ពិបាក - La Reine Media

បើមានមនុស្សស្លាប់ក្នុងទីអវកាស តើនឹងមានរឿងអ្វីកើតឡើង ហើយត្រូវដោះស្រាយយ៉ាងណា?

វិធីចាត់ចែងសាកសពនៅពេលមានមនុស្សស្លាប់ក្នុងទីអវកាស គឺអាស្រ័យលើគម្លាតជាមួយនឹងផែនដី រួមនឹងកត្តាជាច្រើនផ្សេងទៀត។

ចាប់តាំងពីមនុស្សលោកបានចាប់ផ្ដើមស្រាវជ្រាវទីអវកាសកាលពីជាង 60 ឆ្នាំមុន មកដល់បច្ចុប្បន្នមានមនុស្សចំនួន 20 នាក់បានបាត់បង់ជីវិត រួមមាន 14 នាក់នៅក្នុងគ្រោះថ្នាក់យាន Space Shuttle របស់ណាសា ក្នុងឆ្នាំ 1986, 3 នាក់ក្នុងបេសកកម្ម Soyuz 11 កាលពីឆ្នាំ 1971 និង 3 នាក់ក្នុងហេតុការណ៍ឆេះប្រព័ន្ធបាញ់បង្ហោះរ៉ុក្កែត Apollo 1 ក្នុងឆ្នាំ 1967។

ក្នុងគ្រាដែលណាសាកំពុងមានគម្រោងនាំមនុស្សឡើងទៅកាន់ឋានព្រះចន្ទក្នុងឆ្នាំ 2025 និងភពអង្គារក្នុងទសវត្សរ៍ក្រោយ បូករួមនឹងការរីកចម្រើននៃវិស័យទេសចរណ៍អវកាស ដែលអាចនឹងមានមនុស្សកាន់តែច្រើនធ្វើដំណើរទៅកាន់ទីអវកាស ក៏មានសំណួរមួយត្រូវបានលើកឡើង នោះគឺថា «បើមានមនុស្សស្លាប់ក្នុងទីអវកាស តើនឹងមានរឿងអ្វីកើតឡើងចំពោះសាកសព?»។

ទាក់ទងនឹងសំណួរខាងលើ Emmanuel Urquieta សាស្ត្រាចារ្យវេជ្ជសាស្ត្រអវកាស និងវេជ្ជសាស្ត្របន្ទាន់នៅសាកលវិទ្យាល័យ Baylor ជាអ្នកជំនាញក្នុងការសិក្សាស្រាវជ្រាវរកវិធីសាស្ត្រថែទាំសុខភាពសម្រាប់អ្នកអវកាស បានបង្ហើបឱ្យដឹងអំពីវិធីដោះស្រាយករណីបែបនេះ។

បើសិនមានមនុស្សស្លាប់ក្នុងបេសកកម្មនៅលើគន្លងតារាវិថីកម្រិតទាបរបស់ផែនដី ដូចនៅក្នុងស្ថានីយអវកាសអន្តរជាតិ (ISS) ជាដើម ក្រុមអវកាសចរអាចដាក់សាកសពក្នុងកាប៊ីនយានអវកាស និងនាំត្រលប់មកកាន់ផែនដីក្នុងរយៈពេលតែប៉ុន្មានម៉ោងប៉ុណ្ណោះ។ ដូច្នេះ ករណីបែបនេះនឹងមិនចោទជាបញ្ហាធំឡើងសម្រាប់សាកសព។

ស្ថានការណ៍នឹងខុសគ្នា បើសិនមានអវកាសចរស្លាប់ក្នុងដំណើរទៅកាន់ភពអង្គារដែលមានចម្ងាយជិត 483 លានគីឡូម៉ែត្រពីផែនដី។ ក្នុងករណីនេះ ក្រុមហោះហើរនឹងមិនអាចត្រលប់មកកាន់ផែនដី រួចក៏បន្តធ្វើដំណើរទៅកាន់ភពអង្គារទៀតបានទេ។ ជំនួសមកវិញ សាកសពទំនងជានឹងត្រូវត្រលប់មកកាន់ផែនដីជាមួយនឹងក្រុមហោះហើរនៅចុងបញ្ចប់នៃបេសកកម្ម ពោលគឺប្រហែលពីរឆ្នាំក្រោយ។ ក្រុមហោះហើរនឹងរក្សាសាកសពក្នុងកាប៊ីនដោយឡែក ឬក្នុងថង់សម្រាប់ដាក់សាកសព។ តាមទ្រឹស្ដី សីតុណ្ហភាព និងសំណើមក្នុងយានអវកាស នឹងជួយរក្សាសាកសពមិនឱ្យរលួយ។

ក៏ប៉ុន្តែ វិធីសាស្ត្រខាងលើអនុវត្តបានសម្រាប់តែមនុស្សដែលបានស្លាប់ក្នុងបរិស្ថានដែលមានសម្ពាធបរិយាកាសល្អដូចនៅក្នុងស្ថានីយអវកាសប៉ុណ្ណោះ។ បើសិនមានមនុស្សស្លាប់លើដីភពអង្គារ ការបូជាសពដោយការដុតគឺជារឿងពិបាក ដោយសារក្រុមហោះហើរត្រូវការថាមពលដើម្បីធ្វើកិច្ចការចាំបាច់ដទៃ។ ចំណែកការបញ្ចុះសពវិញក៏មិនមែនជាគំនិតល្អ ព្រោះថា បាក់តេរី និងមេរោគជាច្រើនក្នុងរាងកាយសាកសព អាចបំពុលបរិស្ថានរបស់ដីនៅភពអង្គារ។ ជំនួសមកវិញ ក្រុមអវកាសចរប្រហែលជាត្រូវរក្សាសាកសពក្នុងថង់ មុននឹងនាំយកមកកាន់ផែនដី៕

August 8, 2023

អាម៉េរិកផ្ដល់ជំនួយជាយន្តហោះគ្មានមនុស្សបើកមហាតូចឱ្យអ៊ុយក្រែន

អ៊ុយក្រែននឹងទទួលបានយន្តហោះគ្មានមនុស្សបើកបរ (UAV) Black Hornet ខ្នាតតូចមួយឈុត នៅក្នុងកញ្ចប់ជំនួយថ្មីដែលមានតម្លៃ 400 លានដុល្លារអាម៉េរិក។

មន្ទីរបញ្ចកោណបានប្រកាសឱ្យដឹងអំពីកញ្ចប់ជំនួយតម្លៃ 400 លានដុល្លារសម្រាប់អ៊ុយក្រែន ក្នុងនោះមានទាំងគ្រាប់កាំភ្លើងច្រើនប្រភេទសម្រាប់ប្រព័ន្ធការពារដែនអាកាស និងបណ្ដាញយន្តហោះ UAV ខ្នាតមហាតូចដែលមានឈ្មោះថា Black Hornet។

Black Hornet គឺជា UAV ដែលមានទំហំតូចខ្លាំង និងត្រូវបានប្រើប្រាស់ដើម្បីប្រមូលព័ត៌មានស៊ើបការណ៍សម្ងាត់។ មុននោះ អង់គ្លេស និងន័រវែសក៏ធ្លាប់បានផ្ដល់ជំនួយជាយន្តហោះ Black Hornet នេះដល់អ៊ុយក្រែន។

Black Hornet មានបណ្ដោយប្រហែល 10 សង់ទីម៉ែត្រ អាចហោះបានក្នុងរង្វង់ 2 គីឡូម៉ែត្រ និងមានល្បឿន 4.7 ម៉ែត្រ/វិនាទី អាចដំណើរការជាបន្តបន្ទាប់បាន 25 នាទី។

Black Hornet ត្រូវបានបំពាក់កាមេរ៉ាខ្នាតតូចមួយចំនួន និងអាចហោះទៅក្បែរគោលដៅដោយមិនងាយនឹងត្រូវបានមើលឃើញ។ ទន្ទឹមនឹងនេះ វាក៏អាចថតរូប ថតវីដេអូនៅពេលយប់ និងបញ្ជូនវីដេអូទៅកាន់មូលដ្ឋាននៅក្នុងរយៈចម្ងាយប្រហែល 2 គីឡូម៉ែត្រផងដែរ។

កំណែថ្មីរបស់ Black Hornet មិនតម្រូវឱ្យយកឧបករណ៍អមមួយចំនួនទៅជាមួយ ដើម្បីលុបបំបាត់ហានិភ័យព័ត៌មានត្រូវធ្លាក់ទៅលើដៃសត្រូវ។

Black Hornet មានប្រយោជន៍ច្រើននៅក្នុងការតាមដានគោលដៅ និងឈ្លបយកការណ៍។ ប៉ុន្តែ UAV នេះក៏ពិបាកប្រើប្រាស់នៅពេលមានអាកាសធាតុអាក្រក់ មានដូចជា ខ្យល់ព្យុះ និងភ្លៀងធំជាងដើម។ ទោះជាយ៉ាងនេះក៏ដោយ អ្នកជំនាញនិយាយថា កំណែថ្មីដែលមានទម្ងន់ធ្ងន់ជាង អាចទប់ទល់នឹងខ្យល់ព្យុះដែលមានល្បឿន 28 គីឡូម៉ែត្រ/ម៉ោង៕

July 26, 2023

អាយុ 99 ឆ្នាំ តែសុខភាពមាំមួនដូចអាយុ 40 ដោយសារតែខ្ញី

(ប្រទេសចិន) – ដោយសារតែទម្លាប់ទទួលទានខ្ញីត្រាំទឹកខ្មេះបីចំណិតជារៀងរាល់ថ្ងៃ វេជ្ជបណ្ឌិត Lu Zhizheng មានសុខភាពមាំមួនដូចទៅនឹងបុរសវ័យកណ្ដាល បើទោះគាត់មានអាយុ 99 ឆ្នាំហើយក៏ដោយ។

ក្នុងវ័យជិត 100 ទៅហើយ ប៉ុន្តែវេជ្ជបណ្ឌិតផ្នែកឱសថបុរាណ Lu Zhizheng នៅមានរាងកាយមាំមួន សុខភាពល្អ ការចងចាំល្អជាងមនុស្សចាប់ពីវ័យ 60 ទៅ 70 ឆ្នាំទៅទៀត។ នៅពេលត្រូវបានសួរអំពីអាថ៌កំបាំងដែលបានជួយឱ្យគាត់មានសុខភាពល្អបែបនេះ វេជ្ជបណ្ឌិត Lu ប្រាប់ថា ដោយសារតែគ្រឿងទេសពីរប្រភេទដែលមានតម្លៃទាប និងតែងត្រូវបានប្រើប្រាស់ក្នុងគ្រួសារ នោះគឺខ្ញី និងទឹកខ្មេះ។

វេជ្ជបណ្ឌិត Lu ឱ្យដឹងថា ក្នុងរយៈពេលប្រហែលពី 20 ទៅ 30 ឆ្នាំកន្លង គាត់តែងតែបរិភោគខ្ញីត្រាំទឹកខ្មេះចំនួនបីចំណិតជារៀងរាល់ព្រឹក។ គាត់ប្រាប់ថា វិធីនេះជួយកាត់បន្ថយអាការទល់ខ្យល់ ពិបាករំលាយអាហារចំពោះមនុស្សដែលមានការងារមមាញឹក និងមានរបបអាហារមិនត្រឹមត្រូវ។ ក្រៅពីនេះ ខ្ញីក៏ជួយកម្ដៅក្រពះ និងកាត់បន្ថយបញ្ហាផ្ដាសាយផងដែរ។

ដើម្បីបញ្ជាក់អំពីប្រសិទ្ធភាពរបស់ខ្ញីត្រាំទឹកខ្មេះ លោក Lu ក៏បានប្រកាសបង្ហាញលទ្ធផលនៃការពិនិត្យសុខភាពជាទៀតទាត់របស់គាត់។ លទ្ធផលបង្ហាញថា សរសៃឈាមរបស់គាត់ល្អ ប្រហាក់ប្រហែលនឹងមនុស្សវ័យកណ្ដាល។ រាងកាយអាយុ 90 ឆ្នាំ ប៉ុន្តែបេះដូងនៅក្នុងវ័យ 40 ឆ្នាំ។

វិធីធ្វើខ្ញីត្រាំទឹកខ្មេះរបស់វេជ្ជបណ្ឌិត Lu មានដូចតទៅ៖ យកខ្ញីខ្ចី លាងឱ្យស្អាត ទុកឱ្យស្ងួត ចិតជាចំណិត រួចរោយអំបិលបន្តិច ហើយផ្អាប់ទុក 12 ម៉ោង។ បន្ទាប់មក យកចំណិតខ្ញីទាំងនេះទៅក្នុងក្រឡ ចាក់ទឹកខ្មេះពីលើបន្តិច រួចគ្របឱ្យជិត ទុកពី 4 ទៅ 5 ថ្ងៃ មុនពេលបរិភោគ។ គាត់ថា ល្អបំផុតគឺប្រើប្រាស់ទឹកខ្មេះធ្វើពីអង្ករ និងលាយជាមួយទឹក នៅក្នុងការត្រាំខ្ញីនេះ។

ការទទួលទានខ្ញីត្រាំទឹកខ្មេះ ឬហៅថាខ្ញីជ្រក់ទឹកខ្មេះ ក៏ជួយកាត់បន្ថយជាតិខ្លាញ់ក្នុងឈាម ជួយព្យាបាលជំងឺលើសខ្លាញ់អាក្រក់ទៀតផង៕

July 19, 2023

សំបុត្រចូលមើល Messi ទាត់ឱ្យក្លឹប Inter Miami ក្នុងការប្រកួតដំបូង កំពុងឡើងថ្លៃខ្ពស់ខ្លាំង

(សហរដ្ឋអាម៉េរិក) – សំបុត្រចូលទស្សនា Lionel Messi ទាត់ក្នុងការប្រកួតដំបូងនៅ Inter Miami ដែលនឹងត្រូវប៉ះក្រុម Cruz Azul ក្នុងក្របខណ្ឌ Leagues Cup នៅថ្ងៃទី 21 កក្កដាខាងមុខ បានឡើងថ្លៃលើសពី 100,000 ដុល្លារអាម៉េរិក។

កាលពីចុងសប្ដាហ៍កន្លង គេហទំព័ររបស់ក្លឹបបាល់ទាត់ Inter Miami បានបញ្ជាក់ថា Messi រួមនឹងកីឡាករថ្មី Sergio Busquets អាចទាត់នៅក្នុងការប្រកួតជាមួយនឹងក្រុម Cruz Azul ក្នុងក្របខណ្ឌ Leagues Cup នៅលើទីលាន DRV PNK ក្នុងថ្ងៃទី 21 កក្កដា 2023។ Leagues Cup គឺជាពានរង្វាន់ប្រចាំឆ្នាំ ដែលត្រូវបានបង្កើតឡើងកាលពីឆ្នាំ 2019 និងមានការចូលរួមពីបណ្ដាក្លឹបមកពីពានរង្វាន់បាល់ទាត់អាជីពអាម៉េរិក (MLS) និង Liga MX របស់ម៉ិចស៊ិច នៅអាម៉េរិកខាងជើង។

យោងតាម Goal សំបុត្រចូលទស្សនាការប្រកួតនៅក្នុងកីឡដ្ឋាន DRV PNK កាន់តែពិបាករកទិញ ហើយតម្លៃក៏កើនឡើងខ្ពស់ខ្លាំងក្នុងប៉ុន្មានថ្ងៃចុងក្រោយនេះ។ Vivid Seats ដែលជាគេហទំព័រជំនាញខាងទិញ-លក់សំបុត្រចូលមើលបាល់ទាត់ បច្ចុប្បន្នកំពុងដាក់លក់សំបុត្រចូលទស្សនា Messi ទាត់ក្នុងការប្រកួតដំបូងនៅ Inter Miami ក្នុងតម្លៃ 110,000 ដុល្លារអាម៉េរិក/សំបុត្រ។

តម្លៃមធ្យមសម្រាប់សំបុត្រចូលមើលការប្រកួតរវាង Inter Miami និង Cruz Azul គឺ 487 ដុល្លារ ពោលគឺខ្ពស់ជាងទ្វេដង បើធៀបនឹងសំបុត្រចូលមើលការប្រកួតមិត្តភាពរវាង Inter Miami និងម្ចាស់ជើងឯក La Liga Barca កាលពីរដូវក្ដៅឆ្នាំមុន។

តម្រូវការសំបុត្រចូលមើល Messi ទាត់ក្នុងប្រកួតដំបូងនៅពានរង្វាន់បាល់ទាត់អាជីពអាម៉េរិក (MLS) ដែល Inter Miami ត្រូវប៉ះនឹងក្រុម Charlotte FC ក្នុងថ្ងៃទី 21 សីហា ក៏កើនឡើងខ្ពស់ផងដែរ និងត្រូវបានដាក់លក់ក្នុងតម្លៃប្រហែល 288 ដុល្លារ/សំបុត្រ។ តួលេខនេះអាចនឹងកើនឡើងខ្ពស់ជាងនេះនាពេលខាងមុខ បើសិន Messi បង្ហាញថ្វីជើងបានល្អនៅ Leagues Cup។

មិនត្រឹមតែសំបុត្រនោះទេ សូម្បីតែអាវរបស់ Messi ក៏ត្រូវបានអ្នកគាំទ្រតាមរកទិញច្រើនផងដែរ។ ដោយសារតែមិនទាន់ត្រូវបានដាក់លក់លើគេហទំព័ររបស់ Inter Miami ដូច្នេះអ្នកគាំទ្រមានតែរកទិញអាវលេខ 10 របស់ Messi នៅឯហាងក្នុងកីឡដ្ឋាន DRV PNK ដែលដាក់លក់ក្នុងតម្លៃ 199 ដុល្លារអាម៉េរិក/អាវ។

ទំព័រ Goal បានឱ្យដឹងថា តម្លៃសំបុត្រចូលមើលការប្រកួតរបស់ក្រុមបាល់ទាត់ Inter Miami បានកើនឡើងជិត 900% ចាប់តាំងពីក្លឹបនេះបានបញ្ជាក់ថា ចុះហត្ថលេខាជាមួយនឹង Messi កាលពីថ្ងៃទី 07 មិថុនា 2023។ នៅក្លឹបថ្មីនេះ កំពូលតារាបាល់ទាត់អាហ្សង់ទីន នឹងទទួលបានប្រាក់បៀវត្សរ៍ពី 50 លាន ដល់ 60 លានដុល្លារ/ឆ្នាំ។ តម្លៃសរុបនៃកិច្ចព្រមព្រៀងរបស់ Messi ក្នុងរយៈពេលពីរឆ្នាំកន្លះ នឹងចាប់ពី 125 លាន ដល់ 150 លានដុល្លារ។

Messi ក៏នឹងទទួលបានប្រាក់ខ្លះពីបណ្ដាគណនីថ្មីដែលចុះឈ្មោះមើល MLS នៅលើ Apple TV ក៏ដូចជាប្រាក់ចំណេញមួយផ្នែករបស់ក្រុមហ៊ុន Adidas នៅសហរដ្ឋអាម៉េរិកផងដែរ។

កាលពីព្រលប់ថ្ងៃទី 16 កក្កដា Messi ត្រូវបាន Inter Miami បង្កើតព្រឹត្តិការណ៍បង្ហាញខ្លួនមួយដែលមានឈ្មោះថា «The Unveil» នៅក្នុងកីឡដ្ឋាន DRV PNK។ នៅទីនេះ ម្ចាស់បាល់មាស 7 គ្រាប់ បានថ្លែងអំណរគុណអ្នកគាំទ្រ មិត្តរួមក្រុមថ្មី និងគណៈគ្រប់គ្រងក្លឹប Inter Miami ចំពោះការទទួលស្វាគមន៍ដ៏អស្ចារ្យនេះ ព្រមទាំងបានសម្ដែងអំពីមហិច្ឆតាចង់យកឈ្នះ ដើម្បីជួយឱ្យក្លឹបនេះរីកចម្រើនបន្តទៀត៕

July 18, 2023

បាតុភូត «ព្រះចន្ទយក្ស» ដំបូងរបស់ឆ្នាំ 2023 កើតឡើងនៅយប់នេះ

ព្រះចន្ទដែលមានរូបរាងធំជាងគេដំបូងក្នុងឆ្នាំ 2023 គឺស្ថិតក្នុងចំណោមព្រះចន្ទធំៗជាងគេដែលនឹងកើតឡើងក្នុងខែកក្កដា សីហា និងកញ្ញាឆ្នាំ 2023។

«ព្រះចន្ទយក្ស» នៅថ្ងៃទី 03 ខែកក្កដានេះ គឺជាព្រះចន្ទធំជាងគេដំបូងបង្អស់ក្នុងឆ្នាំ 2023។ ក្នុងព្រឹត្តិការណ៍នេះ ព្រះចន្ទនឹងធំជាងធម្មតារហូតដល់ 30% និងភ្លឺជាងធម្មតា 14% នៅពេលមើលពីផែនដី។ ក៏ប៉ុន្តែ ភាពខុសគ្នានេះតែងពិបាកដឹងបានដោយមើលនឹងភ្នែកទទេ លើកលែងតែអ្នកមើលព្រះចន្ទច្រើនយប់ជាបន្តបន្ទាប់។ នេះបើតាមទំព័រ Space។

បាតុភូត «ព្រះចន្ទយក្ស» គឺជាលទ្ធផលដែលកើតឡើងនៅពេលព្រះចន្ទគោចរចូលក្បែរផែនដីជាងធម្មតានៅក្នុងពេលព្រះចន្ទពេញបូណ៌មី។ មន្ត្រីរបស់ណាសាឱ្យដឹងនៅថ្ងៃនេះថា ថ្ងៃនេះព្រះចន្ទស្ថិតនៅចម្ងាយពីផែនដី 361,934 គីឡូម៉ែត្រ ជិតជាងធៀបនឹងចម្ងាយធម្យម 382,900 គីឡូម៉ែត្រ។

«ព្រះចន្ទយក្ស» កើតឡើងដោយសារតែគន្លងគោចររបស់ព្រះចន្ទជុំវិញផែនដីមិនមែនមូលឥតខ្ចោះ។ ដោយសារតែទំនាញផែនដី គន្លងគោចររបស់ព្រះចន្ទមានរូបរាងស្រដៀងពងក្រពើ នេះមានន័យថា អំឡុងខែខ្លះព្រះចន្ទនៅជិតផែនដី និងខែខ្លះទៀតនៅឆ្ងាយពីផែនដី។ ពេលបាតុភូត «ព្រះចន្ទយក្ស» កើតឡើង ក៏ជាពេលដែលព្រះចន្ទពេញវង់ និងស្ថិតនៅក្បែរផែនដីជាងធម្មតា។

ក្រោយខែកក្កដា បាតុភូមខាងលើនឹងកើតឡើងម្ដងទៀតនៅក្នុងថ្ងៃទី 01 សីហា, 30 សីហា និង 28 កញ្ញា ឆ្នាំ 2023។ ចំណែកឆ្នាំ 2024 វិញ «ព្រះចន្ទយក្ស» នឹងកើតឡើងតែពីរលើកប៉ុណ្ណោះ គឺនៅថ្ងៃទី 18 កញ្ញា និង 18 តុលា៕

July 3, 2023

ការស្រង់សាកសពកប៉ាល់ Titanic និងមូលហេតុដែលគេមិនអាចធ្វើបាន

ការស្រង់យកសាកសពកប៉ាល់ Titanic ដែលបានលិចកាលពី 111 ឆ្នាំមុន ពិតជាពិបាកនឹងធ្វើទៅរួច ព្រោះត្រូវការចំណាយប្រាក់ច្រើន រួមនឹងកត្តាជាច្រើនផ្សេងទៀត។

យោងតាមទំព័រ Business Insider មូលហេតុដែលគេមិនអាចស្រង់សាកសពកប៉ាល់ Titanic ឡើងគោកគឺ ដោយសារមានមូលហេតុធំៗបី រួមមាន ការចំណាយប្រាក់ច្រើន, Titanic កំពុងរលាយ និងត្រូវបានចាត់ទុកជាទីបញ្ចុះសព។

1-សាកសពកប៉ាល់ Titanic គឺជាកន្លែងបញ្ចុះសព

មនុស្សប្រហែល 1,500 នាក់បានស្លាប់នៅក្នុងហេតុការណ៍លិចកប៉ាល់ទេសចរណ៍ Titanic កាលពីឆ្នាំ 1912។ ក្រោយហេតុការណ៍នេះ សាកសពជាង 300 នាក់ត្រូវបានស្រង់ឡើងគោក ខណៈដែលសាកសពដទៃទៀត ខ្លះលិចទៅតាមកប៉ាល់ ខ្លះក៏អណ្ដែតចេញឆ្ងាយពីតំបន់កើតហេតុ។ រដ្ឋាភិបាលអាម៉េរិក និងអង់គ្លេស យល់ព្រមចាត់ទុកសាកសពកប៉ាល់ Titanic ជាទីបញ្ចុះសព ជាកន្លែងរម្លឹកហេតុការណ៍សោកនាដកម្ម។ ដូច្នេះ តំបន់នេះនឹងត្រូវបានការពារ ជំនួសឱ្យការស្រង់ឡើងគោក។

2- សាកសពកប៉ាល់ Titanic កំពុងរលាយ

កប៉ាល់នេះត្រូវបានសាងសង់ពីបន្ទះដែកកម្រាស់ 2.5 សង់ទីម៉ែត្រ និងប្រើប្រាស់ដែកគោលចំនួនពីរលានគ្រាប់។ បាក់តេរី Halomonas titanicae កំពុងតែនាំគ្នាស៊ីដែក និងស្ពាន់ធ័រនៅលើសាកសពកប៉ាល់ Titanic។ ក្នុងពេលរំលាយអាហារ បាក់តេរីនេះបង្កើតបានជា rusticle គ្របដណ្ដប់ពេញសាកសពកប៉ាល់។

Rusticle ជាវត្ថុធាតុម្យ៉ាងដែលដូចទៅនឹងកំណកច្រែះ និងងាយរលាយ។ ក្រៅពី rusticle ជាតិប្រៃរបស់ទឹកសមុទ្រ និងលំហូរទឹកសមុទ្រ ក៏ជាកត្តាដែលនាំឱ្យសាកសពកប៉ាល់ Titanic អាចបាត់ខ្លួននាពេលដ៏ខ្លីខាងមុច ពិបាកក្នុងការស្រង់ឡើងគោក។

3- គេនឹងត្រូវចំណាយប្រាក់យ៉ាងច្រើន បើសិនចង់ស្រង់សាកសព Titanic

ឆ្នាំ 1914 វិស្វាករ Charles Smith ធ្លាប់រៀបគម្រោងស្រង់សាកសពកប៉ាល់ Titanic ឡើងមកលើគោក។ ពេលនោះ លោកគណនាឃើញថា នឹងត្រូវចំណាយប្រាក់ 1.5 លានដុល្លារអាម៉េរិក គឺប្រហែល 45 លានដុល្លារបច្ចុប្បន្ន។ ក៏ប៉ុន្តែ កាលពីឆ្នាំ 2013 គេត្រូវចំណាយប្រាក់អស់ 800 លានដុល្លារក្នុងការស្រង់កប៉ាល់ Costa Concordia ដែលបានក្រឡាប់។ ដូច្នេះ ការស្រង់សាកសពកប៉ាល់ Titanic នឹងត្រូវចំណាយអស់ប្រាក់ច្រើនជាងនេះមិនខាន ព្រោះវាមានភាពស្មុគស្មាញខ្លាំងណាស់៕

June 27, 2023

ក្រោយពីម្ចាស់ Twitter និង Facebook ណាត់គ្នាប្រដាល់ក្នុងទ្រុង អ្នកលេងអ៊ីនធើណិតក៏ចាប់ផ្ដើមភ្នាល់

ពាក្យគន្លឹះ «Team Musk» និង «Team Zuck» កំពុងពេញនិយមលើបណ្ដាញសង្គម Twitter ខណៈដែលអ្នកនាំពាក្យរបស់ក្រុមហ៊ុន Meta ឱ្យដឹងថា Mark Zuckerberg ពិតជាទន្ទឹងរង់ចាំការប្រកួតជាមួយ Elon Musk នៅលើសង្វៀន។

កាលពីថ្ងៃទី 21 មិថុនា ចាប់ផ្ដើមពីរឿងរ៉ាវសរសេរលេងនៅលើ Twitter មហាសេដ្ឋី Elon Musk បានបបួលមហាសេដ្ឋី Mark Zuckerberg ណាត់ទីតាំងវាយគ្នានៅលើសង្វៀនក្នុងទ្រុងដែកនៅ Las Vegas ហើយម្ចាស់ Facebook ក៏យល់ព្រម។

សំណួរដែលសួរថា «អ្នកជ្រើសរើស Team Musk ឬ Team Zuck?» បានក្លាយជាពាក្យពេញនិយមនៅលើបណ្ដាញសង្គម Twitter និង Reddit។

«ខ្ញុំនឹងទស្សនាការប្រកួតឱ្យខាងតែបាន សូម្បីតែត្រូវចំណាយប្រាក់ច្រើន។ ខ្ញុំភ្នាល់ថា Zuckerberg នឹងឈ្នះ។ គាត់ចេះក្បាច់គុន ចំណែក Musk គ្រាន់តែមានមាឌធំប៉ុណ្ណោះ» គណនីឈ្មោះ Stefan សរសេរដូច្នេះ។

គណនីឈ្មោះ lkHouVanWiskunde សរសេរថា «មិនមែន Zuckerberg ទើបតែក្លាយជាជើងឯកគុនជឺជិតស៊ូប្រេស៊ីល (Jiu-jitsu) ទេអី? គាត់នៅក្មេង។ នេះនឹងជាការប្រកួតតែម្ខាង»។

អ្នកខ្លះថា លោក Musk ត្រូវប្រើប្រាស់មនុស្សយន្តទើបឈ្នោះ Zuckerberg។ ក៏ប៉ុន្តែ ក៏នៅមានអ្នកខ្លះជ្រើសរើសខាង Team Musk។ «ប្រាក់របស់ខ្ញុំទុកសម្រាប់អ្នកតែអង្គុយដោយមិនចាំបាច់កល់កៅអីប៉ុណ្ណោះ» អ្នកលេង Twitter ម្នាក់សរសេរដូច្នេះ និងបង្ហោះរូបថត Zuckerberg ត្រូវបន្ថែមពូកកៅអីនៅក្នុងសវនាការនៅសភាអាម៉េរិក។

បើនិយាយអំពីន័យចំ Zuckerberg អាយុ 39 ឆ្នាំ ប្រាកដជាមានប្រៀបជាង ដោយសារតែនៅក្មេង ជាអ្នកគុននិយម MMA និងធ្លាប់ឈ្នះក្នុងការប្រកួតគុនជឺជិតស៊ូប្រេងស៊ីល។ ចំណែកលោក Musk អាយុ 51 ឆ្នាំ មានប្រៀបជាងខាងកម្ពស់ និងទម្ងន់ ហើយធ្លាប់និយាយថា បានចូលរួមវាយគ្នានៅតាមដងផ្លូវពេលធំឡើងនៅអាហ្វ្រិកខាងត្បូង។

Business Insider បានវាយតម្លៃថា Zuckerberg នឹងឈ្នះ ដោយសារតែក្បាច់គុនជឺជិតស៊ូ ដែលប្រើក្បាច់ចាប់កាច់ដៃជើងដើម្បីគ្រប់គ្រងគូប្រកួត។

ក៏ប៉ុន្តែ លោក Musk បានបង្ហើបឱ្យដឹងថា «ខ្ញុំមានក្បាច់ពិសេសដែលហៅថា «The Walrus» ក្នុងនោះ ខ្ញុំគ្រាន់តែស្ថិតនៅពីលើគូប្រកួត និងមិនបាច់ធ្វើអ្វីទាំងអស់»។

ចំណែកទំព័រ Guardian វិញ ចុះផ្សាយថា ក្នុងចំណោមមិត្តរបស់លោក Musk ក៏មាន Lex Fridman ដែលជាអ្នកគុននិយមជឺជិតស៊ូ។ «គាត់អាចរៀនក្បាច់គុនការពារខ្លួនពីមិត្តរបស់គាត់ បើសិនការប្រកួតកើតឡើង» ទំព័រនេះសរសេរដូច្នេះ។

លោក Musk ក៏ធ្លាប់ជាអ្នកលេងម្នាក់កាលធំឡើងនៅប្រទេសអាហ្វ្រិកខាងត្បូង

Elena Cresci អតីតអ្នកសារព័ត៌មាន និងជាជើងឯកក្បាច់គុនបុរាណខ្មែរ (នៅថៃ គេហៅមួយថៃ) យល់ថា បើសិនមានយុទ្ធសាស្ត្រគេច លោក Musk ពិតជាអាចផ្ដួលគូប្រកួត។

ដោយឡែក ទំព័រ The Verge អះអាងថា ទោះជាអ្នកណាឈ្នះក៏ដោយ ការប្រកួតរវាងម្ចាស់ Twitter និង CEO របស់ Meta នឹងជាការប្រកួតមួយដ៏អស្ចារ្យបំផុត។

ក៏ប៉ុន្តែ បើទោះនេះគឺជាការភ្នាល់ពិតប្រាកដក៏ដោយ ការប្រកួតរវាងមហាសេដ្ឋីពីររូបនេះ ទំនងជាពិបាកនឹងរៀងចំការប្រកួតលើសង្វៀនជាក់ស្ដែង៕

June 23, 2023

វរនាវីឯកទ័ពជើងទឹកអាម៉េរិកថា អ្នកជាប់ក្នុងនាវា Titan ប្រហែលកំពុងរងភាពត្រជាក់ខ្លាំង

វរនាវីឯកនៃទ័ពជើងទឹកអាម៉េរិកដែលចូលនិវត្តន៍ យល់ថា មនុស្សទាំងប្រាំនាក់នៅក្នុងនាវាមុជទឹក Titan ដែលកំពុងបាត់ខ្លួន ប្រហែលកំពុងរងភាពត្រជាក់ខ្លាំង ហើយប្រឈមនឹងហានិភ័យទាក់ទងនឹងបញ្ហាអុកស៊ីសែន។

វរនាវីឯក David Marquet អតីតមេបញ្ជាការនាវាមុជទឹកនៃទ័ពជើងទឹកអាម៉េរិក កាលពីថ្ងៃទី 21 មិថុនា បាននិយាយថា យោងតាមការវាយតម្លៃផ្ទាល់ខ្លួនរបស់គាត់ មនុស្សដែលកំពុងជាប់ក្នុងនាវា Titan នៅមហាសមុទ្រអាត្លង់ទិក កំពុងស្រេកឃ្លានក្រោយរយៈពេលបីថ្ងៃ ប៉ុន្តែបញ្ហានេះប្រហែលជាមិនធ្វើឱ្យពួកគេស្លាប់។ បើសិនជានៅមានជីវិត ពួកគេអាចនឹងពិបាកទ្រាំនៅក្នុងទីដ៏តូចចង្អៀតរបស់នាវា។

«ពួកគេកំពុងតែរងភាពត្រជាក់ខ្លាំង ព្រោះថា តំបន់ទឹកនៅជុំវិញនាវាសុទ្ធតែមានសីតុណ្ហភាព 0 អង្សាសេ ឬទាបជាងនេះ។ ពួកគេត្រូវចូលមកក្បែរគ្នាដើម្បីទទួលកម្ដៅពីរាងកាយ» លោក Marquet អះអាងដូច្នេះ។

នៅពេលពួកគេដកដង្ហើមចេញ ចំហាយទឹកនឹងប្រមូលផ្ដុំគ្នា បង្កើតបានជាស្រទាប់អ័ព្ទត្រជាក់ខាងក្នុងនាវា ប៉ុន្តែប្រការសំខាន់គឺអុកស៊ីសែនកំពុងថយចុះជាលំដាប់ ខណៈដែលពួកគេបន្តបញ្ចេញកាបូន។

នាវា Titan ប្រហែលជាកាត់បន្ថយការស្រូបយកឧស្ម័នកាបូន។ បើសិនកំហាប់កាបូនក្នុងនាវានេះមានកម្រិតខ្ពស់ វានឹងធ្វើឱ្យមានអាការៈឈឺក្បាល ក្អួតចង្អោរ និងបាត់បង់ស្មារតី។

មន្ត្រីអាម៉េរិកកាលពីម្សិលមិញឱ្យដឹងថា ក្រុមសង្គ្រោះបានឮសំឡេងខ្លាំងនៅក្រោមសមុទ្រ ប៉ុន្តែមិនអាចកំណត់បានថាជាសំឡេងអ្វី។ ទំហំនៃការស្វែងរកត្រូវបានពង្រីកទ្វេដង បើធៀបនឹងផ្ទៃដីរបស់រដ្ឋ Connecticut (ជាង 13,000 គីឡូម៉ែត្រក្រឡា)។

សមត្ថកិច្ចអាម៉េរិក កាលពីថ្ងៃទី 18 មិថុនា បានទទួលដំណឹងថា Titan ដែលជានាវាមុជទឹកមួយគ្រឿងក្នុងចំណោមបីគ្រឿងរបស់ក្រុមហ៊ុន OceanGate Expeditions បានបាត់ខ្លួននៅក្នុងមហាសមុទ្រអាត្លង់ទិក នៅថ្ងៃទី 18 មិថុនា ពេលកំពុងធ្វើដំណើរទេសចរណ៍នៅឯតំបន់បាតសមុទ្រដែលមានសាកសពកប៉ាល់ Titanic។

ភ្លាមៗបន្ទាប់ពីហេតុការណ៍ដាច់ទំនាក់ទំនងជាមួយនាវា Titan បានកើតឡើង សមត្ថកិច្ច និងក្រុមសង្គ្រោះក៏ត្រូវបានបញ្ជូនទៅជួយស្វែងរក។ ក្រុមមនុស្សក្នុងនាវាមុជទឹក Titan ដែលកំពុងបាត់ខ្លួន ត្រូវបានគេជឿថា រួមមាន មហាសេដ្ឋីអង់គ្លេស Hamish Harding, អ្នកជំនាញបារាំង Paul-Henry Nargeolet, ស្ថាបនិករបស់ OceanGate Expeditions លោក Stockton Rush, អ្នកជំនួញប៉ាគីស្ថាន Shahzada Dawood និងកូនប្រុស Suleman៕

June 22, 2023

រោងចក្រដំបូងគេបង្អស់នៅក្នុងទីអវកាស ចាប់ផ្ដើមដំណើរការ

(សហរដ្ឋអាម៉េរិក) – ក្រុមហ៊ុន Varda Space Industries នឹងផលិតឱសថ រួមនឹងវត្ថុធាតុផ្សេងៗទៀតនៅលើគន្លងតារាវិថីផែនដី តាមរយៈកាប៊ីនដែលហោះអមនឹងផ្កាយរណប។

ក្រុមហ៊ុន Varda Space Industries នៅរដ្ឋ California ប្រកាសថា បានទទួលជោគជ័យក្នុងការបាញ់បង្ហោះ W-Seres 1 ដែលជាផ្កាយរណបដំបូងរបស់ខ្លួន ឡើងទៅកាន់គន្លងគោចរផែនដី។ ក្រុមហ៊ុននេះកំពុងឆ្ពោះទៅរកការផលិតវត្ថុធាតុជាច្រើននៅក្នុងទីអវកាស។ វត្ថុធាតុទាំងនេះមិនអាចបង្កើតឡើងនៅលើផែនដី ឬអភិវឌ្ឍឆាប់រហ័សជាមួយនឹងគុណភាពខ្ពស់ជាង ធៀបនឹងនៅក្នុងស្ថានភាពគ្មានទំនាញផែនដី។

ផ្ទាំងសូឡារបស់រោងចក្រដំបូងក្នុងអវកាសនេះ បានបែរទៅរកព្រះអាទិត្យ និងចាប់ផ្ដើមពន្លាតខ្លួន។ នេះបើតាមការឱ្យដឹងរបស់ Varda បន្ទាប់ពីផ្កាយរណបបានហោះចូលដល់គន្លងគោចរ នៅក្នុងបេសកកម្ម Transporter-8 របស់ SpaceX កាលពីថ្ងៃទី 13 មិថុនា 2023។

ផ្កាយរណប W-Series 1 ត្រូវបានបំពាក់កាប៊ីនទម្ងន់ 90 គីឡូក្រាម ដែលត្រូវបានរចនាឡើងដើម្បីស្រាវជ្រាវឱសថ។ កាប៊ីននេះនឹងផ្ដាច់ខ្លួន មុនពេលចាប់ផ្ដើមហោះហើរក្នុងអវកាស ប៉ុន្តែនៅតែភ្ជាប់ជាមួយនឹងបណ្ដាញថាមពល កម្លាំងរុញច្រាន និងទំនាក់ទំនងចាំបាច់ដើម្បីកំណត់ទិស។ ក្នុងភារកិច្ចដំបូង បណ្ដាញខាងលើត្រូវបានផ្គត់ផ្គង់ដោយក្រុមហ៊ុន Rocket Lab។ បន្ទាប់មក ការពិសោធនឹងត្រូវបានធ្វើឡើងដោយរ៉ូបូតក្នុងកាប៊ីន។

សកម្មភាពរបស់ Varda គឺយោងទៅតាមការសិក្សាស្រាវជ្រាវផ្នែកវិទ្យាសាស្ត្រដែលបញ្ជាក់ថា ប្រូតេអ៊ីនក្នុងអវកាសអាចកកើតរចនាសម្ព័ន្ធល្អជាងធៀបនឹងនៅលើផែនដី ដោយសារតែបរិស្ថានមាន និងគ្មានទំនាញផែនដី។

បេសកកម្មដំបូងរបស់ Varda នឹងផ្ដោតទៅលើការអភិវឌ្ឍ ritonavir ក្នុងអវកាស។ Ritonavir គឺជាថ្នាំដែលតែងត្រូវបានប្រើប្រាស់សម្រាប់ប្រឆាំងនឹង HIV ដែលជាវីរុសបង្កឱ្យមានជំងឺអេដស៍ ប៉ុន្តែប៉ុន្មានឆ្នាំចុងក្រោយនេះ វាក៏ត្រូវបានប្រើប្រាស់ដើម្បីព្យាបាលជំងឺកូវីដ-19។

ក្រោយពីការពិសោធរបស់ Varda បានបញ្ចប់ កាប៊ីននេះនឹងត្រូវបានផ្កាយរណបរុញទម្លាក់មកកាន់ផែនដី និងចុះចតដោយប្រើប្រាស់ឆត្រយោង មុនពេលអ្នកវិទ្យាសាស្ត្រប្រមូលយកវត្ថុធាតុឱសថ។

ក្រុមហ៊ុន Varda ត្រូវបានបង្កើតឡើងដោយអតីតវិស្វករអេឡិចត្រូនិចអាកាសចរណ៍របស់ SpaceX លោក Will Bruye និង Delian Asparouhov។ គោលដៅរបស់ពួកគេគឺបង្កើតផលិតផលនានានៅក្នុងអវកាស ដែលរោងចក្រនៅលើផែនដីមិនអាច ឬពិបាកធ្វើបានល្អ៕

June 15, 2023

អនុសាសន៍របស់ស្ត្រីដោះបំណុល 300,000 ដុល្លាររួចរាល់ក្នុងបីឆ្នាំ និងក្លាយជាសេដ្ឋិនី

Bernadette Joy បានទូទាត់បំណុលចំនួន 300,000 ដុល្លារអាម៉េរិករួចស្រេច ហើយបច្ចុប្បន្នសន្សំទ្រព្យបានមួយលានដុល្លារអាម៉េរិក។

នៅពេលនិយាយដល់អាទិភាពក្នុងហិរញ្ញវត្ថុ អ្នកជំនាញស្ទើរតែទាំងអស់យល់ស្របថា ការសន្សំសំច័យប្រាក់ និងការបង្កើតខ្ទង់ប្រាក់សម្រាប់ហេតុការណ៍បន្ទាន់នៅមុនពេលផ្ដោតទៅលើការវិនិយោគគឺជាគំនិតឆ្លាតវៃ។

យោងតាម Bernadette Joy ដែលជាគ្រូបណ្ដុះបណ្ដាលផ្នែកហិរញ្ញវត្ថុ និងជាស្ថាបនិករបស់ក្រុមហ៊ុន Crush Your Money Goals ប្រការខាងលើនោះពុំមែនមានន័យថាជាការសំច័យហួសហេតុនោះទេ។ Joy បានទូទាត់បំណុល 300,000 ដុល្លារអាម៉េរិកក្នុងរយៈពេលបីឆ្នាំ ហើយបច្ចុប្បន្ន អ្នកស្រីមានទ្រព្យមួយលានដុល្លារ។ អ្នកស្រីឱ្យដឹងថា អតិថិជនមួយចំនួនរបស់អ្នកស្រី សន្សំប្រាក់បានច្រើនជាងតម្រូវការទៅទៀត។

អ្នកស្រី Joy ថ្លែងថា៖ «ពួកគេកំពុងមានភាពយឺតយ៉ាវនៅពេលមានលទ្ធភាពគ្រប់គ្រាន់ក្នុងការវិនិយោគ។ នៅពេលអ្នកសន្សំបានប្រាក់គ្រប់គ្រាន់សម្រាប់ខ្ទង់ហេតុការណ៍បន្ទាន់ អ្នកអាចបង្វែរទ្រព្យមួយផ្នែកទៅកាន់ខ្ទង់វិនិយោគ ដើម្បីមានមូលដ្ឋានហិរញ្ញវត្ថុរឹងមាំ និងយូរអង្វែង»។

ប្រាក់សន្សំសម្រាប់ខ្ទង់ដោះស្រាយបញ្ហាបន្ទាន់ ត្រូវមានចំនួនប៉ុន្មាន ទើបហៅថា ឆ្លាតវៃ

អ្នកជំនាញផ្នែកហិរញ្ញវត្ថុស្ទើរតែទាំងអស់ រួមទាំងអ្នកស្រី Joy ផងដែរ យល់ថា សន្សំប្រាក់សម្រាប់ខ្ទង់ចំណាយប្រចាំថ្ងៃ ឱ្យបានចាប់ពី 3 ខែដល់ 6 ខែ គឺជារឿងឆ្លាតវៃ។ ចំណែក Suze Orman ដែលជាម្ចាស់សៀវភៅ «ស្ត្រី និងប្រាក់កាស» បានចែករំលែកថា «ការពិតនៃបញ្ហាគឺថា អ្នកគួរមានខ្ទង់ប្រាក់សម្រាប់ដោះស្រាយហេតុការណ៍បន្ទាន់ដែលអាចប្រើប្រាស់បានមួយឆ្នាំ ចាប់ពីពេលនេះ» គឺជារឿងល្អ។

ប្រការនេះទំនងជាពិបាកអនុវត្ត។ យោងតាមការស្រាវជ្រាវមួយរបស់ Bankrate កាលពីឆ្នាំ 2021 ពលរដ្ឋអាម៉េរិក ជាងពាក់កណ្ដាល (51%) ឯណោះ ដែលមានខ្ទង់ប្រាក់សម្រាប់ដោះស្រាយបញ្ហាបន្ទាន់តិចជាងខ្ទង់ចំណាយប្រចាំថ្ងៃ រយៈពេល 3 ខែ។ ក្នុងចំណោម 51% នោះ មាន 25% ពុំមានខ្ទង់ប្រាក់សម្រាប់ដោះស្រាយបញ្ហាបន្ទាន់ទាល់តែសោះ។

ដើម្បីសន្សំប្រាក់ឱ្យបានគ្រប់គ្រាន់ អ្នកអាចសន្សំដោយខ្លួនឯង និងគោរពតាមគោលការ 50/20/30 ដែលក្នុងនោះ អ្នកត្រូវដាក់ 20% នៃប្រាក់ចំណួលប្រចាំខែសរុប ទៅក្នុងខ្ទង់សន្សំ និងខ្ទង់វិនិយោគ, 50% សម្រាប់ខ្ទង់ចំណាយប្រចាំថ្ងៃ និង 30% សម្រាប់ការចំណាយតាមកាលៈទេសៈ។

ក៏ប៉ុន្តែ នៅពេលអ្នកមានខ្ទង់ប្រាក់សម្រាប់ដោះស្រាយបញ្ហាបន្ទាន់ដែលអ្នកបានគិតថា សមស្របហើយនោះ អ្នកមិនចាំបាច់សន្សំសម្រាប់ខ្ទង់នេះទៀតទេ ដោយគ្រាន់តែរក្សាទុកខ្ទង់នេះឱ្យបានគង់វង្សគឺជាការល្អ។ បន្ទាប់មក ចូរផ្ដោតទៅលើការវិនយោគ បើទោះវាបង្កប់ទៅដោយហានិភ័យ ប៉ុន្តែ វាក៏ផ្ដល់ឱកាសសម្រាប់អ្នកក្លាយជាអ្នកមាន៖ «ប្រាក់សុទ្ធនឹងមិននាំមកនូវផលប្រយោជន៍ បើសិនវាមិនបានកើនឡើង» នេះបើតាមអ្នកស្រី Joy។

ចាប់ផ្ដើមវិនិយោគកាន់តែឆាប់ កាន់តែល្អ

ទីផ្សារអាចមានឡើង និងអាចមានចុះ ដូច្នេះ ការវិនិយោគដែលមានប្រសិទ្ធភាពបំផុតគឺការវិនិយោគក្នុងរយៈពេលវែង។ នេះគឺជាមូលហេតុដែលអ្នកត្រូវចាប់ផ្ដើមវិនិយោគឱ្យបានឆាប់។

Mark La Spisa អ្នកឯកទេសផ្នែកហិរញ្ញវត្ថុដ៏ល្បីឈ្មោះ និងជាប្រធានក្រុមហ៊ុន Vermillion Financial Advisors បាននិយាយថា បើសិនមិនអាចវិនិយោគច្រើន នោះក៏មិនមែនជាបញ្ហា៖ ចាប់ផ្ដើមកាន់តែឆាប់ កាន់តែល្អ សូម្បីនៅក្នុងខ្លួនមានតែប៉ុន្មានដុល្លារ ក៏ប្រសើរជាងការដែលមិនបានវិនិយោគអ្វីសោះ ឬរង់ចាំរហូតដល់សន្សំបានប្រាក់ច្រើន»។

មូលហេតុដែលថា កាន់តែឆាប់វិនិយោគ កាន់តែល្អ គឺមកពីកម្លាំងនៃការប្រាក់ត្រួត ជាការប្រាក់ដែលអ្នករកបានពីប្រាក់របស់ខ្លួន បូកនឹងការប្រាក់ដែលបានកើតជាកូន ពូនជាចៅ៕

June 13, 2023

Tag: ពិបាក