អគ្គលេខាធិការនៃអង្គការសហប្រជាជាតិ លោក Antonio Guterres យល់ថា យុគសម័យឡើងកម្ដៅទូទាំងសកលលោកបានបញ្ចប់ ហើយពិភពលោកចាប់ផ្ដើមចូលដល់ «យុគសម័យដុតកម្លោច»។
«អាកាសធាតុប្រែប្រួលកំពុងកើតមានឡើងយ៉ាងអាក្រក់ ប៉ុន្តែនោះគ្រាន់តែជាការចាប់ផ្ដើមប៉ុណ្ណោះ» លោក Guterres ប្រកាសកាលពីថ្ងៃទី 27 កក្កដាដូច្នេះ និងបន្តថា «នៅតែអាចគ្រប់គ្រងកំណើនសីតុណ្ហភាពទូទាំងសកលលោកក្នុងកម្រិត 1.5 អង្សាសេ និងចៀសផុតពីសេណារីយោស្ដីពីការប្រែប្រួលអាកាសធាតុអាក្រក់បំផុត។ ប៉ុន្តែ យើងត្រូវតែធ្វើសកម្មភាពឱ្យបានខ្លាំងក្លាជាបន្ទាន់»។
ការព្រមាននេះត្រូវបានធ្វើឡើងបន្ទាប់ពីក្រុមអ្នកវិទ្យាសាស្ត្របញ្ជាក់ថា បីសប្ដាហ៍កន្លងទៅនេះគឺជាពេលដែលផែនដីមានកម្ដៅខ្ពស់បំផុតមិនធ្លាប់មានពីមុន។ ខែកក្កដាឆ្នាំនេះ កំពុងស្ថិតក្នុងជំហានក្លាយទៅជាខែដែលមានអាកាសធាតុក្ដៅជាងគេបង្អស់ក្នុងប្រវត្តិសាស្ត្ររបស់មនុស្សជាតិ។
លោក Guterres ក៏បានអំពាវនាវសូមឱ្យអ្នកនយោបាយ ធ្វើសកម្មភាពជាបន្ទាន់។ «ខ្យល់អាកាសមិនអាចដកដង្ហើមបាន កម្ដៅមិនអាចទ្រាំបាន ផលចំណេញពីឥន្ធនៈហ្វូស៊ីល និងការអង្គុយនៅស្ងៀម មិនធ្វើសកម្មភាព គឺជារឿងដែលមិនអាចទទួលយកបាន។ មេដឹកនាំត្រូវតែជាអ្នកដើរនាំមុខគេ។ មិនអាចពន្យារពេល មិនអាចប្រើលេស មិនអាចរង់ចាំអ្នកផ្សេងធ្វើមុន ព្រោះថា មិនមានពេលទៀតនោះទេ»។
អគ្គលេខាធិការនៃអង្គការសហប្រជាជាតិអះអាងថា ការប្រើប្រាស់ថាមពលកកើតឡើងវិញប្រកបដោយភាពខ្លាំងក្លា និងការកែសម្រួលក្នុងវិស័យមួយចំនួន មានវិស័យដឹកជញ្ជូនជាដើម បង្ហាញថា មានភាពជឿនលឿន ប៉ុន្តែសុទ្ធតែមិនទាន់បានឆ្ងាយ និងលឿនគ្រប់គ្រាន់នៅឡើយ ហើយនៅតែត្រូវការបន្ថែមល្បឿនបន្តទៀត៕
