របួស - La Reine Media

កុមារបួននាក់វង្វេងក្នុងព្រៃអាម៉ាហ្សូនអស់ 17 ថ្ងៃ ប៉ុន្តែសំណាងល្អនៅមានជីវិត

កងកម្លាំងជួយសង្គ្រោះបានរកឃើញកុមារបួននាក់ដែលបានបាត់ខ្លួនអស់រយៈពេល 17 ថ្ងៃ ក្រោយពីជួបគ្រោះថ្នាក់ធ្លាក់យន្តហោះនៅក្នុងព្រៃអាម៉ាហ្សូន ដែលស្ថិតក្នុងប្រទេសកូឡុំប៊ី។

កាលពីថ្ងៃទី 01 ឧសភា យន្តហោះ Cessna 206 មួយគ្រឿង ដឹកមនុស្ស 7 នាក់ បានជួបគ្រោះថ្នាក់នៅពេលធ្វើដំណើរពី Araracuara ទៅកាន់ San Jose del Guaviare ជាទីក្រុងមួយស្ថិតក្នុងតំបន់ព្រៃអាម៉ាហ្សូននៅក្នុងប្រទេសកូឡុំប៊ី។ សាកសពមនុស្សបីនាក់ ក្នុងនោះក៏មានពីឡុត ត្រូវបានរកឃើញនៅកន្លែងកើតហេតុ។

ការស្រាវជ្រាវបានបង្ហាញថា កុមារបួននាក់ដែលមានអាយុ 4, 9, 13 ឆ្នាំ និងទារកអាយុ 11 ខែម្នាក់ ស្ថិតក្នុងសហគមន៍ជនជាតិដើម Huitolo នៅមានជីវិត នៅក្នុងហេតុការណ៍ធ្លាក់យន្តហោះខាងលើ និងបានចូលទៅក្នុងព្រៃដើម្បីស្វែងរកអាហារ និងជំនួយ។ អាជ្ញាធរក្នុងតំបន់ក៏បានបើក «យុទ្ធនាការនៃក្ដីសង្ឃឹម» ដោយបញ្ជូនកម្លាំងទាហានជាង 100 នាក់ និងឧទ្ធម្ភាគចក្របីគ្រឿង រួមនឹងសុនកពិសេស ចូលទៅព្រៃស្វែករកជនរងគ្រោះ។

«នៅក្នុងការប្រឹងប្រែងមិនឈប់ឈរ កងទ័ពបានរកឃើញក្មេងបួននាក់ដែលបានបាត់ខ្លួនក្រោយហេតុការណ៍ធ្លាក់យន្តហោះនៅ Guaviare» ប្រធានាធិបតីកូឡុំប៊ី Gustavo Petro ប្រកាសលើ Twitter កាលពីថ្ងៃទី17 ឧសភាដូច្នេះ ហើយថា ការរកឃើញនេះគឺជា «ភាពរីករាយសម្រាប់ប្រទេសជាតិ»។

តំបន់ដែលក្មេងទាំងបួននាក់បានវង្វេង មិនមានផ្លូវល្បឿនលឿន ហើយក៏ពិបាកទៅដល់តាមរយៈផ្លូវទឹក។ ដើមឈើធំៗ កម្ពស់រហូតដល់ 40 ម៉ែត្រ រួមនឹងសត្វព្រៃ និងភ្លៀងធំក៏ធ្វើឱ្យកម្លាំងសង្គ្រោះជួបការលំបាកខ្លាំង។

មួយក្នុងចំណោមឧទ្ធម្ភាគទាំងបីគ្រឿងបំពាក់ឧបករណ៍បំពងសំឡេង បានធ្វើការស្វែងរកក្នុងរង្វង់ 1,500 ម៉ែត្រ និងបានចាក់ផ្សាយសំឡេងជីដូនរបស់ក្មេងទាំងនោះ ដែលប្រាប់ថា «ឈប់ផ្លាស់ទីក្នុងព្រៃដើម្បីរង់ចាំការជួយសង្គ្រោះ»។

សកម្មភាពស្វែងរកត្រូវបានបន្ថែម បន្ទាប់ពីកម្លាំងសង្គ្រោះបានឃើញកូនខ្ទមមួយ ដែលគេជឿថា គឺជាខ្ទមរបស់ក្មេងទាំងនោះ។ មុននោះ កម្លាំងសង្គ្រោះបានរកឃើញដបទឹកដោះគោសម្រាប់ទារក និងផ្លែឈើសល់ពីការហូប។

ក្មេងរងគ្រោះទាំងបួននាក់នេះត្រូវបានរកឃើញក្នុង «ស្ថានភាពសុខភាពធម្មតា បើទោះមានរបួសស្នាមខ្លះ» ក្រោយពីរង្វេង 17 ថ្ងៃនៅក្នុងព្រៃ។

អាជ្ញាធរមិនទាន់ប្រកាសអំពីមូលហេតុនៃករណីធ្លាក់យន្តហោះនេះនៅឡើយ។ ប៉ុន្តែ ប៉ុន្មាននាទីមុនពេលជួបគ្រោះថ្នាក់ ពីឡុតបានបញ្ជូនសញ្ញាប្រាប់ថា ម៉ាស៊ីនយន្តហោះមានបញ្ហា។ ជនជាតិកូឡុំប៊ី នៅក្នុងតំបន់ខាងលើនេះ តែងតែធ្វើដំណើរតាមឧទ្ធម្ភាគចក្រ ដោយសារតែផ្លូវគោកមិនមានអំណោយផលល្អសម្រាប់ការធ្វើដំណើរ។

យោងតាមអង្គការជនជាតិដើមភាគតិចកូឡុំប៊ី (ONIC) ជីវភាពរបស់ជនជាតិ Huitoto បានសម្របខ្លួននឹងស្ថានភាពលំបាកនៅក្នុងព្រៃអាម៉ាហ្សូន និងថែរក្សាប្រពៃណីបរបាញ់សត្វ ក៏ដូចជាមានជំនាញក្នុងការបេះផ្លែឈើក្នុងព្រៃជាអាហារ៕

May 18, 2023

កីឡាករថៃ៖ «អាជ្ញាកណ្ដាលគឺជាដើមហេតុនៃភាពច្របូកច្របល់ក្នុងវគ្គផ្ដាច់ព្រ័ត្រនៅស៊ីហ្គេម»

ខ្សែការពាររបស់ក្រុមបាល់ទាត់ជម្រើសជាតិថៃ Jonathan Khemdee យល់ថា អាជ្ញាកណ្ដាលបង្កឱ្យមានកំហុសឆ្គងធំជាច្រើន នាំទៅរកជម្លោះរវាងក្រុមជម្រើសជាតិថៃ និងឥណ្ឌូណេស៊ី នៅវគ្គផ្ដាច់ព្រ័ត្រនៃវិញ្ញាសាបាល់ទាត់បុរសនៅស៊ីហ្គេមលើកទី 32។

កាលពីព្រលប់ថ្ងៃទី 16 ឧសភា នៅលើទីលានបាល់ទាត់របស់ពហុកីឡដ្ឋានជាតិអូឡាំពិក សមាជិកក្រុមកីឡាថៃ និងឥណ្ឌូណេស៊ី បានប៉ះទង្គិចគ្នាពីរលើក។ ពិសេសគឺការប្រវាយប្រតប់គ្នានៅក្រោយការស៊ុតបញ្ចូលទីរបស់កីឡាករ Irfan Jauhari ជួយឱ្យឥណ្ឌូណេស៊ី នាំមុខ 3-2 នៅដើមនារីថែមម៉ោងលើកទីមួយ នាំឱ្យអាជ្ញាកណ្ដាលពិន័យកាត់ក្រហមដោយផ្ទាល់ចំនួនប្រាំចំពោះភាគីទាំងពីរ។

ក្រោយការប្រកួត Jonathan Khemdee បានប្រាប់អ្នកយកព័ត៌មានថា «អាជ្ញាកណ្ដាលបង្កកំហុសធំជាច្រើន ហើយនោះគឺជាមូលហេតុដែលនាំឱ្យមានករណីប្រវាយប្រតប់គ្នា។ អាជ្ញាកណ្ដាលមិនអាចគ្រប់គ្រងការប្រកួត ដូច្នេះគ្រប់គ្នាក៏រុលទៅរកគ្នា និងវាយគ្នា»។

យោងតាមខ្សែការពារកណ្ដាលដើមកំណើតដាណឺម៉ាកខាងលើ កំហុសធំបំផុតរបស់អាជ្ញាកណ្ដាលស្ថិតនៅត្រង់គ្រាប់បាល់ចាញ់ទីពីររបស់ថៃ។ នាទីទីប្រាំនៃការថែមម៉ោងក្នុងតង់ទីមួយ កីឡាករឥណ្ឌូណេស៊ីម្នាក់រងរបួសត្រង់ក្បាល ទើបអាជ្ញាកណ្ដាលផ្លុំកញ្ចែផ្អាកការប្រកួត គ្រាដែលគ្រាប់បាល់មិនបានទៅខាងណា។ បន្ទាប់ពីកីឡាករឥណ្ឌូណេស៊ីត្រូវគេសែងចេញ អាជ្ញាកណ្ដាលក៏ប្រគល់បាល់ឱ្យប្រធានក្រុម Rizky Ridho របស់ឥណ្ឌូណេស៊ី ពេលដែលកីឡាកររបស់ថៃ មិនត្រូវបានអនុញ្ញាតឱ្យដណ្ដើមបាល់ភ្លាម។ Rodho បញ្ជូនបាល់ឡើងដល់ក្បែរតំបន់គ្រោះថ្នាក់របស់ថៃ ហើយខ្សែប្រយុទ្ធ Ramadhan Sananta ក៏ទាត់បាល់រំលងក្បាលអ្នកចាំទី Soponwit Rakyart ធ្វើឱ្យបាល់ហោះចូលទី ជួយឱ្យឥណ្ឌូណេស៊ីនាំមុខ 2-0។

ក្រុមកីឡាករថៃ ភ្លាមនោះក៏បានតវ៉ាទៅកាន់អាជ្ញាកណ្ដាលជនជាតិអូម៉ង់ Kassem Matar Al-Hatmi ព្រោះពួកគេយល់ថា Ridho គួរតែប្រគល់បាល់មកឱ្យថៃ។ ប៉ុន្តែ លោក Al-Hatmi នៅតែទទួលស្គាល់គ្រាប់បាល់នេះបន្ទាប់ពីផ្លាស់ប្ដូរយោបល់ជាមួយអាជ្ញាកណ្ដាលខ្សែបន្ទាត់។

ក្នុងការថែមម៉ោងនៅតង់ទីពីរ សំឡេងកញ្ចែរបស់អាជ្ញាកណ្ដាលក៏បានធ្វើឱ្យក្រុមឥណ្ឌូណេស៊ីយល់ច្រលំថាអស់ម៉ោងប្រកួត ទើបនាំគ្នារត់ចូលទីលានអបអរសាទរ គ្រាដែលសំឡេងកញ្ចែនោះគឺជាការពិន័យចំពោះក្រុមឥណ្ឌូណេស៊ី។ ស្ថានការណ៍នេះបាននាំទៅរកគ្រាប់បាល់ស្មើ 2-2 ដោយកីឡាករថៃបានស៊ុតបញ្ចូលទីរបស់ឥណ្ឌូណេស៊ី។ បន្ទាប់ពីស៊ុតចូលភ្លាម កីឡាករថៃក៏រត់ទៅខាងមុខតំបន់អ្នកគាំទ្រឥណ្ឌូណេស៊ីដើម្បីសំដែងការអបអរ ឌឺដង ហើយក៏មានការប៉ះទង្គិចគ្នាមួយប្រាវ។

ចូលដល់តង់ទីពីរ បន្ទាប់ពីរកបានមួយគ្រាប់ទៀតដែលជួយឱ្យនាំមុខ 3-2 ឥណ្ឌូណេស៊ីក៏អបអរសងសឹក ហើយក៏មានការប្រវាយប្រតប់គ្នាជាថ្មី ធ្វើឱ្យការប្រកួតត្រូវអាក់ខានច្រើននាទី។ ពេលនោះ កាត់ក្រហមជាច្រើនក៏ត្រូវបានហូតចេញជាបន្តបន្ទាប់។

បន្ទាប់ពីស្ថានការណ៍ត្រូវបានគ្រប់គ្រង ថៃក៏ត្រូវបាត់បង់កីឡាករពីររូបដោយសារកាត់ក្រហម។ ដោយមានគ្នាតែ 9 នាក់ ក្រុមថៃក៏ត្រូវចាញ់ 2 គ្រាប់ទៀត នាំឱ្យឥណ្ឌូណេស៊ីឈ្នះ 5-2 ជាស្ថាពរ។

ភាពច្របូកច្របល់ក្នុងវគ្គផ្ដាច់ព្រ័ត្រនៅស៊ីហ្គេម

«គ្រប់ស្ថានការណ៍ អាជ្ញាកណ្ដាលត្រូវតែរក្សាឥរិយាបថយុត្តិធម៌ ប៉ុន្តែការប្រកួតនេះ អាជ្ញាកណ្ដាលមិនអាចធ្វើបាន» Khemdee អះអាងដូច្នេះ។

ទោះជាយ៉ាងណាក៏ដោយ នៅពេលចប់ការប្រកួត ក្រុមទាំងពីរក៏ពុំមានបញ្ហាអ្វីនឹងគ្នាទៀតនោះដែរ។ នេះគឺជាបទពិសោធន៍ដែលគួរយកជាមេរៀន ដែលយើងមិនគួរឱ្យមានករណីបែបនេះកើតឡើង ព្រោះវាប៉ះពាល់ដល់អ្នកគាំទ្រ និងកីឡាករផងដែរ។ ប៉ុន្តែ បរាជ័យលើកនេះ ធ្វើឱ្យថៃ ខកខានក្នុងការលើកមេដាយមាសនៅស៊ីហ្គេមចំនួនបីជំនាន់បន្តបន្ទាប់ ខណៈដែល U22 ឥណ្ឌូណេស៊ី ដណ្ដើមបានមេដាយមាសលើកទីបីនៅស៊ីហ្គេម៕

May 17, 2023

ក្រុមបាល់ទាត់នារីកម្ពុជាអាចដណ្ដើមបានមេដាយសំរឹទ្ធឬទេ ពេលប៉ះថៃនៅល្ងាចនេះ?

នៅចំពោះមុខក្រុមបាល់ទាត់នារីជម្រើសជាតិកម្ពុជាដែលត្រូវបានវាយតម្លៃថាខ្សោយជាង ក្រុមនារីថៃទំនងជាអាចប្រើប្រាស់ចំណុចនេះដើម្បីដណ្ដើមមេដាយសំរឹទ្ធនៅក្នុងវិញ្ញាសាបាល់ទាត់នារីរបស់ស៊ីហ្គេមលើកទី 32។

មកដល់បច្ចុប្បន្ន ទាំងក្រុមបាល់ទាត់នារីកម្ពុជា ទាំងក្រុមថៃ ពុំមានករណីរងរបួសណាមួយឡើយ នៅមុនការប្រកួតចុងក្រោយរបស់វិញ្ញាសាបាល់ទាត់នារី ដែលនឹងត្រូវធ្វើឡើងនៅល្ងាចនេះ។

សមត្ថភាពរបស់ក្រុមបាល់ទាត់នារីកម្ពុជានាពេលថ្មីៗនេះ៖

ជាលើកដំបូងដែលបានឡើងដល់វគ្គពាក់កណ្ដាលផ្ដាច់ព្រ័ត្រ ក្រុមនារីកម្ពុជាមិនអាចផ្ដួលក្រុមខ្លាំងវៀតណាម (ម្ចាស់មេដាយមាស 8 លើកនៅស៊ីហ្គេម) តែត្រូវចាញ់ 0-4 បើទោះកម្ពុជាបានយកឈ្នះលើឡាវ 2-0 នៅជើងទីមួយ និងឈ្នះសង្ហបុរី 1-0 នៅជើងទីពីរនៃវគ្គចែកពូល ខណៈដែលក្រុមថៃត្រូវមានសមត្ថភាពប្រហាក់ប្រហែលនឹងក្រុមវៀតណាម។ ប្រការនេះបង្ហាញថា កម្ពុជាកំពុងចាញ់ប្រៀបថៃនៅមុនការប្រកួតដណ្ដើមមេដាយសំរឹទ្ធ។

សមត្ថភាពរបស់ក្រុមបាល់ទាត់នារីថៃនាពេលថ្មីៗនេះ៖

ក្រុមបាល់ទាត់នារីថៃ និងកម្ពុជាសុទ្ធតែបានចាញ់នៅវគ្គពាក់កណ្ដាលផ្ដាច់ព្រ័ត្រនៅស៊ីហ្គេមលើកនេះ។ ប៉ុន្តែ បរាជ័យរបស់ក្រុមថៃ ពិតជាពិបាកទទួលយកជាងបើធៀបនឹងបរាជ័យរបស់ក្រុមនារីកម្ពុជា។ ក្រុមថៃបាននាំមុខមីយ៉ាន់ម៉ាពីរគ្រាប់តាំងពីដើមទី។ ប៉ុន្តែចុងក្រោយ ក្រុមថៃបែរជាបណ្ដោយឱ្យចាញ់មីយ៉ាន់ម៉ា 2-4 ទៅវិញ។ ក៏ប៉ុន្តែ បន្ទាប់ពីបរាជ័យនៅវគ្គពាក់កណ្ដាលផ្ដាច់ព្រ័ត្រ ក្រុមនារីថៃប្រាកដជាចង់ស្រោចស្រង់កិត្តិយសរបស់ខ្លួនឡើងវិញ ដោយការយកឈ្នះលើក្រុមនារីកម្ពុជា នៅក្នុងការប្រកួតដណ្ដើមមេដាយសំរឹទ្ធ។ ជាងនេះ ថៃក៏កំពុងមានប្រៀបផងដែរ នៅពេលបានផ្ដួលកម្ពុជា 3-0 នៅក្នុងការប្រកួតជើងចុងក្រោយនៃវគ្គចែកពូល កាលពីថ្ងៃទី 09 ឧសភា។

ដូច្នេះ ការនិយាយថា ក្រុមនារីថៃនឹងឈ្នះក្រុមនារីកម្ពុជា នៅក្នុងការប្រកួតដណ្ដើមមេដាយសំរឹទ្ធដែលនឹងធ្វើឡើងនៅវេលាម៉ោង 16 ថ្ងៃទី 15 ឧសភានេះ គឺជារឿងធម្មតា ប៉ុន្តែបើសិនក្រុមនារីកម្ពុជាឈ្នះវិញ នោះគឺជារឿងដ៏អស្ចារ្យ។ Admin ជឿថា ក្រុមបាល់ទាត់នារីថៃ អាចឈ្នះក្រុមនារីកម្ពុជា ដោយលទ្ធផល 3-1 តែសូមជូនពរឱ្យក្រុមកម្ពុជាឈ្នះ 1-0៕

May 15, 2023

រុស្ស៊ី ប្រារព្ធពិធីដង្ហែព្យុហយាត្រាអបអរជ័យជម្នះនៅថ្ងៃនេះ

ព្រឹត្តិការណ៍ដង្ហែក្បួនព្យុហយាត្រាអបអរជ័យជម្នះរបស់រុស្ស៊ី គ្រោងនឹងធ្វើឡើងនៅល្ងាចនេះនៅឯទីលានក្រហម ដោយមានការចូលរួមរបស់ទាហានរុស្ស៊ីជាង 10,000 នាក់ រួមនឹងអាវុធនានារបស់ប្រទេសនេះ។

ពិធីដង្ហែក្បួនព្យុហយាត្រាអបអរជ័យជម្នះ 78 ឆ្នាំនៃថ្ងៃកងទ័ពក្រហមសូវៀត បានផ្ដួលរំលំរបបហ្វាស៊ីសអាល្លឺម៉ង់ បញ្ចប់សង្គ្រាមស្នេហាជាតិដ៏អស្ចារ្យ (Great Patriotic War) នេះ នឹងធ្វើឡើងនៅវេលាម៉ោង 10 ថ្ងៃទី 09 ឧសភា (ម៉ោងប្រហែល 14 នៅកម្ពុជា) នៅទីលានក្រហម (Red Square) ក្នុងរដ្ឋធានីមូស្គូ។ ទាហានរុស្ស៊ីជាង 10,000 នាក់ រួមនឹងអង្គភាពអាវុធចំនួន 125 នឹងចូលរួមពិធីខាងលើនេះ។

ប្រធានាធិបតីរុស្ស៊ី លោក ពូទីន រួមនឹងមេដឹកនាំប្រទេសមួយចំនួន ក្នុងនោះមាន បេឡារុស អាមេនី កៀហ្ស៊ីស៊ីស្ថាន តាហ្ស៊ីគីស្ថាន អ៊ូសបេគីស្ថាន និងកាហ្សាក់ស្ថានជាដើម នឹងបង្ហាញវត្តមាននៅក្នុងព្រឹត្តិការណ៍នេះផងដែរ។

ពិធីដង្ហែព្យុហយាត្រាអបអរជ័យជម្នះនៅក្នុងឆ្នាំនេះរបស់រុស្ស៊ី ធ្វើឡើងក្នុងស្ថានការណ៍សន្តិសុខត្រូវបានរឹតបន្តឹងខ្លាំងនៅទូទាំងប្រទេស បន្ទាប់ពីមានការវាយប្រហារពីយន្តហោះគ្មានមនុស្សបើកបរ (UAV) ទៅលើហេដ្ឋារចនាសម្ព័ន្ធជាច្រើនករណី គ្រាដែលកងទ័ពប្រទេសនេះកំពុងឈ្លានពានទឹកដីអ៊ុយក្រែន។

សង្គ្រាមស្នេហាជាតិដ៏អស្ចារ្យ (1941-1945) គឺជាសង្គ្រាមធំបំផុត និងបង្កឱ្យមានមនុស្សស្លាប់ និងរបួសច្រើនបំផុតក្នុងប្រវត្តិសាស្ត្រមនុស្សជាតិ ក្នុងនោះមានទាហាន និងប្រជាជនសូវៀត ប្រហែល 27 លាននាក់បានបាត់បង់ជីវិតដើម្បីការពារប្រទេស និងមនុស្សជាតិពីពួកហ្វាស៊ីសនិយម។

សង្គ្រាមនេះបានបញ្ចប់នៅថ្ងៃទី 09 ឧសភា 1945 នៅពេលតំណាងហ្វាស៊ីសអាល្លឺម៉ង់ ចុះហត្ថលេខាទទួលស្គាល់ការចុះចាញ់ដោយគ្មានលក្ខខណ្ឌនៅចំពោះមុខតំណាងសម្ព័ន្ធមិត្តនៅបែរឡាំង។ កងទ័ពក្រហមសូវៀតបានប្រារព្ធពិធីដង្ហែក្បួនព្យុហយាត្រាអបអរជ័យជម្នះជាលើកដំបូងកាលពីថ្ងៃទី 24 មិថុនា 1945។ ក្រោយមក ព្រឹត្តិការណ៍នេះក៏ត្រូវបានធ្វើឡើងនៅថ្ងៃទី 09 ឧសភា ក្នុងឆ្នាំ 1965, 1985 និង 1990។

ក្រោយពីសូវៀតបានដួលរលំ រុស្ស៊ីក៏បានប្រារព្ធពិធីនេះឡើងវិញនៅមូស្គូចាប់ពីឆ្នាំ 1995។ ចាប់តាំងពីពេលនោះមក ព្រឹត្តិការណ៍នេះក៏ត្រូវបានធ្វើឡើងជារៀងរាល់ឆ្នាំនៅថ្ងៃទី 09 ឧសភា។ ក៏ប៉ុន្តែ កាលពីឆ្នាំ 2020 ព្រឹតត្តិការណ៍នេះត្រូវបានលើកទៅធ្វើនៅថ្ងៃទី 24 មិថុនា ដោយសារតែវិបត្តិកូវីដ-19៕

May 9, 2023

តួកគីប្រកាសព័ត៌មានលម្អិតថ្មីបំផុតស្ដីពីយុទ្ធនាការកម្ចាត់មេដឹកនាំកំពូលរបស់ «រដ្ឋអ៊ីស្លាម (IS)»

ប្រទេសតួកគីបានប្រកាសអំពីយុទ្ធនាការបួនម៉ោងនៅប្រទេសស៊ីរី ដើម្បីកំណត់ទីតាំង និងកម្ចាត់មេបញ្ជាការកំពូលបច្ចុប្បន្នរបស់ក្រុមភេរវកម្មរដ្ឋអ៊ីស្លាម (Islamic State)។

បណ្ដាផ្សព្វផ្សាយរបស់រដ្ឋតួកគី កាលពីថ្ងៃទី 01 ឧសភា បានបញ្ចេញរូបថតថ្មីបំផុតស្ដីពីផ្ទះដ៏រឹងមាំស្ថិតនៅកណ្ដាលវាលស្រែនៃខេត្ត Afrin ប្រទេសស៊ីរី ជាទីដែលកម្លាំងពិសេសរបស់តួកគីបានធ្វើការវាយប្រហារកម្ចាត់មេបញ្ជាការកំពូលរបស់ក្រុមភេរវកររដ្ឋអ៊ីស្លាម (Islamic State) Abu al-Hussein al-Husseini al-Qurashi។

ទីភ្នាក់ងារសារព័ត៌មាន Anadolu បានឱ្យដឹងថា ក្រោយពីបានកំណត់ទីតាំងផ្ទះនេះ ដែលជាកន្លែងស្នាក់នៅរបស់ Qurashi ស្ថាប័នស៊ើបការណ៍សម្ងាត់របស់តួកគី (MIT) ក៏បានធ្វើយុទ្ធនាការរយៈពេលបួនម៉ោងក្នុងថ្ងៃទី 29 មេសា ដើម្បីឡោមព័ទ្ធមេភេរវករ។

MIT បានបំផ្ទុះជញ្ជាំងជុំវិញផ្ទះ មុននឹងសម្រុកចូលតាមច្រកទ្វារខាងក្រោយ និងតាមបង្អួច។ រូបភាពដែលត្រូវបានបញ្ចេញបង្ហាញថា មួយផ្នែករបស់ផ្ទះពីរជាន់នេះបានខូចខាតច្រើន។

មេបញ្ជាការកំពូលរបស់ក្រុមភេរវកម្មរដ្ឋអ៊ីស្លាម (Islamic State) Abu al-Hussein al-Husseini al-Qurashi

Qurashi បានចុចបំផ្ទុះគ្រាប់បែកអត្តឃាតនៅពេលដឹងថា ខ្លួនជិតត្រូវបានគេចាប់។ ក្នុងការវាយលុកនេះ ភាគីខាងតួកគីពុំមានអ្នកស្លាប់ ឬរងរបួសនោះទេ។

ប្រធានាធិបតីតួកគី Recep Tayyip Erdogan កាលពីថ្ងៃទី 30 មេសា បានប្រកាសថា កម្លាំងស៊ើបការណ៍សម្ងាត់របស់ប្រទេសនេះបានកម្ចាត់ Qurashi នៅក្នុងយុទ្ធនាការមួយនៅប្រទេសស៊ីរី។

Qurashi គឺជាមេបញ្ជាការកំពូលទីបួនរបស់ IS ដែលត្រូវបានតែងតាំងកាលពីខែវិច្ឆិកា 2022 បន្ទាប់ពីការស្លាប់របស់មេដឹកនាំកំពូល Abu al-Hassan al-Hashemi al-Quraishi។ Qurashi បានចូលក្រុម IS ក្នុងឆ្នាំ 2013 និងបានទទួលការតែងតាំងជាបន្តបន្ទាប់យ៉ាងឆាប់រហ័សនៅក្នុងក្រុមភេរវករ។

ផ្ទះរបស់មេភេរវករ រដ្ឋអ៊ីស្លាម (Islamic State) Abu al-Hussein al-Husseini al-Qurashi

តួកគីបានបញ្ជូនទ័ពទៅកាន់ភាគខាងជើងប្រទេសស៊ីរីតាំងពីឆ្នាំ 2020 និងគ្រប់គ្រងតំបន់ដ៏ធំមួយដោយមានការជួយគាំទ្រពីបណ្ដាក្រុមបះបោរនៅប្រទេសស៊ីរី៕

May 2, 2023

ក្រុមបាល់ទាត់ U-22 ថៃ ប្រកាសថា មិនខ្លាចអាជ្ញាកណ្ដាល បើទោះមិនមាន VAR

គ្រូបង្វឹករបស់ក្រុមបាល់ទាត់បុរសជម្រើសជាតិអាយុក្រោម 22 ឆ្នាំ (U-22) របស់ប្រទេសថៃ បានអះអាងថា មិនព្រួយបារម្ភអំពីការងាររបស់ក្រុមអាជ្ញាកណ្ដាល បើទោះមិនមានជំនួយពីបច្ចេកវិទ្យា VAR នៅស៊ីហ្គេមលើកទី 32។

ដើម្បីត្រៀមខ្លួនឱ្យបានល្អបំផុតសម្រាប់ការប្រកួតនៅស៊ីហ្គេមលើកនេះ កាលពីល្ងាចថ្ងៃទី 28 មេសា ក្រុម U-22 ថៃ បានធ្វើការហ្វឹកហាត់ថ្ងៃទីពីរនៅឯកីឡដ្ឋានអគ្គិសនីកម្ពុជា (EDC) នៅរាជធានីភ្នំពេញ ក្រោមការដឹកនាំរបស់គ្រូបង្វឹក Issara Sritaro ។

នៅពេលត្រូវបានសួរអំពីការងាររបស់ក្រុមអាជ្ញាកណ្ដាលនៅស៊ីហ្គេមលើកនេះ គ្រូបង្វឹក Sritaro ឱ្យដឹងថា លោកមិនមានការព្រួយបារម្ភចំពោះអាជ្ញាកណ្ដាល បើទោះបច្ចេកវិទ្យា VAR ដែលជួយផ្ដល់ភាពសុក្រឹតដល់ការកាត់ក្ដីរបស់អាជ្ញាកណ្ដាល មិនត្រូវបានប្រើប្រាស់នៅក្នុងព្រឹត្តិការណ៍ប្រកួតកីឡាអាស៊ីអាគ្នេយ៍ឆ្នាំ 2023។

គ្រូបង្វឹករបស់ U-22 ថៃ និយាយថា «នោះគឺជាកត្តាខាងក្រៅ។ យើងមិនអាចគ្រប់គ្រងបាន ដូច្នេះ U-22 ថៃ នឹងមិនផ្ដោតអារម្មណ៍ច្រើនទៅលើអាជ្ញាកណ្ដាល»។ លោក Sritaro បន្ថែមថា «យើងមិនខ្លាច ហើយយើងនឹងប្រឹងប្រែងឱ្យអស់ពីសមត្ថភាព។ … កីឡាកររបស់យើងក៏ត្រូវបានរម្លឹកអំពីបញ្ហាមួយចំនួន មានដូចជា ការបង្កកំហុសនៅក្នុងតំបន់គ្រោះថ្នាក់ និងអកហ្សឺជាដើម»។

ទន្ទឹមនឹងបញ្ហាខាងលើ គ្រូបង្វឹកអាយុ 43 ឆ្នាំរបស់ U-22 ថៃ ក៏បានឱ្យដឹងថា លោកមិនពេញចិត្តចំពោះទីលានហ្វឹកហាត់ EDC ដែលម្ចាស់ផ្ទះកម្ពុជាផ្ដល់ឱ្យ U-22 ថៃ។ ក្រុមគ្រូបង្វឹកថៃក៏បានសម្រេចចិត្តស្វែងរកទីលានហ្វឹកហាត់ថ្មីដើម្បីមានលក្ខខណ្ឌល្អបំផុតសម្រាប់ U-22 ថៃ នៅស៊ីហ្គេម។

លោក Sritaro ពន្យល់ថា «ទីលានហ្វឹកហាត់ EDC ដែលម្ចាស់ផ្ទះផ្ដល់ជូន U-22 ថៃ ប្រើប្រាស់ស្មៅ carpet ខុសពីស្មៅ bermuda នៅកីឡដ្ឋានព្រីនស៍…។ ផ្ទៃរបស់ទីលាន EDC រឹងខ្លាំងពេក ដូច្នេះហានិភ័យរងរបួសរបស់កីឡាករក៏មានកម្រិតខ្ពស់។ យើងពិតជាព្រួយបារម្ភចំពោះបញ្ហានេះ»។

នៅស៊ីហ្គេមលើកទី 32 U-22 ថៃ ស្ថិតក្នុងពូល B ជាមួយនឹងវៀតណាម ម៉ាឡេស៊ី សិង្ហបុរី និងឡាវ។ ប្រធានសហព័ន្ធបាល់ទាត់ថៃ (FAT) បានដាក់គោលដៅឱ្យក្រុម U-22 ថៃ និងក្រុមបាល់ទាត់នារីជម្រើសជាតិប្រទេសនេះ ត្រូវដណ្ដើមឱ្យបានមេដាយមាសពីស៊ីហ្គេមនៅកម្ពុជា៕

April 29, 2023

ជំនឿ 5យ៉ាងក្នុងរឿងអាហារការហូបចុក របស់ស្ត្រីមានគភ៌

មានជំនឿជាច្រើន ពាក់ព័ន្ធនឹងរឿងអាហារការហូបចុក ក្នុងអំឡុងពេលមានគភ៌ថា ញ៉ាំអានេះទៅ វានឹងល្អ ឬញ៉ាំអានោះទៅ នឹងធ្វើឱ្យកូនខ្ពស់ កូនឆ្លាត កូនងាយកើត ឬស្រួលកើត ជាដើម-ល- តែជំនឿខ្លះ មិនមែនចេះតែត្រូវទាំងអស់នោះទេ ដូច្នេះថ្ងៃនេះ យើងនាំគ្នាមកពិនិត្យមើលថា តើរឿងដែលយើងជឿទាំងអស់នោះ វាជាការពិត ឬយ៉ាងណា?

ជំនឿថា ញ៉ាំហឹរពេក នឹងធ្វើឱ្យកូន មិនសូវមានសក់…

ការពិត៖ សក់របស់កូនតិច ឬច្រើននោះ វាស្ថិតនៅលើពូជ ឬហ្ស៊ែន របស់មនុស្សម្នាក់ៗ ចំណែកឯជំនឿ រឿងហាមញ៉ាំហឹរនេះ ប្រហែលជាមកពីខ្លាចស្ត្រីមានគភ៌ឈឺពោះ ពិបាកបន្ទោបង់ ឬមិនទេ ក៏ខ្លាចរាករូស ដែលនាំឱ្យមានផលប៉ះពាល់ដល់សុខភាពរបស់ស្ត្រីមានគភ៌ទៅវិញទេ ព្រោះនៅក្នុងអំឡុងពេលមានគភ៌ ប្រព័ន្ធរំលាយអាហារ នឹងខុសពីពេលមុនមានគភ៌ ដោយសារតែអ័រម៉ូនប្រែប្រួល ដែលអាចនឹងធ្វើឱ្យមានបញ្ហាក្នុងការបន្ទោបង់ ឬអាចធ្វើឱ្យកើតអាការឆ្អល់ពោះ និងរាករូសបានហ្នឹងឯង។

ជំនឿថា ញ៉ាំទឹកដូងច្រើន នឹងជួយឱ្យកូនមានសាច់ស្អាត និងលាងជម្រះជាតិខ្លាញ់តាមដងខ្លួន…

ការពិត៖ ការពិតទៅ ការដែលមានខ្លាញ់ជាប់នៅតាមដងខ្លួនទារកនោះ នឹងធ្វើឱ្យងាយស្រួលប្រសូត ព្រោះវាប្រៀបដូចជា ជាតិខ្លាញ់រំអិលស្រោបពីលើខ្លួនទារក ខណៈពេលប្រសូតចេញមកដូច្នោះដែរ។ ជាតិខ្លាញ់មួយនេះ ផលិតឡើងដោយកោសិកាស្បែករបស់ទារក និងក្រពេញជាតិខ្លាញ់នៅខាងក្រោមស្បែក ពេលអាយុគភ៌ រឹតតែច្រើនឡើង ជាតិខ្លាញ់នោះក៏នឹងកើតឡើងច្រើនតាមនោះដែរ។ ក្រៅពីនេះ ក្រោយពេលប្រសូតហើយថ្មីៗ ជាតិខ្លាញ់ដែលស្រោបខ្លួនប្រាណទារកនោះ នឹងជួយគ្រប់គ្រងសីតុណ្ហភាពរបស់កូនតូច មិនឱ្យធ្លាក់ចុះទាបជ្រុលពេកបានទៀតផង។ ដូច្នេះហើយទើបគ្រូពេទ្យបណ្តោយឱ្យជាតិខ្លាញ់ទាំងនោះ នៅជាប់នឹងខ្លួនទារកមួយរយៈសិន មុននឹងលាងចេញ នៅពេលប្រាកដក្នុងចិត្តហើយថា ទារកចាប់ផ្តើមគ្រប់គ្រងសីតុណ្ហភាពដោយខ្លួនឯងបានហើយ។ ការប្រញាប់លាងជាតិខ្លាញ់នោះចេញពេក អាចនឹងធ្វើឱ្យខ្លួនប្រាណកូនតូច ត្រជាក់ខុសធម្មតា និងអាចបង្កឱ្យមានបញ្ហាបាន។

ចំណែកឯទឹកដូងវិញ មានជាតិស្ករ និងសារធាតុអាស៊ីតខ្លាញ់កកច្រើន ពេលស្ត្រីមានគភ៌ញ៉ាំច្រើន អាចធ្វើឱ្យកូនមានមាឌធំ តែមិនសូវរឹងមាំ ហើយអ្នកម្តាយខ្លួនឯង ក៏កាន់តែមានភាពប្រឈមនឹងការកើតមានខ្លាញ់ញ៉ុកណែនក្នុងសរសៃឈាមខ្លាំងដែរ ដូច្នេះបើទម្ងន់ខ្លួន កើនឡើងច្រើនហើយ គួរតែផ្អាកញ៉ាំទឹកដូងមួយរយៈ។

ជំនឿថា ហាមញ៉ាំបន្លែពពួកវល្លិ៍ៗ ឬបន្លែឡើងទ្រើង ព្រោះនឹងធ្វើឱ្យពិបាកប្រសូត…

ការពិតវិញ៖ វាជាជំនឿកាលពីបុរាណ ដែលថា បន្លែទាំងនោះមានលក្ខណៈជាខ្សែសរសៃ រឹតចងតោង ធ្វើឱ្យទារកពិបាកកើតចេញមក។ តែការពិតទៅ ស្ត្រីមានគភ៌ អាចទទួលទានបានទាំងអស់ មិនកំណត់ប្រភេទបន្លែឡើយ ជាពិសេសពពួកបន្លែស្លឹកបៃតងផ្សេងៗ ដូចជាត្រកួន ស្លឹកបាស សណ្តែកកួរ ល្ពៅ ប៉េងប៉ោះ ខាត់ណា ជាដើម។ បើបានទទួលទានបន្លែទាំងអស់នោះហើយ នឹងមានប្រយោជន៍ខ្លាំងណាស់ ព្រោះនឹងធ្វើឱ្យស្ត្រីមានគភ៌ខ្លួនឯង ទទួលបានវិតាមីនដែលចាំបាច់ និងសំខាន់ដល់ការរីកធំធាត់របស់ភ្នាសស្តើងៗ នៃកែវភ្នែក និងក្រពេញការធ្វើការងាររបស់គ្រាប់ភ្នែក។

ជំនឿដែលថា ហាមញ៉ាំទឹកតែ កាហ្វេ ព្រោះអាចធ្វើឱ្យរលូតបុត្រ…

តែការពិតវិញ…មានការសិក្សាវិភាគពីការញ៉ាំកាហ្វេ ឬភេសជ្ជៈដែលមានជាតិកាហ្វេអ៊ីនរបស់ស្ត្រីមានគភ៌ ចំនួន 1,063នាក់ បានរកឃើញថា ស្ត្រីមានផ្ទៃពោះ ដែលទទួលទានបរិមាណកាហ្វេអ៊ីន លើសពី 200មីល្លីក្រាមក្នុង 1ថ្ងៃ (ប្រមាណ 2ពែង ក្នុង 1ថ្ងៃ) អាចនឹងបណ្ដាលឱ្យកើតការរលូតបុត្របានដល់ទៅ 25ភាគរយ តែក៏មិនមែនមានន័យថា ហាមមិនឱ្យញ៉ាំនោះដែរ គ្រាន់តែត្រូវកំណត់ មិនឱ្យលើសពី 1កែវ ក្នុងរយៈពេល 2-3ថ្ងៃឡើយ អាចគ្រាន់តែក្រេបចឹបៗ ឱ្យបាត់ចង់ទៅបានហើយ។ ការញ៉ាំទឹកតែ ឬកាហ្វេ ច្រើនជ្រុលពេក នឹងធ្វើឱ្យគេងមិនលក់ សម្រាកមិនបានគ្រប់គ្រាន់ ឬអ្នកខ្លះអាចធ្វើឱ្យឆ្អល់ពោះ ដែលនឹងមានផលប៉ះពាល់ដល់សុខភាពរបស់ស្ត្រីមានគភ៌ខ្លួនឯង និងប៉ះពាល់ដល់ការរីកចម្រើនធំធាត់ និងការវិវឌ្ឍរបស់ទារកនៅក្នុងផ្ទៃបានទៀតផង។

ជំនឿថា ញ៉ាំថ្នាំខ្លាញ់ត្រី ប្រភេទគ្រាប់ នឹងធ្វើឱ្យឈាមបង្កកខ្លួនយឺត…

ការពិតវិញ៖ ខ្លាញ់ត្រី ឬ Fish Oil នេះ មិនដូចខ្លាញ់ថ្លើមត្រីទេ តែជាខ្លាញ់របស់ត្រី ដែលមានអាស៊ីតជាតិខ្លាញ់មិនកកដែលចាំបាច់ចំពោះរាងកាយ គឺអាស៊ីតខ្លាញ់នៅក្នុងក្រុមអូមេហ្កា3 ដែលជាចំណែកសំខាន់មួយរបស់កោសិកា ឬសាច់ភ្នាសរបស់រាងកាយ រួមទាំងខួរក្បាល គ្រាប់ឈាមប្រភេទផ្សេងៗ និងការបង្កើតភាពស៊ាំ ប្រឆាំងនឹងជំងឺរបស់រាងកាយ និងថែមទាំងជួយកាត់បន្ថយអាការរលាករបស់សន្លាក់ឆ្អឹង ដែលស្ត្រីមានគភ៌ច្រើនតែជួបប្រទះទៀតផង តែស្ត្រីមានផ្ទៃពោះ ក៏មិនគួរទទួលទានថ្នាំខ្លាញ់ត្រីប្រភេទគ្រាប់នេះច្រើនពេកដែរ តែគួរទទួលទានខ្លាញ់ត្រី ដែលមាននៅក្នុងសាច់ត្រីផ្សេងៗ ដូចជា សាច់ត្រីសាល់ម៉ុន ត្រីធូណា ត្រីឆ្ពុងក្រហម ជាដើមជំនួសវិញ ទើបជាការល្អ។

ក្រៅពីនេះ ស្ត្រីមានគភ៌គួរឈប់ទទួលទានអាហារបំប៉ន ប្រភេទថ្នាំខ្លាញ់ត្រីបែបគ្រាប់ ពេលមានផ្ទៃពោះបាន 6-7ខែ ព្រោះទោះជាវាជួយមិនឱ្យកើតមានភាពញ៉ុកណែនក្នុងសរសៃឈាមមែន តែវាអាចធ្វើឱ្យឈាម ក្របង្កកខ្លួននៅពេលកើតមានរបួសស្នាម ឬពេលវះកាត់ជាដើម។

បន្ទាប់ពីបានដឹងការពិតរបស់ជំនឿក្នុងរឿងអាហារការហូបចុក ដែលយើងបាននាំយកមកជម្រាបជូនហើយនោះ ស្ត្រីមានគភ៌ទាំងឡាយប្រហែលជាបានយល់ និងអាចជ្រើសរើសទទួលទានអាហារ បានយ៉ាងសប្បាយចិត្ត ដើម្បីសុវត្ថិភាពទាំងខ្លួនអ្នក និងកូននៅក្នុងផ្ទៃជាមិនខាន៕

រៀបរៀងដោយអ្នកគ្រូ ឆវី

July 21, 2021

ជំនឿ 5យ៉ាងក្នុងរឿងអាហារការហូបចុក របស់ស្ត្រីមានគភ៌

មានជំនឿជាច្រើន ពាក់ព័ន្ធនឹងរឿងអាហារការហូបចុក ក្នុងអំឡុងពេលមានគភ៌ថា ញ៉ាំអានេះទៅ វានឹងល្អ ឬញ៉ាំអានោះទៅ ណឹងធ្វើឱ្យកូនខ្ពស់ កូនឆ្លាត កូនងាយកើត ឬស្រួលកើត ជាដើម-ល- តែជំនឿខ្លះ មិនមែនចេះតែត្រូវទាំងអស់នោះទេ ដូច្នេះថ្ងៃនេះ យើងនាំគ្នាមកពិនិត្យមើលថា តើរឿង ដែលយើងជឿទាំងអស់នោះ វាជាការពិត ឬយ៉ាងណា?

ជំនឿថា ញ៉ាំហឹរពេក នឹងធ្វើឱ្យកូន មិនសូវមានសក់…

ការពិត៖ សក់របស់កូនតិច ឬច្រើននោះ វាស្ថិតនៅលើពូជ ឬហ្ស៊ែន របស់មនុស្សម្នាក់ៗ ចំណែកឯជំនឿ រឿងហាមញ៉ាំហឹរនេះ ប្រហែលជាមកពីខ្លាចស្ត្រីមានគភ៌ ឈឺពោះ ពិបាកបន្ទោបង់ ឬមិនទេ ក៏ខ្លាចរាករូស ដែលនាំឱ្យមានផលប៉ះពាល់ដល់សុខភាពរបស់ស្ត្រីមានគភ៌ទៅវិញទេ ព្រោះនៅក្នុងអំឡុងពេលមានគភ៌ ប្រព័ន្ធរំលាយអាហារនឹងខុសពីពេលមុនមានគភ៌ ដោយសារតែអ័រម៉ូនប្រែប្រួល ដែលអាចនឹងធ្វើឱ្យមានបញ្ហាក្នុងការបន្ទោបង់ ឬអាចធ្វើឱ្យកើតអាការឆ្អល់ពោះ និងរាករូសបានហ្នឹងឯង។

ជំនឿថា ញ៉ាំទឹកដូងច្រើន នឹងជួយឱ្យកូនមានសាច់ស្អាត និងលាងជម្រះជាតិខ្លាញ់តាមដងខ្លួន…

ការពិត៖ ការពិតទៅ ការដែលមានខ្លាញ់ ជាប់នៅតាមដងខ្លួនទារកនោះ នឹងធ្វើឱ្យងាយស្រួលប្រសូត ព្រោះវាប្រៀបដូចជា ជាតិខ្លាញ់រំអិលស្រោបពីលើខ្លួនទារក ខណៈពេលប្រសូតចេញមកដូច្នោះដែរ។ ជាតិខ្លាញ់មួយនេះ ផលិតឡើងដោយកោសិកាស្បែករបស់ទារក និងក្រពេញជាតិខ្លាញ់នៅខាងក្រោមស្បែក ពេលអាយុគភ៌ រឹតតែច្រើនឡើង ជាតិខ្លាញ់នោះ ក៏នឹងកើតឡើងច្រើនតាមនោះដែរ។ ក្រៅពីនេះ ក្រោយពេលប្រសូតហើយថ្មីៗ ជាតិខ្លាញ់ដែលស្រោបខ្លួនប្រាណទារកនោះ នឹងជួយគ្រប់គ្រងសីតុណ្ហភាពរបស់កូនតូច មិនឱ្យធ្លាក់ចុះទាបជ្រុលពេកបានទៀតផង ដូច្នេះហើយទើបគ្រូពេទ្យបណ្តោយឱ្យជាតិខ្លាញ់ទាំងនោះ នៅជាប់នឹងខ្លួនទារកមួយរយៈសិន មុននឹងលាងចេញ នៅពេលប្រាកដក្នុងចិត្តហើយថា ទារកចាប់ផ្តើមគ្រប់គ្រងសីតុណ្ហភាពដោយខ្លួនឯងបានហើយ។ ការប្រញាប់លាងជាតិខ្លាញ់នោះចេញពេក អាចនឹងធ្វើឱ្យខ្លួនប្រាណកូនតូច ត្រជាក់ខុសធម្មតា និងអាចបង្កឱ្យមានបញ្ហាបាន។

ចំណែកឯទឹកដូងវិញ មានជាតិស្ករ និងសារធាតុអាស៊ីតខ្លាញ់កកច្រើន ពេលស្ត្រីមានគភ៌ញ៉ាំច្រើន អាចធ្វើឱ្យកូនមានមាឌធំ តែមិនសូវរឹងមាំ ហើយអ្នកម្តាយខ្លួនឯង ក៏កាន់តែមានភាពប្រឈមនឹងការកើតមានខ្លាញ់ញ៉ុកណែនក្នុងសរសៃឈាមខ្លាំងដែរ ដូច្នេះបើទម្ងន់ខ្លួន កើនឡើងច្រើនហើយ គួរតែតមញ៉ាំទឹកដូងមួយរយៈ។

ជំនឿថា ហាមញ៉ាំបន្លែពពួកវល្លិ៍ៗ ឬបន្លែឡើងទ្រើង ព្រោះនឹងធ្វើឱ្យពិបាកប្រសូត…

ការពិតវិញ៖ វាជាជំនឿកាលពីបុរាណ ដែលថា បន្លែទាំងនោះមានលក្ខណះជាខ្សែសរសៃ រឹតចងតោង ធ្វើឱ្យទារកពិបាកកើតចេញមក។ តែការពិតទៅ ស្ត្រីមានគភ៌ អាចទទួលទានបានទាំងអស់ មិនកំណត់ប្រភេទបន្លែឡើយ ជាពិសេសពពួកបន្លែស្លឹកបៃតងផ្សេងៗ ដូចជាត្រកួន ស្លឹកបាស សណ្តែកកួរ ល្ពៅ ប៉េងប៉ោះ ខាត់ណា ជាដើម។ បើបានទទួលទានបន្លែទាំងអស់នោះហើយ នឹងមានប្រយោជន៍ខ្លាំងណាស់ ព្រោះនឹងធ្វើឱ្យស្ត្រីមានគភ៌ខ្លួនឯង ទទួលបានវិតាមីនដែលចាំបាច់ និងសំខាន់ដល់ការរីកធំធាត់របស់ភ្នាសស្តើងៗ នៃកែវភ្នែក និងក្រពេញការធ្វើការងាររបស់គ្រាប់ភ្នែក។

ជំនឿដែលថា ហាមញ៉ាំទឹកតែ កាហ្វេ ព្រោះអាចធ្វើឱ្យរលូតបុត្រ…

តែការពិតវិញ…មានការសិក្សាវិភាគពីការញ៉ាំកាហ្វេ ឬភេសជ្ជៈដែលមានជាតិកាហ្វេអ៊ីនរបស់ស្ត្រីមានគភ៌ ចំនួន 1,063នាក់ បានរកឃើញថា ស្ត្រីមានផ្ទៃពោះ ដែលទទួលទានបរិមាណកាហ្វេអ៊ីន លើសពី 200មីល្លីក្រាមក្នុង 1ថ្ងៃ (ប្រមាណ 2ពែង ក្នុង 1ថ្ងៃ) អាចនឹងបណ្ដាលឱ្យកើតការរលូតបុត្របាន ដល់ទៅ 25ភាគរយ តែក៏មិនមែនមានន័យថា ហាមមិនឱ្យញ៉ាំនោះដែរ គ្រាន់តែត្រូវកំណត់ មិនឱ្យលើសពី 1កែវ ក្នុងរយៈពេល 2-3ថ្ងៃឡើយ អាចគ្រាន់តែក្រេបចឹបៗ ឱ្យបាត់ចង់បានហើយ។ ការញ៉ាំទឹកតែ ឬកាហ្វេ ច្រើនជ្រុលពេក នឹងធ្វើឱ្យគេងមិនលក់ សំរាកមិនបានគ្រប់គ្រាន់ ឬអ្នកខ្លះអាចធ្វើឱ្យឆ្អល់ពោះ ដែលនឹងមានផលប៉ះពាល់ដល់សុខភាពរបស់ស្ត្រីមានគភ៌ខ្លួនឯង និងប៉ះពាល់ដល់ការរីកចម្រើនធំធាត់ និងការវិវឌ្ឍរបស់ទារកនៅក្នុងផ្ទៃបានទៀតផង។

ជំនឿថា ញ៉ាំថ្នាំខ្លាញ់ត្រី ប្រភេទគ្រាប់ នឹងធ្វើឱ្យឈាមបង្កកខ្លួនយឺត…

ការពិតវិញ៖ ខ្លាញ់ត្រី ឬ Fish Oil នេះ មិនដូចខ្លាញ់ថ្លើមត្រីទេ តែជាខ្លាញ់របស់ត្រី ដែលមានអាស៊ីតជាតិខ្លាញ់មិនកក ដែលចាំបាច់ចំពោះរាងកាយ គឺអាស៊ីតខ្លាញ់នៅក្នុងក្រុមអូមេហ្កា3 ដែលជាចំណែកសំខាន់មួយ របស់កោសិកា ឬសាច់ភ្នាសរបស់រាងកាយ រួមទាំងខួរក្បាល គ្រាប់ឈាមប្រភេទផ្សេងៗ និងការបង្កើតភាពស៊ាំ ប្រឆាំងនឹងជំងឺរបស់រាងកាយ និងថែមទាំងជួយកាត់បន្ថយអាការរលាករបស់សន្លាក់ឆ្អឹង ដែលអ្នកមានគភ៌ច្រើនតែជួបប្រទះទៀតផង តែស្ត្រីមានផ្ទៃពោះ ក៏មិនគួរទទួលទានថ្នាំខ្លាញ់ត្រីប្រភេទគ្រាប់នេះ ច្រើនពេកដែរ តែគួរទទួលទានខ្លាញ់ត្រី ដែលមាននៅក្នុងសាច់ត្រីផ្សេងៗ ដូចជា សាច់ត្រីសាល់ម៉ុន ត្រីធូណា ត្រីឆ្ពុងក្រហម ជាដើមជំនួសវិញ ទើបជាការល្អ។

ក្រៅពីនេះ ស្ត្រីមានគភ៌ គួរឈប់ទទួលទានអាហារបំប៉ន ប្រភេទថ្នាំខ្លាញ់ត្រីបែបគ្រាប់ ពេលមានផ្ទៃពោះបាន 6-7ខែ ព្រោះទោះជាវាជួយមិនឱ្យកើតមានភាពញ៉ុកណែនក្នុងសរសៃឈាមមែន តែវាអាចធ្វើឱ្យឈាម ក្របង្កកខ្លួននៅពេលកើតមានរបួសស្នាម ឬពេលវះកាត់ជាដើម។

បន្ទាប់ពីបានដឹងការពិតរបស់ជំនឿ ក្នុងរឿងអាហារការហូបចុក ដែលយើងបាននាំយកមកជម្រាបជូនហើយនោះ ស្ត្រីមានគភ៌ទាំងឡាយប្រហែលជាបានយល់ និងអាចជ្រើសរើសទទួលទានអាហារ បានយ៉ាងសប្បាយចិត្ត ដើម្បីសុវត្ថិភាពទាំងខ្លួនអ្នក និងកូននៅក្នុងផ្ទៃជាមិនខាន៕

June 19, 2021

ការឱ្យរង្វាន់កូន ពេលកូនធ្វើអំពើល្អ

“ការទទួលស្គាល់របស់ឪពុក-ម្តាយ នឹងជួយឱ្យកូនកើតមានមោទនភាពចំពោះខ្លួនឯង និងធ្វើឱ្យគេអាចធ្វើរឿងផ្សេងៗបានល្អដូចគ្នាដែរ”

នៅពេលកូនធ្វើអំពើល្អ ឬមានស្នាដៃក្នុងការធ្វើអ្វីមួយគួរជាទីពេញចិត្តនោះ ឪពុក-ម្តាយកុំភ្លេចពោលពាក្យសរសើរ ឬឱ្យរង្វាន់ជាការតបស្នងទៅវិញផង ព្រោះរូបកូនខ្លួនឯងក៏ត្រូវការការទទួលស្គាល់ចំពោះខ្លួនគេដែរថា គេអាចធ្វើបាន ដូច្នេះពាក្យរីករាយសរសើរ ឬរង្វាន់ ក៏ប្រៀបដូចជាកម្លាំងដឹកនាំចិត្តមួយដែរ។

តែការឱ្យរង្វាន់ មិនមែនជាការសូកប៉ាន់កូននោះទេ មានជាច្រើនដងណាស់ដែលឪពុក-ម្តាយតែងប្រើរង្វាន់ធ្វើជា រឿងជន្លរចិត្តឱ្យកូនធ្វើនូវរឿងអ្វីម្យ៉ាងឱ្យបាន ឬបញ្ឈប់ទង្វើដែលមិនល្អ ដូចជា បើកូនញ៉ាំបាយអស់ពីចាន ម៉ាក់នឹងទិញសៀវភៅតុក្កតារឿងថ្មីមកឱ្យ ឬបើកូនឈប់យំ ម៉ាក់នឹងនាំទៅទិញនំញ៉ាំ ឬក៏ បើកូនប្រឡងបានលេខ1 ម៉ាក់នឹងទិញកង់ថ្មីឱ្យជាដើម។

រឿងទាំងអស់នេះ នឹងហុចផលឱ្យកុមាររៀនយល់ដឹង និងជ្រួតជ្រាបថា ការនឹងធ្វើអ្វីក៏ដោយ តែងតែមានចំណុចដូរដោះគ្នា ឬផលតបស្នងដែលគេពេញចិត្តជានិច្ច បើគ្មានរង្វាន់ គេនឹងមិនធ្វើទេ ដូច្នេះយើងហៅទង្វើបែបហ្នឹងថា ការសូកប៉ាន់កូន។

ការឱ្យរង្វាន់ មិនគួរឱ្យផ្ដេសផ្ដាស់ ឬមិនចាំបាច់ត្រូវតែជារបស់របរ វត្ថុ ឬលុយកាក់ជានិច្ចនោះទេ អាចជាការសរសើរដោយវាចាក៏បាន គួរឱ្យរង្វាន់នៅពេលដល់ពេលវេលាដែលស័ក្តិសម និងតាមភាពសមរម្យ។ គ្រប់ពេលដែលឱ្យ គួរប្រាប់ពីហេតុផលផងថា ដោយសារហេតុអីទើបកូនគួរតែបានទទួលរង្វាន់នេះ ដើម្បីឱ្យរង្វាន់នេះក្លាយជារង្វាន់ដែលមានតម្លៃ និងស័ក្តិសិទ្ធិ ត្រូវនឹងមនុស្សដែលស័ក្តិសមនឹងវាដូចគ្នា ដូចជា នៅពេលកូនបានជួយលើកមិត្តភ័ក្តិដែលជំពប់ជើងដួលរងរបួសនៅក្នុងទីលានក្មេងលេង ហើយក្រោកឡើងវិញមិនរួចជាដើមនោះ ឪពុក-ម្តាយគួរឱ្យរង្វាន់ដោយការនិយាយសរសើរ និងលើកតម្កើងនូវអ្វីដែលកូនបានធ្វើ ដែលវានឹងធ្វើឱ្យកូនមានមោទនភាពលើខ្លួនឯង និងរៀនយល់ដឹងក្នុងការធ្វើល្អតទៅទៀតដែរ៕

December 10, 2020

សំណួរ-ចម្លើយ ពាក់ព័ន្ធនឹងសុខភាពពេលមានគភ៌ ដែលស្រ្តីទាំងអស់គួរដឹង…(តចប់)

ឡារ៉ែនជឿថា នារីៗយើងទាំងអស់ អ្នកណាៗក៏ត្រូវតែមានគ្រួសារ(ស្វាមី) និងត្រៀមខ្លួនសម្រាប់ការមានផ្ទៃពោះដូចគ្នា ដូច្នេះដើម្បីជាចំណេះដឹងសម្រាប់ត្រៀមខ្លួនក្នុងការមានគភ៌ និងដើម្បីថែរក្សាសុខភាពរបស់ខ្លួនឯង និងកូនក្នុងផ្ទៃក្នុងអំឡុងពេលតាំងគភ៌នោះ ខាងក្រោមនេះគឺជាសំណួររបស់ស្ត្រីមានគភ៌ និងចម្លើយរបស់គ្រូពេទ្យជំនាញ ដែលឡារ៉ែនសូមលើកយកមកជម្រាបជូនសម្រាប់ស្ត្រីដែលកំពុងត្រៀមខ្លួនធ្វើជាម្ដាយថ្មោងថ្មីទុកជាចំណេះដឹង…។

បារម្ភ កូនមិនសូវរើ

Q . មានផ្ទៃពោះបាន 20សប្តាហ៍ហើយ តែគ្មានទទួលអារម្មណ៍ថា កូនរើបន្តិចសោះ។ ពេលខ្លះមានអារម្មណ៍រាងទុលៗ តែក៏មិនប្រាកដក្នុងចិត្តធាកូនកំពុងរើដែរ ព្រោះស្រាលៗមែនទែន។ ខំព្យាយាមសង្កេតមើលក្រោយពេលញ៉ាំបាយហើយ តែក៏ស្ងាត់ឈឹង ចង់សួរថា តើបែបហ្នឹងខុសប្រក្រតី ឬក៏អត់?

A . ជាប្រក្រតីស្ត្រីមានគភ៌ នឹងមានអារម្មណ៍ដឹងថា កូនរើលើកតំបូងបង្អស់ នៅក្នុងអំឡុងពេលដែលផ្ទៃពោះមានអាយុពី 16 – 20សប្តាហ៍ តែអារម្មណ៍របស់ស្ត្រីមានផ្ទៃពោះម្នាក់ៗ តែងខុសប្លែកពីគ្នា ដូច្នេះមិនចាំបាច់ថា ត្រូវតែមានអារម្មណ៍ដឹងពីអាការកូនរើឱ្យត្រឹមត្រូវតាមពេលវេលា និងម៉ោងពេលនៃការធ្វើចលនារបស់ទារកនៅក្នុងផ្ទៃរបស់អ្នកនោះទេ។

មានកង្វល់រឿងថ្នាំហ្វូលេត សម្រាប់អ្នកមានផ្ទៃពោះ

Q . ពេលមានគភ៌កូនដំបូង លោកគ្រូពេទ្យចែកថ្នាំហ្វូលេតឱ្យញ៉ាំរៀងរាល់ខែ(គ្រាប់ពណ៌លឿង)ហើយជាប្រក្រតីនឹងទទួលបាន កាល់ស្យូម វិតាមីនរួម និងហ្វូលេត តែខែកន្លងទៅនេះ បានទទួលតែកាល់ស្យូម និងវិតាមីនរួម អត់មានហ្វូលេតទៀតទេ ធ្វើឱ្យខ្ញុំមានកង្វល់ក្នុងចិត្តជាខ្លាំង ខ្លាចកូនក្នុងពោះមានសុខភាពមិនល្អ ព្រោះតែខ្វះខាតជាតិហ្វូលេត។

A . ហ្វូលេតសម្រាប់អ្នកមានផ្ទៃពោះ មានតួនាទីក្នុងការផលិតគ្រាប់ឈាមក្រហម និងមានប្រយោជន៍ក្នុងការការពារភាពខុសប្រក្រតីនៃការសាងប្រព័ន្ធសរសៃប្រសាទខួរក្បាល និងសសៃប្រសាទឆ្អឹងកងខ្នងរបស់ទារកនៅក្នុងគភ៌ ដែលមានដូចជា សភាវបំពង់ប្រសាទបើក ( Neural Tube Defect ឬ NTD ) សភាវគ្មានខួរក្បាល ( Anencephaly ) ឆ្អឹងកងខ្នងបិទមិនជិតល្អ ( Spina Bifida )ជាដើម ហើយបរិមាណហ្វូលេតដែលត្រូវទទួលទាននោះ ចែកចេញជា៖

ករណីដែលស្ត្រីមានគភ៌លើកដំបូង ឬគ្មានប្រវត្តិធ្លាប់ប្រសូតបុត្រដែលមានរោគបំពង់ប្រសាទបើក សភាវគ្មានខួរក្បាល ឬឆ្អឹងកងខ្នងបិទមិនជិតល្អទេនោះ សូមណែនាំឱ្យទទួលទានមុនពេលមានគភ៌រយៈពេល 3ខែ រហូតដល់គភ៌មានអាយុ 12 សប្តាហ៍ ក្នុង 1ថ្ងៃ 400មីល្លីក្រាម។
ក្នុងករណីដែលស្រ្តីមានគភ៌ ធ្លាប់មានប្រវត្តិប្រសូតបុត្រមកមានរោគបំពង់ប្រសាទបើក ឬសភាវគ្មានខួរក្បាល ឬឆ្អឹងកងខ្នងបិទមិនជិតល្អនោះ សូមណែនាំឱ្យទទួលទានមុនពេលមានគភ៌រយៈពេល 3ខែ រហូតដល់គភ៌មានអាយុ 12សប្តាហ៍ ក្នុង1ថ្ងៃ 400មីល្លីក្រាម។
ក្នុងករណីស្រ្តីមានគភ៌មានភាពខុសប្រក្រតីរបស់រោគមិនសូវមានឈាមក្រហម ថាឡាស់ស៊ិមៀ អាចទទួលទានបានក្នុង 1ថ្ងៃ 400មីល្លីក្រាម រហូតក្នុងរយៈពេលនៃការមានគភ៌ ក្រៅពីនេះនៅអាចជ្រើសរើសបរិភោគអាហារដែលបរិមាណហ្វូលេតខ្ពស់ ដែលមានដូចជា បន្លែស្លឹកបៃតង ឈីស ថ្លើម សាច់សត្វ ទឹកដោះ សណ្តែក ទំពាំង ផ្សឹត និងដំឡូងបារាំង ។

ធ្វើលំហាត់ប្រាណដង្ហើម ដើម្បីឱ្យប្រសូតបុត្របានងាយស្រួល

Q . ចង់ឱ្យមាត់ស្បូនងាយបើកក្នុងថ្ងៃឆ្លងទន្លេ គួរធ្វើយ៉ាងណា?

A . ជាប្រក្រតី អ្នកម្តាយមានផ្ទៃពោះគ្រប់រូប រយៈតំបូងបំផុតនៃការប្រសូតបុត្រ គឺជារយៈពេលដែលមានការបើកធំឡើងរបស់មាត់ស្បូន ចាប់ផ្តើមតាំងពីការឈឺពោះប្រសូតមែនទែន មាត់ស្បូននឹងចាប់ផ្តើមបើក និងបើករហូតដល់អាចប្រសូតបុត្របាន។ រយៈពេលនេះ នឹងត្រូវបញ្ចប់ដោយប្រើពេលវេលាប្រមាណជា 8 – 12ម៉ោង ក្នុងការឆ្លងទន្លេលើកដំបូង និង 6 – 8ម៉ោងក្នុងការឆ្លងទន្លេកូនបន្ទាប់(កូនទី2)។

ការហ្វឹកហាត់បញ្ជាខ្យល់ដង្ហើមយ៉ាងទៀងទាត់ តាំងពីស្រ្តីចាប់ផ្តើមតាំងគភ៌ នឹងជួយឱ្យស្ត្រីមានគភ៌មានអារម្មណ៍ធូរស្រាល ហើយពេលដល់ពេលប្រសូត នឹងជួយឱ្យប្រសូតបានងាយស្រួល។ វិធីហ្វឹកហាត់ដោយការគេងផ្ងាររាបស្មើនឹងដី យកខ្នើយទ្រក្បាលឱ្យខ្ពស់បន្តិច បិទភ្នែក និងកំណត់ខ្យល់ដង្ហើមចូល-ចេញឱ្យវែងៗយ៉ាងទៀងទាត់ រួមទាំងការបន្ធូរសម្រួលសាច់ដុំ ក្បាល ក ផ្ទៃមុខ និងថ្ងាស ដោយយកដៃអង្អែលស្រាលៗដើម្បីបណ្តេញភាពធុញថប់តានតឹង។

ហាត់ប្រាណក្រោយពេលប្រសូតបុត្ររួច

Q . ប្រសូតបុត្រដោយការវះ តើអាចធ្វើលំហាត់ប្រាណបានឡើងវិញនៅពេលណាទៅ? ហើយខ្សែឆ្នូតៗពណ៌ក្រហមៗនៅលើក្បាលពោះ និងក្លៀកឡើងខ្មៅនោះ តើពេលណាទើបរលុបបាត់ទៅវិញ? តើត្រូវធ្វើយ៉ាងណាខ្លះទៅ?

A . ស្ត្រីដែលឆ្លងទន្លេតាមបែបធម្មតា ក្រោយពេលប្រសូតរួចអាចធ្វើលំហាត់ប្រាណបានភ្លាមនៅពេលបាត់ឈឺមុខរបួសហើយនោះ តែបើស្ត្រីដែលឆ្លងទន្លេដោយការវះកាត់វិញ គួររង់ចាំយ៉ាងតិចពី 4 – 6សប្តាហ៍ក្រោយពេលប្រសូតរួច បន្ទាប់មកសឹមចាប់ផ្តើមធ្វើលំហាត់ប្រាណសន្សឹមៗ ដោយសារតែបញ្ហាស្នាមរបួសវះហ្នឹងឯង។ ចំណែកឯស្នាមខ្សែពណ៌ក្រហមៗនៅចំកណ្តាលពោះ ស្នាមខ្មៅនៅក្រោមក្លៀក និងជុំវិញក្បាលសុដន់នោះ កើតឡើងដោយសារអ័រម៉ូននៅក្នុងរាងកាយមានការប្រែប្រួលក្នុងអំឡុងពេលមានគភ៌ តែក្រោយពេលប្រសូតបុត្ររួច ស្នាមជាំខ្មៅផ្សេងៗ នឹងរលុបបាត់អស់ទៅវិញជាបណ្តើរៗមិនខាន ៕

December 9, 2020

Tag: របួស