ដី - La Reine Media

ផ្កាយមួយដួងនឹងផ្ទុះក្នុងឆ្នាំ 2024 ហើយអាចមើលឃើញដោយភ្នែកទទេ

នៅកណ្ដាលកញ្ចុំផ្កាយ Hercules នឹងមានវត្ថុអវកាសមួយដែលមើលទៅដូចផ្កាយថ្មីទើបបង្ហាញខ្លួននៅលើផ្ទៃមេឃ។

យោងតាម Science Alert ហេតុការណ៍ផ្ទុះផ្កាយជិតនឹងកើតឡើងរបស់ T Coronae Borealis ដែលជាផ្កាយមួយគូ រួមមាន «ផ្កាយខ្មោចឆៅ» មួយដួង និងជនរងគ្រោះរបស់វា នឹងបញ្ចេញពន្លឺរហូតដល់ថ្នាក់មនុស្សនៅលើផែនដីអាចមើលឃើញវាដោយភ្នែកទទេ។

T Coronae Borealis ធ្លាប់បានផ្ទុះម្ដងរួចហើយកាលពីឆ្នាំ 1946។ យោងតាមការគណនារបស់អ្នកវិទ្យាសាស្ត្រនៅអង្គការណាសា ផ្កាយភ្លោះ T Coronae Borealis នឹងត្រូវផ្ទុះម្ដងទៀត នៅចន្លោះពីខែកុម្ភៈ ដល់ខែកញ្ញា ឆ្នាំ 2024។

បច្ចុប្បន្ន វាមិនទាន់ផ្ទុះ ដូច្នេះ អ្នកដែលចូលចិត្តវិស័យតារាសាស្ត្រ អាចទន្ទឹមរង់ចាំមើលព្រឹត្តិការណ៍នេះ ចាប់ពីពេលនេះរហូតដល់ដាច់ខែកញ្ញា។

តាមរយៈភ្នែកទទេ អ្នកនឹងបានឃើញចំណុចដែលភ្លឺមួយដូចទៅនឹងផ្កាយថ្មីមួយដួងទើបរះនៅកណ្ដាលកញ្ចុំផ្កាយ Hercules ជាទីដែលផ្កាយមួយគូខាងលើកំពុងស្ថិតនៅ។ ក្នុងនោះ ពន្លឺរបស់វា ភ្លឺស្មើនឹងផ្កាយ North Star។

T Coronae Borealis គឺជាប្រព័ន្ធផ្កាយមួយដែលបានឈានចូលដល់ដំណាក់កាលស្លាប់។ បច្ចុប្បន្ន វារួមមាន ផ្កាយយក្សក្រហមមួយដួង និងកូនផ្កាយក្រិនពណ៌ស (White Dwarf) មួយដួង។ កូនផ្កាយក្រិនពណ៌សនេះ ដើរតួជាផ្កាយខ្មោចឆៅ ខណៈដែលផ្កាយយក្សក្រហមគឺជាជនរងគ្រោះរបស់វា។

កូនផ្កាយក្រិនពណ៌សនេះ ចេះតែជះកម្លាំងសម្ពាធ ហែកសាច់ផ្កាយយក្សក្រហមជាបន្តបន្ទាប់។ នៅពេលសម្ពាធធំគ្រប់គ្រាន់ ផ្កាយយក្សក្រហមនឹងផ្ទុះទៅតាមវដ្ដមួយនៅក្នុងព្រឹត្តិការណ៍ដែលត្រូវបានហៅថា ហេតុការណ៍ផ្ទុះណូវ៉ា ដោយបញ្ចេញវត្ថុធាតុមួយផ្នែករបស់វាទៅក្នុងបរិយាកាស។

វត្ថុធាតុពីផ្កាយយក្សក្រហមដែលត្រូវបានបំបែកចេញ ក៏ត្រូវបានកូនផ្កាយក្រិនពណ៌ស ស៊ីជាចំណី ក្នុងរយៈពេលខ្លី។ ដូច្នេះ អ្នកអាចតាមដានគយគន់ព្រឹត្តិការណ៍នេះជាច្រើនថ្ងៃផងដែរ។

រហូតដល់ថ្ងៃណាមួយនោះ ផ្កាយយក្សក្រហមនឹងត្រូវផ្កាយក្រិនពណ៌ស ហែកស៊ីវត្ថុធាតុរហូតដល់ឆ្អែត «បែកពោះ»។ ពេលនោះ ផ្កាយមួយគូនេះនឹងត្រូវផ្ទុះដំណាលគ្នា និងខ្លាំងក្លាជាងការផ្ទុះរបស់វានាពេលកន្លង នៅក្នុងព្រឹត្តិការណ៍មួយដែលហៅថា «ហេតុការណ៍ផ្ទុះស៊ុបពើណូវ៉ា»។

ផ្កាយយក្សក្រហមគឺជាបណ្ដាផ្កាយដែលកំពុងស្ថិតក្នុងដំណាក់កាល «ដង្ហើមចង្រិត» ពេលដែលជិតអស់ថាមពល។ ព្រះអាទិត្យរបស់មនុស្ស នៅសល់ 5 ពាន់លានឆ្នាំទៀត ក៏នឹងក្លាយជាផ្កាយយក្សក្រហម។

ក្រោយការផ្ទុះណូវ៉ា និងការផ្ទុះស៊ុបពើណូវ៉ា អ្វីដែលនៅសេសសល់ នឹងប្រមូលផ្ដុំគ្នា ក្លាយជាកូនផ្កាយក្រិនពណ៌ស ដែលមានទំហំប្រហាក់ប្រហែលនឹងភពផែនដី ប៉ុន្តែមានផ្ទុកថាមពលមហិមា។

តាមការគណនា ក្រោយរយៈពេលប្រហែល 10 ពាន់លានឆ្នាំទៀត ពោលគឺប្រហែល 5 ពាន់លានឆ្នាំដែលបានក្លាយជាផ្កាយយក្សក្រហម ព្រះអាទិត្យរបស់មនុស្សនឹងក្លាយទៅជាកូនផ្កាយក្រិនពណ៌ស៕

March 4, 2024

ស្ថានភាពបច្ចុប្បន្នរបស់យានរុករកភាវៈរស់របស់ណាសាលើភពអង្គារ

មូលហេតុពិតប្រាកដដែលនៅពីក្រោយ «ការស្លាប់» របស់យានស្វែងរកភាវៈរស់ Ingenuity ទើបតែត្រូវបានបង្ហើបឱ្យដឹងនៅក្នុងរូបដែលថតដោយមិត្តរួមការងាររបស់វា។

Ingenuity គឺជាយានស្រាវជ្រាវដែលមានរូបរាងជាកូនឧទ្ធម្ភាគចក្រ ដែលបានចុះចតជាមួយនឹងយាន Perseverance លើផ្ទៃភពអង្គារ កាលពីខែកុម្ភៈ 2021។

Ingenuity គឺជាអ្នកនាំផ្លូវរបស់ Perseverance ដែលមានមាឌធំជាង និងបំពាក់ឧបករណ៍វិទ្យាសាស្ត្រច្រើន។ បន្ទាប់ពី Ingenuity បានបញ្ចប់បេសកកម្មរបស់ខ្លួនដោយឧបទ្ទវហេតុកាលពីចុងខែមករាឆ្នាំនេះ ណាសានៅតែបន្តស្វែងរកមូលហេតុនៃបញ្ហានេះ។

មុននោះ ណាសាយល់ថា បញ្ហាបាក់ស្លាបចក្រ គឺជាមូលហេតុដែលនាំឱ្យ Ingenuity ជួបត្រូវ «ស្លាប់»។ វាទំនងជាបានធ្លាក់ពីកម្ពស់មួយម៉ែត្រ នៅពេលកំពុងចុះចត នាំឱ្យស្លាបចក្រត្រូវបាក់។

ក៏ប៉ុន្តែ រូបថតថ្មីដែលត្រូវបានថត និងបញ្ជូនមកកាន់ផែនដីដោយយាន Perseverance ក្រោយពីការស្វែងរកមិត្តរួមការងារ អស់មួយរយៈពេល បង្ហាញថា ស្ថានភាពរបស់ Ingenuity ធ្ងន់ធ្ងរជាងការសន្និដ្ឋានមុននេះទៅទៀត។ នេះបើតាម Space.com។

នៅក្នុងរូបថតថ្មីបំផុត Ingenuity បានបាត់បង់ស្លាបចក្រមួយទាំងស្រុង នៅក្នុងចំណោមស្លាបចក្រទាំងបួនរបស់វា។

ណាសាឱ្យដឹងថា សេណារីយ៉ូដែលអាចកើតឡើងបំផុតគឺ ដោយសារតំបន់ដែល Ingenuity ចុះចតចុងក្រោយ និងបានជួបបញ្ហានេះ គឺសុទ្ធតែជាដីខ្សាច់ ខណៈវាមិនអាចមើលឃើញផ្ទៃដីតាមភាពជាក់ស្ដែង នៅពេលចុះចត នាំឱ្យវាត្រូវផ្អៀង ហើយស្លាបក៏ត្រូវកាប់ទៅលើដីពេញទំហឹង។

បើទោះជានោះគឺជាដំណឹងអាក្រក់ ប៉ុន្តែ Ingenuity បានបង្ហាញអំពីសមត្ថភាពដ៏អស្ចារ្យ បន្ទាប់ពីដំណើរការបានពីរឆ្នាំនៅលើភពអង្គារ គ្រាដែលគម្រោងដំបូង ណាសាបានរំពឹងថា Ingenuity អាចដំណើរការល្អក្នុងរយៈពេលតែ 30 ថ្ងៃប៉ុណ្ណោះ៕

នៅក្នុងរូបថតថ្មីបំផុត Ingenuity បានបាត់បង់ស្លាបចក្រមួយទាំងស្រុង នៅក្នុងចំណោមស្លាបចក្រទាំងបួនរបស់វា។

March 2, 2024

ស្ថានីយអវកាសនៅលើដីដំបូងរបស់ប្រទេសចិន

មូលដ្ឋានថ្មីដែលមានសមត្ថភាពបង្ហាញត្រាប់តាមបរិស្ថានស្ថានីយអវកាសចំនួន 9 យ៉ាង អនុញ្ញាតឱ្យអ្នកវិទ្យាសាស្ត្រធ្វើការពិសោធផ្នែកអវកាសជាច្រើនប្រភេត នៅលើផែនដីដោយផ្ទាល់។

ហេដ្ឋារចនាសម្ព័ន្ធស្រាវជ្រាវ និងធ្វើត្រាប់តាមបរិស្ថានអវកាស (SESRI) ដែលត្រូវបានចាត់ទុកថា ជាស្ថានីយអវកាសលើដីដំបូងរបស់ប្រទេសចិន បានឆ្លងផុតដំណាក់កាលវាយតម្លៃនៅខេត្ត Heilongjiang ភាគឦសានប្រទេសចិន កាលពីថ្ងៃទី 27 កុម្ភៈ។

ស្ថានីយអវកាសលើកដីនេះ ត្រូវបានសាងសង់ដោយវិទ្យាស្ថានស្រាវជ្រាវអវកាស និងវិទ្យាសាស្ត្រវត្ថុធាតុ នៃវិទ្យាស្ថានបច្ចេកវិទ្យាខេត្ត Heilongjiang (HIT) សហការជាមួយក្រុមហ៊ុនបច្ចេកវិទ្យា និងវិទ្យាសាស្ត្រអាកាសចរណ៍អវកាសចិន។

នៅក្នុងមូលដ្ឋាននេះ មានអគារពិសោធន៍ចំនួនបួន រួមមាន អគារបរិស្ថានអវកាសទាំងស្រុង, អគារវិទ្យាសាស្ត្រផ្លាស្មាអវកាស, អគារបរិស្ថានម៉ាញ៉េទិចអវកាស និងទីតាំងពង្រីកពូជសត្វ។

តាមផែនការ SESRI អាចធ្វើត្រាប់តាមកត្តាបរិស្ថានអវកាសចំនួន 9 ប្រភេទ មានជាអាទិ៍ សុញ្ញកាស សីតុណ្ហភាពខ្ពស់ និងទាប ភាគល្អិតផ្ទុកអគ្គិសនី វិទ្យុសកម្មអេឡិចត្រូម៉ាញ៉េទិច ធូលីអវកាស ផ្លាស្មា កម្លាំងទំនាញខ្សោយ ឧស្ម័នអព្យាក្រឹត និងមីក្រូទំនាញ។

យោងតាមអ្នកស្រាវជ្រាវនៅសភាវិទ្យាសាស្ត្រចិន ស្ថានីយអវកាសលើដីនេះនឹងក្លាយជាកន្លែងបណ្ដុះបណ្ដាលធនធានមនុស្សជាន់ខ្ពស់នៅប្រទេសចិន។ គិតត្រឹមខែមិថុនា 2023 មានស្ថាប័នជាង 110 មកពីប្រទេស និងដែនដីជាង 30 បានចុះឈ្មោះប្រើប្រាស់ស្ថានីយ SESRI៕

February 29, 2024

Apple លុបចោលគម្រោងរថយន្តអគ្គិសនី ក្រោយចំណាយអស់រាប់ពាន់លានដុល្លារ

ប្រហែលមួយទសវត្សរ៍ក្រោយពី Apple បានបង្ហាញ Project Titan គម្រោងផលិតរថយន្តអគ្គិសនីរបស់ក្រុមហ៊ុននេះ ក៏ត្រូវបានគេជឿថា ត្រូវបានលុបចោល។

យោងតាម Bloomberg ការសម្រេចចិត្តលុបចោលគម្រោងរថយន្តអគ្គិសនីនេះ ត្រូវបាន COO របស់ Apple Jeff Williams និង Kevin Lynch ប្រកាសនៅក្នុងកិច្ចប្រជុំផ្ទៃក្នុងកាលពីពេលថ្មីៗនេះ។

គម្រោងនេះនឹងចាប់ផ្ដើមលុបចោល ហើយបុគ្គលិកជាច្រើននឹងត្រូវបានប្ដូរទៅកាន់ផ្នែកបញ្ញាសិប្បនិម្មិត (AI) របស់ Apple។ Apple បានសម្ងំទិញក្រុមហ៊ុនបច្ចេកវិទ្យា AI និងម៉ាស៊ីនសិក្សាជាង 20 ស្ថាប័ន ចាប់តាំងពីឆ្នាំ 2017 ហើយបច្ចុប្បន្ន ក្រុមហ៊ុននេះកំពុងបង្កើនការប្រើប្រាស់បច្ចេកវិទ្យា AI នៅក្នុងមុខងារនានារបស់ផលិតផលថ្មី។

បុគ្គលិកជិត 2,000 នាក់ បានធ្វើការនៅក្នុងគម្រោងរថយន្តអគ្គិសនីរបស់ Apple ក្នុងនោះមានរាប់រយនាក់ជាអ្នករចនារថយន្ត និងជាវិស្វករផ្នែករឹង។ បើទោះបុគ្គលិកទាំងនេះត្រូវបាន Apple ប្រកាសថា នឹងមានការងារថ្មីក្នុងក្រុមហ៊ុនដដែល ប៉ុន្តែតាមការសន្និដ្ឋាន ស្ថានភាពបញ្ចប់កុងត្រាការងារទំនងជានឹងនៅតែមាន។

ដំណឹងស្ដីពី Apple លុបចោលគម្រោងរថយន្តអគ្គិសនី ក៏ត្រូវបាន អគ្គនាយកប្រតិបត្តិរបស់ក្រុមហ៊ុន Tesla លោក Elon Musk ក៏បានចែករំលែកបន្តកាលពីពេលថ្មីៗនេះផងដែរ៕

February 28, 2024

គម្រោងផ្លូវល្បឿនលឿនទីបី ភ្នំពេញ-សៀមរាប-ប៉ោយប៉ែត កំពុងត្រូវបានពិនិត្យលទ្ធភាពសាងសង់ ក្នុងក្របខណ្ឌ PPP

(ភ្នំពេញ) – នារសៀលថ្ងៃទី 27 ខែកុម្ភៈនេះ កិច្ចប្រជុំពិនិត្យលទ្ធភាពសិក្សាគម្រោងសាងសង់ផ្លូវល្បឿនលឿនរាជធានីភ្នំពេញ – ខេត្តសៀមរាប – ក្រុងប៉ោយប៉ែត ក្រោមក្របខ័ណ្ឌភាពជាដៃគូរវាងរដ្ឋ និងឯកជន (PPP) ត្រូវបានរៀបចំធ្វើឡើងនៅទីស្ដីការក្រសួងសាធារណការ និងដឹកជញ្ជូន ដោយដឹកនាំដោយឯកឧត្ដម ឡេង ធនយុទ្ធា រដ្ឋលេខខាធិការក្រសួងសាធារណការ និងដឹកជញ្ជូន និងជាប្រធានគម្រោង និងមានការអញ្ជើញចូលរួមពីថ្នាក់ដឹកនាំក្រសួង និងក្រុមមន្ត្រីពាក់ព័ន្ធ ក៏ដូចជាតំណាងក្រុមហ៊ុនស្ពាន និងថ្នល់ចិន (CRBC) ផងដែរ។

យោងតាមទំព័របណ្ដាញសង្គមរបស់ក្រសួងខាងលើ កិច្ចប្រជុំនេះធ្វើឡើងក្នុងគោលបំណងប្រមូលមតិយោបល់ និងការផ្ដល់អនុសាសន៍បន្ថែមដល់ក្រុមហ៊ុន ដើម្បីពិនិត្យ និងកែសម្រួលឡើងវិញ ជាពិសេស ក្នុងដំណាក់កាលទីមួយ នៃគម្រោងសិក្សាផ្លូវល្បឿនលឿនភ្នំពេញ-សៀមរាប បន្ទាប់ពីក្រសួងបានទទួលរបាយការណ៍ស្តីពីការសិក្សាលទ្ធភាពបច្ចេកទេស ដើម្បីធានាឱ្យការអនុវត្តគម្រោងទទួលបានភាពល្អប្រសើរ។

ឯកឧត្ដមរដ្ឋលេខាធិការ បានលើកឡើងថា ក្រសួងនឹងរៀបចំកិច្ចប្រជុំជាមួយស្ថាប័ន អាជ្ញាធរពាក់ព័ន្ធ ជាពិសេសអាជ្ញាធរអប្សរា ដើម្បីសិក្សាពីផលប៉ះពាល់ និងផ្តល់មតិយោបល់លើការសិក្សាកំណាត់ផ្លូវវាងក្រុង។

ក្រសួងសាធារណការ និងដឹកជញ្ជូនបានបញ្ជាក់ថា ក្រុមហ៊ុន CRBC គ្រោងនឹងបញ្ចប់សេចក្តីព្រាងគម្រោងសិក្សាសមិទ្ធលទ្ធភាពប្លង់វិស្វកម្មសំណង់នៅខែកុម្ភៈ ឆ្នាំ 2024 ហើយបន្ទាប់មកត្រៀមបញ្ចប់ការសិក្សាសមិទ្ធិលទ្ធភាពគម្រោង (FS ) មុននឹងដាក់ជូនរាជរដ្ឋាភិបាលពិនិត្យសម្រេចនៅដើមខែមិថុនា ឆ្នាំ 2024។ សម្រាប់ដំណាក់ទីពីរ សៀមរាប-ប៉ោយប៉ែត នឹងបញ្ចប់ការងារសិក្សានៅខែមីនា ឆ្នាំ 2024 បន្ទាប់ពីបញ្ចប់សេចក្តីព្រាងគម្រោងសិក្សាសមិទ្ធិលទ្ធភាពបច្ចេកទេសប្លង់វិស្វកម្ម និងដាក់ជូនមកក្រសួងពិនិត្យ កែសម្រួលឈានទៅបញ្ចប់នៅខែឧសភា ឆ្នាំ 2024៕

February 27, 2024

យានអវកាសឯកជនអាម៉េរិក បញ្ជូនរូបថតដំបូងពីឋានព្រះចន្ទមកកាន់ផែនដី

យាន Odysseus បញ្ជូនរូបថតពីរសន្លឹកស្ដីពីផ្ទៃព្រះចន្ទ មកកាន់ផែនដី នៅមុនពេលបញ្ចប់បេសកកម្មឆាប់ជាងច្រើនថ្ងៃ បើធៀបនឹងគម្រោងដំបូង។

យោងតាមសារព័ត៌មាន Space កាលពីថ្ងៃទី 26 កុម្ភៈ ក្រុមហ៊ុន Intuitive Machines ប្រកាសលើបណ្ដាញសង្គម X ថា យាន Odysseus នៅតែភ្ជាប់ទំនាក់ទំនងជាមួយនឹងក្រុមគ្រប់គ្រងនៅលើផែនដី បើទោះវាដួលផ្អៀងទៅម្ខាង បន្ទាប់ពីបានចុះចតលើផ្ទៃព្រះចន្ទ។ យាននេះក៏បញ្ជូនរូបថតពីរសន្លឹកពីឋានព្រះចន្ទមកកាន់ផែនដី ក្នុងនោះមានមួយសន្លឹកត្រូវបានថតនៅពេលយានចុះដល់ទីតាំងចុះចតដែលមានឈ្មោះថា Malapert A ខណៈរូបមួយសន្លឹកទៀតគឺជារូបថតលើផ្ទៃព្រះចន្ទដោយផ្ទាល់ជាលើកដំបូងស្ដីពីផ្ទៃភពរណបនេះ។

យាន Lunar Reconnaissance របស់ណាសា ដែលមានជំនាញខាងស្កេនព្រះចន្ទពីគន្លងតារាវិថីតាំងពីឆ្នាំ 2009 ក៏បានថតរូបភាពរបស់យាន Odysseus ពីកម្ពស់ 90 គីឡូម៉ែត្រ។ រូបភាពពីកាម៉េរិករបស់យាន Lunar Reconnaissance បញ្ជាក់ថា Odysseus បានចុះចតដោយជោគជ័យ ពីកម្ពស់ 2,759 ម៉ែត្រ។

Intuitive Machines ឱ្យដឹងថា ក្រោយពីបានហោះហើរជាង 965,600 គីឡូម៉ែត្រ យាន Odysseus ក៏បានចុះចតលើទីតាំងដែលមានចម្ងាយពីគោលដៅ Malapert A 1.5 គីឡូម៉ែត្រ។ ក្រុមគ្រប់គ្រងបេសកកម្មបញ្ជាក់ថា Odysseus រអិលដួលផ្អៀងទៅម្ខាង សង្កត់លើថ្មមួយដុំ ធ្វើឱ្យអង់តែនមួយចំនួនរបស់វាត្រូវបែរទិសខុសពីការកំណត់។ ផ្អែកលើទីតាំងរបស់ផែនដី និងព្រះចន្ទ ក្រុមហ៊ុនខាងលើគណនាឃើញថា ក្រុមអ្នកគ្រប់គ្រងយានអាចបន្តទាក់ទងជាមួយ Odysseus រហូតដល់ព្រឹកថ្ងៃទី 27 កុម្ភៈ 2024 ឆាប់ជាងច្រើនថ្ងៃ បើធៀបនឹង 9 ថ្ងៃ ដែលជាការគ្រោងទុកដំបូង។

យាន Odysseus ត្រូវបានបាញ់បង្ហោះលើរ៉ុក្កែត Falcon 9 របស់ SpaceX ពីមជ្ឈមណ្ឌលអវកាស Kennedy របស់ណាសា នៅ Cape Canaveral រដ្ឋ Florida កាលពីថ្ងៃទី 15 កុម្ភៈ 2024 និងហោះចូលដល់គន្លងតារាវិថីព្រះចន្ទកាលពីថ្ងៃទី 21 កុម្ភៈ។ យាននេះបានចុះចតលើដីក្បែរមាត់រណ្ដៅ Malapert A នៅប៉ូលខាងត្បូងរបស់ព្រះចន្ទ។ យោងតាមណាសា នេះគឺជាតំបន់ដែលទាក់ទាញចំណាប់អារម្មណ៍របស់អ្នកវិទ្យាសាស្ត្រតាំងពីយូរមកហើយ ព្រោះតែវត្តមានរបស់ផ្ទាំងទឹកកក ដែលអាចបំបែកទៅជាអ៊ីដ្រូសែន និងអុកស៊ីសែន សម្រាប់ប្រើប្រាស់ជាឥន្ធនៈរបស់រ៉ុក្កែតនាពេលអនាគត។

បេសកកម្ម Odysseus ស្ថិតក្នុងកម្មវិធី Commercial Lunar Payload Services របស់ណាសា ដែលជួយជំរុញការអភិវឌ្ឍយានចុះចតឯកជន។ ណាសាបានចុះកិច្ចព្រមព្រៀងជាមួយនឹងបណ្ដាក្រុមហ៊ុនឯកជន ដើម្បីដឹកទំនិញ និងឧបករណ៍វិទ្យាសាស្ត្រឡើងទៅកាន់ឋានព្រះចន្ទ។ នៅមុនជោគជ័យរបស់ Odysseus ក៏មានយាន 5 គ្រឿងបានបរាជ័យក្នុងការចុះចតលើផ្ទៃព្រះចន្ទនាពេលថ្មីៗនេះ ក្នុងនោះក៏មានបេសកកម្មឯកជន Peregrine ដែលបានបរាជ័យកាលពីខែមុនផងដែរ៕

February 27, 2024

ព្រះចន្ទ Europa ជាគោលដៅក្នុងឆ្នាំ 2024 របស់យានរុករកភាវៈរស់របស់ណាសា

យោងតាមអង្គការអវកាសអាម៉េរិក (ណាសា) ឆ្នាំ 2024 គឺជាការចាប់ផ្ដើមរបស់ភពក្នុងក្ដីស្រមៃមួយ ដែលត្រូវបានណាសាសម្ងំដាក់ផែនការតាំងពីច្រើនឆ្នាំមុន នោះគឺ «គម្រោងទៅកាន់ Europa»។

ក្នុងប្រព័ន្ធព្រះអាទិត្យ Europa គឺជាភពរណបធំទី 6 និងជាភពរណបតូចបំផុតក្នុងក្រុមព្រះចន្ទ Galilean របស់ភពព្រហស្បតិ៍ (Jupiter)។ ក្រុមនេះ ក្រៅពី Europa ក៏នៅមាន Ganymede, Calisto និង Io ផងដែរ។ ព្រះចន្ទទាំងបួនដួងនេះត្រូវបានអ្នកវិទ្យាសាស្ត្រ Galileo Galilei សង្កេតឃើញជាលើកដំបូងកាលពីចុងឆ្នាំ 1609 ឬដើមឆ្នាំ 1610។

ក្នុងសម័យបច្ចុប្បន្ន ព្រះចន្ទទាំងនេះត្រូវបានណាសាចាត់ទុកថាជា «ព្រះចន្ទរស់» ព្រោះព្រះចន្ទនីមួយៗសុទ្ធតែមានផ្ទុកវត្ថុធាតុមួយចំនួនដែលសមស្របនឹងជីវិត។ ប៉ុន្តែ Europa ត្រូវបានគេឱ្យតម្លៃខ្ពស់ជាងគេ។

ដូច្នេះហើយ ណាសាមានផែនការបាញ់បញ្ជូនយានអវកាស Europa Clipper ឬហៅថា Clipper ទៅកាន់ព្រះចន្ទ Europa របស់ភពព្រហស្បតិ៍ នៅខែតុលា ឆ្នាំ 2024។

យាននេះគ្រោងនឹងហោះហើរជុំវិញ Europa ក្នុងរយៈចម្ងាយជិតដើម្បីប្រមូលទិន្នន័យស្ដីពីបរិយាកាស ផ្ទៃ និងមហាសមុទ្រជាដើម របស់វា សម្រាប់បម្រើដល់គោលដៅរុករកភាវៈរស់នៅទីនោះ៕

ព្រះចន្ទទាំងបួនដួងគឺ Europa ក៏នៅមាន Ganymede, Calisto និង Io ត្រូវបានអ្នកវិទ្យាសាស្ត្រ Galileo Galilei សង្កេតឃើញជាលើកដំបូងកាលពីចុងឆ្នាំ 1609 ឬដើមឆ្នាំ 1610។

ព្រះចន្ទ Europa អាចមានលាក់មហាសមុទ្រទឹករាវនៅក្រោមស្រទាប់ទឹកកក

February 26, 2024

រោងចក្រផលិតឱសថក្នុងទីអវកាស ហោះត្រឡប់មកកាន់ផែនដី

(សហរដ្ឋអាម៉េរិក) – កាប៊ីនយាន W-1 ដែលដឹកធាតុរាវនៃថ្នាំព្យាបាល HIV និងជំងឺរលាកថ្លើមប្រភេទ C របស់ក្រុមហ៊ុន Varda Space Industries ត្រឡប់មកកាន់ផែនដី ក្រោយរយៈពេលជិត 8 ខែ ដែលបានស្ថិតនៅលើគន្លងតារាវិថី ហើយគ្រោងនឹងចុះដល់ដីដោយប្រើប្រាស់ឆត្រយោង នៅវេលាម៉ោង 03:40 ថ្ងៃទី 22 កុម្ភៈ ម៉ោងនៅកម្ពុជា។

យោងតាម Space កាប៊ីនយានពីបេសកកម្ម W-1 របស់ក្រុមហ៊ុន Varda Space Industries ចុះចតពីលើតំបន់ភាគខាងជើងរបស់រដ្ឋ Utah កាលពីល្ងាចថ្ងៃទី 21 កុម្ភៈ នាំមកជាមួយនូវធាតុរាវរបស់ឱសថប្រឆាំងវីរុសដែលអភិវឌ្ឍនៅលើគន្លងតារាវិថីផែនដី។ ជោគជ័យនេះធ្វើឱ្យ Varda ក្លាយជាក្រុមហ៊ុនទីបីដែលបញ្ជាឱ្យយានអវកាសត្រឡប់មកវិញប្រកបដោយសុវត្ថិភាព។ ក្រុមហ៊ុនទីមួយ និងទីពីរដែលបានទទួលជោគជ័យដូចគ្នានេះគឺ SpaceX ដែលមានកាប៊ីនយាន Dragon និង Boeing ដែលមានកាប៊ីនយាន Starliner។

Varda បានរៀបគម្រោងក្លាយជាក្រុមហ៊ុនធំមួយដែលផលិតនៅខាងក្រៅផែនដី។ «ការចាត់ចែងវត្ថុធាតុក្នុងបរិស្ថានមានទំនាញផែនដីតិចបំផុត ផ្ដល់នូវបរិស្ថានពិសេសដែលនៅលើផែនដីមិនមាន។ ផលប្រយោជន៍ភាគច្រើនគឺបានមកពីការមិនមានបាតុភូតចរន្តជាដើមនៅក្នុងវត្ថុធាតុរាវ ដោយសារទំនាញផែនដី ក៏ដូចជាលទ្ធភាពកកើតរចនាសម្ព័ន្ធល្អជាង ដោយសារការថយចុះនៃសម្ពាធ» ក្រុមហ៊ុនខាងលើពន្យល់ដូច្នេះ។

ក្រោយពីការចុះចត កាប៊ីនយានអវកាសនេះនឹងត្រូវបាននាំយកទៅកាន់មូលដ្ឋានរបស់ Varda នៅ Los Angeles ដើម្បីវិភាគ។ ទិន្នន័យដែលប្រមូលបានពីបេសកកម្មនេះនឹងត្រូវបានចែករំលែកជាមួយនឹងទ័ពអាកាសអាម៉េរិក និងណាសា ទៅតាមកិច្ចព្រមព្រៀងរវាងស្ថាប័នទាំងនេះ៕

February 22, 2024

BYD បង្ហាញរថយន្តអគ្គិសនីតម្លៃទាបជាងមុន ដើម្បីប្រជែងនឹងរថយន្តសាំង

ក្រុមហ៊ុនចិន BYD កំពុងចាប់ផ្ដើម «សង្គ្រាមតម្លៃ» ជាមួយនឹងរថយន្តប្រើម៉ាស៊ីនចំហេះក្នុង (ICE) នៅពេលបណ្ដារថយន្តអគ្គិសនីថ្មីដែលមានតម្លៃទាបជាងមុន ចាប់ផ្ដើមបង្ហាញខ្លួនក្នុងទីផ្សារ។ បន្ទាប់ពីបង្ហាញវត្តមាន Qin Plus EV Honor Edition ថ្មីកាលពីថ្ងៃអង្គារ ក្រុមហ៊ុន BYD ក៏បានឱ្យដឹងថា ពួកគេចាប់ផ្ដើមជាផ្លូវការនូវយុគសម័យថ្មីស្ដីពីអគ្គិសនីតម្លៃទាបជាងប្រេងឥន្ធនៈ។

ក្រោយពីដណ្ដើមបានតំណែងជាអ្នកផលិតរថយន្តអគ្គិសនីដែលលក់ដាច់ជាងគេលើពិភពលោកនៅក្នុងត្រីមាសទីបួននៃឆ្នាំ 2023 ពី Tesla របស់អាម៉េរិក បច្ចុប្បន្នក្រុមហ៊ុនចិន BYD កំពុងជំរុញផែនការរក្សាល្បឿននៃការរីកចម្រើននេះសម្រាប់ឆ្នាំ 2024។

កាលពីថ្ងៃទី 20 កុម្ភៈ 2024 BYD បានបង្ហាញកំណែថ្មីរបស់រថយន្តអគ្គិសនីប្រភេទសេដានរបស់ខ្លួន ដើម្បីបន្តដណ្ដើមយកចំណែកទីផ្សារពីរថយន្តសាំង។ កំណែ Qin Plus EV របស់ BYD មានតម្លៃចាប់ពី 15,200 ដុល្លារ ដល់ 19,400 ដុល្លារអាម៉េរិក។

កំណែដំណើរការដោយអគ្គិសនី រួមមាន ម៉ូទ័រអគ្គិសនីមួយគ្រឿងដែលមានអានុភាពរហូតដល់ 134 កម្លាំងសេះ (100 kW) និងកម្លាំងរមួលកង់ 132 lb-ft (180 Nm)។ វានឹងត្រូវបានផ្គត់ផ្គង់អគ្គិសនីពីថ្មផ្ទុកថាមពល 48 kWh ឬ 57.6 kWh សម្រាប់រង្វង់ប្រតិបត្តិការ CLTC ឡើងដល់ 420 គីឡូម៉ែត្រ និង 510 គីឡូម៉ែត្រ។

កាលពីឆ្នាំមុន BYD បានបញ្ចេញ Qin Plus Champion Edition ដែលមានតម្លៃប្រហាក់ប្រហែលនឹងរថយន្តសាំង (14,000 ដុល្លារ) ដែល «លុបបំបាត់កម្លាំងទាក់ទាញរបស់រថយន្ត ICE ដោយផ្ទាល់»។

ពេលនេះ BYD បានបង្ហាញស៊េរីថ្មីរបស់ម៉ូដែលរថយន្តហាយព្រីត BYD Seal DM-i ដែលត្រូវបានហៅថា Glory Edition មានតម្លៃចាប់ពីជាង 11,000 ដុល្លារ និងកំណែអគ្គិសនីសុទ្ធ (EV) មានតម្លៃចាប់ពី 15,200 ដុល្លារ។

យោងតាម CnEVPost ក្រុមហ៊ុន BYD ក៏កំពុងបង្ហាញវត្តមានកំណែ Champion Edition Dolphin EV ថ្មី ដែលធ្វើដំណើរបានឆ្ងាយជាង និងមានតម្លៃទាបជាងស៊េរីមុន។ Dolphin បច្ចុប្បន្នមានតម្លៃចាប់ពី 14,500 ដុល្លារអាម៉េរិក៕

February 22, 2024

ចំណូលពន្ធពីវិស័យយានយន្ត រួមចំណែកប្រមាណ 31% នៃចំណូលពន្ធសរុបក្នុងឆ្នាំ 2023

របាយការណ៍របស់ អគ្គនាយកដ្ឋានគយ និងរដ្ឋាករកម្ពុជា បានបង្ហាញថា ចំណូលដែលប្រមូលបានក្នុងឆ្នាំ2023 បើគិតជាប្រាក់ដុល្លារអាម៉េរិក គឺស្មើនឹងប្រមាណ 2,288.27 លានដុល្លារ ថយចុះប្រមាណ 15.7% បើធៀបនឹងចំណូលសរុបក្នុងឆ្នាំ 2022។

យោងតាមរបាយការណ៍ដដែល លទ្ធផលខាងលើនេះសម្រេចបាន 82.4% នៃផែនការដែលបានកំណត់ដោយច្បាប់ស្ដីពីហិរញ្ញវត្ថុសម្រាប់ការគ្រប់គ្រងឆ្នាំ 2023។

បើគិតតាមប្រភេទពន្ធនិងអាករវិញ ឃើញថា អាករលើតម្លៃបន្ថែម (VAT) រួមចំណែក 41.2%, អាករពិសេស (Special tax) រួមចំណែក 30.3%, ពន្ធគយរួមចំណែក 21%, អាករបន្ថែមលើផលិតផលប្រេងឥន្ធនៈរួមចំណែក 4.3% និងអាករនាំចេញនិងកម្រៃផ្សេងៗ រួមចំណែក 1.8% នៃចំណូលសរុប។

សហព័ន្ធឧស្សាហកម្មយានយន្តកម្ពុជា ដកស្រង់របាយការណ៍របស់អគ្គនាយកដ្ឋានគយ និងរដ្ឋាករកម្ពុជា ឱ្យដឹងថា ចំណូលតាមក្រុមទំនិញវិញ ឃើញថា ក្រុមទំនិញចម្រុះមាន 35.3%, យានយន្តនិងគ្រឿងចក្ររួមចំណែក 31.1%, ប្រេងឥន្ធនៈនិងថាមពលរួមចំណែក 26.6% និងសម្ភារសំណង់និងកម្រៃផ្សេងៗ រួមចំណែក 7% នៃចំណូលសរុប៕

February 20, 2024

រកឃើញវត្ថុអវកាសដែលភ្លឺជាងគេបង្អស់ក្នុងចក្រវាល

វត្ថុអវកាសមួយដែលទើបត្រូវបានរកឃើញ មិនត្រឹមតែជាឃ្វីហ្សា (quasar) ដែលភ្លឺជាងគេនោះទេ តែក៏ជាវត្ថុអវកាសដែលបញ្ចេញពន្លឺខ្លាំងជាងគេមិនធ្លាប់បានរកឃើញពីមុនផងដែរ។

ឃ្វីហ្សា J0529-4351 ស្ថិតនៅឆ្ងាយពីផែនដីដល់ថ្នាក់ ពន្លឺរបស់វាត្រូវការពេលវេលា 12 ពាន់លានឆ្នាំទើបធ្វើដំណើរមកដល់ផែនដី។ ថាមពលរបស់វាបានមកពីប្រហោងខ្មៅ (black hole) ដែលកំពុងរីកមាឌយ៉ាងឆាប់រហ័សបំផុតដែលក្រុមអ្នកវិទ្យាសាស្ត្រធ្លាប់បានជួបប្រទះ។ Black hole នេះស៊ីវត្ថុអវកាសប៉ុនព្រះអាទិត្យជារៀងរាល់ថ្ងៃ។ នេះបើតាមលទ្ធផលនៃការស្រាវជ្រាវដែលត្រូវបានប្រកាសកាលពីថ្ងៃទី 19 កុម្ភៈ នៅលើទស្សនាវដ្ដី Nature Astronomy។

ជារៀងរាល់ឆ្នាំ Black hole ដែលស្ថិតនៅកណ្ដាល J0529-4351 «ស៊ី» ឬប្រមូលផ្ដុំឧស្ម័ន និងធូលីបានប្រហាក់ប្រហែលនឹងព្រះអាទិត្យចំនួន 370 ដួង។ ប្រការនេះធ្វើឱ្យ J0529-4351 ភ្លឺជាង 500 លានលានដង បើធៀបនឹងព្រះអាទិត្យ។

ក្រុមអ្នកស្រាវជ្រាវគណនាឃើញថា អង្កត់ផ្ចិតរបស់ J0529-4351 វែងជាងប្រហែល 45,000 ដង បើធៀបនឹងចម្ងាយពីផែនដីទៅព្រះអាទិត្យ។

ឃ្វីហ្សា (quasar មកពីពាក្យ quasi-stellar object – វត្ថុមានរូបរាងដូចផ្កាយ) គឺជាតំបន់ដែលស្ថិតនៅចំកណ្ដាលកាឡាក់ស៊ីនានា និងមានផ្ទុកប្រហោងខ្មៅមហាយក្សដែលព័ន្ធជុំវិញដោយធូលី និងឧស្ម័នក្ដៅ៕

February 20, 2024

ទុនជាង 444 លានដុល្លារ ត្រូវបានអនុញ្ញាតឱ្យវិនិយោគនៅកម្ពុជា នៅក្នុង 15 ថ្ងៃដំបូងនៃខែកុម្ភៈ 2024

(ភ្នំពេញ) – ពាក់កណ្ដាលដើមខែកុម្ភៈនេះ ក្រុមប្រឹក្សាអភិវឌ្ឍន៍កម្ពុជា (CDC) បានចេញវិញ្ញាបនបត្រចុះបញ្ជីគម្រោងវិនិយោគចំនួន 22 ដែលមានទុនវិនិយោគសរុបប្រមាណជាង 444 លានដុល្លារអាម៉េរិក។

យោងតាម ក្រុមប្រឹក្សាអភិវឌ្ឍន៍កម្ពូជា (CDC) បណ្ដាខេត្តដែលទទួលបានការវិនិយោគច្រើនជាងគេបង្អស់ រួមមាន រាជធានីភ្នំពេញ និងខេត្តស្វាយរៀង ដោយមានទុនវិនិយោគ 4 គម្រោងដូចគ្នា។ ក្រៅពីនេះ ខេត្តព្រះសីហនុ និងខេត្តកំពង់ស្ពឺ ក៏ទទួលបានការវិនិយោគ 3 គម្រោងដូចគ្នាផងដែរ។

ព័ត៌មានបន្ថែម សូមអានសេចក្ដីប្រកាសរបស់ CDC ដែលមានដូចខាងក្រោម៖

February 19, 2024

Tag: ដី