បាតុកម្ម - La Reine Media

ពលរដ្ឋថៃមិនសុខចិត្តនៅពេលលោក Pita បរាជ័យក្នុងការបោះឆ្នោតជុំដំបូង

ប្រជាជនថៃជាច្រើនបានប្រមូលផ្ដុំគ្នានៅរាជធានីបាងកក ដើម្បីសម្ដែងការមិនសុខចិត្តនៅពេលលោក Pita ដែលជាបេក្ខភាពនាយករដ្ឋមន្ត្រីមកពីបក្ស Move Forward មិនទាន់ត្រូវបានបោះឆ្នោតជ្រើសតាំងជានាយករដ្ឋមន្ត្រី។

សភាថៃកាលពីថ្ងៃទី 13 កក្កដា បានបោះឆ្នោតជ្រើសតាំងនាយករដ្ឋមន្ត្រីដែលមានបេក្ខភាពតែមួយរូបគត់ គឺលោក Pita Limjaroenrat មេដឹកនាំបក្ស Move Forward។ ក៏ប៉ុន្តែ លោក Pita មិនទទួលបានសំឡេងឆ្នោតគ្រប់គ្រាន់ដើម្បីក្លាយជានាយករដ្ឋមន្ត្រីបន្ទាប់របស់ប្រទេសថៃ ដោយសារតែសមាជិកសភាជាន់ខ្ពស់ ដែលភាគច្រើនគឺជាមនុស្សរបស់កងទ័ព មិនបោះឆ្នោតជូនលោក។

អ្នកគាំទ្រលោក Pita និងបក្ស Move Forward បានប្រមូលផ្ដុំគ្នានៅខាងក្រៅវិមានសភាក្នុងរាជធានីបាងកក ដើម្បីរង់ចាំតាមដានការបោះឆ្នោត។ ក្រោយពីលទ្ធផលត្រូវបានប្រកាស ពួកគេសម្ដែងការមិនសុខចិត្ត។

ពលរដ្ឋថៃបានបោះឆ្នោតជាតិកាលពីខែឧសភាដើម្បីជ្រើសរើសតំណាងរាស្ត្រ 500 នាក់នៅសភាជាន់ទាប។ សមាជិកសភាជាន់ទាប រួមនឹងសមាជិកសភាជាន់ខ្ពស់ 250 រួបដែលត្រូវបានតែងតាំង គឺជាអ្នកបោះឆ្នោតជ្រើសរើសនាយករដ្ឋមន្ត្រីដោយផ្ទាល់។

អ្នកគាំទ្រក្រុមប្រជាធិបតេយ្យថៃ បានអំពាវនាវឱ្យប្រជាជនចេញធ្វើបាតុកម្ម បង្កឱ្យមានការបារម្ភខ្លាំង ពិសេសនៅពេលបេក្ខភាពមកពីបក្ស Move Forward ទទួលបរាជ័យ។ បញ្ហានេះ បាននាំឱ្យសមត្ថកិច្ចបន្ថែមការរឹតបន្តឹងសន្តិសុខ។

ប្រធានសភាថៃ Wan Muhamad Noor Matha ឱ្យដឹងថា ការបោះឆ្នោតជ្រើសរើសនាយករដ្ឋមន្ត្រីជុំទីពីរ និងទីបី នឹងត្រូវធ្វើឡើងនៅថ្ងៃទី 19 និង 20 កក្កដាខាងមុខ។ លោក Pita អាយុ 42 ឆ្នាំ អាចបន្តឈរឈ្មោះជាបេក្ខភាពនាយករដ្ឋមន្ត្រី បើសិនលោកនៅតែត្រូវបានសម្ព័ន្ធភាព 8 បក្ស ជ្រើសតាំងជាបេក្ខភាព៕

July 14, 2023

គ្រាន់តែកិនឆ្មាងាប់សោះ ក្រុមហ៊ុនបារាំងរងការពិន័យជាប្រាក់ 3,000 ដុល្លារអាម៉េរិក

ក្រុមហ៊ុនគ្រប់គ្រងផ្លូវដែកជាតិបារាំង ត្រូវបានពិន័យជាប្រាក់ជាង 1,000 ដុល្លារអាម៉េរិក ពីបទខ្វះការទទួលខុសត្រូវ ដោយសារតែបានកិនឆ្មាសំណព្វរបស់អ្នកដំណើរម្នាក់ រហូតដល់ងាប់។

តុលាការបារាំង កាលពីថ្ងៃទី 04 កក្កដា បានសម្រេចថា ក្រុមហ៊ុនផ្លូវដែកជាតិ (SNCF) បានធ្វើឱ្យមានកំហុសទាក់ទិននឹងបញ្ហាខ្វះការទទួលខុសត្រូវ បន្ទាប់ពីមានករណីរថភ្លើងមួយខ្សែបានកិនឆ្មាសំណព្វរបស់អ្នកដំណើររហូតដល់ងាប់ កាលពីខែមករា។

ការចោទប្រកាន់ខាងលើនេះអាចដាក់ពិន័យជាប្រាក់ឡើងដល់ 75,000 អឺរ៉ូប (ជាង 80,000 ដុល្លារអាម៉េរិក) និងដាក់ពន្ធនាគារ 5 ឆ្នាំ។ ក៏ប៉ុន្តែ តុលាការបានសម្រេចពិន័យជាប្រាក់ត្រឹមតែ 1,000 អឺរ៉ូ (ជាង 1,000 ដុល្លារអាម៉េរិក) ចំពោះ SNCF។

SNCF ក៏ត្រូវបានបញ្ជាឱ្យបង់ប្រាក់ជំងឺចិត្តបន្ថែមចំនួន 2,000 អឺរ៉ូ (ជិត 2,200 ដុល្លារអាម៉េរិក) ដល់ម្ចាស់ពីរនាក់របស់សត្វមួយក្បាលឈ្មោះ Neko ដែលត្រូវរថភ្លើងកិននោះផងដែរ។

រឿងរ៉ាវខាងលើបានកើតឡើងកាលពីខែមករា 2023។ កាលណោះ Georgia និងកូនស្រី Melaina អាយុ 15 ឆ្នាំ បានឃើញ Neko លោតចុះពីថង់ និងរត់ទៅកាន់ផ្លូវដែកនៅមុនពេលរថភ្លើងចេញដំណើរ។ Georgia បានចោទថា បុគ្គលិករបស់ក្រុមហ៊ុនរថភ្លើងមានចិត្តឃោរឃៅ ព្រោះបានបដិសេធការស្នើសុំពន្យារការចេញដំណើរពី Paris ទៅកាន់ Bordeaux ដើម្បីជួយស្វែងរកឆ្មា។

នៅពេលរថភ្លើងចេញដំណើរ ម្ចាស់ឆ្មាក៏បានឃើញ Neko ត្រូវរថភ្លើងកិន។ ពេលនោះ SNCF ស្នើសុំបង់ថ្លៃខូចខាតដោយសំបុត្ររថភ្លើងមួយទៅកាន់ Bordeaux។

ករណីខាងលើក៏បានធ្វើឱ្យមានបាតុកម្ម រួមនឹងញត្តិតវ៉ាដែលមានស្នាមមេដៃរបស់មនុស្ស 100,000 នាក់។ រដ្ឋមន្ត្រីក្រសួងមហាផ្ទៃបារាំង Gerald Darmanin និយាយថា លោកភ្ញាក់ផ្អើលខ្លាំងណាស់នៅចំពោះហេតុការណ៍នេះ។ អង្គការការពារសិទ្ធិសត្វមួយក៏បានដាក់ញត្តិតវ៉ាចំពោះ SNCF ព្រោះតែ «អំពើហិង្សាធ្ងន់ធ្ងរ និងឃោរឃៅដែលនាំឱ្យសត្វស្លាប់»។

ចៅក្រមតុលាការបារាំង កាលពីថ្ងៃទី 04 កក្កដា 2023 យល់ថា បុគ្គលិកនៅលើរថភ្លើង «មិនបានប្រឹងប្រែងក្នុងការសង្គ្រោះសត្វឆ្មា»។ សាលក្រមរបស់តុលាការនេះក៏ដើរផ្ទុយពីអនុសាសន៍របស់ក្រុមរដ្ឋអាជ្ញា ជាក្រុមដែលអំពាវនាវឱ្យទម្លាក់ចោលរាល់ការចោទប្រកាន់ទៅលើ SNCF ដោយយល់ថា បុគ្គលិករបស់ស្ថាប័ននេះមិនបានបញ្ចេញភាពគ្មានមនុស្សធម៌។

នៅលើបណ្ដាញសង្គម មនុស្សមួយចំនួនបានរិះគន់សាលក្រមតុលាការខាងលើ។ អ្នកខ្លះថា លើកក្រោយបើមានករណីនេះកើតឡើង ពួកគេគិតថា ម្ចាស់សត្វត្រូវតែបង់ថ្លៃខាតបង់ពេលវេលាដល់អ្នកដំណើរដទៃ នៅពេលរថភ្លើងត្រូវបានពន្យារពេលចេញដំណើរ៕

July 6, 2023

បាតុករដុតបំផ្លាញរថយន្ត និងទ្រព្យរបស់ប៉ូលិស ព្រោះតែករណីប៉ូលិសបាញ់សម្លាប់ក្មេងនៅកណ្ដាលផ្លូវ

(បារាំង) – បាតុកម្មជាច្រើនបានផ្ទុះឡើងនៅក្នុងបណ្ដាទីក្រុង និងរីកធំទៅជាអំពើដុតបំផ្លាញ បន្ទាប់ពីក្មេងជំទង់ម្នាក់ដែលបានបំពានច្បាប់ចរាចរណ៍ ត្រូវប៉ូលិសបាញ់សម្លាប់នៅជាយក្រុងប៉ារីស។

Nael M. អាយុ 17 ឆ្នាំ កាលពីថ្ងៃទី 27 មិថុនា ត្រូវបានប៉ូលិសបារាំងពីរនាក់បញ្ឈប់រថយន្ត ព្រោះតែរំលោភច្បាប់ចរាចរណ៍។ ប៉ូលិសម្នាក់តម្រង់កាណុងកាំភ្លើងទៅកាន់ Nael M. និងកេះកៃនៅពេលក្មេងប្រុសនេះគេចខ្លួន។ រថយន្តរបស់ Nael M. បរទៅមុខបន្ថែមបានប៉ុន្មានសិបម៉ែត្រ មុនពេលបុកនឹងចិញ្ចើមផ្លូវ។

Nael M. ត្រូវបានសង្គ្រោះបន្ទាន់នៅនឹងកន្លែងកើតហេតុ ប៉ុន្តែមិនអាចជួយបាន។ ការស្លាប់របស់ក្មេងប្រុសនេះបានធ្វើឱ្យមានបាតុកម្មជាច្រើនកើតឡើងនៅ Nanterre និងតំបន់មួយចំនួនដែលនៅក្បែរខាង។

ក្រុមមន្ត្រីបារាំង បានដាក់ពង្រាយប៉ូលិស 40,000 នាក់នៅពាសពេញផ្ទៃប្រទេស រួមនឹងកងម្លាំងពិសេស RAID និង GIGN ជាដើម ដើម្បីទប់ទល់នឹងក្រុមបាតុករ។

អាជ្ញាធរទីក្រុងយ៉ាងតិចបីនៅជុំវិញប៉ារីស បានប្រកាសអាសន្ន ហាមពលរដ្ឋជួបជុំគ្នាទ្រង់ទ្រាយធំ។ ឧទ្ធម្ភាគចក្រ និងយន្តហោះគ្មានមនុស្សបើក ក៏ត្រូវបានប្រើប្រាស់ដើម្បីធានាសុវត្ថិភាព។

បើទោះជាមានការដាក់ពង្រាយកម្លាំងសន្តិសុខយ៉ាងច្រើន ប៉ុន្តែស្ថានការណ៍អំពីហិង្សានៅតែកើតឡើង។ បាតុករនាំគ្នាដុតបំផ្លាញរថយន្ត ដំឡើងរបងលើផ្លូវ និងសរសេរលើបដាថា «សងសឹកឱ្យ Nael M.»។ ប៉ូស្តិ៍ប៉ូលិសនៅតំបន់ Pyrenees ទីក្រុង Pau ក៏ត្រូវរងការវាយប្រហារដោយគ្រាប់បែកសាំង។

ក្រសួងមហាផ្ទៃបារាំងនិយាយថា សមត្ថកិច្ចបានចាប់ខ្លួនមនុស្សយ៉ាងតិច 667 នាក់ នៅក្នុងអំពើហិង្សាខាងលើ។

ប៉ូលិសម្នាក់អាយុ 38 ឆ្នាំ ដែលបានបាញ់សម្លាប់ Nael មិនទាន់ត្រូវបានប្រកាសឱ្យដឹងអំពីអត្តសញ្ញាណនៅឡើយ ប៉ុន្តែត្រូវបានចាប់ខ្លួនពីបទមនុស្សឃាតកាលពីថ្ងៃទី 29 មិថុនា។

June 30, 2023

ទាហានណាតូរាប់រយនាក់ទៅកាន់តំបន់ផ្ដាច់ខ្លួនកូសូវ៉ូនៅស៊ែប៊ី

ទាយានរាប់រយនាក់របស់សម្ព័ន្ធមិត្តយោធាណាតូ (NATO) ត្រូវបានបញ្ជូនទៅជួយពង្រឹងការរក្សាសន្តិសុខរបស់សម្ព័ន្ធមិត្តនេះនៅកូសូវ៉ូ (Kosovo) ក្រោយពីមានហេតុការណ៍ប៉ះទង្គិចគ្នានៅភាគខាងជើងនៃតំបន់ផ្ដាច់ខ្លួន។

«កងកម្លាំងបន្ថែមរបស់ណាតូ ចាប់ផ្ដើមធ្វើដំណើរទៅកាន់កូសូវ៉ូ បន្ទាប់ពីមានហេតុការណ៍ប៉ះទង្គិចគ្នាកាលពីសប្ដាហ៍កន្លងដែលបានធ្វើឱ្យទាហានណាតូប្រហែល 30 នាក់រងរបួស។ ទាហានប្រហែល 500 នាក់មកពីទ័ពជើងគោករបស់តួកគី ដើរតួនាទីសំខាន់ជាងគេនៅក្នុងកងកម្លាំងជំនួយបន្ថែម» អ្នកនាំពាក្យរបស់ណាតូ Oana Lungescu កាលពីថ្ងៃទី 05 មិថុនា បានប្រកាសដូច្នេះ។

មុននោះ កាលពីថ្ងៃទី 30 ឧសភា អគ្គលេខាធិការនៃអង្គការណាតូ លោក Jens Stoltenberg បានឱ្យដឹងថា សម្ព័ន្ធយោធានេះនឹងបញ្ជូនទាហាន 700 នាក់បន្ថែមទៀតទៅកាន់កូសូវ៉ូ ដើម្បីពង្រឹងកម្លាំងដែលមានចំនួន 4,000 នាក់នៅតំបន់ផ្ដាច់ខ្លួនកូសូវ៉ូ។ លោក Jens Stoltenberg ប្រកាសថា ណាតូបានត្រៀមខ្លួនរួចហើយសម្រាប់ការផ្ដល់កម្លាំងជំនួយបន្ថែម។

ការប៉ះទង្គិចគ្នារវាងបាតុករដើមកំណើតស៊ែប៊ី ជាមួយប៉ូលិសកូសូវ៉ូ និងកងកម្លាំងរបស់ណាតូ បានកើតឡើងនៅខាងមុខសាលាស្រុក Zvecan នៃតំបន់កូសូវ៉ូ កាលពីថ្ងៃទី 29 ឧសភា។ កងទ័ពណាតូ ដំបូងឡើយបានព្យាយាមបំបែកក្រុមបាតុករចេញពីកម្លាំងប៉ូលិស ហើយក្រោយមកប្រើប្រាស់ខែល និងដំបងឆក់ដើម្បីរំសាយបាតុកម្ម។

បាតុករមួយចំនួនបានគប់ដុំឥដ្ឋ គ្រាប់បែកសាំងសំដៅទៅកាន់ទាហានណាតូ ប៉ុន្តែ មិនយូរប៉ុន្មាន ក្រុមបាតុករក៏ត្រូវបានរុញច្រានចេញឆ្ងាយពីខាងមុខសាលាស្រុក។ ការប៉ះទង្កិចគ្នានេះបានបណ្ដាលឱ្យទាហានណាតូជាង 30 នាក់ និងបាតុករជាង 50 នាក់ ត្រូវរងរបួស។

ក្រោយហេតុការណ៍កាលពីថ្ងៃទី 29 ឧសភាក្នុងតំបន់ Zvecan បាតុករដើមកំណើតស៊ែប៊ីរាប់រយនាក់ ក៏បន្តប្រមូលផ្ដុំគ្នានៅខាងមុខសាលាក្រុង ជាទីដែលមានការរឹតបន្តឹងសន្តិសុខកម្រិតខ្ពស់។

ប្រជាជនដើមកំណើតស៊ែប៊ី នៅកូសូវ៉ូ នាំគ្នាតវ៉ា មិនទទួលស្គាល់ការបោះឆ្នោតក្នុងតំបន់កាលពីខែមេសានៅភាគខាងជើងនៃតំបន់ផ្ដាច់ខ្លួន ជាទីដែលបានអនុញ្ញាតឱ្យក្រុមមន្ត្រីដើមកំណើតអាល់បានី គ្រប់គ្រងក្រុមប្រឹក្សាក្នុងតំបន់ បើទោះអត្រានៃអ្នកទៅបោះឆ្នោតមានមិនដល់ 3.5%។

កូសូវ៉ូដែលមានផ្ទៃដីទំហំប្រហែល 10,800 គីឡូម៉ែត្រការ៉េ គឺជាតំបន់ផ្ដាច់ខ្លួននៅភាគនិរតីរបស់ប្រទេសស៊ែប៊ី។ កូសូវ៉ូប្រកាសឯករាជ្យកាលពីឆ្នាំ 2008 ប៉ុន្តែ ស៊ែប៊ីមិនទទួលស្គាល់ និងបានប្រកាសថា កូសូវ៉ូជាកម្មសិទ្ធិរបស់ខ្លួន។ កូសូវ៉ូមានប្រជាជន 1.8 លាននាក់ ក្នុងនោះភាគច្រើនគឺជាជនជាតិអាល់បានី។

ជនជាតិស៊ែប៊ីប្រហែល 123,000 នាក់ដែលរស់នៅក្នុងភាគខាងជើងតំបន់កូសូវ៉ូ មិនទទួលស្គាល់អាជ្ញាធរនៅ Pristina។ ពួកគេស្មោះស្ម័គ្រក្នុងផ្នែកនយោបាយជាមួយនឹងស៊ែប៊ី ដែលជាអ្នកផ្គត់ផ្គង់ផ្នែកហិរញ្ញវត្ថុដល់សហគមន៍នេះ។ ចំណែកប្រទេសលោកខាងលិចវិញ ភាគច្រើនទទួលស្គាល់ឯករាជ្យរបស់កូសូវ៉ូ ប៉ុន្តែតំបន់ផ្ដាច់ខ្លួននេះមិនទាន់ទទួលបានកៅអីនៅអង្គការសហប្រជាជាតិ ដោយសារតែមានការជំទាស់ពីរុស្ស៊ី និងចិន៕

June 6, 2023

ពលរដ្ឋ 19,000 នាក់ ធ្វើបាតុកម្មក្នុងថ្ងៃបុណ្យឯករាជ្យរបស់ បារាំង

បារាំង៖ មនុស្សប្រហែល 19,000 នាក់ បានចូលរួមធ្វើបាតុកម្មនៅក្នុងថ្ងៃបុណ្យឯករាជ្យរបស់ បារាំង នៅពាសពេញផ្ទៃប្រទេស ដើម្បីប្រឆាំងនឹងការរឹតបន្តឹងថ្មីក្នុងបំណងគ្រប់គ្រងស្ថានការណ៍ COVID-19 របស់រដ្ឋាភិបាល។

បាតុកម្មដាច់ដោយឡែកជាច្រើនក្រុម ត្រូវបានធ្វើឡើងកាលពីថ្ងៃទី 14 ខែកក្កដា នៅពាសពេញផ្ទៃប្រទេស ក្នុងនោះក៏មាន ទីក្រុង Paris, Toulouse, Bordeaux, Montpelier, Nantes រួមនឹងតំបន់ផ្សេងៗមួយចំនួនទៀត។ ក្រុមមន្ត្រីរដ្ឋាភិបាល បារាំង ឱ្យដឹងថា មនុស្សប្រមាណ 19,000 នាក់ បានចូលរួមធ្វើបាតុកម្ម។ ក្រសួងមហាផ្ទៃ បារាំង បានប្រកាសថា បាតុកម្មតូច-ធំ ចំនួន 53 ត្រូវបានធ្វើឡើងនៅតំបន់សំខាន់ៗនៃប្រទេសនេះ។

បាតុកម្មមួយចំនួននៅ Paris បានចាប់ផ្ដើមនៅព្រឹកថ្ងៃទី 14 ខែកក្កដា ក្នុងគ្រាដែលក្បួនព្យុហយាត្រាប្រចាំឆ្នាំ អបអរថ្ងៃបុណ្យឯករាជ្យបារាំង ត្រូវបានធ្វើឡើងតាមបណ្ដោយមហាវិថី Champs-Elysees ក្រោមអធិបតីភាពរបស់ប្រធានាធិបតី Emmanuel Macron។

មូលហេតុនៃបាតុកម្មនេះ កើតឡើងដោយសារក្រុមបាតុករមិនពេញចិត្តនឹងសេចក្ដីសម្រេចមួយដែលបានប្រកាសកាលពីថ្ងៃទី 12 កក្កដា ស្ដីពីការបង្ខំឱ្យបុគ្គលិកសុខាភិបាល ទទួលការចាក់វ៉ាក់សាំង ក៏ដូចជាការតម្រូវឱ្យពលរដ្ឋត្រូវបង្ហាញប័ណ្ណចាក់វ៉ាក់សាំង ទើបអាចចេញ-ចូលទីសាធារណៈ ឬតម្រូវឱ្យពលរដ្ឋដែលមិនទាន់បានចាក់វ៉ាក់សាំង ត្រូវបង្ហាញលទ្ធផលអវិជ្ជមាន ទើបអាចចូលភោជនីយដ្ឋានបាន។

យោងតាមការស្រាវជ្រាវមួយរបស់ Elabe ដែលបានប្រកាសកាលពីថ្ងៃទី 13 កក្កដា វិធានការថ្មីខាងលើនេះ ទទួលបានការគាំទ្រច្រើនពីសំណាក់ពលរដ្ឋបារាំង។ ពលរដ្ឋប្រមាណ 35.5 លាននាក់ (ជាងពាក់កណ្ដាលនៃចំនួនប្រជាជនសរុបរបស់បារាំង) បានចាក់វ៉ាក់សាំង COVID-19 យ៉ាងតិច 1 ដូសរួចហើយ។

គិតមកដល់បច្ចុប្បន្ន បារាំង បានរកឃើញអ្នកឆ្លង COVID-19 សរុបចំនួន 5,829,724 នាក់ ក្នុងនោះក៏មានករណីស្លាប់ 111,413 នាក់, ជាសះស្បើយ 5,162,757 នាក់ និងកំពុងព្យាបាលចំនួន 555,554 នាក់៕

ប្រភព៖ AFP
ប្រែសម្រួល៖ បុត្រា

July 15, 2021

កងទ័ពមីយ៉ានម៉ាចេញបញ្ជាមិនឱ្យប្រើគ្រាប់កាំភ្លើងពិត ក្នុងការបង្ក្រាបក្រុមបាតុករ

រដ្ឋាភិបាលយោធាភូមា (មីយ៉ានម៉ា) បានស្នើឱ្យក្រុមប៉ូលិស ឈប់ប្រើគ្រាប់កាំភ្លើងពិតក្នុងការបង្រាបក្រុមបាតុករ ក្រោយពីត្រូវអន្តរជាតិថ្កោលទោសដោយសារតែបានប្រើអំពើហិង្សា និងបាញ់ប្រហារ បណ្ដាលឱ្យបាតុករជាច្រើននាក់បានបាត់បង់ជីវិត។

សេចក្ដីប្រកាសខាងលើនេះត្រូវបានលើកឡើងនៅក្នុងកម្មវិធីផ្សាយនៃស្ថានីយទូរទស្សនកងទ័ពកាលពីថ្ងៃទី 1 មីនា មួយថ្ងៃក្រោយកងសន្តិសុខបាញ់ប្រហារក្រុមបាតុករដោយប្រើប្រាស់គ្រាប់កាំភ្លើងពិត។ ការិយាល័យសិទ្ធិមនុស្សរបស់អង្គការសហប្រជាជាតិ បានឱ្យដឹងថា បាតុករយ៉ាងតិច 18 នាក់បានស្លាប់ និង 30 នាក់ត្រូវរងរបួសនៅក្នុងអំពើបាញ់ប្រហារនោះពីសំណាក់ប៉ូលិសភូមា។ កងទ័ពភូមាក៏បានឱ្យដឹងថា មនុស្សជាង 1,300 នាក់ ត្រូវបានចាប់ខ្លួននៅក្នុងបាតុកម្មនានានៅទូទាំងប្រទេស។

តាមគម្រោង បាតុកម្មនឹងត្រូវបន្តធ្វើឡើងនៅថ្ងៃនេះ បន្ទាប់ពីតុលាការមីយ៉ានម៉ា បានប្រកាសអំពីការចោទប្រកាន់បន្ថែមចំនួន 2 ករណីទៀត ប្រឆាំងនឹងមេដឹកនាំ Aung San Suu Kyi ដែលត្រូវបានកងទ័ពធ្វើរដ្ឋប្រហារកាលពីថ្ងៃទី 1 កុម្ភៈ ឆ្នាំ 2021។ លោកស្រី Suu Kyi បានបង្ហាញខ្លួននៅតុលាការតាមរយៈវីដេអូ កាលពីថ្ងៃទី 1 មីនា និងត្រូវបានគេជឿថា នឹងត្រូវកងទ័ពបញ្ជូនទៅឃុំខ្លួនជាបន្តទៀតក្នុងរយៈពេលយូរ។

ករណីកងសន្តិសុខបាញ់ប្រហារសម្លាប់ក្រុមបាតុករនៅភូមា បាននាំឱ្យមានការប្រតិកម្មដោយការថ្កោលទោសយ៉ាងខ្លាំងក្លាពីអន្តរជាតិ ក្នុងនោះមានសហរដ្ឋអាមេរិក កាណាដា អាល្លឺម៉ង់ សហភាពអឺរ៉ុប និងប្រទេសមួយចំនួននៅតំបនអាស៊ីអាគ្នេយ៍ផងដែរ៕

ប្រភព៖ Bloomberg
ប្រែសម្រួល៖ បុត្រា

March 2, 2021

ក្រុមបាតុករប្រឆាំង និងគាំទ្រកងទ័ពនៅមីយ៉ានម៉ា ប៉ះទង្គិចគ្នា

ក្រុមអ្នកគាំទ្រយោធាមីយ៉ានម៉ាដែលយកអាវុធតាមខ្លួន បានប៉ះទង្គិចគ្នានឹងក្រុមបាតុករប្រឆាំងរដ្ឋប្រហារ នៅទីក្រុង Yangon ប្រទេសភូមាកាលពីម្សិលមិញ (26 កុម្ភៈ 2021) នាំឱ្យមានការព្រួយបារម្ភកាន់តែខ្លាំង។

បាតុកម្ម និងកូដកម្មប្រឆាំងរដ្ឋប្រហារយោធា ត្រូវបានធ្វើឡើងជារៀងរាល់ថ្ងៃនៅប្រទេសភូមា (មីយ៉ានម៉ា) ក្នុងរយៈពេល 3 ខែកន្លងមកនេះ។ ក្រុមនិស្សិត រួមនឹងក្រុមបាតុករផ្សេងទៀត នៅតែមានផែនការបន្តធ្វើបាតុកម្ម។ កាលពីថ្ងៃទី 25 កន្លងទៅ នៅពេលក្រុមបាតុករប្រឆាំងរដ្ឋប្រហារបង្ហាញខ្លួន ក៏ស្រាប់តែមានមនុស្សប្រហែល 1,000 នាក់ ដែលគាំទ្រកងទ័ព ក៏បានមានវត្តមាននៅកណ្ដាលទីក្រុង។ ការប៉ះទង្គិចគ្នារវាងក្រុមបាតុករទាំងពីរក្រុមខាងលើក៏បានកើតឡើង និងក្លាយជាអំពើហិង្សាយ៉ាងឆាប់រហ័ស។

យោងតាមសាក្សី ក្រុមគាំទ្រកងទ័ព ដែលមានអាវុធក្នុងដៃ ដូចជាកាំបិត ដំបង ជំពាមកៅស៊ូ និងដុំថ្ម បានប្រវាយប្រហារលើក្រុមបាតុករប្រឆាំងរដ្ឋប្រហារ ក្នុងនោះមានបាតុករយ៉ាងតិច 2 នាក់ ត្រូវបានចាក់។

មនុស្សមួយក្រុមប្រដាប់ដោយកាំបិត បានវាយប្រហារលើបុរសម្នាក់នៅខាងក្រៅសណ្ឋាគារមួយនៅក្នុងទីក្រុង។ បុគ្គលិកពេទ្យបានជួយសង្គ្រោះបុរសដែលត្រូវរបួសពេញខ្លួននេះ បន្ទាប់ពីក្រុមជនដៃដល់បានចាកចេញ ប៉ុន្តែមិនដឹងថា បុរសនោះនៅមានជីវិតដែរ ឬអត់។

កាលពីល្ងាចម្សិលមិញ ប៉ូលិសប្រឆាំងកុបកម្មរាប់សិបនាក់ បានបាញ់គ្រាប់បែកផ្សែងបង្ហូរទឹកភ្នែកដើម្បីបំបែកហ្វូងបាតុករដែលប្រមូលផ្ដុំគ្នានៅក្បែរការិយាល័យរដ្ឋាភិបាល ដើម្បីឆាំងនឹងការដែលកងទ័ពបានតែងតាំងមន្ត្រីមូលដ្ឋានម្នាក់។

អំពើហិង្សាខាងលើ បាននាំឱ្យមានការព្រួយបារម្ភកាន់តែខ្លាំងនៅប្រទេសនេះ។ មេដឹកយោធា Min Aung Hlaing បាននិយាយថា អាជ្ញាធរកំពុងប្រើប្រាស់កម្លាំងអាវុធតិចតួចបំផុត។

ក៏ប៉ុន្តែ គិតមកដល់បច្ចុប្បន្ន យ៉ាងហោចណាស់ មានបាតុករ 3 នាក់ និងប៉ូលិសម្នាក់ បានបាត់បង់ជីវិត។ គិតត្រឹមថ្ងៃទី 24 កុម្ភៈ មនុស្សចំនួន 728 នាក់ ត្រូវបានចាប់ខ្លួន ចោទប្រកាន់ និងកាត់ទោស ទាក់ទិននឹងបាតុកម្មប្រឆាំងរដ្ឋប្រហារ៕

ប្រភព៖ Reuters
ប្រែសម្រួល៖ បុត្រា

February 26, 2021

សញ្ញាបែងចែក «សត្រូវ និងមិត្ត» លើកាំភ្លើងខ្លីរបស់ប៉ូលិសមួយចំនួនក្នុងអំពើហិង្សានៅសភាអាមេរិក

ក្រុមប៉ូលិសដែលស្លៀកពាក់ស៊ីវិលប្រចាំការនៅវិមានសភាសហរដ្ឋអាមេរិក បានបិទបង់ចាំងពន្លឺលើកាំភ្លើងខ្លីដើម្បីជាសញ្ញាបែកចែកថា «អ្នកណាជាសត្រូវ និងអ្នកណាជាមិត្ត» នៅក្នុងករណីបាតុកម្មហិង្សាដែលបានកើតឡើងនៅឯវិមានសភាសហរដ្ឋអាមេរិក។

ក្នុងពេលដែលក្រុមបាតុករគាំទ្រលោក Donald Trump កំពុងសម្រុកចូលអគារសភាជាតិនៅតំបន់ Capitol Hill កាលពីថ្ងៃត្រង់ ទី 6 ខែមករា ក្រុមមន្ត្រីប៉ូលិសប្រចាំនៅសភាដែលស្លៀកពាក់ស៊ីវិល នាំគ្នាតម្រង់ជួរនៅខាងក្រោយទ្វារបន្ទប់ប្រជុំ និងដកកាំភ្លើងខ្លី Glock ដើម្បីបិទតែមសម្គាល់ ក្នុងបំណងគំរាមដល់ក្រុមបាតុករដែលមាន «ឈាមរាវ»។ កំភ្លើងខ្លីដែលក្រុមប៉ូលិសស្លៀកពាក់ស៊ីវិលប្រើប្រាស់ បានធ្វើឱ្យមានការចាប់អារម្មណ៍ខ្លាំង ដោយសារនៅលើកាំភ្លើងមានតែម ឬបង់ឆ្នូតក្រហម-ស ដែលចាំងប្លាតពន្លឺ។

Tomer Israeli អតីតប្រធានសន្តិសុខនៃអង្គភាពស៊ើបការណ៍សម្ងាត់របស់អ៊ីស្រាអែល (Shin Bet) បានអះអាងថា ការដែលមន្ត្រីប៉ូលិសសភាអាមេរិកបិទតែមចាំងប្លាតពន្លឺនៅលើកាំភ្លើងខ្លី «មិនមែនជារឿងខុសប្រក្រតីនោះទេ»។ Tomer Israeli និយាយថា៖ «បង់នេះត្រូវបានប្រើដើម្បីបែងចែកមិត្តនិងសត្រូវ នៅក្នុងស្ថានការណ៍ដែលមានមនុស្សច្រើន ដែលនេះអាចជួយឱ្យក្រុមមន្ត្រីធ្វើការសម្រេចចិត្តបានត្រឹមត្រូវថា ត្រូវវាយប្រហារលើគោលដៅ ឬអត់ នៅក្នុងមួយប៉ប្រិចភ្នែក»។

កងកម្លាំងសន្តិសុខក៏ប្រើប្រាស់សញ្ញាពិសេសនៅលើកាំភ្លើង ដើម្បីកំណត់អត្តសញ្ញាណក្រុមរបស់ខ្លួន និងដើម្បីជៀសវាងការភាន់ច្រលំនៅក្នុងស្ថានភាពច្របូកច្របល់ ពិសេសនៅពេលមានខ្មាន់កាំភ្លើងម្នាក់ ឬច្រើននាក់ដែលប្រើប្រាស់កាំភ្លើងដូចពួកគេ។

និពន្ធនាយក Joseph Trevithick និង Tyler Rogoway របស់សារព័ត៌មាន The Drive បានអះអាងថា៖ «បង់ចាំងពន្លឺក៏ជាវិធីដើម្បីកំណត់អត្តសញ្ញាបានឆាប់រហ័សថា វាជាកាំភ្លើងរបស់ប៉ូលិសប្រចាំការនៅសភា ពោលគឺមិនមែនជាកាំភ្លើងសម្រាប់ប្រព្រឹត្តអំពើខុសច្បាប់ណាមួយនោះឡើយ»។ កាលពីពេលកន្លងទៅនេះ មន្ត្រីប៉ូលិសប្រចាំនៅសភាអាមេរិកក៏ធ្លាប់បានភ្លេចកាំភ្លើងនៅក្នុងបន្ទប់ទឹកជាច្រើនករណីផងដែរ។

ក្រុមមន្ត្រីប៉ូលិសនៅសភាអាមេរិក ចាប់តាំងពីឆ្នាំ 2019 ត្រូវបានបំពាក់កាំភ្លើងខ្លី ម៉ាក Glock 22។ ប៉ុន្តែ នៅក្នុងការប៉ះទង្គិចគ្នាជាមួយក្រុមបាតុករនៅសភាកាលពីថ្ងៃទី 6 មករា គេមិនទាន់ដឹងច្បាស់ថា កាំភ្លើងដែលក្រុមប៉ូលិសបានប្រើនោះជាប្រភេទអ្វីនៅឡើយ។

កងកម្លាំងសន្តិសុខពិសេស Shin Bet របស់អ៊ីស្រាអែល

នៅក្នុងការប៉ះទង្គិចនៅសភា គេឃើញមានមន្ត្រីប៉ូលិសយ៉ាងតិច 2 នាក់ កាន់កាំភ្លើងដែលមានសញ្ញាខាងលើ ខណៈមន្ត្រីផ្សេងពីនេះមិនមានសញ្ញានេះទេ។ ប៉ុន្តែគេមិនបានដឹងថា ក្នុងចំណោមពួកគេ មានមន្ត្រីរូបណាជាសមាជិករបស់កម្លាំងសម្ងាត់នៅទេ។

នៅពេលហេតុការណ៍កំពុងកើតឡើង ក្រុមមន្ត្រីប៉ូលិស និងកងកម្លាំងពិសេសនៃអធិការដ្ឋាននគរបាលក្រុងវ៉ាស៊ីងតោន អង្គភាពស៊ើបការណ៍ជាតិ (FBI) ស្ថាប័នគ្រប់គ្រងស្រា បារី អាវុធជាតិផ្ទុះ រួមនឹងនគរបាលយុត្តិធម៌ជាដើម ត្រូវបានបញ្ជូនទៅកាន់វិមានសភាដើម្បីជួយដល់កងកម្លាំងដែលនៅខាងក្នុង។ កងកម្លាំងការពារជាតិនៃតំបន់ពិសេស Columbia និង Virginia ក៏ត្រូវបានបញ្ជូនទៅកាន់កន្លែងកើតហេតុដើម្បីទប់ទល់នឹងបាតុករ ខណៈរដ្ឋមួយចំនួនក៏បានបញ្ជូនកងកម្លាំងប្រដាប់អាវុធរបស់ខ្លួន ទៅកាន់រដ្ឋធានីវ៉ាស៊ីងតោន៕

ប្រភព៖ Drive

January 8, 2021

ក្រុមបាតុករថៃ៖ ថ្វីបើត្រូវបានបំបែក និងបញ្ចប់បាតុកម្មពេលនេះ ប៉ុន្តែពួកគេនឹងនៅតែបន្តតវ៉ា

ក្រុមមេដឹកនាំបាតុកម្មថៃ កាលពីយប់មិញ (16តុលា) បានប្រកាសបញ្ចប់បាតុកម្មនៅទីក្រុងបាងកក ក្រោយពីកងកម្លាំងប៉ូលិសប្រឆាំងកុបកម្មបានដាក់ពង្រាយរថយន្តបាញ់ទឹកដើម្បីបំបែកហ្វូងបាតុករ។

“បញ្ចប់បាតុកម្ម” នេះគឺជាសារមួយដែលត្រូវបានផ្ញើពីសមាជិកម្នាក់នៃក្រុមមេដឹកនាំចលនាបាតុកម្មកាលពីយប់ថ្ងៃទី16តុលា។

ការសម្រេចចិត្តនេះត្រូវបានធ្វើឡើងបន្ទាប់ពីកងកម្លាំងនគរបាលប្រឆាំងកុបកម្មរាប់រយនាក់ត្រូវបានដាក់ពង្រាយដើម្បីទប់ទល់នឹងបាតុករជាង2,000នាក់នៅក្នុងទីក្រុងបាងកកកាលពីរសៀលថ្ងៃទី16តុលា។ ក្រុមប៉ូលិសបានស្នើឱ្យក្រុមបាតុករត្រលប់ទៅផ្ទះ បើមិនដូច្នោះទេពួកគេនឹងត្រូវបំបែកហ្វូងដោយការបាញ់ទឹក។ ប៉ុន្តែ ក្រុមបាតុករបានបិទផ្លូវមួយកំណាត់ ច្រៀងបទចម្រៀងជាតិ និងស្នើឱ្យក្រុមប៉ូលិស “ចាកចេញ”។

បន្ទាប់មក ប៉ូលិសបានដំឡើងប្រព័ន្ធបាញ់ទឹក និងតម្រង់ទៅរកក្រុមបាតុករ នាំឱ្យបាតុករជួរមុខប្រើប្រាស់ឆត្រដើម្បីទប់ទល់ ក្នុងនោះមានអ្នកខ្លះបានគប់ដបជ័រសំដៅរកប៉ូលិសផងដែរ។ ក្រោយមក ក្រុមបាតុករត្រូវបានបំបែកយ៉ាងឆាប់រហ័ស ប៉ុន្តែពួកគេនិយាយថានឹងនៅតែបន្តធ្វើបាតុកម្ម។ យោងតាមមន្ទីរសុខាភិបាលនៃមន្ទីរពេទ្យមួយនៅទីក្រុងបាងកក ប៉ូលិសចំនួន4នាក់ និងបាតុករម្នាក់បានរងរបួស។

“រដ្ឋាភិបាលកំពុងប្រើប្រាស់អំពើហិង្សាដើម្បីបំបែកចលនារបស់ពលរដ្ឋ” Tattep Ruangprapaikitseree ដែលជាមេដឹកនាំបាតុករម្នាក់និយាយដូច្នេះ។ Pin ដែលជានិស្សិតម្នាក់ វ័យ22ឆ្នាំ បានឱ្យដឹងថា៖ “ខ្ញុំត្រូវតែតស៊ូដើម្បីអនាគតរបស់ខ្ញុំ”។

នាយករដ្ឋមន្ត្រីថៃ លោក Prayuth Chan-ocha កាលពីថ្ងៃទី15តុលា បានចេញបទបញ្ជាបន្ទាន់មួយដែលហាមមិនឱ្យមានការប្រមូលផ្ដុំគ្នាលើសពី4នាក់ ប៉ុន្តែ មនុស្សប្រមាណ10,000នាក់បានជួបជុំគ្នាធ្វើបាតុកម្មដើម្បីប្រឆាំងតវ៉ានៅក្នុងថ្ងៃដដែលនោះ បើទោះជាមានការព្យាយាមបំបែកពីកងកម្លាំងប៉ូលិសក៏ដោយ។

ក្រុមបាតុករបានចោទប្រកាន់លោក Prayuth ដែលបានឡើងកាន់កាប់អំណាចក្រោយរដ្ឋប្រហារយោធាកាលពីឆ្នាំ2014ថា បានប្រើឧបាយកលក្នុងការបោះឆ្នោតកាលពីឆ្នាំទៅដើម្បីបន្តក្ដោបក្ដាប់អំណាច។ ប៉ុន្តែ លោកនាយករដ្ឋមន្ត្រីថៃ បានឱ្យដឹងថា ការបោះឆ្នោតបានប្រព្រឹត្តទៅដោយយុត្តិធម៌ និងបានអះអាងថា លោកនឹងមិនលាលែងពីតំណែងនោះឡើយ។

ក្រុមបាតុករក៏បានស្នើឱ្យធ្វើវិសោធនកម្មរដ្ឋធម្មនុញ្ញ និងកែទម្រង់របបយោធាផងដែរ។ ជាងនេះ ក្រុមបាតុករក៏បានស្នើឱ្យរាជវង្សមានតម្លាភាពជាងបច្ចុប្បន្ន ទាក់ទងនឹងឯកសារហិរញ្ញវត្ថុនៅក្នុងស្ថានភាពសេដ្ឋកិច្ចកំពុងដាំក្បាលចុះដោយសារ Covid-19 នេះ។

ជាទូទៅ បាតុកម្មបានប្រព្រឹត្តទៅដោយសន្តិវិធី ប៉ុន្តែមានហេតុការណ៍តែមួយគាត់ដែលបាននាំឱ្យអាជ្ញាធរយកជាលេសដើម្បីអនុវត្តបទបញ្ជាបន្ទាន់ដែលបណ្ដាលឱ្យមានការចាប់ខ្លួនបាតុករ2រូប នោះគឺហេតុការណ៍ឡោមព័ទ្ធរថយន្តដែលកំពុងដឹកមហេសី Suthida។ ចំណែកក្រុមមន្ត្រីរដ្ឋាភិបាលវិញបានឱ្យដឹងថា បាតុកម្មបានបង្កផលប៉ះពាល់ធ្ងន់ធ្ងរដល់សេដ្ឋកិច្ច និងសន្តិសុខជាតិ៕

ប្រភព៖ Reuters

October 17, 2020

ប្រធានាធិបតីប្រទេសប្រេស៊ីល ចូលរួមធ្វើបាតុកម្មប្រឆាំងបម្រាមគោចរក្នុងប្រទេសរបស់ខ្លួន

ប្រធានាធិបតី Jair Bolsonaro រួមជាមួយមនុស្សរាប់រយនាក់ នាំគ្នាធ្វើបាតុកម្មនៅខាងក្រៅអគ្គបញ្ជាការដ្ឋានកងទ័ពនៅ Brasilia ដើម្បីប្រឆាំងទៅនឹងបទបម្រាមគោចររបស់អភិបាលរដ្ឋនានាក្នុងប្រទេសនេះ។

មនុស្សប្រមាណជា600នាក់ បាននាំគ្នាធ្វើបាតុកម្មកាលពីថ្ងៃទី19មេសា អំពាវនាវឱ្យកងទ័ព ធ្វើអន្តរាគមន៍ទៅលើវិធានការទប់ទល់នឹង COVID-19 ព្រមទាំងស្នើឱ្យបិទទ្វារសភាជាតិផងដែរ។ មនុស្សមួយចំនួន លើកបដាដែលមានសរសេរថា “យោធាធ្វើអន្តរាគមន៍ជាមួយប្រធានាធិបតី Bolsonaro”។

ក្រុមអ្នកសង្កេតការណ៍នយោបាយ បានឱ្យដឹងថា ក្រុមបាតុករនេះគឺជាអ្នកគាំទ្ររបស់ប្រធានាធបិតី Jair Bolsonaro។ ពួកគេបានអំពាវនាវឱ្យកងទ័ព ជួយដល់ប្រធានាធិបតី ដោយសារពួកគេយល់ថា តុលាការជាន់ខ្ពស់ និងសភាជាតិ កំពុងតែរារាំងប្រធានាធិបតី ក្នុងការប្រឆាំងទៅនឹងបទបញ្ជាបម្រាមគោចរ ទប់ស្កាត់ COVID-19 ដែលអភិបាលរដ្ឋនានាក្នុងប្រទេស បានដាក់ចេញ។

“ខ្ញុំនៅទីនេះ ព្រោះតែជឿជាក់អ្នកទាំងអស់គ្នា ហើយអ្នកទាំងអស់គ្នានៅទីនេះក៏ព្រោះតែជឿជាក់ប្រេស៊ីល” ប្រធានាធិបតី Bolsonaro មានប្រសាសន៍នៅលើរថយន្ត ទៅកាន់ក្រុមបាតុកម្ម។ លោកបន្តថា “ចូរប្រយុទ្ធដើម្បីប្រទេសជាតិ។ ចូរជឿជាក់លើប្រធានាធិបតីរបស់អ្នក ជាមនុស្សដែលនឹងធ្វើអ្វីៗដែលចាំបាច់ដើម្បីការពារខឿនប្រជាធិបតេយ្យ និងសេរីភាព ដែលជាប្រការដ៏សំខាន់សម្រាប់យើងគ្រប់គ្នា”។

ក៏ប៉ុន្តេ ប្រធានាធិបតីរូបនេះ មិនបានបញ្ចេញមតិអ្វីទាំងអស់ជុំវិញការអំពាវនាវរបស់ក្រុមបាតុករ ដែលស្នើឱ្យកងទ័ពធ្វើអន្តរាគមន៍ ក៏ដូចជាការស្នើឱ្យបិទសភាជាតិនោះឡើយ។

ប្រធានាធិបតីប្រេស៊ីល ចូលរួមបាតុកម្មប្រឆាំងបម្រាមគោចរក្នុងប្រទេសរបស់ខ្លួន

Bolsonaro ដែលជាអតីតមន្ត្រីយោធាម្នាក់ដែរនោះ បានរិះគន់ជាបន្តបន្ទាប់ទៅលើវិធានការដាក់បម្រាមគោចរទប់ស្កាត់ COVID-19 ពីសំណាក់អភិបាលរដ្ឋនានានៃប្រទេសនេះ ដែលក្នុងនោះក៏មានបណ្ដារដ្ឋដែលមានប្រជាជនច្រើនបំផុតនៅប្រេស៊ីល ដូចជារដ្ឋ Sao Paulo និងរដ្ឋ Rio de Janeiro ជាដើម។

សូមរំឭកថា កាលពីថ្ងៃទី17មេសា លោក Bolsonaro បានដកតំណែងរដ្ឋមន្ត្រីក្រសួងសុខាភិបាល ដែលជាអ្នកគាំទ្រវិធានការទប់ស្កាត់ COVID-19 ដែលត្រូវបានប្រធានាធិបតី Bolsonaro យល់ថា អាចបំផ្លាញសេដ្ឋកិច្ចប្រទេសនេះ។

គិតត្រឹមថ្ងៃទី20មេសានេះ ប្រេស៊ីលដែលជាប្រទេសមានប្រជាជនសរុបជាង200លាននាក់នេះ បានរកឃើញអ្នកជំងឺកូរ៉ូណាសរុបចំនួន 38,654នាក់ ក្នុងនោះមាន2,462នាក់បានបាត់បង់ជីវិត៕

ប្រភព៖ សារព័ត៌មានបរទេស

April 20, 2020

Tag: បាតុកម្ម