អារម្មណ៍ - La Reine Media

រកឃើញដាននៃម៉ូលេគុលសរីរាង្គនៅលើអាចម៍ផ្កាយ Bennu?

ក្រុមអ្នកវិទ្យាសាស្ត្របានរកឃើញសញ្ញានៃម៉ូលេគុលសរីរាង្គនៅក្នុងសំណាកដីដែលបានយកពីអាចម៍ផ្កាយ Bennu ជាអាចម៍ផ្កាយដែលអាចបង្កគ្រោះថ្នាក់ដល់ផែនដី។

ក្នុងនាមជាអ្នកបំពេញបេសកកម្មស្វែងរកតម្រុយនៃប្រភពរបស់ភាវៈរស់នៅលើផែនដី យានអវកាស OSIRIS-Rex របស់ណាសា បានប្រមូលយកបំបែកនានារបស់អាចម៍ផ្កាយ Bennu កាលពីចុងឆ្នាំ 2020 ហើយបាននាំយកវាមកកាន់ផែនដីកាលពីពីរខែមុន។ ថ្មីៗនេះ ក្រុមអ្នកវិទ្យាសាស្ត្របានរកឃើញប្រការដ៏គួរឱ្យចាប់អារម្មណ៍របស់សំណាកដីទាំងនេះ។

Lauretta សាស្ត្រាចារ្យវិទ្យាសាស្ត្រភព និងគីមីអវកាស នៅសាកលវិទ្យាល័យ Arizona សហរដ្ឋអាម៉េរិក បានឱ្យដឹងថា បំបែកនានារបស់អាចម៍ផ្កាយដែលមានអាយុកាល 3 ពាន់លានឆ្នាំនេះ សម្បូរកាបូន និងសារធាតុសរីរាង្គ។ ទាំងអស់សុទ្ធតែមានសម្បុរងងឹត។

យានអវកាស OSIRIS-Rex ត្រូវបានផលិតឡើងដើម្បីហោះទៅជាន់អាចម៍ផ្កាយ Bennu ក្នុងរយៈពេល 6 វិនាទី ប៉ុន្តែ ចុងក្រោយ វាបានជ្រុលទៅបុកផ្ទៃរបស់អាចម៍ផ្កាយនេះក្នុងជម្រៅ 0.5 ម៉ែត្រ ក្នុងរយៈពេល 17 វិនាទី។ យាននេះជីកបានវត្ថុធាតុជាច្រើន មុននឹងហោះមកកាន់ផែនដី ដើម្បីឱ្យអ្នកជំនាញធ្វើការពិសោធ។

Lauretta ឱ្យដឹងថា ដីដែលបានយកពីអាចម៍ផ្កាយ Bennu ប្រហែលជាមានផ្ទុកធាតុទឹកច្រើនជាងការសន្និដ្ឋានដំបូងរបស់អ្នកវិទ្យាសាស្ត្រ៕

December 18, 2023

ការនាំចេញអង្ករក្នុងឆ្នាំ 2023 របស់វៀតណាម គ្រោងនឹងសម្រេចបានលើសផែនការ

ការនាំចេញអង្កររបស់ប្រទេសជាប់ព្រំដែនភាគខាងកើតរបស់កម្ពុជា កំពុងសម្រេចបានតួលេខខ្ពស់មិនធ្លាប់មាន ក្នុងនោះ គិតមកដល់ត្រឹមដំណាច់ខែវិច្ឆិកា បរិមាណអង្ករនាំចេញរបស់ប្រទេសនេះ បានកើនដល់ជិត 7.8 លានតោន។

ក្នុងឆ្នាំ 2022 វៀតណាម បាននាំចេញអង្ករចំនួនប្រហែល 7 លានតោន។ ប៉ុន្តែ ក្នុងរយៈពេល 11 ខែដំបូងនៃឆ្នាំ 2023 តួលេខអង្ករដែលបាននាំចេញរបស់ វៀតណាម បានឡើងដល់ 7.8 លានតោន ស្មើនឹងចំណូល 4.4 ពាន់លានដុល្លារអាម៉េរិក ខណៈដែលកំណើននៃការនាំចេញនៅតែបន្ត។

យោងតាមសារព័ត៌មានវៀតណាម ខាងលើនេះគឺជាតួលេខខ្ពស់មិនធ្លាប់មាននៅក្នុងវិស័យនាំចេញអង្កររបស់ប្រទេសនេះ គិតចាប់ពីឆ្នាំ 1989។ ប្រទេសនេះសង្ឃឹមថា ដល់ដំណាច់ខែធ្នូ បរិមាណអង្ករនាំចេញអាចនឹងកើនដល់ 8 លានតោន ដែលមានតម្លៃស្មើនឹង 4.6 ពាន់លានដុល្លារអាម៉េរិក។

ទីផ្សារនាំចេញអង្ករធំៗរបស់ប្រទេសវៀតណាម រួមមានដូចជា ហ្វ៊ីលីពីន ចិន និងឥណ្ឌូណេស៊ី ក្នុងនោះ ហ្វ៊ីលីពីន នៅតែជាទីផ្សារនាំចេញអង្ករធំជាងគេបង្អស់។

>គួរឱ្យចាប់អារម្មណ៍៖ កម្ពុជា នាំចេញអង្ករបានជិត 6 សែនតោន ក្នុង 11 ខែដំបូងនៃឆ្នាំ 2023

ក្រុមអ្នកនាំចេញអង្ករនៅវៀតណាម អះអាងថា ជោគជ័យក្នុងវិស័យនាំចេញអង្ករវៀតណាមនៅក្នុងឆ្នាំនេះ កើតឡើងដោយសារតែអង្ករមានគុណភាពខ្ពស់ ព្រោះតែងតែត្រូវបាននាំចេញភ្លាមៗ បន្ទាប់ពីប្រមូលផលរួច៕

December 7, 2023

រកឃើញ «អំណោយពិសេស» ដែលព្រះអាទិត្យប្រទានដល់មនុស្សលោកលើឋានព្រះចន្ទ

«អំណោយពិសេស» ពីព្រះអាទិត្យលើឋានព្រះចន្ទ បើកកកាយនូវអាថ៌កំបាំងស្ដីពីប្រភពនៃវត្ថុធាតុទ្រទ្រង់ជីវិត និងបើកផ្លូវឱ្យមានក្ដីសង្ឃឹមថ្មីនៅក្នុងការស្រាវជ្រាវទីអវកាស។

ក្រុមអ្នកស្រាវជ្រាវមួយមកពីមន្ទីរពិសោធន៍របស់ទ័ពជើងទឹកអាម៉េរិក (NRL) បានបង្ហើបឱ្យដឹងអំពីការរកឃើញដ៏គួរឱ្យចាប់អារម្មណ៍ ទាក់ទងនឹងសំណាកដី 79221 ដែលយកពីឋានព្រះចន្ទ។

ដោយការប្រើប្រាស់បច្ចេកទេសរបស់កែវពង្រីកអតិសុខុមទស្សន៍អេឡិចត្រុង (មីក្រូទស្សន៍អេឡិចត្រុង) ក្រុមអ្នកវិទ្យាសាស្ត្រខាងលើបានរកឃើញអ៊ីដ្រូសែននៅក្នុងបណ្ដាគ្រាប់រ៉ែ apatite និង merrillite ដែលបានប្រែប្រួលដោយសារអាកាសធាតុពីអវកាស ក្រោមឥទ្ធិពលរបស់ខ្យល់ព្រះអាទិត្យ។ នេះអាចបញ្ជាក់បានថា ដីលើឋានព្រះចន្ទ កំពុងលាក់អ៊ីដ្រូសែន។

អ៊ីដ្រូសែនដែលជាវត្ថុធាតុដ៏មានតម្លៃ បើសិនជាត្រូវបានទាញយកពីព្រះចន្ទ វានឹងដើរតួនាទីយ៉ាងសំខាន់នៅក្នុងការស្រាវជ្រាវទីអវកាស និងបកស្រាយបានអំពីប្រភពដើមរបស់ទឹកលើឋានមួយនេះ៕

December 6, 2023

Ford Territory ទទួលបានពានរង្វាន់ជារថយន្ត Compact SUV ដែលល្អបំផុតប្រចាំឆ្នាំ ២០២៣

[ភ្នំពេញ – ថ្ងៃទី ២៩ ខែវិច្ឆិកា ឆ្នាំ២០២៣] ថ្មីៗនេះរថយន្ត Next-Generation Ford Territory បានទទួលពានរង្វាន់ជារថយន្ត Compact SUV ដែលល្អបំផុតប្រចាំឆ្នាំ ២០២៣ បន្ទាប់ពីត្រូវបានឆ្លងកាត់ការវាយតម្លៃយ៉ាងម៉ត់ច៉ត់លើគ្រប់ផ្នែកនៃរថយន្តទាំងអស់ក្នុងទីផ្សារប្រទេសភីលីពីនដែលរួមមាន៖ ការវាយតម្លៃលើកម្លាំងនិងសមត្ថភាពរបស់រថយន្តជារួម ការរចនា/រូបរាង មុខងារ/ស្តង់ដាររបស់រថយន្ត ផាសុកភាព សុវត្ថិភាព ប្រសិទ្ធភាព គុណភាព កញ្ចប់សេវាធានា សេវាថែទាំយានយន្ត និងការគាំទ្រពីសំណាក់អតិថិជនជាដើម។

គួរបញ្ជាក់ផងដែរថា រថយន្ត Next-Generation Ford Territory បានត្រឡប់មកជាថ្មីម្តងទៀតក្នុងតំណែងជារថយន្ត Compact SUV ដែលលក់ដាច់បំផុត ជាពិសេសក្នុងទីផ្សារប្រទេស ភីលីពីន។ អ្វីដែលគួរអោយភ្ញាក់ផ្អើលបំផុតនោះគឺ ត្រឹមតែរយៈពេល ៥ ខែប៉ុណ្ណោះ បន្ទាប់ពីពិធីសម្ពោធជាផ្លូវការនៅឯពិព័រណ៍រថយន្តអន្តរជាតិ Manila International Auto Show (MIAS) ក្នុងខែមេសា រថយន្ត Ford Territory ត្រូវបានលក់ដាច់អស់ដល់ទៅ ៥០០០ គ្រឿងឯណោះ! ដែលនាំឱ្យចំនួនលក់សរុបកើនឡើងដល់ជាង 25,000 គ្រឿងគិតចាប់តាំងពីការចេញលក់ក្នុងខែសីហា ឆ្នាំ 2020 កន្លងមក។ ព្រឹត្តិការណ៍ដ៏សំខាន់នេះ គឺជាសក្ខីភាពមួយដែលសបង្ហាញពីប្រជាប្រិយភាពនៃរថយន្ត Next-Generation Ford Territory ក្នុងចំណោមអតិថិជនថ្មីៗ អ្នកជំនួញវ័យក្មេង និងគ្រួសារខ្នាតតូចដែលស្វែងរករថយន្ត SUV ដែលឆ្លាតវៃ សុវត្ថិភាព ទំនើប និងទាន់សម័យ។

រថយន្ត Next-Generation Ford Territory ជារថយន្ត SUV ស៊េរីថ្មីឆ្នាំ ២០២៣ ឆ្លងកាត់នូវកំណែទម្រង់ថ្មីទាំងស្រុងទាំងផ្នែកខាងក្នុង និងផ្នែកខាងក្រៅ ផ្តល់នូវផាសុកភាព និងសុវត្ថិភាពក្នុងការធ្វើដំណើរគ្រប់ស្ថានភាពផ្លូវ។

ផ្នែកខាងក្នុងនៃរថយន្តនេះត្រូវបានបំពាក់មកជាមួយនូវ៖

កៅអីស្បែកប្រណិតផ្តល់ផាសុកភាពក្នុងពេលធ្វើដំណើរ និងមានមុខងារកៅអីត្រជាក់មិនធ្វើអោយអ្នកបើកបរមានអារម្មណ៍ថាហត់នឿយជាពិសេសពេលធ្វើដំណើរផ្លូវឆ្ងាយ
កុងទ័រឌីជីថលទំនើបទាន់សម័យទំហំ 3 អ៊ីញផ្តល់រូបភាពភ្លឺច្បាស់ត្រជាក់ភ្នែក
អេក្រង់កម្សាន្ត Touch Screen កណ្តាលទំហំ 12 អ៊ីញ អាចភ្ជាប់មុខងារ Apple CarPlay, Android Auto & Google Maps ដោយមិនចាំបាច់ប្រើខ្សែ
ប្រព័ន្ធសាកថ្មទូរស័ព្ទឥតខ្សែ Wireless Charge

មិនតែប៉ុណ្ណោះ រថយន្តនេះក៏បានបំពាក់ជាមួយនឹងប្រព័ន្ធសុវត្ថិភាព ក៏ដូចជាបច្ចេកវិទ្យាទំនើបជំនាន់ចុងក្រោយដូចជា៖

កាមេរ៉ាសុវត្ថិភាព ៣៦០ ដឺក្រេ កម្រិតខ្ពស់ជុំវិញរថយន្តផ្តល់រូបភាពច្បាស់ល្អ
ប្រព័ន្ធផ្តល់សញ្ញាគ្រោះថ្នាក់ពេលមានឧបសគ្គ ឬអ្នកថ្មើរជើងឆ្លងកាត់ និងប្រព័ន្ធចាប់ហ្វ្រាំងបន្ទាន់ដោយស្វ័យប្រវត្ត
ប្រព័ន្ធបន្ថយល្បឿន រក្សាគម្លាតសុវត្ថិភាព ឈប់ និងទៅមុខដោយស្វ័យប្រវត្តតាមរថយន្តខាងមុខ និងតម្រង់គន្លងផ្លូវ
ប្រព័ន្ធជំនួយចូលចតដោយស្វ័យប្រវត្តបែបអក្សរ (P) បែបអក្សរ (T) និងប្រព័ន្ធជំនួយចាកចេញពីចំណត
ប្រព័ន្ធបើក/បិទឃ្លុបក្រោយដោយស្វ័យប្រវត្តគ្រាន់តែគ្រវាសជើង។

November 30, 2023

ក្រុមហ៊ុនហូឡង់រកវិធីបង្កកំណើតទារកដំបូងគេក្នុងទីអវកាស

ក្រុមហ៊ុន Spaceborn United របស់អ្នកជំនួញជនជាតិហូឡង់ Egbert Edelbroek កំពុងសិក្សាស្រាវជ្រាវដើម្បីបង្កកំណើត និងបង្កើតទារកតាមធម្មជាតិ នៅក្នុងបរិស្ថានដែលមានកម្លាំងទំនាញខ្សោយដូចនៅលើភពអង្គារ។

បើទោះជាមានឧបសគ្គច្រើនក្នុងដំណើរឆ្ពោះទៅការសម្រេចគោលដៅខាងលើ ប៉ុន្តែ លោក Edelbroek ជឿថា លោកអាចមើលឃើញទារកដំបូងដែលបង្កកំណើតក្នុងទីអវកាស។ នេះបើតាម AFP ចុះផ្សាយកាលពីថ្ងៃទី 14 វិច្ឆិកា 2023។

«មនុស្សជាតិត្រូវតែជាសត្វលោកដែលរស់នៅក្នុងអន្តរភព។ បើសិនជាចង់រស់នៅដោយឯករាជ្យនៅខាងក្រៅផែនដី យើងត្រូវការដោះស្រាយបញ្ហានៃការបន្តពូជ» លោក Edelbroek សង្កត់ធ្ងន់ដូច្នេះ។

ការបង្កកំណើតក្នុងទីអវកាស មានឧបសគ្គច្រើន។ ឧបសគ្គចម្បងគេគឺកង្វះកម្លាំងទំនាញ ធ្វើឱ្យគូស្នេហ៍ងាយនឹងអណ្តែតឆ្ងាយពីគ្នា ដូច្នេះ Spaceborn United គឺជាក្រុមហ៊ុនដំបូងគេដែលស្វែងរកវិធីបង្កកំណើតនៅទីអវកាស។

យោងតាមលោក Edelbroek ឧបសគ្គមួយទៀត នោះគឺធាតុរាវរបស់រាងកាយនឹងត្រូវបានរុញច្រានឡើងទៅលើ នៅក្នុងបរិស្ថានកម្លាំងទំនាញទាប ដែលផ្ទុយពីនៅលើផែនដី។ ដូច្នេះ ជាដំបូង មនុស្សត្រូវការបង្កើតបរិស្ថានមួយដែលល្អឥតខ្ចោះ។

ក្រុមអ្នកវិទ្យាសាស្ត្រកំពុងស្វែងយល់អំពីវិធីបង្កកំណើតក្នុងបន្ទប់ពិសោធន៍ដែលមានកម្លាំងទំនាញផែនដីទាប ប៉ុន្តែ លោក Edelbroek និយាយថា គម្រោងបាញ់បង្ហោះកោសិកាកណ្ដុរទៅពិសោធក្នុងទីអវកាសនឹងធ្វើឡើងនៅចុងឆ្នាំនេះ។ បន្ទាប់មក ក្នុងរយៈពេលពី 5 ដល់ 6 ឆ្នាំទៀត ក្រុមហ៊ុននេះនឹងពិសោធលើកោសិកាមនុស្ស។

បញ្ហាសីលធម៌គឺជាមូលហេតុដែលធ្វើឱ្យការបង្កកំណើតក្នុងទីអវកាស ទាក់ទាញចំណាប់អារម្មណ៍របស់បណ្ដាក្រុមហ៊ុនឯកជនដូច Spaceborn ជំនួសឱ្យណាសា ដែលរារែកក្នុងការផ្ដល់ថវិកាសម្រាប់ប្រធានបទ «រសើប»។ ក៏ប៉ុន្តែ លោក Edelbroek ជឿថា នឹងមានពេលវេលាគ្រប់គ្រាន់ដើម្បីបង្កើតទារកដំបូងដែលបង្កកំណើតក្នុងអវកាស មុនពេលលោកទទួលមរណភាព៕

November 16, 2023

ពិធីសម្ពោធដាក់ឱ្យប្រើប្រាស់ជាផ្លូវការ ស្ពានកោះពេជ្រ – កោះនរា នឹងធ្វើនៅថ្ងៃទី 15 ខែនេះ

នៅថ្ងៃទី 15 ខែវិច្ឆិកា ឆ្នាំ 2023 ស្ពានបេតុងខ្សែកាបឆ្លងទន្លេ ពីតំបន់អភិវឌ្ឍន៍កោះពេជ្រ ទៅតំបន់អភិវឌ្ឍន៍កោះនរា នឹងត្រូវដាក់សម្ពោធឱ្យប្រើប្រាស់ជាផ្លូវការ ក្រោមអធិបតីភាពដ៏ខ្ពង់ខ្ពស់របស់ សម្តេចមហាបរវធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។

ខាងលើនេះគឺជាការបញ្ជាក់របស់លោក កើត ឆែ អភិបាលរងរាជធានីភ្នំពេញ ក្នុងពេលអញ្ជើញជាអធិបតីភាពសម្ពោធបើកឱ្យដំណើរការអគារពង្រីកបន្ថែមថ្មី ផ្សារទំនើប អ៊ីអនម៉លភ្នំពេញ កាលពីថ្ងៃទី 04 ខែវិច្ឆិកា ឆ្នាំ 2023។

ស្ពានកោះពេជ្រ – កោះនរា ត្រូវបានប្រមុខរដ្ឋាភិបាលកម្ពុជា អនុញ្ញាតឱ្យប្រើប្រាស់ជាបណ្តោះអាសន្នកាលពីថ្ងៃទី 20 ខែតុលា ឆ្នាំ 2023 ដើម្បីបញ្ជៀសការកកស្ទះចរាចរណ៍នៅស្ពានព្រះមុនីវង្ស និងស្ពានអាកាសក្បាលថ្នល់។ បច្ចុប្បន្ន ស្ពាននេះកំពុងទទួលបានចំណាប់អារម្មណ៍ខ្លាំងពីសាធារណជន ពិសេសគឺពលរដ្ឋដែលត្រូវធ្វើដំណើរឆ្លងកាត់តំបន់ផ្សារច្បារអំពៅនាពេលកន្លង។ ស្ពាននេះក៏កំពុងតែក្លាយជាស្ពានដ៏សំខាន់ដែលតភ្ជាប់ទីក្រុងរណបកោះនរា ក៏ដូចជាផ្លូវជាតិលេខ 1 ទៅនឹងចំណុចកណ្តាលនៃរាជធានីភ្នំពេញ។

ស្ពានដែលសាងសង់ដោយក្រុមហ៊ុន OCIC និងមានបណ្ដោយ 824 ម៉ែត្រ និងទទឹង 24.50 ម៉ែត្រនេះ ត្រូវបានបើកការដ្ឋានសាងសង់កាលពីថ្ងៃទី 26 ខែតុលា ឆ្នាំ 2020 ក្រោមអធិបតីភាពដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុនសែន អតីតនាយករដ្ឋមន្ត្រី នៃព្រះរាជាណាចក្រកម្ពុជា។ ការសាងសង់ស្ពាននេះត្រូវចំណាយថវិកាសរុបចំនួន 38 លានដុល្លារអាម៉េរិក។

November 13, 2023

ប្រេស៊ីលអភិវឌ្ឍ «វ៉ាក់សាំងព្យាបាលជំងឺញៀនកូកាអ៊ីន»

ក្រុមអ្នកវិទ្យាសាស្ត្រនៅប្រទេសប្រេស៊ីលប្រកាសថា កំពុងអភិវឌ្ឍវិធីសាស្ត្រថ្មីដែលទំនើប ដើម្បីព្យាបាលអាការញៀនកូកាអ៊ីន និងម៉ាទឹកកក ដោយយោងទៅតាមបច្ចេកវិទ្យាវ៉ាក់សាំង។

យោងតាម AFP ចុះផ្សាយកាលពីថ្ងៃទី 26 តុលា 2023 វ៉ាក់សាំងឈ្មោះ Calixcoca ដែលកំពុងត្រូវបានពិសោធនេះ អាចដាស់ប្រព័ន្ធការពាររាងកាយឱ្យទប់ស្កាត់សារធាតុកូកាអ៊ីន និងម៉ាទឹកកកដែលនឹងចូលទៅកាន់ខួរក្បាល ជួយឱ្យអ្នកប្រើប្រាស់បំផ្លាញវដ្ដនៃអាការញៀន។ នេះមានន័យថា ពួកគេនឹងលែងមានអារម្មណ៍ត្រេកត្រអាលនៅពេលប្រើប្រាស់គ្រឿងញៀន។

អ្នកជំនាញនៅសាកលវិទ្យាល័យរដ្ឋ Minas Gerais បានឱ្យដឹងថា បើសិនវិធីសាស្ត្រព្យាបាលនេះទទួលបានការអនុញ្ញាត នោះវានឹងក្លាយជាវ៉ាក់សាំងដំបូងគេដែលព្យាបាលអាការញៀនកូកាអ៊ីន។

បច្ចុប្បន្ន វ៉ាក់សាំងនេះជិតចូលដល់ដំណាក់កាលពិសោធចុងក្រោយនៅលើមនុស្ស។ អ្នកជំនាញឱ្យដឹងថា វ៉ាក់សាំង Calixcoca អាចកំណត់ឡើងវិញនូវការព្យាបាលអាការញៀននឹងគ្រឿងញៀន។

គម្រោងអភិវឌ្ឍវ៉ាក់សាំងនេះទទួលបានពានរង្វាន់តម្លៃជាងកន្លះលានដុល្លារអាម៉េរិកពី Euro Health Innovation ដែលឧបត្ថម្ភដោយក្រុមហ៊ុនផលិតឱសថ Eurofarma៕

October 27, 2023

ក្នុងខែតុលានេះ ទាំងសូរ្យគ្រាស និងចន្ទគ្រាស សុទ្ធតែនឹងកើតឡើង

សូរ្យគ្រាសរាងចិញ្ចៀនក្នុងថ្ងៃទី 14 តុលា និងចន្ទគ្រាសមួយផ្នែកក្នុងថ្ងៃទី 29 តុលា គឺជាព្រឹត្តិការណ៍តារាសាស្ត្រគួរឱ្យចាប់អារម្មណ៍ដែលកើតឡើងក្នុងខែតុលា 2023។

សូរ្យគ្រាសរាងចិញ្ចៀនលើកនេះអាចមើលឃើញក្នុង 8 រដ្ឋនៅភាគនិរតីរបស់សហរដ្ឋអាម៉េរិក។ សូរ្យគ្រាសប្រភេទនេះកើតឡើងនៅពេលព្រះចន្ទ ព្រះអាទិត្យ និងផែនដីស្ថិតនៅត្រង់ជួរនឹងគ្នាប៉ុន្តែដោយសារព្រះចន្ទស្ថិតនៅត្រង់ចំណុចឆ្ងាយពីផែនដីបំផុតលើគន្លងរាងពងក្រពើរបស់វា ទើបមិនអាចបិទបាំងព្រះអាទិត្យបានទាំងស្រុង ហើយក៏បន្សល់រង្វង់មូលភ្លើងដូចចិញ្ចៀន។

អ្នកដែលស្ថិតនៅក្រៅតំបន់អាចមើលឃើញបាតុភូតសូរ្យគ្រាសរាងចិញ្ចៀនលើកនេះ នៅតែអាចគយគន់សូរ្យគ្រាសមួយផ្នែក ក្នុងនោះរួមមាន ទឹកដីអាម៉េរិកទាំងមូល តំបន់ខ្លះរបស់ប្រទេសម៉ិកស៊ិក តំបន់អាម៉េរិកកណ្ដាល ប្រទេសកូឡុំប៊ី និងប្រេស៊ីល។

ចំណែកចន្ទគ្រាសមួយផ្នែកដែលកើតឡើងនៅចុងខែតុលានេះនឹងបង្ហាញខ្លួននៅតំបន់អឌ្ឍគោលខាងកើតរបស់ផែនដី រួមមាន ទ្វីបអឺរ៉ុប អាហ្វ្រិក អាស៊ី អង់តាក់ទិក និងអូសេអានី។ ក្នុងបាតុភូតនេះ ព្រះចន្ទនឹងគោចរឆ្លងកាត់ស្រមោលផែនដី ធ្វើឱ្យវាងងឹតជាងធម្មតា។ ចន្ទគ្រាសមួយផ្នែកនឹងកើតឡើងពីម៉ោង 02:36 ថ្ងៃទី 29 តុលា និងបញ្ចប់នៅវេលាម៉ោង 03:53។

នេះគឺជាចន្ទគ្រាសទីពីរក្នុងឆ្នាំ 2023 ក្រោយពីចន្ទគ្រាសពាក់កណ្ដាលដែលបានកើតឡើងកាលពីខែឧសភា៕

October 7, 2023

តែទឹកដោះគោគជ់បង្កហានិភ័យ «ញៀន» និង «វិបត្តិផ្លូវចិត្ត»

(ប្រទេសចិន) – ក្រុមអ្នកជំនាញឱ្យដឹងថា អាការញៀនតែទឹកដោះគោគឺជាមានពិត និងអាចនាំឱ្យមានបញ្ហាថប់អារម្មណ៍ និងផ្លូវចិត្ត។

ការសន្និដ្ឋាននេះត្រូវបានលើកឡើងដោយយោងទៅលើការសិក្សាស្រាវជ្រាវរបស់សាកលវិទ្យាល័យ Tsinghua និងសាកលវិទ្យាល័យជាតិសេដ្ឋកិច្ច និងហិរញ្ញវត្ថុ (CUFE) ចិន ធ្វើឡើងលើនិស្សិតជាង 5,200 នាក់នៅទីក្រុងប៉េកាំង និងប្រកាសលើទស្សនាវដ្ដី Journal of Affective Disorders កាលពីចុងខែកញ្ញា 2023។

«តែទឹកដោះគោកំពុងពេញនិយមខ្លាំងនៅប្រទេសចិន ពិសេសគឺក្នុងស្រទាប់យុវវ័យ។ ការរកឃើញរបស់យើងសង្កត់ធ្ងន់ថា ការប្រើប្រាស់តែទឹកដោះគោអាចនាំឱ្យញៀន ទាក់ទងនឹងបញ្ហាផ្លូវចិត្ត ថប់អារម្មណ៍ និងការចង់ធ្វើអត្តឃាត» ក្រុមអ្នកស្រាវជ្រាវអះអាងដូច្នេះ។

តាមរយៈការប្រើប្រាស់រង្វាស់សម្រាប់វាស់ស្ទង់កម្រិតញៀន (ពិនិត្យទៅលើកត្តានានាមានដូចជាការចង់ខ្លាំង និងចូលចិត្តខ្លាំង) ក្រុមអ្នកស្រាវជ្រាវខាងលើបានរកឃើញភស្តុតាងបង្ហាញថា យុវវ័យមួយចំនួនមានអាការញៀន។ ជិត 50% នៃអ្នកស្ម័គ្រចិត្តក្នុងការសិក្សាស្រាវជ្រាវបានឱ្យដឹងថា ពួកគេផឹកតែទឹកដោះគោយ៉ាងតិចម្ដងក្នុងមួយសប្ដាហ៍។

ក្រៅពីស្ករបន្ថែម ភេសជ្ជៈនេះក៏មានផ្ទុកជាតិកាហ្វេអ៊ីន ដែលអាចនាំឱ្យមានអារម្មណ៍ធុញទ្រាន់ ថប់អារម្មណ៍ និងឯកាក្នុងសង្គម។ នេះគឺជាបញ្ហាលាក់មុខ និងមានច្រើន ដែលត្រូវការពិនិត្យស៊ីជម្រៅ ពិសេសនៅពេលតែទឹកដោះគោគជ់កាន់តែទទួលបានការពេញនិយម។

ក្រុមអ្នកស្រាវជ្រាវសរសេរថា «លទ្ធផលបង្ហាញថា ការប្រើប្រាស់តែទឹកដោះគោអាចនាំឱ្យមានអាការញៀន ដោយសារវាធ្វើឱ្យមានភាពពឹងផ្អែក ការចង់ផឹក កម្រិតនៃការប្រើប្រាស់ខ្ពស់ មិនអាចបញ្ឈប់បាន និងអារម្មណ៍មានកំហុស»។

ការវិភាគដទៃជាច្រើនទៀតបង្ហាញថា យុវវ័យចិន និងតំបន់ជាច្រើនផ្សេងទៀតកំពុងប្រើប្រាស់តែទឹកដោះគោដើម្បីទប់ទល់ និងកែសម្រួលអារម្មណ៍។ ភេសជ្ជៈទាំងនេះមានកម្រិតគ្រោះថ្នាក់ប្រហាក់ប្រហែលនឹងការប្រើប្រាស់បណ្ដាញសង្គមញឹកញាប់ហួស ឬអាភៀន។

ក្នុងអនាគត ក្រុមស្រាវជ្រាវខាងលើនឹងបន្តការសិក្សាស៊ីជម្រៅបន្ថែមទៀត ដើម្បីបើកផ្លូវឱ្យមានការរកវិធីដោះស្រាយបញ្ហាដែលអាចកើតឡើងដោយសារការញៀននឹងតែទឹកដោះគោ៕

October 4, 2023

មហាសេដ្ឋីមួយរូបថា អ្នកវិនិយោគគួរតែរក្សាសាច់ប្រាក់ជាបណ្ដោះអាសន្ន

ក្នុងស្ថានភាពដែលមានការព្រួយបារម្ភអំពីការប្រាក់ និងអតិផរណាដែលចេះតែកើនឡើង មហាសេដ្ឋី Ray Dalio ដែលបច្ចុប្បន្នមានទ្រព្យជាង 15 ពាន់លានដុល្លារ យល់ថា អ្នកវិនិយោគគួរតែរក្សាសាច់ប្រាក់ក្នុងដៃជាបណ្ដោះអាសន្ន។

ជាក់ស្ដែង នៅក្នុងព្រឹត្តិការណ៍មួយរបស់វិទ្យាស្ថាន Milken ដែលធ្វើឡើងនៅសឹង្ហបុរីកាលពីថ្ងៃទី 14 កញ្ញា 2023 ទស្សនិកជនបានសួរ លោក Ray Dalio ថា «លោកនឹងបណ្ដាក់ទុនបែបណានៅក្នុងស្ថានការណ៍បច្ចុប្បន្ន?»។

មហាសេដ្ឋីអាម៉េរិក លោក Ray Dalio ដែលជាស្ថាបនិកនៃមូលនិធិការពារហានិភ័យ Bridgewater Associates ឆ្លើយថា «ខ្ញុំមិនចង់ទិញមូលបត្របំណុល និងទ្រព្យប្រហាក់ប្រហែលនេះ។ ក្នុងកាលៈទេសៈនេះ ខ្ញុំគិតថា យើងគួរតែរក្សាសាច់ប្រាក់ជាបណ្ដោះអាសន្ន…»។

ការយល់ឃើញនេះត្រូវបានលើកឡើងក្នុងគ្រាដែលអត្រាការប្រាក់មូលបត្របំណុលនៅរតនាគារអាម៉េរិកប្រភេទ 30 ឆ្នាំ បានកើនឡើងដល់ 5% ហើយអ្នកវិនិយោគអាចទទួលបានអត្រាចំណេញ 4% ពីសញ្ញាប័ណ្ណ ក៏ដូចជាគណនីបញ្ញើសន្សំ។

មហាសេដ្ឋីខាងលើនិយាយថា កំហុសធំបំផុតដែលអ្នកវិនិយោគស្ទើរតែទាំងអស់ជួបប្រទះគឺ «ជឿថា ទីផ្សារដែលដំណើរការល្អគឺជាខ្ទង់វិនិយោគដែលមានប្រសិទ្ធភាពបំផុត មិនមែនថ្លៃបំផុត»។ ជាងនេះ លោកក៏បានអះអាងថា មូលបត្របំណុលរយៈកាលយូរគឺជាខ្ទង់វិនិយោគដែលមិនគួរឱ្យចាប់អារម្មណ៍ ក្នុងកាលៈទេសៈបច្ចុប្បន្ន៕

September 18, 2023

Tag: អារម្មណ៍