទៅនៃក្រុមហ៊ុន BMCG ដោយមានការអញ្ជើញចូលរួមពីថ្នាក់ដឹកនាំក្រសួង និងមន្ត្រីជំនាញពាក់ព័ន្ធ។

ជំនួបពិភាក្សានេះធ្វើឡើងក្នុងគោលបំណងដើម្បីពិនិត្យកិច្ចសហការ សិក្សាឱកាសវិនិយោគ និងសក្កានុពលលើវិស័យហេដ្ឋារចនាសម្ព័ន្ធផ្លូវ ថ្នល់ ស្ពាន ផ្លូវដែក និងកំពង់ផែ នៅកម្ពុជា។

គណៈប្រតិភូក្រុមហ៊ុន BMCG បានស្នើសុំការគាំទ្រពីក្រសួងសាធារណការ និងដឹកជញ្ជូន ក្នុងគម្រោងវិនិយោគលើវិស័យហេដ្ឋារចនាសម្ព័ន្ធ។

The post ក្រុមហ៊ុន Beijing Municipal Construction ស្វែងរកឱកាសវិនិយោគនៅកម្ពុជា first appeared on La Reine Media.

ទីក្រុងឆ្លាតវៃតម្លៃដប់ពាន់លានដុល្លាររបស់ក្រុមហ៊ុនតូយ៉ូតា

សឿន សំណាង — Wed, 24 Apr 2024 15:23:30 +0000

(ជប៉ុន) – ទីក្រុង Woven City នៅជើងភ្នំហ្វ៊ូជី (Fuji) នឹងប្រើប្រាស់អគ្គិសនីព្រះអាទិត្យ ថ្មឥន្ធនៈឆ្លាតវៃ និងរថយន្តមិនបំភាយឧស្ម័នពុល។

ត្រូវបានរចនាឡើងដោយក្រុមហ៊ុនតូយ៉ូតា (Toyota) ទីក្រុង Women City មានចម្ងាយតែប៉ុន្មានគីឡូម៉ែត្រប៉ុណ្ណោះ ពីភ្នំហ្វ៊ូជី នៃប្រទេសជប៉ុន និងត្រូវបានកសាងតាំងពីឆ្នាំ 2021។ យោងតាមទំព័រ Sun ទីក្រុងអនាគតនេះ ដើរតួនាទីដូចទៅនឹង «បន្ទប់ពិសោធន៍» របស់ក្រុមហ៊ុន ដើម្បីធ្វើតេស្តបណ្ដារថយន្តបើកបរស្វ័យប្រវត្តសន្សំសំចៃថាមពល ដែលមានរហ័សនាមថា «E-palettes»។

មនុស្ស 2ពាន់នាក់ដំបូងនឹងរើមករស់នៅក្នុងទីក្រុងឆ្លាតវៃនេះនៅចុងឆ្នាំ 2024 តាមរយៈគម្រោងសិក្សាស្រាវជ្រាវមួយដែលមានតម្លៃជិត 10ពាន់លានដុល្លារអាម៉េរិក ដើម្បីស្វែងយល់អំពីរូបមន្តក្នុងឥរិយាបថនៃការបើកបររថយន្ត និងអ្នកថ្មើរជើង។

នៅក្នុងទីក្រុងឆ្លាតវៃ ពលរដ្ឋទាំងឡាយនឹងរស់នៅក្នុងផ្ទះដែលដំណើរការដោយអ៊ីដ្រូសែនស្ទើរតែទាំងស្រុង ធ្វើឱ្យទីក្រុងនេះមានភាពស្រស់ស្រាយខ្លាំង។ គ្រប់ផ្ទះសុទ្ធតែមានផ្ទាំងសូឡានៅលើដំបូល រួមនឹងបច្ចេកវិទ្យាបញ្ញាសិប្បនិម្មិតតាមដានសុខភាពអ្នកនៅខាងក្នុង។

យោងតាមប្រធានក្រុមហ៊ុនតូយ៉ូតា Akio Toyoda រាល់មធ្យោបាយធ្វើដំណើរ និងផ្ទះ សុទ្ធតែត្រូវបានតភ្ជាប់តាមរយៈប្រព័ន្ធទិន្នន័យ និងសេនស៊ើរ។ នៅតាមផ្ទះដែលត្រូវបានសង់ពីឈើ នឹងមានរ៉ូបូតជួយធ្វើកិច្ចការប្រចាំថ្ងៃ ជួយឱ្យម្ចាស់ផ្ទះមានភាពឯករាជ្យជាងមុន។

ក្រុមហ៊ុនតូយ៉ូតាឱ្យដឹងថា ការកសាងទីក្រុងពេញលេញមួយ បើទោះទោះក្នុងទ្រង់ទ្រាយតូចក៏ពិតមែន ប៉ុន្តែវាគឺជាឱកាសពិសេសដើម្បីអភិវឌ្ឍបច្ចេកវិទ្យាថ្មី។

ក្រុមមនុស្សដែលនឹងមករស់នៅក្នុងទីក្រុង Woven City រួមមាន ចាប់ពីក្រុមគ្រួសារ គូស្វាមីភរិយាចូលនិវត្សរ៍ អ្នកលក់រាយ រហូតដល់អ្នកវិទ្យាសាស្ត្រ។

The post ទីក្រុងឆ្លាតវៃតម្លៃដប់ពាន់លានដុល្លាររបស់ក្រុមហ៊ុនតូយ៉ូតា first appeared on La Reine Media.

រ៉ូបូតរបស់ណាសា ឆ្ពោះទៅកាន់ «ទន្លេជីវិត» ក្រៅភពផែនដី

សឿន សំណាង — Fri, 05 Apr 2024 15:57:23 +0000

យាន Curiosity របស់ទីភ្នាក់ងារអវកាសអាម៉េរិក (ណាសា) នឹងឆ្ពោះទៅកាន់តំបន់មួយដែលមិនទាន់ត្រូវបានស្រាវជ្រាវ ហើយអាចលាក់ភាវៈរស់ក្រៅភពផែនដី។

យោងតាមណាសា នៅក្នុងឆ្នាំទី 12 នៃបេសកកម្ម យានស្រាវជ្រាវលើដីភពអង្គារ Curiosity នឹងឆ្ពោះចូលទៅក្នុងតំបន់មួយដែលក្រុមអ្នកវិទ្យាសាស្ត្រជឿថា ជាផ្ទៃនៃទន្លេបុរាណមួយ ដែលត្រូវបានរំពឹងថា មានផ្ទុកភស្ដុតាងស្ដីពីភាវៈរស់។ នោះគឺជាតំបន់មួយដែលមិនធ្លាប់ត្រូវបានយានណាមួយស្រាវជ្រាវពីមុន ហើយត្រូវបានហៅថា Gediz Vallis។

Gediz Vallis មានរូបរាងដូចទៅនឹងសត្វពស់កំពុងលូនឆ្លងកាត់ Mount Sharp ដែលជាតំបន់ភ្នំដ៏គួរឱ្យចាប់អារម្មណ៍។ រាប់ពាន់លានឆ្នាំមុន ភ្នំនៅទីនេះត្រូវបានគេជឿថា ជាតំបន់បៃតង និងមានទឹកច្រើន។

ណាសាសង្ឃឹមថា Curiosity អាចរកឃើញភស្ដុតាងស្ដីពីភាវៈរស់ក្រៅភពផែនដី ដែលធ្លាប់មាននៅតំបន់នេះ ឬអាចជួបប្រទះអ្វីមួយដែលនៅមានជីវិត។

The post រ៉ូបូតរបស់ណាសា ឆ្ពោះទៅកាន់ «ទន្លេជីវិត» ក្រៅភពផែនដី first appeared on La Reine Media.

CEO របស់ Xiaomi បង្ហើបឱ្យដឹងតម្លៃរបស់រថយន្តអគ្គិសនីដែលជិតបង្ហាញខ្លួន

សឿន សំណាង — Mon, 25 Mar 2024 16:34:54 +0000

អគ្គនាយកប្រតិបត្តិរបស់ក្រុមហ៊ុនចិន Xiaomi នាថ្ងៃនេះ បានឱ្យដឹងថា គោលដៅរបស់លោកសម្រាប់រថយន្តអគ្គិសនីដំបូងរបស់ក្រុមហ៊ុន គឺវានឹងជា «រថយន្តស្អាតបំផុត ងាយស្រួលបើកបរបំផុត និងឆ្លាតវៃបំផុត» ហើយមានតម្លៃក្រោម 69,424 ដុល្លារអាម៉េរិក។

នៅថ្ងៃទី 28 ខាងមុខ Xiaomi នឹងប្រកាសតម្លៃជាផ្លូវការ ហើយក៏ចាប់ផ្ដើមទទួលការបញ្ជាទិញសម្រាប់រថយន្តអគ្គិសនី SU7។

លោក Lei Jun ដែលជា CEO របស់ Xiaomi បានអួតថា SU7 មានបច្ចេកវិទ្យាដែលអាចបង្កើនល្បឿនបានល្អជាងរថយន្តអគ្គិសនី Tesla របស់អាម៉េរិក និង Porsche របស់អាល្លឺម៉ង់ទៅទៀត។

The post CEO របស់ Xiaomi បង្ហើបឱ្យដឹងតម្លៃរបស់រថយន្តអគ្គិសនីដែលជិតបង្ហាញខ្លួន first appeared on La Reine Media.

បណ្ដាញផ្លូវដែកលើឋានព្រះចន្ទ នឹងបង្ហាញខ្លួននាពេលអនាគត

សឿន សំណាង — Fri, 22 Mar 2024 16:01:45 +0000

បណ្ដាញផ្លូវរថភ្លើងលើឋានព្រះចន្ទ អាចដឹកមនុស្ស ទំនិញ និងធនធានធម្មជាតិ សម្រាប់បម្រើដល់សកម្មភាពពាណិជ្ជកម្ម និងរួមចំណែកទៅក្នុងសេដ្ឋកិច្ចអវកាស។

ស្ថាប័នគ្រប់គ្រងបណ្ដាគម្រោងស្រាវជ្រាវការពារជាតិទំនើបអាម៉េរិក (DARPA) បានជ្រើសយកក្រុមហ៊ុនបច្ចេកវិទ្យាការពារជាតិ និងអវកាសចរណ៍ Northrop Grumman ដើម្បីអភិវឌ្ឍគំនិតស្ដីពីការស្ថាបនាផ្លូវដែកលើឋានព្រះចន្ទ។ នេះគឺជាផ្នែកមួយនៅក្នុងការស្រាវជ្រាវអំពីស្ថាបត្យកម្មព្រះចន្ទរយៈពេល 10 ឆ្នាំ (LunA-10) ដែល ADRPA ប្រកាសកាលពីឆ្នាំកន្លង ដោយមានការចូលរួមពីក្រុមហ៊ុនចំនួន 14 ផ្សេងទៀត។ នេះបើតាមការចុះផ្សាយរបស់ Interesting Engineering កាលពីថ្ងៃទី 20 មីនា។

ជាមួយនឹងគម្រោង LunA-10 ស្ថាប័ន DARPA សង្ឃឹមថា អាចរកឃើញដំណោះស្រាយសម្រាប់ការបង្កើតប្រព័ន្ធពហុមុខងារនៅលើឋានព្រះចន្ទ ដោយប្រព័ន្ធមួយអាចបំពេញភារកិច្ចច្រើន តាំងពីការផ្គត់ផ្គង់អគ្គិសនីគ្មានខ្សែ ស្ថានីយទំនាក់ទំនង រហូតដល់តួនាទីជាមជ្ឈមណ្ឌលកំណត់ទិសជាដើម។

Northrop Grumman គឺជាក្រុមហ៊ុនដំបូងដែលបង្ហើបឱ្យដឹងតួនាទីនៅក្នុងគម្រោង ដែលនឹងអភិវឌ្ឍបច្ចេកទេសស្ថាបនាផ្លូវដែកលើឋានព្រះចន្ទ។

ដូចទៅនឹងវត្តមានដំបូងរបស់ផ្លូវដែកកាលពីសតវត្សរ៍ទី 19 ដែលបានជួយបង្កើនសកម្មភាពសេដ្ឋកិច្ចនៅភាគខាងលិចសហរដ្ឋអាម៉េរិក បច្ចេកវិទ្យាថ្មីត្រូវបានរំពឹងថា នឹងចាប់ផ្ដើម ក៏ដូចជារក្សាកំណើនសេដ្ឋកិច្ចនៅលើផ្ទៃព្រះចន្ទ។

យោងតាមក្រុមហ៊ុនខាងលើ បណ្ដាញផ្លូវដែកឋានព្រះចន្ទ អាចដឹកមនុស្ស ទំនិញ និងធនធានធម្មជាតិ សម្រាប់បម្រើដល់សកម្មភាពពាណិជ្ជកម្ម និងរួមចំណែកទៅក្នុងសេដ្ឋកិច្ចអវកាសរបស់សហរដ្ឋអាម៉េរិក និងដៃគូសហការអន្តរជាតិ។

The post បណ្ដាញផ្លូវដែកលើឋានព្រះចន្ទ នឹងបង្ហាញខ្លួននាពេលអនាគត first appeared on La Reine Media.

កំណប់ 1.1 លានឆ្នាំ ធ្វើឱ្យប្រវត្តិសាស្ត្រមនុស្សជាតិត្រូវចារឡើងវិញ

សឿន សំណាង — Mon, 18 Mar 2024 08:51:37 +0000

មនុស្សសម័យបុរាណ បានមកដល់ដែនដីមួយដែលបច្ចុប្បន្នជាប្រទេសចិន ឆាប់ជាងច្រើន បើធៀបនឹងការរកឃើញកន្លងមក និងមានបច្ចេកវិទ្យាជឿលឿនខ្លាំង។

ការសិក្សាស្រាវជ្រាវមួយដែលដឹកនាំដោយសាស្ត្រាចារ្យ PEI Shuwen មកពីសភាវិទ្យាសាស្ត្រចិន និងសាស្ត្រាចារ្យ Ignacio de la Torre មកពីវិទ្យាស្ថានប្រវត្តិសាស្ត្រ នៃក្រុមប្រឹក្សាស្រាវជ្រាវអេស្ប៉ាញ បានធ្វើឱ្យមានការប្រែប្រួលនូវពេលវេលានៃការវិវឌ្ឍរបស់មនុស្សជាតិ ដែលបានចារនាពេលកន្លង។

យោងតាមអត្ថបទនៅលើទស្សនាវដ្ដីវិទ្យាសាស្ត្រ PNAS ពួកគេបានវិភាគទៅលើឃ្លាំងវត្ថុបុរាណមួយដ៏មានតម្លៃ ដែលត្រូវបានរកឃើញនៅតំបន់ Nihewan ស្ថិតក្នុងខេត្ត Hunan ប្រទេសចិន និងរកឃើញថា ពួកវាមានអាយុកាល 1.1 លានឆ្នាំទៅហើយ។

អ្វីដែលគួរឱ្យភ្ញាក់ផ្អើលជាងនេះ គឺថា បច្ចេកវិទ្យាដែលបានប្រើប្រាស់សម្រាប់ច្នៃឧបករណ៍នានាក្នុងយុគថ្ម (Stone Age) គឺ Mode 2 ជាវិធីសាស្ត្រច្នៃឧបករណ៍ដែលទំនើបជាងយុគដំបូងដែលហៅថា Mode 1។

Mode 2 មានចំណុចពិសេស ព្រោះបច្ចេកទេសឆ្លាក់នៅលើដុំថ្មប្រកបដោយការយកចិត្តទុកដាក់ ហើយដំណាក់កាលនៃការផលិតត្រូវបានធ្វើឱ្យមានស្តង់ដា។ ក្រៅពីនេះ ឧបករណ៍មួយចំនួនថែមទាំងមានរន្ធខួងផងដែរ។

យោងតាម SciTech Daily បុរាណវិទូក៏បានរកឃើញបំណែកថ្មដែលបែកចេញពីឧបករណ៍ ជាមួយនឹងភាពស៊ីគ្នា ដែលបញ្ជាក់អំពីស្តង់ដានេះ។

Mode 2 គឺជាជំហានដ៏លេចធ្លោនៅក្នុងបច្ចេកវិទ្យារបស់មនុស្សសម័យដំបូង ដោយមានភាពស្មុគស្មាញ និងមានប្រសិទ្ធភាពក្នុងការប្រើប្រាស់ជាងឆ្ងាយ បើធៀបនឹង Mode 1។

កន្លងមក គេជឿថា ក្នុងមួយរយៈពេលវែង បច្ចេកវិទ្យានៅតំបន់អាស៊ីខាងកើត នៅតែប្រើប្រាស់វិធីសាស្ត្រច្នៃឧបករណ៍បែប Mode 1។

ការរកឃើញខាងលើ នាំមកនូវទិន្នន័យថ្មីសំខាន់ចំនួនពីរ៖

*ទីមួយ មនុស្សបុរាណច្រើនអំបូរបានបង្ហាញវត្តមាននៅអាស៊ីខាងកើត ដែលបច្ចុប្បន្នគឺជាប្រទេសចិន ឆាប់ជាងឆ្ងាយ បើធៀបនឹងការយល់ដឹងកន្លងមក។

*ទីពីរ ពួកមានបច្ចេកវិទ្យាជឿលឿនខ្លាំង ដែលអាចអភិវឌ្ឍសមត្ថភាពច្នៃឧបករណ៍ Mode 2 ឆាប់ជាងយ៉ាងតិចបំផុត 300,000 ឆ្នាំ បើធៀបនឹងទិន្នន័យនៃការសិក្សាស្រាវជ្រាវចាស់។

ដូច្នេះ អាស៊ីខាងកើតអាចមិនមែនជាតំបន់ដំបូងគេលើផែនដី ដែល Mode 2 បង្ហាញវត្តមាន ប៉ុន្តែគឺជាមួយក្នុងចំណោមតំបន់ដែលមនុស្សបាននាំបច្ចេកវិទ្យានេះមករស់នៅឆាប់ជាងគេ។ មូលហេតុនេះហើយ ប្រវត្តិសាស្ត្ររបស់មនុស្សជាតិ អាចត្រូវសរសេរឡើងវិញម្ដងទៀត៕

The post កំណប់ 1.1 លានឆ្នាំ ធ្វើឱ្យប្រវត្តិសាស្ត្រមនុស្សជាតិត្រូវចារឡើងវិញ first appeared on La Reine Media.

ប្រព័ន្ធផ្កាយមានភព 6 នេះ ត្រូវបានសង្ស័យថា «មានជីវិតឆ្លាតវៃ»

សឿន សំណាង — Fri, 08 Mar 2024 12:40:12 +0000

អ្នកវិទ្យាសាស្ត្រជឿថា អាចរកឃើញបច្ចេកវិទ្យាពីភពផែនដី នៅក្នុងប្រព័ន្ធផ្កាយ HD 110067 ជាទីដែលមានភពរហូតដល់ 6 កំពុងវិលជុំវិញគ្នាយ៉ាងល្អឥតខ្ចោះ។

ត្រូវបានរកឃើញកាលពីឆ្នាំ 2023 ប្រព័ន្ធ HD 110067 ដែលមានផ្កាយក្រិនពណ៌ទឹកក្រូចនៅចំកណ្ដាល ហើយនៅជុំវិញគឺជាភពចំនួន 6 ដែលមានគន្លងគោចរប្រទាក់ក្រឡាគ្នាយ៉ាងល្អឥតខ្ចោះ ដែលហៅថា orbital resonance ត្រូវបានអ្នកវិទ្យាសាស្ត្រយល់ថា អាចមានវត្តមាននៃភាវៈរស់។

ភពមួយដែលស្ថិតនៅក្បែរផ្កាយមេរបស់វាបំផុត បញ្ចប់ការវិលមួយជុំ (មួយឆ្នាំ) ក្នុងរយៈពេល 9.1 ថ្ងៃរបស់ផែនដី ខណៈបណ្ដាភពជាបន្តបន្ទាប់មានគន្លងគោចរដែលមានរយៈពេល 13.6 ថ្ងៃ, 20.5 ថ្ងៃ, 30.8 ថ្ងៃ, 41 ថ្ងៃ និង 54.7 ថ្ងៃ។ ដូច្នេះ សមាមាត្រនៃឥទ្ធិពលរវាងភពដែលនៅក្បែរគ្នាក្នុងប្រព័ន្ធផ្កាយនេះគឺ 3:2, 3:2, 3:2, 4:3 និង 4:3 ។

យោងតាមលទ្ធផលនៃការស្រាវជ្រាវដែលទើបត្រូវបានប្រកាសលើទស្សនាវដ្ដីវិទ្យាសាស្ត្រ Research Notes of the AAS ភាពប្រទាក់ក្រឡាគ្នាល្អឥតខ្ចោះនេះ ជួយឱ្យភពទាំង 6 ដែលមានទំហំជិតស្មើនឹងភពណិបទូន (Neptune) មានបរិស្ថាននឹងនរអស់រាប់ពាន់លានឆ្នាំមកហើយ។

ភពខ្លះនៅក្នុងប្រព័ន្ធផ្កាយ HD 110067 ថែមទាំងមានសញ្ញាណរបស់ទឹកនៅលើផ្ទៃរបស់ពួកវាទៀតផង។ ពួកវាក៏ស្ថិតក្នុងស្ថានភាពនឹងនរ មិនច្របូកប្របល់យ៉ាងតិចមួយពាន់លានឆ្នាំកន្លង បន្ទាប់ពីកកើតរូបរាងល្អឥតខ្ចោះ និងវិលជុំវិញផ្កាយមេដែលមានអាយុបួនពាន់លានឆ្នាំ។

ប្រព័ន្ធផ្កាយ HD 110067 – (រូបភាព៖ Thibaut Roger, NCCR Planets)

អ្នកវិទ្យាសាស្ត្រនៅវិទ្យាស្ថានស្វែងរកជីវិតឆ្លាតវៃក្រៅភពផែនដី (SETI) របស់សហរដ្ឋអាម៉េរិក គណនាឃើញថា ភាពនឹងនរ និងពេលវេលានោះ គឺគ្រប់គ្រាន់ដែលអាចនាំមកនូវឱកាសល្អសម្រាប់ការកកើតជីវិត ការវិវត្ត និងការរីកចម្រើន។ ជាងនេះ ភាវៈរស់នោះទំនងជាបានវិវឌ្ឍដល់កម្រិតមួយដែលក្លាយជាអរិយធម៌ធំៗ ជាជីវិតដែលមានបច្ចេកវិទ្យាដែលអាចត្រូវបានរកឃើញពីចម្ងាយ។

ទំព័រ Science Alert បានផ្សាយថា ក្រុម SETI ក៏បានព្យាយាមស្វែងរករលកសញ្ញាពីបច្ចេកវិទ្យារបស់មនុស្សពិភពផ្កាយដែលស្ថិតក្នុងប្រព័ន្ធ HD 110067 តាមរយៈស្ថានីយតារាសាស្ត្រ Green Bank នៅសហរដ្ឋអាម៉េរិក ប៉ុន្តែមិនទាន់ចាប់បានប្រការដែលកំពុងទន្ទឹងរង់ចាំ។

The post ប្រព័ន្ធផ្កាយមានភព 6 នេះ ត្រូវបានសង្ស័យថា «មានជីវិតឆ្លាតវៃ» first appeared on La Reine Media.

Hacker បីក្រុមប្រកាសថា បានវាយប្រហារលើ Facebook/Instagram

សឿន សំណាង — Thu, 07 Mar 2024 08:26:25 +0000

ក្រោយពីហេតុការណ៍ Facebook, Instagram, Threads និង Messenger «នាំគ្នា» ឈប់ដំណើរការនៅទូទាំងពិភពលោក ធ្វើឱ្យប៉ះពាល់ធ្ងន់ធ្ងរដល់អ្នកប្រើប្រាស់ នៅម៉ោងប្រហែល 22 និង 25 នាទី ថ្ងៃទី 05 មីនា (ម៉ោងនៅកម្ពុជា) ក្រុមហ៊ុនសន្តិសុខបណ្ដាញអ៊ីនធើណិត Cyberint បានរាយការណ៍ថា «ចោរអ៊ីនធើណិត» (hacker) ចំនួនបីក្រុម រួមមាន Anonymous Sudan, Skynet និង Godzilla បានចេញមុខទទួលខុសត្រូវចំពោះរឿងនេះ។

បន្ទាប់ពីហេតុការណ៍បានកើតឡើង Anonymous Sundan ក៏បានបង្អួតស្នាដៃ តាមរយៈក្រុម Telegram «ការវាយប្រហារតាមអ៊ីនធើណិត ធ្វើឱ្យ Facebook គាំង ដែលបង្កើតឡើងដោយក្រុមរបស់យើង និងក្រុមហែកឃើរពីរផ្សេងទៀត គឺ Skynet និង Godzilla!»។ គោលដៅរបស់ពួកគេគឺ ការវាយប្រហារ និងបិទទ្វារថ្នាលបច្ចេកវិទ្យាដូច Facebook និង Instagram ជាដើម។

ក៏ប៉ុន្តែ Cyberint ឱ្យដឹងថា មិនទាន់ដឹងច្បាស់នៅឡើយថា Facebook, Instagram, Threads និង Messenger ត្រូវផ្អាកដំណើរការគឺដោយសារក្រុមទាំងបីខាងលើ។

ការបង្អួតស្នាដៃរបស់ក្រុម Anonymous Sundan

បើសិនវាពិតជាស្នាដៃរបស់ក្រុមហែកឃើរទាំងបីនេះមែន នោះការវាយប្រហារនេះមិនមែនជាលើកដំបូងដែលក្រុមទាំងនេះបានសហការគ្នានោះទេ។ កាលពីខែធ្នូឆ្នាំ 2023 ក្រុមទាំងបីនេះធ្លាប់បានទទួលខុសត្រូវចំពោះការសហការវាយប្រហារលើទំព័រចុះឈ្មោះចូលរបស់ Discord ។ មុននោះ ក្រុមនេះក៏ធ្លាប់បានរៀបផែនដីវាយប្រហារ ChatGPT ផងដែរ។

Facebook មិនទាន់បញ្ចេញប្រតិកម្មនៅឡើយ ទាក់ទងនឹងព័ត៌មានខាងលើ។ រហូតមកដល់បច្ចុប្បន្ន Facebook ទំនងជាមិនទាន់រៀបរយទាំងស្រុងនៅឡើយ ព្រោះអ្នកប្រើប្រាស់មួយចំនួននៅតែមិនទាន់ចូលប្រើប្រាស់បាន៕

The post Hacker បីក្រុមប្រកាសថា បានវាយប្រហារលើ Facebook/Instagram first appeared on La Reine Media.

យានអវកាសឯកជនអាម៉េរិក បញ្ជូនរូបថតដំបូងពីឋានព្រះចន្ទមកកាន់ផែនដី

សឿន សំណាង — Tue, 27 Feb 2024 08:23:33 +0000

យាន Odysseus បញ្ជូនរូបថតពីរសន្លឹកស្ដីពីផ្ទៃព្រះចន្ទ មកកាន់ផែនដី នៅមុនពេលបញ្ចប់បេសកកម្មឆាប់ជាងច្រើនថ្ងៃ បើធៀបនឹងគម្រោងដំបូង។

យោងតាមសារព័ត៌មាន Space កាលពីថ្ងៃទី 26 កុម្ភៈ ក្រុមហ៊ុន Intuitive Machines ប្រកាសលើបណ្ដាញសង្គម X ថា យាន Odysseus នៅតែភ្ជាប់ទំនាក់ទំនងជាមួយនឹងក្រុមគ្រប់គ្រងនៅលើផែនដី បើទោះវាដួលផ្អៀងទៅម្ខាង បន្ទាប់ពីបានចុះចតលើផ្ទៃព្រះចន្ទ។ យាននេះក៏បញ្ជូនរូបថតពីរសន្លឹកពីឋានព្រះចន្ទមកកាន់ផែនដី ក្នុងនោះមានមួយសន្លឹកត្រូវបានថតនៅពេលយានចុះដល់ទីតាំងចុះចតដែលមានឈ្មោះថា Malapert A ខណៈរូបមួយសន្លឹកទៀតគឺជារូបថតលើផ្ទៃព្រះចន្ទដោយផ្ទាល់ជាលើកដំបូងស្ដីពីផ្ទៃភពរណបនេះ។

យាន Lunar Reconnaissance របស់ណាសា ដែលមានជំនាញខាងស្កេនព្រះចន្ទពីគន្លងតារាវិថីតាំងពីឆ្នាំ 2009 ក៏បានថតរូបភាពរបស់យាន Odysseus ពីកម្ពស់ 90 គីឡូម៉ែត្រ។ រូបភាពពីកាម៉េរិករបស់យាន Lunar Reconnaissance បញ្ជាក់ថា Odysseus បានចុះចតដោយជោគជ័យ ពីកម្ពស់ 2,759 ម៉ែត្រ។

Intuitive Machines ឱ្យដឹងថា ក្រោយពីបានហោះហើរជាង 965,600 គីឡូម៉ែត្រ យាន Odysseus ក៏បានចុះចតលើទីតាំងដែលមានចម្ងាយពីគោលដៅ Malapert A 1.5 គីឡូម៉ែត្រ។ ក្រុមគ្រប់គ្រងបេសកកម្មបញ្ជាក់ថា Odysseus រអិលដួលផ្អៀងទៅម្ខាង សង្កត់លើថ្មមួយដុំ ធ្វើឱ្យអង់តែនមួយចំនួនរបស់វាត្រូវបែរទិសខុសពីការកំណត់។ ផ្អែកលើទីតាំងរបស់ផែនដី និងព្រះចន្ទ ក្រុមហ៊ុនខាងលើគណនាឃើញថា ក្រុមអ្នកគ្រប់គ្រងយានអាចបន្តទាក់ទងជាមួយ Odysseus រហូតដល់ព្រឹកថ្ងៃទី 27 កុម្ភៈ 2024 ឆាប់ជាងច្រើនថ្ងៃ បើធៀបនឹង 9 ថ្ងៃ ដែលជាការគ្រោងទុកដំបូង។

យាន Odysseus ត្រូវបានបាញ់បង្ហោះលើរ៉ុក្កែត Falcon 9 របស់ SpaceX ពីមជ្ឈមណ្ឌលអវកាស Kennedy របស់ណាសា នៅ Cape Canaveral រដ្ឋ Florida កាលពីថ្ងៃទី 15 កុម្ភៈ 2024 និងហោះចូលដល់គន្លងតារាវិថីព្រះចន្ទកាលពីថ្ងៃទី 21 កុម្ភៈ។ យាននេះបានចុះចតលើដីក្បែរមាត់រណ្ដៅ Malapert A នៅប៉ូលខាងត្បូងរបស់ព្រះចន្ទ។ យោងតាមណាសា នេះគឺជាតំបន់ដែលទាក់ទាញចំណាប់អារម្មណ៍របស់អ្នកវិទ្យាសាស្ត្រតាំងពីយូរមកហើយ ព្រោះតែវត្តមានរបស់ផ្ទាំងទឹកកក ដែលអាចបំបែកទៅជាអ៊ីដ្រូសែន និងអុកស៊ីសែន សម្រាប់ប្រើប្រាស់ជាឥន្ធនៈរបស់រ៉ុក្កែតនាពេលអនាគត។

បេសកកម្ម Odysseus ស្ថិតក្នុងកម្មវិធី Commercial Lunar Payload Services របស់ណាសា ដែលជួយជំរុញការអភិវឌ្ឍយានចុះចតឯកជន។ ណាសាបានចុះកិច្ចព្រមព្រៀងជាមួយនឹងបណ្ដាក្រុមហ៊ុនឯកជន ដើម្បីដឹកទំនិញ និងឧបករណ៍វិទ្យាសាស្ត្រឡើងទៅកាន់ឋានព្រះចន្ទ។ នៅមុនជោគជ័យរបស់ Odysseus ក៏មានយាន 5 គ្រឿងបានបរាជ័យក្នុងការចុះចតលើផ្ទៃព្រះចន្ទនាពេលថ្មីៗនេះ ក្នុងនោះក៏មានបេសកកម្មឯកជន Peregrine ដែលបានបរាជ័យកាលពីខែមុនផងដែរ៕

The post យានអវកាសឯកជនអាម៉េរិក បញ្ជូនរូបថតដំបូងពីឋានព្រះចន្ទមកកាន់ផែនដី first appeared on La Reine Media.

យានអវកាសឯកជនអាម៉េរិក ចុះចតដោយជោគជ័យលើឋានព្រះចន្ទ

សឿន សំណាង — Fri, 23 Feb 2024 09:37:08 +0000

យាន Odysseus របស់ក្រុមហ៊ុន Intuitive Machines ត្រូវបានចារក្នុងប្រវត្តិសាស្ត្របន្ទាប់ពីបានក្លាយជាយានអវកាសឯកជនដំបូងគេដែលបានទទួលជោគជ័យក្នុងការចុះចតលើផ្ទៃព្រះចន្ទ កាលពីវេលាទៀបភ្លឺថ្ងៃទី 23 កុម្ភៈ ឆ្នាំ 2024 ម៉ោងនៅកម្ពុជា។

នេះគឺជាព្រឹត្តិការណ៍ដ៏អស្ចារ្យនៅក្នុងការស្រាវជ្រាវទីអវកាស។ កន្លងមកពុំដែលមានយានអវកាសឯកជនណាមួយធ្លាប់បានទទួលជោគជ័យក្នុងការចុះចតលើផ្ទៃព្រះចន្ទ និងមិនទាន់មានយានអវកាសណាមួយរបស់អាម៉េរិក ចុះចតលើផ្ទៃឋានរណបនេះនៅឡើយ រាប់ចាប់ពីក្រោយការចុះចតរបស់យានមានមនុស្ស Apollo 17 កាលពីខែធ្នូ ឆ្នាំ 1972។

ទីភ្នាក់ងារអវកាសអាម៉េរិក (ណាសា) មានផែនការកសាងមូលដ្ឋានមានមនុស្សសម្រាប់កម្មវិធី Artemis នៅតំបន់ប៉ូលខាងត្បូងរបស់ព្រះចន្ទ ជាទីដែលត្រូវបានគេជឿថា មានផ្ទុកទឹកកកយ៉ាងច្រើន។ ក៏ប៉ុន្តែ មុននឹងនាំមនុស្សឡើងទៅកាន់ទីនោះ ណាសាចង់ប្រមូលទិន្នន័យបន្ថែមទៀត ទាក់ទងនឹងតំបន់ដែលមិនសូវមានការស្រាវជ្រាវច្រើនមួយនេះ ក្នុងនោះរួមមានទាំងប្រភពទឹកជាដើម។

ដើម្បីឆ្លើយតបនឹងតម្រូវការខាងលើ ណាសាក៏បានបង្កើតកម្មវិធីដោយឡែកមួយដែលមានឈ្មោះថា CLPS (Commercial Lunar Payload Services) អនុញ្ញាតឱ្យបណ្ដាក្រុមហ៊ុនអាម៉េរិក អភិវឌ្ឍយានចុះចតលើផ្ទៃព្រះចន្ទបែបស្វ័យប្រវត្តិ ដើម្បីដឹកឧបករណ៍វិទ្យាសាស្ត្រ ហើយយាន Odysseus របស់ក្រុមហ៊ុន Intuitive Machines ក៏ស្ថិតក្នុងកម្មវិធីនេះផងដែរ៕

The post យានអវកាសឯកជនអាម៉េរិក ចុះចតដោយជោគជ័យលើឋានព្រះចន្ទ first appeared on La Reine Media.

សេណារីយ៉ូណាដែលធ្វើឱ្យតម្លៃមាសពិភពលោកឡើងដល់ 361 ដុល្លារ/ជី

សឿន សំណាង — Thu, 22 Feb 2024 03:07:00 +0000

តម្លៃមាសអាចកើន 50% ឡើងដល់ 3,000 ដុល្លារអាម៉េរិកក្នុងមួយអោន (1 អោន (ounce) = 8.29426 ជី) នៅក្នុងរង្វង់ពី 12 ទៅ 18 ខែទៀត បើសិនសេដ្ឋកិច្ចពិភពលោកធ្លាក់ចូលក្នុងឱនភាពជ្រៅជាងបច្ចុប្បន្ន និងបណ្ដាធនាគារកណ្ដាលបង្កើនការទិញ។ នេះបើតាមធនាគារ Citi។

តម្លៃមាសប្រគល់ភ្លាមពិភពលោក បច្ចុប្បន្នត្រូវបានជួញដូរក្នុងតម្លៃ 2,016 ដុល្លារក្នុងមួយអោន ទាបជាងឆ្ងាយបើធៀបនឹង 2,135 ដុល្លារកាលពីខែធ្នូ 2023។ ក៏ប៉ុន្តែ ក្រុមអ្នកវិភាគនៅធនាគារ Citi យល់ថា តម្លៃមាសនេះអាចឡើងដល់ 3,000 ដុល្លារ/អោន នៅក្នុងរង្វង់ពី 12 ទៅ 18 ខែខាងមុខ។

យោងតាម Aakash Doshi ប្រធានក្រុមអ្នកវិភាគទំនិញតំបន់អាម៉េរិកខាងជើង ប្រចាំធនាគារ Citi សេណារីយ៉ូដែលមានភាគរយកើតឡើងខ្ពស់ជាងគេ ដែលនាំឱ្យមាសឡើងថ្លៃដល់ 3,000 ដុល្លារ/អោន គឺនិន្នាការ «មិនប្រើប្រាស់ប្រាក់ដុល្លារអាម៉េរិក» នៅតាមធនាគារជាតិនៃបណ្ដាប្រទេសទើបលេចធ្លោ។ ប្រការនេះអាចនាំឱ្យកម្លាំងទិញមាសរបស់ធនាគារទាំងនេះកើនឡើងទ្វេដង។ បច្ចុប្បន្ន គ្រឿងអលង្ការគឺជាកម្លាំងរុញច្រានចម្បងគេសម្រាប់តម្រូវការមាសលើពិភពលោក។

«និន្នាការនេះកំពុងកើតឡើង ប៉ុន្តែមានសភាពយឺតយ៉ាវខ្លាំង។ បើសិនត្រូវបានជំរុញល្បឿន វិបត្តិទំនុកចិត្តលើប្រាក់ដុល្លារអាម៉េរិក នឹងកើតឡើង» Aakash Doshi ឱ្យដឹងដូច្នេះ។

Citi ឱ្យដឹងថា ប៉ុន្មានឆ្នាំចុងក្រោយនេះ កម្លាំងទិញមាសរបស់បណ្ដាធនាគារកណ្ដាល បានកើនឡើងដល់កម្រិតខ្ពស់បំផុត នៅពេលពួកគេស្វែងរកវិធីធ្វើពិពិធកម្មទុនបម្រុង និងកាត់បន្ថយហានិភ័យឥណទាន។ ធនាគារជាតិចិន និងរុស្ស៊ី ទិញមាសច្រើនជាងគេបំផុត និងតាមពីក្រោយដោយប្រទេសឥណ្ឌា តួកគី និងប្រេស៊ីល។

របាយការណ៍របស់ក្រុមប្រឹក្សាមាសពិភពលោក (WGC) កាលពីខែមករា បង្ហាញថា បណ្ដាធនាគារកណ្ដាលបានទិញមាសជាង 1,000 តោន ក្នុងរយៈពេលពីរឆ្នាំជាប់ៗគ្នា។ «បើសិនតួលេខនេះច្រើនជាងទ្វេដង ពោលគឺឡើងដល់ 2,000 តោន យើងយល់ថា នេះនឹងជាកម្លាំងទាញដ៏ធំសម្រាប់តម្លៃមាស» Doshi បញ្ជាក់ដូច្នេះ។

ទន្ទឹមនឹងនេះ ការដែលសេដ្ឋកិច្ចពិភពលោកធ្លាក់ចូលក្នុងឱនភាពជ្រៅ ក៏អាចទាញតម្លៃមាសឱ្យឡើងដល់ 3,000 ដុល្លារក្នុងមួយអោន ព្រោះថា សេណារីយ៉ូនេះធ្វើឱ្យធនាគារកណ្ដាលអាម៉េរិក (Fed) បញ្ចុះអត្រាការប្រាក់កម្រិតខ្ពស់បំផុត។ ប៉ុន្តែ Citi ឱ្យដឹងថា សេណារីយ៉ូនេះមានលទ្ធភាពកើតឡើងមិនខ្ពស់។

ក្រៅពីនេះ Stagflation (កំណើនសេដ្ឋកិច្ចទាប អមនឹងអតិផរណា) ក៏អាចជាកត្តារុញតម្លៃមាសឱ្យឡើងខ្ពស់ ដោយសារមាសគឺជាទ្រព្យសុវត្ថិភាពក្នុងពេលមានអស្ថិរភាពសេដ្ឋកិច្ច – នយោបាយ។ ក៏ប៉ុន្តែ សេណារីយ៉ូនេះក៏មានលទ្ធភាពកើតឡើងក្នុងកម្រិតទាប។

ក្នុងស្ថានភាពធម្មតា Citi ព្យាករថា តម្លៃមាសជាមធ្យមនឹងត្រូវបានជួញដូរក្នុងរង្វង់ 2,000 ដុល្លារ/អោន នៅពាក់កណ្ដាលដើមឆ្នាំ និងឡើងដល់ 2,150 ដុល្លារ នៅពាក់កណ្ដាលចុងឆ្នាំ 2024។ ធនាគារនេះរំពឹងថា នៅចុងឆ្នាំនេះ តម្លៃមាសអាចមានលទ្ធភាពហក់ឡើងដល់កម្រិតថ្មីមួយទៀត៕

The post សេណារីយ៉ូណាដែលធ្វើឱ្យតម្លៃមាសពិភពលោកឡើងដល់ 361 ដុល្លារ/ជី first appeared on La Reine Media.

ផ្ទាំងសូឡាតម្លៃទាបនាំចូលពីប្រទេសចិន កំពុងធ្វើឱ្យអឺរ៉ុបឈឺក្បាល

សឿន សំណាង — Thu, 08 Feb 2024 10:27:34 +0000

ក្រុមអ្នកផលិតនៅអឺរ៉ុប នាំគ្នាសុំជំនួយ ព្រោះតែមិនអាចប្រកួតប្រជែងបានជាមួយនឹងផ្ទាំងសូឡាតម្លៃទាបដែលផលិតនៅប្រទេសចិន ប៉ុន្តែមិនទាន់រកឃើញវិធីដោះស្រាយដែលមិនមានផលវិបាក។

សហភាពអឺរ៉ុប (EU) ទើបតែទទួលបានជោគជ័យក្នុងវិស័យថាមពលបៃតងនាឆ្នាំកន្លង។ ពួកគេបានដំឡើងផ្ទាំងសូឡាច្រើនជាងឆ្នាំ 2022 រហូតដល់ 40% បើគិតអំពីអានុភាព។ ក៏ប៉ុន្តែ ជោគជ័យនេះមិនបានជួយអ្វីដល់បណ្ដាក្រុមហ៊ុនផលិតផ្ទាំងសូឡាក្នុងស្រុក។ ព្រោះថា ផ្ទាំងសូឡា ក៏ដូចជាជើងទម្រ និងឧបករណ៍ដំឡើង ភាគច្រើនត្រូវបាននាំចូលពីប្រទេសចិន។ នេះបើយោងតាមទិន្នន័យរបស់អង្គការថាមពលអន្តរជាតិ។

នៅពេលត្រូវបានផ្ដួលដោយសារគូប្រជែងមកពីចិន បូករួមនឹងស្ថានភាពបរិមាណច្រើនលើសពីតម្រូវការ ក្រុមហ៊ុនមួយចំនួននៅ EU បានធ្លាក់ចូលក្នុងវិបត្តិ។ ការប្រកាសបិទទ្វាររោងចក្រកំពុងកើតឡើងជាហូរហែនៅអឺរ៉ុប។ វិស័យឧបករណ៍អគ្គិសនីព្រះអាទិត្យនៅអឺរ៉ុបបានព្រមានថា ផលិតកម្មប្រមាណពាក់កណ្ដាលអាចនឹងបាត់ខ្លួនពីទីផ្សារ បើសិនរដ្ឋាភិបាលមិនជួយដោះស្រាយ។

បណ្ដាក្រុមហ៊ុននៅអឺរ៉ុបបានចោទប្រកាន់ថា ក្រុមហ៊ុននានានៅប្រទេសចិន កំពុងលក់ទំនិញក្នុងតម្លៃទាបជាងការចំណាយក្នុងការផលិត។ Gunter Erfurt ដែលជាអគ្គនាយកប្រតិបត្តិរបស់ក្រុមហ៊ុនផលិតឧបករណ៍អគ្គិសនីព្រះអាទិត្យ Meyer Burger និយាយថា វិស័យឧស្សាហកម្មនៅប្រទេសចិន ទទួលបានជំនួយច្រើនរាប់រយពាន់លានដុល្លារអាម៉េរិក ពីរដ្ឋាភិបាលរបស់ពួកគេ។

ក្រុមអ្នកច្បាប់របស់រដ្ឋាភិបាលនានានៅ EU កំពុងប្រឹងប្រែងដោះស្រាយ ប៉ុន្តែ នៅមិនទាន់រកឃើញចំណុចឯកភាពគ្នានៅឡើយ ទាក់ទងនឹងបញ្ហាខាងលើ។ រដ្ឋមន្ត្រីសេដ្ឋកិច្ចរបស់ប្រទេសខ្លះ បានសម្ដែងការព្រួយបារម្ភចំពោះរឿងដែលថា ក្រុមមន្ត្រី EU អាចនឹងពិចារណាលើការកាត់បន្ថយពាណិជ្ជកម្មចំពោះផ្ទាំងសូឡាដែលមានប្រភពពីប្រទេសចិន ដោយលើកហេតុផលថា ប្រការនេះអាចរារាំងល្បឿននៃការរីកចម្រើនរបស់វិស័យថាមពលបៃតងនៅអឺរ៉ុបជាដើម ខណៈដែលមន្ត្រីប្រទេសខ្លះទៀតថា នឹងរឹតបន្តឹងការនាំចូលផលិតផលនេះពីប្រទេសចិន៕

The post ផ្ទាំងសូឡាតម្លៃទាបនាំចូលពីប្រទេសចិន កំពុងធ្វើឱ្យអឺរ៉ុបឈឺក្បាល first appeared on La Reine Media.

ស្ពានដែលវែងជាងគេបង្អស់លើពិភពលោក

សឿន សំណាង — Wed, 07 Feb 2024 03:46:22 +0000

(ប្រទេសចិន) – ស្ពាន Danyang–Kunshan គឺជាមហាគម្រោងដែលវែងជាងគេលើពិភពលោក ក្នុងនោះវាត្រូវបានសាង សង់ឆ្លងកាត់ទន្លេ បឹង វាលភក់ និងទីក្រុងជាច្រើន។

ស្ពានខាងលើដែលតភ្ជាប់ទីក្រុងសៀងហៃ និងណានជិញ គឺជាស្ពានដែលវែងជាងគេលើពិភពលោក ដោយមានប្រវែង 164.8 គីឡូម៉ែត្រ និងមានកម្ពស់ជាមធ្យម 30 ម៉ែត្រពីផ្ទៃទឹក។

ស្ពាន Danyang–Kunshan មានកំណាត់ខ្លះគឺជាស្ពានលើគោក ក្នុងនោះក៏មានមួយកំណាត់ដែលមានប្រវែងរហូតដល់ 114 គីឡូម៉ែត្រ។

ស្ពាននេះត្រូវបានចាប់ផ្ដើមសាងសង់ពីឆ្នាំ 2006 ហើយរួចរាល់នៅក្នុងឆ្នាំ 2010 និងដាក់ឱ្យប្រើប្រាស់នៅឆ្នាំ 2011 ដោយត្រូវចំណាយប្រាក់អស់ 8.5 ពាន់លានដុល្លារអាម៉េរិក។

ស្ពាន Danyang–Kunshan Grand Bridge ប្រើប្រាស់សសរបេតុងចំនួន 11,500 សសរ និងអាចទប់នឹងគ្រោះធម្មជាតិច្រើនប្រភេទ មានដូចជា រញ្ជួយដី និងព្យុះ ក៏ដូចជាការបុកពេញទំហឹង 300,000 តោន ពីនាវាយោធាជាដើម។ អាយុកាលដែលត្រូវបានកំណត់របស់ស្ពាននេះគឺជាង 100 ឆ្នាំ៕

The post ស្ពានដែលវែងជាងគេបង្អស់លើពិភពលោក first appeared on La Reine Media.

រថភ្លើង «ហោះលើផ្លូវដែក» របស់ចិន បង្កើតបានកំណត់ត្រាល្បឿនថ្មី

សឿន សំណាង — Sat, 03 Feb 2024 15:49:11 +0000

សាជីវកម្មឧស្សាហកម្ម និងវិទ្យាសាស្ត្រអវកាសចិន (CASIC) បង្កើតបានកំណត់ត្រាល្បឿនថ្មីរបស់រថភ្លើងអណ្ដែតដើរដោយកម្លាំងមេដែក ឬហៅថា Maglev Train (Maglev ជាពាក្យកាត់របស់ពាក្យ magnetic levitation) បើកផ្លូវសម្រាប់ប្រព័ន្ធរថភ្លើង Hyperloop ល្បឿនមហាលឿន នាពេលអនាគត។

បើទោះជាល្បឿនពិតប្រាកដដែលខ្សែរថភ្លើងនេះសម្រេចបានគឺជាព័ត៌មានសម្ងាត់ ប៉ុន្តែ CASIC ឱ្យដឹងថា ពួកគេបានឈានដល់ជំហានដ៏សំខាន់នៅក្នុងការធ្វើតេស្តនាពេលថ្មីៗនេះ។ នេះបើតាម Sun ចុះផ្សាយកាលពីថ្ងៃទី 22 កុម្ភៈ 2024។

យោងតាម CASIC នេះគឺជាលើកដំបូងដែលរថភ្លើង Maglev ឈានដល់កម្រិតអណ្ដែតស្ថិរភាព នៅពេលផ្លាស់ទីក្នុងបំពង់សុញ្ញកាសកម្រិតទាប ដោយប្រើប្រាស់ផ្លូវរថភ្លើងសម្រាប់ការពិសោធ ប្រវែង 2 គីឡូម៉ែត្រ ដែលស្ថាបនារួចរាល់កាលពីខែវិច្ឆិកា 2023។ CASIC បង្ហើបឱ្យដឹងថា លទ្ធផលបានបំបែកកំណត់ត្រាមុននោះ (623 គីឡូម៉ែត្រ/ម៉ោង) របស់រថភ្លើង Maglev មួយខ្សែដែលធ្វើដំណើរក្នុងបរិស្ថានធម្មតាកាលពីខែតុលា 2023។

ទូរថភ្លើងដែលត្រូវបានធ្វើតេស្តលើផ្លូវដែកសុញ្ញកាសកម្រិតទាប

បច្ចេកវិទ្យា Maglev ជួយឱ្យរថភ្លើងអណ្ដែតពីលើផ្លូវដែក លុបបំបាត់ភាពកកិតនៅពេលធ្វើដំណើរតាមបំពង់សុញ្ញកាសកម្រិតទាប។ ស្ថានភាពក្បែរសុញ្ញកាស (ស្ទើរតែគ្មានខ្យល់ ឬម៉ូលេគុល) កាត់បន្ថយកម្លាំងកកិតរបស់ខ្យល់ បង្កើតបានជា «ជើងហោះហើរទាបក្បែរដី» ក្នុងល្បឿនលឿនខ្លាំង។

The post រថភ្លើង «ហោះលើផ្លូវដែក» របស់ចិន បង្កើតបានកំណត់ត្រាល្បឿនថ្មី first appeared on La Reine Media.

គម្រោងព្រះពុទ្ធប្បដិមាខ្ពស់ជាងគេនៅកម្ពុជា ទទួលបានការនិមន្តមកទតពីព្រះប្រធានកិត្តិយសនៃសម្ព័ន្ធពុទ្ធសាសនិកពិភពលោក

សឿន សំណាង — Tue, 30 Jan 2024 15:33:32 +0000

ព្រះប្រធានកិត្តិយសសម្ព័ន្ធពុទ្ធសាសនិកពិភពលោក World Alliance of Buddhists – WAB កាលពីពេលថ្មីៗនេះ បាននិមន្តមកពីប្រទេសភូមា ដើម្បីទតការដ្ឋានសាងសង់សំណង់ ព្រះពុទ្ធប្បដិមា ដែលខ្ពស់ជាងគេបង្អស់នៅកម្ពុជា។

យោងតាមសមាគមឧកញ៉ាកម្ពុជា អ្នកឧកញ៉ា សុខ គង់ ទីប្រឹក្សាជាន់ខ្ពស់នៃសមាគមឧកញ៉ាកម្ពុជា រួមនឹងឧកញ៉ា និងបុគ្គលល្បីឈ្មោះមួយចំនួនទៀត បានអញ្ជើញទទួលបដិសណ្ឋារកិច្ចចំពោះការនិមន្តមកដល់របស់សម្តេចសង្ឃព្រះនាម Ven. Sayadaw Pandawontha (Aungzabu) Mahasadhamajotikadaja ព្រះប្រធានកិត្តិយសសម្ព័ន្ធពុទ្ធសាសនិកពិភពលោក World Alliance of Buddhists – WAB និមន្តមកពីប្រទេសភូមា (មីយ៉ាន់ម៉ា) ដើម្បីទតការដ្ឋានសាងសង់សំណង់ ព្រះពុទ្ធប្បដិមាកម្ពស់ 108 ម៉ែត្រ នៅលើភ្នំបូកគោ។

គម្រោងសាងសង់ព្រះពុទ្ធប្បដិមាកម្ពស់ 108 ម៉ែត្រ នៅលើខ្នងភ្នំបូកគោ ស្ថិតនៅក្នុងឧទ្យានជាតិព្រះមុនីវង្ស «បូកគោ» នេះ ជាគំនិតផ្តួចផ្តើមរបស់អ្នកឧកញ៉ា សុខ គង់។ ព្រះពុទ្ធប្បដិមានេះ នឹងខ្ពស់ជាងគេនៅកម្ពុជាហើយក៏នឹងស្ថិតក្នុងចំណោមព្រះពុទ្ធប្បដិមាខ្ពស់ៗនៅលើពិភពលោក។ នេះបើតាមទំព័រ Preahputhpadima108monbokor។

ទំព័រ Preahputhpadima108monbokor ឱ្យដឹងថា ព្រះពុទ្ធប្បដិមានេះមានទម្រង់ជា ព្រះពុទ្ធមារវិជ័យ ឬ ផ្ចាញ់មារនៃរចនាប័ទ្មបាយ័ន ដែលជារចនាប័ទ្មកំពូលនៃព្រះពុទ្ធសាសនាក្នុងរជ្ជកាលព្រះបាទជ័យវ័រ្មនទី 7 នាសតវត្សរ៍ទី 13។

ព្រះពុទ្ធប្បដិមានេះ នឹងសាងសង់អំពីបេតុងអាម៉េ មានពណ៌មាស បែរព្រះភក្រ្តទៅទិសខាងកើត មានកម្ពស់108 ម៉ែត្រ ពីនីវ៉ូសូន្យនៃខឿនផ្ទាល់ដីដល់កំពូលព្រះមោលី ដែលតំណាងមង្គលទាំង 108 របស់ព្រះអង្គ ទ្រង់គង់ភ្នែននៅលើបល្ល័ងផ្កាឈូករាងរង្វង់(វដ្តសង្ខារ) ដែលទម្រង់ក្បាច់រចនាបល្ល័ងនេះ យកលំនាំតាមផ្នែកមួយរបស់សសរពេជ្រប្រាសាទដំរីក្រាបនៃរចនាប័ទ្មគូលែន ក្នុងរជ្ជកាលព្រះបាទជ័យវ័រ្មនទី 2 នាសតវត្សរ៍ទី 9។

ចំពោះខឿនជាន់ទី 1 មានក្តារបែន ឬ រានហាលនៅចំពីមុខ សម្រាប់ប្រារព្ធពិធីសាសនា ហើយមានព្រះពុទ្ធរូប 7 អង្គ ព្រះអសីតិសាវ័ក 5 អង្គ និងព្រះ 2 អង្គទៀត សរុបចំនួន 12 អង្គ (តំណាងឱ្យខែឆ្នាំទាំង 12) គង់ក្នុងបុស្បុក តម្កល់ជុំវិញព្រះពុទ្ធប្បដិមាអង្គធំ និងមានជណ្តើរចំនួន 8 (តំណាងឱ្យទិសទាំង 8 និងអរិយមគ្គទាំង 8) សម្រាប់ឡើងឆ្ពោះទៅកាន់ទីសក្ការៈនៃព្រះពុទ្ធប្បដិមា។

ជារួម គម្រោងសាងសង់ព្រះពុទ្ធប្បដិមាដែលនឹងត្រូវចំណាយពេលវេលាសាងសង់ប្រមាណ 4 ឆ្នាំនេះ គឺជាការរក្សានូវអត្តសញ្ញាណជាតិនៃវប្បធម៌សាសនា ដោយឈរលើមូលដ្ឋានរក្សាចាស់ បង្កើតថ្មី៕

The post គម្រោងព្រះពុទ្ធប្បដិមាខ្ពស់ជាងគេនៅកម្ពុជា ទទួលបានការនិមន្តមកទតពីព្រះប្រធានកិត្តិយសនៃសម្ព័ន្ធពុទ្ធសាសនិកពិភពលោក first appeared on La Reine Media.

ខ្សែរថភ្លើងដែលតភ្ជាប់រាជធានីរបស់ថៃ និងរដ្ឋធានីរបស់ឡាវ នឹងដំណើរការសាកល្បងនៅក្នុងខែកុម្ភៈខាងមុខ

សឿន សំណាង — Fri, 26 Jan 2024 16:23:55 +0000

ក្រុមហ៊ុនផ្លូវដែករដ្ឋថៃ (SRT) មានគម្រោងពង្រីកខ្សែរថភ្លើង Bangkok-Nong Khai ទៅកាន់រដ្ឋធានីវៀងចន្ទន៍របស់ប្រទេសឡាវ ចាប់ពីខែមេសាឆ្នាំ 2024។ នេះបើតាមការចុះផ្សាយរបស់ Thaitrainguide។

ប្រធាននាយកដ្ឋានដឹកជញ្ជូនតាមផ្លូវដែកនៃក្រសួងដឹកជញ្ជូនថៃ លោក Pichet Kunadhamraks ឱ្យដឹងថា គិតមកដល់បច្ចុប្បន្ន SRT បានដំណើរការខ្សែរថភ្លើងពី Nong Khai នៅភាគពាយព្យប្រទេសថៃ ទៅកាន់ស្ថានីយ Thanaleng របស់ឡាវ។

ចាប់ពីខែកុម្ភៈខាងមុខ SRT នឹងដំណើរការសាកល្បងខ្សែរថភ្លើងពីស្ថានីយ Nong Khai ឆ្លងកាត់ Thanaleng ទៅកាន់ស្ថានីយ Khamasavath ថ្មី នៅវៀងចន្ទន៍ ដើម្បីត្រៀមដំណើរការជាផ្លូវការចាប់ពីខែមេសា ឆ្នាំ 2024។

ស្ថានីយ Nong Khai មានចម្ងាយពីស្ថានីយ Khamsavath ប្រហែល 13 គីឡូម៉ែត្រ។ សំបុត្រសម្រាប់ការធ្វើដំណើរតាមរថភ្លើងប្រហែល 20 នាទីនេះ នឹងមានតម្លៃប្រហែលពី 60 – 70 បាត (1.68 – 1.96 ដុល្លារអាម៉េរិក)។

នៅពេលដំណើរការជាផ្លូវការ ខ្សែរថភ្លើង Bangkok-Nong Khai ដែលចេញដំណើរពីស្ថានីយ Krung Thep Aphiwat (ប្រទេសថៃ) នឹងត្រូវបានប្ដូរឈ្មោះទៅជា Bangkok-Vientiane (Khamsavath)៕

The post ខ្សែរថភ្លើងដែលតភ្ជាប់រាជធានីរបស់ថៃ និងរដ្ឋធានីរបស់ឡាវ នឹងដំណើរការសាកល្បងនៅក្នុងខែកុម្ភៈខាងមុខ first appeared on La Reine Media.

ក្រុមហ៊ុនមួយរបស់កូរ៉េខាងត្បូង មានគោលដៅបង្កើតរោងចក្រផលិតគ្រឿងបង្គុំរថយន្តអគ្គសនីនៅកម្ពុជា

សឿន សំណាង — Thu, 25 Jan 2024 15:32:34 +0000

គណៈប្រតិភូក្រុមហ៊ុន CAMKO MOTOR COMPANT LTD. និងក្រុមហ៊ុន CAMKO INFRACORE CO., LTD. របស់កូរ៉េខាងត្បូង បានបង្ហាញទិសដៅនៃការបង្កើតរោងចក្រផលិតគ្រឿងបង្គុំរថយន្តអគ្គិសនីនៅកម្ពុជា។

ការបង្ហាញទិសដៅរបស់ក្រុមហ៊ុនខាងលើ ត្រូវបានលើកឡើងនៅក្នុងជំនួបពិភាក្សាការងាររវាងក្រុមប្រឹក្សាអភិវឌ្ឍកម្ពុជាដែលដឹកនាំដោយឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទីមួយនៃក្រុមប្រឹក្សាអភិវឌ្ឍន៍កម្ពុជា និងប្រតិភូកូរ៉េខាងត្បូងដែលដឹកនាំដោយអតីតនាយករដ្ឋមន្ត្រីនៃសាធារណរដ្ឋករ៉េ លោក Chung Sye-Kyun កាលពីព្រឹកថ្ងៃទី 24 មករា 2024។

យោងតាមក្រុមប្រឹក្សាអភិវឌ្ឍកម្ពុជា ជំនួបនេះត្រូវបានរៀបចំឡើងក្នុងគោលបំណងដើម្បីពិភាក្សាអំពីកិច្ចសហប្រតិបត្តិការរវាងភាគីទាំងពីរកម្ពុជា-កូរ៉េ នាពេលកន្លងមក ពិសេសលើសកម្មភាពវិនិយោគ និងការជំរុញឱ្យមានវិនិយោគិនពីក្រុមហ៊ុននានារបស់សាធារណរដ្ឋកូរ៉េ ចូលមកបណ្ដាក់ទុននៅកម្ពុជាបន្ថែមទៀត។

ក្រុមហ៊ុន CAMKO MOTOR បច្ចុប្បន្នកំពុងមានប្រតិបត្តិការអាជីវកម្មនៅកម្ពុជា លើការដំឡើងរថយន្តម៉ាក Hyundai និងផលិតខ្សែភ្លើងរថយន្ត សម្រាប់ការនាំចេញ។ ចំណែកក្រុមហ៊ុន CAMKO INFRACORE តាមរយៈកិច្ចប្រជុំនេះ ក៏បានបង្ហាញទិសដៅនៃការដាក់ទុនវិនិយោគបង្កើតរោងចក្រផលិតគ្រឿងបង្គុំរថយន្តអគ្គសនីនៅកម្ពុជា សម្រាប់ការនាំចេញទៅទីផ្សារអន្តរជាតិ។

The post ក្រុមហ៊ុនមួយរបស់កូរ៉េខាងត្បូង មានគោលដៅបង្កើតរោងចក្រផលិតគ្រឿងបង្គុំរថយន្តអគ្គសនីនៅកម្ពុជា first appeared on La Reine Media.

Hyundai បង្ហាញតាក់ស៊ីហោះ 193 គីឡូម៉ែត្រ/ម៉ោង អាចហោះឡើង-ចុះចតដូចឧទ្ធម្ភាគចក្រ

សឿន សំណាង — Wed, 24 Jan 2024 15:32:52 +0000

តាក់ស៊ីហោះគំរូថ្មីរបស់ក្រុមហ៊ុនកូរ៉េខាងត្បូង Hyundai ដែលហោះឡើង និងចុះចតបែបបញ្ឈរត្រង់ ដំណើរការបានស្រួលជាងឆ្ងាយបើធៀបនឹងឧទ្ធម្ភាគចក្រ និងធ្វើដំណើរបានចម្ងាយពី 40 ទៅ 64 គីឡូម៉ែត្រ ក្នុងល្បឿន193 គីឡូម៉ែត្រ/ម៉ោង។

តាក់ស៊ីហោះឡើង ចុះចតបញ្ឈរត្រង់ដែលប្រើប្រាស់អគ្គិសនី (eVTOL) មានកៅអីចំនួនបួន និងត្រូវបានផលិតដោយក្រុមហ៊ុន Supernal របស់ Hyundai ឈ្មោះ SA-2 នេះ នឹងមានវត្តមានក្នុងទីផ្សារចាប់ពីឆ្នាំ 2028 បន្ទាប់ពីបានហោះហើរសាកល្បងនៅចុងឆ្នាំ 2024។ នេះបើតាមការផ្សាយកាលពីថ្ងៃទី 22 មករា របស់ Live Science ដែលបានដកស្រង់សម្ដីរបស់តំណាងនៃក្រុមហ៊ុន Hyundai ដែលបានឱ្យដឹងនៅក្នុងពិព័រណ៍អេឡេចត្រូនិច CES 2024 នាពេលថ្មីៗកន្លងទៅនេះ។

SA-2 ត្រូវបានផលិតឡើងដើម្បីអាចហោះធម្មតាក្នុងល្បឿន 193 គីឡូម៉ែត្រ/ម៉ោង នៅលើកម្ពស់ 457 ម៉ែត្រ និងបញ្ចប់ជើងហោះហើរពី 40 ទៅ 64 គីឡូម៉ែត្រ។ យោងតាមអាជ្ញាធរគ្រប់គ្រងអាកាសចរណ៍សហរដ្ឋអាម៉េរិក (FAA) តាក់ស៊ីហោះនេះបញ្ចេញសំឡេងរំខានតិចជាងឆ្ងាយបើធៀបនឹងឧទ្ធម្ភាគចក្រ។

បច្ចុប្បន្ន Supernal កំពុងរៀបគម្រោងសម្រាប់ការហោះហើរសាកល្បងនៅចុងឆ្នាំនេះ។ ក្រុមហ៊ុនក៏មានគម្រោងដាក់ឯកសារជូន FAA ក្នុងឆ្នាំ 2024 មុនពេលស្នើសុំច្បាប់ហោះហើរពិសេសនៅឆ្នាំ 2025 ខណៈការធ្វើតេស្តលម្អិតបំផុតនឹងចាប់ផ្ដើមនៅដើមឆ្នាំ 2027។ Hyundai មានគោលដៅផលិត SA-2 នៅឆ្នាំ 2028 ប៉ុន្តែការទិញដូរ និងប្រើប្រាស់យន្តហោះអគ្គិសនីនេះក៏អាស្រ័យទៅលើស្ថានភាពច្បាប់ស្ដីពី eVTOL ផងដែរ៕

The post Hyundai បង្ហាញតាក់ស៊ីហោះ 193 គីឡូម៉ែត្រ/ម៉ោង អាចហោះឡើង-ចុះចតដូចឧទ្ធម្ភាគចក្រ first appeared on La Reine Media.

មហាក្សត្រ និងមហេសីរបស់ម៉ាឡេស៊ី ធ្វើជាអ្នកដឹកនាំកម្មវិធីទូរទស្សន៍

សឿន សំណាង — Fri, 19 Jan 2024 13:37:49 +0000

មហាក្សត្រ រួមនឹងមហេសីរបស់ប្រទេសម៉ាឡេស៊ី ដឹកនាំកម្មវិធីព័ត៌មានទូរទស្សន៍ក្នុងម៉ោងពិសេស និងទទួលបានការកោតសរសើរពីប្រជាជនយ៉ាងខ្លាំង។

មហាក្សត្រម៉ាឡេស៊ី Abdullah Ahmad Shah និងមហេសី Tunku Azizah Aminah Maimunah Iskandariah កាលពីថ្ងៃទី 17 មករា 2024 បានបង្ហាញព្រះកាយក្នុងកម្មវិធីព័ត៌មាននៅវេលាម៉ោង 20 របស់ទូរទស្សន៍ TV3។ កម្មវិធីរាយការណ៍ព័ត៌មាននេះត្រូវបានថតជាមុននៅពេលព្រឹកថ្ងៃដដែល ពេលទ្រង់យាងទៅធ្វើទស្សនកិច្ចក្រុមហ៊ុនប្រព័ន្ធផ្សព្វផ្សាយ Media Prima Group ដែលជាស្ថាប័នគ្រប់គ្រងទូរទស្សន៍ TV3 នៅ Selangor។

ក្នុងអំឡុង 10 នាទីនៃការដឹកនាំកម្មវិធីព័ត៌មាន មហាក្សត្រ Abdullah ព្រះជន្ម 64 វស្សា និងមហេសី បានដឹកនាំសេចក្ដីរាយការណ៍ព័ត៌មានចំនួនបី ដែលចាប់ផ្ដើមដោយការសម្ភាសជាមួយនឹងប្រជាជនម៉ាឡេស៊ី ទាក់ទងនឹងសាមគ្គីភាព។

ក្នុងសេចក្ដីរាយការណ៍ព័ត៌មានទីពីរ មហាក្សត្រ និងមហេសីរបស់ម៉ាឡេស៊ី មានបន្ទូលអំពីតួនាទីរបស់ត្រីប្រាចំពោះសេដ្ឋកិច្ច និងទេសចរណ៍នៅ Pahang។ ចុងក្រោយ ទ្រង់ទាំងពីរអង្គមានបន្ទួលអំពីដំណើរទស្សនកិច្ចរបស់ទ្រង់នៅ Media Prima Group។

ការដឹកនាំកម្មវិធីព័ត៌មានរបស់មហាក្សត្រ និងមហេសីម៉ាឡេស៊ី ទទួលបានចំណាប់អារម្មណ៍ច្រើនពីអ្នកលេងបណ្ដាញសង្គម។ អ្នកខ្លះនិយាយថា ពួកគេមានមោទកភាពយ៉ាងខ្លាំងចំពោះការបង្ហាញសមត្ថភាពរបស់មហាក្សត្រ និងមហេសី៕

The post មហាក្សត្រ និងមហេសីរបស់ម៉ាឡេស៊ី ធ្វើជាអ្នកដឹកនាំកម្មវិធីទូរទស្សន៍ first appeared on La Reine Media.

រ៉ុក្កែតពាណិជ្ជកម្មកម្លាំងខ្លាំងបំផុតរបស់ចិន បាញ់បង្ហោះបានជោគជ័យ

សឿន សំណាង — Sat, 13 Jan 2024 04:47:49 +0000

ប្រទេសចិន កាលពីថ្ងៃទី 11 មករា 2024 បានបាញ់បង្ហោះរ៉ុក្កែតឥន្ធនៈរឹង Gravity-1 ដែលមានកម្លាំងរុញច្រាន 600 តោន ចេញពីតំបន់សមុទ្ររបស់ខេត្តសានទុង (Shandong) ដោយជោគជ័យ។

ក្នុងជើងហោះហើរដំបូង រ៉ុក្កែត Gravity-1 ដែលអភិវឌ្ឍដោយក្រុមហ៊ុនអវកាសពាណិជ្ជកម្មចិន Orienspace បាននាំយកផ្កាយរណបឧតុនិយម Yunyao-1 ចំនួន 3 គ្រឿង ឡើងទៅកាន់គន្លងតារាវិថីដោយជោគជ័យ។ ការសម្រេចបាននេះបានជួយឱ្យ Gravity-1 ក្លាយជារ៉ុក្កែតពាណិជ្ជកម្មដែលមានកម្លាំងខ្លាំងបំផុតរបស់ប្រទេសចិន និងជារ៉ុក្កែតដែលប្រើប្រាស់ឥន្ធនៈរឹងដែលមានកម្លាំងខ្លាំងបំផុតដែលធ្លាប់បានទទួលជោគជ័យក្នុងបេសកកម្មអវកាស។

រ៉ុក្កែតនេះមានកម្ពស់ប្រហែល 30 ម៉ែត្រ ខណៈដែលទម្ងន់គឺប្រហែល 400 តោន និងមានសមត្ថភាពរុញច្រាន 600 តោន។ វាអាចនាំយកបន្ទុកប្រហែល 6,500 គីឡូក្រាមឡើងទៅកាន់គន្លងតារាវិថីផែនដីកម្រិតទាប (LEO) ឬ 4,200 គីឡូក្រាមឡើងទៅកាន់គន្លងតារាវិថីសមកាលកម្មព្រះអាទិត្យ (Sun Synchronous Orbit – SSO) ដែលមានកម្ពស់ពីផែនដីប្រហែល 500 គីឡូម៉ែត្រ។

ប្រភេទគន្លងតារាវិថីជុំវិញផែនដី

Gravity-1 អាចនាំយកផ្កាយរណប 30 គ្រឿង ដែលក្នុងមួយគ្រឿងៗមានទម្ងន់ 100 គីឡូក្រាម ឡើងទៅកាន់គន្លងតារាវិថីកម្រិតទាប និងមធ្យម។

យោងតាម Orienspace រ៉ុក្កែតនេះមានបីជាន់សំខាន់ៗ និងប្រព័ន្ធរុញច្រានចំនួនបួន ដែលទាំងអស់សុទ្ធតែទទួលបានថាមពលពីម៉ូទ័រឥន្ធនៈរឹង។ ក្រុមហ៊ុនផលិតនិយាយថា ម៉ូទ័ររបស់ជាន់ទីបីអាចត្រូវបានផ្លាស់ប្ដូរដោយម៉ាស៊ីនម៉ាស៊ូត kerosene និងអុកស៊ីសែន ដើម្បីបង្កើនកម្លាំងដឹកជញ្ជូន៕

The post រ៉ុក្កែតពាណិជ្ជកម្មកម្លាំងខ្លាំងបំផុតរបស់ចិន បាញ់បង្ហោះបានជោគជ័យ first appeared on La Reine Media.

ធាតុរបស់បុគ្គលរូបណាដែលត្រូវបានបញ្ចុះលើឋានព្រះចន្ទដំបូងគេ?

សឿន សំណាង — Tue, 09 Jan 2024 10:16:29 +0000

ភូគព្ភវិទូ Eugene Shoemaker ធ្វើការឱ្យណាសា បានក្លាយជាមនុស្សដំបូងគេដែលត្រូវបានបញ្ចុះធាតុនៅលើផ្ទៃរបស់ឋានព្រះចន្ទកាលពីឆ្នាំ 1998។

ថ្មីៗនេះ ក្រុមហ៊ុន Celestis ដែលផ្ដល់សេវាកម្មបញ្ចុះធាតុក្នុងទីអវកាស បានទទួលធាតុរបស់បុគ្គលល្បីឈ្មោះជាច្រើនរូប ដាក់លើយានចុះចត Peregrine របស់ Astrobotic ហោះឡើងទៅកាន់ឋានព្រះចន្ទ។ ក៏ប៉ុន្តែ នេះមិនមែនជាបេសកកម្មពាណិជ្ជកម្មដំបូងគេដែលនាំយកធាតុមនុស្សឡើងទៅបញ្ចុះលើផ្ទៃព្រះចន្ទនោះទេ។ មុននោះ ធាតុទម្ងន់ 28 ក្រាមរបស់អ្នកវិទ្យាសាស្ត្រ Shoemaker ត្រូវបានក្រុមហ៊ុន Celestis ដាក់លើយាន Lunar Prospector របស់ណាសា និងត្រូវបាននាំយកទៅបញ្ចុះលើឋានព្រះចន្ទកាលពីថ្ងៃទី 06 មករា 1998។

លោក Shoemaker គឺជាភូគព្ភវិទូភពដ៏ល្បីល្បាញ។ ជំនាញរបស់លោករួមមាន ការជ្រើសរើស និងបង្ហាត់បង្រៀនអ្នកអវកាស Apollo អំពីភូគព្ភសាស្ត្រ និងរណ្ដៅលើឋានព្រះចន្ទ រួមនឹងការដឹកនាំក្រុមស្រាវជ្រាវស្វែងរកទឹកលើឋានព្រះចន្ទ។ល។

ក្រោយពីបេសកកម្ម Apollo លោក Shoemaker ក៏បន្តធ្វើការក្នុងបេសកកម្ម Voyager ក៏ដូចជា Clementine របស់ណាសា ដើម្បីស្វែងរកទឹកលើឋានព្រះចន្ទ។ លោកបានក្លាយជាប្រធានដំបូងនៃកម្មវិធីស្រាវជ្រាវភូគព្ភសាស្ត្រអវកាសរបស់នាយកដ្ឋានស្រាវជ្រាវភគព្ភសាស្ត្រអាម៉េរិក (USGS)។ មិនត្រឹមតែប៉ុណ្ណោះ លោកក៏តែងតែចង់ក្លាយជាអ្នកអវកាស ប៉ុន្តែមិនអាចធ្វើបាន ដោយសារតែមានជំងឺប្រចាំកាយ។

លោក Eugene Shoemaker

ដើម្បីជាការតបស្នងសងគុណដល់លោក Shoemaker ទីភ្នាក់ងារអវកាសអាម៉េរិក ក៏បានសម្រេចចិត្តបញ្ចុះធាតុរបស់លោក នៅលើផ្ទៃរបស់ឋានព្រះចន្ទ។

ជើងហោះហើរទីពីររបស់ក្រុមហ៊ុន Celestis ដែលមានឈ្មោះថា Tranquility កំពុងតែត្រូវបានធ្វើឡើង នៅពេលយាន Peregrine ដឹកធាតុ និង DNA របស់បុគ្គលល្បីឈ្មោះចំនួន 66 រូប ក្នុងនោះក៏មានអតីតប្រធានាធិបតីអាម៉េរិកជាច្រើនរូប ឡើងទៅបញ្ចុះលើឋានព្រះចន្ទ៕

The post ធាតុរបស់បុគ្គលរូបណាដែលត្រូវបានបញ្ចុះលើឋានព្រះចន្ទដំបូងគេ? first appeared on La Reine Media.

កត្តាជាច្រើនដែលនាំឱ្យគេសង្ឃឹមថា សេដ្ឋកិច្ចពិភពលោកក្នុងឆ្នាំ 2024 នឹងល្អប្រសើរជាងបច្ចុប្បន្ន

សឿន សំណាង — Sat, 30 Dec 2023 16:38:37 +0000

សន្ទស្សន៍ភ្ញាក់ផ្អើលសេដ្ឋកិច្ចសកលរបស់ Citigroup បង្ហាញថា ទិន្នន័យជាក់ស្ដែងនានាក្នុងឆ្នាំ 2023 សុទ្ធតែខ្ពស់ជាងការព្យាករ ហើយនេះគឺជាមូលហេតុដែលគ្រប់គ្នាមានសុទិដ្ឋិនិយមចំពោះសេដ្ឋកិច្ចរបស់ឆ្នាំ 2024។

ទំព័រ Financial Times ថ្មីៗនេះបានចេញផ្សាយថា 2023 គឺជាឆ្នាំដ៏ប្រសើរមួយចំពោះសេដ្ឋកិច្ចពិភពលោក នៅពេលសន្ទស្សន៍ភ្ញាក់ផ្អើលសេដ្ឋកិច្ចសកលរបស់ Citigroup (Global’s Global Citigroup Economic Surprise Index) បង្ហាញថា ទិន្នន័យជាក់ស្ដែងនានាក្នុងឆ្នាំ 2023 សុទ្ធតែខ្ពស់ជាងការព្យាករ។

និន្នាការសេដ្ឋកិច្ចខាងលើនេះក៏ស្ដែងឱ្យឃើញនូវមូលហេតុជាច្រើនដែលគ្រប់គ្នាអាចជឿជាក់បានចំពោះសេដ្ឋកិច្ចក្នុងឆ្នាំ 2024។ ខាងក្រោមនេះគឺជាកត្តាមួយចំនួនដែលអាចជំរុញឱ្យសេដ្ឋកិច្ចក្នុងឆ្នាំ 2024 ល្អប្រសើរជាងឆ្នាំ 2023៖

ទីមួយ៖ សេដ្ឋកិច្ចពិភពលោកបានបង្ហាញនូវលទ្ធភាពងើបឡើងវិញដ៏គួរឱ្យចាប់អារម្មណ៍។ យោងតាមសន្ទស្សន៍សកលរបស់ Fitch Ratings នៅក្នុងត្រីមាសទីបីនៃឆ្នាំ 2023 ផលិតផលក្នុងស្រុកសរុប (GDP) របស់ពិភពលោក គឺខ្ពស់ជាង 9% បើធៀបនឹងដំណាក់កាលមុនវិបត្តិសុខភាពសកល។

ទីពីរ៖ អតិផរណាកំពុងថយចុះលឿន។ អតិផរណារបស់ពិភពលោកស្ថិតនៅក្នុងកម្រិត 8.9% កាលពីឆ្នាំ 2022 ហើយគ្រោងនឹងថយចុះ 5.1% នៅចុងឆ្នាំ 2024។

ទីបី៖ ការព្រួយបារម្ភអំពីវដ្ដនៃគោលនយោបាយរូបិយវត្ថុបែប «ភ្នំតុ (Table Mountain)» ដែលការប្រាក់ត្រូវបានដំឡើងខ្ពស់ខ្លាំង និងរក្សាកម្រិតកំពូលក្នុងរយៈពេលយូរ បានថយចុះ។

ទីបួន៖ ការផ្ទុះឡើងរបស់ទីផ្សារហិរញ្ញវត្ថុ។ សន្ទស្សន៍លំដាប់កំពូលនានារបស់ Wall Street ភាគច្រើនជិតស្មើ ឬលើសពីកម្រិតខ្ពស់បំផុតក្នុងខែធ្នូ ឆ្នាំ 2023។ ទីផ្សារមូលបត្របំណុលក៏បញ្ចប់ឆ្នាំចាស់ប្រកបដោយភាពខ្លាំងក្លា។

ចុងក្រោយ៖ ឆ្នាំ 2023 គឺជាឆ្នាំល្អចំពោះវិស័យបច្ចេកវិទ្យា ដូចទៅនឹងអ្វីដែលមនុស្សមួយចំនួនបានរំពឹងទុក៕

The post កត្តាជាច្រើនដែលនាំឱ្យគេសង្ឃឹមថា សេដ្ឋកិច្ចពិភពលោកក្នុងឆ្នាំ 2024 នឹងល្អប្រសើរជាងបច្ចុប្បន្ន first appeared on La Reine Media.

អ្នកវិនិយោគចិនខេត្តយុនណាន នឹងមកបង្កើតតំបន់សេដ្ឋកិច្ចពិសេសមួយនៅខេត្តសៀមរាប

សឿន សំណាង — Fri, 29 Dec 2023 08:57:26 +0000

ផ្ទៃដីប្រមាណ 1,000 ហិកតា នៅជុំវិញអាកាសយានដ្ឋានអន្តរជាតិខេត្តសៀមរាប នឹងត្រូវបានរៀបចំជាតំបន់សេដ្ឋកិច្ចពិសេស ដើម្បីទាក់ទាញអ្នកវិនិយោគចិននៅខេត្តយុនណានជាពិសេស មកបណ្ដាក់ទុនក្នុងវិស័យកសិ-ចំណីអាហារនៅកម្ពុជា។

នាព្រឹកថ្ងៃទី 29 ខែធ្នូ ឆ្នាំ 2023 នៅទីស្តីការក្រុមប្រឹក្សាអភិវឌ្ឍន៍កម្ពុជា (អ.ក.អ) ឯកឧត្តម សួន សុផល អគ្គលេខាធិការរងគណៈកម្មាធិការវិនិយោគកម្ពុជា (គ.វ.ក.) បានដឹកនាំក្រុមការងារ ទទួលជួបគណៈប្រតិភូនៃមន្ទីរពាណិជ្ជកម្មខេត្តយុនណាននៃសាធារណរដ្ឋប្រជាមានិតចិន តំណាងដោយ លោក Ma Jun អគ្គនាយករង ដើម្បីពិភាក្សាការងារអំពីទិសដៅចំពោះមុខសម្រាប់ការងារពាក់ព័ន្ធនឹងការជំរុញ និងទាក់ទាញគម្រោងវិនិយោគនៅកម្ពុជា និងកិច្ចសហប្រតិបត្តិការសេដ្ឋកិច្ចឆ្លងកាត់ព្រំដែនក្រោមក្របខ័ណ្ឌមេគង្គ-ឡានឆាង និងមហាអនុតំបន់មេគង្គ។ នេះបើតាមការចេញផ្សាយរបស់ ក្រុមប្រឹក្សាអភិវឌ្ឍន៍កម្ពុជា។

នៅក្នុងជំនួបនេះ ភាគីកម្ពុជា បានបង្ហាញជំនឿចិត្តយ៉ាងមុតមាំថា ក្នុងឆ្នាំ 2024 ខាងមុខ តំណាង Yunnan Construction Group នឹងសហការជាមួយដៃគូរបស់ខ្លួន មកធ្វើអានុភាវូបនីយកម្មផ្ទៃដីប្រមាណ 1,000 ហិកតា នៅជុំវិញអាកាសយានដ្ឋានអន្តរជាតិខេត្តសៀមរាប ដើម្បីរៀបចំជាតំបន់សេដ្ឋកិច្ចពិសេស ក្នុងបំណងចងក្រងឧស្សាហកម្មលើវិស័យកសិ-ចំណីអាហារ នៃខេត្តយុនណាន មកបណ្តាក់ទុនវិនិយោគដើម្បីបំពេញតម្រូវការទីផ្សារចំណីអាហារនៅកម្ពុជា និងនៅក្នុងតំបន់។

យោងតាម ក.អ.ក ភាគីកម្ពុជា ក៏បានបញ្ជាក់អំពីការគាំទ្ររបស់ខ្លួន លើគម្រោងធ្វើឱ្យប្រសើរឡើងនូវសមាហរណកម្មសេដ្ឋកិច្ចក្នុងអនុតំបន់ ដើម្បីរួមគ្នាដោះស្រាយបញ្ហាមួយចំនួនក្នុងអនុតំបន់ដែលកំពុងតែរងផលជះអវិជ្ជមានពីបញ្ហាប្រឈមសកលតាមរយៈ ការពង្រឹង និងពង្រីករបៀងសេដ្ឋកិច្ច កិច្ចសម្រួលវិនិយោគ និងពាណិជ្ជកម្ម ក៏ដូចជា ការបង្កើនប្រសិទ្ធភាពនៃការអនុវត្តកិច្ចព្រមព្រៀងពាណិជ្ជកម្មសេរីនានាដែលភាគីទាំងពីរជាហត្ថលេខី។

ជាការឆ្លើយតប សមភាគីចិន បានប្តេជ្ញាបង្កើនកិច្ចសហប្រតិបត្តិការវិនិយោគ និងពាណិជ្ជកម្មឆ្លងកាត់ព្រំដែន ក្រោមក្របខ័ណ្ឌនៃកិច្ចសហប្រតិបត្តិការមេគង្គ-ឡានឆាង និងមហាអនុតំបន់មេគង្គ ក៏ដូចជាកិច្ចសហប្រតិបត្តិការទ្វេភាគីកម្ពុជា-ចិន ឱ្យកាន់តែរីកចម្រើន៕

The post អ្នកវិនិយោគចិនខេត្តយុនណាន នឹងមកបង្កើតតំបន់សេដ្ឋកិច្ចពិសេសមួយនៅខេត្តសៀមរាប first appeared on La Reine Media.

មហាសេដ្ឋី Elon Musk ថា «កុំបង្កើតក្រុមហ៊ុន បើសិនត្រូវការការលើកទឹកចិត្ត»

សឿន សំណាង — Mon, 25 Dec 2023 03:39:24 +0000

មហាសេដ្ឋីអាម៉េរិកដើមកំណើតអាហ្វ្រិកខាងត្បូង លោក Elon Musk យល់ថា អ្នកជំនួញដែលមានសក្ដានុពល មិនគួរបង្កើតក្រុមហ៊ុនធុរកិច្ចថ្មីឡើយ បើសិនពួកគេត្រូវការការជំរុញពីអ្នកដទៃ។

«កុំបង្កើតក្រុមហ៊ុន បើសិនអ្នកត្រូវការការលើកទឹកចិត្តពីអ្នកផ្សេង។ អត្រាបរាជ័យខ្ពស់ណាស់ ពិតជាមិនគួរធ្វើ បើត្រូវរកស្វែងរកការលើកទឹកចិត្តពីខាងក្រៅ» លោក Elon Musk ថ្លែងដូច្នេះជាមួយនឹង Cathie Wood ដែលជា CEO របស់ ARK Investment Management នៅក្នុងព្រឹត្តិការណ៍មួយ កាលពីពេលថ្មីៗនេះ។

កាលពីឆ្នាំ 2008 លោក Elon Musk ត្រូវបានសួរថា «ធ្វើយ៉ាងណាទើបអាចរក្សាបាននូវភាពជឿជាក់ គ្រាដែលការបាញ់បង្ហោះរ៉ុក្កែតរបស់ SpaceX ជួបបរាជ័យជាបន្តបន្ទាប់?»។ យោងតាម Fortune ចម្លើយរបស់លោក Elon Musk បានបង្ហាញពីការប្ដេជ្ញាចិត្តខ្ពស់ រហូតដល់ថ្នាក់ មិនត្រូវការការលើកទឹកចិត្តពីអ្នកណាទាំងអស់។ លោក Elon Musk បានឆ្លើយថា «សុទិដ្ឋិនិយម ទុទិដ្ឋិនិយម មិនខ្វល់អ្វីទាំងអស់។ យើងនឹងធ្វើឱ្យវាក្លាយជាការពិត។ ព្រះជាសាក្សី ខ្ញុំប្ដេជ្ញាចិត្តធ្វើឱ្យវាជោគជ័យ»។

ក្រៅពី SpaceX លោក Elon Musk ក៏ជាអ្នកគ្រប់គ្រងក្រុមហ៊ុនផលិតរថយន្តអគ្គិសនី Tesla, ក្រុមហ៊ុនស្ថាបនាផ្លូវក្រោមដី Boring Company, បណ្ដាញសង្គម X (អតីត Twitter), ក្រុមហ៊ុនបច្ចេកវិទ្យាខួរក្បាល Neuralink និងក្រុមហ៊ុនបច្ចេកវិទ្យា xAI ផងដែរ។ លោកបានផ្ញើអនុសាសន៍ដល់អ្នកទាំងឡាយណាដែលកំពុងចាប់ផ្ដើមរកស៊ីថា «ចូររកវិធីដើម្បីក្លាយជាអ្នកមានប្រយោជន៍។ បង្កើតផលិត និងសេវាកម្មដែលគ្រប់គ្នាត្រូវការ ដើម្បីកែលម្អជីវភាពរបស់ពួកគេ។ គ្រាន់តែប៉ុណ្ណឹងទេ»៕

The post មហាសេដ្ឋី Elon Musk ថា «កុំបង្កើតក្រុមហ៊ុន បើសិនត្រូវការការលើកទឹកចិត្ត» first appeared on La Reine Media.

ឥណ្ឌូណេស៊ី បញ្ចុះអត្រាពន្ធ ដើម្បីជំរុញការប្រើប្រាស់រថយន្តអគ្គិសនី

សឿន សំណាង — Tue, 19 Dec 2023 08:28:15 +0000

ចាប់ពីពេលនេះរហូតដល់ឆ្នាំ 2025 ឥណ្ឌូណេស៊ី នឹងបញ្ចុះអត្រាពន្ធសម្រាប់បណ្ដាក្រុមហ៊ុនទាំងឡាយណាដែលមានគម្រោងបង្កើតរោងចក្រផលិតរថយន្តអគ្គិសនីនៅប្រទេសនេះ ដែលនេះបញ្ជាក់ថា ទីក្រុងហ្សាការតា កំពុងរកវិធីអូសទាញអ្នកវិនិយោគបន្ថែមទៀត។

យោងតាមគោលការណ៍ថ្មីដែលត្រូវបានចុះហត្ថលេខាកាលពីថ្ងៃទី 12 ធ្នូ និងមានសុពលភាពចាប់ពីពេលនេះ បណ្ដាក្រុមហ៊ុនដែលអាចទទួលបានអត្ថប្រយោជន៍ខាងលើ រួមមាន៖ បណ្ដាក្រុមហ៊ុនដែលបានវិនិយោគទៅលើរោងចក្រផលិតរថយន្តអគ្គិសនី និងកំពុងមានគម្រោងបង្កើនការវិនិយោគទៅលើរថយន្តអគ្គិសនី ឬមានគម្រោងវិនិយោគ។

សេចក្ដីសម្រេចថ្មីនេះនឹងលុបបំបាត់ពន្ធនាំចូល និងពន្ធលើទំនិញប្រណិត ចំពោះរថយន្តដំឡើងរួចរាល់ដែលបាននាំចូលប្រទេសនេះ។ គោលការណ៍ថ្មីនេះក៏ផ្ដល់អត្ថប្រយោជន៍ដល់ប្រភេទពន្ធអាករដែលត្រូវបង់ជូនអាជ្ញាធរក្នុងស្រុកផងដែរ។

កាលពីពេលកន្លង គោលការណ៍ចាស់ដែលបានដាក់ចេញដោយប្រទេសដែលជាទីផ្សាររថយន្តធំជាងគេប្រចាំតំបន់អាស៊ីអាគ្នេយ៍មួយនេះ ផ្ដល់អត្ថប្រយោជន៍ដូចខាងលើចំពោះតែរថយន្តមិនទាន់ដំឡើងរួចរាល់ប៉ុណ្ណោះ។

ឥណ្ឌូណេស៊ី បានកំណត់គោលដៅផលិតរថយន្តអគ្គិសនីឱ្យបាន 600,000 គ្រឿងនៅឆ្នាំ 2030។ តួលេខនេះខ្ពស់ជាង 100 ដង បើធៀបនឹងចំនួនរថយន្តអគ្គិសនីដែលបានលក់ក្នុងប្រទេសនេះ នៅក្នុង 6 ខែដំបូងនៃឆ្នាំ 2023។

ក្រុមហ៊ុនមួយចំនួន ក្នុងនោះមាន Hyundai របស់កូរ៉េខាងត្បូង ជាដើម បាន និងកំពុងវិនិយោគនៅ ឥណ្ឌូណេស៊ី។ Neta EV របស់ចិន និង Mitsubishi Motors របស់ជប៉ុន ក៏បានចូលរួមវិនិយោគនៅប្រទេសនេះ។ បច្ចុប្បន្ន ឥណ្ឌណេស៊ី កំពុងអូសទាញ Tesla របស់អាម៉េរិក និង BYD របស់ចិន បន្ថែមទៀត៕

The post ឥណ្ឌូណេស៊ី បញ្ចុះអត្រាពន្ធ ដើម្បីជំរុញការប្រើប្រាស់រថយន្តអគ្គិសនី first appeared on La Reine Media.

កម្ពុជា វៀតណាម និងឡាវ អភិវឌ្ឍរូបមន្តទេសចរណ៍ «មួយដំណើរ បីគោលដៅ»

សឿន សំណាង — Mon, 18 Dec 2023 10:43:16 +0000

នាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត និងនាយករដ្ឋមន្ត្រីឡាវ Sonexay Siphandone រួមនឹងនាយករដ្ឋមន្ត្រីវៀតណាម Pham Minh Chinh បានឯកភាពគ្នាក្នុងកិច្ចសហប្រតិបត្តិការណ៍អភិវឌ្ឍរូបមន្តទេសចរណ៍ «មួយដំណើរ បីគោលដៅ» ដើម្បីជំរុញវិស័យទេសចរណ៍របស់ប្រទេសទាំងបី។

កាលពីថ្ងៃទី 17 ធ្នូ ក្នុងឱកាសចូលរួមសន្និសីទកំពូល ខួប 50 ឆ្នាំ នៃទំនាក់ទំនងអាស៊ាន – ជប៉ុន នៅរាជធានីតូក្យូ (ប្រទេសជប៉ុន) ប្រមុខរាជរដ្ឋាភិបាលកម្ពុជា សម្ដេចធិបតី ហ៊ុន ម៉ាណែត បានអញ្ជើញជួបពិភាក្សាការងារជាមួយសមាសភាគីឡាវ និងវៀតណាម។

នៅក្នុងជំនួបនេះ មេដឹកនាំរបស់កម្ពុជា វៀតណាម និងឡាវ បានឯកភាព លើការវាយតម្លៃដែលថា ទំនាក់ទំនងមិត្តភាព និងកិច្ចសហប្រតិបត្តិការរវាងប្រទេសទាំងបី កំពុងត្រូវបានធ្វើឱ្យប្រសើរឡើង និងរីកចម្រើនក្នុងវិស័យជាច្រើន។

ទន្ទឹមនឹងបញ្ហាសំខាន់ៗដទៃ សម្ដេចធិបតី ហ៊ុន ម៉ាណែត ក៏ទទួលបានការសាទរពីសមាសភាគីវៀតណាម និងឡាវ ចំពោះសំណើបើកកិច្ចប្រជុំថ្នាក់រដ្ឋមន្ត្រីនៃក្រសួងទេសចរណ៍របស់ប្រទេសទាំងបីនៅកម្ពុជា នាពេលឆាប់ៗខាងមុខ ដើម្បីជំរុញបន្ថែមទៀតនូវកិច្ចសហប្រតិបត្តិការក្នុងវិស័យទេសចរណ៍រវាងប្រទេសទាំងបី ពិសេសគឺការអភិវឌ្ឍរូបមន្តទេសចរណ៍ «មួយដំណើរ បីគោលដៅ» (One Journey – Three Destinations/Three Countries One Destination)។

យោងតាមអ្នកជំនាញ កិច្ចសហប្រតិបត្តិការនេះនឹងនាំមកនូវផលប្រយោជន៍ជាច្រើនសម្រាប់កម្ពុជា។ ទេសចរម្នាក់មកពីលោកខាងលិច ឬគ្រួសារដែលមានថវិកាខ្ទង់ 10,000 ដុល្លារអាម៉េរិក នឹងពេញចិត្តក្នុងការដើរទេសចរណ៍នៅបីប្រទេសក្នុងមួយជើង។

The post កម្ពុជា វៀតណាម និងឡាវ អភិវឌ្ឍរូបមន្តទេសចរណ៍ «មួយដំណើរ បីគោលដៅ» first appeared on La Reine Media.

សុនកយន្តបង្កើតកំណត់ត្រា «រត់លឿនជាងគេលើពិភពលោក»

សឿន សំណាង — Thu, 14 Dec 2023 05:02:31 +0000

HOUND ដែលជារ៉ូបូតជើងបួនរបស់ប្រទេសកូរ៉េខាងត្បូង បង្កើតបានកំណត់ត្រាពិភពលោក Guinness នៅពេលរត់ចម្ងាយ 100 ម៉ែត្រ ដោយប្រើពេលត្រឹមតែ 19.87 វិនាទី ក្នុងល្បឿន 18.13 គីឡូម៉ែត្រ/ម៉ោង។

យោងតាម Interesting Engineering ចុះផ្សាយកាលពីថ្ងៃទី 13 ធ្នូ សុនករ៉ូបូត HOUND ដែលអភីវឌ្ឍដោយវិទ្យាស្ថានពិសោធន៍ផ្នែករចនា និងបញ្ជារ៉ូបូតយន្ត នៃបណ្ឌិត្យសភាវិទ្យាសាស្ត្រ និងបច្ចេកវិទ្យាទំនើបកូរ៉េខាងត្បូង (KAIST) រត់ចម្ងាយ 100 ម៉ែត្រ ដោយចំណាយពេលតិចបំផុត បើធៀបនឹងរ៉ូបូតជើងបួនដែលបានបង្កើតកំណត់ត្រានាពេលកន្លង។ HOUND បំបែកកំណតត់ត្រាដោយប្រើពេល 19.87 វិនាទី ដោយរត់ក្នុងល្បឿន 18.13 គីឡូម៉ែត្រក្នុងមួយម៉ោង។

«រាល់ចលនាសុទ្ធតែបានមកពីប្រព័ន្ធបញ្ជាម៉ូទ័រដែលប្រើបច្ចេកវិទ្យា «រៀនបន្ថែម»» នេះគឺជាការបកស្រាយរបស់ Young-Ha Shin ដែលជាអ្នករចនារ៉ូបូត HOUND។

រ៉ូបូតដែលមានទម្ងន់ 45 គីឡូក្រាមនេះ ក៏បានទទួលជោគជ័យក្នុងការដើរឡើងទួលចោត 22 ឌឺក្រេ និងដើរចម្ងាយ 3.2 គីឡូម៉ែត្រ ហើយក៏ឆ្លងផុតឧបសគ្គកម្ពស់ 35 សង់ទីម៉ែត្រ។

ក្រុមការងារខាងលើនឹងបន្តអភិវឌ្ឍរូបរាងរបស់ HOUND ដើម្បីឱ្យវាអាចរត់បានលឿន និងអាចធ្វើចលនាស្មុគស្មាញជាងបច្ចុប្បន្ន៕

The post សុនកយន្តបង្កើតកំណត់ត្រា «រត់លឿនជាងគេលើពិភពលោក» first appeared on La Reine Media.

យានអវកាស Voyager 1 ជួបបញ្ហា ពេលស្ថិតនៅចម្ងាយ 24 ពាន់លានគីឡូម៉ែត្រពីផែនដី

សឿន សំណាង — Wed, 13 Dec 2023 08:21:08 +0000

បច្ចុប្បន្ន ទិន្នន័យតែមួយគត់ដែលយានអវកាស Voyager 1 បញ្ជូនមកកាន់ផែនដី គឺលេខ 1 និងលេខ 0 ហើយក្រុមការងាររបស់ណាសា អាចនឹងត្រូវចំណាយពេលច្រើនសប្ដាហ៍ដើម្បីដោះស្រាយបញ្ហានេះ។

យោងតាមទំព័រ Space ដែលបានចុះផ្សាយកាលពីថ្ងៃទី 12 ធ្នូ យាន Voyager 1 របស់ណាសា បច្ចុប្បន្នមិនអាចបញ្ជូនទិន្នន័យវិទ្យាសាស្ត្រ ឬទិន្នន័យទាក់ទងនឹងប្រព័ន្ធរបស់យាននេះ មកកាន់ផែនដី។ យានដែលមានអាយុ 46 ឆ្នាំមួយគ្រឿងនេះ អាចទទួលបញ្ជា ប៉ុន្តែ បញ្ហាខាងលើទំនងជាកើតចេញពីកុំព្យូទ័ររបស់យាន។

ណាសាឱ្យដឹងថា ប្រព័ន្ធទិន្នន័យហោះហើរ (FDS) របស់ Voyager 1 ដែលមានតួនាទីប្រមូលព័ត៌មាន និងទិន្នន័យបច្ចេកទេសពីឧបករណ៍វិទ្យាសាស្ត្រនៅលើយាន មិនអាចភ្ជាប់ទំនាក់ទំនងដូចមុន ជាមួយនឹងប្រព័ន្ធបញ្ជាពីចម្ងាយនៅលើផែនដី។

ពេលដំណើរការធម្មតា FDS រៀបចំដាក់ព័ត៌មានរបស់យានទៅក្នុងកញ្ចប់ទិន្នន័យ រួចបញ្ជូនមកកាន់ផែនដីតាមរយៈ TMU (telecommunications unit) ។ ថ្មីៗនេះ កញ្ចប់ទិន្នន័យនេះបានជាប់គាំង និងបញ្ជូនតែលេខ 1 និងលេខ 0 ម្ដងហើយម្ដងទៀត។ ក្រុមបច្ចេកទេសរបស់ Voyager គិតថា បញ្ហាកើតចេញពី FDS ប៉ុន្តែ ពួកគេប្រហែលជាត្រូវចំណាយពេលច្រើនសប្ដាហ៍ ទើបរកឃើញដំណោះស្រាយ។

នេះមិនមែនជាបញ្ហាដំបូងដែលយាន Voyager 1 បានជួបប្រទះនាប៉ុន្មានឆ្នាំចុងក្រោយនេះ។ យានអវកាសនេះធ្លាប់ជួបបញ្ហាប្រព័ន្ធបញ្ជា និងកំណត់ទិស (AACS) កាលពីខែឧសភា ឆ្នាំ 2022 និងបញ្ជូនទិន្នន័យដែលគ្មានន័យក្នុងរយៈពេលច្រើនខែ មុននឹងត្រូវបានដោះស្រាយ៕

The post យានអវកាស Voyager 1 ជួបបញ្ហា ពេលស្ថិតនៅចម្ងាយ 24 ពាន់លានគីឡូម៉ែត្រពីផែនដី first appeared on La Reine Media.

ប្រទេសចំនួន 7 រួមដៃគ្នាបាញ់បង្ហោះយានទៅចុះចតលើផ្ទៃព្រះចន្ទនាពេលឆាប់ៗនេះ

សឿន សំណាង — Mon, 11 Dec 2023 05:06:42 +0000

នៅរាត្រីបុណ្យណូអែល ថ្ងៃទី 24 ធ្នូ 2023 យានអវកាសមួយគ្រឿងនឹងត្រូវបានបាញ់បង្ហោះឡើងទៅកាន់ឋានព្រះចន្ទ ដើម្បីបំពេញបេសកកម្មពាណិជ្ជកម្មមួយដែលមិនធ្លាប់មានក្នុងប្រវត្តិសាស្ត្រនាពេលកន្លង។ នេះបើតាម Space.com ដែលបានចុះផ្សាយកាលពីដើមខែនេះ។

យានអវកាសនេះមានឈ្មោះថា យានចុះចតឋានព្រះចន្ទ Peregrine (ឬហៅថា ស្ទាំងទេព របស់ផែនដី) ដែលដាក់ឈ្មោះទៅតាមឈ្មោះសត្វស្ទាំង Peregrine ដែលហោះលឿនជាងគេលើពិភពលោក។

បើសិនគ្រប់យ៉ាងដំណើរការរលូនទៅតាមផែនការ «ស្ទាំងទេព» របស់ផែនដី នឹងចុះចតលើផ្ទៃព្រះចន្ទ ត្រង់តំបន់ដែលមានជ្រលងកម្អែភ្នំភ្លើងបុរាណនៅលើឋានព្រះចន្ទ ដែលត្រូវបានហៅថា Sinus Viscositatis។

បេសកកម្មនេះនឹងត្រូវបានកត់ត្រាក្នុងប្រវត្តិសាស្ត្រ ព្រោះវាជាបេសកកម្មដំបូងដែលបាញ់បង្ហោះទៅតាមគំនិតផ្ដួចផ្ដើម សេវាកម្មដឹកជញ្ជូនបែបពាណិជ្ជកម្មឡើងទៅកាន់ឋានព្រះចន្ទ (CLPS) របស់ទីភ្នាក់ងារអវកាសអាម៉េរិក (NASA)។ នេះក៏ជាលើកដំបូងដែលបច្ចេកវិទ្យារបស់ប្រទេសចំនួន 7 ត្រូវបានបាញ់បង្ហោះរួមគ្នាឡើងទៅកាន់ផ្ទៃព្រះចន្ទ។

ទំនិញចំនួន 20 ចំណែក មកពី 7 ប្រទេស នឹងត្រូវបាន «ស្ទាំងទេព» Peregrine នាំឡើងទៅកាន់ទីឋានរណបរបស់ផែនដី។ ក្នុងនោះ ទំនិញ 5 ចំណែកមកពី សហរដ្ឋអាម៉េរិក។ ក្រៅពីនេះ គឺជាទំនិញរបស់ អង់គ្លេស ម៉ិចស៊ិច អាល្លឺម៉ង់ ហុងគ្រី ជប៉ុន និងប្រទេសសីស្ហែល (Seychelles) នៅទ្វីបអាហ្វ្រិក។

ដោយការប្រើប្រាស់បច្ចេកវិទ្យាទំនើបចុងក្រោយ បេសកកម្មស្រាវជ្រាវឋានព្រះចន្ទរបស់ប្រទេសចំនួន 7 នេះ ត្រូវបានរំពឹងថា នឹងនាំមកនូវព័ត៌មាន/ទិន្នន័យសំខាន់ៗសម្រាប់អ្នកវិទ្យាសាស្ត្រ។

តាមគម្រោង យានចុះចត Peregrine នឹងធ្វើដំណើរតាមរយៈជើងហោះហើរដំបូងរបស់រ៉ុក្កែត Vulcan Centaur ដែលផលិតដោយក្រុមហ៊ុនអាម៉េរិក United Launch Alliance៕

The post ប្រទេសចំនួន 7 រួមដៃគ្នាបាញ់បង្ហោះយានទៅចុះចតលើផ្ទៃព្រះចន្ទនាពេលឆាប់ៗនេះ first appeared on La Reine Media.

ផ្លូវល្បឿនលឿនប្រវែងជិត 280 គីឡូម៉ែត្រ រត់ឆ្លងកាត់សមុទ្រខ្សាច់ធំបំផុតនៅប្រទេសចិន

សឿន សំណាង — Mon, 04 Dec 2023 10:28:22 +0000

ផ្លូវល្បឿនលឿន Tukun ជួយតភ្ជាប់ទីក្រុងពីរនៅក្នុងតំបន់ស៊ីនជាំង និងកាត់បន្ថយពេលវេលាធ្វើដំណើរពីជាង 6 ម៉ោង មកនៅត្រឹមប្រហែល 3 ម៉ោង។

ផ្លូវល្បឿនលឿនមួយខ្សែដែលរត់ឆ្លងកាត់ Taklamakan ដែលជាសមុទ្រខ្សាច់ធំបំផុតនៅប្រទេសចិន និងស្ថិតក្នុងតំបន់ស្វយ័តស៊ីនជាំង របស់ប្រទេសចិន ត្រូវបានដាក់ឱ្យដំណើរការកាលពីថ្ងៃទី 01 ធ្នូ 2023។

ផ្លូវល្បឿនលឿន Tukun ដែលតភ្ជាប់ទីក្រុងពីរគឺ Tumushuke និង Kunyu នៅក្នុងតំបន់ស៊ីនជាំង មានប្រវែងសរុប 276 គីឡូម៉ែត្រ។ នេះគឺជាផ្លូវល្បឿនលឿងទីបួនដែលរត់ឆ្លងកាត់ Taklamakan ដែលជាសមុទ្រខ្សាច់ធំជាងគេលំដាប់ទីពីររបស់ពិភពលោក។

នៅពេលដាក់ឱ្យដំណើរការ ផ្លូវល្បឿនលឿនថ្មីនេះនឹងជួយកាត់បន្ថយពេលវេលាធ្វើដំណើររវាងទីក្រុង Tumushuke និង Kunyu ពីជាង 6 ម៉ោង ចុះមកនៅត្រឹមប្រហែល 3 ម៉ោង។

«មុននេះ យើងត្រូវធ្វើដំណើរវាងវង់ប្រហែល 600 គីឡូម៉ែត្រ។ ប៉ុន្តែផ្លូវថ្មីនេះ ជួយកាត់បន្ថយចម្ងាយផ្លូវបានប្រហែល 300 គីឡូម៉ែត្រ» អ្នកដំណើរម្នាក់ឈ្មោះ Shi Chengshan ឱ្យដឹងដូច្នេះ។

ស្ពានមួយខ្សែដែលមានឈ្មោះថា Yerqiang ក៏ត្រូវបានសាងសង់ឡើងនៅតាមបណ្ដោយផ្លូវនេះ ដើម្បីជួយការពារសត្វព្រៃ៕

The post ផ្លូវល្បឿនលឿនប្រវែងជិត 280 គីឡូម៉ែត្រ រត់ឆ្លងកាត់សមុទ្រខ្សាច់ធំបំផុតនៅប្រទេសចិន first appeared on La Reine Media.

UN - La Reine Media

ចិនបញ្ជូនយានទៅយកសំណាកដីតំបន់ងងឹតរបស់ព្រះចន្ទ

រោងចក្រដំឡើងរថយន្តតូយ៉ូតា​នៅ​កម្ពុជា​ សម្ពោធបើក​ដំណើរ​ការ​ជា​ផ្លូវការ​

ចិន​បង្ហើប​ឱ្យ​ដឹង​អំពី​ស្ថានីយ​ស្រាវជ្រាវ​លើ​ឋាន​ព្រះ​ចន្ទ​គំរូដំបូង

ក្រុមហ៊ុន Beijing Municipal Construction ស្វែងរកឱកាសវិនិយោគ​នៅ​កម្ពុជា

ទីក្រុង​ឆ្លាតវៃ​តម្លៃដប់ពាន់​លាន​ដុល្លារ​របស់​ក្រុម​ហ៊ុន​តូយ៉ូតា

រ៉ូបូត​របស់​ណាសា ឆ្ពោះ​ទៅ​កាន់​ «ទន្លេ​ជីវិត» ក្រៅ​ភព​ផែនដី​

CEO របស់ Xiaomi បង្ហើប​ឱ្យ​ដឹង​តម្លៃ​របស់​រថយន្ត​អគ្គិសនី​ដែលជិត​បង្ហាញ​ខ្លួន

បណ្ដាញ​​ផ្លូវ​ដែក​លើ​ឋាន​ព្រះ​ចន្ទ នឹង​បង្ហាញ​ខ្លួន​នា​ពេល​អនាគត

កំណប់​ 1.1 លាន​ឆ្នាំ ធ្វើ​ឱ្យ​​ប្រវត្តិសាស្ត្រមនុស្ស​ជាតិត្រូវ​ចារ​ឡើង​វិញ

ប្រព័ន្ធ​ផ្កាយ​មាន​ភព​​ 6 នេះ ត្រូវ​បានសង្ស័យ​ថា «មាន​ជីវិត​ឆ្លាតវៃ»

Hacker បី​ក្រុម​​ប្រកាស​ថា បាន​វាយ​ប្រហារ​លើ Facebook/Instagram

យានអវកាស​ឯកជន​អាម៉េរិក បញ្ជូន​រូបថត​ដំបូង​ពី​ឋាន​ព្រះ​ចន្ទ​មក​កាន់​ផែនដី

យានអវកាស​ឯកជនអាម៉េរិក ចុះ​ចត​ដោយ​ជោគ​ជ័យ​លើ​ឋាន​ព្រះ​ចន្ទ

សេណារីយ៉ូណា​ដែល​ធ្វើ​ឱ្យ​តម្លៃ​មាស​ពិភពលោក​ឡើង​ដល់ 361 ដុល្លារ​/ជី

ផ្ទាំង​សូឡា​តម្លៃ​ទាប​នាំ​ចូល​ពី​ប្រទេស​​ចិន​ កំពុង​ធ្វើ​ឱ្យ​អឺរ៉ុប​ឈឺក្បាល​

ស្ពាន​ដែល​វែង​ជាង​គេ​បង្អស់​លើ​ពិភពលោក

រថភ្លើង​ «ហោះ​លើ​ផ្លូវ​ដែក» របស់​ចិន​ បង្កើត​បាន​កំណត់​ត្រា​ល្បឿន​​ថ្មី​

ក្រុមហ៊ុនមួយ​របស់​កូរ៉េខាងត្បូង មាន​គោលដៅបង្កើតរោងចក្រផលិតគ្រឿងបង្គុំរថយន្តអគ្គសនីនៅកម្ពុជា

Hyundai បង្ហាញ​តាក់ស៊ីហោះ 193 គីឡូម៉ែត្រ​/ម៉ោង អាច​ហោះឡើង-ចុះ​ចត​ដូច​ឧទ្ធម្ភាគ​ចក្រ

មហា​ក្សត្រ និង​មហេសីរបស់​ម៉ាឡេស៊ី ធ្វើជាអ្នក​ដឹក​នាំ​កម្មវិធីទូរទស្សន៍​

រ៉ុក្កែត​ពាណិជ្ជកម្ម​កម្លាំង​ខ្លាំង​បំផុត​របស់​ចិន បាញ់​បង្ហោះ​បាន​ជោគ​ជ័យ

ធាតុ​របស់​បុគ្គល​រូប​ណា​ដែល​ត្រូវ​បាន​បញ្ចុះ​លើ​ឋាន​ព្រះ​ចន្ទ​ដំបូង​គេ​?

អ្នក​វិនិយោគ​ចិន​​ខេត្តយុនណាន នឹង​មក​បង្កើត​តំបន់​សេដ្ឋកិច្ច​ពិសេស​មួយ​នៅ​ខេត្តសៀមរាប

មហា​សេដ្ឋី Elon Musk ថា «កុំបង្កើត​ក្រុម​ហ៊ុន បើ​សិន​ត្រូវ​ការ​ការ​លើក​ទឹក​ចិត្ត»

ឥណ្ឌូណេស៊ី​ បញ្ចុះ​អត្រាពន្ធ ដើម្បី​ជំរុញ​ការ​ប្រើ​ប្រាស់​រថយន្ត​អគ្គិសនី​

កម្ពុជា វៀតណាម និង​ឡាវ អភិវឌ្ឍរូបមន្ត​ទេសចរណ៍ «មួយ​ដំណើរ​ បី​គោលដៅ»

សុនក​យន្ត​បង្កើត​​កំណត់​ត្រា «​រត់​លឿន​ជាង​គេ​លើពិភពលោក»

យាន​អវកាស​ Voyager 1 ជួបបញ្ហា​ ពេល​ស្ថិត​នៅ​ចម្ងាយ​ 24 ពាន់​លាន​គីឡូម៉ែត្រ​ពី​ផែនដី

ប្រទេស​ចំនួន​ 7 រួម​ដៃ​គ្នា​បាញ់បង្ហោះ​យាន​ទៅចុះចត​លើ​ផ្ទៃ​​ព្រះចន្ទ​​នា​ពេល​ឆាប់​ៗ​នេះ

ផ្លូវ​ល្បឿន​លឿន​ប្រវែងជិត 280 គីឡូម៉ែត្រ រត់​ឆ្លង​កាត់​សមុទ្រ​ខ្សាច់​ធំ​បំផុត​នៅប្រទេស​ចិន