មាន - La Reine Media

ទង្វើប្រកបដោយហិង្សាធ្វើឱ្យកីឡាការិនីអង់គ្លេសត្រូវបានប្រដូចទៅនឹង Beckham និង Rooney

សកម្មភាពបាត់បង់ការគ្រប់គ្រងរបស់កីឡាការិនី Lauren James ក្នុងវគ្គ 1/8 នៅ World Cup នារី 2023 ធ្វើឱ្យគេនឹកឃើញដល់ករណីដូចគ្នានេះដែលបានកើតឡើងជាមួយនឹងកីឡាករ Wayne Rooney និង David Beckham របស់អង់គ្លេស។

នៅនាទីទី 85 ក្នុងការប្រកួតរវាងក្រុមបាល់ទាត់នារីនីហ្សេរីយ៉ា និងអង់គ្លេសកាលពីដើមសប្ដាហ៍នេះ Lauren James មិនអាចគ្រប់គ្រងអារម្មណ៍បាន នៅពេលដើរជាន់ពីលើដងខ្លួនរបស់ Michelle Alozie។ ដំបូងឡើយ អាជ្ញាកណ្ដាលមិនបានឃើញ ប៉ុន្តែសកម្មភាពនេះត្រូវបាន VAR រកឃើញ នាំឱ្យខ្សែប្រយុទ្ធវ័យ 21 ឆ្នាំ ត្រូវទទួលកាតក្រហម។

សកម្មភាពនេះធ្វើឱ្យសារព័ត៌មាន និងអ្នកលេងបណ្ដាញសង្គមនៅអង់គ្លេស នាំគ្នាប្រៀបប្រដួចទៅនឹងករណីបង្កកំហុសឆ្គងរបស់ Wayne Rooney និង David Beckham កាលពីអតីតកាល។

David Beckham (អាវស) និង Diego Simeone នៅ World Cup 1998 ក្នុងការប្រកួតរវាងអង់គ្លេស និងអាហ្សង់ទីន

នៅក្នុងវគ្គ ¼ នៃ World Cup 1998 ដែលពេលនោះ Beckham មានអាយុ 23 ឆ្នាំ ត្រូវទទួលកាតក្រហម បន្ទាប់ពីបញ្ចេញកាយវិការសងសឹកនឹង Diego Simeone នៅក្នុងការប្រកួតរវាងអង់គ្លេស និងអាហ្សង់ទីន។ មកដល់វគ្គ ¼ នៃ World Cup 2006 Wayne Rooney អាយុ 21 ឆ្នាំ ក៏ត្រូវបានបញ្ឈប់ការប្រកួត បន្ទាប់ពីយកជើងជាន់ពីលើ Ricardo Carvalho របស់ព័រទុយហ្កាល់។

Wayne Rooney (អាវស) និង Ricardo Carvalho

កំហុសឆ្គងទាំងបីខាងលើនេះ មានចំណុចដូចគ្នាជាច្រើន ក្នុងនោះមានដូចជា ពួកគេគឺជាកីឡាករឆ្នើមកំពុងមានឈ្មោះល្បីជាងគេនៅអង់គ្លេស ដែលឆ្លងកាត់ករណីមិនអាចគ្រប់គ្រងអារម្មណ៍ ពេលក្រុមជម្រើសជាតិកំពុងប្រកួតក្នុងវគ្គជម្រុះផ្ទាល់នៅ World Cup។ ទន្ទឹមនឹងនេះ ក្រុមអង់គ្លេសក៏សុទ្ធតែត្រូវប្រកួតទាត់ប៉េណាំងទីម្ដងម្នាក់នៅក្នុងបីប្រកួតខាងលើ។ ប៉ុន្តែ កីឡាការិនី Lauren James មានសំណាងល្អជាង នៅពេលក្រុមនារីជម្រើសជាតិអង់គ្លេសបានយកឈ្នះលើនីហ្សេរីយ៉ា ចំណែក Beckham និង Rooney បានក្លាយជាកីឡាករមានកំហុសរបស់អង់គ្លេស បន្ទាប់ពីការប្រកួតបានបញ្ចប់។

នៅ World Cup នារី 2023 Lauren James រកបាន 3 គ្រាប់ និងបង្កឱកាសបាន 3 គ្រាប់ ក្នុងចំណោម 8 គ្រាប់របស់ក្រុមនារីអង់គ្លេស។ គ្រូបង្វឹកក្រុមនារីអង់គ្លេស Sarina Wiegman ឱ្យដឹងថា Lauren James បានធ្វើការសូមអភ័យទោសចំពោះករណីដែលនាងបានបង្កឡើង៕

August 9, 2023

យានអវកាសអឺរ៉ុបរកឃើញតម្រុយទាក់ទងនឹង «ភាពចម្លែកខុសគេ» នៃបរិយាកាសព្រះអាទិត្យ

យានអវកាសមួយគ្រឿងដែលកំពុងតែធ្វើសកម្មភាពជុំវិញព្រះអាទិត្យ បានរកឃើញចម្លើយសម្រាប់សំណួរដែលសួរថា «តើព្រះអាទិត្យគឺជាវត្ថុអវកាសដែលខុសគេក្នុងចំណោមតារានៅក្នុងចក្រវាល?»។

ច្រើនទសវត្សរ៍កន្លង ក្រុមអ្នកវិទ្យាសាស្ត្របានដឹងថា ព្រះអាទិត្យហាក់បីដូចជាខុសពីគេ ធៀបនឹងផ្កាយនានាដែលធ្លាប់ត្រូវបានសង្កេត។ ព្រះអាទិត្យបានបំបែករាល់ទម្រង់ស្ដីពីផ្កាយ ព្រោះវាមានបរិយាកាសដែលក្ដៅមិនសមហេតុផល។

សីតុណ្ហភាពក្នុងបរិយាកាសខាងលើរបស់ព្រះអាទិត្យ (ស្រទាប់កូរ៉ូណា – corona) អាចឡើងដល់ជាង 1.1 លានអង្សាសេ ស្របពេលដែលតំបន់ហ្វូតូសហ្វៀ (Photosphere) ដែលជាស្រទាប់លើបំផុតរបស់ព្រះអាទិត្យដែលនៅខាងក្រោម និងមានចម្ងាយ 1,600 គីឡូម៉ែត្រពីបរិយាកាសកូរ៉ូណា បែរជាមានកម្ដៅត្រឹមតែ 5,500 អង្សាសេទៅវិញ។

តាមធម្មតា បរិយាកាសរបស់ផ្កាយមួយដួងត្រូវបានដុតកម្ដៅដោយសារប្រតិកម្មនុយក្លេអែរនៅខាងក្នុងស្នូលរបស់វា។ ដូច្នេះ ស្រទាប់បរិយាកាសខាងលើរបស់ផ្កាយ មិនអាចមានកម្ដៅខ្ពស់ជាង 200 ដង ធៀបនឹងស្រទាប់ខាងក្រោមឡើយ។ ស្រទាប់បរិយាកាសកូរ៉ូណារបស់ផ្កាយ គួរណាស់តែត្រូវត្រជាក់ជាងស្រទាប់ហ្វូតូសហ្វៀ។

ប្រការនេះបង្ហាញថា នៅមានអ្វីមួយដែលមនុស្សមិនទាន់ដឹង កំពុងតែដុតកម្ដៅផ្កាយមេរបស់ផែនដី។ នោះជាសំណួរដែលមិនមានចម្លើយនៅក្នុងរយៈពេល 80 ឆ្នាំកន្លង។

ថ្មីៗនេះ យានអវកាសព្រះអាទិត្យ (SO) របស់ទីភ្នាក់ងារអវកាសអឺរ៉ុប (ESA) បានរកឃើញអ្វីមួយយ៉ាងចម្លែក៖ រលកម៉េញេទិចប្រេកង់ខ្ពស់ ដែលភាយពាសពេញស្រទាប់បរិយាកាសកូរ៉ូណា។

ពីតំបន់ដែលមានចម្ងាយ 42 គីឡូម៉ែត្រពីព្រះអាទិត្យ យាន SO បានប្រើប្រាស់តេឡេស្កុប EUI របស់បែលហ្ស៊ិក ដើម្បីថតយករូបភាពស្រទាប់បរិយាកាសខាងលើរបស់ព្រះអាទិត្យ ជាមួយនឹងកម្រិតភាពច្បាស់ខ្ពស់មិនធ្លាប់មាន។ ហើយពួកគេក៏បានឃើញរលកម៉ាញេទិចតូចៗដែលសាយភាយកាត់តាមពន្លឺប្លាស្មាក្នុងស្រទាប់បរិយាកាសដ៏ក្ដៅនេះ។

អ្នកវិទ្យាសាស្ត្រក៏បន្តវិភាគលើការស្រាវជ្រាវកន្លង និងបានដឹងថា ទម្រង់រលកម៉ាញេទិចប្រេកង់ខ្ពស់ដែលកើតឡើងដដែលៗក្នុងល្បឿនលឿន អាចដុតកម្ដៅស្រទាប់បរិយាកាសកូរ៉ូណារបស់ព្រះអាទិត្យក្នុងកម្រិតខ្ពស់គួរឱ្យកត់សម្គាល់។

ក៏ប៉ុន្តែ អ្វីដែលបានរកឃើញនេះមិនទាន់គ្រប់គ្រាន់នៅឡើយ។ អ្នកវិទ្យាសាស្ត្រកំពុងតែបន្តស្វែងរកចម្លើយដែល «ក្បោះក្បាយ» ជាងនេះ ដើម្បីយល់ច្បាស់អំពីរបៀបដែលស្រទាប់បរិយាកាសកូរ៉ូណារបស់ព្រះអាទិត្យត្រូវបានដុតកម្ដៅ និងបង្កើតបានជាបរិយាកាសព្រះអាទិត្យដែលមានលក្ខណៈខុសគេបែបនេះ៕

August 9, 2023

សូមប្រយ័ត្នពេលទិញថ្នាំស៊ីរ៉ូព្យាបាលផ្ដាសាយ-ក្អកឱ្យកូនលេប

អង្គការសុខភាពពិភពលោក (WHO) បានព្រមានអំពីថ្នាំស៊ីរ៉ូព្យាបាលជំងឺផ្ដាសាយ Cold Out ដែលកំពុងត្រូវបានដាក់លក់ក្នុងទីផ្សារ ពិសេសគឺនៅប្រទេសអ៊ីរ៉ាក់ ដោយសារមានផ្ទុកជាតិពុលក្នុងកម្រិតខ្ពស់។

កាលពីថ្ងៃទី 07 សីហា WHO បានឱ្យដឹងថា ថ្នាំស៊ីរ៉ូក្អកកំពុងដាក់លក់នៅអ៊ីរ៉ាក់ ដែលបន្ទប់ពិសោធន៍ Fourrts នៅប្រទេសឥណ្ឌា ផលិតឱ្យក្រុមហ៊ុន Dabilife Pharma មានផ្ទុកសារធាតុពុលកម្រិតខ្ពស់។ ជាក់ស្ដែង ទំនិញនេះមានផ្ទុក diethylene glycol 0.25% និង ethylene glycol 2.1% ខណៈបរិមាណសុវត្ថិភាពដែលត្រូវបានអនុញ្ញាតសម្រាប់សារធាតុទាំងពីរនេះគឺ 0.1%។ WHO បន្ថែមថា អ្នកផលិត និងអ្នកចែកចាយមិនអាចធានាអំពីសុវត្ថិភាព និងគុណភាពរបស់ផលិតផល។

នេះគឺជាសេចក្ដីប្រកាសថ្មីបំផុតនៅក្នុងការព្រមានជាច្រើនដែលត្រូវបានស្ថាប័នសុខាភិបាលរបស់អង្គការសហប្រជាជាតិលើកឡើងអំពីប្រភេទថ្នាំគុណភាពទាបដែលនាំចេញពីប្រទេសឥណ្ឌា និងត្រូវបានដាក់លក់លើពិភពលោក។ មុននោះ មានថ្នាំស៊ីរ៉ូយ៉ាងតិច 5 ប្រភេទ ស្ថិតក្នុងការស៊ើបអង្កេត ដោយមានជាប់ទាក់ទងនឹងក្រុមហ៊ុនផលិតនៅឥណ្ឌា។

Propylene glycol មិនពុល ប៉ុន្តែ diethylene glycol (DEG) និង Ethylene glycol (EG) គឺមានពិតជាគ្រោះថ្នាក់ខ្លាំង។ អ្នកស្រាវជ្រាវអះអាងថា ពេលចូលដល់ក្នុងរាងកាយ ពួកវានឹងធ្វើឱ្យខ្សោយតម្រងនោម និងស្លាប់ បើសិនមិនបានព្យាបាលទាន់ពេល។ បរិមាណដែលអាចបង្កឱ្យស្លាប់គឺអាស្រ័យលើទម្ងន់របស់រាងកាយ។ ក្មេងតូចងាយរងគ្រោះជាងមនុស្សធំ៕

August 8, 2023

បើមានមនុស្សស្លាប់ក្នុងទីអវកាស តើនឹងមានរឿងអ្វីកើតឡើង ហើយត្រូវដោះស្រាយយ៉ាងណា?

វិធីចាត់ចែងសាកសពនៅពេលមានមនុស្សស្លាប់ក្នុងទីអវកាស គឺអាស្រ័យលើគម្លាតជាមួយនឹងផែនដី រួមនឹងកត្តាជាច្រើនផ្សេងទៀត។

ចាប់តាំងពីមនុស្សលោកបានចាប់ផ្ដើមស្រាវជ្រាវទីអវកាសកាលពីជាង 60 ឆ្នាំមុន មកដល់បច្ចុប្បន្នមានមនុស្សចំនួន 20 នាក់បានបាត់បង់ជីវិត រួមមាន 14 នាក់នៅក្នុងគ្រោះថ្នាក់យាន Space Shuttle របស់ណាសា ក្នុងឆ្នាំ 1986, 3 នាក់ក្នុងបេសកកម្ម Soyuz 11 កាលពីឆ្នាំ 1971 និង 3 នាក់ក្នុងហេតុការណ៍ឆេះប្រព័ន្ធបាញ់បង្ហោះរ៉ុក្កែត Apollo 1 ក្នុងឆ្នាំ 1967។

ក្នុងគ្រាដែលណាសាកំពុងមានគម្រោងនាំមនុស្សឡើងទៅកាន់ឋានព្រះចន្ទក្នុងឆ្នាំ 2025 និងភពអង្គារក្នុងទសវត្សរ៍ក្រោយ បូករួមនឹងការរីកចម្រើននៃវិស័យទេសចរណ៍អវកាស ដែលអាចនឹងមានមនុស្សកាន់តែច្រើនធ្វើដំណើរទៅកាន់ទីអវកាស ក៏មានសំណួរមួយត្រូវបានលើកឡើង នោះគឺថា «បើមានមនុស្សស្លាប់ក្នុងទីអវកាស តើនឹងមានរឿងអ្វីកើតឡើងចំពោះសាកសព?»។

ទាក់ទងនឹងសំណួរខាងលើ Emmanuel Urquieta សាស្ត្រាចារ្យវេជ្ជសាស្ត្រអវកាស និងវេជ្ជសាស្ត្របន្ទាន់នៅសាកលវិទ្យាល័យ Baylor ជាអ្នកជំនាញក្នុងការសិក្សាស្រាវជ្រាវរកវិធីសាស្ត្រថែទាំសុខភាពសម្រាប់អ្នកអវកាស បានបង្ហើបឱ្យដឹងអំពីវិធីដោះស្រាយករណីបែបនេះ។

បើសិនមានមនុស្សស្លាប់ក្នុងបេសកកម្មនៅលើគន្លងតារាវិថីកម្រិតទាបរបស់ផែនដី ដូចនៅក្នុងស្ថានីយអវកាសអន្តរជាតិ (ISS) ជាដើម ក្រុមអវកាសចរអាចដាក់សាកសពក្នុងកាប៊ីនយានអវកាស និងនាំត្រលប់មកកាន់ផែនដីក្នុងរយៈពេលតែប៉ុន្មានម៉ោងប៉ុណ្ណោះ។ ដូច្នេះ ករណីបែបនេះនឹងមិនចោទជាបញ្ហាធំឡើងសម្រាប់សាកសព។

ស្ថានការណ៍នឹងខុសគ្នា បើសិនមានអវកាសចរស្លាប់ក្នុងដំណើរទៅកាន់ភពអង្គារដែលមានចម្ងាយជិត 483 លានគីឡូម៉ែត្រពីផែនដី។ ក្នុងករណីនេះ ក្រុមហោះហើរនឹងមិនអាចត្រលប់មកកាន់ផែនដី រួចក៏បន្តធ្វើដំណើរទៅកាន់ភពអង្គារទៀតបានទេ។ ជំនួសមកវិញ សាកសពទំនងជានឹងត្រូវត្រលប់មកកាន់ផែនដីជាមួយនឹងក្រុមហោះហើរនៅចុងបញ្ចប់នៃបេសកកម្ម ពោលគឺប្រហែលពីរឆ្នាំក្រោយ។ ក្រុមហោះហើរនឹងរក្សាសាកសពក្នុងកាប៊ីនដោយឡែក ឬក្នុងថង់សម្រាប់ដាក់សាកសព។ តាមទ្រឹស្ដី សីតុណ្ហភាព និងសំណើមក្នុងយានអវកាស នឹងជួយរក្សាសាកសពមិនឱ្យរលួយ។

ក៏ប៉ុន្តែ វិធីសាស្ត្រខាងលើអនុវត្តបានសម្រាប់តែមនុស្សដែលបានស្លាប់ក្នុងបរិស្ថានដែលមានសម្ពាធបរិយាកាសល្អដូចនៅក្នុងស្ថានីយអវកាសប៉ុណ្ណោះ។ បើសិនមានមនុស្សស្លាប់លើដីភពអង្គារ ការបូជាសពដោយការដុតគឺជារឿងពិបាក ដោយសារក្រុមហោះហើរត្រូវការថាមពលដើម្បីធ្វើកិច្ចការចាំបាច់ដទៃ។ ចំណែកការបញ្ចុះសពវិញក៏មិនមែនជាគំនិតល្អ ព្រោះថា បាក់តេរី និងមេរោគជាច្រើនក្នុងរាងកាយសាកសព អាចបំពុលបរិស្ថានរបស់ដីនៅភពអង្គារ។ ជំនួសមកវិញ ក្រុមអវកាសចរប្រហែលជាត្រូវរក្សាសាកសពក្នុងថង់ មុននឹងនាំយកមកកាន់ផែនដី៕

August 8, 2023

Elon Musk ថា ប្រហែលជាអាចត្រូវវ៉ះកាត់មុនប្រយុទ្ធជាមួយនឹងម្ចាស់ Facebook

មហាសេដ្ឋី Elon Musk ឱ្យដឹងថា មិនទាន់ជ្រើសយកកាលបរិច្ឆេទសម្រាប់ការប្រកួតប្រដាល់ជាមួយនឹងម្ចាស់ Facebook ដោយសារតែត្រូវពិនិត្យសុខភាព ហើយប្រហែលជាត្រូវវះកាត់ផងក៏មិនដឹង។

ការឆ្លើយតបនេះត្រូវបានម្ចាស់ក្រុមហ៊ុន Tesla លើកឡើងកាលពីថ្ងៃទី 07 សីហា ក្រោយពីមហាសេដ្ឋី Mark Zuckerberg «រអ៊ូរទាំ» លើបណ្ដាញសង្គម Threads ស្ដីពីរឿងមិនទាន់ទទួលបានចម្លើយពីលោក Elon Musk បើទោះបានណាត់ប្រកួតនៅថ្ងៃទី 26 សីហា។

«ថ្ងៃផ្លូវការអាចនឹងផ្លាស់ប្ដូរ» លោក Musk ឆ្លើយតបនៅលើបណ្ដាញសង្គម X (មុននោះគឺ Twitter) យ៉ាងដូច្នេះ។

មូលហេតុដែលត្រូវបានលោក Musk លើកឡើង គឺថា លោកត្រូវទៅថត MRI ត្រង់ក និងខ្នង ហើយអាចនឹងត្រូវតម្រូវឱ្យធ្វើការវះកាត់ មុនពេលការប្រកួតមកដល់។ លទ្ធផលនៃការពិនិត្យសុខភាពរបស់លោក Musk គ្រោងនឹងមាននៅសប្ដាហ៍នេះ។

នេះមិនមែនជាលើកដំបូងទេ ដែលលោក Musk លើកឡើងអំពីបញ្ហាឆ្អឹងរបស់គាត់។ កាលពីខែមីនាឆ្នាំកន្លង ក្នុង tweet ដែលលោកនិយាយជាមួយស្ថាបនិក Binance លោក Changpeng Zhao លោក Musk ក៏ធ្លាប់បានបង្ហោះរូបថត និងប្រាប់ថា ការប្រកួតជាមួយអ្នកកីឡាករ sumo បានបណ្ដាលឱ្យលោកជួបបញ្ហាឈឺខ្នង 8 ឆ្នាំកន្លង។

ក្រោយពីលោក Elon Musk បានបង្ហោះសារទាក់ទងនឹងបញ្ហាសុខភាពខាងលើ ភាគហ៊ុនរបស់ Tesla ក៏បានធ្លាក់ថ្លៃអស់ 2%។

ការបបួលប្រយុទ្ធលើសង្វៀនរវាងម្ចាស់បណ្ដាញសង្គមធំៗលើពិភពលោកនេះ ត្រូវបានលើកឡើងកាលពីចុងខែមិថុនា ឆ្នាំ 2023 នៅពេលលោក Musk រិះគន់ចំពោះរឿង Meta បង្ហាញបណ្ដាញសង្គម Threads។ អ្នកលេងបណ្ដាញសង្គមម្នាក់ព្រមានថា មិនគួរគំរាមកំហែង Zuckerberg ព្រោះថា គាត់ចេះក្បាច់គុន។ សំណេរនេះ ភ្លាមនោះក៏ធ្វើឱ្យលោក Musk បបួលប្រយុទ្ធគ្នា ហើយ Zuckerberg ក៏បានយល់ព្រមយ៉ាងលឿន។

យោងតាម Dana White ប្រធានស្ថាប័នក្បាច់គុន UFC ដែលធ្លាប់បានជជែកជាមួយលោក Musk និង Zuckerberg និយាយថា មហាសេដ្ឋីទាំងពីររូបនេះសុទ្ធតែបង្ហាញភាពម៉ឺងម៉ាត់។ ការប្រកួតនេះត្រូវបានគេរំពឹងថា អាចរកប្រាក់ចំណូលបានលើសពីមួយពាន់លានដុល្លារអាម៉េរិក៕

August 8, 2023

យានអវកាស Voyager 1 និង 2 នឹងហោះឆ្ពោះទៅណា បន្ទាប់ពីចប់ភារកិច្ច?

ប្រព័ន្ធដែលមិនមែនជាឧបករណ៍បច្ចេកទេសនៅលើយានអវកាស Voyager 1 និង Voyager 2 ត្រូវបានបិទខ្លះហើយ ដោយសង្ឃឹមថា នឹងជួយឱ្យពួកវាធ្វើសកម្មភាពរហូតដល់ឆ្នាំ 2030 ហើយក្រោយមក ពួកវាអាចនឹងដាច់ទំនាក់ទំនងជាមួយផែនដី។

យានអវកាស Voyager 1 និង 2 របស់ណាសា ដែលត្រូវបានបាញ់បង្ហោះមុនក្រោយគ្នា 16 ថ្ងៃ ក្នុងឆ្នាំ 1977 ត្រូវបានរចនាឡើងដើម្បីអាចបំពេញបេសកកម្មបាន 5 ឆ្នាំ។ យានមួយគូនេះបានសិក្សាស្រាវជ្រាវភពព្រហស្បតិ៍ ភពសៅរ៍ ភពអ៊ុយរ៉ានុស ភពណេបទូន និងព្រះចន្ទជាច្រើនទៀត។

ក៏ប៉ុន្តែ ក្រោយធ្វើសកម្មភាពបានជិត 46 ឆ្នាំ មកដល់ពេលនេះ យានអវកាសមួយគូនេះបង្កើតបានកំណត់ត្រាដ៏អស្ចារ្យ នៅពេលបានហោះឆ្លងផុតព្រំដែននៃតំបន់ឥទ្ធិពលរបស់ព្រះអាទិត្យ។ ពួកវានៅតែបន្តបញ្ជូនទិន្នន័យមកកាន់ផែនដី បើទោះស្ថិតក្នុងបរិស្ថានអន្តរតារា ដែលជាតំបន់អាថ៌កំបាំងនៅចន្លោះផ្កាយនានា។ ទោះជាពេលខ្លះជួបបញ្ហាបច្ចេកទេស ដាច់ទំនាក់ទងនឹងផែនដី ប៉ុន្តែដំណើរហោះហើរក្នុងទីអវកាសរបស់ពួកវា ទំនងជាអាចបន្តទៅមុខយូរទៀត។ នេះបើតាម Business Insider ចុះផ្សាយកាលពីថ្ងៃទី 04 សីហា។

ណាសាផលិតយាន Voyager គឺដើម្បីស្រាវជ្រាវផ្នែកខាងក្រៅរបស់ប្រព័ន្ធព្រះអាទិត្យ។ ក្រោយពីចប់បេសកកម្មសំខាន់ ពួកវាបន្តហោះហើរផ្សងព្រេងក្នុងកាឡាក់ស៊ីមីលគីវ៉េ និងថតបានទិដ្ឋភាពចក្រវាលដ៏សែនអស្ចារ្យ។

កាលពីថ្ងៃទី 14 កុម្ភៈ 1990 Voyager 1 ថតបានរូបភាព «Pale Blue Dot» (ចំណុចពណ៌ខៀវ) ពីចម្ងាយ 6.4 ពាន់លានគីឡូម៉ែត្រ។ នោះគឺជារូបភាពនិមិត្តរូប និងជារូបថតឆ្ងាយបំផុតស្ដីពីផែនដី។

ក្នុងទសវត្សរ៍កន្លង Voyager 1 បានស្រាវជ្រាវតំបន់អន្តរតារា ជាទីដែលមានធូលី ឧស្ម័ន និងគ្រាប់ដែលមានផ្ទុកអគ្គិសនីយ៉ាងក្រាស់។ Voyager 2 បានទៅដល់តំបន់អន្តរតារាក្នុងឆ្នាំ 2018 ក្រោយ Voyager 1 6 ឆ្នាំ។ ការស្រាវជ្រាវរបស់ពួកវាទាក់ទងនឹងឧស្ម័ននៅតំបន់អន្តរតារា បានជួយឱ្យក្រុមតារាវិទូយល់ដឹងអំពីទីអវកាសដ៏អាថ៌កំបាំងនេះ។

នៅក្នុងគន្លាតប្រហែល 23.8 ពាន់លានគីឡូម៉ែត្រពីផែនដី Voyager 1 កំពុងហោះហើរក្នុងបរិស្ថានអន្តរតារាដ៏ងងឹត។ វាគឺជាយានអវកាសរបស់មនុស្សដែលបានហោះទៅឆ្ងាយពីផែនដីបំផុត។ ដោយសារតែហោះក្នុងទិសដៅផ្សេងគ្នា ដូច្នេះ Voyager 2 បច្ចុប្បន្នមានគម្លាតពីផែនដីប្រហែល 19.8 ពាន់លានគីឡូម៉ែត្រ។

ប៉ុន្មានឆ្នាំមកនេះ ដោយមានការប្រឹងប្រែងដើម្បីគ្រប់គ្រងថាមពល ក្រុមវិស្វករបានបិទប្រព័ន្ធមួយចំនួនដែលមិនមែនជាឧបករណ៍បច្ចេកទេសនៅលើយានទាំងពីរនេះ ក្នុងនោះមានដូចជាប្រព័ន្ធកម្ដៅសម្រាប់ឧបករណ៍វិទ្យាសាស្ត្រជាដើម ដោយសង្ឃឹមថា ពួកវាអាចនឹងបំពេញភារកិច្ចបានដល់ឆ្នាំ 2030។ បន្ទាប់ពីនោះ ពួកវាទំនងជាអស់លទ្ធភាពក្នុងការរក្សាទំនាក់ទំនងជាមួយផែនដី។

ក៏ប៉ុន្តែ ក្រោយពីអស់ថាមពល Voyager នឹងនៅតែបន្តហោះហើរអណ្ដែតត្រសែតក្នុងតំបន់អន្តរតារា។ ណាសាឱ្យដឹងថា ប្រហែល 300 ឆ្នាំទៀត Voyager 1 នឹងហោះចូលដល់ពពក Oort ជាតំបន់ដែលមានរូបរាងមូលនៅខាងក្រៅគន្លងគោចររបស់ភពភ្លុយតូ និងមានផ្ទុកផ្កាយដុះកន្ទុយត្រជាក់ចំនួនរាប់ពាន់លានដុំ។ Voyager នឹងត្រូវចំណាយពេល 30,000 ឆ្នាំទៀតដើម្បីហោះទៅដល់ចំណុចចុងក្រោយបង្អស់របស់ពពក Oort និងប្រហែល 40,000 ឆ្នាំទៀតដើម្បីទៅដល់ AC+ 79 3888 ជាផ្កាយមួយដួងដែលស្ថិតក្នុងកញ្ចុំផ្កាយ Camelopardalis។

ចំណែក Voyager 2 វិញ ប្រហែល 296,000 ឆ្នាំទៀត នឹងហោះឆ្លងកាត់ Sirius ជាផ្កាយមួយដួងដែលភ្លឺជាងគេក្នុងរាត្រីនៅលើផែនដី។ ណាសាឱ្យដឹងថា យាន Voyager ប្រហែលជាហោះអណ្ដែតត្រសែតជារៀងរហូតនៅក្នុងកាឡាក់ស៊ីមីលគីវ៉េ៕

August 8, 2023

ដំណើរក្លាយជាតារា Idol នៅ Kpop មិនមែនជារឿងធម្មតាឡើយ

ក្មេងជាច្រើននៅកូរ៉េខាងត្បូង ក្លាយជាអ្នកហាត់ការពេលមានវ័យទើបតែ 10 ឆ្នាំ និងចំណាយប្រហែល 10 ឆ្នាំក្នុងការហាត់ច្រៀង រាំ នៅមុនពេលបង្ហាញខ្លួនក្នុងក្រុមចម្រៀង។

«ដើម្បីក្លាយជា idol Kpop ដែលជោគជ័យ អ្នកត្រូវតែជាមនុស្សក្លាហាន មានចំណូលចិត្តខ្ពស់ មានវិន័យ និងសំណាង» Patti Sunio ឱ្យដឹងនៅលើ SCMP ដែលនិយាយអំពីដំណើរក្លាយជា idol ម្នាក់។

ជាដំបូង កុមារដែលមានទេពកោសល្យត្រូវតែចុះកិច្ចសន្យាធ្វើជាអ្នកហាត់ការរបស់ក្រុមហ៊ុនមួយ។ យោងតាម Koreaboo ក្មេងជាច្រើននៅកូរ៉េខាងត្បូងបានជាប់ក្នុងការជ្រើសរើសតាំងពីអាយុ 10 ឆ្នាំ ដោយពួកគេចូលរួមការសម្ដែងសាកល្បងជាមធ្យម 30 លើក មុនពេលចុះកិច្ចសន្យាហាត់ការ។ តាមនិន្នាការសកលរបស់វិស័យឧស្សាហកម្ម Kpop បណ្ដាក្រុមអ្នកវិនិយោគបានពង្រីកដំណើរការជ្រើសរើសអ្នកហាក់ការនៅក្នុងក្របខណ្ឌទូទាំងសកលលោក ផ្ដល់ឱកាសដល់ក្មេងនៅប្រទេសដទៃក្រៅពីកូរ៉េខាងត្បូង។

ក្មេងជាច្រើននៅកូរ៉េខាងត្បូងបានជាប់ក្នុងការជ្រើសរើសតាំងពីអាយុ 10 ឆ្នាំ

Lisa របស់ក្រុម Blackpink គឺជាឧទាហរណ៍មួយសម្រាប់ប្រការខាងលើ។ នាងគឺជាមនុស្សតែម្នាក់គត់ដែលឆ្លងផុតការជ្រើសរើសរបស់ក្រុមហ៊ុនកម្សាន្ត YG នៅប្រទេសថៃ ហើយជាអ្នកហាត់ការជនជាតិបរទេសដំបូងដែលបង្ហាញវត្តមាននៅ YG។ ក្រៅពីសម្ពាធនៃការហ្វឹកហាត់ ក្មេងបរទេសក៏ត្រូវតែឆ្លងកាត់រនាំងភាសា វប្បធម៌ ដើម្បីសម្របខ្លួន។ បណ្ដាក្រុមហ៊ុនគ្រប់គ្រងនឹងទទួលខុសត្រូវលើការចំណាយទាំងអស់របស់អ្នកហាត់ការ។ ខ្ទង់ប្រាក់ចំណាយជាមធ្យមសម្រាប់អ្នកហាត់ការម្នាក់នៅ Kpop គឺប្រហែល 50,000 ដុល្លារ/ឆ្នាំ។

ការធ្វើជាអ្នកហាត់ការគ្រាន់តែជាជំហានដំបូងនៅក្នុងការបើកផ្លូវសម្រាប់ដំណើរដ៏វែងឆ្ងាយ និងប្រកបដោយឧបសគ្គ មុននឹងអាចក្លាយជា idol ម្នាក់។ ក្នុងអំឡុងហាត់ការដែលមានរយៈពេលជាមធ្យម 7 ឆ្នាំ ក្រុមហ៊ុនគ្រប់គ្រងនឹងវាយតម្លៃលើជំនាញ សមត្ថភាពសម្របខ្លួននៅក្នុងក្រុម និងការស៊ូទ្រាំនឹងសម្ពាធរបស់អ្នកហាក់ការម្នាក់ៗ។ ក្រៅពីសំឡេងច្រៀង ក្បាច់រាំ ពួកគេក៏ត្រូវរៀនភាសាបរទេស វិធីសាស្ត្រគ្រប់គ្រងរូបភាព ការឆ្លើយក្នុងកិច្ចសម្ភាស ទំនាក់ទំនងជាមួយមិត្តរួមអាជីព និងការរក្សាទម្ងន់រាងកាយជាដើម។ ជាងនេះ ក្រុមហ៊ុនជាច្រើនក៏ស្នើឱ្យអ្នកហាត់ការសន្យាថាមិនប្រើប្រាស់គ្រឿងញៀន ផឹកគ្រឿងស្រវឹងនៅពេលបើកបរ និងចៀសវាងរឿងអាស្រូវស្នេហាផងដែរ។ Euny Hong អ្នកយកព័ត៌មានអាម៉េរិកដើមកំណើតកូរ៉េខាងត្បូង បានសរសេរលើ The Paris Review ថា «ការបណ្ដុះបណ្ដាលតារា Kpop គឺជាការអប់រំមនុស្សដ៏ពេញលេញ»។

កាលជ្រើសរើសបេក្ខភាពសម្រាប់តំណែងអ្នកហាត់ការរបស់ SM Entertainment នៅជប៉ុន កាលពីឆ្នាំ 2019

កំពូលតារា Kpop ជាច្រើន បានចំណាយស្ទើរពេញមួយយុវវ័យដើម្បីធ្វើជាអ្នកហាត់ការ និងរកឱកាសដើម្បីបង្ហាញខ្លួន។ G-Dragon របស់ Bigbang បានឆ្លងកាត់ការបណ្ដុះបណ្ដាល 11 ឆ្នាំ ក្នុងនោះ 5 ឆ្នាំនៅ SM Entertainment និង 6 ឆ្នាំនៅ YG។ Idol Kpop ជាច្រើនរូបផ្សេងទៀតក៏ធ្លាប់បានឆ្លងកាត់ប្រហាក់ប្រហែលនេះ ក្នុងនោះមានដូចជា Jihyo (TWICE, 10 ឆ្នាំ), Heo Chan Mi (10 ឆ្នាំ), Jennie (Blackpink, 6 ឆ្នាំ), Suho (EXO, 6 ឆ្នាំ)។

ពេលធ្វើជាគណៈកម្មការនៃកម្មវិធី Idol Producer តារាចម្រៀង Lay (EXO) បានបង្ហើបអំពីដំណើរការប្រកួតប្រជែងមុនពេលបានបង្ហាញខ្លួនជាមួយក្រុមថា ក្នុង 120 នាក់ ពួកគេរើសយកតែ 100 នាក់ ហើយបន្តជម្រុះរាប់សិបនាក់ទៀត ដើម្បីយក 24 នាក់។ ចាប់ពី 24 នាក់ ពួកគេក៏ជ្រើសរើស 12 នាក់ចុងក្រោយ។ រៀងរាល់សប្ដាហ៍សុទ្ធតែមានអ្នកហាត់ការម្នាក់ត្រូវចាកចេញ»។

បើទោះជាបង្ហាញខ្លួនក្នុងរូបភាពដ៏អស្ចារ្យ ប៉ុន្តែ idol ជាច្រើននៅ Kpop រកប្រាក់ចំណូលមិនបានច្រើនដូចទស្សនិកជនគិតនោះឡើយ។ ទំព័រ Seoulspace បានផ្សាយថា ក្រុមហ៊ុនកន្សាន្តជាច្រើនយកប្រាក់ចំណូលរហូតដល់ 90% ហើយទុកតែ 10% ប៉ុណ្ណោះសម្រាប់តារាម្នាក់ៗ។ សម្រាប់ក្រុមដែលមានសមាជិក 20 នាក់ដូច NCT ជាដើម នឹងទទួលបានប្រាក់ចំណូលកាន់តែទាប។ នេះមិនទាន់និយាយដល់រឿងបង់ពន្ធជូនរដ្ឋនៅឡើយ៕

Jennie (Blackpink) កាលនៅជាអ្នកហាត់ការ

August 7, 2023

ស្ពានផ្លូវដែក – ផ្លូវគោកដែលវែងជាងគេបង្អស់លើពិភពលោក

សសរគោលរបស់ស្ពានផ្លូវដែក – ផ្លូវគោក Xihoumen 3,118 ម៉ែត្រ ដែលស្ថិតនៅចន្លោះកោះពីររបស់ទីក្រុង Zhoushan ខេត្ត Zhejiang ប្រទេសចិន ត្រូវបានចាប់ផ្ដើមសាងសង់ក្រោមទឹក។

Zhoushan ដែលជាទីក្រុងមួយមានកោះយ៉ាងច្រើន ស្ថិតនៅតំបន់ឆ្នេរសមុទ្ររបស់ខេត្ត Zhejiang នៅជាយឈូងសមុទ្រ Hangzhou។ Xihoumen 3,118 ម៉ែត្រ គឺជាស្ពានផ្លូវដែក – ផ្លូវគោកដែលវែងជាងគេបង្អស់លើពិភពលោក តភ្ជាប់កោះ Jintang ជាមួយនឹងកោះ Cezi។ ទាំងគន្លងផ្លូវដែក និងផ្លូវល្បឿនលឿននឹងត្រូវបានសាងសង់លើផ្ទៃតែមួយ។ ផ្លូវដែកពីរគន្លងដែលត្រូវបានរចនាឡើងដើម្បីអាចធ្វើដំណើរបានក្នុងល្បឿន 250 គីឡូម៉ែត្រ/ម៉ោង ស្ថិតនៅកណ្ដាល និងផ្លូវល្បឿនលឿន 6 គន្លងនៅសងខាង។

ដោយមានផ្ទៃដែលមានទទឹងប្រវែង 68 ម៉ែត្រ នេះក៏ជាស្ពានឆ្លងសមុទ្រដែលមានទទឹងវែងជាងគេលើពិភពលោកផងដែរ។

ផ្នែកសំខាន់ៗរបស់ស្ពាននេះនឹងត្រូវបានសាងសង់រួចរាល់នៅឆ្នាំ 2028។ ដោយមានផ្លូវដែកល្បឿនលឿនរត់នៅលើកោះ ពេលវេលាសម្រាប់ការធ្វើដំណើរពីទីក្រុង Hangzhou ខេត្ត Zhejiang ទៅកាន់ទីក្រុង Zhoushan នឹងកាត់បន្ថយមកត្រឹមប្រហែលមួយម៉ោងប៉ុណ្ណោះ។

August 7, 2023

ការប្រយុទ្ធគ្នារវាង Musk និង Zuckerberg អាចកើតឡើងនៅមុនដំណាច់ខែនេះ

មហាសេដ្ឋី Elon Musk បានឱ្យដឹងថា ការប្រយុទ្ធគ្នានៅលើសង្វៀនជាមួយនឹង Mark Zuckerberg នឹងត្រូវបានផ្សាយផ្ទាល់លើបណ្ដាញសង្គម X (Twitter) ខណៈដែលម្ចាស់ Facebook បានស្នើឱ្យមានការប្រកួតនៅថ្ងៃទី 26 សីហាខាងមុខ។

កាលពីថ្ងៃទី 06 សីហា លោក Elon Musk បានលើកឡើងអំពីគម្រោងផ្សាយផ្ទាល់ការប្រកួតប្រដាល់ក្នុងទ្រុងដែកនៅលើ X ដែលមុននោះគឺជាបណ្ដាញសង្គម Twitter ហើយថា នឹងយកប្រាក់ទាំងអស់ដែលប្រមូលបាន ទៅជួយដល់អតីតយុទ្ធជន។

លោក Elon Musk និយាយថា កំពុងតែត្រៀមខ្លួនសម្រាប់ការប្រកួត ដោយការហាត់គុន និងលើកដុំដែកជារៀងរាល់ថ្ងៃ។ ដោយសារតែមិនមានពេលច្រើន លោកក៏ត្រូវយកដុំដែកទៅតាមខ្លួនដើម្បីហាត់នៅកន្លែងធ្វើការ។

ការប្រយុទ្ធគ្នារវាងមហាសេដ្ឋីទាំងពីររូបខាងលើ កំពុងត្រូវបានគេទន្ទឹងរង់ចាំ ហើយអាចត្រូវបានចាត់ទុកថាជាការប្រកួតប្រចាំសតវត្សរ៍ បើសិនក្លាយជាការពិត។ CEO របស់ Tesla មិនទាន់ឱ្យដឹងអំពីពេលវេលា ស្របពេលដែល CEO របស់ Meta លោក Mark Zuckerberg បានឆ្លើយតបនៅលើបណ្ដាញសង្គម Threads ថា លោក «ត្រៀមរួចរាល់សម្រាប់ថ្ងៃនេះ»។ ម្ចាស់ Facebook បានឱ្យដឹងថា បានផ្ញើសំណើដែលថា យកថ្ងៃទី 26 សីហា ជាថ្ងៃប្រកួត ប៉ុន្តែម្ចាស់ X មិនទាន់យល់ព្រម។

នៅពេលត្រូវបានសួរអំពីគោលដៅនៃការប្រកួត លោក Elon Musk ឆ្លើយថា នោះគឺជារូបភាពប្រកួតប្រកបដោយភាពថ្លៃថ្នូរ។ «បើសិនធ្វើឡើងក្នុងរយៈពេលខ្លី ខ្ញុំអាចឈ្នះ។ បើយូរ គាត់អាចឈ្នះដោយសារកម្លាំង» លោក Elon Musk បញ្ជាក់បន្ថែមកាលពីយប់ថ្ងៃទី 06 សីហា។

ចំណែក Zuckerberg វិញ និយាយថា មិនបារម្ភបន្ទាប់ពីដឹងថា លោក Musk ហាត់លើកដុំដែក។ ជាងនេះ ម្ចាស់ Facebook ក៏បានលើកឡើងទាក់ទងនឹងដំណឹងដែលថា លោក Musk គ្រោងនឹងប្រើប្រាស់បណ្ដាញសង្គម X ដើម្បីផ្សាយផ្ទាល់។ «យើងគួរជ្រើសរើសបណ្ដាញសង្គមផ្សេងដែលគួរទុកចិត្តបានជាងនេះ ដើម្បីរៃអង្គាសថវិកាសម្រាប់មនុស្សធម៌»។

ការប្រយុទ្ធលើសង្វៀនរវាងម្ចាស់បណ្ដាញសង្គមធំៗលើពិភពលោកនេះ ត្រូវបានលើកឡើងកាលពីចុងខែមិថុនា ឆ្នាំ 2023 នៅពេលលោក Musk រិះគន់ចំពោះរឿង Meta បង្ហាញ Threads។ អ្នកលេងបណ្ដាញសង្គមម្នាក់ព្រមានថា មិនគួរគំរាមកំហែង Zuckerberg ព្រោះថា គាត់ចេះក្បាច់គុន។ សំណេរនេះ ភ្លាមនោះក៏ធ្វើឱ្យលោក Musk បបួលប្រយុទ្ធគ្នា ហើយ Zuckerberg ក៏បានយល់ព្រមយ៉ាងលឿន។

យោងតាម Dana White ប្រធានស្ថាប័នក្បាច់គុន UFC ដែលធ្លាប់បានជជែកជាមួយលោក Musk និង Zuckerberg និយាយថា មហាសេដ្ឋីទាំងពីររូបនេះសុទ្ធតែបង្ហាញភាពម៉ឺងម៉ាត់។ ការប្រកួតនេះត្រូវបានគេរំពឹងថា អាចរកប្រាក់ចំណូលបានលើសពីមួយពាន់លានដុល្លារអាម៉េរិក៕

August 7, 2023

យន្តហោះល្បឿនលឿនជាងសំឡេងរបស់ណាសា ត្រៀមហោះហើរសាកល្បង

យន្តហោះល្បឿនលឿនជាងសំឡេង X-59 ត្រូវបានគេជឿថា នឹងហោះហើរយ៉ាងស្ងាត់នៅលើតំបន់ដីគោក មិនដូចទៅនឹងយន្តហោះ Concorde ដែលលាន់កក្រើកមេឃ។

X-59 QuessT (Quiet SuperSonic Technology) គឺជាយន្តហោះប្រតិកម្មរហ័សកំណែសាកល្បងឆ្ពោះទៅរកការកាត់បន្ថយសំឡេងផ្ទុះដែលកើតឡើងនៅពេលយន្តហោះបំបែករនាំងសំឡេង។ ជំនួសឱ្យការបញ្ចេញសំឡេងលាន់កក្រើកមេឃនៅពេលយន្តហោះធ្វើដំណើរក្នុងល្បឿនលឿនជាងសំឡេង (Mach 1 ឬ 1,235 គីឡូម៉ែត្រ/ម៉ោង) X-59 បញ្ចេញសំឡេងប្រហាក់ប្រហែលនឹងសំឡេងបិទទ្វារឡានប៉ុណ្ណោះ។

ក្រុមហ៊ុន Lockheed Martin ដែលកំពុងអភិវឌ្ឍយន្តហោះប្រតិកម្មគំរូនៅរោងចក្រផលិតយន្តហោះ Skunk Works ក្នុងតំបន់ Palmdale នៃរដ្ឋ California បានចែករំលែកវីដេអូបង្ហាញអំពីទិដ្ឋភាព X-59 ត្រូវបានបើកបរចេញពីឃ្លាំង និងត្រៀមខ្លួនសម្រាប់ការហោះហើរសាកល្បង។ នេះបើតាម Space ចុះផ្សាយកាលពីថ្ងៃទី 04 សីហា។

វីដេអូនេះបង្ហាញរូបរាងពិសេសរបស់ X-59 ដែលមានក្បាលស្រួច ប្រវែង 11.5 ម៉ែត្រ។ យន្តហោះនេះមានប្រព័ន្ធអេក្រង់មើលខាងក្រៅ (XVS) ដែលអនុញ្ញាតឱ្យពីឡុតមើលទិដ្ឋភាពខាងក្រៅតាមរយៈអេក្រង់។

បន្ទាប់ពីដំឡើង X-59 រួចរាល់ ក្រុមការងាររបស់ណាសា និង Lockheed Martin នឹងធ្វើការសាកល្បងនៅលើដី មុនពេលហោះហើរ។ ការហោះហើរសាកល្បងនឹងធ្វើឡើងពីលើតំបន់ដែលមានប្រជាជនរស់នៅ ដើម្បីប្រមូលទិន្នន័យស្ដីពីការប្រតិកម្មរបស់មនុស្សទៅនឹងសំឡេងរបស់ X-59 មុននឹងដាក់ពាក្យស្នើសូមការអនុញ្ញាតពីអាជ្ញាធរ សម្រាប់ការធ្វើពាណិជ្ជកម្មលើយន្តហោះល្បឿនលឿនជាងសំឡេងនេះ។

យន្តហោះនេះមានប្រព័ន្ធអេក្រង់មើលខាងក្រៅ (XVS) ដែលអនុញ្ញាតឱ្យពីឡុតមើលទិដ្ឋភាពខាងក្រៅតាមរយៈអេក្រង់

សកម្មភាពហោះហើរពីលើតំបន់ដីគោកនៅសហរដ្ឋអាម៉េរិក ត្រូវបានហាមឃាត់តាំងពីឆ្នាំ 1973។ ណាសាសង្ឃឹមថា ការអភិវឌ្ឍយន្តហោះល្បឿនលឿនជាងសំឡេងនេះអាចជួយកាត់បន្ថយពេលវេលានៃការហោះហើរក្នុងប្រទេស ចុះមកនៅពាក់កណ្ដាលនាពេលអនាគតដ៏ខ្លីខាងមុខ៕

យន្តហោះល្បឿនលឿនជាងសំឡេង X-59

សំឡេងផ្ទុះដែលកើតឡើងពេលយន្តហោះមានល្បឿនលឿនជាងសំឡេង

August 7, 2023

តេឡេស្កុបវិទ្យុធំជាងគេលើពិភពលោក មានរ៉ូបូតឆ្លាតវៃជួយថែទាំការពារ

ប្រព័ន្ធរ៉ូបូតឆ្លាតវៃដែលផលិតឡើងដោយក្រុមវិស្វករចិន បានឆ្លងផុតដំណាក់កាលធ្វើតេស្តសម្រាប់បេសកកម្មថែទាំតេឡេស្កុបវិទ្យុខ្នាតយក្ស ដែលមានដ្យាក្រាម 500 ម៉ែត្រ (FAST)។

តេឡេស្កុបវិទ្យុធំជាងគេលើពិភពលោក FAST គឺជាគម្រោងដែលដឹកនាំដោយស្ថានីយសង្កេតតារាដោយរលកវិទ្យុ Guizhou និងមានការចូលរួមពីស្ថាប័នដទៃចំនួន 10។ FAST ស្ថិតនៅលើជ្រលងភ្នំជ្រៅ និងមូល ក្នុងខេត្ត Guizhou ភាគនិរតីប្រទេសចិន។ តេឡេស្កុបនេះមានតំបន់ចាប់រលកសញ្ញាធំដែលស្មើនឹងទីលានបាល់ទាត់ស្ដង់ដាចំនួន 30 បូកចូលគ្នា។

ការថែទាំគឺជាភារកិច្ចសំខាន់ដើម្បីធានានូវសមត្ថភាព ស្ថិរភាពសម្រាប់ការសង្កេតរបស់ FAST។ បណ្ដារ៉ូបូតអាចបំពេញការងារទាំងឡាយដែលមានហានិភ័យគ្រោះថ្នាក់ខ្ពស់ ហើយមនុស្សមិនអាចធ្វើបាន មានជាអាទិ៍ ការងារប្ដូរឧបករណ៍បច្ចេកវិទ្យា និងការងារសម្អាតជាដើម ដោយសារតែវាធ្វើការមិនរើសទីកន្លែង និងពេលវេលា។

យោងតាមលោក Jiang Peng ដែលជាប្រធានក្រុមវិស្វកររបស់គម្រោង FAST រ៉ូបូតឆ្លាតវៃខាងលើនឹងជួយបង្កើនពេលវេលានៃការសង្កេតប្រចាំឆ្នាំរបស់ FAST បាន 30 ថ្ងៃបន្ថែមទៀត៕

August 7, 2023

កាត់បន្ថយការចំណាយលើអគ្គិសនីពី 5 ដល់ 10% ដោយទម្លាប់មួយនេះ

យោងតាមក្រសួងថាមពលអាម៉េរិក (DOE) អគ្គិសនីពី 5 ទៅ 10% នេះត្រូវបានប្រើប្រាស់ដោយឧបករណ៍នានាដែលអ្នកមិនប្រើប្រាស់ ឬមិនទាន់ប្រើប្រាស់។

អ្នកប្រហែលជាធ្លាប់បានឃើញពាក្យ «Energy vampires» ជាពាក្យសំដៅលើបណ្ដាឧបករណ៍ដែលនៅតែស៊ីភ្លើង បើទោះអ្នកមិនប្រើប្រាស់ ឬបានបិទចរន្តអគ្គិសនីរួចហើយ ប៉ុន្តែនៅតែភ្ជាប់ជាមួយនឹងប្រភពអគ្គិសនី។

មូលហេតុគឺថា ព្រោះតែពួកវានៅតែបន្តប្រើប្រាស់អគ្គិសនីសម្រាប់អេក្រង់ ឬកូនអំពូលភ្លើងសញ្ញា កុំព្យូទ័រស្ថិតក្នុងរបបដេក (sleep) ឆ្នាំងបញ្ចូលថាមពលដែលបានដកទូរស័ព្ទចេញ បណ្ដាឧបករណ៍បច្ចេកវិទ្យាដែលដំណើរការលាក់ខ្លួន ទូរស័ព្ទលើតុ ឧបករណ៍ឆ្លាតវៃសម្រាប់ប្រើក្នុងផ្ទះដែលអេក្រង់ត្រូវដំណើរការមិនឈប់ ឬតែងតែភ្ជាប់នឹងអ៊ីនធើរណិត។ល។

បរិមាណអគ្គិសនីខាងលើតែងត្រូវបានហៅថា «standby power» (បន្ទុកអគ្គិសនីបម្រុង), «shadow load» (បន្ទុកអគ្គិសនីស្រមោល) ឬហៅថា «vampire power» (ផ្ទុកអគ្គិសនីបីសាច)។ ទាំងនេះនឹងធ្វើឱ្យការចំណាយលើថ្លៃអគ្គិសនីប្រចាំខែរបស់អ្នកកើនឡើង។

ក៏ប៉ុន្តែ បញ្ហាខាងលើអាចដោះស្រាយបាន ដោយអ្នកគ្រាន់តែដកឌុយឧបករណ៍ទាំងឡាយដែលមិនចាំបាច់ ឬមិនប្រើប្រាស់ មិនទាន់ប្រើប្រាស់ ចេញពីព្រីភ្លើង។ យោងតាម DOE បើសិនគ្រួសារមួយដែលមានជីវភាពមធ្យមនៅសហរដ្ឋអាម៉េរិក ធ្វើដូច្នេះ ពួកគេអាចសំច័យប្រាក់បានប្រហែល 100 ដុល្លាររៀងរាល់ឆ្នាំ៕

August 5, 2023

Tag: មាន​

Tag: មាន