ជោគជ័យ - La Reine Media

«លោតរំលង» Real ក្រុមបាល់ទាត់មួយនេះក្លាយជាក្លឹបមានតម្លៃខ្ពស់ជាងគេលើពិភពលោក

ដោយបានជោគជ័យច្រើនឆ្នាំបន្តបន្ទាប់ ពិសេសគឺនៅរដូវកាល 2022/2023 នេះ តម្លៃរបស់ក្រុមបាល់ទាត់អង់គ្លេសមួយនេះបានកើន 15% និងក្លាយជាក្លឹបបាល់ទាត់ដែលមានតម្លៃខ្ពស់ជាងគេលើពិភពលោកនាបច្ចុប្បន្ន។

បន្ទាប់ពីដណ្ដើមបានពានរង្វាន់ជើងឯក English Premier League និងជ័យជម្នះក្នុងវគ្គផ្ដាច់ព្រ័ត្រនៅ FA Cup 2023 ក្លឹប Manchester City កំពុងស្ថិតនៅចំពោះមុខឱកាសធំដែលអាចនាំទៅរកការលើកពានទាំងបីក្នុងប្រវត្តិសាស្ត្រនារដូវកាលនេះ។ ការប្រកួតផ្ដាច់ព្រ័ត្រជាមួយនឹង Inter Milan នៅពានរង្វាន់ Champions League នាថ្ងៃទី 11 មិថុនាខាងមុខ នឹងជារនាំងចុងក្រោយដែលកូនសិស្ស និងគ្រូបង្វឹក Pep Guardiola របស់ Man City ត្រូវឆ្លងឱ្យផុត ដើម្បីក្លាយជាម្ចាស់ជើងឯកបីពាន់រង្វាន់ក្នុងមួយរដូវកាល។

ថ្មីៗនេះ អង្គការ Brand Finance បានប្រកាសបញ្ជីឈ្មោះស្ដីពីបណ្ដាក្លឹបបាល់ទាត់ដែលមានតម្លៃខ្ពស់ជាងគេលើពិភពលោក ក្នុងនោះ Man City ស្ថិតនៅលើកំពូលតារាងចំណាត់ថ្នាក់ ដោយសារប្រាក់ចំណូលកើន នាំឱ្យតម្លៃយីហោក៏កើនបន្ថែម 13% ជួយឱ្យតម្លៃសរុបរបស់ក្លឹបនេះលោតឡើងដល់ 1.51 ពាន់លានអឺរ៉ូក្នុងឆ្នាំ 2023។

តារាងចំណាត់ថ្នាក់របស់ Brand Finance

ចំណែកក្លឹបដែលមានតម្លៃខ្ពស់ជាងគេលំដាប់ទីពីរលើពិភពលោក បានទៅលើ Real Madrid ព្រោះតែតម្លៃយីហោបានធ្លាក់អស់ 4% មកនៅត្រឹម 1.46 ពាន់លានអឺរ៉ូ។

បណ្ដាក្លឹបរបស់អេស្ប៉ាញ បន្តរីកចម្រើនខ្លាំងក្នុងឆ្នាំនេះ ក្នុងនោះ Barcelona ជាប់លេខបី, Atletico Madrid លេខ 12, Sevilla លេខ 25, Real Betis លេខ 34, Villareal លេខ 36 និង Real Sociedad លេខ 37។

Man United ជាប់លេខបួន ដោយមានតម្លៃ 1.4 ពាន់លានអឺរ៉ូ និងនៅពីលើ Liverpool ដែលមានតម្លៃ 1.4 ពាន់លានអឺរ៉ូដូច ប៉ុន្តែ Man United កើន 9% ខណៈ Liverpool កើនតែ 7%។ Arsenal ជាប់ចំណាត់ថ្នាក់លេខដប់ ខណៈ PSG ក៏មានឈ្មោះក្នុង Top 50៕

June 6, 2023

យន្តហោះអវកាសរបស់ Sierra Space ត្រៀមជិតរួចរាល់សម្រាប់បេសកកម្មដំបូង

(សហរដ្ឋអាម៉េរិក) – ក្រុមហ៊ុន Sierra Space បានបញ្ឆេះម៉ាស៊ីនយន្តហោះអវកាស Dream Chaser នៅក្នុងរោងចក្រដំឡើង បញ្ជាក់ថា យានដែលមានរូបរាងដូចទៅនឹង Space Shuttle បានត្រៀមខ្លួនជិតរួចរាល់ហើយសម្រាប់ការបំពេញភារកិច្ចដំបូងនៅក្នុងគន្លងគោចរផែនដី។

យោងតាម Yahoo ក្រុមហ៊ុន Sierra Space នៅ Colorado កាលពីថ្ងៃទី 31 ឧសភា 2023 ប្រកាសថា បានទទួលជោគជ័យក្នុងការបញ្ឆេះដំណើរការគ្រឿងម៉ាស៊ីន និងប្រព័ន្ធនានារបស់យន្តហោះអវកាស Dream Chaser។

Dream Chaser គឺជាយន្តហោះអវកាសដែលរចនាឡើងដើម្បីហោះហើរក្នុងគន្លងតារាវិថីកម្រិតទាបរបស់ផែនដី នៅក្នុងបេសកកម្មដឹកអ្នកអវកាស និងទំនិញឡើងទៅកាន់គោលដៅនានា មានដូចជាស្ថានីយអវកាសអន្តរជាតិ (ISS) ជាដើម។ យាននេះអាចដឹកទំនិញបាន 5,443 គីឡូក្រាម។

ដោយសារតែមិនអាចហោះឡើងដល់ទីអវកាសដោយខ្លួនឯង Dream Chaser ត្រូវការរ៉ុក្កែតធំដូច Vulcan Centaur របស់ ULA រុញច្រានឡើងទៅដល់គន្លងតារាវិថីកម្រិតទាប។ ក៏ប៉ុន្តែ ដូចទៅនឹងយាន Space Shuttle របស់ណាសា Dream Chaser អាចទម្លាក់ខ្លួនចូលបរិយាកាសផែនដី និងហោះចុះចតលើព្រលានយន្តហោះនៅលើដី។

Dream Chaser មានបណ្ដោយសរុបជាង 9 ម៉ែត្រ ខ្លីជាងបួនដងធៀបនឹង Space Shuttle។ ក្រុមហ៊ុន Sierra Space កំពុងឆ្ពោះទៅកាន់ការហោះហើរដំបូងរបស់ Dream Chaser នៅមជ្ឈមណ្ឌលអវកាស Kennedy ក្នុងឆ្នាំ 2023 នេះ។ ជើងហោះហើរនេះស្ថិតក្នុងកិច្ចព្រមព្រៀងជាមួយណាសា ដើម្បីដឹកទំនិញឡើងទៅកាន់ ISS។

សកម្មភាពដំឡើងយន្តហោះអវកាស Dream Chaser របស់ Sierra Space

ក្រៅពីនេះ Sierra Space ក៏មានគម្រោងបាញ់បង្ហោះយានដឹកមនុស្សទៅកាន់ស្ថានីយអវកាសផ្ទាល់ខ្លួនដែលមានឈ្មោះថា Orbital Reef នៅក្នុងគម្រោងដែលសហការជាមួយ Blue Origin របស់មហាសេដ្ឋី Jeff Bezos ផងដែរ។

បច្ចុប្បន្ន Sierra Space កំពុងត្រៀមខ្លួនសម្រាប់ការនាំយាន Dream Chaser ដំបូងដែលមានឈ្មោះថា Tenacity ទៅកាន់មូលដ្ឋានធ្វើតេស្ត Neil Armstrong របស់ណាសា នៅ Ohio ដើម្បីត្រួតពិនិត្យ មុនពេលចាប់ផ្ដើមការហោះហើរលើកទីមួយ៕

June 3, 2023

ឥណ្ឌាជោគជ័យក្នុងការបាញ់សាកល្បងមីស៊ីលប្លោង Agni-1

(ឥណ្ឌា) – បញ្ជាការដ្ឋានកងកម្លាំងយុទ្ធសាស្ត្រ (SFC) បានបាញ់សាកល្បងមីស៊ីលប្លោងកម្រិតមធ្យម Agni-1 ពីកោះ Abdul Kalam ក្នុងរដ្ឋ Odisha ខាងកើត។

កាលពីថ្ងៃទី 01 មិថុនា 2023 ក្រសួងការពារជាតិឥណ្ឌា បានឱ្យដឹងថា បញ្ជាការដ្ឋានកងកម្លាំងយុទ្ធសាស្ត្រ (SFC) បានទទួលជោគជ័យទាំងស្រុងនៅក្នុងការបាញ់សាកល្បងមីស៊ីលប្លោងរយៈចម្ងាយមធ្យមយុទ្ធសាស្ត្រ Agni-1 ពីកោះ Abdul Kalam ក្នុងរដ្ឋ Odisha ខាងកើត។

ប្រកាសខាងលើសង្កត់ធ្ងន់ថា «មីស៊ីលនេះគឺជាប្រព័ន្ធមួយដែលត្រូវបានបញ្ជាក់រួចរាល់ថា មានសមត្ថភាពវាយប្រហារចំគោលដៅកម្រិតខ្ពស់ខ្លាំង»។

ក្នុងពីរទសវត្សរ៍កន្លង ឥណ្ឌាបានផ្ដោតទៅលើការបង្កើនសមត្ថភាពកំញើញជាយុទ្ធសាស្ត្រ តាមរយៈការអភិវឌ្ឍមីស៊ីលប្លោងច្រើនប្រភេទ អាវុធមានប្រព័ន្ធនាំផ្លូវវាយចំគោលដៅកម្រិតខ្ពស់ និងបច្ចេកវិទ្យាដែលពាក់ព័ន្ធ។ ប្រទេសនេះក៏បានអភិវឌ្ឍកំណែថ្មីៗជាច្រើនដែលយោងទៅលើមីស៊ីល Agni៕

June 2, 2023

ខ្សែប្រយុទ្ធរបស់ Man Utd ប្ដេជ្ញារារាំង Man City លើកពានទាំងបីក្នុងរដូវកាលនេះ

(អង់គ្លេស) – ខ្សែប្រយុទ្ធ Marcus Rashford ចាត់ទុកថា ការរារាំង Man City បង្កើតឡើងវិញទិដ្ឋភាពលើកពានជើងឯកទាំងបីនៃរដូវកាល 1998-1999 របស់ Manchester United គឺជារឿងសំខាន់បំផុត នៅមុនវគ្គផ្ដាច់ព្រ័ត្រ FA Cup។

«ការធានាថា Man Utd នៅតែជាក្លឹបអង់គ្លេសតែមួយគត់ដែលដណ្ដើមបានពានជើងឯកទាំងបីក្នុងមួយរដូវកាល (Treble) គឺជារឿងសំខាន់បំផុត» Rashford ថ្លែងដូច្នេះនៅពេលត្រូវបានសួរអំពីការជំរុញទឹកចិត្តរបស់គាត់នៅមុនវគ្គផ្ដាច់ព្រ័ត្រ FA Cup (Football Association Challenge Cup)។

ក្រោយពីដណ្ដើមបានពានរង្វាន់ជើងឯកលិគកំពូលអង់គ្លេសបន្តបន្ទាប់ជាលើកទីបី Man City នៅសល់ពីរប្រកួតទៀតដែលនឹងត្រូវប៉ះ Man Utd ក្នុងវគ្គផ្ដាច់ព្រ័ត្រ FA Cup នៅទីលាន Wembley របស់អង់គ្លេស ថ្ងៃទី 03 មិថុនា រួចប្រកួតជាមួយ Inter Milan ក្នុងវគ្គផ្ដាច់ព្រ័ត្រ Champions League នៅប្រទេសតួកគី ថ្ងៃទី 10 មិថុនា។ គ្រូបង្វឹក Pep Guardiola របស់ក្លឹប Man City ធ្លាប់បានសម្ដែងអំពីមហិច្ឆតាលើកពានទាំងបីនេះដើម្បីបង្កើតឡើងវិញទិដ្ឋភាពនៃជ័យជម្នះរបស់ Man Utd នៅរដូវកាល 1998-1999។

ខ្សែប្រយុទ្ធ Marcus Rashford របស់ Manchester United

សម្រាប់ Man Utd វិញ ការផ្ដួល Man City នៅលើទីលាន Wembley របស់ក្រុងឡុងដ៍នៅចុងសប្ដាហ៍នេះ មិនត្រឹមតែជួយឱ្យពួកគេលើកពានជើងឯកបានពីរបន្ទាប់ពី EFL Cup (League Cup) ក្នុងមួយរដូវកាលនោះទេ ប៉ុន្តែក៏រារាំងគូប្រកួតមកពីទីក្រុងជាមួយគ្នា បង្កើតឡើងជាថ្មីនូវជោគជ័យក្រោមការដឹកនាំរបស់ Sir Alex Ferguson កាលពី 24 ឆ្នាំមុនផងដែរ។

ក្នុងពិធីប្រគល់រង្វាន់ចុងរដូវកាលរបស់ Manchester United កាលពីព្រលប់ថ្ងៃទី 19 ឧសភា ខ្សែប្រយុទ្ធ Rashford ដណ្ដើមបានពានរង្វាន់ប្រចាំរដូវកាលចំនួនពីរសំខាន់ៗ គឺ ពានរង្វាន់កីឡាករឆ្នើមបំផុតដែលបោះឆ្នោតដោយអ្នកគាំទ្រ (Sir Matt Busby Player of the Year) និងពានរង្វាន់កីឡាករឆ្នើមបំផុតដែលបោះឆ្នោតដោយសមាជិកក្នុងក្រុម៕

May 31, 2023

បច្ចេកវិទ្យា «បាញ់បញ្ជូនអគ្គិសនីពីអវកាសមកកាន់ផែនដី» កំពុងមានការប្រកួតប្រជែងខ្លាំង

ក្រុមអ្នកវិទ្យាសាស្ត្រនៅសាកលវិទ្យាល័យ Kyoto នឹងធ្វើតេស្តក្នុងការប្រើប្រាស់ផ្កាយរណបបាញ់បញ្ជូនអគ្គិសនីបានពីព្រះអាទិត្យ មកកាន់ផែនដី ក្នុងទម្រង់រលកម៉ៃក្រូវេវ នៅឆ្នាំ 2025។

ការប្រណាំងប្រជែងគ្នាអភិវឌ្ឍបច្ចេកវិទ្យាបាញ់បញ្ជូនអគ្គិសនីព្រះអាទិត្យដែលប្រមូលបានពីទីអវកាស មកកាន់ផែនដី កំពុងឡើងកម្ដៅខ្លាំង។ នៅប្រទេសជប៉ុន ក្រុមហ៊ុនរបស់ Hiroshi Matsumoto អតីតនាយកសាកលវិទ្យាល័យ Kyoto កំពុងនាំមុខគេនៅក្នុងការស្រាវជ្រាវអំពីបច្ចេកវិទ្យានេះ។ បន្ទាប់មកគឺសាស្ត្រាចារ្យ Naoki Shinohara នៅសាកលវិទ្យាល័យ Kyoto ក៏បន្តការស្រាវជ្រាវ។ នេះបើតាម Nikkei ចុះផ្សាយកាលពីថ្ងៃទី 27 ឧសភា។

ឆ្នាំ 2009 ក្រុមរបស់ Shinohara បានប្រើប្រាស់បាឡុងហោះដើម្បីបាញ់បញ្ជូនអគ្គិសនីពីកម្ពស់ 30 ម៉ែត្រ មកកាន់ទូរស័ព្ទចល័តនៅលើដី។ នៅក្នុងឆ្នាំដដែល Shinohara ក៏ត្រូវបានជ្រើសតាំងជាប្រធានក្រុមប្រឹក្សាបច្ចេកវិទ្យារបស់គម្រោងពីក្រសួងសេដ្ឋកិច្ច ពាណិជ្ជកម្ម និងឧស្សាហកម្មរបស់ប្រទេសជប៉ុន ដើម្បីអភិវឌ្ឍមធ្យោបាយផ្គត់ផ្គង់អគ្គិសនីដោយមិនប្រើខ្សែ។ ក្រុមអ្នកវិទ្យាសាស្ត្រក្នុងគម្រោងនេះបានទទួលជោគជ័យក្នុងការធ្វើតេស្តបាញ់បញ្ជូនអគ្គិសនីក្នុងទម្រង់ម៉ៃក្រូវេវរលកទទឹង (transverse waves) កាលពីឆ្នាំ 2015 និងក្នុងទម្រម៉ៃក្រូវេវរលកបណ្ដោយ (longitudinal waves) កាលពីឆ្នាំ 2018 ក្នុងរយៈចម្ងាយពីប្រហែល 40 ម៉ែត្រ។ នាពេលខាងមុខ ពួកគេនឹងធ្វើតេស្តបាញ់បញ្ជូនអគ្គិសនីក្នុងទម្រម៉ៃក្រូវេវរលកបណ្ដោយពីចម្ងាយចាប់ពី 1 ដល់ 5 គីឡូម៉ែត្រ។

បច្ចុប្បន្ន ក្រុមអ្នកវិទ្យាសាស្ត្រខាងលើកំពុងដាក់គោលដៅធ្វើតេស្តការបាញ់បញ្ជូនអគ្គិសនីពីអវកាសមកកាន់ផែនដីនៅឆ្នាំ 2025។ ពួកគេនឹងប្រើប្រាស់ផ្កាយរណបខ្នាតតូចដើម្បីបាញ់បញ្ជូនអគ្គិសនីមកកាន់ទីតាំងទទួលនៅលើដីដែលមានគម្លាតពីគ្នារាប់រយគីឡូម៉ែត្រ។

រូបភាពបង្ហាញពីការបាញ់បញ្ជូនរលកម៉ៃក្រូវេវអវកាសមកកាន់ស្ថានីយទទួលនៅលើដី

គំនិតស្ដីពីការប្រមូលថាមពលព្រះអាទិត្យក្នុងទីអវកាស ត្រូវបានអ្នកវិទ្យាសាស្ត្រអាម៉េរិកលើកឡើងកាលពីឆ្នាំ 1968។ មធ្យោបាយរបស់ពួកគេគឺការបាញ់បង្ហោះផ្ទាំងសូឡាឡើងទៅកាន់ទីអវកាសដើម្បីផលិតអគ្គិសនីពីកម្ដៅព្រះអាទិត្យនៅលើកម្ពស់ 36,000 គីឡូម៉ែត្រ។ ថាមពលព្រះអាទិត្យត្រូវបានបំប្លែងទៅជារលកម៉ៃក្រូវេវ និងបាញ់បញ្ជូនមកកាន់ស្ថានីយទទួលនៅលើដី រួចបំប្លែងវាមកជាអគ្គិសនីវិញ។ រលកម៉ៃក្រូវេវអាចត្រូវបានបាញ់បញ្ជូនឆ្លងកាត់ពពក និងបង្កើតបានជាប្រភពផ្គត់ផ្គង់អគ្គិសនីដែលមានស្ថិរភាព មិនថាថ្ងៃ ឬយប់ ក្ដៅ ឬភ្លៀង៕

May 29, 2023

ដើម្បីត្រៀមសម្រាប់ការប្រកួតជាមួយជើងឯក World Cup ឥណ្ឌូណេស៊ីផ្ដល់សញ្ជាតិដល់កីឡាករបរទេសច្រើននាក់

ឥណ្ឌូណេស៊ីបន្តអនុវត្តគោលនយោបាយដែលមានតាំងពីឆ្នាំ 2021 ដោយការផ្ដល់សញ្ជាតិដល់កីឡាករបាល់ទាត់វ័យក្មេងពីររូបដែលកំពុងទាត់នៅប្រទេសហូឡង់ ហើយពួកគេនឹងបង្ហាញខ្លួនក្នុងការប្រកួតមិត្តភាពក្របខណ្ឌ FIFA Days នៅខែមិថុនា 2023។

កីឡាករពីររូបដែលទើបតែទទួលបានសញ្ជាតិឥណ្ឌូណេស៊ី រួមមាន Ivar Jenner អាយុ 19 ឆ្នាំ កំពុងលេងជាខ្សែបម្រើរបស់ក្លឹប FC Utrecht និង Rafael Struick អាយុ 20 ឆ្នាំ កំពុងលេងជាខ្សែប្រយុទ្ធឱ្យក្លឹប ADO Den Haag។ អ្នកទាំងពីរសុទ្ធតែមានជីដូនជីតាជាជនជាតិឥណ្ឌូណេស៊ី និងបានស្បថចូលក្រុមជម្រើសជាតិក្នុងនាមជាពលរដ្ឋឥណ្ឌូណេស៊ី ចាប់ពីថ្ងៃទី 22 ឧសភា។

សហព័ន្ធបាល់ទាត់ឥណ្ឌូណេស៊ី (PSSI) បានត្រៀមផ្ដល់សញ្ជាតិដល់ Jenner និង Struick កាលពីខែមុនដើម្បីឱ្យពួកគេចូលរួមក្នុងក្រុម U20 ទៅទាត់នៅ U20 World Cup លើទីលានដែលឥណ្ឌូណេស៊ីធ្វើជាម្ចាស់ផ្ទះ។ ប៉ុន្តែ ឥណ្ឌូណេស៊ីត្រូវបាន FIFA ដកហូតសិទ្ធរៀបចំការប្រកួត ធ្វើឱ្យក្រុម U20 របស់ពួកគេខកខានមិនបានទាត់នៅពានរង្វាន់នេះ និងបានពន្យារពេលលើការផ្ដល់សញ្ជាតិដល់កីឡាករពីររូបខាងលើ។

ក្រុមបាល់ទាត់ជម្រើសជាតិឥណ្ឌូណេស៊ី គ្រោងនឹងប្រកួតជាមួយប៉ាឡេស្ទីន និងអាហ្សង់ទីន នៅថ្ងៃទី 14 និង 19 មិថុនាខាងមុខ នៅហ្សាការតា។ គ្រូបង្វឹក Shin Tae-yong មិនទាន់បង្ហាញបញ្ជីឈ្មោះកីឡាករចុងក្រោយ ប៉ុន្តែនឹងប្រមូលកម្លាំងចាប់ពីថ្ងៃទី 05 មិថុនា។

ក្រៅពី Jenner និង Struick PSSI ក៏មានគម្រោងផ្ដល់សញ្ជាតិដល់ Justin Hubner អាយុ 19 ឆ្នាំ សញ្ជាតិហូឡង់ ជាខ្សែការពាររបស់ Wolves លេងនៅពានរង្វាន់លីគកំពូលអង់គ្លេសផងដែរ។

ប្រធាន PSSI លោក Erick Thohir (ឆ្វេង), Rafael Struick (កណ្ដាល) និង Ivar Jenner នៅហ្សាការតា កាលពីថ្ងៃទី 24 ឧសភា 2023

PSSI បានជំរុញគោលនយោបាយផ្ដល់សញ្ជាតិដល់កីឡាករមានឈាមជ័រជាជនជាតិឥណ្ឌូណេស៊ី តាំងពីឆ្នាំ 2021។ កីឡាករជាច្រើនរូបដែលត្រូវបានផ្ដល់សញ្ជាតិទៅតាមគោលនយោបាយនេះ មានជាអាទិ៍ Jordi Amat (ធ្លាប់លេងនៅពានរង្វាន់ La Liga), Elkan Baggott លេងឱ្យ Ipswich Town នៅពានរង្វាន់ League One (អង់គ្លេស) ឬ Marc Klok និង Sandy Walsh ។ល។ PSSI ក៏ផ្ដល់សញ្ជាតិដល់កីឡាករដែលមិនមានឈាមជ័រជាជនជាតិឥណ្ឌូណេស៊ីផងដែរ ក្នុងនោះមានដូចជា ខ្សែប្រយុទ្ធ Ilija Spasojevic ជាដើម។

ថ្មីៗនេះ បាល់ទាត់ឥណ្ឌូណេស៊ីទទួលបានជោគជ័យមួយចំនួន រួមមាន មេដាយមាសស៊ីហ្គេមលើកទី 32 និងដណ្ដើមបានជើងឯក U16 អាស៊ីអាគ្នេយ៍ 2022។ បាល់ទាត់ឥណ្ឌូណេស៊ីក៏កំពុងឆ្ពោះទៅរកជោគជ័យធំជាងនេះនៅវគ្គជម្រុះ World Cup 2026, Asian Cup 2023 និង AFF Cup ផងដែរ។

ការអញ្ជើញក្រុមជម្រើសជាតិអាហ្សង់ទីនមកប្រកួតមិត្តភាពនៅថ្ងៃទី 19 មិថុនា គឺជាសកម្មភាពលើកកម្ពស់មុខមាត់របស់វិស័យបាល់ទាត់ឥណ្ឌូណេស៊ី។ PSSI ក៏បានឱ្យដឹងថា រៀងរាល់ឆ្នាំ ប្រទេសនេះនឹងអញ្ជើញក្រុមជម្រើសជាតិល្បីៗមកប្រកួតមិត្តភាព ក្នុងនោះមាន ព័រទុយហ្កាល់ ប្រស៊ីល ឬម៉ារ៉ុក។ល។

May 29, 2023

រ៉ុក្កែតដំបូងលើពិភពលោកដែលប្រើប្រាស់ឥន្ធនៈចម្រាញ់ពីធ្យូងថ្ម

រ៉ុក្កែត Tianlong-2 របស់ក្រុមហ៊ុនចិន Space Pioneer ត្រូវបានបាញ់បង្ហោះជោគជ័យជាលើកដំបូងកាលពីខែមេសា 2023 ដោយប្រើប្រាស់ឥន្ធនៈជាប្រេងសាំង kerosene ដែលមានប្រភពពីធ្យូងថ្ម។

ឥន្ធនៈថ្មីរបស់ Space Pioneer ដំណើរការល្អដូចទៅនឹងប្រេងសាំងយន្តហោះ kerosene ធ្វើពីរ៉ែប្រេង។ អ្នកជំនាញផ្នែកអវកាសមួយចំនួនបានឱ្យដឹងថា វាផ្គត់ផ្គង់ថាមពលសុវត្ថិភាព និងប្រសិទ្ធភាពដល់វិស័យអវកាសចរណ៍។ នេះបើតាម SCMP ចុះផ្សាយកាលពីថ្ងៃទី 25 ឧសភា។

ម៉ាស៊ីនរ៉ុក្កែតទាមទារឱ្យមានឥន្ធនៈគុណភាពខ្ពស់ ហើយប្រេងសាំង kerosene សម្រាប់រ៉ុក្កែតបច្ចុប្បន្ន អាចត្រូវបានចម្រាញ់តែពីប្រេងរ៉ែដែលមានគុណភាពខ្ពស់តាមរយៈការចម្រាញ់ដ៏ស្មុគស្មាញ។ ប្រភពឥន្ធនៈនេះតែងតែបង្កការលំបាកច្រើន នៅពេលប្រទេសចិនមានប្រេងប្រភេទនេះក្នុងបរិមាណមានកំណត់ ហើយប្រេងរ៉ែ តែងតែមានគុណភាពមិនល្អ។

ការបាញ់បង្ហោះរ៉ុក្កែតដំណើរការដោយប្រេងសាំង kerosene ចម្រាញ់ពីធ្យូងថ្ម ត្រូវបានគេចាត់ទុកថាជាសមិទ្ធផលលេចធ្លោនៅក្នុងវិស័យអវកាស។

ប្រេងសាំង kerosene សម្រាប់យន្តហោះ ដែលមានប្រភពពីធ្យូងថ្ម ត្រូវបានអភិវឌ្ឍដោយការសហការគ្នារវាងបណ្ដាក្រុមហ៊ុនរដ្ឋចិត្ត រួមមាន វិទ្យាស្ថានស្រាវជ្រាវលេខ 165 របស់ CASC (ក្រុមហ៊ុនវិទ្យាសាស្ត្រ និងបច្ចេកវិទ្យាអវកាសចិន), ក្រុមហ៊ុនគីមីធ្យូងរាវនៃសាជីវកម្មបច្ចេកទេសថាមពលចិន និងសាជីវកម្មធ្យូង Ningxia។

រ៉ុក្កែត Tianlong-2 របស់ក្រុមហ៊ុនចិន Space Pioneer ត្រូវបានបាញ់បង្ហោះជោគជ័យជាលើកដំបូងកាលពីថ្ងៃទី 02 ខែមេសា 2023

កាលពីថ្ងៃទី 02 មេសា ឆ្នាំ 2023 ក្រោយការធ្វើតេស្តលើម៉ាស៊ីនជាង 300 លើក រ៉ុក្កែត Tianlong-2 ក៏ត្រូវបានបាញ់បង្ហោះដោយជោគជ័យជាមួយនឹងឥន្ធនៈថ្មី។ ម៉ាស៊ីនប្រើឥន្ធនៈរាវ YF-102 នៅលើរ៉ុក្កែត Tianlong-2 ដែលអភិវឌ្ឍដោយវិទ្យាស្ថានបច្ចេកវិទ្យា និងវិទ្យាសាស្ត្រអវកាសលេខ 6 គឺជាម៉ាស៊ីនស្ដង់ដាសម្រាប់បណ្ដាយានជំនាន់ថ្មីរបស់ប្រទេសចិន។ បណ្ដារ៉ុក្កែត Long March 5, 6 និង 7 គឺសុទ្ធតែប្រើប្រាស់ម៉ាស៊ីនប្រភេទនេះ។ នេះមានន័យថា ពួកវាក៏អាចប្រើប្រាស់ប្រេងសាំង kerosene ដែលចម្រាញ់ពីធ្យូងថ្ម៕

May 27, 2023

ភាពយន្ត «Fast X» រកចំណូលបានច្រើនសម្បើមនៅក្នុងសប្ដាហ៍ដំបូង

ភាពយន្តរឿង «Fast X» ឬហៅថា «Fast & Furious 10» រកចំណូលដំបូងបានជិតស្មើនឹង 70 លានដុល្លារអាម៉េរិក របស់ភាពយន្តវគ្គមុន «F9»។

ប្រាក់ចំណូលបានពីរោងកុននៅសហរដ្ឋអាម៉េរិក ក្នុងសប្ដាហ៍ដំបូងរបស់ភាពយន្តរឿង «Fast X» ត្រូវបានគេយល់ថា «រលូន» ដោយរកបាន 67 លានដុល្លារ។ ភាពយន្តដែលដឹករឿងដោយ Louis Leterrier នេះ រកបាន 28 លានដុល្លារកាលពីថ្ងៃសុក្រ និង 22.2 លានដុល្លារកាលពីថ្ងៃសៅរ៍សប្ដាហ៍កន្លង ជិតស្មើនឹង 70 លានដុល្លារអាម៉េរិករបស់វគ្គមុន គឺ «F9»។

ប៉ុន្តែ ជោគជ័យចុងក្រោយរបស់ភាពយន្តនេះគឺអាស្រ័យលើទស្សនិកជនទូទាំងសកលលោក។ «Fast X» រកបានប្រហែល 319 លានដុល្លារអាម៉េរិកនៅទូទាំងពិភពលោក សម្រាប់សប្ដាហ៍ដំបូង ដែលនេះធ្វើឱ្យវាក្លាយជាភាពយន្តរកប្រាក់ចំណូលបានខ្ពស់ជាងគេលំដាប់ទីបីសម្រាប់ «Fast & Furious» បន្ទាប់ពី «Fate of the Furious» និង «Furious 7»។

ភាពយន្តរឿង «Fast X» ឬហៅថា «Fast & Furious 10»

«Fast & Furious» បានក្លាយជាខ្សែភាពយន្តដែលមិនពឹងផ្អែកលើរឿងនិពន្ធដែលមានស្រាប់ រកចំណូលបានច្រើនជាងគេនៅ Hollywood នាបច្ចុប្បន្នដោយ។ ខ្សែភាពយន្តដែលជាប្រភេទសកម្មភាព និយាយអំពីការប្រណាំងឡាន និងអំពើឧក្រិដ្ឋនេះ រកប្រាក់ចំណូលបានជាង 6 ពាន់លានដុល្លារអាម៉េរិក។ ក៏ប៉ុន្តែ តាមគម្រោង យីហោ «Fast & Furious» នេះ នឹងត្រូវបញ្ចប់ត្រឹមវគ្គ 11 នៅឆ្នាំ 2025៕

May 22, 2023

យន្តហោះអវកាសដ៏អាថ៌កំបាំងរបស់ចិន បង្ហោះវត្ថុ «សម្ងាត់» ទៅក្នុងគន្លងគោចរ

យោងតាមមជ្ឈមណ្ឌលស្រាវជ្រាវអន្តរជាតិ និងយុទ្ធសាស្ត្រនៅសហរដ្ឋអាម៉េរិក យន្តហោះអវកាសប្រើប្រាស់ឡើងវិញរបស់ប្រទេសចិន បានបង្ហោះវត្ថុមួយចូលទៅក្នុងគន្លងគោចរកាលពីខែតុលា ឆ្នាំ 2022។

ក្រោយរយៈពេល 9 ខែនៅលើគន្លងគោចរ យន្តហោះអវកាសដ៏អាថ៌កំបាំងរបស់ប្រទេសចិនក៏បានចុះចត ជួយឱ្យប្រទេសនេះក្លាយជាមួយក្នុងចំណោមប្រទេសដ៏តិចតួចដែលបានបាញ់បង្ហោះ និងបញ្ជាឱ្យចុះចតដោយជោគជ័យនូវយន្តហោះអវកាសដែលអាចប្រើប្រាស់ឡើងវិញ។ យន្តហោះអវកាសនេះបានត្រលប់មកកាន់ផែនដីវិញកាលពីព្រឹកថ្ងៃទី 08 ឧសភា 2023 បន្ទាប់ពីស្ថិតនៅលើគន្លងគោចរអស់រយៈពេល 276 ថ្ងៃ យូរជាង 100 ដង ធៀបនឹងជើងហោះហើរដំបូងកាលពីជិត 3 ឆ្នាំមុន។

ក៏ប៉ុន្តែ រដ្ឋាភិបាលចិនមិនបានប្រកាសព័ត៌មានច្រើនទាក់ទងនឹងយន្តហោះអវកាសនេះទេ។ នេះបើតាម Live Science ចុះផ្សាយកាលពីថ្ងៃទី 20 ឧសភា។

Kevin Pollpeter អ្នកវិទ្យាសាស្ត្រប្រចាំមជ្ឈមណ្ឌលវិភាគផ្នែកទ័ពជើងទឹករបស់សហរដ្ឋអាម៉េរិក ឱ្យដឹងថា យន្តហោះអវកាសរបស់អាម៉េរិក Boeing X-37B ដែលបានបង្ហាញខ្លួនកាលពីឆ្នាំ 2010 អាចជាកត្តាជំរុញឱ្យរដ្ឋាភិបាលចិនអភិវឌ្ឍយន្តហោះអវកាសផ្ទាល់ខ្លួន។

ដូចទៅនឹង Boeing X-37B យន្តហោះអវកាសរបស់ចិនទំនងជាមិនមានមនុស្សបើកបរ និងតូច។ វាប្រហែលជាបានហោះហើរលើកដំបូងកាលពីខែកញ្ញា 2020 និងចុះចតវិញក្រោយការហោះហើរបាន 2 ថ្ងៃ។ បេសកកម្មថ្មីបំផុតរបស់យន្តហោះអវកាសចិន ចាប់ផ្ដើមពីខែសីហា 2022 ដែលហោះឡើងដោយសាររ៉ុក្កែត Long March 2F។ នេះបើតាមរបាយការណ៍របស់មជ្ឈមណ្ឌលស្រាវជ្រាវអន្តរជាតិ និងយុទ្ធសាស្ត្រ (CSIS) នៅសហរដ្ឋអាម៉េរិក។ គោលដៅពិតប្រាកដរបស់បេសកកម្មនេះនៅតែជារឿងអាថ៌កំបាំង។

CSIS បានឱ្យដឹងថា យន្តហោះអវកាសចិន បានទម្លាក់វត្ថុមួយទៅក្នុងគន្លងគោចរកាលពីខែតុលា 2022។ វត្ថុនេះទំនងជាបានបាត់ខ្លួនកាលពីខែមករា 2023 ហើយក្រោយមកក៏បានបង្ហាញខ្លួនជាថ្មីនៅលើរ៉ាដាកាលពីខែមីនា 2023។ ក្រុមអ្នកជំនាញយល់ថា ប្រការនេះអាចបង្ហាញថា យន្តហោះអវកាសចិនមានសមត្ថភាពបំផ្លាស់ទីវត្ថុដោយដៃយន្តរបស់វា៕

May 22, 2023

ជោគជ័យធំៗចំនួនបី ដែលកម្ពុជាទទួលបានក្នុងព្រឹត្តិការណ៍ស៊ីហ្គេមលើកទី 32

ប្រទេសកម្ពុជាបានទទួលជោគជ័យធំៗចំនួនបី នៅក្នុងមហាព្រឹត្តិការណ៍ស៊ីហ្គេមលើកទី 32។ នេះបើតាម ឯកឧត្ដម វ៉ាត់ ចំរើន រដ្ឋលេខាធិការក្រសួងទេសចរណ៍ និងជាអគ្គលេខាធិការគណៈកម្មាធិការជាតិរៀបចំការប្រកួតស៊ីហ្គេមលើកទី 32 (CAMSOC)។

ការបញ្ជាក់ខាងលើ ត្រូវបានធ្វើឡើងនៅព្រឹកថ្ងៃទី 16 ឧសភា បន្ទាប់ពី រដ្ឋលេខាធិការក្រសួងទេសចរណ៍ បានចូលរួមក្នុងសន្និសីទសារព័ត៌មានស្ដីពីការទទួលធ្វើជាម្ចាស់ផ្ទះព្រឹត្ដិការណ៍ស៊ីហ្គេមលើកទី 33។

យោងតាម ឯកឧត្ដម វ៉ាត់ ចំរើន ជោគជ័យធំទីមួយដែលកម្ពុជាទទួលបាន គឺភាពជោគជ័យដ៏អស្ចារ្យនៃការរៀបចំពិធីបើកជាផ្លូវការព្រឹត្តិការណ៍ស៊ីហ្គេមលើកទី 32 កាលពីថ្ងៃទី 05 ឧសភា 2023 នៅពហុកីឡដ្ឋានមរតកតេជោ។

សម្រាប់ភាពជោគជ័យធំទីពីរ គឺចំនួនដ៏ច្រើននៃមេដាយដែលកម្ពុជាទទួលបានពីព្រឹត្តិការណ៍ស៊ីហ្គេម ដែលនេះអាចជួយកម្ពុជាជាប់ចំណាត់ថ្នាក់ទីបួន ក្នុងចំណោម 11 ប្រទេស ហើយនេះគឺជារឿងមិនធ្លាប់មានពីមុនមកសម្រាប់កម្ពុជា។

«ជោគជ័យទីបី គឺភាពជោគជ័យរបស់មហាជន និងសារព័ត៌មានដែលបានផ្តិតយករូបភាពល្អៗ និងរូបភាពមួយដ៏អស្ចារ្យ គឺរូបភាពនៃការដាក់ចេញនូវស្មារតីកីឡារបស់កីឡារិនី ប៊ូ សំណាង» ឯកឧត្ដម វ៉ាត់ ចំរើន ថ្លែងដូច្នេះ។

ឯកឧត្ដមបានបន្ថែមថា ទាំងអស់នេះជាការសម្រេចដ៏ត្រឹមត្រូវ និងខ្ពង់ខ្ពស់បំផុតរបស់សម្តេចតេជោ នាយករដ្ឋមន្ត្រីនៃព្រះរាជាណាចក្រកម្ពុជា សម្រាប់មហាព្រឹត្តិការណ៍នេះ៕

May 16, 2023

យន្តហោះធំជាងគេលើពិភពលោក ទម្លាក់យន្តហោះល្បឿនលឿនជាងសំឡេងបានសម្រេច

(សហរដ្ឋអាម៉េរិក) – យន្តហោះដែលមានស្លាបប្រវែង 117 ម៉ែត្ររបស់ក្រុមហ៊ុន Stratolaunch ទម្លាក់យន្តហោះគំរូដើមដែលមានល្បឿនលឿនជាងសំឡេងក្រោមប្រាំដង បានដោយជោគជ័យ នៅឯលំហសមុទ្រ California។

ក្រុមហ៊ុនអាកាសចរណ៍អវកាស Stratolaunch នៅសហរដ្ឋអាម៉េរិក សម្រេចបានមួយជំហានសំខាន់ទៀតក្នុងការធ្វើឱ្យប្រព័ន្ធបង្ហោះយន្តហោះល្បឿនលឿនជាងសំឡេងក្រោមប្រាំដង ក្លាយជាឧបករណ៍ដែលអាចប្រើប្រាស់បាន។ កាលពីសប្ដាហ៍កន្លង ក្រុមហ៊ុននេះសម្រេចបានជោគជ័យនៅពេលទម្លាក់យានសម្រាប់ធ្វើតេស្ត Talon-0 (TA-0) ពីយន្តហោះ Roc។

ដោយមានដងខ្លួនចំនួនពីរ មានម៉ាស៊ីន Boeing 747 ចំនួន 6 គ្រឿង, កង់ចំនួន 28 គ្រាប់ និងស្លាបប្រវែង 117 ម៉ែត្រ (វែងជាងទីលានបាល់ទាត់) Roc គឺជាយន្តហោះធំជាងគេបង្អស់លើពិភពលោក បើគិតទៅតាមប្រវែងស្លាប។ នេះបើតាមទំព័រ Space។

Roc ហោះឡើងពីព្រលាន Mojave នៅ California ខាងត្បូង កាលពីព្រឹកថ្ងៃទី 13 ឧសភា ចាប់ផ្ដើមជើងហោះហើរសាកល្បងលើកទី 11។ Roc នាំយកយានសម្រាប់ធ្វើតេស្ត TA-0 បំពាក់នៅចន្លោះដងខ្លួនទាំងពីររបស់វា និងហោះទៅទិសខាងលិច ហើយទម្លាក់ TA-0 នៅពេលទៅដល់លំហសមុទ្រ California។ TA-0 ទម្លាក់ខ្លួនចុះលើផ្ទៃទឹកសមុទ្រ ទៅតាមការគ្រោងទុក ខណៈ Roc ហោះត្រលប់មកចុះចតវិញ ក្រោយបេសកកម្មសាកល្បងរយៈពេលប្រហែលបួនម៉ោងបានបញ្ចប់។

Stratolaunch មានគម្រោងប្រើប្រាស់ Roc ដើម្បីដឹកយន្តហោះគ្មានមនុស្សបើកបរ ល្បឿនលឿនជាងសំឡេងក្រោមប្រាំដង Talon-A (TA-1) ឡើងទៅកាន់កម្ពស់ 10,000 ម៉ែត្រ។ នៅទីនោះ វានឹងត្រូវបានផ្ដាច់ចេញពី Roc ដើម្បីហោះហើរដោយខ្លួនឯង។ TA-1 ដំណើរការដោយរ៉ុក្កែត នឹងបន្តហោះក្នុងល្បឿន Mach 5 (6,174 គីឡូម៉ែត្រ/ម៉ោង) មុនពេលចុះចតដោយស្វ័យប្រវត្ត៕

May 16, 2023

ក្រុមបាល់ទាត់នារីវៀតណាមអាចក្លាយជាម្ចាស់ជើងឯកបួនជំនាន់ជាប់គ្នាដំបូងគេនៅស៊ីហ្គេម

បើសិនជាផ្ដួលមីយ៉ាន់ម៉ាបានសម្រេចនៅវគ្គផ្ដាច់ព្រ័ត្រនាព្រលប់ថ្ងៃទី 15 ឧសភានេះ ក្រុមបាល់ទាត់នារីវៀតណាម នឹងក្លាយជាក្រុមនារីដំបូងគេដែលគ្រប់គ្រងជើងឯកបាល់ទាត់នារីបួនជំនាន់បន្តបន្ទាប់គ្នានៅស៊ីហ្គេម។

ដោយមានកីឡាការិនីពេញដោយគុណភាព និងបទពិសោធន៍ ក្រុមបាល់ទាត់នារីវៀតណាមបាន និងកំពុង «បង្កព្យុះភ្លៀង» នៅលើទីលានបាល់ទាត់នៅអាស៊ីអាគ្នេយ៍។ ក្រុមវៀតណាមបានលើកពានស៊ីហ្គេមបីលើកជាបន្តបន្ទាប់ បើទោះជាមានក្រុមជើងខ្លាំងថៃ ហ្វ៊ីលីពីន ឬមីយ៉ាន់ម៉ា នាប៉ុន្មានឆ្នាំកន្លង។

បើសិនទទួលបានជោគជ័យនៅក្នុងការប្រកួតវគ្គផ្ដាច់ព្រ័ត្រនៅម៉ោង 19 ព្រលប់នេះ ក្រុមនារីវៀតណាមនឹងក្លាយជាក្រុមនារីដំបូងគេដែលដណ្ដើមបានមេដាយមាសបួនជំនាន់ជាបន្តបន្ទាប់ និង 8 លើកនៅស៊ីហ្គេម។ បច្ចុប្បន្ន ក្រុមនារីថៃ ក៏ធ្លាប់លើកពានបីលើកជាប់ៗគ្នានៅស៊ីហ្គេមផងដែរ។

នៅមុនពេលឡើងដល់វគ្គផ្ដាច់ព្រ័ត្រ វៀតណាមធ្លាប់ផ្ដួលមីយ៉ាន់ម៉ា 3-1 នៅជើងទីពីរ។ បើសិនពិនិត្យទៅលើប្រវត្តិនៃការប៉ះគ្នារវាងមីយ៉ាន់ម៉ា និងវៀតណាម គេឃើញថា វៀតណាមកំពុងមានប្រៀបជាងក្នុងផ្នែកកម្លាំងចិត្ត។ ចាប់ពីឆ្នាំ 2007 ពួកគេបានប៉ះគ្នា 26 ប្រកួតនៅគ្រប់ទីលាន ក្នុងនោះវៀតណាមឈ្នះ 18 ប្រកួត, ស្មើ 5 ប្រកួត និងចាញ់ 3 ប្រកួត។ ដោយឡែក នៅក្នុងស៊ីហ្គេម វៀតណាមមិនបានចាញ់មីយ៉ាន់ម៉ា ប៉ុន្តែបានឈ្នះ 3 ប្រកួត និងស្មើ 2 ប្រកួត។

ទោះជាយ៉ាងណាក៏ដោយ មីយ៉ាន់ម៉ា គឺជាក្រុមដែលអាចធ្វើឱ្យមានការភ្ញាក់ផ្អើលគ្រប់ពេល។ ប្រការនេះ ពួកគេបានបញ្ជាក់រួចហើយតាមរយៈការផ្ដួលហ្វ៊ីលីពីន និងយកឈ្នះលើកថៃនៅវគ្គពាក់កណ្ដាលផ្ដាច់ព្រ័ត្រ៕

May 15, 2023

Tag: ជោគជ័យ