Tag: ខាតបង់

YouTube លុបវីដេអូរាប់ពាន់របស់ឆានែលនៅវៀតណាម ដោយជឿថា បានរំលោភគោលការណ៍
YouTube បានលុបវីដេអូចំនួនរាប់ពាន់ដែលនិយាយអំពីតួអង្គ Wolfoo ដោយសារមានការតវ៉ាថា បានរំលោភកម្មសិទ្ធិបញ្ញារបស់ Peppa Pig ប៉ុន្តែខាងក្រុមហ៊ុនវៀតណាមថា មិនបានធ្វើខុសគោលការណ៍។
Sconnect ជាក្រុមហ៊ុនផលិតវីដេអូរបស់វៀតណាម ដែលនៅពីក្រោយតួអង្គភាពយន្តគំនូរជីវចល Wolfoo យល់ថា YouTube បានលុបវីដេអូទាំងនេះដោយខុសច្បាប់ បណ្ដាលឱ្យឆានែលនានារបស់ក្រុមហ៊ុននេះ ត្រូវបាត់បង់វីដេអូជាង 3,000 និងចំនួនអ្នកចូលមើលរាប់ពាន់លានលើក។
ក្នុងរបាយការណ៍ដែលបានផ្ញើលទៅកាន់អាជ្ញាធរវៀតណាមកាលពីចុងខែកក្កដា Sconnect ឱ្យដឹងថា បណ្ដាវីដេអូរបស់ពួកគេត្រូវបានបណ្ដាញសង្គមរបស់ Google លុបចោលដោយលើកហេតុផលថា បានរំលោភលើគោលការណ៍កម្មសិទ្ធិបញ្ញាស្ដីពីរូបភាព និងសំឡេង។ ភាគីដែលបានរាយការណ៍ទៅ YouTube គឺ Entertainment One (EO) ដែលជាក្រុមហ៊ុននៅពីក្រោយតួអង្គគំនូរជីវចលជ្រូក Peppa។
គំនូរជីវចល Peppa Pig
យោងតាម Sconnect ទាំង EO ទាំង YouTube សុទ្ធតែមិនបានលើកឡើងភ័ស្ដុតាងច្បាស់លាស់ដែលបង្ហាញថា បណ្ដាវីដេអូ Wolfoo បានរំលោភលើគោលការណ៍កម្មសិទ្ធិរូបភាព និងសំឡេងនៅក្នុងវីដេអូរបស់ Peppa Pig។ ក្រៅពីនេះ សំឡេង និងរូបភាពទាំងនេះក៏សុទ្ធតែមាននៅក្នុងជីវភាពប្រចាំថ្ងៃ។
ក្រុមហ៊ុនវៀតណាមខាងលើឱ្យដឹងថា បានផ្ញើការតវ៉ានេះទៅកាន់តំណាង YouTube តាំងពីខែមិថុនា ប៉ុន្តែក្រោយរយៈពេលជាងមួយខែ នៅតែមិនទាន់ទទួលបានចម្លើយ។ ចំណែកចំនួនវីដេអូដែលត្រូវបានលុប និងមិនអាចស្ដារឡើងវិញបាន នៅតែបន្តកើនឡើង គ្រាដែលឆានែលជាច្រើនមិនអាចបង្ហោះវីដេអូថ្មី បង្កឱ្យមានការខាតបង់យ៉ាងធ្ងន់ធ្ងរ។
គំនូរជីវចល Wolfoo
យោងតាមការគណនានៅលើទំព័រ SocialBlade ឆានែល Wolfoo Family របស់ Sconnect បានបត់បង់ចំនួនអ្នកចូលមើលអស់ប្រហែល 2.4 ពាន់លានលើក ក្រោយពីវីដេអូនានារបស់ឆានែលនេះត្រូវបានលុបកាលពីខែឧសភា 2023។
ក្នុងពេលដែលអាជ្ញាធរវៀតណាមកំពុងរកដំណោះស្រាយ ភាគីខាង YouTube និង EO មិនទាន់បញ្ចេញប្រតិកម្មអ្វីនៅឡើយ ទាក់ទងនឹងការតវ៉ារបស់ Sconnect៕
August 1, 2023
ចិនបាញ់រ៉ុក្កែត «ហៅទឹកភ្លៀង» បានជិត 40 ពាន់លានតោន និងសង្គ្រោះបានជាង 14 ពាន់លានយុន
សកម្មភាពបាញ់រ៉ុក្កែតទៅលើអាកាសដើម្បីហៅភ្លៀង គឺជាការងារស្មុគស្មាញ និងទាមទារឱ្យមានស្ដង់ដាប្រកបដោយភាពស៊ីចង្វាក់គ្នា រវាងស្ថាប័នដែលពាក់ព័ន្ធ។
វេលាម៉ោង 22 និង 23 នាទី ថ្ងៃទី 18 មីនា 2023 នៅមូលដ្ឋានគ្រប់គ្រងដំណើរការបង្កើនទឹកភ្លៀងសិប្បនិម្មិត ក្នុងស្រុក Fushun ខេត្ត Sichuan ប្រទេសចិន រ៉ុក្កែតហៅភ្លៀងសិប្បនិម្មិតចំនួនពីរគ្រាប់ត្រូវបានបាញ់ឡើងទៅកាន់អាកាស និងបានផ្ទុះ បង្កើតជាសំឡេងយ៉ាងកក្រើកមេឃ ហើយការបាញ់លើកទីមួយនេះក៏បានសម្រេចជាស្ថាពរ។
បួននាទីក្រោយការបាញ់រ៉ុក្កែត ទឹកភ្លៀងក៏ចាប់ផ្ដើមធ្លាក់នៅតំបន់ Fushun។ មកដល់ម៉ោង 23 និង 48 នាទី រ៉ុក្កែតហៅភ្លៀងពីរគ្រាប់ទៀតក៏ត្រូវបានបាញ់ឡើងទៅកាន់អាកាស ធ្វើឱ្យទឹកភ្លៀងបង្អោរចុះមកជាបន្តបន្ទាប់។
យោងតាមប្រព័ន្ធផ្សព្វផ្កាយនៅខេត្ត Sichuan សកម្មភាពបាញ់បង្ហោះរ៉ុក្កែតហៅភ្លៀង គឺជាការងារស្មុគស្មាញ និងទាមទារឱ្យមានស្ដង់ដាប្រកបដោយភាពស៊ីចង្វាក់គ្នា រវាងស្ថាប័នដែលពាក់ព័ន្ធ។
បច្ចេកទេស «ហៅភ្លៀង»
មន្ត្រីជំនាញនៅមជ្ឈមណ្ឌលសេវាកម្មកាត់បន្ថយគ្រោះធម្មជាតិនៃស្រុក Fushun និយាយថា ដើម្បីសម្រេចបានកិច្ចការបង្កើនទឹកភ្លៀងសិប្បនិម្មិត គេត្រូវបំពេញលក្ខខណ្ឌជាច្រើន មានដូចជា ការវិភាគនិន្នាការអាកាសធាតុ ការប្រឹក្សាយោបល់រួម ការត្រៀម ការកែតម្រូវឧបករណ៍ដំណើរការ ការតាមដានដោយផ្ទាល់ និងការស្នើសូមប្រើប្រាស់ដែនអាកាសជាដើម។
សកម្មភាពបង្កើនទឹកភ្លៀងសិប្បនិម្មិតមិនមែនមានន័យថា ចង់ហៅភ្លៀងពេលណាក៏បាន។ ដើម្បីអាចធ្វើឱ្យទឹកភ្លៀងធ្លាក់ គេត្រូវបំពេញលក្ខខណ្ឌសំខាន់ៗចំនួនបី៖ កម្រាស់របស់ពពកដែលផ្ទុកទឹកភ្លៀងត្រូវតែធំជាង 2 គីឡូម៉ែត្រ, ពពកនោះត្រូវតែមានចំហាយទឹកគ្រប់គ្រាន់ និងត្រូវតែមានតំបន់ភាយចំហាយទឹក។
តំបន់ដែលត្រូវការទឹកភ្លៀងត្រូវតែជាទីដែលអនុញ្ញាតឱ្យរ៉ុក្កែតហោះឡើងដល់កម្ពស់ពី 4 ពាន់ ទៅ 8 ពាន់ម៉ែត្រ ដែលនេះក៏ត្រូវការកិច្ចសហការឱ្យបានម៉ត់ចត់ជាមួយនឹងស្ថាប័នគ្រប់គ្រងដែនអាកាស ដើម្បីធានាសុវត្ថិភាព។
ពេលវេលាដែលអាចឱ្យគេដំណើរការបាញ់រ៉ុក្កែតហៅភ្លៀង គឺជារឿងស្មុគស្មាញមួយផ្សេងទៀត។ ព្រោះថា គេត្រូវការជ្រើសរើសពេលវេលា និងការរង់ចាំ មុននឹងអាចបាញ់រ៉ុក្កែតហៅភ្លៀង បន្ទាប់ពីបានត្រៀមផែនការរួចរាល់។
បច្ចេកទេសហៅទឹកភ្លៀងសិប្បនិម្មិត កាត់បន្ថយការខាតបង់ប្រាក់បានជិត 2 ពាន់ដុល្លារអាម៉េរិក
ជាក់ស្ដែង សកម្មភាពកែសម្រួលអាកាសធាតុបែបសិប្បនិម្មិត មិនត្រឹមតែដើម្បីបង្កើនទឹកភ្លៀងនោះទេ តែនៅអាចទប់ស្កាត់បាតុភូតភ្លៀងទឹកកក ចុះអ័ព្ទ និងបាតុភូតត្រជាក់ដល់កកផងដែរ។
ក្រោយការអភិវឌ្ឍជាង 60 ឆ្នាំ បច្ចេកទេសកែប្រែអាកាសធាតុ និងបង្កើនទឹកភ្លៀងរបស់ប្រទេសចិន បានរីកចម្រើនយ៉ាងខ្លាំង បង្កើតជាប្រព័ន្ធមួយដែលមានបួនថ្នាក់ រួមមាន ថ្នាក់ស្រុក ថ្នាក់ក្រុង ថ្នាក់ខេត្ត និងថ្នាក់ជាតិ។
កាលពីឆ្នាំ 2022 ស្ទើរតែទាំងអស់នៃតំបន់ភាគខាងត្បូងប្រទេសចិន បានឆ្លងកាត់រលកកម្ដៅ និងគ្រោះរាំងស្ងួតជាច្រើនលើក ចាប់ពីខែមិថុនា ដល់ពាក់កណ្ដាលខែវិច្ឆិកា នាំឱ្យអាជ្ញាធរតំបន់ជាច្រើនត្រូវប្រើប្រាស់បច្ចេកទេសហៅទឹកភ្លៀង។ ក្នុងអំឡុងពេលនោះ ពួកគេបានធ្វើការហៅទឹកភ្លៀងសរុបជាង 15,000 លើក ក្នុងនោះ ការប្រើប្រាស់យន្តហោះមានចំនួន 241 លើក និងការបាញ់រ៉ុក្កែតចំនួន 15,000 លើក ហើយទាញយកទឹកភ្លៀងបានប្រហែល 8.56 ពាន់លានតោន។
យោងតាមស្ថាប័នឧតុនិយមចិន ពេញមួយឆ្នាំ 2022 ប្រទេសចិនបង្កើតទឹកភ្លៀងបានប្រហែល 39.8 ពាន់លានតោន ជួយការពារផ្ទៃដីបានប្រហែល 650,000 គីឡូម៉ែត្រការ៉េ និងកាត់បន្ថយការខាតបង់ផ្នែកសេដ្ឋកិច្ចបានប្រហែល 14.1 ពាន់លានយុន (ប្រហែល 1,972,900,000 ដុល្លារអាម៉េរិក)៕
July 26, 2023
Mbappe មិនសូវអើពើដល់សំណើផ្ដល់បៀវត្សរ៍ជិត 800 លានដុល្លារពីក្លឹបនៅអារ៉ាប់
ខ្សែប្រយុទ្ធជនជាតិបារាំង Mbappe ទំនងជានឹងបដិសេធសំណើបង្កើតកិច្ចព្រមព្រៀងមួយឆ្នាំ និងប្រាក់បៀវត្សរ៍ 775 លានដុល្លារអាម៉េរិក ពីក្លឹប Al Hilal របស់ប្រទេសអារ៉ាប៊ីសាអូឌីត។
យោងតាមទំព័រ Relevo នៅប្រទេសអេស្ប៉ាញ Mbappe មិនមានចេតនាទាត់ឱ្យក្លឹប Al Hilal។ ខ្សែប្រយុទ្ធវ័យ 24 ឆ្នាំរូបនេះ ប្ដេជ្ញាចិត្តទាត់ឱ្យ PSG ក្នុងឆ្នាំចុងក្រោយនៃកិច្ចព្រមព្រៀង មុននឹងទៅចូលរួមជាមួយនឹងក្លឹប Real Madrid ទៅតាមទម្រង់សេរី។
មុននោះ កាលពីថ្ងៃទី 24 កក្កដា ក្លឹប Al Hilal បានស្នើទិញ Mbappe ក្នុងតម្លៃ 330 លានដុល្លារអាម៉េរិក។ Al Hilal ក៏បានត្រៀមខ្លួនរួចហើយសម្រាប់ការផ្ដល់ប្រាក់បៀវត្សរ៍ 775 លានដុល្លារអាម៉េរិក និងសិទ្ធិទៅចូលរួមជាមួយក្លឹប Real Madrid នៅឆ្នាំ 2024 ដល់ Mbappe។
បន្ទាប់ពីព័ត៌មានស្ដីពីសំណើរបស់ Al Hilal កំពូលតារាបាល់បោះនៅពានរង្វាន់ NBA លោក Giannis Antetokounmpo បានសរសេរលើ Twitter ថា «Al Hilal អ្នកអាចទិញខ្ញុំបាន។ ខ្ញុំមានមុខមាត់ដូច Mbappe។
ក្លឹប Al Hilal ឆ្លើយតបវិញថា «ស្វាគមន៍មកកាន់យើងខ្ញុំក្នុងនាមជាអ្នកគាំទ្រ, Giannis»។ ក្រោយមក Mbappe ក៏បានចូលបញ្ចេញមតិក្រោមសាររបស់ Giannis ដោយការដាក់រូបសើចចេញទឹកភ្នែក។
កិច្ចព្រមព្រៀងរវាង Mbappe និងក្លឹប PSG នៅមានសុពលភាពមួយឆ្នាំទៀត។ ការដែល Mbappe បដិសេធការពន្យារសុពលភាពដល់ឆ្នាំ 2025 ដែលផ្ទុយពីគម្រោងដំបូងរបស់ភាគីទាំងពីរ បានក្លាយជារឿង «ទុំជោរ» និងអាចបង្កការខាតបង់ប្រាក់ច្រើនដល់ PSG។ បើសិនមិនលក់នៅក្នុងរដូវក្ដៅនេះ PSG នឹងបាត់បង់កីឡាករជនជាតិបារាំងរូបនេះដោយទទេៗ ចាប់ពីខែកក្កដាឆ្នាំ 2024។
Kylian Mbappe
បន្ទាប់ពីមិនទទួលបានចម្លើយបកស្រាយពី Mbappe កាលពីថ្ងៃទី 22 កក្កដា PSG ក៏សម្រេចចិត្តប្រកាសលក់។ PSG ក៏ដាក់សម្ពោធលើ Mbappe ដោយការមិនបញ្ចូលឈ្មោះកីឡាករនេះទៅក្នុងក្រុមដែលត្រូវទៅទាន់នៅប្រទេសជប៉ុន។ ពេលនោះ Mbappe ត្រូវបានគេជឿថា ទំនងជាបានយល់ព្រមធ្វើជាកីឡាករបម្រុងពេញមួយរដូវកាល 2023-2024។
បច្ចុប្បន្ន Mbappe កំពុងកាន់កាប់កំណត់ត្រាទាត់ចូលទីបាន 212 គ្រាប់នៅក្នុង 260 ប្រកួតសម្រាប់ PSG។ សម្រាប់ក្រុមជម្រើសជាតិបារាំង Mbappe រកបាន 40 គ្រាប់ ជាប់ចំណាត់ថ្នាក់លេខ 5 នៅក្នុងបញ្ជីឈ្មោះកីឡាករដែលរកបានគ្រាប់បាល់ ដែលនេះគឺនៅទាបជាង 14 គ្រាប់បើធៀបនឹង Olivier Giroud ដែលជាកីឡាករនាំមុខគេក្នុងបញ្ជីចំណាត់ថ្នាក់៕
July 25, 2023
គ្រាន់តែកិនឆ្មាងាប់សោះ ក្រុមហ៊ុនបារាំងរងការពិន័យជាប្រាក់ 3,000 ដុល្លារអាម៉េរិក
ក្រុមហ៊ុនគ្រប់គ្រងផ្លូវដែកជាតិបារាំង ត្រូវបានពិន័យជាប្រាក់ជាង 1,000 ដុល្លារអាម៉េរិក ពីបទខ្វះការទទួលខុសត្រូវ ដោយសារតែបានកិនឆ្មាសំណព្វរបស់អ្នកដំណើរម្នាក់ រហូតដល់ងាប់។
តុលាការបារាំង កាលពីថ្ងៃទី 04 កក្កដា បានសម្រេចថា ក្រុមហ៊ុនផ្លូវដែកជាតិ (SNCF) បានធ្វើឱ្យមានកំហុសទាក់ទិននឹងបញ្ហាខ្វះការទទួលខុសត្រូវ បន្ទាប់ពីមានករណីរថភ្លើងមួយខ្សែបានកិនឆ្មាសំណព្វរបស់អ្នកដំណើររហូតដល់ងាប់ កាលពីខែមករា។
ការចោទប្រកាន់ខាងលើនេះអាចដាក់ពិន័យជាប្រាក់ឡើងដល់ 75,000 អឺរ៉ូប (ជាង 80,000 ដុល្លារអាម៉េរិក) និងដាក់ពន្ធនាគារ 5 ឆ្នាំ។ ក៏ប៉ុន្តែ តុលាការបានសម្រេចពិន័យជាប្រាក់ត្រឹមតែ 1,000 អឺរ៉ូ (ជាង 1,000 ដុល្លារអាម៉េរិក) ចំពោះ SNCF។
SNCF ក៏ត្រូវបានបញ្ជាឱ្យបង់ប្រាក់ជំងឺចិត្តបន្ថែមចំនួន 2,000 អឺរ៉ូ (ជិត 2,200 ដុល្លារអាម៉េរិក) ដល់ម្ចាស់ពីរនាក់របស់សត្វមួយក្បាលឈ្មោះ Neko ដែលត្រូវរថភ្លើងកិននោះផងដែរ។
រឿងរ៉ាវខាងលើបានកើតឡើងកាលពីខែមករា 2023។ កាលណោះ Georgia និងកូនស្រី Melaina អាយុ 15 ឆ្នាំ បានឃើញ Neko លោតចុះពីថង់ និងរត់ទៅកាន់ផ្លូវដែកនៅមុនពេលរថភ្លើងចេញដំណើរ។ Georgia បានចោទថា បុគ្គលិករបស់ក្រុមហ៊ុនរថភ្លើងមានចិត្តឃោរឃៅ ព្រោះបានបដិសេធការស្នើសុំពន្យារការចេញដំណើរពី Paris ទៅកាន់ Bordeaux ដើម្បីជួយស្វែងរកឆ្មា។
នៅពេលរថភ្លើងចេញដំណើរ ម្ចាស់ឆ្មាក៏បានឃើញ Neko ត្រូវរថភ្លើងកិន។ ពេលនោះ SNCF ស្នើសុំបង់ថ្លៃខូចខាតដោយសំបុត្ររថភ្លើងមួយទៅកាន់ Bordeaux។
ករណីខាងលើក៏បានធ្វើឱ្យមានបាតុកម្ម រួមនឹងញត្តិតវ៉ាដែលមានស្នាមមេដៃរបស់មនុស្ស 100,000 នាក់។ រដ្ឋមន្ត្រីក្រសួងមហាផ្ទៃបារាំង Gerald Darmanin និយាយថា លោកភ្ញាក់ផ្អើលខ្លាំងណាស់នៅចំពោះហេតុការណ៍នេះ។ អង្គការការពារសិទ្ធិសត្វមួយក៏បានដាក់ញត្តិតវ៉ាចំពោះ SNCF ព្រោះតែ «អំពើហិង្សាធ្ងន់ធ្ងរ និងឃោរឃៅដែលនាំឱ្យសត្វស្លាប់»។
ចៅក្រមតុលាការបារាំង កាលពីថ្ងៃទី 04 កក្កដា 2023 យល់ថា បុគ្គលិកនៅលើរថភ្លើង «មិនបានប្រឹងប្រែងក្នុងការសង្គ្រោះសត្វឆ្មា»។ សាលក្រមរបស់តុលាការនេះក៏ដើរផ្ទុយពីអនុសាសន៍របស់ក្រុមរដ្ឋអាជ្ញា ជាក្រុមដែលអំពាវនាវឱ្យទម្លាក់ចោលរាល់ការចោទប្រកាន់ទៅលើ SNCF ដោយយល់ថា បុគ្គលិករបស់ស្ថាប័ននេះមិនបានបញ្ចេញភាពគ្មានមនុស្សធម៌។
នៅលើបណ្ដាញសង្គម មនុស្សមួយចំនួនបានរិះគន់សាលក្រមតុលាការខាងលើ។ អ្នកខ្លះថា លើកក្រោយបើមានករណីនេះកើតឡើង ពួកគេគិតថា ម្ចាស់សត្វត្រូវតែបង់ថ្លៃខាតបង់ពេលវេលាដល់អ្នកដំណើរដទៃ នៅពេលរថភ្លើងត្រូវបានពន្យារពេលចេញដំណើរ៕
July 6, 2023
មហាសេដ្ឋី Elon Musk ព្រមហាត់គុនជាមួយគ្រូល្បីៗ មុនការប្រកួតជាមួយ Zuckerberg
លោក Musk បានយល់ព្រមហាត់ក្បាច់គុនជាមួយនឹង Gerges St-Pierre ដែលជាកំពូលអ្នកគុននិយមម្នាក់របស់ពិភពលោក ដើម្បីត្រៀមខ្លួនឡើងសង្វៀនប្រកួតប្រដាល់ជាមួយនឹងមហាសេដ្ឋី Zuckergerg។
«លោក Musk ខ្ញុំគឺជាអ្នកគាំទ្ររបស់លោក។ នឹងជាកិត្តិយសបំផុតបើសិនខ្ញុំអាចជួយក្នុងការប្រកួតជាមួយ Zuckerberg។ សូមទុកឱ្យខ្ញុំធ្វើជាគ្រូបង្វឹករបស់លោក» Georges St-Pierre (GSP) បង្ហោះសារលើ Twitter កាលពីថ្ងៃទី 25 មិថុនាដូច្នេះ។
កាលពីថ្ងៃទី 27 មិថុនា 2023 មហាសេដ្ឋីអាម៉េរិកដើមកំណើតអាហ្វ្រិកខាងត្បូង លោក Elon Musk បានឆ្លើយតបលើ Twitter ថា «បាន តោះយើងចាប់ផ្ដើម»។ សាររបស់លោក Musk ទាក់ទាញអ្នកអានបានជាងកន្លះលាននាក់ និងការចុចចូលចិត្តជាង 14.4 k ក្រោយការបង្ហោះមិនដល់មួយថ្ងៃ។ អ្នកចូលមើលស្ទើរតែទាំងអស់គាំទ្រដល់ការសម្រេចចិត្តរបស់លោក Musk ដោយពួកគេសរសេរប្រហាក់់ប្រហែលគ្នាថា ទន្ទឹងរង់ចាំការប្រកួតនេះ។
ឆ្លើយតបនឹងការពេញចិត្តរបស់អ្នកលេងបណ្ដាញសង្គម លោក Musk ក៏បានឱ្យដឹងថា លោកក៏ទើបតែ «លេងមួយទឹក» ជាមួយនឹង Lex Fridman អ្នកស្រាវជ្រាវផ្នែកបញ្ញាសិប្បនិម្មិត (AI) និងជាម្ចាស់ឆានែល podcast ដ៏ល្បីឈ្មោះ ដែលជំនាញខាងសម្ពាសក្រុមមេដឹកនាំបច្ចេកវិទ្យា។
Gerges St-Pierre គឺជាអ្នកគុននិយមជនជាតិកាណាដាដើមកំណើតបារាំង។ បុរសនេះធ្លាប់ដណ្ដើមបានតំណែងជើងឯកពានរង្វាន់ MMA ពីរទម្ងន់ផ្សេងគ្នា។
កាលពីថ្ងៃទី 21 មិថុនា ចាប់ផ្ដើមពីរឿងរ៉ាវសរសេរលេងនៅលើ Twitter មហាសេដ្ឋី Elon Musk បានបបួលមហាសេដ្ឋី Mark Zuckerberg ណាត់ទីតាំងវាយគ្នានៅលើសង្វៀនក្នុងទ្រុងដែកនៅ Las Vegas ហើយម្ចាស់ Facebook ក៏យល់ព្រម។
សំណួរដែលសួរថា «អ្នកជ្រើសរើស Team Musk ឬ Team Zuck?» បានក្លាយជាពាក្យពេញនិយមនៅលើបណ្ដាញសង្គម Twitter និង Reddit។
មហាសេដ្ឋី Elon Musk (ស្ដាំ) និងមហាសេដ្ឋី Mark Zuckerberg
បើនិយាយអំពីន័យចំ Zuckerberg អាយុ 39 ឆ្នាំ ប្រាកដជាមានប្រៀបជាង ដោយសារតែនៅក្មេង ជាអ្នកគុននិយម MMA និងធ្លាប់ឈ្នះក្នុងការប្រកួតគុនជឺជិតស៊ូប្រេងស៊ីល។ ចំណែកលោក Musk អាយុ 51 ឆ្នាំ មានប្រៀបជាងខាងកម្ពស់ និងទម្ងន់ ហើយធ្លាប់និយាយថា បានចូលរួមវាយគ្នានៅតាមដងផ្លូវពេលធំឡើងនៅអាហ្វ្រិកខាងត្បូង។
ចំណែកឪពុកម្ដាយរបស់លោក Musk សុទ្ធតែមានការបារម្ភចំពោះកូនប្រុស និងណែនាំថា មិនគួរប្រកួតឡើយ។ លោក Errol Musk ដែលជាឪពុករបស់លោក Elon Musk និយាយថា ទោះជាឈ្នះ ឬចាញ់ កូនរបស់គាត់នៅតែត្រូវទទួលការខាតបង់។
លោក Dana White ប្រធាន UFC
រីឯអ្នកគាំទ្រវិញ កំពុងតែទន្ទឹងរង់ចាំ និងនាំគ្នាភ្នាល់ ចែកជាក្រុម «Team Musk» និង «Team Zuck»។ Dana White ប្រធាន UFC (Ultimate Fighting Championship) ព្យាករថា គូប្រកួត Musk – Zuckerberg អាចក្លាយជាការប្រកួតក្បាច់គុនមួយទល់នឹងមួយធំបំផុតក្នុងប្រវត្តិសាស្ត្រ និងបំបែករាល់កំណត់ត្រាស្ដីពីការលក់សំបុត្រចូលទស្សនា។ លោកនិយាយថា គ្រប់គ្នានឹងត្រូវចំណាយប្រហែល 100 ដុល្លារ សម្រាប់ការទស្សនាមួយលើកនៅតាមទូរទស្សន៍៕
June 28, 2023
ដំណឹង Lionel Messi ចាកចេញ ធ្វើឱ្យ PSG បាត់បង់អ្នកគាំទ្រជាងមួយលាននាក់
ម្ចាស់ជើងឯក Ligue 1 ក្លឹប Paris Saint-German បានបាត់បង់អ្នកតាមដានជាងមួយលាននាក់នៅលើបណ្ដាញសង្គម Instagram រាប់ចាប់តាំងពីបានប្រកាសថា Lionel Messi ចាកចេញពីក្លឹបនេះ។
ថ្មីៗនេះ ក្លឹប PSG បានប្រកាសជាផ្លូវការថា កិច្ចព្រមព្រៀងរវាងក្លឹបនេះ និង Lionel Messi មិនអាចពន្យារសុពលភាព ហើយភាគីទាំងពីរផ្ដាច់ទំនាក់ទំនងនឹងគ្នាបន្ទាប់ពីរដូវកាលនេះបានបញ្ចប់។ មិនយូរប៉ុន្មានក្រោយពីព័ត៌មាននេះត្រូវបានបញ្ជាក់ ចំនួនអ្នកតាមដាននៅលើទំព័របណ្ដាញសង្គមរបស់ PSG ក៏បានថយចុះអស់ជាងមួយលាននាក់។
ឆ្នាំ 2021 រឿង Lionel Messi ចុះកិច្ចព្រមព្រៀងពីរឆ្នាំជាមួយ PSG គឺជាព្រឹត្តិការណ៍លេចធ្លោជាងគេមួយក្នុងវិស័យបាល់ទាត់ពិភពលោក ហើយវានឹងត្រូវអស់សុពលភាពត្រឹមចុងខែមិថុនា 2023 ខណៈដែល Messi និង PSG មិនបន្តចុះហត្ថលេខាលើកិច្ចព្រមព្រៀងថ្មី។
ចំនួនអ្នកតាមដាននៅមុនការប្រកាស
Lionel Messi បានឆ្លងកាត់ពីររដូវកាលជាមួយនឹង PSG ក្នុងនោះ ពួកគេដណ្ដើមបានពានរង្វាន់ជើងឯក Ligue 1 ទាំងពីររដូវកាល ក៏ដូចជាដណ្ដើមបានតំណែងជើងឯក Champions Trophy របស់បារាំងឆ្នាំ 2022។ Messi ចូលរួមទាត់ឱ្យ PSG បាន 74 ប្រកួត រកបាន 32 គ្រាប់ និងបង្កឱកាសបាន 35 គ្រាប់។
ចំនួនអ្នកតាមដាននៅក្រោយការប្រកាស
ថ្មីៗនេះ PSG បានប្រកាសពីការចាកចេញរបស់ Messi ដោយការបង្ហោះវីដេអូខ្លីនៅលើទំព័របណ្ដាញសង្គម។ ក៏ប៉ុន្តែ ដំណឹងនេះធ្វើឱ្យអ្នកគាំទ្រមិនសប្បាយចិត្ត ព្រោះពួកគេយល់ថា Messi គួរតែទទួលបានការប្រព្រឹត្តល្អក្នុងវេលាចុងក្រោយនៅ PSG។ និន្នាការបោះបង់ការតាមដាន (Unfollow) ចំពោះទំព័រ PSG លើ Instagram កំពុងតែរីករាយដាលខ្លាំង ថ្វីបើមិនទាន់ដឹងថា អ្នកបោះបង់ការតាមដាននេះមានប៉ុន្មាននាក់ជាអ្នកគាំទ្ររបស់ PSG និងប៉ុន្មាននាក់ជាអ្នកគាំទ្ររបស់ Messi។
Lionel Messi
PSG ក៏ត្រូវបានវាយតម្លៃថា នឹងខាតបង់មិនតិចឡើយនៅពេល Messi ចាកចេញ ក្នុងនោះមានទាំងប្រាក់ចំណូលបានពីការលក់អាវ និងម្ចាស់ឧបត្ថម្ភផងដែរ៕
June 5, 2023
ត្រឹមត្រូវឬទេ ពាក្យដាស់តឿន និងរឿងហាមឃាត់របស់ចាស់បុរាណសម្រាប់អ្នកមានផ្ទៃពោះ?
សង្គមខ្មែរយើងមានជំនឿជាច្រើនជាមួយរឿងផ្សេងៗ រហូតដល់ជួនកាលយើងមិនបានស្វែងរកមូលហេតុថា តើជំនឿនោះមកពីណា? មានប្រភពយ៉ាងណា? និងមានហេតុផលអ្វី? មកធានាអះអាងលើជំនឿនោះឡើយ…តែយើងបាននាំយកមកប្រតិបត្តិតាម ក្លាយជាផ្នែកមួយក្នុងជីវិតរស់នៅ។ ជំនឿខ្លះមិនបានសាងនូវភាពខាតបង់ធ្ងន់ធ្ងរអ្វីទេ តែជំនឿខ្លះ វាជំទាស់នឹងការពិតដែលអាចពិសោធបាន រហូតអាចធ្វើឱ្យយើងខកខាននូវរឿងល្អៗ ឬក្លាយជាផលអាក្រក់សម្រាប់យើងក៏មាន ជាពិសេសជំនឿ និងចំណុចហាមឃាត់ពីបុរាណសម្រាប់ស្រ្តីមានផ្ទៃពោះ។ ថ្ងៃនេះ ឡារ៉ែនសូមនាំស្រ្តីមានផ្ទៃពោះទាំងឡាយមកស្វែករកការពិតពាក់ព័ន្ធនឹងជំនឿទាំងនោះថា តើហេតុអីបានគួរជឿ? ព្រោះថា ជំនឿដែលត្រឹមត្រូវគួរតែស្ថិតនៅលើមូលដ្ឋានចំណេះដឹងដែលត្រឹមត្រូវដូចគ្នា។
1 . ស្រ្តីមានផ្ទៃពោះ ហាមងូតទឹកពេលយប់ជ្រៅ ព្រោះនឹងធ្វើឱ្យមានទឹកភ្លោះច្រើន
ការពិត ៈ កាលពីសម័យបុរាណ បន្ទប់ទឹកត្រូវបានសង់នៅឆ្ងាយពីផ្ទះ ដូច្នេះទើបធ្វើឱ្យមនុស្សចាស់ខ្លាចអ្នកមានផ្ទៃពោះមានគ្រោះថ្នាក់រអិលដួល ឬរងគ្រោះថ្នាក់ពីសត្វចង្រៃដែលមានពិស ក៏ហាមស្រ្តីមានគភ៌មិនចេញពីផ្ទះនៅពេលយប់។
2 . អ្នកមានផ្ទៃពោះ ហាមដេរខោអាវ ៈ ការដេរប៉ះខោអាវក្នុងអំឡុងពេលតាំងគភ៌ នឹងធ្វើឱ្យកូនក្នុងផ្ទៃកើតមក ឆែបមាត់។
ការពិត ៈ ទារកកើតមក ឆែបមាត់ មួយចំនួនបណ្ដាលមកពីពូជអម្បូរ ឬការអភិវឌ្ឍខ្លួនរបស់តួកំណើតក្នុងអំឡុង 3ខែដំបូងមានភាពខុសប្រក្រតី រួមទាំងការដែលម្ដាយជក់បារីដែលហុចផលប៉ះពាល់ធ្វើឱ្យកូនក្នុងផ្ទៃឆែបមាត់។ សម្រាប់មូលហេតុពិតប្រាកដរបស់ការហាមឃាត់នេះ គឺជាការដាស់តឿនដែលចាស់បុរាណបារម្ភថា ស្រ្តីមានគភ៌អាចនឹងត្រូវប្រយ័ត្នប្រយែងក្នុងការធ្វើការបែបនេះ ព្រោះត្រូវអង្គុយធ្វើការយូរ ឱនងើបៗ ធ្វើឱ្យងាយកើតអាការវិលមុខ ឬការអង្គុយដេរ ក៏អាចនឹងមិនមែនជារឿងល្អសម្រាប់ស្រ្តីមានគភ៌ដែលមានសុខភាពមិនសូវល្អក៏អាចថាបានដែរ តែបើស្រ្តីមានគភ៌ចេះធ្វើការងារដោយក្ដីប្រយ័ត្នប្រយែង ចេះមើលថែទាំខ្លួនបានល្អ ក៏ប្រហែលជាគ្មានបញ្ហាអ្វីដែរ។
3 . អ្នកមានផ្ទៃពោះ ហាមទៅបុណ្យសព ៈ មានការដាស់តឿនសម្រាប់ស្រ្តីមានផ្ទៃពោះថា ហាមទៅចូលរួមពិធីបុណ្យសព ព្រោះបុរាណគេប្រកាន់ តែអ្នកខ្លះក៏អាចនឹងជឿដោយមិនបានស្វែងរកការពិតនៃពាក្យថា “ប្រកាន់” នេះ ចង់សំដៅលើអ្វីដែរ ព្រោះមានអ្នកខ្លះក៏ធ្លាប់បានឮរឿងទំនងដែលថា ខ្លាចខ្មោចចូល ជាដើមដែរ។
ការពិត ៈ បុណ្យសព គឺជាពិធីដែលសោកសង្រេង អ្នកចូលរួមពិធីក៏ច្រើនតែស្រងេះស្រងោចពីការបាត់បង់ញាតិមិត្តបងប្អូន ដូច្នេះបើអ្នកមានផ្ទៃពោះទៅចូលរួម ក៏អាចនឹងមានអារម្មណ៍សោកសៅ យំស្រែក និងតានតឹងអារម្មណ៍ទៅជាមួយដែរ ព្រោះក្នុងអំឡុងពេលតាំងគភ៌នេះ ស្រ្តីមានគភ៌គួរតែមានផ្លូវចិត្តដែលស្រស់ថ្លា រីករាយ ដូច្នេះហើយទើបចាស់ៗមិនចង់ឱ្យអ្នកមានផ្ទៃពោះមានអារម្មណ៍ពិបាកចិត្ត ធុញថប់តានតឹង ឬសោកសង្រេងហ្នឹងឯង។
4 . អ្នកមានផ្ទៃពោះ ហាមអង្គុយឃាំងមាត់ជណ្ដើរ ៈ ស្រ្តីមានគភ៌ហាមអង្គុយឃាំងមាត់ជណ្ដើរ មិនដូច្នោះទេ នឹងពិបាកប្រសូតបុត្រ។ ស្រ្តីមានគភ៌ណាបានឮហើយ តែងតែខ្លាចជាធម្មតា ព្រោះថា ការពិបាកប្រសូត មានន័យពីការឈឺពោះយូរ និងអាចមានគ្រោះថ្នាក់ផ្សេងៗកើតឡើង ជាពិសេសសម័យមុន ខាងវេជ្ជសាស្រ្តនៅមិនទាន់រីកចម្រើន។
ការពិត ៈ ផ្ទះខ្មែរក្នុងសម័យមុន ច្រើនតែជាផ្ទះមួយជាន់មានសសរខ្ពស់ៗ និងមានជណ្ដើរឡើងផ្ទះរាងចោត បើសិនទៅអង្គុយឃាំងមាត់ជណ្ដើរ ក៏អាចនឹងធ្លាក់ចុះទៅក្រោមនាំឱ្យមានគ្រោះថ្នាក់បានដោយងាយ ជាពិសេសស្រ្តីដែលមានគភ៌ធំៗដែលការទប់លំនឹងខ្លួនមិនសូវជាបានល្អផងនោះ រឹតតែមិនគួរទៅអង្គុយនៅទីនោះឡើយ ដែលនេះជាការហាមឃាត់មួយដែលគួរតែធ្វើតាម ឯហេតុផលដែលនិយាយថា អាចនឹងធ្វើឱ្យពិបាកប្រសូត ឬឈឺពោះយូរនោះ មិនមែនជាការពិតទេ។
5 . ហាមត្រៀមរបស់ប្រើប្រាស់របស់ទារកទុកមុន ៈ ជំនឿមួយនេះនៅតែមានអ្នកប្រតិបត្តិតាមនៅឡើយ ព្រោះនៅក្នុងជំនឿនេះបានឱ្យហេតុផលថា វាជាប្រផ្នូលមិនល្អ ដែលទោះជាអ្នកម្ដាយសម័យថ្មីហើយក៏ដោយ ក៏នៅតែមានអារម្មណ៍ថា ជឿៗទៅ វាប្រសើរជាង ព្រោះមិនចង់ឱ្យមានរឿងអ្វីមិនល្អកើតឡើងចំពោះកូនសម្លាញ់…។
ការពិត ៈ បើគិតតាមគោលការណ៍ហេតុ និងផលវិញនោះ ឃើញថាវាគ្មានពាក់ព័ន្ធគ្នាអីរវាងការត្រៀមរបស់ប្រើប្រាស់សម្រាប់ទារក ជាមួយនឹងសុខភាព ឬឧប្បត្តិហេតុអ្វីដែលអាចនឹងកើតឡើងក្នុងអំឡុងពេលប្រសូតនោះឡើយ តែជំនឿនេះប្រហែលជាបណ្ដាលមកពីការប្រសូតបុត្រកាលពីសម័យមុនដែលមានភាពប្រថុយប្រថានខ្លាំង ទើបចាស់ៗមិនចង់ឱ្យត្រៀមរបស់ប្រើប្រាស់សម្រាប់ក្មេងទុកឱ្យហើយប៉ុន្មានឡើយ ឬឪពុកម្ដាយអាចនឹងត្រេកអរនឹងកូនក្នុងផ្ទៃខ្លាំងពេក ធ្វើឱ្យត្រៀមរបស់របរសម្រាប់កូនច្រើនជ្រុលពេក លើសតម្រូវការ ដែលរបស់ខ្លះ ពេលកូនប្រសូតចេញមកហើយ អាចមិនទាំងបានប្រើផងក៏មាន ដូច្នេះហើយដើម្បីភាពសប្បាយចិត្ត ទើបចាស់ៗឱ្យត្រៀមតែរបស់ណាដែលត្រូវប្រើប្រាស់ចាំបាច់ ដែលទារកកើតមកភ្លាមត្រូវប្រើមែនទែន ដូចជា ក្រណាត់កន្ទប ខោអាវទារក ជាដើម ចំណែករបស់ផ្សេងៗទៀត ចាំគិតពេលកូនប្រសូតចេញមកហើយ ក៏អាចទៅរកទិញមកប្រើទាន់ដែរ។
6 . ខ្ទាស់ម្ជុលខ្ទាស់នៅអាវត្រង់កន្លែងក្បាលពោះ ការពារធ្លាក់កូន និងមិនឱ្យវិញ្ញាណកំណាចចូលមកធ្វើបាបកូន
ការពិត ៈ ខ្ទាស់ឱ្យជាប់ដើម្បីឱ្យស្រ្តីមានគភ៌ប្រយ័ត្នខ្លួនឯងពេលដើរទៅណាមកណា កុំឱ្យដើរទៅបុកនេះបុកនោះ និងឱ្យអ្នកដទៃមើលឃើញបានច្បាស់ថា ខ្លួនកំពុងមានផ្ទៃពោះ មិនមែនកំពុងធាត់ទេ កុំដើរមកបុក… ជាដើម។
ជំនឿ និងពិធីការផ្សេងៗពាក់ព័ន្ធនឹងការមានផ្ទៃពោះ និងការឆ្លងទន្លេរបស់មនុស្សសម័យមុន មានច្រើនយ៉ាង ដូច្នេះពេលបានឮមកហើយ ស្វាមី និងភរិយាដែលកំពុងមានគភ៌គួរតែពិចារណាជាមុនសិន មុននឹងប្រតិបត្តិតាម ដើម្បីការពារគ្រោះថ្នាក់ដែលអាចនឹងកើតឡើងចំពោះម្ដាយ និងកូនតូច ព្រោះជំនឿ និងការហាមឃាត់ពីបុរាណសម្រាប់អ្នកមានផ្ទៃពោះ រឿងមួយចំនួនដែលចាស់បុរាណបង្ហាត់បង្រៀនមក ជួនកាលក៏មានប្រយោជន៍ មានហេតុផលត្រឹមត្រូវអាចយកមកច្នៃប្រើបាន តែរឿងខ្លះក៏មិនអាចជឿបាន ឬមិនអាចពិសោធបានថាត្រូវ ឬមិនត្រូវនោះក៏មាន៕
October 22, 2020
ក្រុមហ៊ុនរបស់ Warren Buffett ខាតបង់50ពាន់លានដុល្លារព្រោះតែវីរុសCOVID-19
ការលក់ឡាយឡុងនៅលើទីផ្សារមូលបត្រដោយសារតែCOVID-19 បានធ្វើឱ្យក្រុមហ៊ុន Berkshire Hattaway របស់មហាសេដ្ឋី Warren Buffett ខាតបង់អស់50ពាន់លានដុល្លារនៅក្នុងត្រីមាសទី1 ឆ្នាំ2020នេះ។
ក្រុមហ៊ុន Berkshire Hattaway ល្បីឈ្មោះខ្លាំងនៅក្នុងការវិនិយោគទៅលើ Goldman Sachs នៅក្នុងអំឡុងវិបត្តិហិរញ្ញវត្ថុ។ ប៉ុន្តែ នៅក្នុងត្រីមាសកន្លង ផ្សារហ៊ុន S&P 500 Index (S&P 500) បានធ្លាក់ចុះ 20% ហើយភាគហ៊ុនដែលក្រុមហ៊ុន Berkshire កំពុងកាន់កាប់មួយចំនួនធំ ក៏បានដាំក្បាលចុះលឿនជាងគេ ក្នុងនោះមាន American Express, Bank of America, Wells Fargo និងក្រុមហ៊ុនអាកាសចរណ៍ចំនួន4ផ្សេងទៀត (American, Delta, Southwest និង United)។ បិទការជួញដូរកាលពីថ្ងៃទី1ឧសភា Berkshire បានធ្លាក់ចុះប្រមាណជា19%។
ការខាតបង់ដ៏ធ្ងន់ធ្ងររបស់ក្រុមហ៊ុន Berkshire គឺដោយសារមូលបត្រដែលនៅជួរមុខក្នុងតារាងវិនិយោគ ទទួលរងផលប៉ះពាល់ពីវិបត្តិសុខភាព(COVID-19)។ បណ្ដាក្រុមហ៊ុនដែលមានភាគហ៊ុនរបស់ Berkshire សុទ្ធតែរងផលវិបាកពីវីរុសនេះ ដោយមានការធ្លាក់ថ្លៃចាប់ពី 5.2-34%។ ក្នុងនោះ ក្រុមហ៊ុនសាងសង់ផ្លូវដែក BNSF ដែលត្រូវបាន Berkshire បានទិញកាលពីឆ្នាំ2010 និងបណ្ដាក្រុមហ៊ុនលក់រាយ សុទ្ធតែត្រូវផ្អាកសកម្មភាព។
នេះគឺជាលើកទីពីរហើយដែលក្រុមហ៊ុនរបស់មហាសេដ្ឋី Warren Buffett បានប្រកាសខាតបង់ បើគិតចាប់ពីត្រីមាសទី4 ឆ្នាំ2018។ ប៉ុន្តែ ក្រុមហ៊ុនរបស់មហាសេដ្ឋីនេះក៏នៅមានចំណេញពីវិស័យធានារ៉ាប់រងផងដែរ ដោយរកបានប្រាក់ចំណេញ5.9ពាន់លានដុល្លារ ដោយសារតម្លៃមូលបត្រវិស័យនេះកើន6%។
Warren Buffett គិតមកដល់បច្ចុប្បន្ន មានទ្រព្យសរុប 72ពាន់លានដុល្លារអាមេរិក។ បុរសវ័យ89ឆ្នាំរូបនេះ គឺជាមហាសេដ្ឋីលំដាប់ទី4 នៅក្នុងពិភពលោក៕
ប្រភព៖ Bloomberg
May 3, 2020