សមត្ថភាព - La Reine Media

BYD បង្ហាញរថយន្តអគ្គិសនីថ្មីតម្លៃជាងបីម៉ឺនដុល្លារអាម៉េរិក/គ្រឿង

ក្រុមហ៊ុនចិន BYD បានបង្ហាញរថយន្តអគ្គិសនីម៉ូដែលថ្មី 2023 ដែលមានឈ្មោះថា Tang តម្លៃជាង 34,000 ដុល្លារអាម៉េរិក។

កាលពីថ្ងៃទី 31 សីហាកន្លងទៅ BYD បានបង្ហាញកំណែថ្មីឆ្នាំ 2023 នៃរថយន្តអគ្គិសនី Tang នៅទីផ្សារចិន។ កំណែថ្មីរបស់ BYD Tang មានម៉ូដែលដែលមានមុខងារ និងតម្លៃផ្សេងៗគ្នាសម្រាប់ជ្រើសរើស។ កំណែដែលអាចធ្វើដំណើរបាន 600 គីឡូម៉ែត្រ មានតម្លៃ 34,300 ដុល្លារ ខណៈដែលកំណែ 730 គីឡូម៉ែត្រ មានតម្លៃ 37,700 ដុល្លារ និងកំណែ 635 គីឡូម៉ែត្រ មានតម្លៃ 41,100 ដុល្លារអាម៉េរិក។

មួយក្នុងចំណោមចំណុចលេចធ្លោរបស់ BYD Tang 2023 គឺតម្លៃថយចុះរហូតដល់ 13.7% បើធៀបនឹងស៊េរីឆ្នាំ 2022 ធ្វើឱ្យរថយន្តទាំងនេះកាន់តែមានភាពទាក់ទាញ។

ក្រៅពីនេះ គ្រប់ម៉ូដែល BYD Tang 2023 សុទ្ធតែបំពាក់ឧបករណ៍បច្ចេកវិទ្យាដែលគាំទ្រដល់ការបញ្ចូលថាមពលរហ័ស អនុញ្ញាតឱ្យថ្មដែលសល់ 30% លោតឡើងដល់ 80% ដោយចំណាយពេលតែ 30 នាទី។ ម៉ូដែលថ្មីនេះមានកៅអី 6 និង 7។

កំណែ 635 គីឡូម៉ែត្រ មានសមត្ថភាពបង្កើនល្បឿនពី 0 ដល់ 100 គីឡូម៉ែត្រ/ម៉ោង ដោយចំណាយពេលត្រឹមតែ 4.4 វិនាទី៕

September 4, 2023

អ្នកវិទ្យាសាស្ត្ររកឃើញហ្សែនដែលអាចជួយឱ្យមនុស្សមានអាយុវែងជាងបច្ចុប្បន្ន

(សហរដ្ឋអាម៉េរិក) – ក្រុមអ្នកជំនាញនៅសាកលវិទ្យាល័យ Rochester បានដាក់បញ្ចូលហ្សែនពិសេសមួយរបស់កណ្ដុរគ្មានរោម ទៅក្នុងកណ្ដុរប្រភេទធម្មតា និងបានរកឃើញថា ហ្សែននេះបានជួយឱ្យពួកវាមានសុខភាពល្អ និងរស់បានយូរជាង 4.4%។

ក្នុងការសិក្សាស្រាវជ្រាវថ្មីដ៏អស្ចារ្យមួយ ក្រុមអ្នកជំនាញរបស់សាកលវិទ្យាល័យ Rochester នៅនីវយ៉ក បានបង្ហាញវិធីសាស្ត្រដាក់បញ្ចូលហ្សែនរស់បានយូររបស់សត្វកណ្ដុរគ្មានរោម (Naked mole-rat) ដែលមានឈ្មោះក្នុងវិទ្យាសាស្ត្រថា Heterocephalus glaber ទៅក្នុងកណ្ដុរប្រភេទធម្មតាដើម្បីអូសបន្លាយអាយុកាល និងកែលំអសុខភាព។ លទ្ធផលនៃការសិក្សាស្រាវជ្រាវត្រូវបានប្រកាសលើទស្សនាវដ្ដី Nature កាលពីថ្ងៃទី 23 សីហា 2023។

កណ្ដុរខាងលើមានឈ្មោះល្បីខ្លាំងដោយសារតែសមត្ថភាពទប់ទល់នឹងជំងឺទាំងឡាយដែលទាក់ទងនឹងវ័យចំណាស់ និងមានអាយុវែងខុសធម្មតា ពោលគឺវែងជាងជិត 10 ដង បើធៀបនឹងប្រភេទសត្វកកេរដែលមានទំហំប្រហាក់ប្រហែល។ អ្នកវិទ្យាសាស្ត្រខាងលើ កាលពីឆ្នាំ 2020 បានរកឃើញហ្សែនមួយដែលរួមចំណែកក្នុងការជួយឱ្យវារស់បានយូរ។ ហ្សែននេះទទួលបន្ទុកផលិតអាស៊ីត HMW-HA ដែលជាម៉ូលេគុលជួយបង្កើនកម្លាំងរបស់កោសិកាក្នុងការទប់ទល់នឹងភាពតានតឹង និងរលាក ឆ្លងរោគ។

កណ្ដុរគ្មានរោម (Naked mole-rat) ដែលមានឈ្មោះក្នុងវិទ្យាសាស្ត្រថា Heterocephalus glaber

កណ្ដុរគ្មានរោមនេះមាន HMW-HA ច្រើនជាងប្រហែល 10 ដង បើធៀបនឹងមនុស្ស ឬប្រភេទកណ្ដុរដទៃ។ មូលហេតុគឺថា ហ្សែន (ហ្សែន hyaluronan synthase 2) ដែលបង្កើតម៉ូលេគុលនេះ នៅលើកណ្ដុរខាងលើ បានបង្ហាញភាពខ្លាំងក្លាជាងបណ្ដាសត្វដទៃ។

ក្នុងការស្រាវជ្រាវថ្មីនេះ ក្រុមអ្នកវិទ្យាសាស្ត្ររកឃើញថា បណ្ដាកណ្ដុរដែលមានហ្សែនរបស់កណ្ដុរគ្មានរោម Heterocephalus glaber មានសមត្ថភាពខ្ពស់ក្នុងការទប់ទល់នឹងជំងឺមហារីកស្បែក សុខភាពទូទៅត្រូវបានកែលំអ និងរស់បានយូរជាង 4.4% បើធៀបនឹងបណ្ដាប្រភេទកណ្ដុរធម្មតាដែលកើតដំណាលគ្នា។

ការរកឃើញថ្មីនេះត្រូវបានរំពឹងថា នឹងបើកផ្លូវសម្រាប់ការស្វែងរកវិធីដែលអាចជួយឱ្យមនុស្សមានសុខភាពល្អ ពន្យារភាពក្មេង និងរស់បានយូរជាងបច្ចុប្បន្ន នាពេលអនាគត៕

August 26, 2023

រោងចក្រវារីអគ្គិសនីផ្ទុកថាមពលកម្លាំង 2.8 ជីហ្គាវ៉ាត់ចាប់ផ្ដើមការសាងសង់

ប្រទេសចិនចាប់ផ្ដើមអនុវត្តគម្រោងផលិតអគ្គិសនីនេះនៅសៀងហៃ ដែលអាចបង្កើនផលិតភាពខ្ពស់ជាងមុន នៅសមុទ្រខ្សាច់ Gobi និងខ្ពង់រាបទីបី។

គម្រោងដែលបានចាប់ផ្ដើមកាលពីថ្ងៃទី 06 សីហា 2023 គឺដើម្បីសាងសង់រោងចក្រវារីអគ្គិសនីផ្ទុកថាមពលធំជាងគេនៅខេត្តសៀងហៃ។ តាមផែនការ គម្រោងនេះមានសមត្ថភាពផលិតអគ្គិសនី 2.8 ជីហ្គាវ៉ាត់ (GW) បន្ទាប់ពីដាក់ឱ្យដំណើរការពេញលេញ។

រោងចក្រនេះមានបឹងផ្ទុកទឹកចំនួនពីរដែលដើរតួនាទីដូចទៅនឹងថ្មផ្ទុកថាមពលអគ្គិសនី ដោយការទម្លាក់ទឹកពីបឹងខ្ពស់ចុះមកកាន់បឹងទាបដើម្បីផលិតអគ្គិសនីនៅពេលមានតម្រូវការខ្ពស់ និងបូមទឹកពីបឹងទាបត្រលប់ទៅកាន់បឹងខ្ពស់វិញដោយប្រើប្រាស់អគ្គិសនីកកើតឡើងវិញនៅពេលមានតម្រូវការទាប។

អគ្គនាយកដ្ឋានថាមពលចិន (NEA) ឱ្យដឹងថា ប្រទេសចិនផ្ដល់អាទិភាពឱ្យវិស័យវារីអគ្គិសនីផ្ទុកថាមពលដូចខាងលើ ដើម្បីចូលរួមចំណែកជួយឱ្យប្រទេសចិនសម្រេចគោលដៅមិនបំភាយឧស្ម័ននាពេលខាងមុខ៕

August 12, 2023

ដំណើរក្លាយជាតារា Idol នៅ Kpop មិនមែនជារឿងធម្មតាឡើយ

ក្មេងជាច្រើននៅកូរ៉េខាងត្បូង ក្លាយជាអ្នកហាត់ការពេលមានវ័យទើបតែ 10 ឆ្នាំ និងចំណាយប្រហែល 10 ឆ្នាំក្នុងការហាត់ច្រៀង រាំ នៅមុនពេលបង្ហាញខ្លួនក្នុងក្រុមចម្រៀង។

«ដើម្បីក្លាយជា idol Kpop ដែលជោគជ័យ អ្នកត្រូវតែជាមនុស្សក្លាហាន មានចំណូលចិត្តខ្ពស់ មានវិន័យ និងសំណាង» Patti Sunio ឱ្យដឹងនៅលើ SCMP ដែលនិយាយអំពីដំណើរក្លាយជា idol ម្នាក់។

ជាដំបូង កុមារដែលមានទេពកោសល្យត្រូវតែចុះកិច្ចសន្យាធ្វើជាអ្នកហាត់ការរបស់ក្រុមហ៊ុនមួយ។ យោងតាម Koreaboo ក្មេងជាច្រើននៅកូរ៉េខាងត្បូងបានជាប់ក្នុងការជ្រើសរើសតាំងពីអាយុ 10 ឆ្នាំ ដោយពួកគេចូលរួមការសម្ដែងសាកល្បងជាមធ្យម 30 លើក មុនពេលចុះកិច្ចសន្យាហាត់ការ។ តាមនិន្នាការសកលរបស់វិស័យឧស្សាហកម្ម Kpop បណ្ដាក្រុមអ្នកវិនិយោគបានពង្រីកដំណើរការជ្រើសរើសអ្នកហាក់ការនៅក្នុងក្របខណ្ឌទូទាំងសកលលោក ផ្ដល់ឱកាសដល់ក្មេងនៅប្រទេសដទៃក្រៅពីកូរ៉េខាងត្បូង។

ក្មេងជាច្រើននៅកូរ៉េខាងត្បូងបានជាប់ក្នុងការជ្រើសរើសតាំងពីអាយុ 10 ឆ្នាំ

Lisa របស់ក្រុម Blackpink គឺជាឧទាហរណ៍មួយសម្រាប់ប្រការខាងលើ។ នាងគឺជាមនុស្សតែម្នាក់គត់ដែលឆ្លងផុតការជ្រើសរើសរបស់ក្រុមហ៊ុនកម្សាន្ត YG នៅប្រទេសថៃ ហើយជាអ្នកហាត់ការជនជាតិបរទេសដំបូងដែលបង្ហាញវត្តមាននៅ YG។ ក្រៅពីសម្ពាធនៃការហ្វឹកហាត់ ក្មេងបរទេសក៏ត្រូវតែឆ្លងកាត់រនាំងភាសា វប្បធម៌ ដើម្បីសម្របខ្លួន។ បណ្ដាក្រុមហ៊ុនគ្រប់គ្រងនឹងទទួលខុសត្រូវលើការចំណាយទាំងអស់របស់អ្នកហាត់ការ។ ខ្ទង់ប្រាក់ចំណាយជាមធ្យមសម្រាប់អ្នកហាត់ការម្នាក់នៅ Kpop គឺប្រហែល 50,000 ដុល្លារ/ឆ្នាំ។

ការធ្វើជាអ្នកហាត់ការគ្រាន់តែជាជំហានដំបូងនៅក្នុងការបើកផ្លូវសម្រាប់ដំណើរដ៏វែងឆ្ងាយ និងប្រកបដោយឧបសគ្គ មុននឹងអាចក្លាយជា idol ម្នាក់។ ក្នុងអំឡុងហាត់ការដែលមានរយៈពេលជាមធ្យម 7 ឆ្នាំ ក្រុមហ៊ុនគ្រប់គ្រងនឹងវាយតម្លៃលើជំនាញ សមត្ថភាពសម្របខ្លួននៅក្នុងក្រុម និងការស៊ូទ្រាំនឹងសម្ពាធរបស់អ្នកហាក់ការម្នាក់ៗ។ ក្រៅពីសំឡេងច្រៀង ក្បាច់រាំ ពួកគេក៏ត្រូវរៀនភាសាបរទេស វិធីសាស្ត្រគ្រប់គ្រងរូបភាព ការឆ្លើយក្នុងកិច្ចសម្ភាស ទំនាក់ទំនងជាមួយមិត្តរួមអាជីព និងការរក្សាទម្ងន់រាងកាយជាដើម។ ជាងនេះ ក្រុមហ៊ុនជាច្រើនក៏ស្នើឱ្យអ្នកហាត់ការសន្យាថាមិនប្រើប្រាស់គ្រឿងញៀន ផឹកគ្រឿងស្រវឹងនៅពេលបើកបរ និងចៀសវាងរឿងអាស្រូវស្នេហាផងដែរ។ Euny Hong អ្នកយកព័ត៌មានអាម៉េរិកដើមកំណើតកូរ៉េខាងត្បូង បានសរសេរលើ The Paris Review ថា «ការបណ្ដុះបណ្ដាលតារា Kpop គឺជាការអប់រំមនុស្សដ៏ពេញលេញ»។

កាលជ្រើសរើសបេក្ខភាពសម្រាប់តំណែងអ្នកហាត់ការរបស់ SM Entertainment នៅជប៉ុន កាលពីឆ្នាំ 2019

កំពូលតារា Kpop ជាច្រើន បានចំណាយស្ទើរពេញមួយយុវវ័យដើម្បីធ្វើជាអ្នកហាត់ការ និងរកឱកាសដើម្បីបង្ហាញខ្លួន។ G-Dragon របស់ Bigbang បានឆ្លងកាត់ការបណ្ដុះបណ្ដាល 11 ឆ្នាំ ក្នុងនោះ 5 ឆ្នាំនៅ SM Entertainment និង 6 ឆ្នាំនៅ YG។ Idol Kpop ជាច្រើនរូបផ្សេងទៀតក៏ធ្លាប់បានឆ្លងកាត់ប្រហាក់ប្រហែលនេះ ក្នុងនោះមានដូចជា Jihyo (TWICE, 10 ឆ្នាំ), Heo Chan Mi (10 ឆ្នាំ), Jennie (Blackpink, 6 ឆ្នាំ), Suho (EXO, 6 ឆ្នាំ)។

ពេលធ្វើជាគណៈកម្មការនៃកម្មវិធី Idol Producer តារាចម្រៀង Lay (EXO) បានបង្ហើបអំពីដំណើរការប្រកួតប្រជែងមុនពេលបានបង្ហាញខ្លួនជាមួយក្រុមថា ក្នុង 120 នាក់ ពួកគេរើសយកតែ 100 នាក់ ហើយបន្តជម្រុះរាប់សិបនាក់ទៀត ដើម្បីយក 24 នាក់។ ចាប់ពី 24 នាក់ ពួកគេក៏ជ្រើសរើស 12 នាក់ចុងក្រោយ។ រៀងរាល់សប្ដាហ៍សុទ្ធតែមានអ្នកហាត់ការម្នាក់ត្រូវចាកចេញ»។

បើទោះជាបង្ហាញខ្លួនក្នុងរូបភាពដ៏អស្ចារ្យ ប៉ុន្តែ idol ជាច្រើននៅ Kpop រកប្រាក់ចំណូលមិនបានច្រើនដូចទស្សនិកជនគិតនោះឡើយ។ ទំព័រ Seoulspace បានផ្សាយថា ក្រុមហ៊ុនកន្សាន្តជាច្រើនយកប្រាក់ចំណូលរហូតដល់ 90% ហើយទុកតែ 10% ប៉ុណ្ណោះសម្រាប់តារាម្នាក់ៗ។ សម្រាប់ក្រុមដែលមានសមាជិក 20 នាក់ដូច NCT ជាដើម នឹងទទួលបានប្រាក់ចំណូលកាន់តែទាប។ នេះមិនទាន់និយាយដល់រឿងបង់ពន្ធជូនរដ្ឋនៅឡើយ៕

Jennie (Blackpink) កាលនៅជាអ្នកហាត់ការ

August 7, 2023

តេឡេស្កុបវិទ្យុធំជាងគេលើពិភពលោក មានរ៉ូបូតឆ្លាតវៃជួយថែទាំការពារ

ប្រព័ន្ធរ៉ូបូតឆ្លាតវៃដែលផលិតឡើងដោយក្រុមវិស្វករចិន បានឆ្លងផុតដំណាក់កាលធ្វើតេស្តសម្រាប់បេសកកម្មថែទាំតេឡេស្កុបវិទ្យុខ្នាតយក្ស ដែលមានដ្យាក្រាម 500 ម៉ែត្រ (FAST)។

តេឡេស្កុបវិទ្យុធំជាងគេលើពិភពលោក FAST គឺជាគម្រោងដែលដឹកនាំដោយស្ថានីយសង្កេតតារាដោយរលកវិទ្យុ Guizhou និងមានការចូលរួមពីស្ថាប័នដទៃចំនួន 10។ FAST ស្ថិតនៅលើជ្រលងភ្នំជ្រៅ និងមូល ក្នុងខេត្ត Guizhou ភាគនិរតីប្រទេសចិន។ តេឡេស្កុបនេះមានតំបន់ចាប់រលកសញ្ញាធំដែលស្មើនឹងទីលានបាល់ទាត់ស្ដង់ដាចំនួន 30 បូកចូលគ្នា។

ការថែទាំគឺជាភារកិច្ចសំខាន់ដើម្បីធានានូវសមត្ថភាព ស្ថិរភាពសម្រាប់ការសង្កេតរបស់ FAST។ បណ្ដារ៉ូបូតអាចបំពេញការងារទាំងឡាយដែលមានហានិភ័យគ្រោះថ្នាក់ខ្ពស់ ហើយមនុស្សមិនអាចធ្វើបាន មានជាអាទិ៍ ការងារប្ដូរឧបករណ៍បច្ចេកវិទ្យា និងការងារសម្អាតជាដើម ដោយសារតែវាធ្វើការមិនរើសទីកន្លែង និងពេលវេលា។

យោងតាមលោក Jiang Peng ដែលជាប្រធានក្រុមវិស្វកររបស់គម្រោង FAST រ៉ូបូតឆ្លាតវៃខាងលើនឹងជួយបង្កើនពេលវេលានៃការសង្កេតប្រចាំឆ្នាំរបស់ FAST បាន 30 ថ្ងៃបន្ថែមទៀត៕

August 7, 2023

OPPO Reno10 5G តម្លៃ $399 | Reno10 Pro 5G តម្លៃ $569 បានដាក់សម្ពោធជាផ្លូវការយ៉ាងកក្រើកនៅប្រទេសកម្ពុជា

នាល្ងាចថ្ងៃទី 6 ខែសីហា ឆ្នាំ 2023 ក្រុមហ៊ុនស្មាតហ្វូន OPPO ដ៏ធំប្រចាំប្រទេសកម្ពុជាបានបង្ហាញខ្លួនយ៉ាងអធឹកអធមក្នុង «កម្មវិធីសម្ពោធជាផ្លូវការ OPPO Reno10 Series 5G» ដោយមានវត្តមានភ្ញៀវកិត្តិយសជាច្រើនរូប ពិសេសគឺ ព្រះនាងតូច ជេនណា នរោត្តម ជាមួយនឹងវត្តមានទូតសុច្ឆន្ទៈប្រចាំក្រុមហ៊ុន OPPO ទាំង 3 រូបគឺ ពេជ្រ វត្តីសារ៉ាវឌ្ឍី, ថេណា និងកញ្ញា រ៉េត ស៊ូហ្សាណាព្រមទាំងតារាប្រុសស្រីល្បីៗជាច្រើនរូបទៀតដែលបានអញ្ជើញចូលរួមយ៉ាងច្រើននៅក្នុងកម្មវិធីនេះផងដែរ។

នេះជាមហាកិត្តិយសដ៏ធំក្រៃលែងដែលព្រះនាងតូច ជេនណា នរោត្តម បានផ្តល់វត្តមានជាភ្ញៀវកិត្តិយស ចូលរួមបកស្រាយចម្រៀងយ៉ាងពិរោះរណ្តំ ព្រមទាំងផ្តល់កិត្តិយសក្នុងការប្រកាសតម្លៃរបស់ស្មាតហ្វូនស៊េរីថ្មីជូនដល់ក្រុមហ៊ុន OPPO ផងដែរ ។ ចំណែកតារាចម្រៀង Original Song លោក ថេណា និង កញ្ញា រ៉េត ស៊ូហ្សាណា ក៏បានច្រៀងចម្រៀងថ្មីៗព្រមទាំងចែករំលែកបទពិសោធពីការប្រើប្រាស់នូវស្មាតហ្វូន OPPO Reno10 Series 5G ផងដែរ។ រីឯបវរកញ្ញា ពេជ្រ វត្តីសារ៉ាវឌ្ឍី បានដើរបង្ហាញម៉ូដជាមួយនឹងទូរស័ព្ទស៊េរីថ្មី OPPO Reno10 Series 5G យ៉ាងទាក់ទាញជាមួយនឹងសម្លេងហ៊ោគាំទ្រពេញសាលកម្មវិធីផងដែរ។ មិនតែប៉ុណ្ណោះ ក្នុងនោះក៏ឃើញមានវត្តមានបវរកញ្ញាដែលជា Top3 ក្នុងកម្មវិធី Miss Pre-Teen ដើរម៉ូដយ៉ាងស្រស់ស្អាតផងដែរ។

ក្រុមហ៊ុន OPPO បានដាក់សម្ពោធនូវស្មាតហ្វូន 2 ម៉ូដែលគឺ OPPO Reno10 5G និង Reno10 Pro 5G ដែល កញ្ញា ងួន ភួងទេពសុនិច ជាតួនាទីជា Product Manager បានឡើងធ្វើបទបង្ហាញអំពីមុខងារ អត្ថប្រយោជន៍ សមត្ថភាព និងភាពឈ្លាសវៃរបស់ស្មាតហ្វូនទាំង 2 ម៉ូដែលនេះផងដែរ។

សម្រាប់ OPPO Reno10 5G បានបំពាក់នូវប្រព័ន្ធកាមេរ៉ា Portrait ដ៏ពេញលេញជាមួយលែន Telephoto Portrait ទំហំ 32MP បំពាក់នូវសេនស័រ Flagship របស់ SONY IMX709 ដែលអាចថតរូប Portrait បានហើយអាច Zoom បានទៀតជាមួយបច្ចេកវិទ្យា 2X Optical Zoom និង Digital Zoom ដល់ទៅ 20X ។ OPPO Reno10 5G ក៏បានបំពាក់នូវបច្ចេកវិទ្យាសាកថ្មល្បឿនលឿន 67W SUPERVOOC សាកពេញ 100% ប្រើពេលត្រឹមតែ 47នាទីតែប៉ុណ្ណោះ បន្ថែមពីសាកថ្មលឿនហើយទំហំថ្មក៏ធំដែររហូតដល់ 5000mAh។ មិនតែប៉ុណ្ណោះ បើនិយាយពី Spec អេក្រង់វិញគឺកាន់តែអេម ដោយបំពាក់មកនូវអេក្រង់កោង 3D កម្រិតកំពូលជាមួយ Refresh Rate 120Hz អូសដោយមិនទាក់ និងទើសចិត្តឡើយជាមួយអេក្រង់ធំដល់ទៅ 6.7Inch AMOLED។ បើក្រឡេកទៅមើលការឌីហ្សាញវិញប្រកបដោយភាពប្រណីត និងទាន់សម័យដោយផ្តល់នូវជម្រើស 2 ពណ៌គឺ Ice Blue និង Silvery Grey។

ចំណែក OPPO Reno10 Pro 5G នាំមកជូនជាមួយជម្រើស 2 ពណ៌គឺ Glossy Purple រចនាឡើងដោយកញ្ចក់ថ្លារលោង ជាមួយពណ៌ស្វាយបែប Premium និងមួយពណ៌ទៀតគឺ Silvery Grey ដែលរចនាបែប OPPO Glow ជាមួយនឹងអេក្រង់កោងបែប 3D ដូចទៅនឹង OPPO Reno10 5G ដែរ។ អ្វីដែលគួរឲ្យចាប់អារម្មណ៍នោះគឺ OPPO Reno10 Pro 5G បានប្រើប្រាស់សេនស័រ SONY ទាំងអស់ដែលផ្តល់ឲ្យការថតរូបទាំងនៅលើកាមេរ៉ាមុខនិងក្រោយច្បាស់គ្រប់ពេលវេលាប្រៀបដូចប្រើកាមេរ៉ាអាជីព។ រីឯថាមពលថ្មទំហំ 4600mAh និងកម្លាំងសាកថ្មលឿនរហូតដល់ 80W SUPERVOOC សាកពេញ 100% ក្នុងពេលត្រឹមតែ 28នាទីប៉ុណ្ណោះ។ បន្ថែមពីនេះ វាមានសមត្ថភាពប្រតិបត្តិការកាន់តែប្រសើរ ជាមួយនឹងឈីបគ្រប់គ្រងថាមពល SUPERVOOC S ផ្តាច់មុខនិងដំបូងនៅលើ OPPO ផងដែរ។ បើនិយាយពីកម្លាំងប្រតិបត្តិការវិញបំពាក់ជាមួយឈីប Qualcomm ® Snapdragon 778 5G ដ៏ល្បីល្បាញទទួលស្គាល់លើកម្លាំងប្រតិបត្តិការលើពិភពលោក។

ជាមួយនឹងតម្លៃកាន់តែពិសេស! កក់ទុកមុននូវសមាជិកថ្មីរបស់ OPPO Reno10 Series 5G ទាំងពីរម៉ូដែល Reno10 5G តម្លៃ $399 | Reno10 Pro 5G តម្លៃ $569 ចាប់ពីថ្ងៃទី 7 រហូតដល់ថ្ងៃទី 12 ខែសីហា ឆ្នាំ2023 មានការថែមជូនកាដូតម្លៃ $182 រួមមាន៖ បណ្ណធានាអេក្រង់រយៈពេល1ឆ្នាំ តម្លៃ$89, កាតាបដ៏ស្រស់ស្អាត តម្លៃ$39 និងស៊ីមស្មាតលេខពិសេស Bronze តម្លៃ $54 ភ្ជាប់គម្រោង SurfLikeCrazy រយៈពេល 6ខែ។ តោះចាំអីទៀត!

តម្លៃកាន់តែពិសេស! ស្មាតហ្វូន OPPO Reno10 Series 5G ទទួលកក់ចាប់ពីថ្ងៃទី 7 រហូតដល់ថ្ងៃទី 12 សីហា ដើម្បីទទួលបានកាដូពិសេសៗជាច្រើន

August 7, 2023

ត្រូវហូឡង់ផ្ដួលក្នុងលទ្ធផល 0-7 វៀតណាមទទួលស្គាល់ថា «កម្លាំងចិត្តមិនឈ្នះសមត្ថភាព»

(នូវែលសេឡង់) – បន្ទាប់ពីត្រូវក្រុមបាល់ទាត់នារីជម្រើសជាតិហូឡង់ផ្ដួលដោយលទ្ធផល 0-7 នៅជើងចុងក្រោយនៃពូល E នៅរសៀងថ្ងៃទី 01 សីហានេះ គ្រូបង្វឹករបស់វៀតណាមបានទទួលស្គាល់ថា ស្មារតីតែមួយមុខគឺមិនគ្រប់គ្រាន់សម្រាប់ក្រុមវៀតណាមបង្ហាញថ្វីជើងនៅ World Cup នារីឆ្នាំ 2023។

ក្រុមបាល់ទាត់នារីជម្រើសជាតិហូឡង់ គ្រប់គ្រងបាល់បាន 73% និងទាត់ផ្ដាច់បានច្រើនជាងក្រុមវៀតណាមដល់ទៅ 9 ដង ពេលប្រកួតលើទីលាន Forsyth Barr នាថ្ងៃនេះ។ សំណាញ់ទីរបស់វៀតណាមអាចត្រូវរងគ្រាប់បាល់ច្រើនជាងលទ្ធផលដែលបានធ្វើឡើង បើសិនក្រុមកីឡាការិនីហូឡង់ប្រើប្រាស់ឱកាសបានល្អជាងនេះ។

«សមត្ថភាពរបស់វៀតណាមមិនអាចយកទៅប្រៀបស្មើនឹងគេបាន ហើយយើងត្រូវនិយាយថា កម្លាំងមិនដូចចិត្ត។ ក្រុមកីឡាការិនីបានប្រកួតដោយស្មារតីខ្ពស់ ប៉ុន្តែមិនអាចប៉ះប៉ូវសមត្ថភាព ហើយការចាញ់គឺជារឿងស័ក្ដិសម» គ្រូបង្វឹករបស់វៀតណាម លោក Mai Duc Chung ទទួលស្គាល់បន្ទាប់ពីវៀតណាមចាញ់ហូឡង់ 0-7 នៅជើងចុងក្រោយរបស់ពូល E នៅ World Cup នារីឆ្នាំ 2023 នាថ្ងៃទី 01 សីហានេះ។

មុននោះ នៅក្នុងការប្រកួតជើងដំបូងនៅ World Cup នារីរដូវកាលនេះ ក្រុមវៀតណាមក៏បានចាញ់ក្រុមអាម៉េរិក 0-3 រួចហើយក៏បន្តចាញ់ព័រទុយហ្គាល់ 0-2 ទៀត។ ក្រោយបីប្រកួតនេះ វៀតណាមស្ថិតនៅបាតតារាងចំណាត់ថ្នាក់របស់ពូល E ដោយចាញ់ 12 គ្រាប់ និងមិនបានឈ្នះសូម្បីតែមួយគ្រាប់៕

August 1, 2023

អាម៉េរិកផ្ដល់បន្ថែមមីស៊ីល «មានប្រសិទ្ធភាព 100%» ឱ្យអ៊ុយក្រែន

សហរដ្ឋអាម៉េរិកប្រកាសអំពីការផ្ដល់បន្ថែមប្រព័ន្ធការពារដែនអាកាស NASAMS ដែលពួកគេអះអាងថា «វាយស្ទាក់បានជោគជ័យ 100%» ប្រឆាំងនឹងមីស៊ីលរុស្ស៊ី ទៅឱ្យអ៊ុយក្រែន នៅក្នុងកញ្ចប់ជំនួយថ្មី។

មន្ទីរបញ្ចកោណ កាលពីថ្ងៃទី 19 កក្កដា បានប្រកាសអំពីកញ្ចប់ជំនួយផ្នែកយោធាថ្មី តម្លៃ 1.3 ពាន់លានដុល្លារ ហើយថា នេះគឺជាមួយផ្នែកនៃកិច្ចប្រឹងប្រែងរបស់អាម៉េរិក ដើម្បីឆ្លើយតបនឹងតម្រូវការបន្ទាន់របស់ទីក្រុងកៀវ ដោយការសន្យាថា កសាងសមត្ថភាពសំខាន់ៗនៅក្នុងរយៈពេលខ្លី ទន្ទឹមនឹងការបង្កើនសមត្ថភាពយូរអង្វែងដល់កងទ័ពអ៊ុយក្រែន។

អាវុធដែលលេចធ្លោជាងគេនៅក្នុងកញ្ចប់ជំនួយថ្មីនេះ គឺប្រព័ន្ធមីស៊ីលការពារដែនអាកាសទំនើប NASAMS រួមនឹងគ្រាប់មីស៊ីល។ ការផ្ដល់អាវុធលើកនេះ ធ្វើឱ្យចំនួនប្រព័ន្ធមីស៊ីល NASAMS ដែលអាម៉េរិកផ្ដល់ឱ្យអ៊ុយក្រែន កើនឡើងដល់ 12 ប្រព័ន្ធ។

រដ្ឋមន្ត្រីការពារជាតិអាម៉េរិក Lloyd Austin កាលពីខែវិច្ឆិកា 2022 បានប្រកាសថា ប្រព័ន្ធមីស៊ីល NASAMS «សម្រេចបានអត្រាជោគជ័យ 100% នៅក្នុងការស្ទាក់វាយមីស៊ីលរុស្ស៊ី»។ នេះគឺជាប្រព័ន្ធការពារដែនអាកាសអចល័តតែមួយប្រភេទគត់ដែលត្រូវបានដាក់ពង្រាយនៅលើទឹកដីអាម៉េរិក ដើម្បីការពាររដ្ឋធានីវ៉ាស៊ីងតោន និងបណ្ដាតំបន់សំខាន់ៗរបស់ប្រទេសនេះ។

កញ្ចប់ជំនួយខាងលើនេះក៏បានធ្វើឱ្យជំនួយសរុបនៅក្នុងផ្នែកយោធាដែលអាម៉េរិកបានផ្ដល់ឱ្យអ៊ុយក្រែន កើនឡើងដល់ជាង 40 ពាន់លានដុល្លារ បន្ទាប់ពីរុស្ស៊ីចូលឈ្លានពានអ៊ុយក្រែនចាប់ពីខែកុម្ភៈ 2022 រហូតដល់បច្ចុប្បន្ន៕

July 20, 2023

កប៉ាល់ទេសចរណ៍ខ្នាតយក្សផលិតក្នុងស្រុកដំបូងរបស់ចិន ចាប់ផ្ដើមដំណើរការ

កប៉ាល់ទេសចរណ៍ខ្នាតយក្ស ប្រវែង 323.6 ម៉ែត្រ ដែលត្រូវបានប្រដូចទៅនឹងទីក្រុងអណ្ដែតចល័ត បានចាប់ផ្ដើមធ្វើដំណើរជើងដំបូងនៅលើសមុទ្រ ដែលនឹងចំណាយពេល 9 ថ្ងៃ។

កប៉ាល់ទេសចរណ៍ខ្នាតយក្សដំបូងដែលផលិតដោយវិស្វករក្នុងស្រុករបស់ប្រទេសចិន បានចាកចេញពីកំពង់ផែនៅសៀងហៃកាលពីថ្ងៃទី 17 កក្កដា ដើម្បីចាប់ផ្ដើមដំណើរការសាកល្បង។ កប៉ាល់ដែលមានឈ្មោះថា Adora Magic City (H1508) នេះ នឹងបរលើផ្ទៃសមុទ្រចំនួន 9 ថ្ងៃ។ នេះបើតាមទំព័រ CGTN ដកស្រង់ព័ត៌មានពីក្រុមហ៊ុនផលិតកប៉ាល់សៀងហៃ Waigaoqiao។

ដោយមានបណ្ដោយ 323.6 ម៉ែត្រ ទទឹង 37.2 ម៉ែត្រ និងទម្ងន់ 135,500 តោន កប៉ាល់ Adora Magic City អាចដាក់មនុស្សបានជាង 6,500 នាក់ នៅក្នុងកាប៊ីនចំនួន 2,826។ កប៉ាល់នេះត្រូវបានគេប្រដូចទៅនឹងទីក្រុងអណ្ដែតលើសមុទ្រ ព្រោះតែមានកន្លែងកម្សាន្តជាច្រើន។ Adora Magic City មានសាលមហោចស្រព ភោជនីយដ្ឋាន មជ្ឈមណ្ឌលពាណិជ្ជកម្ម សួនទឹក និងច្រករបៀងសិល្បៈ។ល។

ជោគជ័យក្នុងការសាងសង់កប៉ាល់ Adora Magic City នេះ បានជួយឱ្យចិនក្លាយជាប្រទេសទីប្រាំលើពិភពលោក ដែលមានសមត្ថភាពស្ថាបនាកប៉ាល់ទេសចរណ៍ខ្នាតយក្ស បន្ទាប់ពីប្រទេសអាល្លឺម៉ង់ បារាំង អ៊ីតាលី និងហ្វាំងឡង់៕

July 20, 2023

អាម៉េរិកអនុម័តលក់មីស៊ីលបាញ់លើអាកាស តម្លៃជិតបីពាន់លានដុល្លារឱ្យអាល្លឺម៉ង់

ក្រសួងការបរទេសអាម៉េរិក បានយល់ព្រមលក់មីស៊ីលអាកាសប្រឆាំងអាកាសខ្នាតមធ្យម AMRAAM ជិត 1,000 ដើម ក្នុងតម្លៃ 2.9 ពាន់លានដុល្លារ ដល់ប្រទេសអាល្លឺម៉ង់។

មន្ទីរបញ្ចកោណ កាលពីថ្ងៃទី 19 កក្កដា បានប្រកាសថា ក្រសួងការបរទេសអាម៉េរិកបានអនុញ្ញាតឱ្យលក់មីស៊ីលបាញ់ពីអាកាសទៅអាកាសប្រភេទមធ្យម AIM-120C-8 AMRAAM ចំនួន 969 ដើម រួមនឹងប្រព័ន្ធបញ្ជាបម្រុង រូបមន្តនៃការហ្វឹកហាត់ ឧបករណ៍បច្ចេកទេស និងជំនួយផ្នែកហ្វឹកហ្វឺន ក្នុងតម្លៃ 2.9 ពាន់លានដុល្លារ ទៅឱ្យប្រទេសអាល្លឺម៉ង់។

«ការលក់អាវុធនេះនឹងជួយគាំទ្រដល់គោលនយោបាយការបរទេស និងសន្តិសុខជាតិរបស់សហរដ្ឋអាម៉េរិក តាមរយៈការកែលំអសន្តិសុខសម្រាប់សម្ព័ន្ធមិត្តមួយនៅក្នុងណាតូ ហើយក៏ជាប្រទេសដែលដើរតួនាទីសំខាន់នៅក្នុងការរក្សាស្ថិរភាពនយោបាយ និងសេដ្ឋកិច្ចអឺរ៉ុប» ប្រកាសរបស់ក្រសួងការពារជាតិអាម៉េរិក មានឃ្លាសរសេរដូច្នេះ។

យោងតាមមន្ទីរបញ្ចកោណ ការទិញដូរអាវុធនេះនឹងជួយឱ្យអាល្លឺម៉ង់មានអាវុធប្រឆាំងអាកាសទំនើប លើកកម្ពស់សមត្ថភាពទប់ទល់នឹងការគំរាមកំហែងនាបច្ចុប្បន្ន និងអនាគត។

ការលក់អាវុធខាងលើក៏ត្រូវបានជូនដំណឹងដល់សភាអាម៉េរិក ជាទីដែលស្ថាប័ននេះមានពេលវេលា 30 ថ្ងៃ ដើម្បីធ្វើការសម្រេចចិត្តថា ត្រូវយល់ព្រមឱ្យលក់ ឬបដិសេធ។ បើសិនទទួលបានការយល់ព្រមពីសភា ការលក់អាវុធនេះនឹងត្រូវបញ្ជូនឡើងទៅកាន់ប្រធានាធិបតី ចូ បៃដិន ដើម្បីចុះហត្ថលេខាចុងក្រោយ។

បុគ្គលិកយោធាអាម៉េរិក កំពុងដំឡើងមីស៊ីល AMRAAM

AIM-120 AMRAAM គឺជាមីស៊ីលម្ចាស់ការដែលនាំផ្លូវដោយរ៉ាដា អាចធ្វើសកម្មភាពនៅក្នុងលក្ខខណ្ឌអាកាសធាតុខុសៗគ្នា។ ក្បាលរ៉ាដាបំពាក់បច្ចេកវិទ្យាម្ចាស់ការ អនុញ្ញាតឱ្យមីស៊ីលអនុវត្តគោលការណ៍ «បាញ់ ហើយភ្លេច» ដែលជួយឱ្យយន្តហោះមិនចាំបាច់ចុចតម្រង់គោលដៅជាបន្តបន្ទាប់ និងគេចផុតពីការបាញ់តបតពីសត្រូវ។

កំណែដើម AIM-120A អាចបាញ់បានចម្ងាយ 50 គីឡូម៉ែត្រ គ្រាដែលកំណែ AIM-120C-8 របស់ AMRAAM អាចបាញ់ចំគោលដៅពីចម្ងាយ 180 គីឡូម៉ែត្រ។

ក្រុមហ៊ុនការពារជាតិ Raytheon ឱ្យដឹងថា មីស៊ីល AMRAAM កំពុងត្រូវបានដាក់ឱ្យប្រើប្រាស់នៅក្នុងជួរកងទ័ពអាម៉េរិក និងប្រទេសជិត 40 ក្នុងពិភពលោក៕

July 20, 2023

Tag: សមត្ថភាព