មាន - La Reine Media

អ្នកវិទ្យាសាស្ត្រចិនចិញ្ចឹមតម្រងនោមមនុស្សក្នុងអំប៊្រីយ៉ុងជ្រូកបានជោគជ័យ

ជាលើកដំបូងហើយដែលអ្នកវិទ្យាសាស្ត្រមួយក្រុមនៅប្រទេសចិន ចិញ្ចឹមតម្រងនោមមានកោសិកាមនុស្សក្នុងអំប៊្រីយ៉ុងសត្វជ្រូក ដែលនេះត្រូវបានគេរំពឹងថា នឹងក្លាយជាវិធីសាស្ត្រជំនួសនៅក្នុងការវះកាត់ប្ដូរសរីរាង្គរបស់មនុស្ស។

លទ្ធផលនៃការសិក្សាស្រាវជ្រាវរបស់វិទ្យាស្ថានវេជ្ជសាស្ត្រ និងសុខភាពក្វាងចូវ នៃបណ្ឌិត្យសភាវិទ្យាសាស្ត្រចិន ប្រកាសនៅលើទស្សនាវដ្ដី Cell Stem Cell កាលពីថ្ងៃទី 07 កញ្ញា 2023 បានបង្ហាញអំពីសក្ដានុពលនៃការចិញ្ចឹមសរីរាង្គដើម្បីផ្លាស់ប្ដូរ និងសិក្សាស្រាវជ្រាវនៅលើសត្វជ្រូក។ យោងតាម China Science Net នេះគឺជាលើកដំបូងដែលសរីរាង្គរបស់មនុស្សរីកចម្រើននៅខាងក្នុងរាងកាយសត្វដទៃ។

ក្នុងចំណោមអំប៊្រីយ៉ុងជា 1,800 នៅក្នុងការសិក្សាស្រាវជ្រាវខាងលើ មានអំប៊្រីយ៉ុងចំនួន 5 បានរីកចម្រើនប្រកបដោយជោគជ័យ។ អំប៊្រីយ៉ុងទាំងនេះចិញ្ចឹមតម្រងនោមដែលមានផ្ទុកកោសិកាមនុស្សពី 50 ទៅ 60%។ ក្រុមអ្នកវិទ្យាសាស្ត្រប្រើប្រាស់ឧបករណ៍កែសម្រួលហ្សែន CRISPR ដើម្បីចាត់ចែងហ្សែនចំនួនពីរដែលមានតួនាទីគ្រប់គ្រងការវិវត្តរបស់តម្រងនោម និងកាត់បន្ថយការរីកចម្រើនរបស់កោសិកាជ្រូក។

តម្រងនោមគឺជាមួយក្នុងចំណោមសរីរាង្គដែលត្រូវបានប្ដូរច្រើនជាងគេនៅលើមនុស្ស ប៉ុន្តែកង្វះតម្រងនោមល្អដែលបានពីការបរិច្ចាគកំពុងក្លាយជារឿងលំបាក។ ការចិញ្ចឹមសរីរាង្គមនុស្សក្នុងអំប៊្រីយ៉ុងសត្វមានដោះធំនឹងជាដំណោះស្រាយល្អសម្រាប់បញ្ហានេះ។

September 11, 2023

យន្តហោះដំណើរការដោយអ៊ីដ្រូសែនរាវ-អគ្គិសនីដំបូងគេលើពិភពលោក

ក្រុមហ៊ុនអាកាសចរណ៍មួយនៅ Stuttgart នៃប្រទេសអាល្លឺម៉ង់ ប្រកាសថា យន្តហោះអគ្គិសនី H&4 ដំណើរការដោយអគ្គិសនីពីថ្មផ្ទុកឥន្ធនៈអ៊ីដ្រូសែនរាវរបស់ខ្លួន បានទទួលជោគជ័យក្នុងការហោះហើរសាកល្បងដែលមានមនុស្សបើកបរ។

នេះគឺជាជំហានថ្មីបំផុតនៃបច្ចេកវិទ្យារបស់វិស័យអាកាសចរណ៍ ក្នុងការប្រឹងប្រឹងកាត់បន្ថយការបំភាយឧស្ម័នផ្ទះកញ្ចក់ ជាឧស្ម័នដែលធ្វើឱ្យផែនដីឡើងកម្ដៅពីមួយថ្ងៃទៅមួយថ្ងៃ។

ក្រុមហ៊ុនអាល្លឺម៉ង់ H2Fly ឱ្យដឹងថា HY4 គឺជាយន្តហោះ 4 កៅអី ដំណើរការដោយថ្មផ្ទុកថាមពលអ៊ីដ្រូសែនរាវ ក្នុងនោះអ៊ីដ្រូសែនប្រតិកម្មជាមួយនឹងអុកស៊ីសែន ហើយត្រូវបានបំប្លែងទៅជាអគ្គិសនី និងទឹក។ ដូច្នេះសំណល់តែមួយគត់ដែលវាបំភាយ នោះគឺទឹក ដែលមិនបង្កផលប៉ះពាល់ដល់បរិស្ថាន មិនដូចឧស្ម័នកាបូននៅក្នុងវិស័យអាកាសចរណ៍ដែលកំពុងពេញនិយមនាបច្ចុប្បន្ន។

ការប្រើប្រាស់ឥន្ធនៈអ៊ីដ្រូសែនរាវជំនួសអ៊ីដ្រូសែនទម្រង់ឧស្ម័ន បានជួយឱ្យរយៈចម្ងាយអតិបរមានៃការហោះហើររបស់យន្តហោះ HY4 កើនពី 750 គីឡូម៉ែត្រ ឡើងដល់ 1,500 គីឡូម៉ែត្រ។

ក្រុមហ៊ុនខាងលើឱ្យដឹងថា មានគម្រោងស្ថាបនាមជ្ឈមណ្ឌលអាកាសចរណ៍អ៊ីដ្រូសែននៅឯព្រលានយន្តហោះ Stuttgart ក្នុងឆ្នាំ 2024 ដើម្បីអភិវឌ្ឍយន្តហោះទេសចរណ៍ 40 កៅអី ដែលដំណើរការដោយអ៊ីដ្រូសែន-អគ្គិសនី ចាប់ពីឆ្នាំ 2025៕

September 11, 2023

យន្តហោះកូនកាត់ឧទ្ធម្ភាគចក្រសង្គ្រោះបន្ទាន់ ល្បឿន 460 គីឡូម៉ែត្រ/ម៉ោង

យានជំនិះហោះឡើង និងចុះចតបញ្ឈរត្រង់ JA1 Pulse បំពាក់ស្លាបចក្រអគ្គិសនី 8 គ្រឿង អាចដឹកបុគ្គលិកសង្គ្រោះបន្ទាន់ទៅកាន់ទីតាំងមានជនរងគ្រោះបានយ៉ាងឆាប់រហ័ស។

ក្រុមហ៊ុនអាម៉េរិក Jump Aero ឱ្យដឹងថា រូបរាងរបស់ JA1 Pulse ដែលជាយានជំនិះហោះឡើង និងចុះចតបញ្ឈរត្រង់ដំណើរការដោយអគ្គិសនី (eVTOL) ត្រូវបានផលិតឡើងដើម្បីប្រើប្រាស់ក្នុងការដឹកបុគ្គលិកសង្គ្រោះបន្ទាន់ទៅកាន់គោលដៅបានលឿនបំផុត។ JA1 Pulse ទទួលបានការបញ្ជាទិញជាមុន ប៉ុន្តែ Jump Aero មិនទាន់ប្រកាសជាផ្លូវការអំពីពេលវេលាដំណើរការរបស់យន្តហោះកូនកាត់ឧទ្ធម្ភាគចក្រអគ្គិសនីនេះនៅឡើយ។

JA1 Pulse មានរូបរាងបែប tail-sitter ដែលមានន័យថា ពេលចតលើដី វានឹង «អង្គុយ» ដោយកន្ទុយ ចំណែកក្បាល និងស្លាបចក្របែរទៅលើ។ វាហោះឡើងដូចឧទ្ធម្ភាគចក្រ ប៉ុន្តែនៅពេលហោះឡើងដល់កម្ពស់សមល្មម វានឹងហោះទៅមុខដូចយន្តហោះធម្មតា។

ប្រព័ន្ធបញ្ជានៅលើយានជំនិះនេះមានលក្ខណៈសាមញ្ញ មិនត្រូវការការហ្វឹកហាត់បើកបរស៊ីជម្រៅ។ ទន្ទឹមនឹងនេះ JA1 Pulse នឹងមិនបង្កគ្រោះថ្នាក់ធ្ងន់ធ្ងរ បើសិនវាជួបបញ្ហា។ បើយានជំនិះនេះមិនអាចបន្តដំណើរពេលកំពុងហោះហើរ ពីឡុតនឹងប្រើប្រាស់ឆត្រយោង។

តាមគម្រោង JA1 Pulse នឹងអាចហោះក្នុងល្បឿន 463 គីឡូម៉ែត្រ/ម៉ោង អាចដឹកឧបករណ៍ ឬអ្នកបើកបរដែលមានទម្ងន់ 150 គីឡូក្រាម និងអាចហោះដល់គ្រប់គោលដៅដែលស្ថិតក្នុងរង្វង់ 50 គីឡូម៉ែត្រ ដោយប្រើពេល 8 នាទី។

ម៉ូទ័ររបស់ស្លាបចក្រនីមួយៗទទួលថាមពលពីថ្មផ្ទុកអគ្គិសនីកម្លាំង 11 គីឡូវ៉ាតម៉ោង អាចបញ្ចូលថាមពលដំណាលគ្នាតាមរយៈឌុយតែមួយ។

ដោយសារតែមិនប្រើប្រាស់សម្រាប់ការដឹកអ្នកជំងឺ ដូច្នេះ JA1 Pulse មិនមែនជាយានដែលនឹងចូលមកជំនួសឡានសង្គ្រោះបន្ទាន់ឡើយ។ នៅពេលមានហេតុការណ៍បន្ទាន់ ទាំងយាននេះ ទាំងរថយន្តសង្គ្រោះបន្ទាន់ នឹងត្រូវបានបញ្ជូនទៅកាន់កន្លែងកើតហេតុដំណាលគ្នា ហើយ JA1 Pulse នឹងទៅដល់មុន។ ពេលនោះ ពីឡុតជាបុគ្គលិកសង្គ្រោះបន្ទាន់នឹងជួយដោះស្រាយមុនដោយប្រើប្រាស់ឧបករណ៍វេជ្ជសាស្ត្រនៅលើយាននេះ។ ពេលឡានពេទ្យទៅដល់ បុគ្គលិកលើឡាននឹងទទួលចាត់ចែងការងារបន្ត ហើយ JA1 Pulse អាចងាកទៅបំពេញភារកិច្ចថ្មី៕

September 9, 2023

ម៉ាស៊ីនផលិតអុកស៊ីសែនលើភពអង្គាររបស់ណាសាផ្ដល់ក្ដីសង្ឃឹមខ្ពស់ដល់មនុស្សជាតិ

ឧបករណ៍ធ្វើតេស្តការផលិតអុកស៊ីសែនពីកាបូនឌីអុកស៊ីតនៅលើភពអង្គារដំណើរការបានល្អជាងការរំពឹងទុក និងបញ្ជាក់អំពីសមត្ថភាពដែលអាចជួយឱ្យក្រុមអ្នកអវកាសផ្សងព្រេង ស្រាវជ្រាវលើភពពណ៌ក្រហមមួយនេះនៅថ្ងៃអនាគត។

ឧបករណ៍ MOXIE (Mars Oxygen In-Situ Resource Utilization Experiment) មានទំហំប៉ុនចង្ក្រានម៉ៃក្រូវ៉េវ ស្ថិតលើរ៉ូបូតស្វ័យប្រវត្ត Perseverance។ ការពិសោធលើការផលិតអុកស៊ីសែនរបស់ MOXIE ត្រូវបានធ្វើឡើងកាលពីជាងពីរឆ្នាំមុន បន្ទាប់ពីរ៉ូបូតនេះបានចុះចតលើភពអង្គារ។ តាំងពីពេលនោះមក MOXIE ផលិតអុកស៊ីសែនបាន 122 ក្រាម គ្រប់គ្រាន់សម្រាប់ឱ្យកូនសុនកមួយក្បាលដកដង្ហើមបាន 10 ម៉ោង។ ឧបករណ៍នេះបំប្លែងមួយផ្នែកនៃកាបូនឌីអុកស៊ីតដែលសម្បូរនៅលើភពអង្គារ ឱ្យទៅជាអុកស៊ីសែន។ មានពេលខ្លះ MOXIE ផលិតអុកស៊ីសែនបាន 12 ក្រាមក្នុងមួយម៉ោង។ កាលពីថ្ងៃទី 07 សីហា MOXIE ដំណើរការជាលើកទី 16 ហើយក៏ជាលើកចុងក្រោយដែលវាបានសម្រេចរាល់ភារកិច្ច។

បរិយាកាសដ៏ស្ដើងរបស់ភពអង្គារមានឧស្ម័នកាបូនឌីអុកស៊ីតចំនួន 96%។ កំណែធំជាង និងល្អជាងរបស់ MOXIE អាចផ្គត់ផ្គង់ និងរក្សាទុកអុកស៊ីសែនដើម្បីគាំទ្រដល់ប្រព័ន្ធទ្រទ្រង់ជីវិត និងធ្វើជាឥន្ធនៈសម្រាប់រ៉ុក្កែតរបស់យានអវកាស។

បច្ចេកវិទ្យាដូច MOXIE អាចជួយដល់ក្រុមអ្នកអវកាស រស់នៅ ធ្វើការ និងប្រើប្រាស់ធនធាននៅលើភពអង្គារ។ បន្ទាប់ពីជោគជ័យរបស់ MOXIE ណាសាគ្រោងនឹងអនុវត្តជំហានបន្ទាប់ នោះគឺការធ្វើតេស្តបច្ចេកវិទ្យាដទៃនៅលើភពក្រហមនេះ ក្នុងនោះមានជាអាទិ៍ ឧបករណ៍ និងវត្ថុធាតុសម្រាប់បង្កើតបរិស្ថានរស់នៅជាដើម៕

September 9, 2023

លទ្ធផលនៃការប្រកួតបញ្ជូនទិន្នន័យរវាងសត្វព្រាប និងអ៊ីនធើណិតខ្សែកាបអុបទិច

ដោយធ្លាប់ត្រូវបានប្រើប្រាស់ក្នុងការបញ្ជូនសារក្នុងរយៈពេលរាប់សិបសតវត្សរ៍កាលពីសម័យមុនៗ សត្វព្រាបច្ចុប្បន្ននៅតែមានសមត្ថភាពខ្ពស់ក្នុងការបញ្ជូនទិន្នន័យ បើធៀបនឹងបណ្ដាញអ៊ីនធើណិតខ្សែកាបកញ្ចក់។

កាលពីសម័យបុរាណ សត្វព្រាបត្រូវបានជ្រើសរើសឱ្យធ្វើជាអ្នកនាំសារ ព្រោះតែវាអាចហោះហើររាប់ពាន់គីឡូម៉ែត្រ ឬឆ្ងាយជាងនេះក្នុងល្បឿនប្រហែល 100 គីឡូម៉ែត្រ/ម៉ោង។ សត្វព្រាបមួយចំនួនអាចហោះក្នុងល្បឿនរហូតដល់ 180 គីឡូម៉ែត្រ/ម៉ោង ជួយបញ្ជូនសារបានយ៉ាងឆាប់រហ័ស។

ក៏ប៉ុន្តែ ក្នុងសម័យបច្ចេកវិទ្យានេះ តើសត្វព្រាបអាចយកឈ្នះលើអ៊ីនធើណិត ឬអត់?

ដើម្បីឆ្លើយនឹងសំនួរខាងលើ ការពិសោធមួយត្រូវបានធ្វើឡើងកាលពីឆ្នាំ 2009 ហើយបន្ទាប់មកក៏ធ្វើឡើងជាថ្មីក្នុងឆ្នាំ 2023។ ក្នុងការប្រកួតលើនេះ សត្វព្រាបនៅតែមិនមានការប្រែប្រួល បើធៀបនឹងឆ្នាំ 2009។ ចំណែកល្បៀនរបស់អ៊ីនធើណិត ពិសេសគឺបណ្ដាញខ្សែកាបអុបទិចដែលធ្វើពីកញ្ចក់ នៅឆ្នាំ 2023 មានល្បឿនលឿនជាង ADSL របស់ឆ្នាំ 2009 ឆ្ងាយណាស់។ កាលនោះ ក្រុមហ៊ុនអ៊ីនធើណិត Telkom នៅអាហ្វ្រិកខាងត្បូងបានវាស់វែងពេលវេលា និងល្បឿននៃការបញ្ជូនទិន្នន័យរបស់សត្វព្រាបមួយក្បាល ដែលបំពាក់អង្គចងចាំ 4 GB ប្រៀបធៀបជាមួយនឹងល្បឿនអ៊ីនធើណិត ADSL របស់ Telkom។

ដោយហោះក្នុងល្បឿនរហូតដល់ 125 គីឡូម៉ែត្រ/ម៉ោង សត្វព្រាបខាងលើបានយកឈ្នះលើអ៊ីនធើណិតរបស់ក្រុមហ៊ុន Telkom។ លទ្ធផលបង្ហាញថា សត្វព្រាបបានចំណាយពេលប្រហែលមួយម៉ោង និង 8 នាទី ដើម្បីហោះដល់ទីតាំងដែលបានកំណត់ដែលមានចម្ងាយពីដើមទីប្រហែល 96 គីឡូម៉ែត្រ។ បើគិតទាំងពេលវេលាផ្ទេរទិន្នន័យ 4GB ដែលស៊ីពេលអស់មួយម៉ោងទៀត ពេលវេលាសរុបសម្រាប់ដំណើរការបញ្ជូនទិន្នន័យតាមសត្វព្រាបគឺប្រហែលជាងពីរម៉ោង។

ក្នុងរយៈពេលដូចគ្នានេះ សេវា ADSL របស់ Telkom ទើបតែផ្ញើ (ឬ upload) បាន 4% ធៀបនឹងទិន្នន័យ 4GB ដែលបញ្ជូនទៅកាន់កុំព្យូទ័រមួយផ្សេងទៀតដែលនៅឆ្ងាយពីនោះ 96 គីឡូម៉ែត្រ។

សត្វព្រាប និងអ៊ីនធើណិតបន្តប្រកួតនឹងគ្នាក្រោយរយៈពេល 14 ឆ្នាំ

14 ឆ្នាំ បន្ទាប់ពីការប្រកួតដំបូង ការប្រកួតមួយទៀតរវាងសត្វព្រាប និងអ៊ីនធើណិតក៏ត្រូវបានធ្វើឡើងជាថ្មីក្នុងឆ្នាំ 2023 ដោយ YouTuber ផ្នែកបច្ចេកវិទ្យា Jeff Geerling។

រូបមន្តនៃការប្រកួតក្នុងឆ្នាំ 2023 គឺដូចទៅនឹងឆ្នាំ 2009 នៅពេល YouTuber ឈ្មោះ Jeff Geerling បានភ្ជាប់ USB, SSD, SanDisk Extreme PRO 1TB (មួយគ្រាប់ទម្ងន់ 5 ក្រាម) ទៅលើជើងសត្វព្រាប និងឱ្យហោះទៅកាន់ទីតាំងមួយដែលមានចម្ងាយ 1.6 គីឡូម៉ែត្រ

លទ្ធផលនៃការប្រកួតលើកនេះបង្ហាញថា សត្វព្រាបចំណាយពេលប្រហែលមួយនាទីដើម្បីហោះដល់គោលដៅ។ បើបូកទាំងពេលវេលាចម្លងទិន្នន័យ 3TB ទៀត ព្រាបនៅតែយកឈ្នះលើបណ្ដាញអ៊ីនធើណិតខ្សែកាប។

September 8, 2023

គណៈកម្មាធិការវិនិយោគកម្ពុជាអនុម័តលើសំណើចុះបញ្ជីក្រុមហ៊ុនថ្មី មានទុនសរុប 146 លានដុល្លារអាម៉េរិក

គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនបត្រចុះបញ្ជីគម្រោងវិនិយោគជូនដល់ក្រុមហ៊ុនថ្មីចំនួនដប់ដែលមានទុនវិនិយោគសរុបចំនួន 146.45 លានដុល្លារអាម៉េរិក និងអាចបង្កើតការងារថ្មីសរុបប្រមាណ 14,350 កន្លែង។

គម្រោងវិនិយោគទាំងដប់នេះរួមមាន៖

“CAMBODIAN TRANSMISSION II CO., LTD” ៖ គម្រោងអភិវឌ្ឍន៍អនុស្ថានីយ៍ និងខ្សែបញ្ជូនថាមពលអគ្គិសនី តង់ស្យុងខ្ពស់ 230 គីឡូវ៉ុល ពីខេត្តកំពង់ចាម ទៅខេត្តក្រចេះ ក្នុងទុនវិនិយោគប្រមាណ 92.2 លានដុល្លារអាម៉េរិក និងអាចបង្កើតការងារបានចំនួន 464 កន្លែង។

“HANTANG YIPIN LEISURE PRODUCTS (CAMBODIA) CO., LTD” ៖ គម្រោងបង្កើតរោងចក្រផ្គុំ និងដំឡើងសម្ភារៈប្រើប្រាស់ (កៅអីផ្អែក កៅអីអង្គុយ តុ…) និងសម្ភារៈបន្ទាប់បន្សំ ដែលមានទីតាំងវិនិយោគស្ថិតនៅភូមិសេរីភ័ត្ត ឃុំពោធិ៍អង្ក្រង ស្រុកបរសេដ្ឋ ខេត្តកំពង់ស្ពឺ ក្នុងទុនវិនិយោគប្រមាណ 8.9 លានដុល្លារអាម៉េរិក និងអាចបង្កើតការងារបានចំនួន 3,618 កន្លែង។

“APOLLO PET PRODUCTS (CAMBODIA) CO., LTD” ៖ គម្រោងបង្កើតរោងចក្រផលិតចំណី និងសម្ភារៈសត្វចិញ្ចឹម ដែលមានទីតាំងវិនិយោគស្ថិតនៅភូមិ 3 សង្កាត់លេខ 1 ក្រុងព្រះសីហនុ ខេត្តព្រះសីហនុ ក្នុងទុនវិនិយោគប្រមាណ 8 លានដុល្លារអាម៉េរិក និងអាចបង្កើតការងារបានចំនួន 1,126 កន្លែង។

“PRIME STORAGE SOLUTION (CAMBODIA) CO., LTD” ៖ គម្រោងបង្កើតរោងចក្រផលិតឧបករណ៍ប្រើប្រាស់ក្នុងផ្ទះពីលោហៈធាតុកែច្នៃ (ធ្នើរ) ដែលមានទីតាំងវិនិយោគស្ថិតនៅភូមិអូរតាពូង ឃុំរកាកោះ ស្រុកគងពិសី ខេត្តកំពង់ស្ពឺ ក្នុងទុនវិនិយោគប្រមាណ 5,8 លានដុល្លារអាម៉េរិក និងអាចបង្កើតការងារបានចំនួន 150 កន្លែង។

“INTEGRITY UNION PACKAGING MATERIAL CO., LTD” ៖ គម្រោងបង្កើតរោងចក្រផលិតសម្ភារៈវេចខ្ចប់គ្រប់ប្រភេទ ដែលមានទីតាំងវិនិយោគស្ថិតនៅផ្លូវលំ ភូមិព្រៃខ្វាវ ឃុំរកាកោះ ស្រុកគងពិសី ខេត្តកំពង់ស្ពឺ ក្នុងទុនវិនិយោគប្រមាណ 5,7 លានដុល្លារអាម៉េរិក និងអាចបង្កើតការងារបានចំនួន 537 កន្លែង។

“NEOCAMBO TEXTILE CO., LTD” គម្រោងបង្កើតរោងចក្រកាត់ដេរសម្លៀកបំពាក់ និងផលិតមួកគ្រប់ប្រភេទ ដែលមានទីតាំងវិនិយោគស្ថិតនៅភូមិត្រពាំងអង្ក្រង សង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ ក្នុងទុនវិនិយោគប្រមាណ 5.4 លានដុល្លារអាម៉េរិក និងអាចបង្កើតការងារបានចំនួន 2,759 កន្លែង។

“FONTERNIG GARMENT CO., LTD” ៖ គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅផ្លូវជាតិលេខ 2 ភូមិឃ្លាំងសម្បត្តិ ឃុំពត់សរ ស្រុកបាទី ខេត្តតាកែវ ក្នុងទុនវិនិយោគប្រមាណ 5.3 លានដុល្លារអាម៉េរិក និងអាចបង្កើតការងារបានចំនួន 1,686 កន្លែង។

“XIANGRUIFENG PACKAGING TECHNOLOGY CO., LTD” ៖ គម្រោងវិនិយោគកម្មន្តសាលសម្ភារៈធ្វើពីក្រដាស (ទ្រនាប់ពុម្ពសម្លៀកបំពាក់ ស្បែកជើង កាបូប ម៉ាកឃឺ និងវេចខ្ចប់) ដែលមានទីតាំងវិនិយោគស្ថិតនៅភូមិដំណាក់ត្រយឹង សង្កាត់ចោមចៅទី 2 ខណ្ឌពោធិ៍សែនជ័យ រាជធានីភ្នំពេញ ក្នុងទុនវិនិយោគប្រមាណ 5.1 លានដុល្លារអាម៉េរិក និងអាចបង្កើតការងារបានចំនួន 191 កន្លែង។

“INSPIROR BAG (CAMBODIA) MANUFACTURING CO., LTD” ៖ គម្រោងបង្កើតរោងចក្រផលិតកាបូបគ្រប់ប្រភេទ ដែលមានទីតាំងវិនិយោគស្ថិតនៅភូមិព្រៃចំការ ឃុំលំហាច ស្រុកអង្គស្នួល ខេត្តកណ្តាល ក្នុងទុនវិនិយោគប្រមាណ 5.03 លានដុល្លារអាម៉េរិក និងអាចបង្កើតការងារបានចំនួន 1,281 កន្លែង។

“HONGRUI BAG (CAMBODIA) CO., LTD” ៖ គម្រោងបង្កើតរោងចក្រផលិតកាបូប តុក្កតា និងសម្លៀកបំពាក់សត្វចិញ្ចឹម (ពីក្រណាត់) ដែលមានទីតាំងវិនិយោគស្ថិតនៅភូមិបាក់ចិញ្ចៀន ឃុំត្រពាំងគង ស្រុកសំរោងទង ខេត្តកំពង់ស្ពឺ ក្នុងទុនវិនិយោគប្រមាណ 5.02 លានដុល្លារអាម៉េរិក និងអាចបង្កើតការងារបានចំនួន 2,540 កន្លែង។

September 8, 2023

អ្នកស្រាវជ្រាវអភិវឌ្ឍពីឡុត AI រាងមនុស្សដំបូងគេលើពិភពលោក

ថ្មីៗនេះ ក្រុមអ្នកវិទ្យាសាស្ត្រកូរ៉េខាងត្បូងបានអភិវឌ្ឍរ៉ូបូតទំនើបដោយយោងទៅលើបច្ចេកវិទ្យាបញ្ញាសិប្បនិម្មិតដែលមានសមត្ថភាពជំនួសអ្នកបើកបរនាពេលអនាគត។

រ៉ូបូតដែលមានរូបរាងដូចមនុស្សនេះមានឈ្មោះថា PIBOT និងមានកម្ពស់ 1.6 ម៉ែត្រ, ទម្ងន់ 65 គីឡូក្រាម និងមានប្រព័ន្ធកាមេរ៉ានៅលើក្បាល។ PIBOT ត្រូវបានអភិវឌ្ឍដោយក្រុមអ្នកវិទ្យាសាស្ត្រនៃវិទ្យាស្ថានវិទ្យាសាស្ត្រ និងបច្ចេកវិទ្យាកូរ៉េខាងត្បូង។ បើទោះហាក់នៅយឺត ប៉ុន្តែ PIBOT ចងចាំរាល់សកម្មភាពចាំបាច់របស់ជើងហោះហើរ និងអាចបញ្ជាលើការហោះឡើង និងចុះចត។

សាស្ត្រាចារ្យ David Hyunchul Shim ដែលជាប្រធានក្រុមស្រាវជ្រាវបានឱ្យដឹងថា PIBOT គឺជាពីឡុតរូបរាងមនុស្សដំបូងគេបង្អស់លើពិភពលោក ត្រូវបានអភិវឌ្ឍដោយយោងទៅតាមរូបមន្តភាសាធំ (Large language model (LLM)) អនុញ្ញាតឱ្យវាយល់រាល់សំណេរណែនាំអំពីជើងហោះហើរដែលសរសេរជាភាសាពេញនិយម។

គុណសម្បត្តិរបស់ពីឡុតរ៉ូបូតនេះគឺការរក្សាបានស្ថានភាពនឹងនខ្ពស់បំផុត មានសមត្ថភាពប្រតិកម្មរហ័សនៅចំពោះមុខស្ថានការណ៍អាសន្នដោយមិនមានការស្លន់ស្លោ។ PIBOT ក៏អាចពិនិត្យមើលសំណេរស្ដីពីការហោះហើរបានរហ័សជាងមនុស្សឆ្ងាយណាស់ ដោយសារបំពាក់កម្មវិធី ChatGPT។

បច្ចុប្បន្ន PIBOT អាចបញ្ជាការហោះហើរនៅលើប្រព័ន្ធធ្វើត្រាប់តាមការហោះហើរ។ ក្រុមអ្នកស្រាវជ្រាវមានគម្រោងសាកល្បងបច្ចេកវិទ្យា PIBOT នៅលើយន្តហោះខ្នាតតូចនៅប៉ុន្មានឆ្នាំខាងមុខ៕

September 8, 2023

BYD បង្ហាញរថយន្តអគ្គិសនី Seal DM-i តម្លៃចាប់ពីជាង 20,000 ដុល្លារអាម៉េរិក

BYD បានបង្ហាញជាផ្លូវការនូវរថយន្តអគ្គិសនី Seal DM-i តម្លៃចាប់ពី 22,800 ដល់ 32,400 ដុល្លារអាម៉េរិក នៅទីផ្សារប្រទេសចិន។

រថយន្តអគ្គិសនី Seal DM-i គឺជាសមាជិកថ្មីក្នុងត្រកូល Seal ហើយកំណែ plug-in hybrid នេះបានបង្ហាញខ្លួនជាលើកដំបូងកាលពីថ្ងៃទី 18 មេសា ជាថ្ងៃដំបូងនៃពិព័រណ៍រថយន្តសៀងហៃ ប៉ុន្តែពេលនោះវាត្រូវបានហៅថា Chaser 07។

BYD បានប្ដូរឈ្មោះ Chaser 07 ទៅជា Seal DM-i កាលពីថ្ងៃទី 14 កក្កដា ក្នុងបំណងប្រើប្រាស់ការពេញនិយមរបស់Seal។

BYD Seal ត្រូវបានគេចាត់ទុកថាជាគូប្រជែងសំខាន់របស់ Tesla Model 3 នៅប្រទេសចិន នៅពេលបង្ហាញខ្លួនក្នុងទីផ្សារនេះកាលពីថ្ងៃទី 29 កក្កដា 2022។

BYD កំពុងផ្គត់ផ្គង់រថយន្ត Seal DM-i ចំនួន6 ម៉ូដែល។ Seal DM-i គឺជាម៉ូដែល sedan B+ ដែលមានបណ្ដោយ ទទឹង និងកម្ពស់ប្រវែងជាបន្តបន្ទាប់គឺ 4,980 មម, 1,890 មម និង 1,495 មម ខណៈប្រវែងបណ្ដោយជាមូលដ្ឋានគឺ 2,900 មម។

ម៉ាស៊ីនរបស់រថយន្តទាំងនេះរួមមានពីរជម្រើសគឺ 1.5L និង 1.7T ដែលផ្ដល់ថាមពលខ្លាំងជាបន្តបន្ទាប់គឺ 81 គីឡូវ៉ាត់ និង 102 គីឡូវ៉ាត់ រួមនឹងកម្លាំងរមួលកង់ 135 Nm និង 231 Nm។

រថយន្តទាំងនេះក៏មានម៉ូទ័រអគ្គិសនីពីរជម្រើសគឺកម្លាំង 145 សេះ និង 160 សេះ។ ទាំងពីរជម្រើសនេះសុទ្ធតែមានកម្លាំងរមួលកង់325 Nm។

September 7, 2023

ម្ចាស់ Facebook បង្អួតក្បាច់គុនលើស្រឡាងកណ្ដាលសាគរ

Mark Zuckerberg ហាត់គុនលើស្រឡាងកណ្ដាលសមុទ្រជាមួយនឹងក្រុមអ្នកគុននិយម ខុសពីរូបភាពលាបគ្រែមការពារស្បែកពីកម្ដៅថ្ងៃនៅពេលជិះស្គីលើរលកទឹកកាលពីច្រើនឆ្នាំមុន។

ក្នុងវីដេអូដែលបង្ហោះលើ Instagram នាសប្ដាហ៍នេះ មហាសេដ្ឋី Mark Zuckerberg អួតសកម្មភាពហាត់គុនជាមួយនឹងមនុស្ស 11 នាក់ ក្នុងនោះក៏មានអ្នកប្រដាល់ MMA ល្បីឈ្មោះ រួមមាន Israel Adesanya មកពីនីហ្សេរីយ៉ា និង Alexander Volkanovski មកពីអូស្ត្រាលីផងដែរ។ ពួកគេប្រយុទ្ធគ្នាលើស្រឡាង អមនឹងភ្លេងរបស់ភាពយន្តរឿង Mission Impossible។

ក្រោយការបង្ហោះលើបណ្ដាញសង្គមបានពីរថ្ងៃ « វីដេអូនេះ » ទទួលបានការចុចចូលចិត្តជិត 200,000 លើក រួមនឹងមតិរាប់ពាន់លើក។ អ្នកខ្លះថា ម្ចាស់ Facebook កំពុងតែបញ្ចេញភាពខ្លាំងក្លា ខុសពីរូបភាពលាបគ្រែមការពារស្បែកពីកម្ដៅថ្ងៃនៅពេលជិះស្គីលើរលកទឹកកាលពីឆ្នាំ 2020។ ចំណែកអ្នកខ្លះទៀតក៏សរសេររំលឹកដល់រឿងមហាសេដ្ឋី Elon Musk បបួល Mark Zuckerberg ប្រកួតប្រដាល់លើសង្វៀន។

កាលពីចុងខែមិថុនា 2023 នៅលើបណ្ដាញសង្គម Twitter (បច្ចុប្បន្នគឺ X) លោក Elon Musk បានបបួលលោក Zuckerberg ប្រកួតប្រដាល់ ហើយក្រោយមក CEO របស់ Meta ក៏យល់ព្រម។ អ្នកទាំងពីរឆ្លងឆ្លើយនឹងគ្នាជាបន្តបន្ទាប់លើបណ្ដាញសង្គម X និង Threads ទាក់ទិននឹងការប្រកួតនេះ ប៉ុន្តែចុងក្រោយលោក Musk ក៏បានទទួលស្គាល់ថា លោកនិយាយលេង៕

September 7, 2023

ជប៉ុនបាញ់បង្ហោះស្ថានីយចុះចតលើឋានព្រះចន្ទ

យានអវកាស SLIM នឹងហោះដល់គន្លងតារាវិថីព្រះចន្ទនៅក្នុងរយៈពេលពី 3 ទៅ 4 ខែទៀត រួចក៏នឹងចុះចតខាងក្នុងមាត់រណ្ដៅមួយដែលមានទំហំ 300 ម៉ែត្រ។

រ៉ុក្កែត H-2A របស់ជប៉ុន ដឹកស្ថានីយចុះចត SLIM និងតេឡេស្កុបអវកាស XRISM ហោះឡើងពីមជ្ឈមណ្ឌលអវកាស Tanegashima កាលពីម៉ោង 6 និង 42 នាទី ថ្ងៃទី 6 កញ្ញា (ពេលវេលានៅកម្ពុជា) យឺតជាង 10 ថ្ងៃ បើធៀបនឹងផែនការដំបូង ដោយសារតែបញ្ហាអាកាសធាតុ។

យានអវកាសទាំងពីរគ្រឿងបានហោះហោះដូចការគ្រោងទុក បន្ទាប់ពីត្រូវបានបាញ់បង្ហោះជិតមួយម៉ោង។ បើសិនជាគ្រប់យ៉ាងដំណើរការរលូត តែប៉ុន្មានខែទៀតប៉ុណ្ណោះ SLIM (ស្ថានីយស្រាវជ្រាវព្រះចន្ទឆ្លាតវៃ) នឹងរកវិធីចុះចតលើផ្ទៃព្រះចន្ទជាលើកដំបូង ដើម្បីបើកផ្លូវសម្រាប់បេសកកម្មប្រកបដោយមហិច្ឆតាជាច្រើនផ្សេងទៀត។

យោងតាមអង្គការស្រាវជ្រាវអវកាសជប៉ុន (JAXA) ស្ថានីយ SLIM ឆ្ពោះទៅរកការធ្វើតេស្តប្រព័ន្ធស្រាវជ្រាវស្រាលក្នុងទ្រង់ទ្រាយតូច និងប្រើប្រាស់បច្ចេកវិទ្យាចុះចតប្រកបដោយភាពសុក្រឹតចាំបាច់សម្រាប់យានអវកាសចុះចតលើឋានព្រះចន្ទក្នុងពេលអនាគត។

SLIM គឺជាយានអវកាសខ្នាតតូច មានកម្ពស់ 2.4 ម៉ែត្រ, បណ្ដោយ 2.7 ម៉ែត្រ និងទទឹង 1.7 ម៉ែត្រ។ នៅពេលហោះឡើង យាននេះមានទម្ងន់ 700 គីឡូក្រាម ក្នុងនោះ ឥន្ធនៈមានរហូតដល់ 70% នៃទម្ងន់សរុប។ SLIM នឹងហោះទៅតាមគន្លងវែងឆ្ងាយដែលសន្សំសំចៃឥន្ធនៈ ហើយគ្រោងនឹងទៅដល់គន្លងតារាវិថីព្រះចន្ទនៅ 3 ឬ 4 ខែទៀត។ យានអវកាសនេះនឹងសង្កេតមើលផ្ទៃព្រះចន្ទក្នុងមួយខែ មុននឹងបន្តចុះចតខាងក្នុងមាត់រណ្ដៅអាចម៍ផ្កាយ Shioli Crater ទំហំ 300 ម៉ែត្រ ដើម្បីធ្វើតេស្តបច្ចេកវិទ្យាចុះចត។

SLIM ក៏នាំយកយានស្រាវជ្រាវខ្នាតតូចពីរគ្រឿង ដែលគ្រោងនឹងត្រូវបានដាក់ពង្រាយលើផ្ទៃព្រះចន្ទ បន្ទាប់ពីបានចុះចត។ យានខ្នាតតូចមួយគូនេះនឹងជួយក្រុមអ្នកបច្ចេកទេសលើផែនដីអាចតាមដានស្ថានភាពរបស់យានចុះចត SLIM និងថតរូបតំបន់ចុះចត ក៏ដូចជាផ្ដល់ប្រព័ន្ធទំនាក់ទំនងផ្ទាល់ជាមួយនឹងផែនដី។

មុននោះ ស្ថានីយចុះចត Hakuto-R របស់ក្រុមហ៊ុនឯកជន Hakuto-R នៅតូក្យូ ក៏បានហោះដល់គន្លងតារាវិថីព្រះចន្ទ ប៉ុន្តែបានធ្លាក់បុកដីកាលពីខែមេសាឆ្នាំកន្លង។ ដូច្នេះ ជោគជ័យរបស់ SLIM នឹងជាប្រវត្តិសាស្ត្រដ៏សំខាន់មួយ។ គិតមកដល់បច្ចុប្បន្ន លើពិភពលោកមានតែបួនប្រទេសប៉ុណ្ណោះដែលធ្លាប់បានបញ្ជូនយានអវកាសទៅស្រាវជ្រាវឋានព្រះចន្ទ នោះគឺ សូវៀត អាម៉េរិក ចិន និងឥណ្ឌា។

ក្រៅពី SLIM រ៉ុក្កែតរុញច្រាន H-2A ក៏ដឹកឡេស្កុបអវកាស XRISM (បេសកកម្មថតរូបដែលបំពាក់បច្ចេកវិទ្យាកាំរស្មីអ៊ិច (X)) ដែលជាគម្រោងសហការរវាងទីភ្នាក់ងារអវកាសជប៉ុន អាម៉េរិក និងអឺរ៉ុប នឹងធ្វើសកម្មភាពនៅក្នុងគន្លងតារាវិថីកម្រិតទាបរបស់ផែនដី។ តេឡេស្កុបនេះនឹងស្រាវជ្រាវចក្រវាលតាមរយៈកាំរស្មីអ៊ិចថាមពលខ្ពស់ក្នុងទីអវកាស៕

September 7, 2023

តម្លៃប្រេងឆៅលើពិភពលោកនឹងឡើងជិតដល់កំពូលនៅប៉ុន្មានខែចុងឆ្នាំនេះ

ប្រេង Brent និង WTI នាំគ្នាឡើងថ្លៃ នៅពេលរុស្ស៊ី និងអារ៉ាប៊ីសាអូឌីតនាំគ្នាប្រកាសបន្តអនុវត្តវិធានការរឹតបន្តឹងប្រភពផ្គត់ផ្គង់រហូតដល់ដាច់ឆ្នាំនេះ។

ប្រេងឆៅអាម៉េរិក WTI នៅព្រឹកនេះមានពេលខ្លះឡើងថ្លៃ 1.3% ដោយត្រូវបានលក់ចេញក្នុងតម្លៃ 87 ដុល្លារក្នុងមួយធុងបារ៉ែល។ តម្លៃប្រេង Brent ក៏កើនឡើងដល់ 90.2 ដុល្លារក្នុងមួយធុង។ តម្លៃប្រេងឆៅទាំងពីរប្រភេទនេះសុទ្ធតែកំពុងហក់ឡើងជិតដល់ចំណុចកំពូលរបស់ខែវិច្ឆិកា 2022។

តម្លៃកើនឡើងនេះកើតមានបន្ទាប់ពីរុស្ស៊ី និងអារ៉ាប៊ីសាអូឌីតចេញសេចក្ដីប្រកាសកាលពីថ្ងៃទី 05 កញ្ញា។ អារ៉ាប៊ីសាអូឌីតប្រកាសថា បន្តការកាត់បន្ថយការផលិតមួយលានធុងក្នុងមួយថ្ងៃក្នុងរយៈពេលបីខែទៀត ដើម្បីជួយលើកតម្លៃប្រេងពិភពលោក ដោយប្រទេសនេះនឹងផលិតតែ 9 លានធុងក្នុងមួយថ្ងៃ។ ចំណែករុស្ស៊ីវិញ ក៏បានប្រកាសបន្តកាត់បន្ថយការផលិត 3 សែនធុងក្នុងមួយថ្ងៃ រហូតដល់ដាច់ឆ្នាំនេះ។ អារ៉ាប៊ីសាអូឌីត និងរុស្ស៊ីគឺជាប្រទេសនាំមុខគេក្នុងអង្គការនៃប្រទេសនាំចេញប្រេង និងសម្ព័ន្ធមិត្ត (OPEC+)។

យុទ្ធសាស្ត្ររបស់រាជធានីរីយ៉ាត់ និងមូស្គូ នឹងធ្វើឱ្យប្រភពផ្គត់ផ្គង់ប្រេងទូទាំងសកលលោកត្រូវបានរឹតបន្តឹងជាបន្តទៀត។ តម្លៃប្រេងបានកើនឡើងខ្ពស់ខ្លាំងក្នុងត្រីមាសនេះ ក្រោយពី OPEC+ អនុម័តគោលនយោបាយកាត់បន្ថយការផលិតក្នុងទ្រង់ទ្រាយធំ ហើយបណ្ដាសមាជិកនៃអង្គការនេះក៏បានស្ម័គ្រចិត្តកាត់បន្ថយបន្ថែមទៀត។ ប្រការនេះកើតឡើងក្នុងពេលដែលអង្គការថាមពលអន្តរជាតិ (IEA) ព្យាករថា តម្រូវការប្រើប្រាស់ប្រេងឆៅទូទាំងពិភពលោកនឹងកើនឡើងខ្ពស់ជាងពេលណាៗទាំងអស់៕

September 6, 2023

ជាងពីរឆ្នាំទៀត អូស្ត្រាលីនឹងបញ្ជូនយានទៅចុះចតលើឋានព្រះចន្ទ

ទីភ្នាក់ងារអវកាសអូស្ត្រាលី កាលពីថ្ងៃទី 05 កញ្ញា បានប្រកាសថា ប្រទេសនេះមានគម្រោងបញ្ជូនរ៉ូបូតដំបូងរបស់ខ្លួនទៅកាន់ឋានព្រះចន្ទ តាមរយៈបេសកកម្ម Artemis របស់អាម៉េរិក នៅប៉ុន្មានឆ្នាំខាងមុខ។

«ដោយការប្រើប្រាស់បច្ចេកវិទ្យាគ្រប់គ្រងពីចម្ងាយលំដាប់កំពូលលើពិភពលោករបស់អូស្ត្រាលី រ៉ូបូតស្វ័យប្រវត្តនឹងចាប់យកសំណាកដី ថ្មរបស់ព្រះចន្ទ ដែលហៅថា regolith។ ណាសានឹងប្រឹងប្រែងចម្រាញ់អុកស៊ីសែនពីសំណាកដី។ នេះគឺជាជំហានសំខាន់មួយឆ្ពោះទៅកាន់ការបង្កើតវត្តមានយូរអង្វែងរបស់មនុស្សនៅលើឋានព្រះចន្ទ» ទីភ្នាក់ងារអវកាសអូស្ត្រាលី (ASA) ឱ្យដឹងដូច្នេះ។

រ៉ូបូតមិនទាន់មានឈ្មោះ ខណៈ ASA កំពុងបង្កើតកម្មវិធីប្រឡងមួយដើម្បីដាក់ឈ្មោះឱ្យរ៉ូបូតនេះ។ ពលរដ្ឋនៅអូស្ត្រាលីអាចចូលរួមការប្រឡងដែលនឹងផុតកំណត់នៅថ្ងៃទី 20 តុលាខាងមុខ។ ASA នឹងជ្រើសរើសឈ្មោះចំនួនបួន រួចហើយបើកឱ្យមានការជ្រើសរើសជាសាធារណៈ។ ឈ្មោះដែលបានឈ្នះការប្រកួតនឹងត្រូវបានប្រកាសនៅដើមខែធ្នូ 2023។ ឈ្មោះនេះនឹងត្រូវដាក់ឱ្យរ៉ូបូតរបស់អូស្ត្រាលីដែលធ្វើដំណើរទៅតាមយានអវកាសរបស់ណាសាក្នុងបេសកម្ម Artemis ដែលនឹងចុះចតលើឋានព្រះចន្ទនៅឆ្នាំ 2026។

ណាសាកំពុងប្រឹងប្រែងដើម្បីបង្កើតវត្តមានយូរអង្វែងរបស់មនុស្សនៅលើ និងជុំវិញឋានព្រះចន្ទនៅចុងទសវត្សរ៍ឆ្នាំ 2020 តាមរយៈកម្មវិធី Artemis។ ចំណេះដឹង និងសមត្ថភាពដែលប្រមូលបានពីកម្មវិធីនេះនឹងជួយឱ្យមនុស្សបោះជំហានទៅរកគោលដៅ «ហោះ» ទៅកាន់ភពអង្គារ។

Artemis 3 នឹងនាំអ្នកអវកាសចុះចតក្បែរប៉ូលខាងត្បូងរបស់ព្រះចន្ទនៅចុងឆ្នាំ 2025 ឬ 2026

គិតមកដល់ពេលនេះ ណាសាបានអនុវត្តដោយជោគជ័យនូវបេសកកម្មមួយនៅក្នុងកម្មវិធី Artemis នោះគឺ Artemis 1។ ក្នុងបេសកកម្មនេះ យាន Orion គ្មានមនុស្សបានហោះទៅកាន់គន្លងតារាវិថីព្រះចន្ទ និងត្រលប់មកកាន់ផែនដីក្នុងឆ្នាំ 2022។ ណាសាកំពុងត្រៀមសម្រាប់បេសកកម្ម Artemis 2 ដែលគ្រោងនឹងនាំអវកាសចរ 4 រូប ហោះទៅគោចរជុំវិញព្រះចន្ទនៅឆ្នាំ 2024។ Artemis 3 នឹងនាំអ្នកអវកាសចុះចតក្បែរប៉ូលខាងត្បូងរបស់ព្រះចន្ទនៅចុងឆ្នាំ 2025 ឬ 2026 បើសិនគ្រប់យ៉ាងដំណើរការដោយរលូន។

ណាសាកំពុងប្រើប្រាស់ទំនាក់ទំនងពាណិជ្ជកម្ម និងអន្តរជាតិដើម្បីសម្រេចបានគោលដៅប្រកបដោយមហិច្ឆតារបស់ Artemis ។ ដៃគូសហការរបស់ណាសាសម្រាប់គម្រោង Artemis រួមមានជាអាទិ៍ ទីភ្នាក់ងារអវកាសអឺរ៉ុប (ESA), អូស្ត្រាលី, SpaceX ។ល។

September 6, 2023

Tag: មាន​

Tag: មាន