Tag: ev

ដំណើរក្លាយជាតារា Idol នៅ Kpop មិនមែនជារឿងធម្មតាឡើយ
ក្មេងជាច្រើននៅកូរ៉េខាងត្បូង ក្លាយជាអ្នកហាត់ការពេលមានវ័យទើបតែ 10 ឆ្នាំ និងចំណាយប្រហែល 10 ឆ្នាំក្នុងការហាត់ច្រៀង រាំ នៅមុនពេលបង្ហាញខ្លួនក្នុងក្រុមចម្រៀង។
«ដើម្បីក្លាយជា idol Kpop ដែលជោគជ័យ អ្នកត្រូវតែជាមនុស្សក្លាហាន មានចំណូលចិត្តខ្ពស់ មានវិន័យ និងសំណាង» Patti Sunio ឱ្យដឹងនៅលើ SCMP ដែលនិយាយអំពីដំណើរក្លាយជា idol ម្នាក់។
ជាដំបូង កុមារដែលមានទេពកោសល្យត្រូវតែចុះកិច្ចសន្យាធ្វើជាអ្នកហាត់ការរបស់ក្រុមហ៊ុនមួយ។ យោងតាម Koreaboo ក្មេងជាច្រើននៅកូរ៉េខាងត្បូងបានជាប់ក្នុងការជ្រើសរើសតាំងពីអាយុ 10 ឆ្នាំ ដោយពួកគេចូលរួមការសម្ដែងសាកល្បងជាមធ្យម 30 លើក មុនពេលចុះកិច្ចសន្យាហាត់ការ។ តាមនិន្នាការសកលរបស់វិស័យឧស្សាហកម្ម Kpop បណ្ដាក្រុមអ្នកវិនិយោគបានពង្រីកដំណើរការជ្រើសរើសអ្នកហាក់ការនៅក្នុងក្របខណ្ឌទូទាំងសកលលោក ផ្ដល់ឱកាសដល់ក្មេងនៅប្រទេសដទៃក្រៅពីកូរ៉េខាងត្បូង។
ក្មេងជាច្រើននៅកូរ៉េខាងត្បូងបានជាប់ក្នុងការជ្រើសរើសតាំងពីអាយុ 10 ឆ្នាំ
Lisa របស់ក្រុម Blackpink គឺជាឧទាហរណ៍មួយសម្រាប់ប្រការខាងលើ។ នាងគឺជាមនុស្សតែម្នាក់គត់ដែលឆ្លងផុតការជ្រើសរើសរបស់ក្រុមហ៊ុនកម្សាន្ត YG នៅប្រទេសថៃ ហើយជាអ្នកហាត់ការជនជាតិបរទេសដំបូងដែលបង្ហាញវត្តមាននៅ YG។ ក្រៅពីសម្ពាធនៃការហ្វឹកហាត់ ក្មេងបរទេសក៏ត្រូវតែឆ្លងកាត់រនាំងភាសា វប្បធម៌ ដើម្បីសម្របខ្លួន។ បណ្ដាក្រុមហ៊ុនគ្រប់គ្រងនឹងទទួលខុសត្រូវលើការចំណាយទាំងអស់របស់អ្នកហាត់ការ។ ខ្ទង់ប្រាក់ចំណាយជាមធ្យមសម្រាប់អ្នកហាត់ការម្នាក់នៅ Kpop គឺប្រហែល 50,000 ដុល្លារ/ឆ្នាំ។
ការធ្វើជាអ្នកហាត់ការគ្រាន់តែជាជំហានដំបូងនៅក្នុងការបើកផ្លូវសម្រាប់ដំណើរដ៏វែងឆ្ងាយ និងប្រកបដោយឧបសគ្គ មុននឹងអាចក្លាយជា idol ម្នាក់។ ក្នុងអំឡុងហាត់ការដែលមានរយៈពេលជាមធ្យម 7 ឆ្នាំ ក្រុមហ៊ុនគ្រប់គ្រងនឹងវាយតម្លៃលើជំនាញ សមត្ថភាពសម្របខ្លួននៅក្នុងក្រុម និងការស៊ូទ្រាំនឹងសម្ពាធរបស់អ្នកហាក់ការម្នាក់ៗ។ ក្រៅពីសំឡេងច្រៀង ក្បាច់រាំ ពួកគេក៏ត្រូវរៀនភាសាបរទេស វិធីសាស្ត្រគ្រប់គ្រងរូបភាព ការឆ្លើយក្នុងកិច្ចសម្ភាស ទំនាក់ទំនងជាមួយមិត្តរួមអាជីព និងការរក្សាទម្ងន់រាងកាយជាដើម។ ជាងនេះ ក្រុមហ៊ុនជាច្រើនក៏ស្នើឱ្យអ្នកហាត់ការសន្យាថាមិនប្រើប្រាស់គ្រឿងញៀន ផឹកគ្រឿងស្រវឹងនៅពេលបើកបរ និងចៀសវាងរឿងអាស្រូវស្នេហាផងដែរ។ Euny Hong អ្នកយកព័ត៌មានអាម៉េរិកដើមកំណើតកូរ៉េខាងត្បូង បានសរសេរលើ The Paris Review ថា «ការបណ្ដុះបណ្ដាលតារា Kpop គឺជាការអប់រំមនុស្សដ៏ពេញលេញ»។
កាលជ្រើសរើសបេក្ខភាពសម្រាប់តំណែងអ្នកហាត់ការរបស់ SM Entertainment នៅជប៉ុន កាលពីឆ្នាំ 2019
កំពូលតារា Kpop ជាច្រើន បានចំណាយស្ទើរពេញមួយយុវវ័យដើម្បីធ្វើជាអ្នកហាត់ការ និងរកឱកាសដើម្បីបង្ហាញខ្លួន។ G-Dragon របស់ Bigbang បានឆ្លងកាត់ការបណ្ដុះបណ្ដាល 11 ឆ្នាំ ក្នុងនោះ 5 ឆ្នាំនៅ SM Entertainment និង 6 ឆ្នាំនៅ YG។ Idol Kpop ជាច្រើនរូបផ្សេងទៀតក៏ធ្លាប់បានឆ្លងកាត់ប្រហាក់ប្រហែលនេះ ក្នុងនោះមានដូចជា Jihyo (TWICE, 10 ឆ្នាំ), Heo Chan Mi (10 ឆ្នាំ), Jennie (Blackpink, 6 ឆ្នាំ), Suho (EXO, 6 ឆ្នាំ)។
ពេលធ្វើជាគណៈកម្មការនៃកម្មវិធី Idol Producer តារាចម្រៀង Lay (EXO) បានបង្ហើបអំពីដំណើរការប្រកួតប្រជែងមុនពេលបានបង្ហាញខ្លួនជាមួយក្រុមថា ក្នុង 120 នាក់ ពួកគេរើសយកតែ 100 នាក់ ហើយបន្តជម្រុះរាប់សិបនាក់ទៀត ដើម្បីយក 24 នាក់។ ចាប់ពី 24 នាក់ ពួកគេក៏ជ្រើសរើស 12 នាក់ចុងក្រោយ។ រៀងរាល់សប្ដាហ៍សុទ្ធតែមានអ្នកហាត់ការម្នាក់ត្រូវចាកចេញ»។
បើទោះជាបង្ហាញខ្លួនក្នុងរូបភាពដ៏អស្ចារ្យ ប៉ុន្តែ idol ជាច្រើននៅ Kpop រកប្រាក់ចំណូលមិនបានច្រើនដូចទស្សនិកជនគិតនោះឡើយ។ ទំព័រ Seoulspace បានផ្សាយថា ក្រុមហ៊ុនកន្សាន្តជាច្រើនយកប្រាក់ចំណូលរហូតដល់ 90% ហើយទុកតែ 10% ប៉ុណ្ណោះសម្រាប់តារាម្នាក់ៗ។ សម្រាប់ក្រុមដែលមានសមាជិក 20 នាក់ដូច NCT ជាដើម នឹងទទួលបានប្រាក់ចំណូលកាន់តែទាប។ នេះមិនទាន់និយាយដល់រឿងបង់ពន្ធជូនរដ្ឋនៅឡើយ៕
Jennie (Blackpink) កាលនៅជាអ្នកហាត់ការ
August 7, 2023
គម្រោងប្រើប្រាស់គ្រាប់បែកនុយក្លេអែរបង្កើតព្រែកជីកជំនួស Suez
សហរដ្ឋអាម៉េរិកធ្លាប់រៀបផែនការប្រើប្រាស់គ្រាប់បែកនុយក្លេអែរដើម្បីបង្កើតព្រែកជីកប្រវែង 257 គីឡូម៉ែត្រ ដែលឆ្លងកាត់ប្រទេសអ៊ីស្រាអែល ដើម្បីជំនួសព្រែកជីក Suez នៅក្បែរនោះ។
រដ្ឋាភិបាលអាម៉េរិក កាលពីអំឡុងទសវត្សរ៍ឆ្នាំ 1960 ធ្លាប់បានពិចារណាអំពីសំណើប្រើប្រាស់គ្រាប់បែកនុយក្លេអែរ 520 គ្រាប់ ដើម្បីបង្កើតព្រែកជីកមួយជំនួសព្រែកជីក Suez ដែលឆ្លងកាត់ប្រទេសអ៊ីស្រាអែល។ គម្រោងនេះមិនអាចក្លាយជាការពិត ប៉ុន្តែបើសិនមានផ្លូវទឹកជំនួស ឬបន្ថែមលើ Suez នោះគឺអាចមានប្រយោជន៍ច្រើននៅក្នុងវិស័យដឹកជញ្ជូនតាមផ្លូវទឹក ហើយអាចចៀសវាងការកកស្ទះចរាចរណ៍ដូចករណីមួយកាលពីខែមីនា 2021។ នេះបើតាម Business Insider។
យោងតាមអនុស្សារណៈឆ្នាំ 1963 របស់ក្រសួងការពារជាតិអាម៉េរិក ដែលត្រូវបានបង្ហើបឱ្យដឹងកាលពីឆ្នាំ 1996 គម្រោងរបស់ក្រុមអ្នកវិទ្យាសាស្ត្រអាម៉េរិក គឺការប្រើប្រាស់គ្រាប់បែកនុយក្លេអែរដើម្បីបង្កើតព្រែកជីកសមុទ្រងាប់ (Dead Sea) ដែលនឹងអនុញ្ញាតឱ្យទឹកហូរឆ្លងកាត់សមុទ្រខ្សាច់ Negev។ ព្រែកជីកថ្មីក្នុងគម្រោងនេះនឹងមានប្រវែង 257 គីឡូម៉ែត្រ ឆ្លងកាត់ប្រទេសអ៊ីស្រាអែល។ មូលហេតុដែលធ្វើឱ្យមានគម្រោងនេះ គឺដោយសារវិធីសាស្ត្រជីកបែបធម្មតាត្រូវការចំណាយប្រាក់ច្រើន ហើយគ្រាប់បែកនុយក្លេអែរអាចប្រើប្រាស់បាននៅក្នុងករណីនេះ។ ព្រែកជីកមួយបែបនេះអាចរួមចំណែកយ៉ាងធំធេងនៅក្នុងការអភិវឌ្ឍសេដ្ឋកិច្ច។
ការកកស្ទះចរាចរណ៍កាលពីខែមីនា 2021 នៅលើព្រែកជីក Suez
ក្រុមអ្នកវិទ្យាសាស្ត្រនៅក្រសួងការពារជាតិអាម៉េរិកគណនាឃើញថា ត្រូវការឧបករណ៍ផ្ទុះដែលមានកម្លាំង 2 ម៉េហ្គាតោនចំនួន 4 សម្រាប់ព្រែកមួយកំណាត់ៗដែលមានប្រវែង 1.6 គីឡូម៉ែត្រ។ អ្នកជំនាញនិយាយថា តួលេខនេះប្រហាក់ប្រហែលនឹងគ្រាប់បែកនុយក្លេអែរចំនួន 520 គ្រាប់ ឬ រំសេវ 1.04 ជីហ្គាតោន (មួយជីហ្គាតោនស្មើនឹងមួយពាន់លានតោន)។ ទីតាំងល្អដែលត្រូវបានស្នើ គឺតំបន់ដែលឆ្លងកាត់សមុទ្រខ្សាច់ Negev នៅអ៊ីស្រាអែល ភ្ជាប់សមុទ្រមេឌីទែរ៉ាណេទៅនឹងឈូងសមុទ្រ Aqaba បើកផ្លូវរហូតដល់សមុទ្រក្រហម និងមហាសមុទ្រឥណ្ឌា។
ការសិក្សាបឋមបង្ហាញថា វិធីសាស្ត្រខាងលើគឺអាចទៅរួច។ ប៉ុន្តែ អនុស្សារណៈរបស់អាម៉េរិកក៏បានបង្ហាញថា អាចមានបញ្ហាផ្នែកនយោបាយ ព្រោះថា ក្រុមប្រទេសអារ៉ាប់ដែលនៅជុំវិញអ៊ីស្រាអែល នឹងជំទាស់យ៉ាងខ្លាំងក្លាទៅនឹងគម្រោងនេះ។
តំបន់ព្រែកជីក Suez និងគម្រោងព្រែកជីកនុយក្លេអែរ
អនុស្សារណៈនេះត្រូវបានប្រទះឃើញនៅពេលគណៈកម្មការថាមពលនុយក្លេអែរអាម៉េរិក ស៊ើបអង្កេតលើការប្រើប្រាស់ជាតិផ្ទុះនុយក្លេអែរសន្តិភាព (PNE) ដើម្បីជីកហេដ្ឋារចនាសម្ព័ន្ធដែលមានប្រយោជន៍។ គម្រោងខាងលើបានខកខានបន្ទាប់ពីសហរដ្ឋអាម៉េរិកមើលឃើញថា ការធ្វើតេស្តជាមួយនឹង PNE ចំនួន 27 លើក គឺមានការបំភាយវិទ្យុសកម្មទៅក្នុងបរិស្ថាន៕
August 3, 2023
ក្រុមរដ្ឋប្រហារនេហ្សេត្រូវអាហ្វ្រិកខាងលិចដាក់ទណ្ឌកម្ម ខណៈស្ថានទូតបារាំងរងការវាយប្រហារ
កាលពីថ្ងៃទី 30 កក្កដា បណ្ដាប្រទេសនៅអាហ្វ្រិកខាងលិច បានចាប់ផ្ដើមដាក់ទណ្ឌកម្ម និងគំរាមថានឹងប្រើប្រាស់កម្លាំងបាយ បើសិនក្រុមយោធាដែលធ្វើរដ្ឋប្រហារនៅប្រទេសនីហ្សេ មិនប្រគល់អំណាចត្រលប់មកប្រធានាធិបតី Mohammed Bazoum ក្នុងរង្វង់មួយសប្ដាហ៍ ស្របពេលដែលក្រុមអ្នកគាំទ្រអាជ្ញាធរយោធា វាយប្រហារលើស្ថានទូតបារាំងនៅរដ្ឋធានីនីញ៉ាម៉េ។
ក្រុម ECOWAS ដែលមាន 15 ប្រទេស បានធ្វើប្រតិកម្មទៅនឹងអំពើរដ្ឋប្រហារលើកទី 7 នៅតំបន់ Sahel នៅក្នុងប៉ុន្មានឆ្នាំចុងក្រោយនេះ បន្ទាប់ពីហ្វូងមនុស្សនៅនីញ៉ាម៉េរបស់ប្រទេសនីហ្សេ ដុតទង់ជាតិបារាំង និងគប់ដុំថ្មលើក្បួនរថយន្តអ្នកការទូតរបស់បារាំង នាំឱ្យប៉ូលិសប្រើប្រាស់ផ្សែងបង្ហូរទឹកភ្នែកដើម្បីទប់ទល់។
រូបភាពនានាបង្ហាញថា ជញ្ជាំងរបស់ស្ថានទូតបារាំងត្រូវគេដុត ហើយមនុស្សជាច្រើនត្រូវបានលើកដាក់លើរថយន្តសង្គ្រោះ នៅពេលពួកគេរងរបួស។
ឧត្ដមសេនីយ Abdourahamane Tiani
នៅក្នុងកិច្ចប្រជុំកំពូលបន្ទាន់មួយនៅប្រទេសនីហ្សេរីយ៉ា ដែលពិភាក្សាអំពីរដ្ឋប្រហារ ក្រុមមេដឹកនាំនៃសហគមន៍សេដ្ឋកិច្ចរបស់បណ្ដាប្រទេសនៅអាហ្វ្រិកខាងលិច បានអំពាវនាវសូមឱ្យស្ដារធម្មនុញ្ញភាព និងបានព្រមានថា នឹងមានវិធានការតបត បើសិនប្រការនេះមិនត្រូវបានអនុវត្ត។
ECOWAS និងសម្ព័ន្ធភាពសេដ្ឋកិច្ច និងហិរញ្ញវត្ថុអាហ្វ្រិកខាងលិច ដែលមានសមាជិកចំនួន 8 បានឱ្យដឹងថា ព្រំដែនរបស់នីហ្សេនឹងត្រូវបិទជាបន្ទាន់ ជើងហោះហើរពាណិជ្ជកម្មត្រូវបានហាមឃាត់ ការដោះដូរហិរញ្ញវត្ថុត្រូវបានផ្អាក ខណៈដែលទ្រព្យសម្បត្តិជាតិត្រូវបានបង្កក និងជំនួយនានាក៏ត្រូវបានកាត់ផ្ដាច់។
ចំណែកក្រុមមន្ត្រីយោធាដែលជាប់ទាក់ទិននឹងអំពើរដ្ឋប្រហារ នឹងត្រូវបានហាមឃាត់ការដើរហើរ ស្របពេលដែលទ្រព្យរបស់ពួកគេក៏ត្រូវបង្កក។
ផែនទីរបស់ប្រទេសនីហ្សេ
អំពើរដ្ឋប្រហារនៅនីហ្សេនេះ ត្រូវបានបណ្ដាប្រទេសក្បែរខាង និងដៃគូអន្តរជាតិ ដែលមានអាម៉េរិក អង្គការសហប្រជាជាតិ សហភាពអាហ្វ្រិក សហភាពអឺរ៉ុប និងបារាំងជាដើម ថ្កោលទោសយ៉ាងខ្លាំងក្លា។ ពួកគេសុទ្ធតែប្រកាសមិនទទួលស្គាល់ក្រុមមេដឹកនាំថ្មីនៅនីហ្សេ ដែលនាំមុខដោយមេរដ្ឋប្រហារ ឧត្ដមសេនីយ Abdourahamane Tiani។
ចំណែកមេបញ្ជាការកំពូលរបស់ក្រុមហ៊ុនយោធាឯកជនរុស្ស៊ី Wagner លោក Yevgeny Prigozhin បានលើកជាសំណើថា ការងារស្ដារស្ថិរភាពនៅនីហ្សេ ទុកឱ្យខ្មាន់កាំភ្លើងរបស់លោកជាអ្នកចាត់ចែង៕
July 31, 2023
រុស្ស៊ីនឹងប្រើប្រាស់អាវុធនុយក្លេអែរ បើសិនអ៊ុយក្រែនឈ្នះសង្គ្រាម
អនុប្រធានក្រុមប្រឹក្សាសន្តិសុខជាតិរុស្ស៊ី Dmitry Medvedev ព្រមានថា មូស្គូ «មិនមានជម្រើសផ្សេង» ក្រៅតែពីអាវុធនុយក្លេអែរ បើសិនការវាយបករបស់អ៊ុយក្រែន ទទួលបានជោគជ័យ។
«កងកម្លាំងប្រដាប់អាវុធរបស់រុស្ស៊ី បានរុញច្រានការវាយបករបស់សត្រូវ ការពារពលរដ្ឋ និងទឹកដីរុស្ស៊ី។ … បើសិន…យុទ្ធនាការវាយបករបស់អ៊ុយក្រែន ដែលគាំទ្រដោយណាតូ ទទួលបានជោគជ័យ និងគ្រប់គ្រងទឹកដីមួយផ្នែករបស់រុស្ស៊ី ពេលនោះយើងខ្ញុំនឹងត្រូវបង្ខំចិត្តប្រើប្រាស់អាវុធនុយក្លេអែរ ទៅតាមគោលការណ៍នានានៃបទបញ្ជារបស់ប្រធានាធិបតីរុស្ស៊ី» អនុប្រធានក្រុមប្រឹក្សាសន្តិសុខជាតិរុស្ស៊ី Dmitry Medvedev បានឱ្យដឹងនៅលើទំព័រ Telegram ដូច្នេះ កាលពីថ្ងៃទី 30 កក្កដា 2023។
លោក Medvedev ក៏បានសង្កត់ធ្ងន់ដែរថា «ជាធម្មតាទេ នោះក៏ព្រោះតែមិនមានជម្រើសផ្សេង»។
លោក Medvedev ត្រូវបានគេយល់ថា កំពុងនិយាយដល់គោលការណ៍មួយផ្នែកស្ដីពីនុយក្លេអែររបស់រុស្ស៊ី ដែលក្នុងនោះមានការចែងថា អាវុធនុយក្លេអែរអាចត្រូវបានប្រើប្រាស់ដើម្បីឆ្លើយតបនឹងសកម្មភាពបង្កហេតុដែលប្រឆាំងនឹងរុស្ស៊ី។
អ៊ុយក្រែនកំពុងតែប្រឹងប្រែងរំដោះទឹកដីដែលរុស្ស៊ីបានវាយយកទៅកាន់កាប់នាពេលកន្លង តាមរយៈការវាយបកដែលបានចាប់ផ្ដើមពីខែមិថុនា 2023។ អ៊ុយក្រែនឱ្យដឹងថា កងទ័ពប្រទេសនេះកំពុងតែសម្រេចបានជោគជ័យមួយចំនួននៅក្នុងយុទ្ធនាការវាយបក បើទោះមានភាពយឺតយ៉ាវ។
សង្គ្រាមរវាងរុស្ស៊ី និងអ៊ុយក្រែន នៅតែបន្តកើតមាន ហើយក៏មិនទាន់មើលឃើញសញ្ញានៃទីបញ្ចប់ ដោយសារតែភាគីទាំងពីរនៅតែវាយរុញច្រានគ្នាជាបន្តបន្ទាប់៕
July 31, 2023
បាញ់ចរន្តអគ្គិសនីមួយលានវ៉ុលឱ្យរត់ឆ្លងកាត់មនុស្សដើម្បីឃោសនាឡានអគ្គិសនី
អ្នកបង្ហាញម៉ូដត្រូវបានគេឱ្យស្លៀកពាក់ឈុតពិសេស រួចបាញ់ចរន្តអគ្គិសនីមួយលានវ៉ុលឱ្យរត់ឆ្លងកាត់រាងកាយ ដើម្បីផ្សព្វផ្សាយរថយន្តអគ្គិសនីថ្មីរបស់ក្រុមហ៊ុន Kia។
តារាម៉ូដែល Jodie Kidd ដែលជាអ្នកចូលចិត្តរថយន្តទំនើប ហើយក៏ជាពិធីការិនីទូរទស្សន៍ដែរនោះ បានយល់ព្រមឱ្យគេឆក់ខ្សែភ្លើង ប៉ុន្តែនាងនៅតែមានសុវត្ថិភាព បើទោះចរន្តអគ្គិសនីកម្លាំងមួយលានវ៉ុលរត់ឆ្លងកាត់រាងកាយ។
តាមការពិត នេះគឺជាការផ្សាយពាណិជ្ជកម្មឱ្យរថយន្ត SUV អគ្គិសនី Kia EV9 ថ្មី។ ដើម្បីអះអាងថា EV9 គឺជារថយន្ត SUV ដ៏ល្អសម្រាប់គ្រួសារ Kidd បានប្រើប្រាស់ឈុតសម្លៀកបំពាក់ពិសេសដែលមានមុខងារដូចទៅនឹងអង់តែនការពាររន្ទះ ដែលការពារនាងពីចរន្តអគ្គិសនីដ៏គ្រោះថ្នាក់ នៅពេលអនុញ្ញាតឱ្យអគ្គិសនីបាញ់ចេញពីម្រាមដៃ។
ឈុតសម្លៀកបំពាក់នោះគឺជាប្រភេទក្រណាត់ពិសេសម្យ៉ាងដែលមានពណ៌ប្រផេះ ហើយ Kidd ត្រូវពាក់គ្របជិតរាងកាយ ដូចនៅក្នុងរូបភាពខាងលើ។
បន្ទាប់ពីបានថតរូបខាងលើរួច Kidd ក៏ត្រូវបានតម្រូវឱ្យស្លៀករ៉ូបទៅតាមស្ដង់ដាអ្នកបង្ហាញម៉ូដ។ រូបភាពថ្មីនេះនឹងត្រូវបានកាត់តដើម្បីបង្កើតបានជារូបចុងក្រោយសម្រាប់ការផ្សាយពាណិជ្ជកម្ម។
និយាយឱ្យងាយយល់ តារាម៉ូដែលនេះត្រូវចរន្តអគ្គិសនីមួយលានវ៉ុលរត់ឆ្លងកាត់រាងកាយគឺជារឿងពិត ប៉ុន្តែមិនមែននៅក្នុងរ៉ូបធម្មតានៅក្នុងរូបថតផ្សាយពាណិជ្ជកម្មនោះទេ។
«ឈុតឆាកផ្សងព្រេងនេះគឺដើម្បីលើកកម្ពស់តម្លៃរបស់ថាមពលអគ្គិសនី និងអនាគតរបស់រថយន្តអគ្គិសនី នៅក្នុងឱកាសបង្ហាញរថយន្តអគ្គិសនីម៉ូដែលថ្មី Kia EV9» Kidd បកស្រាយដូច្នេះ។
តារាម៉ូដែល Jodie Kidd
ចំណែកក្រុមហ៊ុន Kia វិញ និយាយថា គោលដៅនៃការឃោសនានេះ គឺដើម្បីបញ្ជាក់ថា EV9 គឺជាម៉ូដែលរថយន្តអគ្គិសនីដ៏សមស្របសម្រាប់គ្រួសារដែលមានសមាជិកច្រើន។
Kia EV9 អាចបើកបរក្នុងចម្ងាយផ្លូវ 483 គីឡូម៉ែត្រ និងអាចដាក់បានមនុស្ស 7 នាក់។ រថយន្តនេះមានតម្លៃចាប់ពី 64,995 ផោនអង់គ្លេស (ប្រហែល 63,000 ដុល្លារអាម៉េរិក)៕

July 28, 2023
ស្ពានវែងជាងគេលើពិភពលោក កប៉ាល់ទម្ងន់ 300,000 តោន បុកមិនបាក់
ស្ពានហុងកុង – ជូហៃ – ម៉ាកាវ (Hong Kong-Zhuhai-Macao Bridge) ទទួលបានការសរសើរពីសារព័ត៌មានអង់គ្លេស Guardian ថាជាមួយក្នុងចំណោម «បេតិកភណ្ឌទាំង 7 របស់ពិភពលោកសម័យទំនើប» ស្របពេលដែលទំព័រ CGTN បានហៅស្ពាននេះថា «កំពូលភ្នំ Everest» នៅក្នុងវិស័យសាងសង់ស្ពាន ដែលជាមហាគម្រោងមួយដែលបានឆ្លងកាត់ឧបសគ្គច្រើនបំផុតលើពិភពលោក។
ដោយមានបណ្ដោយប្រវែង 55 គីឡូម៉ែត្រ វែងជាង 20 ដង បើធៀបនឹងស្ពាន Golden Gate របស់សហរដ្ឋអាម៉េរិក ស្ពានហុងកុង – ជូហៃ – ម៉ាកាវ គឺជាស្ពានដែលវែងជាងគេលើពិភពលោក។
យោងតាមសារព័ត៌មាន People’s Daily របស់ចិន ការស្ថាបនាស្ពានហុងកុង – ជូហៃ – ម៉ាកាវ មានការប្រើប្រាស់បច្ចេកទេសទំនើបអាចស៊ូទ្រាំជាមួយនឹងការប៉ះទង្គិចពីទម្ងន់ 3,000 តោន ជួយឱ្យវាអាចទប់ទល់នឹងខ្យល់ព្យុះដែលមានល្បឿនប្រមាណ 201 គីឡូម៉ែត្រ/ម៉ោង និងគ្រោះរញ្ជួយដីកម្លាំង 8 រិចទ័រ ឬការបុកពីកប៉ាល់ដែលមានទម្ងន់ 300,000 តោន។
ស្ពាន កោះ និងផ្លូវក្រោមដី ក៏មាននៅក្នុងមហាគម្រោងស្ពានហុងកុង – ជូហៃ – ម៉ាកាវ
មហាគម្រោងសំណង់ដែលវែងជាងគេលើពិភពលោកនេះរួមមាន ស្ពានដែកមួយខ្សែប្រវែង 22.9 គីឡូម៉ែត្រ កោះសិប្បនិម្មិតចំនួនពីរដែលមានទំហំ 200,000 ម៉ែត្រការ៉េ ផ្លូវក្រោមដីដែលស្ថិតក្រោមទឹកមួយខ្សែប្រវែង 6.7 គីឡូម៉ែត្រ និងជម្រៅ 40 ម៉ែត្រ រួមនឹងបណ្ដាស្ពានដែលតភ្ជាប់នឹងទីក្រុងនានា។
ស្ពានហុងកុង – ជូហៃ – ម៉ាកាវ ប្រើប្រាស់គំនិតច្នៃប្រឌិត និងបច្ចេកវិទ្យាក្នុងស្រុក
យោងតាមទំព័រ CGTN ស្ពានហុងកុង – ជូហៃ – ម៉ាកាវ ប្រើប្រាស់បច្ចេកវិទ្យា និងបច្ចេកទេសក្នុងស្រុក ព្រោះថា ពុំមានរូបមន្តពីបរទេសដែលពួកគេអាចយកមកពិនិត្យមើល ឬធ្វើតាមនោះទេ។
ស្ពាននេះផ្ដល់ផលប្រយោជន៍ធំធេងដល់វិស័យដឹកជញ្ជូន
ចំណែកទំព័រ CCTV វិញ និយាយថា ស្ពានតភ្ជាប់តំបន់ចំនួនបីនៅភាគខាងត្បូងរបស់ប្រទេសចិនមួយនេះ ជួយកែលំអប្រសិទ្ធភាពចរាចរណ៍ កាត់បន្ថយពេលវេលានៃការធ្វើដំណើរពីជូហៃទៅកាន់អាកាសយានដ្ឋានអន្តរជាតិហុងកុង ពីប្រហែល 4 ម៉ោង ចុះមកនៅត្រឹម 45 នាទី។
ស្ពាននេះក៏បង្កើតលក្ខខណ្ឌអំណោយផលសម្រាប់ទំនាក់ទំនងរវាងមនុស្ស និងមនុស្ស ក៏ដូចជាផលប្រយោជន៍សម្រាប់វិស័យពាណិជ្ជកម្មក្នុងតំបន់ឈូងសមុទ្រធំ (Greater Bay Are) ផងដែរ៕

July 27, 2023
Mbappe មិនសូវអើពើដល់សំណើផ្ដល់បៀវត្សរ៍ជិត 800 លានដុល្លារពីក្លឹបនៅអារ៉ាប់
ខ្សែប្រយុទ្ធជនជាតិបារាំង Mbappe ទំនងជានឹងបដិសេធសំណើបង្កើតកិច្ចព្រមព្រៀងមួយឆ្នាំ និងប្រាក់បៀវត្សរ៍ 775 លានដុល្លារអាម៉េរិក ពីក្លឹប Al Hilal របស់ប្រទេសអារ៉ាប៊ីសាអូឌីត។
យោងតាមទំព័រ Relevo នៅប្រទេសអេស្ប៉ាញ Mbappe មិនមានចេតនាទាត់ឱ្យក្លឹប Al Hilal។ ខ្សែប្រយុទ្ធវ័យ 24 ឆ្នាំរូបនេះ ប្ដេជ្ញាចិត្តទាត់ឱ្យ PSG ក្នុងឆ្នាំចុងក្រោយនៃកិច្ចព្រមព្រៀង មុននឹងទៅចូលរួមជាមួយនឹងក្លឹប Real Madrid ទៅតាមទម្រង់សេរី។
មុននោះ កាលពីថ្ងៃទី 24 កក្កដា ក្លឹប Al Hilal បានស្នើទិញ Mbappe ក្នុងតម្លៃ 330 លានដុល្លារអាម៉េរិក។ Al Hilal ក៏បានត្រៀមខ្លួនរួចហើយសម្រាប់ការផ្ដល់ប្រាក់បៀវត្សរ៍ 775 លានដុល្លារអាម៉េរិក និងសិទ្ធិទៅចូលរួមជាមួយក្លឹប Real Madrid នៅឆ្នាំ 2024 ដល់ Mbappe។
បន្ទាប់ពីព័ត៌មានស្ដីពីសំណើរបស់ Al Hilal កំពូលតារាបាល់បោះនៅពានរង្វាន់ NBA លោក Giannis Antetokounmpo បានសរសេរលើ Twitter ថា «Al Hilal អ្នកអាចទិញខ្ញុំបាន។ ខ្ញុំមានមុខមាត់ដូច Mbappe។
ក្លឹប Al Hilal ឆ្លើយតបវិញថា «ស្វាគមន៍មកកាន់យើងខ្ញុំក្នុងនាមជាអ្នកគាំទ្រ, Giannis»។ ក្រោយមក Mbappe ក៏បានចូលបញ្ចេញមតិក្រោមសាររបស់ Giannis ដោយការដាក់រូបសើចចេញទឹកភ្នែក។
កិច្ចព្រមព្រៀងរវាង Mbappe និងក្លឹប PSG នៅមានសុពលភាពមួយឆ្នាំទៀត។ ការដែល Mbappe បដិសេធការពន្យារសុពលភាពដល់ឆ្នាំ 2025 ដែលផ្ទុយពីគម្រោងដំបូងរបស់ភាគីទាំងពីរ បានក្លាយជារឿង «ទុំជោរ» និងអាចបង្កការខាតបង់ប្រាក់ច្រើនដល់ PSG។ បើសិនមិនលក់នៅក្នុងរដូវក្ដៅនេះ PSG នឹងបាត់បង់កីឡាករជនជាតិបារាំងរូបនេះដោយទទេៗ ចាប់ពីខែកក្កដាឆ្នាំ 2024។
Kylian Mbappe
បន្ទាប់ពីមិនទទួលបានចម្លើយបកស្រាយពី Mbappe កាលពីថ្ងៃទី 22 កក្កដា PSG ក៏សម្រេចចិត្តប្រកាសលក់។ PSG ក៏ដាក់សម្ពោធលើ Mbappe ដោយការមិនបញ្ចូលឈ្មោះកីឡាករនេះទៅក្នុងក្រុមដែលត្រូវទៅទាន់នៅប្រទេសជប៉ុន។ ពេលនោះ Mbappe ត្រូវបានគេជឿថា ទំនងជាបានយល់ព្រមធ្វើជាកីឡាករបម្រុងពេញមួយរដូវកាល 2023-2024។
បច្ចុប្បន្ន Mbappe កំពុងកាន់កាប់កំណត់ត្រាទាត់ចូលទីបាន 212 គ្រាប់នៅក្នុង 260 ប្រកួតសម្រាប់ PSG។ សម្រាប់ក្រុមជម្រើសជាតិបារាំង Mbappe រកបាន 40 គ្រាប់ ជាប់ចំណាត់ថ្នាក់លេខ 5 នៅក្នុងបញ្ជីឈ្មោះកីឡាករដែលរកបានគ្រាប់បាល់ ដែលនេះគឺនៅទាបជាង 14 គ្រាប់បើធៀបនឹង Olivier Giroud ដែលជាកីឡាករនាំមុខគេក្នុងបញ្ជីចំណាត់ថ្នាក់៕
July 25, 2023
ចិនសាងសង់អគារគ្មានទំនាញផែនដីកម្ពស់រាប់សិបម៉ែត្រ
ក្រុមអ្នកជំនាញរបស់ប្រទេសចិន កំពុងតែសាងសង់មូលដ្ឋានថ្មីដើម្បីបម្រើដល់ការពិសោធដែលទាក់ទងនឹងដែនទំនាញផែនដី រួមចំណែកក្នុងការសិក្សាស្រាវជ្រាវទីអវកាស។
មូលដ្ឋានពិសោធន៍មីក្រូទំនាញជាមួយនឹងអេឡិចត្រូម៉ាញ៉េទិច (Microgravity Experiment Facility with Electromagnetic Launch – MEFEL) នៅទីក្រុងប៉េកាំង មានកម្ពស់ 40 ម៉ែត្រ ប្រើប្រាស់ម៉ាស៊ីនពិសេសដែលនាំវត្ថុឡើង-ចុះ និងទទួលបទពិសោធន៍នៃស្ថានភាពដែលស្ទើរតែមិនមានទំនាញផែនដីក្នុងរយៈពេល 4 វិនាទី។ នេះបើតាមការចុះផ្សាយរបស់ SCMP កាលពីថ្ងៃទី 20 កក្កដា 2023។
MEFEL អាចឱ្យធ្វើការពិសោធ 100 ដង/ថ្ងៃ និងចំណាយអគ្គិសនីប្រហែលតែ 1 គីឡូវ៉ាត់ម៉ោងប៉ុណ្ណោះសម្រាប់ការពិសោធមួយ។ វាក៏អាចបង្កើតកម្លាំងទំនាញស្រាលដើម្បីធ្វើត្រាប់តាមលក្ខខណ្ឌធម្មជាតិនៅលើព្រះចន្ទ និងភពអង្គារ។
កាលពីឆ្នាំ 2019 មូលដ្ឋានដំបូងដែលស្ថិតក្នុងប្រភេទ MEFEL ចាប់ផ្ដើមដំណើរការនៅប្រទេសអាល្លឺម៉ង់ និងមានឈ្មោះថា Einstein – Elevator។ អគារនេះមានកម្ពស់ 40 ម៉ែត្រ អាចឱ្យទទួលបទពិសោធន៍ស្ថានភាពគ្មានទំនាញប្រហែល 4 វិនាទី ហើយអាចធ្វើការពិសោធបាន 300 ដង/ថ្ងៃ។
ក្រុមអ្នកវិទ្យាសាស្ត្រចិន បានចាប់ផ្ដើមអភិវឌ្ឍ MEFEL តាំងពីឆ្នាំ 2017។ ពួកគេប្រើប្រាស់ម៉ាស៊ីនប្រវែង 3 ម៉ែត្រ ដើម្បីបង្កើតបរិស្ថានគ្មានទំនាញក្នុងរយៈពេលខ្លី។ នៅខាងក្នុង MEFEL ឈុតសម្រាប់ពិសោធន៍នឹងផ្ដល់បរិស្ថានមានទំនាញផែនដីស្មើនឹង 1/100,000 នៃកម្រិតទំនាញធម្មតានៅលើផែនដី ក្នុងរយៈពេល 4 វិនាទី។
ក្រុមវិស្វករចិន ក៏ពុងតែអភិវឌ្ឍ MEFEL ជំនាន់ថ្មី ដែលគ្រោងនឹងអាចបង្កើតស្ថានភាពគ្មានទំនាញឱ្យបានដល់ 20 វិនាទី និងទម្ងន់អតិបរមាសម្រាប់ការពិសោធ នឹងឡើងដល់ 500 គីឡូក្រាម៕
July 21, 2023
អបអរសាទរខួប១ឆ្នាំ នៃការបើកដំណើរការជាផ្លូវការរោងចក្រដំឡើងរថយន្ត Ford និងពិធីប្រគល់-ទទួលអំណោយរថយន្តគិលានសង្គ្រោះ Ambulance ជូនដល់កាកបាទក្រហមកម្ពុជា សាខាខេត្តពោធិ៍សាត់
[ភ្នំពេញ – ថ្ងៃទី ១៣ ខែកក្កដា ឆ្នាំ២០២៣] ក្រុមហ៊ុន RMA (Cambodia) PLC ដែលជាក្រុមហ៊ុននាំចូល និងចែកចាយផ្តាច់មុខរថយន្ត Ford ក្នុងទីផ្សារប្រទេសកម្ពុជាបានប្រារព្ធពិធីប្រគល់-ទទួលអំណោយរថយន្តគិលានសង្គ្រោះចំនួន ២ គ្រឿង ជូនទៅដល់កាកបាទក្រហមកម្ពុជា សាខាខេត្តពោធិ៍សាត់ ដែលកម្មវិធីនេះត្រូវបានប្រារព្ធឡើង ក្រោមអធិបតីភាពរបស់ ឯកឧត្តម កែវ រតនៈ រដ្ឋមន្ត្រីប្រតិភូអមនាយករដ្ឋមន្ត្រី និងអគ្គនាយកអគ្គីសនីកម្ពុជា និងលោកអភិបាលនៃគណៈអភិបាលខេត្តពោធិ៍សាត់ ព្រមទាំងថ្នាក់ដឹកនាំក្រុមហ៊ុន Ford Motor Company ថ្នាក់ដឹកនាំក្រុមហ៊ុន RMA Group និងក្រុមហ៊ុន RMA (Cambodia) PLC រួមទាំងភ្ញៀវកិត្តិយសជាតិ និងអន្តរជាតិប្រមាណជាង ២០០ នាក់។ កម្មវិធីនេះបានប្រារព្ធឡើងនៅក្នុងបរិវេនរោងចក្រដំឡើងរថយន្ត Ford ក្នុងភូមិសារវ័ន ឃុំស្នាអន្សារ ស្រុកក្រគរ ខេត្តពោធិ៍សាត់ នៅថ្ងៃទី ១១ ខែកក្កដា ឆ្នាំ ២០២៣ ។
ក្នុងឱកាសនៃពីធីអបអរសាទរខួប១ឆ្នាំ នៃការបើកដំណើរការជាផ្លូវការរោងចក្រដំឡើងរថយន្ត Ford និងពិធីប្រគល់-ទទួលអំណោយរថយន្តគិលានសង្គ្រោះ Ambulance ចំនួន ២ គ្រឿង ជូនដល់កាកបាទក្រហមកម្ពុជា សាខាខេត្តពោធិ៍សាត់ លោក ងន សាំង អគ្គនាយកក្រុមហ៊ុន RMA (Cambodia) PLC បានមានប្រសាសន៍ថា៖ “ យើងខ្ញុំមានមោទភាពជាពន់ពេកដែលទទួលបានសេចក្ដីទុកចិត្តពីក្រុមហ៊ុន FORD MOTOR COMPANY ក្នុងការដំឡើងរថយន្ត FORD RANGER និង FORD EVEREST ជំនាន់ថ្មីនៅ លើទឹកដីនៃព្រះរាជាណាចក្រកម្ពុជា ស្របតាមស្តង់ដាររបស់ក្រុមហ៊ុន FORD ។ យើងខ្ញុំជឿជាក់ថា ការបោះជំហានវិនិយោគក្នុងវិស័យយានយន្តរបស់ក្រុមហ៊ុនយើងខ្ញុំ ចូលរួមចំណែកយ៉ាងសំខាន់ ក្នុងការអភិវឌ្ឍវិស័យឧសហ្សាកម្មយានយន្តនៅកម្ពុជា និងជាសក្ខីភាពនៃទំនុកចិត្តលើកិច្ចខិតខំប្រឹង ប្រែងរបស់រដ្ឋាភិបាលក្នុងការធ្វើឱ្យប្រសើរឡើង នូវបរិយាកាសធុរកិច្ច និងវិនិយោគ។ វត្តមានរបស់ រោងចក្រយើងខ្ញុំក៏បានចូលរួមចំណែកការកាត់បន្ថយការធ្វើចំណាកស្រុកទៅធ្វើការនៅក្រៅប្រទេស របស់ប្រជាពលរដ្ឋ និងលើកកម្ពស់សេដ្ឋកិច្ចក្នុងតំបន់តាមរយៈការជំរុញសន្ទុះអាជីវកម្មសហគ្រាស ធុនតូច និងមធ្យម ការបង្កើតឱកាសការងារដោយផ្ទាល់និងដោយប្រយោល ក៏ដូចជាការអភិវឌ្ឍន៍ ធនធានមនុស្សនៅក្នុងទឹកដី ខេត្តពោធិ៍សាត់នេះផ្ទាល់ផងដែរ។ ”
មិនតែប៉ុណ្ណោះ លោកក៏បានបន្ថែមទៀតថា៖ “ ក្រុមហ៊ុនយើងខ្ញុំនឹងបន្តប្តេជ្ញាគាំទ្រ និង ជំរុញវិស័យឧស្សាហកម្មយានយន្តនៅកម្ពុជា ដើម្បីឱ្យកម្ពុជា ផ្លាស់ប្ដូរមុខមាត់ថ្មី ពីប្រទេសដែលដំឡើងរថយន្ត ទៅជាប្រទេសដែលផលិតរថយន្ត ក្នុងពេលអនាគត។ ក្រុមហ៊ុននឹងពង្រីកការវិនិយោគគម្រោងដំឡើងរថយន្ត Ford ដោយបង្កើនការនាំចូលនៃចំនួន គ្រឿងបង្គុំច្រើនជាងមុន បង្កើនចំនួនការងារក្នុងស្រុក ជំរុញការប្រើប្រាស់ធាតុផ្សំក្នុងស្រុក និងបង្កើន ដើមទុនវិនិយោគបន្ថែមទៀត។ យើងខ្ញុំជឿជាក់ថា ការវិនិយោគនេះនឹងបន្តផ្តល់អត្ថប្រយោជន៍ជាច្រើនបន្ថែមទៀតជូនប្រទេសកម្ពុជា ជាពិសេសការអភិវឌ្ឍន៍ខ្សែសង្វាក់ផ្គត់ផ្គង់ និងធ្វើឱ្យប្រសើរ ឡើងនូវខ្សែចង្វាក់ដែលគាំទ្រគោលនយោបាយអភិវឌ្ឍវិស័យឧស្សាហកម្មរបស់រាជរដ្ឋាភិបាលកម្ពុជា។ ការវិនិយោគនេះ នឹងនាំមកនូវផលិតផលថ្មី បច្ចេកវិទ្យាថ្មី ដើម្បីផ្គត់ ផ្គង់តម្រូវការប្រើប្រាស់រថយន្តថ្មីក្នុងស្រុក ជាមួយនឹងមោទភាពផលិតកម្មក្នុងស្រុក រោងចក្រ ដំឡើងរថយន្ត Ford នឹងបន្តទាក់ទាញវិនិយោគិនផ្សេងៗជាច្រើនទៀតមកវិនិយោគនៅកម្ពុជា ជា ពិសេស អ្នកវិនិយោគដែល ពាក់ព័ន្ធនឹងការផលិត និងដំឡើងរថយន្ត ដូចជា៖ សំបកកង់ កង់ឡាន ខ្សែភ្លើងឡាន អាគុយឡាន និងអាជីវកម្មផ្សេងៗទៀត។”

ឆ្លៀតក្នុងឱកាសនេះដែរ លោកស្រី Kay Hart ប្រធានគ្រប់គ្រងទីផ្សារអន្តរជាតិនៃក្រុមហ៊ុន Ford Motor Company បានមានប្រសាសន៍ថា៖ “ រថយន្តគិលានសង្គ្រោះ (The Next-Generation Ford Ranger-Converted Ambulances) នេះ បានបំពាក់មកជាមួយនូវបច្ចេកវិទ្យា និងប្រព័ន្ធសុវត្ថិភាពទំនើបជំនាន់ចុងក្រោយដែលធ្វើឱ្យរថយន្តនេះក្លាយជារថយន្តមួយដែលមានលក្ខណៈ ធន់ រឹងមាំ និងមានសមត្ថភាពក្នុងការចល័ត និងដឹកជញ្ជូនអ្នកជំងឺដោយសុវត្ថិភាព។ ”
លោកស្រីក៏បានបន្តទៀតថា៖ “ រថយន្តគិលានសង្គ្រោះ (The Next-Generation Ford Ranger-Converted Ambulances) នឹងចូលរួមចំណែកយ៉ាងសំខាន់សម្រាប់កាកបាទក្រហមកម្ពុជាក្នុងខេត្តពោធិ៍សាត់ ក្នុងការគាំពារ សង្គ្រោះបន្ទាន់ និងជាជំនួយការដ៏សំខាន់ក្នុងការជួយដល់សកម្មភាពសប្បុរសធម៌ផ្សេងៗដល់ប្រជាពលរដ្ឋ និងអ្នកជំងឺដើម្បីទទួលបាននូវសេវាកម្មសង្គ្រោះបន្ទាន់មួយដែលមាន គុណភាព សុវត្ថិភាព និងប្រសិទ្ធភាព។ ”
ឯកឧត្តម កែវ រតនៈ រដ្ឋមន្ត្រីប្រតិភូអមនាយករដ្ឋមន្ត្រី និងអគ្គនាយកអគ្គីសនីកម្ពុជា បានមានប្រសាសន៍ថា៖ “ ការសាងសង់រោងចក្រដំឡើងរថយន្ត Ford ក្នុងខេត្តពោធិ៍សាត់ គឺជាសក្ខីភាពមួយដែលបានបង្ហាញពីទំនុកចិត្តរបស់ក្រុមហ៊ុន RMA Cambodia មកលើរាជរដ្ឋាភិបាលកម្ពុជា ហើយការផ្តល់ជូននូវរថយន្តគិលានសង្គ្រោះ ២ គ្រឿងក្នុងថ្ងៃនេះនឹងជាការចូលរួមចំណែកដ៏សំខាន់មួយក្នុងការពង្រឹងសមត្ថភាពមូលដ្ឋានសុខាភិបាលបន្ថែមទៀត ក្នុងការឆ្លើយតបទៅនឹងតម្រូវការសេវាថែទាំសុខភាពអោយកាន់តែមានគុណភាព ប្រសិទ្ធភាព និងសុវត្ថិភាព។ ភាពជាដៃគូរវាង RMA Cambodia និងវិទ្យាស្ថានបច្ចេកទេសក្នុងស្រុករបស់យើង បានដើរតួរនាទីយ៉ាងសំខាន់ក្នុងការលើកកម្ពស់ធនធានមនុស្ស តាមរយៈការបង្កើតកម្មវិធីបណ្តុះបណ្តាលដោយផ្ទាល់ពីអ្នកជំនាញដែលគ្រឹះមួយដ៏សំខាន់សម្រាប់យុវជន ក៏ដូចជាយុវនារីក្នុងការត្រៀមខ្លួនរួចជាស្រេចសម្រាប់ភាពជោគជ័យនាពេលខាងមុខ។ ”
គួរបញ្ជាក់ផងដែរថា ក្រុមហ៊ុន RMA (CAMBODIA) PLC ជាក្រុមហ៊ុនដំបូងគេបំផុត ដែលទទួលបានការទទួលស្គាល់ពី វិទ្យាស្ថានស្ដង់ដារកម្ពុជា នៃ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ក្នុងនាមជាអ្នក អនុវត្តស្តង់ដារសុវត្ថិភាពយានយន្ត និងស្តង់ដារសុវត្ថិភាពគ្រឿងបង្គុំយានយន្តបានខ្ពស់បំផុត។ ក្នុងឆ្នាំ ២០២០ ក្រុមហ៊ុន RMA (CAMBODIA) PLC បានចុះបញ្ជីលក់មូលបត្រ បំណុលចំនួន ៨០ ពាន់លានរៀល ដែលស្មើនឹង ២០ លានដុល្លារអាមេរិក ក្នុងផ្សារមូលបត្រកម្ពុជា ហើយក្លាយជាក្រុមហ៊ុនមិនមែនស្ថាប័នហិរញ្ញវត្ថុដែលបានបោះផ្សាយមូលបត្របំណុលដំបូងគេបង្អស់នៅប្រទេសកម្ពុជា។ ការបោះផ្សាយមូលបត្របំណុលនេះ បង្ហាញពីកិច្ចខិតខំប្រឹងប្រែងរបស់ក្រុមហ៊ុនយើងខ្ញុំក្នុងការលើកកម្ពស់ទីផ្សារមូលបត្រកម្ពុជា និងចូលរួមចំណែកអភិវឌ្ឍទីផ្សារហិរញ្ញវត្ថុនៅប្រទេសកម្ពុជា។
តាមរយៈកំណើនសេដ្ឋកិច្ច និងកំរិត GDP របស់ប្រជាជនកម្ពុជាកើនឡើងខ្ពស់ជាបន្តបន្ទាប់ បានធ្វើឱ្យប្រជាជនកម្ពុជាងាកមកប្រើប្រាស់រថយន្តថ្មីមានការកើនឡើងជាលំដាប់។ ក្នុងនោះការប្រើប្រាស់ រថយន្តថ្មីម៉ាក FORD មានកំណើនកាន់តែច្រើនឡើង និងបានក្លាយជាជម្រើសឈានមុខរបស់អតិថិជននៅកម្ពុជា។ ដូច្នេះ ក្រុមហ៊ុនបានសម្រេចចិត្តបង្កើតរោងចក្រដំឡើងរថយន្ត FORD ដែលទទួលបានសិទ្ធិពេញលេញក្នុងការផ្គុំ និងដំឡើងរថយន្តពីក្រុមហ៊ុនម្ចាស់ដើម FORD MOTOR COMPANY។ រោងចក្រនេះ ត្រូវបានសាងសង់ឡើងនៅលើផ្ទៃដីសរុបប្រមាណជាង ៥ ហិកតា ស្ថិតក្នុងភូមិសារវ័ន ឃុំស្នាអន្សា ស្រុកក្រគរ ខេត្តពោធិ៍សាត់ ជាមួយនឹងទុនវិនិយោគចំនួន ២១ លានដុល្លារសហរដ្ឋអាមេរិក ដែលអាចបង្កើតការងារជំនាញបានជាង ៥០០ កន្លែង និងមានសមត្ថភាពអាចដំឡើងរថយន្តបានចំនួនប្រមាណ ៩,០០០ គ្រឿងក្នុងមួយឆ្នាំ។
រហូតមកដល់ពេលនេះ ក្រុមហ៊ុនបានដំឡើងរថយន្ត Ford Ranger Wildtrak និងរថយន្ត Ford Everest បានចំនួន ៣,០០០ គ្រឿងដើម្បីបម្រើតម្រូវការទីផ្សារក្នុងស្រុក។ ក្រុមហ៊ុនបន្តសហការ ជាមួយនឹងវិទ្យាស្ថានពហុបច្ចេកទេសខេត្តពោធិ៍សាត់ក្នុងការបណ្តុះបណ្តាលអភិវឌ្ឍជំនាញបច្ចេកទេសដល់បុគ្គលិកក្រុមហ៊ុនដើម្បីធានាឱ្យបាននូវធនធានមនុស្សប្រកបដោយគុណភាព។ ថ្មីៗនេះ ក្រុមហ៊ុនបានបញ្ជូនបុគ្គលិកទៅប្រទេស Australia ដើម្បីសិក្សាអំពីបច្ចេកវិទ្យាដំឡើងរថយន្ត ក្នុងគោលបំណងបង្កើនកម្រិតបច្ចេកទេសបុគ្គលិកក៏ដូចជាពាំនាំចំណេះដឹងថ្មី និង បច្ចេកវិទ្យាថ្មីមកប្រទេសកម្ពុជា។ ដើម្បីបន្តចូលរួមលើកកម្ពស់វិស័យយានយន្ត ក្រុមហ៊ុននឹងបង្កើតមជ្ឈមណ្ឌលអប់រំបណ្ដុះបណ្ដាលបច្ចេកទេស និងវិជ្ជាជីវៈដើម្បីផ្ដល់ឱកាសឱ្យប្រជាពលរដ្ឋកម្ពុជាទទួលបានការបណ្តុះបណ្តាលជំនាញបច្ចេកទេសប្រកបដោយគុណភាពដើម្បីចូលរួមចំណែកអភិវឌ្ឍធនធាន មនុស្សនៅកម្ពុជាស្របតាមគោលនយោបាយអភិវឌ្ឍវិស័យឧស្សាហកម្មរបស់រាជរដ្ឋាភិបាលកម្ពុជា។

July 14, 2023
ក្រុមហ៊ុនគ្រប់គ្រងនាវាមុជទឹក Titan ផ្អាកដំណើរការទាំងស្រុង
ក្រុមហ៊ុន OceanGate ដែលគ្រប់គ្រងកូននាវាមុជទឹក Titan បានប្រកាសបញ្ឈប់រាល់សកម្មភាពដោយមិនកំណត់ពេលវេលា ក្រោយពីមានហេតុការណ៍គ្រោះថ្នាក់នៅបាតសមុទ្រដែលបានបណ្ដាលឱ្យមនុស្ស 5 នាក់បាត់បង់ជីវិត។
«យើងផ្អាករាល់សកម្មភាពស្វែងយល់ និងពាណិជ្ជកម្ម» ក្រុមហ៊ុន OceanGate ដែលមានទីស្នាក់ការកណ្ដាលនៅ Everett រដ្ឋ Washington សហរដ្ឋអាម៉េរិក ប្រកាសកាលពីថ្ងៃទី 06 កក្កដាដូច្នេះ។ ក្រុមហ៊ុននេះមិនបានលើកឡើងច្បាស់អំពីមូលហេតុ ក៏ដូចជាពេលវេលាដែលក្រុមហ៊ុននេះនឹងដំណើរការឡើងវិញ។
OceanGate គឺជាក្រុមហ៊ុនដែលគ្រប់គ្រងកូននាវាមុជទឹក Titan។ Titan បានដាច់ទំនាក់ទំនងជាមួយកប៉ាល់មេកាលពីថ្ងៃទី 18 មិថុនា 2023 នៅក្នុងដំណើរនាំមនុស្ស 5 នាក់ចុះទៅទស្សនាសាកសពកប៉ាល់ Titanic ដែលបានលិចកាលពីប្រហែល 111 ឆ្នាំមុន នៅបាតមហាសមុទ្រអាត្លង់ទិក ជម្រៅ 3,800 ម៉ែត្រ។ ជនរងគ្រោះត្រូវបានគេជឿថា បានស្លាប់ភ្លាមៗ ក្រោយពីនាវា Titan ត្រូវបែកខ្ទេចខ្ទីដោយសារសម្ពាធទឹក។
នាយកប្រតិបត្តិរបស់ OceanGate លោក Stockton Rush គឺជាមនុស្សម្នាក់ក្នុងចំណោមជនរងគ្រោះដែលបានស្លាប់ក្នុងហេតុការណ៍ខាងលើ។ នៅលើនាវា Titan ក៏មានមហាសេដ្ឋីជនជាតិអង់គ្លេស លោក Hamish Harding, អ្នកផ្សងព្រេងជនជាតិបារាំង Paul-Henri Nargeolet, មហាសេដ្ឋីអង់គ្លេសដើមកំណើតប៉ាគិស្ថាន លោក Shahzada Dawood និងកូនប្រុស Suleman។
ក្រុមអ្នកជំនាញបានប្រមូលយកបំណែកសាកសពដែលត្រូវបានគេជឿថាជារបស់មនុស្ស ពីបំណែកនាវាដែលបានរកឃើញនៅបាតសមុទ្រ និងយកទៅកាន់កំពង់ផែ St. John’s នៅប្រទេសកាណាដា។ កងកម្លាំងល្បាតឆ្នេរសមុទ្រអាម៉េរិក និងកាណាដា កំពុងស៊ើបអង្កេតរកមូលហេតុនៃគ្រោះថ្នាក់នេះ៕
July 7, 2023