អវកាស - La Reine Media

ការរីកចម្រើនផ្នែកអវកាសរបស់សហរដ្ឋអាម៉េរិក ធៀបនឹងប្រទេសចិន

នៅក្នុងផ្នែកសំខាន់ៗ សហរដ្ឋអាម៉េរិកមិនត្រឹមតែមានប្រៀបលើសលុបលើប្រទេសចិននោះទេ ប៉ុន្តែក៏មានប្រៀបជាងបណ្ដាប្រទេសបូកចូលគ្នាផងដែរនៅក្នុងវិស័យអវកាស។

អំពីថវិកា៖ ឆ្នាំ 2021 ថវិកាសម្រាប់ផ្នែកអវកាសរបស់សហរដ្ឋអាម៉េរិកគឺប្រមាណ 59.8 ពាន់លានដុល្លារ ខណៈប្រទេសចិន មានប្រហែល 16.18 ពាន់លានដុល្លារប៉ុណ្ណោះ។ នេះបើតាម Svetla Ben-Itzhak សាស្ត្រាចារ្យរងផ្នែកអវកាស និងទំនាក់ទំនងអន្តរជាតិ ប្រចាំសាកលវិទ្យាល័យ Air (AU) របស់សហរដ្ឋអាម៉េរិក។

ផ្កាយរណប៖ គិតត្រឹមខែមេសា ឆ្នាំ 2023 នៅលើគន្លងតារាវិថីផែនដី មានផ្កាយរណបសរុប 5,465 គ្រឿងកំពុងដំណើរការ។ ក្នុងនោះ សហរដ្ឋអាម៉េរិកមាន 3,433 គ្រឿង ស្មើនឹង 63% ហើយឈរលំដាប់លេខមួយលើពិភពលោក។ ចំណែកប្រទេសចិនវិញ មានតែ 541 គ្រឿងប៉ុណ្ណោះ។

អវកាសយានដ្ឋាន៖ សហរដ្ឋអាម៉េរិកមានអវកាសយានដ្ឋានសម្រាប់បាញ់បង្ហោះយានអវកាសចំនួន 7 កំពុងដំណើរការក្នុង និងក្រៅប្រទេស គ្រាដែលយ៉ាងតិច 13 កន្លែងផ្សេងទៀតកំពុងស្ថាបនា។ ប្រទេសចិនមានអាកាសយានដ្ឋានកំពុងដំណើរការចំនួន 4 កន្លែង និង 2 កន្លែងទៀតកំពុងអភិវឌ្ឍទៅតាមផែនការ ហើយទាំងអស់សុទ្ធតែស្ថិតក្នុងទឹកដីប្រទេសនេះ។

ដៃគូសហការ៖ រដ្ឋាភិបាលអាម៉េរិកបានចុះហត្ថលេខាលើកិច្ចព្រមព្រៀងចំនួន 169 ជាមួយរដ្ឋ និងអង្គការអន្តររដ្ឋាភិបាលចំនួន នឹង 33, 129 ជាមួយនឹងដៃគូពាណិជ្ជកម្ម និង 7 ជាមួយនឹងស្ថាប័នស្រាវជ្រាវ។ ប្រទេសចិន មានកិច្ចសហការជាមួយប្រទេសរុស្ស៊ី អ៊ីរ៉ង់ ប៉ាគិស្ថាន ថៃ និងតួកគី។

បេសកកម្មឡើងទៅឋានព្រះចន្ទ៖ រុស្ស៊ី និងចិន សហការគ្នានៅក្នុងគម្រោងឡើងទៅកាន់ឋានព្រះចន្ទនៅឆ្នាំ 2028។ ស្ថានីយស្រាវជ្រាវព្រះចន្ទអន្តរជាតិរបស់ប្រទេសទាំងពីរនេះ បើកទ្វារទទួលយកដៃគូសហការអន្តរជាតិ ប៉ុន្តែមកដល់ពេលនេះមិនទាន់មានដៃគូថ្មីណាមួយឡើយ។ ចំណែកកម្មវិធីព្រះចន្ទ Artemis ដែលនឹងនាំអ្នកអវកាសឡើងទៅកាន់ឋានព្រះចន្ទនៅឆ្នាំ 2025 របស់សហរដ្ឋអាម៉េរិកវិញ គិតចាប់ពីឆ្នាំ 2020 មានប្រទេសចំនួន 24 បានចូលរួម។

ចំនួនលើកនៃការបាញ់បង្ហោះយានអវកាស៖ ឆ្នាំ 2021 ប្រទេសចិនបានបាញ់បង្ហោះយានអវកាសចំនួន 55 លើក ច្រើនជាងសហរដ្ឋអាម៉េរិកចំនួន 4 លើក។

ស្ថានីយអវកាស៖ ចាប់ពីឆ្នាំ 2022 ប្រទេសចិនមានស្ថានីយអវកាសពេញលេញផ្ទាល់ខ្លួន ឈ្មោះ ធានហ្គង់ (Tiangong) ដែលគ្រប់គ្រងតែឯង។ ចាប់ពីឆ្នាំ 1990 សហរដ្ឋអាម៉េរិកបានសហការជាមួយប្រទេសចំនួន 14 ក្នុងនោះមានរុស្ស៊ីផងដែរ ដើម្បីដំណើរការស្ថានីយអវកាសអន្តរជាតិ (ISS)។ ប្រទេសចិនអាចនឹងមានប្រៀបជាងសហរដ្ឋអាម៉េរិក យ៉ាងឆាប់ត្រឹមឆ្នាំ 2045 បើសិនវ៉ាស៊ីងតោនមិនធ្វើសកម្មភាព។ ប៉ុន្តែ យោងតាម Space លទ្ធភាពនេះប្រហែលជានឹងមិនអាចកើតឡើង ព្រោះថា សហរដ្ឋអាម៉េរិកកំពុងតែបង្កើនការវិនិយោគទៅលើវិស័យអវកាស៕

May 20, 2023

James Webb រកឃើញទឹកនៅជុំវិញផ្កាយដុះកន្ទុយ 238P/Read

តេឡេស្កុបអវកាស James Webb សង្កេតឃើញចំហាយទឹកនៅជុំវិញផ្កាយដុះកន្ទុយមួយដួងដ៏កម្រ ស្ថិតនៅក្នុងខ្សែក្រវាត់អាចម៍ផ្កាយចន្លោះភពអង្គារ និងភពព្រហស្បតិ៍។

ការរកឃើញថ្មីនេះគឺជាការរីកចម្រើនមួយជំហានទៀតនៅក្នុងវិស័យវិទ្យាសាស្ត្ររបស់តេឡេស្កុបអវកាស James Webb ដែលជាលើកដំបូង ឧស្ម័ន ក្នុងករណីនេះគឺចំហាយទឹក ត្រូវបានរកឃើញស្ថិតនៅជុំវិញផ្កាយដុះកន្ទុយ 238P/Read។ នេះបើតាមការចុះផ្សាយកាលពីថ្ងៃទី 16 ឧសភា របស់ទំព័រ Space។ ប្រការនេះពិតជាមានសារសំខាន់ ព្រោះវាបង្ហាញថា ទឹកនៅក្នុងប្រព័ន្ធព្រះអាទិត្យកាលពីយុគសម័យដំបូង អាចត្រូវបានរក្សាទុកក្នុងទម្រង់ទឹកកកនៅក្នុងខ្សែក្រវាត់អាចម៍ផ្កាយចម្បងជាងគេ។

«កន្លងមក យើងបានឃើញបណ្ដាវត្ថុនៅក្នុងខ្សែក្រវាត់អាចម៍ផ្កាយចម្បងគេ ពេញលក្ខណៈជាផ្កាយដុះកន្ទុយ ប៉ុន្តែ ដោយមានទិន្នន័យវិសាលគមសុក្រឹតនេះពី JWST ទើបយើងអាចប្រាកដថា ទឹកកកកំពុងបង្កើតបាតុភូតនោះ» អ្នកវិទ្យាសាស្ត្រ Michael Kelley ប្រធានក្រុមស្រាវជ្រាវនៃគម្រោងនេះ នៅសាកលវិទ្យាល័យ Maryland បានឱ្យដឹងដូច្នេះ។ ការរកឃើញថ្មីនេះត្រូវបានចុះផ្សាយលើទស្សនាវដ្ដី Nature។

ការរកឃើញចំហាយទឹកនៅជុំវិញ 238P/Read ជួយពង្រឹងទ្រឹស្ដីដែលថា ទឹកត្រូវបានផ្កាយដុះកន្ទុយនាំពីទីអវកាសមកកាន់ផែនដី។ ប៉ុន្តែ ការស្រាវជ្រាវក៏បង្ហាញថា 238P/Read មិនមានឧស្ម័ន CO2 ផងដែរ។

នៅក្នុងខ្សែក្រវាត់អាចម៍ផ្កាយចម្បងរបស់ប្រព័ន្ធព្រះអាទិត្យ ភាគច្រើនគឺជាដុំថ្ម។ ក៏ប៉ុន្តែ នៅទីនេះ ជួនកាលក៏មានវត្ថុដូចផ្កាយដុះកន្ទុយ 238P/Read។

មកដល់បច្ចុប្បន្ន «យើងមិនទាន់ប្រាកដថា ធ្វើបែបណាបានជាទឹកដ៏ច្រើនមានវត្តមាននៅលើផែនដី។ ការស្វែងយល់ប្រវត្តិនៃការ «បែងចែក» ទឹកនៅក្នុងប្រព័ន្ធព្រះអាទិត្យ នឹងជួយឱ្យយើងយល់អំពីប្រព័ន្ធផ្កាយដទៃ និងវាយតម្លៃបានថា តើពួកវាអាចមានភពដែលដូចផែនដី ឬអត់» Stefanie Milam មកពីក្រុមស្រាវជ្រាវខាងលើ ឱ្យដឹងដូច្នេះ។

ជំហានបន្ទាប់ ក្រុមស្រាវជ្រាវកំណត់គោលដៅសង្កេតលំអិតលើ 238P/Read ដើម្បីស្វែងយល់ឱ្យបានច្បាស់ថា ផ្កាយដុះកន្ទុយកម្រជួបដូចវា មានសមាសធាតុដូចគ្នានេះ ឬអត់៕

May 18, 2023

យន្តហោះធំជាងគេលើពិភពលោក ទម្លាក់យន្តហោះល្បឿនលឿនជាងសំឡេងបានសម្រេច

(សហរដ្ឋអាម៉េរិក) – យន្តហោះដែលមានស្លាបប្រវែង 117 ម៉ែត្ររបស់ក្រុមហ៊ុន Stratolaunch ទម្លាក់យន្តហោះគំរូដើមដែលមានល្បឿនលឿនជាងសំឡេងក្រោមប្រាំដង បានដោយជោគជ័យ នៅឯលំហសមុទ្រ California។

ក្រុមហ៊ុនអាកាសចរណ៍អវកាស Stratolaunch នៅសហរដ្ឋអាម៉េរិក សម្រេចបានមួយជំហានសំខាន់ទៀតក្នុងការធ្វើឱ្យប្រព័ន្ធបង្ហោះយន្តហោះល្បឿនលឿនជាងសំឡេងក្រោមប្រាំដង ក្លាយជាឧបករណ៍ដែលអាចប្រើប្រាស់បាន។ កាលពីសប្ដាហ៍កន្លង ក្រុមហ៊ុននេះសម្រេចបានជោគជ័យនៅពេលទម្លាក់យានសម្រាប់ធ្វើតេស្ត Talon-0 (TA-0) ពីយន្តហោះ Roc។

ដោយមានដងខ្លួនចំនួនពីរ មានម៉ាស៊ីន Boeing 747 ចំនួន 6 គ្រឿង, កង់ចំនួន 28 គ្រាប់ និងស្លាបប្រវែង 117 ម៉ែត្រ (វែងជាងទីលានបាល់ទាត់) Roc គឺជាយន្តហោះធំជាងគេបង្អស់លើពិភពលោក បើគិតទៅតាមប្រវែងស្លាប។ នេះបើតាមទំព័រ Space។

Roc ហោះឡើងពីព្រលាន Mojave នៅ California ខាងត្បូង កាលពីព្រឹកថ្ងៃទី 13 ឧសភា ចាប់ផ្ដើមជើងហោះហើរសាកល្បងលើកទី 11។ Roc នាំយកយានសម្រាប់ធ្វើតេស្ត TA-0 បំពាក់នៅចន្លោះដងខ្លួនទាំងពីររបស់វា និងហោះទៅទិសខាងលិច ហើយទម្លាក់ TA-0 នៅពេលទៅដល់លំហសមុទ្រ California។ TA-0 ទម្លាក់ខ្លួនចុះលើផ្ទៃទឹកសមុទ្រ ទៅតាមការគ្រោងទុក ខណៈ Roc ហោះត្រលប់មកចុះចតវិញ ក្រោយបេសកកម្មសាកល្បងរយៈពេលប្រហែលបួនម៉ោងបានបញ្ចប់។

Stratolaunch មានគម្រោងប្រើប្រាស់ Roc ដើម្បីដឹកយន្តហោះគ្មានមនុស្សបើកបរ ល្បឿនលឿនជាងសំឡេងក្រោមប្រាំដង Talon-A (TA-1) ឡើងទៅកាន់កម្ពស់ 10,000 ម៉ែត្រ។ នៅទីនោះ វានឹងត្រូវបានផ្ដាច់ចេញពី Roc ដើម្បីហោះហើរដោយខ្លួនឯង។ TA-1 ដំណើរការដោយរ៉ុក្កែត នឹងបន្តហោះក្នុងល្បឿន Mach 5 (6,174 គីឡូម៉ែត្រ/ម៉ោង) មុនពេលចុះចតដោយស្វ័យប្រវត្ត៕

May 16, 2023

យន្តហោះ SKY Magnetar លឿនជាង 6 ដងធៀបនឹងយន្តហោះលឿនជាងគេនាបច្ចុប្បន្ន

យន្តហោះ SKY Magnetar ដែលមានរូបរាងស្រដៀងយានអវកាស អាចដឹកអ្នកដំណើរហោះក្នុងល្បឿន 6,759 គីឡូម៉ែត្រ។

អ្នករចនា Oscar Vinals មកពីអេស្ប៉ាញ បានបង្ហាញយន្តហោះ SKY Magnetar ដែលអាចហោះក្នុងល្បឿន 6,759 គីឡូម៉ែត្រ/ម៉ោង លឿនជាងបីដងធៀបនឹងយន្តហោះ Concorde។ យន្តហោះនេះអាចដឹកអ្នកដំណើរពីក្រុងឡុងដ៍ របស់ចក្រភពអង់គ្លេស ទៅកាន់ New York សហរដ្ឋអាម៉េរិក ដោយចំណាយពេលតែ 50 នាទី លឿនជាងឆ្ងាយបើធៀបនឹងកំណត់ត្រា 2 ម៉ោង នឹង 52 នាទី មុននោះ។ នេះបើតាមទំព័រ Sun ចុះផ្សាយកាលពីថ្ងៃទី 13 ឧសភា។

យានដែលពាក់កណ្ដាលជាយន្តហោះ ពាក់កណ្ដាលជារ៉ុក្កែតនេះ មានបណ្ដោយ 112 ម៉ែត្រ និងអាចដាក់អ្នកដំណើរបាន 120 នាក់។ យន្តហោះនេះនឹងត្រូវបានបើកបរដោយពីឡុតពីរនាក់ រួមនឹងបច្ចេកវិទ្យាបញ្ញាសិប្បនិម្មិត។ SKY Magnetar អាចហោះបានចម្ងាយ 11,999 គីឡូម៉ែត្រ ដែលអាចហោះទៅដល់គ្រប់ទីកន្លែងដោយប្រើពេលតែពីរម៉ោង។

SKY Magnetar នឹងជាយន្តហោះដែលល្អសម្រាប់បរិស្ថាន ដោយសារប្រើប្រាស់ឥន្ធនៈអ៊ីដ្រូសែនជាថាមពលសម្រាប់ម៉ាស៊ីន។

ទោះជាយ៉ាងនេះក៏ដោយ មកដល់បច្ចុប្បន្នមិនទាន់មានក្រុមហ៊ុន ឬអង្គការណាមួយបញ្ជាក់ថានឹងផលិត ក៏ដូចជាសាកល្បងរចនាយន្តហោះ SKY Magnetar នៅឡើយ ខណៈដែលលោក Oscar ជឿថា យន្តហោះនេះនឹងជំរុញការអភិវឌ្ឍវិស័យអាកាសចរណ៍ល្បឿនលឿនជាងសំឡេងនៅពាសពេញពិភពលោក។

យន្តហោះ Concorde ដែលសហការអភិវឌ្ឍ និងផលិតដោយចក្រភពអង់គ្លេស និងបារាំង បានឈប់ដំណើរការកាលពីឆ្នាំ 2003 ដោយសារតែមានសំឡេងរំខានខ្លាំង ការចំណាយក៏ខ្ពស់ និងសមត្ថភាពផ្ទុកមិនបានច្រើន។ បច្ចុប្បន្ន យន្តហោះដែលមានល្បឿនលឿនជាងគេលើពិភពលោក គឺ Boeing 747-8i ដែលហោះបាន 1,062 គីឡូម៉ែត្រ/ម៉ោង ស្មើនឹង ½ នៃល្បឿនរបស់យន្តហោះ Concorde និង 1/6 នៃល្បឿនរបស់យន្តហោះ SKY Magnetar៕

May 15, 2023

រ៉ុក្កែត SpaceX នឹងនាំយកស្ថានីយអវកាសឯកជនឡើងទៅកាន់គន្លងតារាវិថី

(សហរដ្ឋអាម៉េរិក) – ស្ថានីយអវកាសឯកជនដែលមានបណ្ដោយប្រហែល 100 ម៉ែត្រ រួមមានម៉ូឌុលជាច្រើន និងទំនាញផែនដីសិប្បនិម្មិត នឹងធ្វើសកម្មភាពនៅលើគន្លងគោចរផែនដី នៅពីរឆ្នាំខាងមុខ។

ក្រុមហ៊ុន Vast Space នៅ California កាលពីថ្ងៃទី 10 ឧសភា បានប្រកាសអំពីគម្រោងបាញ់បង្ហោះស្ថានីយអវកាស Haven-1 តាមរយៈរ៉ុក្កែត Falcon 9 របស់ក្រុមហ៊ុន SpaceX យ៉ាងយូរត្រឹមខែសីហា 2025។ បន្ទាប់មក បេសកកម្ម Vast-1 នឹងដឹកអ្នកអវកាសឡើងទៅស្ថានីយ Haven-1 និងនៅទីនោះរយៈពេល 30 ថ្ងៃ។ បេសកកម្ម Vast-1 ក៏នឹងត្រូវបានបាញ់បង្ហោះនៅលើរ៉ុក្កែត Falcon 9 ហើយក្រុមអវកាសចរនឹងជិះក្នុងយាន Dragon របស់ SpaceX។

«ការសហការជាមួយ SpaceX គឺជាជំហានដំបូងនៅក្នុងគោលដៅយូរអង្វែង សំដៅរកការបាញ់បង្ហោះស្ថានីយអវកាសបំពាក់ទំនាញផែនដីសិប្បនិម្មិតធំជាងមុន ទៅកាន់គន្លងគោចររបស់ផែនដី និងឆ្ងាយជាងនេះ» Jed McCaleb អគ្គនាយកប្រតិបត្តិរបស់ក្រុមហ៊ុន Vast Space បញ្ជាក់ដូច្នេះ។

Vast គឺជាក្រុមហ៊ុនមួយដែលត្រូវបានបង្កើតឡើងកាលពីពីរឆ្នាំមុន។ ក្រុមហ៊ុននេះមានគោលដៅគ្រប់គ្រងស្ថានីយអវកាសបំពាក់ទំនាញផែនដីសិប្បនិម្មិតដែលមានម៉ូឌុលច្រើន និងប្រវែង 100 ម៉ែត្រ ហើយបាញ់បង្ហោះដោយរ៉ុក្កែតរបស់ SpaceX។

បើសិនជាគ្រប់យ៉ាងដំណើរការដោយរលូន Haven-1 នឹងក្លាយជាស្ថានីយអវកាសឯកជនមួយក្នុងចំណោមគម្រោងនានាដែលកំពុងស្ថិតក្នុងការអភិវឌ្ឍ។ កន្លងមក មានក្រុមហ៊ុនជាច្រើនក៏បានចាប់ផ្ដើមអនុវត្តគម្រោងប្រហាក់ប្រហែលនឹង Haven-1 ក្នុងនោះក៏មាន Axiom Space, Blue Origin, Nanoracks និង Northrop Grumman ផងដែរ៕

May 12, 2023

មូលដ្ឋានអវកាសពាណិជ្ជកម្មដំបូងគេនៅប្រទេសចិន កំពុងត្រូវបានសាងសង់ ដើម្បីលើកកម្ពស់សមត្ថភាពបាញ់បង្ហោះ

មូលដ្ឋានអវកាសពាណិជ្ជកម្មដំបូងរបស់ចិន ដែលស្ថិតនៅក្នុងខេត្ត Hainan និងបម្រើដល់បេសកកម្មបាញ់បង្ហោះទាំងរ៉ុក្កែតប្រើឥន្ធនៈរាវ និងរឹង គ្រោងនឹងត្រូវបានដាក់ឱ្យដំណើរការចាប់ពីឆ្នាំ 2024។

គម្រោងខាងលើនេះបានចាប់ផ្ដើមការងារសាងសង់តាំងពីខែកក្កដា 2022 ហើយគ្រោងនឹងបំពេញបេសកកម្មបាញ់បង្ហោះបែបពាណិជ្ជកម្មដំបូងនៅឆ្នាំក្រោយ។

ប្រព័ន្ធបាញ់បង្ហោះចំនួនពីរសម្រាប់រ៉ុក្កែតប្រើឥន្ធនៈរាវកំពុងត្រូវបានស្ថាបនា ហើយគ្រោងនឹងសម្រេចជាស្ថាពរនៅចុងឆ្នាំ 2023។ ចំណែកទម្រសម្រាប់ការបាញ់បង្ហោះរ៉ុក្កែតប្រើឥន្ធនៈរឹងពីរផ្សេងទៀតនឹងត្រូវចាប់ផ្ដើមការសាងសង់នៅចុងឆ្នាំនេះ។

«ប្រទេសចិនចាប់ផ្ដើមកម្មវិធីអវកាសពាណិជ្ជកម្មកាលពីឆ្នាំ 2015 ដោយមានវត្តមានរបស់ក្រុមហ៊ុនរ៉ុក្កែតអវកាសជាច្រើនចូលរួម» លោក Guo Qiang សមាជិកគណៈគ្រប់គ្រងរបស់ក្រុមហ៊ុនបាញ់បង្ហោះផ្នែកអវកាសពាណិជ្ជកម្មអន្តរជាតិ Hainan បាននិយាយដូច្នេះ។

មួយក្នុងចំណោមបញ្ហាទាំងឡាយនាបច្ចុប្បន្ន គឺកង្វះសមត្ថភាពបាញ់បង្ហោះ។ ប៉ុន្តែ ការសាងសង់មូលដ្ឋានបាញ់បង្ហោះផ្នែកអវកាសពាណិជ្ជកម្ម អាចដោះស្រាយបញ្ហានេះបាន។

សមត្ថភាពតាមការរចនារបស់ប្រព័ន្ធបាញ់បង្ហោះនីមួយៗសម្រាប់រ៉ុក្កែតឥន្ធនៈរាវ គឺ 16 ជើងក្នុងមួយឆ្នាំ។ ដូច្នេះ បន្ទាប់ពីបានស្ថាបនារួចរាល់ មូលដ្ឋាននឹងមានសមត្ថភាពខ្ពស់ជាងមុនក្នុងការបាញ់បង្ហោះ ដែលជួយជំរុញការរីកចម្រើនរបស់វិស័យអវកាសចរណ៍ពាណិជ្ជកម្ម៕

May 11, 2023

អាចម៍ផ្កាយប្រវែង 200 ម៉ែត្រ កំពុងហោះសំដៅមកកាន់ផែនដី

ទីភ្នាក់ងារអវកាសអាម៉េរិក (ណាសា) កំពុងតាមដានយ៉ាងយកចិត្តទុកដាក់ទៅលើអាចម៍ផ្កាយខ្នាតធំមួយដែលនឹងហោះមកជិតផែនដីនៅចុងខែឧសភានេះ ក្នុងល្បឿន 25,750 គីឡូម៉ែត្រ/ម៉ោង។

អាចម៍ផ្កាយដែលកំពុងហោះមកកាន់ផែនដី និងមានឈ្មោះថា 2023 CL3 នេះ មានទទឹងប្រហែល 200 ម៉ែត្រ។ ណាសាបានដាក់អាចម៍ផ្កាយនេះទៅក្នុងក្រុម «ក្បែរផែនដី» ដែលត្រូវការតាមដានស្រាវជ្រាវបន្ត។

2023 CL3 មានទំហំធំជាងពីរដងធៀបនឹងរូបសំណាកសេរីភាព Statue of Liberty (កម្ពស់សរុបប្រហែល 93 ម៉ែត្រ)។ អាចម៍ផ្កាយនេះអាចបង្កគ្រោះថ្នាក់ធ្ងន់ធ្ងរ បើសិនធ្លាក់មកលើផែនដី។

តាមការព្យាករ អាចម៍ផ្កាយនេះនឹងហោះកាត់មុខផែនដីនៅថ្ងៃទី 24 ឧសភា ក្នុងគម្លាត 7.2 លានគីឡូម៉ែត្រ។ គម្លាតពីផែនដីទៅឋានព្រះចន្ទគឺ 384,400 គីឡូម៉ែត្រ។ ក្រុមអ្នកវិទ្យាសាស្ត្រគណនាឃើញថា អាចម៍ផ្កាយនេះនឹងហោះកាត់មុខផែនដីដោយសុវត្ថិភាពក្នុងល្បឿនជាង 25,750 គីឡូម៉ែត្រ/ម៉ោង។

ណាសាបានរកឃើញថា បច្ចុប្បន្នមានអាចម៍ផ្កាយប្រហែល 1,113,527 ដុំ នៅក្នុងប្រព័ន្ធព្រះអាទិត្យ។ ពួកវាគោចរជុំវិញព្រះអាទិត្យ និងប្រមូលផ្ដុំត្រង់តំបន់ខ្សែក្រវាត់អាចម៍ផ្កាយដែលនៅចន្លោះភពអង្គារ និងភពព្រហស្បតិ៍៕

May 10, 2023

ការប្រៀបធៀបទំហំរបស់ប្រហោងខ្មៅ (Black Hole) ខ្នាតយក្សនៅក្នុងចក្រវាលដែលមនុស្សបានរកឃើញ

ទីភ្នាក់ងារអវកាសអាម៉េរិក (ណាសា-NASA) កាលពីថ្ងៃទី 02 ឧសភា បានចែករំលែកវីដេអូមួយស្ដីពីបណ្ដាប្រហោងខ្មៅខ្នាតយក្សដែលមានម៉ាសធំជាងព្រះអាទិត្យចាប់ពី 100,000 ដងដល់ 66 ពាន់លានដង។

ព្រះអាទិត្យគឺជាវត្ថុតែមួយគត់នៅក្នុងទិដ្ឋភាពដំបូង ហើយវាតូចទៅៗនៅពេលកាមេរ៉ាថយក្រោយឆ្ងាយទៅៗ។ ប្រហោងខ្មៅធំជាងម៉ាសព្រះអាទិត្យ 100,000 ដង ស្ថិតក្នុងកាឡាក់ស៊ី J1601 មានស្រមោលកណ្ដាលតូចជាងព្រះអាទិត្យ។

ស៊ុមទិដ្ឋភាពបន្តគឺជាគន្លងគោចររបស់ភពពុធ (Mercury)។ ប្រហោងខ្មៅនៅកណ្ដាលកាឡាក់ស៊ី Circinus មានម៉ាសធំជាងព្រះអាទិត្យមួយលានដង។

បន្ទាប់មកគឺជាគន្លងគោចររបស់ផែនដី។ ប្រហោងខ្មៅនៅកណ្ដាលកាឡាក់ស៊ី M32 ដែលជាកាឡាក់ស៊ីរណបរបស់កាឡាក់ស៊ី Andromeda មានម៉ាសធំជាងព្រះអាទិត្យពីរលានដង។

ប្រហោងខ្មៅ Sagittarius A* នៅកណ្ដាលកាឡាក់ស៊ីមីលគីវ៉េ មានម៉ាសធំជាងបួនលានដង ធៀបនឹងម៉ាសព្រះអាទិត្យ។

កាឡាក់ស៊ី NGC 7727 មានប្រហោងខ្មៅធំៗចំនួនពីរ ក្នុងនោះ ប្រហោងខ្មៅតូចជាងគេមានម៉ាសធំជាងព្រះអាទិត្យ 6 លានដង។

https://www.youtube.com/watch?v=jU1DsipURcM

វីដេអូបង្ហាញពីទំហំរបស់ប្រហោងខ្មៅ (Black Hole) ខ្នាតយក្សនៅក្នុងចក្រវាលដែលមនុស្សបានរកឃើញ

តមកទៀត យើងហោះឆ្លងកាត់គន្លងគោចររបស់ភពព្រហស្បតិ៍ (Jupiter), ភពណេបទូន (Neptune) និងខ្សែក្រវាត់អាចម៍ផ្កាយ (Kuiper)។ បន្ទាប់មកគឺជាប្រហោងខ្មៅដែលធំជាងគេរបស់ NGC 7727 ដែលធំជាង 150 លានដងធៀបនឹងម៉ាសព្រះអាទិត្យ។

ចំណែកប្រហោងខ្មៅរបស់កាឡាក់ស៊ី Andromeda អាចមានម៉ាសធ្ងន់ជាងព្រះអាទិត្យ 140 លានដង។ កាឡាក់ស៊ី Cygnus A មានប្រហោងខ្មៅដែលធំជាង 2.5 ពាន់លានដងធៀបនឹងម៉ាសព្រះអាទិត្យ។

ពេលនេះយើងនឹងហោះឆ្លងកាត់ពពកផ្កាយដុះកន្ទុយដែលព័ទ្ធជុំវិញប្រព័ន្ធព្រះអាទិត្យ (Oort cloud)។ ប្រហោងខ្មៅ M87 ដែលធ្ងន់ជាងម៉ាសព្រះអាទិត្យ 5.4 ពាន់លានដងគឺជាប្រហោងខ្មៅដំបូងគេដែលត្រូវបានថតដោយផ្ទាល់។

ប្រហោងខ្មៅ TON 618 ស្ថិតក្នុងកាឡាក់ស៊ីមួយដែលនៅឆ្ងាយសែនឆ្ងាយ រហូតដល់ពន្លឺរបស់វាត្រូវការពេល 10 ពាន់លានឆ្នាំទើបមកដល់ផែនដី។ ដោយមានម៉ាសធំជាង 66 ពាន់លានដងនៃម៉ាសព្រះអាទិត្យ TON 618 គឺជាប្រហោងខ្មៅធំបំផុតដែលមនុស្សធ្លាប់បានរកឃើញនៅក្នុងចក្រវាលដែលអ្នកវិទ្យាសាស្ត្រអាចសង្កេតឃើញ។

May 3, 2023

ផ្កាយមួយដួងកំពុង “ស៊ីសាច់” មិត្តរួមដំណើររបស់វា ក្នុងប្រព័ន្ធផ្កាយភ្លោះនៃកាឡាក់ស៊ីមួយដែលនៅក្បែរ Milky Ways

អ្នកវិទ្យាសាស្ត្របានប្រើប្រាស់កម្មវិធីកុំព្យូទ័រដើម្បីធ្វើការវិភាគទៅលើដំណើារវិវឌ្ឍន៍របស់ផ្កាយភ្លោះនេះ ហើយបានរកឃើញថា ផ្កាយដែលមានទំហំធំជាងគេ បានស្រូបយកវត្ថុធាតុពីផ្កាយតូចជាងដែលកំពុងគោចរជុំវិញវា នៅក្នុងរយៈចម្ងាយខ្លី។

ក្រុមតារាវិទូនៅមជ្ឈមណ្ឌលរុករករលកទំនាញ ARC Centre of Excellence for Gravitational Wave Discovery (OzGrav) របស់ក្រុមប្រឹក្សាស្រាវជ្រាវអូស្ត្រាលី សហការជាមួយមន្ទីរស្រាវជ្រាវ Max Planck របស់អាល្លឺម៉ង់ សាកលវិទ្យាល័យ Monash របស់អូស្ត្រាលី និងសាកលវិទ្យាល័យ Birmingham នៃប្រទេសអង់គ្លេស បានធ្វើការស្វែងយល់អំពីប្រភពនៃប្រព័ន្ធផ្កាយភ្លោះ Be X-ray ដែលត្រូវបានរកឃើញនៅក្នុងកាឡាក់ស៊ី Small Magellanic Cloud ដែលនៅមិនឆ្ងាយប៉ុន្មានពីកាឡាក់ស៊ី Milky Ways របស់មនុស្សយើង។

កាឡាក់ស៊ី Small Magellanic Cloud ដែលនៅមិនឆ្ងាយប៉ុន្មានពីកាឡាក់ស៊ី Milky Ways របស់មនុស្សយើង

ប្រព័ន្ធផ្កាយភ្លោះ Be X-ray គឺជាប្រព័ន្ធផ្កាយមួយ ដែលរួមមានផ្កាយនឺត្រុងមួយដែលគោចរយ៉ាងលឿនជុំវិញផ្កាយមួយទៀតដែលមានទំហំធំជាងវា។ ល្បឿននៃការគោចររបស់ផ្កាយនឺត្រុងតូច បានធ្វើឱ្យផ្កាយធំ បង្កើតបានជាកងអវកាសដ៏ធំមួយដែលពេញទៅដោយវត្ថុធាតុផ្សេងៗ។ បន្ទាប់មក ផ្កាយនឺត្រុងក៏បានបញ្ចេញកាំរស្មី X ដែលក្រុមតារាវិទូអាចសង្កេតឃើញ និងវាស់វែងបាន។

បណ្ឌិត Serena Vinciguerra ប្រធានក្រុមស្រាវជ្រាវនៅ OzGrav បានប្រើប្រាស់កម្មវិធីកុំព្យូទ័រ COMPAS ដើម្បីក្លែងបង្កើតបរិយាកាសដែលដូចទៅនឹងកាឡាក់ស៊ី Small Magellanic Cloud។ តាមរយៈការប្រៀបធៀបចំណុចពិសេសរបស់គន្លងគោចររបស់ប្រព័ន្ធផ្កាយភ្លោះ Be X-ray ដែលត្រូវបានបង្កើតឡើងក្នុងកុំព្យូទ័រ ជាមួយនឹងប្រព័ន្ធផ្កាយភ្លោះពិតនៅក្នុងអវកាសដែលត្រូវបានសង្កេតឃើញ ក្រុមតារាវិទូអាចស្វែងយល់អំពីដំណើការនៃការវិវឌ្ឍន៍របស់ផ្កាយទាំងនេះ៖

ដំបូងឡើយ ផ្កាយទាំងនេះបានកកើតក្នុងប្រព័ន្ធផ្កាយភ្លោះដែលមានគន្លងគោចររាងពងក្រពើតូចចង្អៀត។ ផ្កាយមួយដួងដែលមានទំហំធំជាងគេ មានការវិវឌ្ឍន៍លឿងជាង និងប្រែទៅជាធំជាងមុនយ៉ាងលឿន។ ដោយសារតែនៅមិនសូវឆ្ងាយពីគ្នា ផ្កាយធំជាង ក៏ស្រូបយកវត្ថុធាតុពីផ្កាយតូចជាងវាបានច្រើន។ នៅដំណាក់កាលចុងក្រោយនៃការវិវឌ្ឍន៍ ផ្កាយធំជាងគេអាចនឹងផ្ទុះឡើងក្រោមទម្រង់ supernova ហើយប្រែក្លាយជាផ្កាយនឺត្រុងតួច ប៉ុន្តែហាប់ណែន។ បើសិនជាផ្កាយទាំង2នេះនៅមានជីវិតបន្ទាប់ពីការផ្ទុះ ពួកវានឹងបង្កើតបានជាប្រព័ន្ធផ្កាយភ្លោះ Be X-ray ដោយមានផ្កាយនឺត្រុងតូចមួយ វិលជុំវិញផ្កាយយក្សធំមួយ ក្នុងល្បឿនយ៉ាងលឿន៕

ប្រភព៖ Sci Tech Daily

March 31, 2020

កងកម្លាំងអវកាសសហរដ្ឋអាមេរិក បង្ហាញអាវុធវាយលុកទំនើបបំផុតរបស់ខ្លួន

កងទ័ពអវកាសសហរដ្ឋអាមេរិក ចាប់ផ្ដើមបំពាក់ប្រព័ន្ធរំខាន និងប្រឆាំងទៅនឹងទំនាក់ទំនងនៃផ្កាយរណបរបស់សត្រូវ ដែលនេះជាលើកដំបូងហើយដែលកងទ័ពអវកាសកាន់កាប់អាវុធវាយលុកដ៏ទំនើប។

ពិធីប្រគល់ និងបំពាក់ប្រព័ន្ធប្រឆាំងនឹងប្រព័ន្ធទំនាក់ទំនង ដែលហៅកាត់ថា CCS (Counter Communication System) ត្រូវបានធ្វើឡើងកាលពីថ្ងៃទី12មីនាកន្លងទៅ នៅក្នុងបន្ទាយទ័ពអាកាស Peterson របស់សហរដ្ឋអាមេរិក។ “CCS គឺជាអាវុធវាយប្រហារតែមួយគត់ នៅក្នុងកងទ័ពអវកាសសហរដ្ឋអាមេរិក។ នេះគឺជាកំណែបន្ថែមដ៏សំខាន់ ជាមួយនឹងសមត្ថភាពប្រយុទ្ធរបស់កងទ័ព” នេះជាសម្ដីរបស់ Steve Brogan ប្រធានការិយាល័យប្រព័ន្ធប្រយុទ្ធនៃអង្គភាពគ្រប់គ្រងគម្រោងពិសេសរបស់កងកម្លាំងអវកាសសហរដ្ឋអាមេរិក ដែលបានថ្លែងនៅក្នុងពិធីខាងលើ។

CCS បានបង្ហាញខ្លួនជាលើកដំបូងក្នុងទ័ពអាកាសអាមេរិកាំង ចាប់ពីឆ្នាំ2004។ កំណែថ្មីរបស់វា គឺ CCS Block 10.2 មានសមត្ថភាពខ្ពស់ក្នុងការវាយប្រហារ ទៅតាមការចង់បានរបស់សហរដ្ឋអាមេរិក ហើយបន្ទាប់មក វាក៏ត្រូវបាននាំយកមកប្រើប្រាស់ក្នុងជួរកងទ័ពអវកាស។

មុខងារសំខាន់របស់ប្រព័ន្ធអាវុធខាងលើនេះ មិនត្រូវបានគេបង្ហើបឱ្យដឹងនោះទេ ក៏ប៉ុន្តែ អាវុធនេះ ប្រហែលជាអាចបង្កការរំខាន ឬរាំងខ្ទប់សញ្ញា និងព័ត៌មានដែលបញ្ជូនចេញពីផ្កាយរណបរបស់សត្រូវ។ កំណែមួយចំនួនរបស់ CCS រួមមានប្រព័ន្ធថាសអង់តែន និងឧបរកណ៍ជំនួយបច្ចេកទេស។

កងកម្លាំងអវកាស គឺជាកងប្រដាប់អាវុធទី6របស់សហរដ្ឋអាមេរិក ដែលត្រូវបានបង្កើតឡើងកាលពីខែធ្នូ ឆ្នាំ2019 ទៅតាមបញ្ជារបស់ប្រធានាធិបតី Donald Trump។ CCS មានភារកិច្ចការពារផ្កាយរណប ទប់ស្កាត់ និងប្រឆាំងចំពោះការគំរាមកំហែងក្នុងអវកាស និងអះអាងអំពីអំណាចរបស់សហរដ្ឋអាមេរិក នៅក្នុងគន្លងគោចរនៃពិភពផែនដី។

កងកម្លាំងប្រដាប់អាវុធថ្មីនេះ ស្ថិតក្រោមការគ្រប់គ្រងរបស់នាយកដ្ឋានទ័ពអាកាសសហរដ្ឋអាមេរិក និងមានបុគ្គលិកចំនួន 16,000នាក់។ បញ្ជាការដ្ឋានកងទ័ពអវកាស ទទួលខុសត្រូវលើសកម្មភាពប្រយុទ្ធក្នុងទីអវកាស ដែលត្រូវបានបង្កើតឡើងកាលពីខែសីហា ឆ្នាំ2019។

រុស្ស៊ីក៏ជាប្រទេសតែមួយគត់ក្រៅពីសហរដ្ឋអាមេរិក ធ្លាប់មានកងទ័ពអវកាសដោយឡែក។ កងទ័ពអវកាសរស្ស៊ី ត្រូវបានបង្កើតឡើងកាលពីឆ្នាំ1992 ក្រោយមកក៏ត្រូវបានរម្សាយ និងដាក់បញ្ចូលទៅក្នុងជួរកងទ័ពប្រភេទផ្សេងជាច្រើនលើក ហើយក៏បានក្លាយជាកងទ័ពមួយប្រភេទដែលស្ថិតក្រោមការគ្រប់គ្រងរបស់កងទ័ពអាកាសអវកាសរបស់សហព័ន្ធរុស្ស៊ី៕

ប្រភព៖ សារព័ត៌មានបរទេស

March 14, 2020

Tag: អវកាស