សហរដ្ឋអាម៉េរិក

ក្រុមហ៊ុន Virtus Solis មានគម្រោងផលិតអគ្គិសនីព្រះអាទិត្យក្នុងទីអវកាស

ក្រុមហ៊ុន Virtus Solis គ្រោងនឹងប្រើប្រាស់រ៉ុក្កែត Starship ដើម្បីបាញ់បង្ហោះផ្ទាំងសូឡាទំហំមួយគីឡូម៉ែត្រ ឡើងទៅកាន់ទីអវកាស ដើម្បីផលិត និងបាញ់បញ្ជូនអគ្គិសនីពីលើមេឃមកកាន់ផែនដី។

Virtus Solis ដែលជាក្រុមហ៊ុនធុរកិច្ចថ្មីនៅរដ្ឋ Michigan សហរដ្ឋអាម៉េរិក ត្រូវបានបង្កើតឡើងដោយអតីតវិស្វកររ៉ុក្កែត John Bucknell របស់ក្រុមហ៊ុន SpaceX។ តំណាងក្រុមហ៊ុននេះបានអធិប្បាយអំពីគំនិតស្ដីពីការបាញ់បញ្ជូនអគ្គិសនីព្រះអាទិត្យពីទីអវកាស នៅក្នុងសន្និសីទអន្តរជាតិស្ដីពីថាមពលអវកាស ដែលត្រូវបានធ្វើឡើងនៅប្រទេសអង់គ្លេសកាលពីពាក់កណ្ដាលខែមេសា ឆ្នាំ2024។ នេះបើតាមទំព័រ Space ដែលបានចុះផ្សាយកាលពីថ្ងៃទី30 មេសា។

លោក Bucknell យល់ថា នៅពេលការចំណាយសម្រាប់ការបាញ់បង្ហោះផ្កាយរណបឡើងទៅកាន់គន្លងតារាវិថីកម្រិតទាបរបស់ផែនដីថយចុះមកនៅក្រោម 200ដុល្លារក្នុងមួយគីឡូក្រាម អគ្គិសនីព្រះអាទិត្យក្នុងទីអវកាសក៏នឹងមានតម្លៃទាបជាង បើធៀបនឹងអគ្គិសនីពីបណ្ដារោងចក្រថាមពលនុយក្លេអែរ ឬរោងចក្រដែលប្រើប្រាស់ធ្យូងថ្ម និងឧស្ម័នធម្មជាតិនៅលើផែនដី។ បច្ចុប្បន្ន SpaceX យកថ្លៃមិនដល់ 3ពាន់ដុល្លារសម្រាប់ទំនិញមួយគីឡូក្រាមដែលផ្ញើឡើងទៅកាន់ទីអវកាស។ SpaceX បានអះអាងថា បន្ទាប់ពីរ៉ុក្កែត Starship ដំណើរការពេញលេញ ការចំណាយសម្រាប់ការបាញ់បង្ហោះផ្កាយរណបទៅកាន់អវកាស នឹងថយចុះមកនៅ 10ដុល្លារក្នុងមួយគីឡូក្រាម។

ក្រុមហ៊ុន Virtus Solis ចង់អភិវឌ្ឍផ្ទាំងសូឡាដែលមានទទឹងមួយគីឡូម៉ែត្រ អាចដំឡើងនៅលើមេឃដោយរ៉ូបូតម៉ូឌុលដែលមានទំហំ 1.6 ម៉ែត្រ។ ម៉ូឌុលប្រភេទនេះចំនួនរាប់រយ អាចត្រូវបានដឹកជញ្ជូនដោយរ៉ុក្កែត Starship ឡើងទៅកាន់ Molniya ដែលជាគន្លងតារាវិថីរាងពងក្រពើ ដែលមានចំណុចជិតបំផុតគឺ 800 គីឡូម៉ែត្រ និងឆ្ងាយបំផុតគឺ 35ពាន់គីឡូម៉ែត្រ ធៀបនឹងផែនដី។

ដូច្នេះ ផ្កាយរណបចាប់ពីពីរគ្រឿងឡើងទៅនឹងអាចផ្គត់ផ្គង់អគ្គិសនីសម្រាប់មួយតំបន់នៅលើផែនដី។ ប្រព័ន្ធរបស់ក្រុមហ៊ុន Virtus Solis ដែលមានផ្ទាំងសូឡាចំនួន 16ផ្ទាំង នឹងគ្របដណ្ដប់តំបន់នានានៅទូទាំងពិភពលោក ហើយអាចបាញ់បញ្ជូនថាមពលក្នុងទម្រង់រលកមីក្រូវ៉េវ មកកាន់អង់តែនទទួលខ្នាតយក្សនៅលើដី។
យោងតាម Bucknell បច្ចុប្បន្ន ក្រុមហ៊ុន Virtus Solis កំពុងរកវិធីកែលម្អប្រសិទ្ធភាពនៃបច្ចេកវិទ្យាបញ្ជូនអគ្គិសនីដោយមិនប្រើខ្សែ ដែលជាឧបស័គធំចំពោះការផលិតអគ្គិសនីព្រះអាទិត្យក្នុងទីអវកាស។ បណ្ដាប្រព័ន្ធបែបនេះ បច្ចុប្បន្នមានប្រសិទ្ធភាពប្រហែល 5% ប៉ុន្តែដើម្បីអាចប្រើប្រាស់ជាក់ស្ដែង ប្រសិទ្ធភាពនេះត្រូវការកើនឡើងដល់ 20%។

កាលពីខែកុម្ភៈ ឆ្នាំ2024 ក្រុមហ៊ុន Virtus Solis បានប្រកាសអំពីគម្រោងសាកល្បងដំណើរការផ្កាយរណបបាញ់បញ្ជូនអគ្គិសនីនៅក្នុងឆ្នាំ2027 ដើម្បីត្រួតពិនិត្យការដំឡើងផ្ទាំងសូឡាក្នុងទីអវកាស និងបាញ់បញ្ជូនអគ្គិសនីជាងមួយគីឡូវ៉ាត់ មកកាន់ផែនដី។ ក្រុមហ៊ុននេះសង្ឃឹមថា អាចស្ថាបនារោងចក្រអគ្គិសនីព្រះអាទិត្យសម្រាប់ធ្វើពាណិជ្ជកម្ម ក្នុងកម្រិតមេហ្គាវ៉ាត់ នៅក្នុងឆ្នាំ2030។

May 3, 2024

ផ្ទាំងសូឡាធ្វើឱ្យតម្លៃអគ្គិសនីស្មើសូន្យ នៅក្នុងរដ្ឋមួយរបស់សហរដ្ឋអាម៉េរិក

នៅពេលតម្លៃអគ្គិសនីស្មើនឹងសូន្យដោយសារតែការផលិតថាមពលពីព្រះអាទិត្យបានកើនឡើងខ្ពស់ខ្លាំង នាំឱ្យអាជ្ញាធររដ្ឋ California ត្រូវរកដំណោះស្រាយបញ្ហាសល់អគ្គិសនី។

រដ្ឋ California សម្បូរពន្លឺព្រះអាទិត្យ ដូច្នេះ ផ្ទាំងសូឡាក៏មាននៅគ្រប់កន្លែង។ យោងតាមការគណនាថ្មីបំផុត រដ្ឋនេះមានផ្ទាំងសូឡាដែលអាចផលិតអគ្គិសនីបានជិត 47 gigawatt គ្រប់គ្រាន់សម្រាប់ផ្គត់ផ្គង់ដល់គ្រួសារ 13.9 គ្រួ ស្មើនឹង ¼ នៃតម្រូវការអគ្គិសនីរបស់រដ្ឋ។

ក្រុមហ៊ុន CAISO ដែលជាអ្នកគ្រប់គ្រងបណ្ដាញអគ្គិសនីនៅ California ឱ្យដឹងថា California បានត្រៀមសម្រាប់វត្តមានអគ្គិសនីព្រះអាទិត្យតាំងពីយូរមកហើយ ប៉ុន្តែពួកគេបានវាយតម្លៃទាបចំពោះល្បឿននៃការរីកចម្រើនដ៏ខ្លាំងក្លារបស់ផ្ទាំងសូឡានៅតាមផ្ទះ។ ប្រការនេះធ្វើឱ្យបរិមាណអគ្គិសនីកើនឡើងលើសពីតម្រូវការ។

ទោះជាយ៉ាងណាក៏ដោយ រដ្ឋ California កំពុងដោះស្រាយបញ្ហាអគ្គិសនីសល់ដោយសារលក់អគ្គិសនីមួយចំនួនទៅឱ្យបណ្ដារដ្ឋក្បែរខាង។

April 30, 2024

ឧបករណ៍ផលិតអគ្គិសនីពីប្រតិកម្មនុយក្លេអែរបែបប្រមូលផ្ដុំអាតូម បង្កើតកម្ដៅបាន 37លានអង្សាសេ

(សហរដ្ឋអាម៉េរិក) – FuZe គឺជាឧបករណ៍ខ្នាតតូចតម្លៃទាប អាចបង្កើតកម្ដៅពីប្រតិកម្មនុយក្លេអែរបែបប្រមូលផ្ដុំអាតូម (Nuclear fusion) យ៉ាងឆាប់រហ័ស និងអាចឆ្លើយតបនឹងតម្រូវការអគ្គិសនីរបស់មនុស្សនៅក្នុងអនាគត។

ឧបករណ៍ខ្នាតតូចមួយដែលផលិតឡើងដោយក្រុមហ៊ុនថាមពល Zap Energy នៅសហរដ្ឋអាម៉េរិក បង្កើតកម្ដៅអេឡិចត្រុងប្លាស្មាពី 1 ទៅ 3 keV ដែលប្រហែលនឹងពី 11 ទៅ 37 លានអង្សាសេ។ នេះបើតាម Interesting Engineering ចុះផ្សាយកាលពីថ្ងៃទី 23 មេស 2024។

ខុសពីប្រតិកម្មនុយក្លេអែរបែបបំបែកអាតូម (Nuclear fission) ដែលប្រើប្រាស់នៅក្នុងបណ្ដារោងចក្រថាមពលនុយក្លេអែរលើពិភពលោកបច្ចុប្បន្ន ប្រតិកម្មនុយក្លេអែរបែបប្រមូលផ្ដុំអាតូម (ជាធម្មតាគឺអាតូមរបស់ deuterium និង tritium) ដែលហៅថា Nuclear fusion គឺមិនបញ្ចេញសារធាតុវិទ្យុសកម្មឡើយ។

មិនដូចទៅនឹងបច្ចេកវិទ្យា Nuclear fusion ដទៃ FuZe ក្រុមហ៊ុនថាមពល Zap Energy មិនត្រូវការមេដែកមហាកម្លាំង ឬពន្លឺឡាស៊ែរកម្លាំងខ្លាំងដើម្បីបង្កើតប្លាស្មានោះទេ ដូច្នេះហើយវាមានតម្លៃទាបខ្លាំង។

April 25, 2024

យានលើឋានព្រះចន្ទរបស់ជប៉ុន «នៅមានជីវិត» ក្រោយដេកកករយៈពេលបីយប់

យានស្រាវជ្រាវ SLIM របស់ប្រទេសជប៉ុន បង្កើតបានកំណត់ត្រាដ៏អស្ចារ្យ នៅពេលរស់ឡើងវិញបីដង ក្រោយពីបានឆ្លងកាត់រាត្រីដ៏សែនត្រជាក់នៅលើឋានព្រះចន្ទដែលមានសីតុណ្ហភាព -183 អង្សាសេ, -130 អង្សាសេ និង -170 អង្សាសេ។

អង្គការស្រាវជ្រាវអភិវឌ្ឍវិស័យអវកាសចរណ៍ជប៉ុន (JAXA) នាថ្ងៃទី 24 មេសានេះ បានឱ្យដឹងថា យានចុះចតឆ្លាតវៃលើឋានព្រះចន្ទ (SLIM) របស់ប្រទេសនេះ បន្តបង្កើតបានកំណត់ត្រាថ្មី នោះគឺ «នៅមានជីវិតក្រោយរាត្រីព្រះចន្ទទីបីដែលមានបរិស្ថានមហាសែនត្រជាក់។

យាន SLIM បានចុះចតលើផ្ទៃព្រះចន្ទកាលពីខែមករាកន្លងទៅ ដែលនេះបានជួយឱ្យជប៉ុនមានឈ្មោះជាប្រទេសទី 5 លើពិភពលោក ដែលមានយានចុះចតដោយជោគជ័យលើឋានព្រះចន្ទ បន្ទាប់ពីអតីតសូវៀត សហរដ្ឋអាម៉េរិក ចិន និងឥណ្ឌា។

April 24, 2024

ចិនអនុញ្ញាតឱ្យនាំចូលផ្លែដូងស្រស់ពីកម្ពុជា គ្រាដែលទំនិញនាំចូលពីកម្ពុជា នៅមានទំហំតូចខ្លាំង

ចម្ការដូងចំនួន 13 និងទីតាំងវេចខ្ចប់ចំនួន 5 ដែលបានចុះបញ្ជីសម្រាប់នាំចេញផ្លែដូងស្រស់ពីកម្ពុជាទៅកាន់ប្រទេសចិន ទទួលបានការអនុម័តទទួលស្គាល់ជាផ្លូវការពីអគ្គរដ្ឋបាលគយចិន។ នេះបើតាមលោកជំទាវ អ៊ឹម រចនា អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានឱ្យដឹងកាលពីថ្ងៃទី 22 ខែមេសា ឆ្នាំ 2024។

ការទទួលបានការអនុម័តទទួលស្គាល់ខាងលើ ត្រូវបានធ្វើឡើងបន្ទាប់ ក្រសួងកសិកម្ម រុក្ខាប្រមាញ់ និងនេសាទកម្ពុជា ជាមួយអគ្គរដ្ឋបាលគយយចិន បានចុះហត្ថលេខាលើពិធីសារស្ដីពីលក្ខខណ្ឌតម្រូវភូតគាមអនាម័យ សម្រាប់ការនាំចេញផ្លែដូងស្រស់ពីកម្ពុជាទៅកាន់ប្រទេសចិន កាលពីថ្ងៃទី 15 ខែកញ្ញា ឆ្នាំ 2023។

កន្លងមក ក្រសួងកសិកម្ម រុក្ខាប្រមាញ់ និងនេសាទ បានជូនដំណឹងដល់ភាគីពាក់ព័ន្ធនឹងដូង ដែលមានបំណងផលិត និងកែច្នៃវេចខ្ចប់ផ្លែដូងស្រស់ទៅកាន់ទីផ្សារប្រទេសចិន ឱ្យដាក់ពាក្យស្នើសុំចុះបញ្ជី។

បន្ទាប់ពីទទួលបានពាក្យស្នើសុំ ក្រសួងកសិកម្ម បានចាត់មន្ដ្រីជំនាញចុះវាយតម្លៃស្របតាមនីតិវិធីបច្ចេកទេសដូចមានចែងនៅក្នុងពិធីសារ ហើយបញ្ជូនបញ្ជីឈ្មោះចម្ការ និងរោងចក្រកែច្នៃវេចខ្ចប់ទាំងនោះ ទៅកាន់ភាគីចិន ដើម្បីពិនិត្យ និងវាយតម្លៃបន្ត។

គិតត្រឹមពេលនេះ អគ្គរដ្ឋបាលគយយចិនបានអនុម័តទទួលស្គាល់ជាផ្លូវការ ចម្ការដូងចំនួន 13 និងទីតាំងវេចខ្ចប់ចំនួន 5 របស់កម្ពុជា ដែលបានចុះបញ្ជីសម្រាប់នាំចេញផ្លែដូងស្រស់ទៅកាន់ប្រទេសចិន។

យោងតាមរបាយការណ៍របស់អគ្គនាយកដ្ឋានគយ និងរដ្ឋាករកម្ពុជា នៅត្រីមាសទីមួយនៃឆ្នាំ 2024 ស្ថានភាពនៃការនាំចេញទំនិញកម្ពុជាទៅកាន់ទីផ្សារអន្តរជាតិ មានភាពប្រសើរឡើង។ ប្រទេសចិនក្លាយជាដៃគូដោះដូរពាណិជ្ជកម្មធំជាងគេរបស់កម្ពុជា ដោយសម្រេចបានជាង 3ពាន់2រយលានដុល្លារអាម៉េរិក។ ក្នុងនោះ កម្ពុជាបាននាំចេញទៅកាន់ទីផ្សារចិនក្នុងទំហំទឹកប្រាក់តែជាង 3រយលានដុល្លារប៉ុណ្ណោះ ខណៈដែលការនាំចេញរបស់ចិនមកកម្ពុជា សម្រេចបានរហូតជាង 2ពាន់8រយលានដុល្លារ។

ដោយឡែក សហរដ្ឋអាម៉េរិកដែលជាទីផ្សារនាំចេញធំជាងគេរបស់កម្ពុជា បាននាំចូលទំនិញពីកម្ពុជាក្នុងទំហំទឹកប្រាក់ជិត 2ពាន់លានដុល្លារ គ្រាដែលកម្ពុជាបាននាំចូលទំនិញពីសហរដ្ឋអាម៉េរិកក្នុងទំហំទឹកប្រាក់តែជាង 57 លានដុល្លារប៉ុណ្ណោះ នៅត្រីមាសទីមួយនៃឆ្នាំ 2024។

April 23, 2024

បច្ចេកវិទ្យាបង្កភ្លៀងសិប្បនិម្មិតរបស់អារ៉ាប៊ីសាអូឌីត

ភាគច្រើននៃផ្ទៃដីនៅប្រទេសអារ៉ាប៊ីសាអូឌីត គឺជាសមុទ្រខ្សាច់ និងវាលរហោឋានដែលមិនមានមនុស្សរស់នៅ។ ក្នុងនោះក៏មាន Rub’ AI Khali ដែលជាសមុទ្រខ្សាច់មានផ្ទុកខ្សាច់ច្រើនជាងគេលើពិភពលោក និងសមុទ្រខ្សាច់ An-Nafud ជាទីដែលមានភ្នំខ្សាច់កម្ពស់ជាង 30 ម៉ែត្រ រាប់មិនអស់។

ដោយសារតែមានភូមិសាស្ត្រដូចខាងលើ ទើបប្រទេសនៅអាស៊ីខាងលិចមួយនេះ តែងមានអាកាសធាតុក្ដៅខ្លាំង។ សីតុណ្ហភាពជាមធ្យមនៅក្នុងរដូវក្ដៅគឺប្រហែល 45 អង្សាសេ ប៉ុន្តែក៏អាចឡើងដល់ជាង 50 អង្សាសេផងដែរ។

ប្រទេសអារ៉ាប៊ីសាអូឌីត កំពុងតែងាកទៅរកបច្ចេកវិទ្យាបង្កភ្លៀងសិប្បនិម្មិត ក្នុងបំណងបង្កើនបរិមាណទឹកភ្លៀងឱ្យបានច្រើនជាងមុនចាប់ពី 10 ទៅ 20%។ បច្ចេកវិទ្យាដែលអារ៉ាប៊ីសាអូឌីតប្រើប្រាស់គឺ ការបណ្ដុះពពកបង្កភ្លៀងសិប្បនិម្មិត។

ចាប់តាំងពីបង្ហាញវត្តមានជាលើកដំបូងនៅសហរដ្ឋអាម៉េរិកកាលពីឆ្នាំ 1946 ការបង្កភ្លៀងសិប្បនិម្មិតគឺជាបច្ចេកវិទ្យាដែលត្រូវបានអនុវត្តនៅតាមប្រទេសជាច្រើនលើពិភពលោក។ គិតមកដល់បច្ចុប្បន្ន មានប្រទេសជាង 50 បាន និងកំពុងប្រើប្រាស់បច្ចេកវិទ្យានេះ។

បណ្ដុះពពកគឺជាបច្ចេកទេសដែលគេប្រើប្រាស់ធាតុគីមី ដែលមានដូចជាភាគល្អិតនៃអ៊ីយ៉ូតប្រាក់ជាដើម បាញ់ទៅលើពពក ដើម្បីបង្កើនបរិមាណទឹកភ្លៀងពីពពក។ នៅពេលចូលទៅដល់ពពក ភាគល្អិតអ៊ីយ៉ូតប្រាក់នឹងស្រូបទាញភាគល្អិតរបស់ទឹក ឱ្យប្រមូលផ្ដុំជុំវិញវា។ បន្ទាប់មក តំណក់ទឹកតូចៗនេះក៏ប៉ះគ្នា បង្កើតបានជាតំណក់ទឹកដែលធំជាងមុន រហូតដល់ធ្លាក់មកជាទឹកភ្លៀង។

បច្ចុប្បន្ន មានមធ្យោបាយចំនួនពីរដែលត្រូវបានប្រើប្រាស់ច្រើន នៅក្នុងការបណ្ដុះពពកដើម្បីបង្កើនទឹកភ្លៀង។ ទីមួយ គឺការប្រើប្រាស់យន្តហោះធុនស្រាលដើម្បីបាញ់កាំជ្រួចភ្លើងដែលមានផ្ទុកភាគល្អិតសូដ្យូមក្លរួ ឬអ៊ីយ៉ូតប្រាក់ ចូលទៅក្នុងពពក។ ទីពីរ គឺការបាញ់រ៉ុក្កែតតូចៗដែលមានផ្ទុកភាគល្អិត ពីដីទៅកាន់ពពក។

បើទោះជាបច្ចេកទេសបង្កភ្លៀងសិប្បនិម្មិត តែងតែមានប្រសិទ្ធភាពខ្ពស់ ប៉ុន្តែវាក៏ត្រូវបានគេសង្ស័យផងដែរ។ ជាក់ស្ដែង កាលពីដើមសប្ដាហ៍នេះ ភ្លៀងធំច្រើនមេដែលប្រហាក់ប្រហែលនឹងបរិមាណទឹកភ្លៀងពីរឆ្នាំបូកចូលគ្នា បានធ្លាក់ចុះលើទីក្រុងឌូបៃរបស់ប្រទេសអេមីរ៉ាត់អារ៉ាប់រួម (UAE) នៅក្នុងមួយថ្ងៃ បង្កឱ្យមានទឹកជំនន់យ៉ាងធ្ងន់ធ្ងរ។ នៅលើបណ្ដាញសង្គម គេឃើញមានការបញ្ចេញមតិជាច្រើនដែលចោទថា នេះគឺជាលទ្ធផលនៃការបង្កភ្លៀងសិប្បនិម្មិត។ ក៏ប៉ុន្តែ អ្នកវិទ្យាសាស្ត្រជាច្រើនបានបដិសេធការចោទប្រកាន់នេះ៕

April 19, 2024

«បើកបររថយន្តអគ្គិសនីបីឆ្នាំនៅជនបទ» ជាបទពិសោធន៍របស់អតីតគ្រូបង្រៀនម្នាក់នៅអាម៉េរិក

នៅក្នុងតំបន់ជនបទដែលមានស្ថានីយបញ្ចូលថាមពលថ្មមិនច្រើន លោក Frank Johnson អតីតគ្រូបង្រៀនមួយរូប រស់នៅក្នុងតំបន់ Dade រដ្ឋ Missouri សហរដ្ឋអាម៉េរិក បានចែករំលែកអំពីជីវភាពដែលលោកបានប្រើប្រាស់រថយន្តអគ្គិសនីតាំងពីឆ្នាំ 2021។

ចំណុចវិជ្ជមានរបស់រថយន្តអគ្គិសនី

នៅលើទំព័រ Springfield News-Leader លោក Frank Johnson ឱ្យដឹងថា រថយន្តអគ្គិសនីរបស់លោក ភាគច្រើនត្រូវបានបញ្ចូលថាមពលអគ្គិសនីក្នុងផ្ទះនៅពេលយប់ ហើយសាកថ្មល្បឿនលឿននៅលើផ្លូវល្បឿនលឿន គ្រាដែលលោកធ្វើដំណើរផ្លូវឆ្ងាយ។ កូនស្រីរបស់លោក ថែមទាំងបើកបររថយន្តអគ្គិសនីពាសពេញសហរដ្ឋអាម៉េរិក ដោយការបញ្ចូលថាមពលអគ្គិសនីនៅតាមស្ថានីយចល័ត។

ដោយសារតែមានបណ្ដាញស្ថានីយសាកថ្មនៅតាមបណ្ដោយផ្លូវល្បឿនលឿន (160 គីឡូម៉ែត្រ/ស្ថានីយ) លោក Frank Johnson លែងបារម្ភអំពីរយៈចម្ងាយដែលរថយន្តអគ្គិសនីរបស់លោកត្រូវធ្វើដំណើរ។

អតីតគ្រូបង្រៀនរូបនេះ ក៏បានឱ្យដឹងថា រថយន្តអគ្គិសនីមានភាពធន់ និងត្រូវការការថែទាំតិចជាងបើធៀបនឹងរថយន្តម៉ាស៊ីនចំហេះក្នុង។ លោកថា រថយន្តអគ្គិសនីសមស្របនឹងការប្រើប្រាស់ជាលក្ខណៈគ្រួសារ អ្នកប្រគល់ទំនិញ ក៏ដូចជាសិស្សសាលានៅជនបទ ដោយសារតែការចំណាយទៅលើអគ្គិសនីទាបជាង 5 ដង ធៀបនឹងតម្លៃសាំង។

លោក Frank បានផ្ដល់ជាយោបល់ថា សម្រាប់អ្នកដែលត្រូវធ្វើដំណើរផ្លូវឆ្ងាយជាញឹកញាប់ គួរតែជិះរថយន្តឈ្នួល បើសិនមិនទាន់ចង់បោះបង់រថយន្តសាំង។

លោក Frank Johnson អតីតគ្រូបង្រៀនមួយរូប រស់នៅក្នុងតំបន់ Dade រដ្ឋ Missouri សហរដ្ឋអាម៉េរិក

ចំណុចអវិជ្ជមានរបស់រថយន្តអគ្គិសនី

យោងតាមលោក Frank ចំណុចអវិជ្ជមានមួយចំនួនរបស់រថយន្តអគ្គិសនី រួមមាន រថយន្តថ្មីរបស់លោក ដំបូងឡើយសាកថ្មមួយពេញជិតបាន 490 គីឡូម៉ែត្រ ប៉ុន្តែបីឆ្នាំក្រោយមក សាកថ្មម្ដងជិះបាន 467 គីឡូម៉ែត្រ។ រថយន្តអគ្គិសនីក៏មានអាគុយផ្ទុកអគ្គិសនីដូចរថយន្តសាំង ដូច្នេះវាត្រូវការផ្លាស់ប្ដូរក្រោយរយៈពេលពី 5 ទៅ 7 ឆ្នាំ។

ថាមពលថ្មរបស់រថយន្តអគ្គិសនីនឹងឆាប់អស់នៅពេលអាកាសធាតុចុះត្រជាក់ ដូចជាពេលមេឃភ្លៀង ឬធ្លាក់ព្រឹលជាដើម បើធៀបនឹងរដូវក្ដៅ។

ប្រភេទរថយន្តអគ្គិសនី

រថយន្តដែលធ្វើដំណើរដោយអគ្គិសនី បច្ចុប្បន្នមានបីប្រភេទធំៗ រួមមាន រថយន្តអគ្គិសនីសុទ្ធ (BEVs), រថយន្តកូនកាត់សាំង-អគ្គិសនីថ្មធំ (Plug-In Hybrid / PHEV) និងរថយន្តកូនកាត់សាំង-អគ្គិសនីថ្មតូច (Hybrid / HEV)។

រថយន្តអគ្គិសនីសុទ្ធ (BEVs) គឺជារថយន្តដែលប្រើប្រាស់តែអគ្គិសនីពីថ្មដ៏ធំរបស់វា។ ថ្មរបស់រថយន្តនេះអាចបញ្ចូលអគ្គិសនីនៅតាមផ្ទះ ឬតាមស្ថានីយនានា។

រថយន្តអគ្គិសនីកូនកាត់សាំង-អគ្គិសនីថ្មធំ (Plug-In Hybrid / PHEV) គឺជាប្រភេទរថយន្តដែលប្រើប្រាស់ថាមពលចេញពីម៉ូទ័រអាគុយដ៏ធំរបស់វាទាំងស្រុង ដើម្បីធ្វើដំណើរនៅលើគ្រប់ស្ថានភាពផ្លូវ និងល្បឿន។

ការប្រើប្រាស់នូវថាមពលដែលចេញពីម៉ូទ័រថ្មអាគុយនឹងបន្តររហូតដល់ថាមពលថ្មអាគុយនោះស្ថិតនៅកម្រិតមួយដ៏ទាបបំផុត ទើបវាធ្វើការផ្លាស់ប្តូរទៅយកថាមពលដែលចេញពីម៉ាស៊ីនសាំងដើម្បីធ្វើការជំនួសវិញ។ អ្វីដែលជាផ្នែកមួយដ៏អស្ចារ្យរបស់រថយន្ត Plug-In Hybrid (PHEV) ដែលពុំមាននៅក្នុងរថយន្ត Hybrid (HEV) នោះគឺ ការបំពេញថាមពលថ្មឲ្យបានពេញវិញយ៉ាងរហ័ស តាមរយៈការបញ្ចូលថ្មពីប្រភពអគ្គីសនីតាមផ្ទះ ដែលវាមានលក្ខណៈដូចទៅនឹងការបញ្ចូលថ្មទូរស័ព្ទដៃរបស់យើងដែរ។

រថយន្តកូនកាត់សាំង-អគ្គិសនីថ្មតូច (Hybrid / HEV) គឺជាប្រភេទរថយន្តដែលប្រើប្រាស់កំលាំងថាមពលពីម៉ូទ័រថ្មអាគុយនៅពេលដែលរថយន្តនេះរត់នៅក្នុងរយៈល្បឿនយឺត។ នៅពេលដែលអ្នកបើកបរចង់បង្កើនល្បឿន រថយន្តនេះត្រូវការបន្ថែមថាមពល តាមរយៈការទាញយកថាមពលពីម៉ាស៊ីនដែលប្រើប្រាស់សាំង។ ការបង្កើនល្បឿននៃការបើកបរនេះនឹងធ្វើឲ្យរថយន្តផ្លាស់ប្តូរពីការប្រើប្រាស់ថាមពលថ្មអាគុយ ទៅប្រើប្រាស់ថាមពលពីម៉ាស៊ីនសាំងវិញ។ លើសពីនេះប្រសិនបើរថយន្តត្រូវការថាមពលច្រើនក្នុងពេលបើកបរ ដូចជាការបើកបរឡើងទីទួល ទាំងម៉ូទ័រថ្មអាគុយ និងម៉ាស៊ីនសាំងនឹងត្រូវបានប្រើប្រាស់ ដើម្បីឱ្យមានថាមពលគ្រប់គ្រាន់សំរាប់ស្ថានភាពផ្លូវបែបនេះ។

April 11, 2024

សូរ្យគ្រាសពេញវង់តែមួយគត់ក្នុងឆ្នាំ 2024 មានរយៈពេល 5 នាទី

សូរ្យគ្រាសពេញវង់ (ពេញលេញ) លើកនេះ ដែលនឹងបង្ហាញខ្លួនពីតំបន់មាត់សមុទ្រប៉ាស៊ីហ្វិករបស់ប្រទេសម៉ិកស៊ិក នៅវេលាម៉ោង 11 និង 07 នាទី ថ្ងៃទី 08 មេសា ត្រូវនឹងម៉ោង 01 និង 07 នាទី ថ្ងៃទី 09 មេសានៅកម្ពុជា គឺជាសូរ្យគ្រាសដែលយូរបំផុតនៅលើដីគោគ ក្នុងរង្វង់ជាងមួយទសវត្សរ៍កន្លងមកនេះ។

នេះគឺជាសូរ្យគ្រាសពេញវង់ដែលអូសបន្លាយវែងបំផុតនៅសហរដ្ឋអាម៉េរិក រាប់ចាប់ពីឆ្នាំ 1860។ នេះក៏ជាសូរ្យគ្រាសពេញវង់ដែលងងឹតបំផុតនៅសហរដ្ឋអាម៉េរិក ក្នុងរង្វង់ 217 ឆ្នាំកន្លង។

អ្វីដែលពិសេសជាងគេ នោះគឺថា ក្នុងពេលបាតុភូតខាងលើកើតឡើង មនុស្សម្នាក៏អាចមើលឃើញផ្កាយដុះកន្ទុយ 12P/Pons-Brooks ផងដែរ។

សូមស្វែងយល់បន្ថែមនៅទីនេះ

April 8, 2024

កាត់បន្ថយកម្ដៅលើផែនដី ដោយការបាញ់អំបិលទៅកាន់អាកាស

កាលពីពេលថ្មីៗនេះ បច្ចេកវិទ្យាបង្កើនពន្លឺពពក ត្រូវបានធ្វើតេស្តជាលើកដំបូង ក្នុងបរិយាកាសខាងក្រៅ នៅសហរដ្ឋអាម៉េរិក។

ព្រឹកថ្ងៃទី 3 មេសា ឆ្នាំ 2024 ប្រព័ន្ធម៉ាស៊ីនបាញ់ភាគល្អិតអំបិល អមនឹងបច្ចេកវិទ្យាឆ្លាតវៃជាច្រើន ទៀត ត្រូវបានដំឡើងលើនាវា Hornet។ ផ្សែងភាគល្អិតអំបិលក៏ត្រូវបានបាញ់ឡើងទៅក្នុងអាកាសជាលើកដំបូង។ ការសាកល្បងនេះនឹងបើកផ្លូវសម្រាប់បច្ចេកវិទ្យាមួយដ៏មានសក្ដានុពល ជួយកាត់បន្ថយស្ថានភាពកើនឡើងកម្ដៅនៅទូទាំងសកលលោក។

វិធីសាស្ត្រនេះជួយឱ្យពពកមានពន្លឺជាងធម្មតា និងចាំងប្លាតវិទ្យុសកម្មព្រះអាទិត្យឱ្យត្រលប់ទៅកាន់ទីអវកាសបានច្រើនជាងមុន ដែលនេះនឹងជួយឱ្យផែនដីបានត្រជាក់ជាងមុន។ នេះបើតាមសារព័ត៌មាន New York Times។

យោងតាម New York Times ក្រុមអ្នកវិទ្យាសាស្ត្រនឹងត្រូវចំណាយពេលច្រើនខែដើម្បីវិភាគ។ ក៏ប៉ុន្តែ លទ្ធផលនៃការវិភាគនឹងជួយឱ្យអ្នកវិទ្យាសាស្ត្រដឹងថា តើបច្ចេកទេសបង្កើនពន្លឺពពកលើមហាសមុទ្រ មានប្រសិទ្ធភាព ឬអត់។ Robert Wood ប្រធានក្រុមស្រាវជ្រាវអំពីសមុទ្រប្រចាំសាកលវិទ្យាល័យ Washington ឱ្យដឹងដូច្នេះ។

Robert Wood យល់ថា អ្នកវិទ្យាសាស្ត្រអាចនឹងត្រូវចំណាយពេលមួយទសវត្សរ៍បន្ថែមទៀត ដើម្បីសាកល្បងបច្ចេកវិទ្យានេះ មុននឹងប្រើប្រាស់បច្ចេកវិទ្យាបង្កើនពន្លឺពពកទ្រង់ទ្រាយធំជាផ្លូវការ ដើម្បីបញ្ចុះកម្ដៅផែនដី៕

April 8, 2024

អាម៉េរិកនឹងអភិវឌ្ឍយានផ្គត់ផ្គង់ឥន្ធនៈនៅលើគន្លងតារាវិថីផែនដី

យាន APS-R នឹងផ្គត់ផ្គង់សេវាកម្មចាក់ប្រេងឥន្ធនៈសម្រាប់បណ្ដាយានសមស្រប នៅលើគន្លងតារាវិថីជុំវិញផែនដី កម្ពស់ប្រហែល 35,800 គីឡូម៉ែត្រ ពីលើខ្សែអេក្វាទ័រ។

នៅលើគន្លងតារាវិថីផែនដី មានផ្កាយរណប និងយានអវកាសរាប់ពាន់ ប៉ុន្តែពួកវាសុទ្ធតែប្រឈមនឹងបញ្ហាធំមួយ នោះគឺ «ឆាប់អស់ឥន្ធនៈ»។ បញ្ហានេះតែងតែបណ្ដាលឱ្យផ្កាយរណបត្រូវឈប់ដំណើរការ បើទោះឧបករណ៍នានានៅមានស្ថានភាពល្អ។

ដើម្បីដោះស្រាយបញ្ហានេះ វិទ្យាស្ថានស្រាវជ្រាវភាគនិរតី (SwRI) នៅសហរដ្ឋអាម៉េរិក បានរៀបផែនការអភិវឌ្ឍយានអវកាសដែលអាចផ្គត់ផ្គង់សេវាចាក់ឥន្ធនៈនៅទីអវកាស។ ពួកគេនឹងអភិវឌ្ឍយានអវកាសគំរូដែលមានឈ្មោះថា Astroscale Prototype Servicer for Refueling (APS-R) ដើម្បីផ្គត់ផ្គង់ប្រេងឥន្ធនៈសម្រាប់យានសមស្រប នៅលើគន្លងតារាវិថីជុំវិញផែនដី កម្ពស់ប្រហែល 35,800 គីឡូម៉ែត្រ ពីខាងលើខ្សែអេក្វាទ័រ។

APS-R នឹងគោចរទៅតាមគន្លងគោចរមូលដែលស្របនឹងរង្វិលជុំរបស់ផែនដី។ យានអវកាសនេះនឹងដឹកជញ្ជូនឥន្ធនៈ hydrazine ពីស្ថានីយ ទៅកាន់ផ្កាយរណបដែលត្រូវការឥន្ធនៈ។ វាអាចផ្ដល់សេវាកម្មសម្រាប់រាល់យានអវកាសដែលមានរន្ធបញ្ចូលឥន្ធនៈសមស្របនឹងក្បាលទូយោរបស់យាន APS-R។

SwRI កំណត់គោលដៅអភិវឌ្ឍយានដឹកជញ្ជូនដើម្បីនាំ APS-R ឡើងទៅកាន់ទីអវកាស ក្នុងរយៈពេល 16 ខែទៀត។

នៅពេលដំណាក់កាលរចនា និងអភិវឌ្ឍយានដឹកជញ្ជូនត្រូវបានធ្វើឡើងរួចរាល់ SwRI នឹងបញ្ចូលទំនិញដែល Astroscale ផ្គត់ផ្គង់ ហើយធ្វើការសាកល្បងបរិស្ថាន ដើម្បីត្រៀមសម្រាប់ការបាញ់បង្ហោះ។ យោងតាម Interesting Engineering យាន APS-R គ្រោងនឹងត្រៀមខ្លួនរួចរាល់សម្រាប់ការបាញ់បង្ហោះនៅក្នុងឆ្នាំ 2026៕

April 4, 2024

Tag: សហរដ្ឋ​អាម៉េរិក

Tag: សហរដ្ឋអាម៉េរិក