Tag: បច្ចេកទេស

ចិនបាញ់រ៉ុក្កែត «ហៅទឹកភ្លៀង» បានជិត 40 ពាន់លានតោន និងសង្គ្រោះបានជាង 14 ពាន់លានយុន
សកម្មភាពបាញ់រ៉ុក្កែតទៅលើអាកាសដើម្បីហៅភ្លៀង គឺជាការងារស្មុគស្មាញ និងទាមទារឱ្យមានស្ដង់ដាប្រកបដោយភាពស៊ីចង្វាក់គ្នា រវាងស្ថាប័នដែលពាក់ព័ន្ធ។
វេលាម៉ោង 22 និង 23 នាទី ថ្ងៃទី 18 មីនា 2023 នៅមូលដ្ឋានគ្រប់គ្រងដំណើរការបង្កើនទឹកភ្លៀងសិប្បនិម្មិត ក្នុងស្រុក Fushun ខេត្ត Sichuan ប្រទេសចិន រ៉ុក្កែតហៅភ្លៀងសិប្បនិម្មិតចំនួនពីរគ្រាប់ត្រូវបានបាញ់ឡើងទៅកាន់អាកាស និងបានផ្ទុះ បង្កើតជាសំឡេងយ៉ាងកក្រើកមេឃ ហើយការបាញ់លើកទីមួយនេះក៏បានសម្រេចជាស្ថាពរ។
បួននាទីក្រោយការបាញ់រ៉ុក្កែត ទឹកភ្លៀងក៏ចាប់ផ្ដើមធ្លាក់នៅតំបន់ Fushun។ មកដល់ម៉ោង 23 និង 48 នាទី រ៉ុក្កែតហៅភ្លៀងពីរគ្រាប់ទៀតក៏ត្រូវបានបាញ់ឡើងទៅកាន់អាកាស ធ្វើឱ្យទឹកភ្លៀងបង្អោរចុះមកជាបន្តបន្ទាប់។
យោងតាមប្រព័ន្ធផ្សព្វផ្កាយនៅខេត្ត Sichuan សកម្មភាពបាញ់បង្ហោះរ៉ុក្កែតហៅភ្លៀង គឺជាការងារស្មុគស្មាញ និងទាមទារឱ្យមានស្ដង់ដាប្រកបដោយភាពស៊ីចង្វាក់គ្នា រវាងស្ថាប័នដែលពាក់ព័ន្ធ។
បច្ចេកទេស «ហៅភ្លៀង»
មន្ត្រីជំនាញនៅមជ្ឈមណ្ឌលសេវាកម្មកាត់បន្ថយគ្រោះធម្មជាតិនៃស្រុក Fushun និយាយថា ដើម្បីសម្រេចបានកិច្ចការបង្កើនទឹកភ្លៀងសិប្បនិម្មិត គេត្រូវបំពេញលក្ខខណ្ឌជាច្រើន មានដូចជា ការវិភាគនិន្នាការអាកាសធាតុ ការប្រឹក្សាយោបល់រួម ការត្រៀម ការកែតម្រូវឧបករណ៍ដំណើរការ ការតាមដានដោយផ្ទាល់ និងការស្នើសូមប្រើប្រាស់ដែនអាកាសជាដើម។
សកម្មភាពបង្កើនទឹកភ្លៀងសិប្បនិម្មិតមិនមែនមានន័យថា ចង់ហៅភ្លៀងពេលណាក៏បាន។ ដើម្បីអាចធ្វើឱ្យទឹកភ្លៀងធ្លាក់ គេត្រូវបំពេញលក្ខខណ្ឌសំខាន់ៗចំនួនបី៖ កម្រាស់របស់ពពកដែលផ្ទុកទឹកភ្លៀងត្រូវតែធំជាង 2 គីឡូម៉ែត្រ, ពពកនោះត្រូវតែមានចំហាយទឹកគ្រប់គ្រាន់ និងត្រូវតែមានតំបន់ភាយចំហាយទឹក។
តំបន់ដែលត្រូវការទឹកភ្លៀងត្រូវតែជាទីដែលអនុញ្ញាតឱ្យរ៉ុក្កែតហោះឡើងដល់កម្ពស់ពី 4 ពាន់ ទៅ 8 ពាន់ម៉ែត្រ ដែលនេះក៏ត្រូវការកិច្ចសហការឱ្យបានម៉ត់ចត់ជាមួយនឹងស្ថាប័នគ្រប់គ្រងដែនអាកាស ដើម្បីធានាសុវត្ថិភាព។
ពេលវេលាដែលអាចឱ្យគេដំណើរការបាញ់រ៉ុក្កែតហៅភ្លៀង គឺជារឿងស្មុគស្មាញមួយផ្សេងទៀត។ ព្រោះថា គេត្រូវការជ្រើសរើសពេលវេលា និងការរង់ចាំ មុននឹងអាចបាញ់រ៉ុក្កែតហៅភ្លៀង បន្ទាប់ពីបានត្រៀមផែនការរួចរាល់។
បច្ចេកទេសហៅទឹកភ្លៀងសិប្បនិម្មិត កាត់បន្ថយការខាតបង់ប្រាក់បានជិត 2 ពាន់ដុល្លារអាម៉េរិក
ជាក់ស្ដែង សកម្មភាពកែសម្រួលអាកាសធាតុបែបសិប្បនិម្មិត មិនត្រឹមតែដើម្បីបង្កើនទឹកភ្លៀងនោះទេ តែនៅអាចទប់ស្កាត់បាតុភូតភ្លៀងទឹកកក ចុះអ័ព្ទ និងបាតុភូតត្រជាក់ដល់កកផងដែរ។
ក្រោយការអភិវឌ្ឍជាង 60 ឆ្នាំ បច្ចេកទេសកែប្រែអាកាសធាតុ និងបង្កើនទឹកភ្លៀងរបស់ប្រទេសចិន បានរីកចម្រើនយ៉ាងខ្លាំង បង្កើតជាប្រព័ន្ធមួយដែលមានបួនថ្នាក់ រួមមាន ថ្នាក់ស្រុក ថ្នាក់ក្រុង ថ្នាក់ខេត្ត និងថ្នាក់ជាតិ។
កាលពីឆ្នាំ 2022 ស្ទើរតែទាំងអស់នៃតំបន់ភាគខាងត្បូងប្រទេសចិន បានឆ្លងកាត់រលកកម្ដៅ និងគ្រោះរាំងស្ងួតជាច្រើនលើក ចាប់ពីខែមិថុនា ដល់ពាក់កណ្ដាលខែវិច្ឆិកា នាំឱ្យអាជ្ញាធរតំបន់ជាច្រើនត្រូវប្រើប្រាស់បច្ចេកទេសហៅទឹកភ្លៀង។ ក្នុងអំឡុងពេលនោះ ពួកគេបានធ្វើការហៅទឹកភ្លៀងសរុបជាង 15,000 លើក ក្នុងនោះ ការប្រើប្រាស់យន្តហោះមានចំនួន 241 លើក និងការបាញ់រ៉ុក្កែតចំនួន 15,000 លើក ហើយទាញយកទឹកភ្លៀងបានប្រហែល 8.56 ពាន់លានតោន។
យោងតាមស្ថាប័នឧតុនិយមចិន ពេញមួយឆ្នាំ 2022 ប្រទេសចិនបង្កើតទឹកភ្លៀងបានប្រហែល 39.8 ពាន់លានតោន ជួយការពារផ្ទៃដីបានប្រហែល 650,000 គីឡូម៉ែត្រការ៉េ និងកាត់បន្ថយការខាតបង់ផ្នែកសេដ្ឋកិច្ចបានប្រហែល 14.1 ពាន់លានយុន (ប្រហែល 1,972,900,000 ដុល្លារអាម៉េរិក)៕
July 26, 2023
ព្រះចន្ទអាចរៀបចំព្រឹត្តិការណ៍បាល់ទាត់ដំបូងនៅឆ្នាំ 2035?
បាល់ទាត់គឺជាកីឡាដែលទទួលបានការនិយមចូលចិត្តបំផុតនៅលើពិភពលោក ដូច្នេះតើវាអាចត្រូវបានរៀបចំការប្រកួតនៅលើភព ឬទីឋានដទៃក្រៅពីផែនដី ឬអត់?
នេះគឺជាអ្វីដែលក្រុមអ្នកវិទ្យាសាស្ត្រកំពុងគិតដល់។ ពួកគេជឿថា បាល់ទាត់អាចលេងនៅលើឋានព្រះចន្ទយ៉ាងឆាប់នៅឆ្នាំ 2035។
ក្រុមអ្នកជំនាញមកពីវិទ្យាស្ថានបច្ចេកទេស និងបច្ចេកវិទ្យា (IET) ដែលមានទីស្នាក់ការកណ្ដាលនៅប្រទេសអង់គ្លេស បានរៀបគម្រោងពិសេសមួយស្ដីពីការរៀបចំព្រឹត្តិការណ៍ប្រកួតកីឡាបាល់ទាត់នៅលើឋានព្រះចន្ទ។ ពួកគេថា ការប្រកួតនេះនឹងមានថេរវេលា 90 នាទី ប៉ុន្តែមិនប្រើប្រាស់ឈុតសម្លៀកបំពាក់ធម្មតាដូចនៅលើផែនដី។
ការប្រកួតនៅខាងក្រៅភពផែនដីនឹងត្រូវបានចែកចេញជាបួនតង់ ហើយក្នុងមួយតង់មាន 10 នាទី និងសម្រាក 20 នាទីនៅចន្លោះតង់នីមួយៗ។ ក្រុមបាល់ទាត់នីមួយៗនឹងមានកីឡាករ 5 នាក់។
សម្លៀកបំពាក់កីឡាដូចនៅលើផែនដីនឹងត្រូវបានជំនួសដោយឈុតអ្នកអវកាស ដែលបំពាក់មុខងារទំនើបៗជាច្រើន ក្នុងនោះមានទាំងឧបករណ៍បញ្ចុះកម្ដៅផងដែរ។
ចំណែកអាជ្ញាកណ្ដាលវិញ នឹងមានលក្ខណៈស្រដៀងទៅនឹងបច្ចេកវិទ្យា VAR។ ព្រោះថា ពួកគេនឹងបង្ហាញខ្លួនលើទីលានប្រកួតក្នុងទម្រង់ជារូបភាព 3D។
យោងតាម IET ការប្រកួតបាល់ទាត់លើឋានព្រះចន្ទនឹងធ្វើឡើងនៅពេលថ្ងៃត្រង់ ដើម្បីងាយស្រួលមើល គ្រាដែលទំហំរបស់ទីលានក៏នឹងត្រូវបានបន្ថយមកនៅត្រឹម 1/8 នៃទីលាននៅលើផែនដី។
ខ្សែបន្ទាត់ជុំវិញទីលានអាចត្រូវបានគូសសញ្ញាដោយធាតុ polymer ពណ៌ខ្មៅ-ស។ ទីលានបាល់ទាត់ក៏នឹងត្រូវការបាំងដោយសំណាញ់ និងប្រក់ដំបូល ដើម្បីជៀសវាងបាល់ខ្ទាត់ចេញទៅបាត់។ រីឯគ្រាប់បាល់វិញ នឹងត្រូវមានទំហំធំជាងជិតទ្វេដង ធៀបនឹងបាល់ធម្មតា ដើម្បីងាយស្រួលមើល។
ដើម្បីគាំទ្រដល់គម្រោងខាងលើ IET កំពុងតែអំពាវនាវសូមឱ្យក្មេងនៅប្រទេសអង់គ្លេសដែលមានអាយុពី 4 ទៅ 13 ឆ្នាំ ចូលរួមការរចនាឈុតសម្លៀកបំពាក់ផ្លូវការដំបូងគេសម្រាប់ព្រឹត្តិការណ៍បាល់ទាត់នៅលើឋានព្រះចន្ទ៕
July 25, 2023
អាម៉េរិកអនុម័តលក់មីស៊ីលបាញ់លើអាកាស តម្លៃជិតបីពាន់លានដុល្លារឱ្យអាល្លឺម៉ង់
ក្រសួងការបរទេសអាម៉េរិក បានយល់ព្រមលក់មីស៊ីលអាកាសប្រឆាំងអាកាសខ្នាតមធ្យម AMRAAM ជិត 1,000 ដើម ក្នុងតម្លៃ 2.9 ពាន់លានដុល្លារ ដល់ប្រទេសអាល្លឺម៉ង់។
មន្ទីរបញ្ចកោណ កាលពីថ្ងៃទី 19 កក្កដា បានប្រកាសថា ក្រសួងការបរទេសអាម៉េរិកបានអនុញ្ញាតឱ្យលក់មីស៊ីលបាញ់ពីអាកាសទៅអាកាសប្រភេទមធ្យម AIM-120C-8 AMRAAM ចំនួន 969 ដើម រួមនឹងប្រព័ន្ធបញ្ជាបម្រុង រូបមន្តនៃការហ្វឹកហាត់ ឧបករណ៍បច្ចេកទេស និងជំនួយផ្នែកហ្វឹកហ្វឺន ក្នុងតម្លៃ 2.9 ពាន់លានដុល្លារ ទៅឱ្យប្រទេសអាល្លឺម៉ង់។
«ការលក់អាវុធនេះនឹងជួយគាំទ្រដល់គោលនយោបាយការបរទេស និងសន្តិសុខជាតិរបស់សហរដ្ឋអាម៉េរិក តាមរយៈការកែលំអសន្តិសុខសម្រាប់សម្ព័ន្ធមិត្តមួយនៅក្នុងណាតូ ហើយក៏ជាប្រទេសដែលដើរតួនាទីសំខាន់នៅក្នុងការរក្សាស្ថិរភាពនយោបាយ និងសេដ្ឋកិច្ចអឺរ៉ុប» ប្រកាសរបស់ក្រសួងការពារជាតិអាម៉េរិក មានឃ្លាសរសេរដូច្នេះ។
យោងតាមមន្ទីរបញ្ចកោណ ការទិញដូរអាវុធនេះនឹងជួយឱ្យអាល្លឺម៉ង់មានអាវុធប្រឆាំងអាកាសទំនើប លើកកម្ពស់សមត្ថភាពទប់ទល់នឹងការគំរាមកំហែងនាបច្ចុប្បន្ន និងអនាគត។
ការលក់អាវុធខាងលើក៏ត្រូវបានជូនដំណឹងដល់សភាអាម៉េរិក ជាទីដែលស្ថាប័ននេះមានពេលវេលា 30 ថ្ងៃ ដើម្បីធ្វើការសម្រេចចិត្តថា ត្រូវយល់ព្រមឱ្យលក់ ឬបដិសេធ។ បើសិនទទួលបានការយល់ព្រមពីសភា ការលក់អាវុធនេះនឹងត្រូវបញ្ជូនឡើងទៅកាន់ប្រធានាធិបតី ចូ បៃដិន ដើម្បីចុះហត្ថលេខាចុងក្រោយ។
បុគ្គលិកយោធាអាម៉េរិក កំពុងដំឡើងមីស៊ីល AMRAAM
AIM-120 AMRAAM គឺជាមីស៊ីលម្ចាស់ការដែលនាំផ្លូវដោយរ៉ាដា អាចធ្វើសកម្មភាពនៅក្នុងលក្ខខណ្ឌអាកាសធាតុខុសៗគ្នា។ ក្បាលរ៉ាដាបំពាក់បច្ចេកវិទ្យាម្ចាស់ការ អនុញ្ញាតឱ្យមីស៊ីលអនុវត្តគោលការណ៍ «បាញ់ ហើយភ្លេច» ដែលជួយឱ្យយន្តហោះមិនចាំបាច់ចុចតម្រង់គោលដៅជាបន្តបន្ទាប់ និងគេចផុតពីការបាញ់តបតពីសត្រូវ។
កំណែដើម AIM-120A អាចបាញ់បានចម្ងាយ 50 គីឡូម៉ែត្រ គ្រាដែលកំណែ AIM-120C-8 របស់ AMRAAM អាចបាញ់ចំគោលដៅពីចម្ងាយ 180 គីឡូម៉ែត្រ។
ក្រុមហ៊ុនការពារជាតិ Raytheon ឱ្យដឹងថា មីស៊ីល AMRAAM កំពុងត្រូវបានដាក់ឱ្យប្រើប្រាស់នៅក្នុងជួរកងទ័ពអាម៉េរិក និងប្រទេសជិត 40 ក្នុងពិភពលោក៕
July 20, 2023
អបអរសាទរខួប១ឆ្នាំ នៃការបើកដំណើរការជាផ្លូវការរោងចក្រដំឡើងរថយន្ត Ford និងពិធីប្រគល់-ទទួលអំណោយរថយន្តគិលានសង្គ្រោះ Ambulance ជូនដល់កាកបាទក្រហមកម្ពុជា សាខាខេត្តពោធិ៍សាត់
[ភ្នំពេញ – ថ្ងៃទី ១៣ ខែកក្កដា ឆ្នាំ២០២៣] ក្រុមហ៊ុន RMA (Cambodia) PLC ដែលជាក្រុមហ៊ុននាំចូល និងចែកចាយផ្តាច់មុខរថយន្ត Ford ក្នុងទីផ្សារប្រទេសកម្ពុជាបានប្រារព្ធពិធីប្រគល់-ទទួលអំណោយរថយន្តគិលានសង្គ្រោះចំនួន ២ គ្រឿង ជូនទៅដល់កាកបាទក្រហមកម្ពុជា សាខាខេត្តពោធិ៍សាត់ ដែលកម្មវិធីនេះត្រូវបានប្រារព្ធឡើង ក្រោមអធិបតីភាពរបស់ ឯកឧត្តម កែវ រតនៈ រដ្ឋមន្ត្រីប្រតិភូអមនាយករដ្ឋមន្ត្រី និងអគ្គនាយកអគ្គីសនីកម្ពុជា និងលោកអភិបាលនៃគណៈអភិបាលខេត្តពោធិ៍សាត់ ព្រមទាំងថ្នាក់ដឹកនាំក្រុមហ៊ុន Ford Motor Company ថ្នាក់ដឹកនាំក្រុមហ៊ុន RMA Group និងក្រុមហ៊ុន RMA (Cambodia) PLC រួមទាំងភ្ញៀវកិត្តិយសជាតិ និងអន្តរជាតិប្រមាណជាង ២០០ នាក់។ កម្មវិធីនេះបានប្រារព្ធឡើងនៅក្នុងបរិវេនរោងចក្រដំឡើងរថយន្ត Ford ក្នុងភូមិសារវ័ន ឃុំស្នាអន្សារ ស្រុកក្រគរ ខេត្តពោធិ៍សាត់ នៅថ្ងៃទី ១១ ខែកក្កដា ឆ្នាំ ២០២៣ ។
ក្នុងឱកាសនៃពីធីអបអរសាទរខួប១ឆ្នាំ នៃការបើកដំណើរការជាផ្លូវការរោងចក្រដំឡើងរថយន្ត Ford និងពិធីប្រគល់-ទទួលអំណោយរថយន្តគិលានសង្គ្រោះ Ambulance ចំនួន ២ គ្រឿង ជូនដល់កាកបាទក្រហមកម្ពុជា សាខាខេត្តពោធិ៍សាត់ លោក ងន សាំង អគ្គនាយកក្រុមហ៊ុន RMA (Cambodia) PLC បានមានប្រសាសន៍ថា៖ “ យើងខ្ញុំមានមោទភាពជាពន់ពេកដែលទទួលបានសេចក្ដីទុកចិត្តពីក្រុមហ៊ុន FORD MOTOR COMPANY ក្នុងការដំឡើងរថយន្ត FORD RANGER និង FORD EVEREST ជំនាន់ថ្មីនៅ លើទឹកដីនៃព្រះរាជាណាចក្រកម្ពុជា ស្របតាមស្តង់ដាររបស់ក្រុមហ៊ុន FORD ។ យើងខ្ញុំជឿជាក់ថា ការបោះជំហានវិនិយោគក្នុងវិស័យយានយន្តរបស់ក្រុមហ៊ុនយើងខ្ញុំ ចូលរួមចំណែកយ៉ាងសំខាន់ ក្នុងការអភិវឌ្ឍវិស័យឧសហ្សាកម្មយានយន្តនៅកម្ពុជា និងជាសក្ខីភាពនៃទំនុកចិត្តលើកិច្ចខិតខំប្រឹង ប្រែងរបស់រដ្ឋាភិបាលក្នុងការធ្វើឱ្យប្រសើរឡើង នូវបរិយាកាសធុរកិច្ច និងវិនិយោគ។ វត្តមានរបស់ រោងចក្រយើងខ្ញុំក៏បានចូលរួមចំណែកការកាត់បន្ថយការធ្វើចំណាកស្រុកទៅធ្វើការនៅក្រៅប្រទេស របស់ប្រជាពលរដ្ឋ និងលើកកម្ពស់សេដ្ឋកិច្ចក្នុងតំបន់តាមរយៈការជំរុញសន្ទុះអាជីវកម្មសហគ្រាស ធុនតូច និងមធ្យម ការបង្កើតឱកាសការងារដោយផ្ទាល់និងដោយប្រយោល ក៏ដូចជាការអភិវឌ្ឍន៍ ធនធានមនុស្សនៅក្នុងទឹកដី ខេត្តពោធិ៍សាត់នេះផ្ទាល់ផងដែរ។ ”
មិនតែប៉ុណ្ណោះ លោកក៏បានបន្ថែមទៀតថា៖ “ ក្រុមហ៊ុនយើងខ្ញុំនឹងបន្តប្តេជ្ញាគាំទ្រ និង ជំរុញវិស័យឧស្សាហកម្មយានយន្តនៅកម្ពុជា ដើម្បីឱ្យកម្ពុជា ផ្លាស់ប្ដូរមុខមាត់ថ្មី ពីប្រទេសដែលដំឡើងរថយន្ត ទៅជាប្រទេសដែលផលិតរថយន្ត ក្នុងពេលអនាគត។ ក្រុមហ៊ុននឹងពង្រីកការវិនិយោគគម្រោងដំឡើងរថយន្ត Ford ដោយបង្កើនការនាំចូលនៃចំនួន គ្រឿងបង្គុំច្រើនជាងមុន បង្កើនចំនួនការងារក្នុងស្រុក ជំរុញការប្រើប្រាស់ធាតុផ្សំក្នុងស្រុក និងបង្កើន ដើមទុនវិនិយោគបន្ថែមទៀត។ យើងខ្ញុំជឿជាក់ថា ការវិនិយោគនេះនឹងបន្តផ្តល់អត្ថប្រយោជន៍ជាច្រើនបន្ថែមទៀតជូនប្រទេសកម្ពុជា ជាពិសេសការអភិវឌ្ឍន៍ខ្សែសង្វាក់ផ្គត់ផ្គង់ និងធ្វើឱ្យប្រសើរ ឡើងនូវខ្សែចង្វាក់ដែលគាំទ្រគោលនយោបាយអភិវឌ្ឍវិស័យឧស្សាហកម្មរបស់រាជរដ្ឋាភិបាលកម្ពុជា។ ការវិនិយោគនេះ នឹងនាំមកនូវផលិតផលថ្មី បច្ចេកវិទ្យាថ្មី ដើម្បីផ្គត់ ផ្គង់តម្រូវការប្រើប្រាស់រថយន្តថ្មីក្នុងស្រុក ជាមួយនឹងមោទភាពផលិតកម្មក្នុងស្រុក រោងចក្រ ដំឡើងរថយន្ត Ford នឹងបន្តទាក់ទាញវិនិយោគិនផ្សេងៗជាច្រើនទៀតមកវិនិយោគនៅកម្ពុជា ជា ពិសេស អ្នកវិនិយោគដែល ពាក់ព័ន្ធនឹងការផលិត និងដំឡើងរថយន្ត ដូចជា៖ សំបកកង់ កង់ឡាន ខ្សែភ្លើងឡាន អាគុយឡាន និងអាជីវកម្មផ្សេងៗទៀត។”

ឆ្លៀតក្នុងឱកាសនេះដែរ លោកស្រី Kay Hart ប្រធានគ្រប់គ្រងទីផ្សារអន្តរជាតិនៃក្រុមហ៊ុន Ford Motor Company បានមានប្រសាសន៍ថា៖ “ រថយន្តគិលានសង្គ្រោះ (The Next-Generation Ford Ranger-Converted Ambulances) នេះ បានបំពាក់មកជាមួយនូវបច្ចេកវិទ្យា និងប្រព័ន្ធសុវត្ថិភាពទំនើបជំនាន់ចុងក្រោយដែលធ្វើឱ្យរថយន្តនេះក្លាយជារថយន្តមួយដែលមានលក្ខណៈ ធន់ រឹងមាំ និងមានសមត្ថភាពក្នុងការចល័ត និងដឹកជញ្ជូនអ្នកជំងឺដោយសុវត្ថិភាព។ ”
លោកស្រីក៏បានបន្តទៀតថា៖ “ រថយន្តគិលានសង្គ្រោះ (The Next-Generation Ford Ranger-Converted Ambulances) នឹងចូលរួមចំណែកយ៉ាងសំខាន់សម្រាប់កាកបាទក្រហមកម្ពុជាក្នុងខេត្តពោធិ៍សាត់ ក្នុងការគាំពារ សង្គ្រោះបន្ទាន់ និងជាជំនួយការដ៏សំខាន់ក្នុងការជួយដល់សកម្មភាពសប្បុរសធម៌ផ្សេងៗដល់ប្រជាពលរដ្ឋ និងអ្នកជំងឺដើម្បីទទួលបាននូវសេវាកម្មសង្គ្រោះបន្ទាន់មួយដែលមាន គុណភាព សុវត្ថិភាព និងប្រសិទ្ធភាព។ ”
ឯកឧត្តម កែវ រតនៈ រដ្ឋមន្ត្រីប្រតិភូអមនាយករដ្ឋមន្ត្រី និងអគ្គនាយកអគ្គីសនីកម្ពុជា បានមានប្រសាសន៍ថា៖ “ ការសាងសង់រោងចក្រដំឡើងរថយន្ត Ford ក្នុងខេត្តពោធិ៍សាត់ គឺជាសក្ខីភាពមួយដែលបានបង្ហាញពីទំនុកចិត្តរបស់ក្រុមហ៊ុន RMA Cambodia មកលើរាជរដ្ឋាភិបាលកម្ពុជា ហើយការផ្តល់ជូននូវរថយន្តគិលានសង្គ្រោះ ២ គ្រឿងក្នុងថ្ងៃនេះនឹងជាការចូលរួមចំណែកដ៏សំខាន់មួយក្នុងការពង្រឹងសមត្ថភាពមូលដ្ឋានសុខាភិបាលបន្ថែមទៀត ក្នុងការឆ្លើយតបទៅនឹងតម្រូវការសេវាថែទាំសុខភាពអោយកាន់តែមានគុណភាព ប្រសិទ្ធភាព និងសុវត្ថិភាព។ ភាពជាដៃគូរវាង RMA Cambodia និងវិទ្យាស្ថានបច្ចេកទេសក្នុងស្រុករបស់យើង បានដើរតួរនាទីយ៉ាងសំខាន់ក្នុងការលើកកម្ពស់ធនធានមនុស្ស តាមរយៈការបង្កើតកម្មវិធីបណ្តុះបណ្តាលដោយផ្ទាល់ពីអ្នកជំនាញដែលគ្រឹះមួយដ៏សំខាន់សម្រាប់យុវជន ក៏ដូចជាយុវនារីក្នុងការត្រៀមខ្លួនរួចជាស្រេចសម្រាប់ភាពជោគជ័យនាពេលខាងមុខ។ ”
គួរបញ្ជាក់ផងដែរថា ក្រុមហ៊ុន RMA (CAMBODIA) PLC ជាក្រុមហ៊ុនដំបូងគេបំផុត ដែលទទួលបានការទទួលស្គាល់ពី វិទ្យាស្ថានស្ដង់ដារកម្ពុជា នៃ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ក្នុងនាមជាអ្នក អនុវត្តស្តង់ដារសុវត្ថិភាពយានយន្ត និងស្តង់ដារសុវត្ថិភាពគ្រឿងបង្គុំយានយន្តបានខ្ពស់បំផុត។ ក្នុងឆ្នាំ ២០២០ ក្រុមហ៊ុន RMA (CAMBODIA) PLC បានចុះបញ្ជីលក់មូលបត្រ បំណុលចំនួន ៨០ ពាន់លានរៀល ដែលស្មើនឹង ២០ លានដុល្លារអាមេរិក ក្នុងផ្សារមូលបត្រកម្ពុជា ហើយក្លាយជាក្រុមហ៊ុនមិនមែនស្ថាប័នហិរញ្ញវត្ថុដែលបានបោះផ្សាយមូលបត្របំណុលដំបូងគេបង្អស់នៅប្រទេសកម្ពុជា។ ការបោះផ្សាយមូលបត្របំណុលនេះ បង្ហាញពីកិច្ចខិតខំប្រឹងប្រែងរបស់ក្រុមហ៊ុនយើងខ្ញុំក្នុងការលើកកម្ពស់ទីផ្សារមូលបត្រកម្ពុជា និងចូលរួមចំណែកអភិវឌ្ឍទីផ្សារហិរញ្ញវត្ថុនៅប្រទេសកម្ពុជា។
តាមរយៈកំណើនសេដ្ឋកិច្ច និងកំរិត GDP របស់ប្រជាជនកម្ពុជាកើនឡើងខ្ពស់ជាបន្តបន្ទាប់ បានធ្វើឱ្យប្រជាជនកម្ពុជាងាកមកប្រើប្រាស់រថយន្តថ្មីមានការកើនឡើងជាលំដាប់។ ក្នុងនោះការប្រើប្រាស់ រថយន្តថ្មីម៉ាក FORD មានកំណើនកាន់តែច្រើនឡើង និងបានក្លាយជាជម្រើសឈានមុខរបស់អតិថិជននៅកម្ពុជា។ ដូច្នេះ ក្រុមហ៊ុនបានសម្រេចចិត្តបង្កើតរោងចក្រដំឡើងរថយន្ត FORD ដែលទទួលបានសិទ្ធិពេញលេញក្នុងការផ្គុំ និងដំឡើងរថយន្តពីក្រុមហ៊ុនម្ចាស់ដើម FORD MOTOR COMPANY។ រោងចក្រនេះ ត្រូវបានសាងសង់ឡើងនៅលើផ្ទៃដីសរុបប្រមាណជាង ៥ ហិកតា ស្ថិតក្នុងភូមិសារវ័ន ឃុំស្នាអន្សា ស្រុកក្រគរ ខេត្តពោធិ៍សាត់ ជាមួយនឹងទុនវិនិយោគចំនួន ២១ លានដុល្លារសហរដ្ឋអាមេរិក ដែលអាចបង្កើតការងារជំនាញបានជាង ៥០០ កន្លែង និងមានសមត្ថភាពអាចដំឡើងរថយន្តបានចំនួនប្រមាណ ៩,០០០ គ្រឿងក្នុងមួយឆ្នាំ។
រហូតមកដល់ពេលនេះ ក្រុមហ៊ុនបានដំឡើងរថយន្ត Ford Ranger Wildtrak និងរថយន្ត Ford Everest បានចំនួន ៣,០០០ គ្រឿងដើម្បីបម្រើតម្រូវការទីផ្សារក្នុងស្រុក។ ក្រុមហ៊ុនបន្តសហការ ជាមួយនឹងវិទ្យាស្ថានពហុបច្ចេកទេសខេត្តពោធិ៍សាត់ក្នុងការបណ្តុះបណ្តាលអភិវឌ្ឍជំនាញបច្ចេកទេសដល់បុគ្គលិកក្រុមហ៊ុនដើម្បីធានាឱ្យបាននូវធនធានមនុស្សប្រកបដោយគុណភាព។ ថ្មីៗនេះ ក្រុមហ៊ុនបានបញ្ជូនបុគ្គលិកទៅប្រទេស Australia ដើម្បីសិក្សាអំពីបច្ចេកវិទ្យាដំឡើងរថយន្ត ក្នុងគោលបំណងបង្កើនកម្រិតបច្ចេកទេសបុគ្គលិកក៏ដូចជាពាំនាំចំណេះដឹងថ្មី និង បច្ចេកវិទ្យាថ្មីមកប្រទេសកម្ពុជា។ ដើម្បីបន្តចូលរួមលើកកម្ពស់វិស័យយានយន្ត ក្រុមហ៊ុននឹងបង្កើតមជ្ឈមណ្ឌលអប់រំបណ្ដុះបណ្ដាលបច្ចេកទេស និងវិជ្ជាជីវៈដើម្បីផ្ដល់ឱកាសឱ្យប្រជាពលរដ្ឋកម្ពុជាទទួលបានការបណ្តុះបណ្តាលជំនាញបច្ចេកទេសប្រកបដោយគុណភាពដើម្បីចូលរួមចំណែកអភិវឌ្ឍធនធាន មនុស្សនៅកម្ពុជាស្របតាមគោលនយោបាយអភិវឌ្ឍវិស័យឧស្សាហកម្មរបស់រាជរដ្ឋាភិបាលកម្ពុជា។

July 14, 2023
ជប៉ុនចាប់ផ្ដើមបង្កើនការទាក់ទាញកម្លាំងពលកម្មពីបរទេស
ប្រទេសជប៉ុនបានអនុញ្ញាតឱ្យអ្នកដែលមានប្រាក់ខែខ្ពស់ ដាក់ពាក្យសូមប័ណ្ណស្នាក់នៅ ក្រោយពីធ្វើការនៅប្រទេសនេះបានមួយឆ្នាំជាដើម ដើម្បីបង្កើនការទាក់ទាញកម្លាំងពលកម្មពីបរទេស។
ដើម្បីទប់ទល់នឹងបញ្ហាក្នុងការទាក់ទាញកម្លាំងពលកម្មពីបរទេស រាជរដ្ឋាភិបាលជប៉ុនបានបង្កើតគោលការណ៍ថ្មី អនុញ្ញាតឱ្យអ្នកដែលមានប្រាក់ខែខ្ពស់ ដាក់ពាក្យសូមប័ណ្ណស្នាក់នៅ ក្រោយពីធ្វើការនៅប្រទេសនេះបានមួយឆ្នាំ និងអនុញ្ញាតឱ្យនិស្សិតដែលបានបញ្ចប់ការសិក្សាពីសាកលវិទ្យាល័យដែលមានកេរ្តិ៍ឈ្មោះល្អ ស្នាក់នៅប្រទេសនេះពីរឆ្នាំបន្ថែមទៀត ដើម្បីស្វែងរកការងារធ្វើ។
ជាពិសេស ចំពោះកម្មវិធីជ្រើសរើសអ្នកហាត់ការផ្នែកបច្ចេកទេស ជប៉ុនក៏បានជំរុញ និងលើកកម្ពស់កម្មវិធីជំនាញពិសេសលេខមួយ ផ្ដោតសំខាន់ទៅលើក្រុមគោលដៅដែលជាអ្នកហាត់ការបានចប់កិច្ចសន្យាជាមួយបណ្ដាក្រុមហ៊ុន រោងចក្រនៅប្រទេសនេះ។
អ្នកហាត់ការដែលបានចប់កិច្ចសន្យានឹងទទូលបានភាពងាយស្រួលនៅក្នុងការដាក់ពាក្យស្នើសូមទិដ្ឋាការជំនាញពិសេសលេខមួយ ដើម្បីធ្វើការរយៈពេលប្រាំឆ្នាំទៀតនៅប្រទេសជប៉ុន ក្នុងនាមជាបុគ្គលិកដែលទទួលបានអត្ថប្រយោជន៍ពេញលេញដូចពលរដ្ឋជប៉ុន។
ក្រៅពីនេះ ជប៉ុនក៏កំពុងពិចារណាលើការបន្ធូរបន្ថយការកំណត់នានាដែលប្រទេសនេះកំពុងអនុវត្តចំពោះកម្លាំងពលកម្មមកពីបរទេសផងដែរ៕
July 13, 2023
យន្តហោះលឿនជាងសំឡេងជំនាន់ថ្មីរបស់ណាសា ត្រៀមធ្វើតេស្តដំបូង
យន្តហោះល្បឿនលឿនជាងសំឡេងជំនាន់ថ្មីរបស់ទីភ្នាក់ងារអវកាសអាម៉េរិក (NASA) បានចាប់ផ្ដើមត្រៀមខ្លួនសម្រាប់ការហោះហើរលើកដំបូង។
តាំងពីឆ្នាំ 2018 គម្រោងយន្តហោះ X-59 របស់ណាសា ទទួលបានការចាប់អារម្មណ៍ច្រើនពីសហគមន៍អ្នកសារព័ត៌មាន ហើយវាក៏បាន និងកំពុងរុញច្រានវិស័យទេសចរណ៍ល្បឿនលឿនជាងសំឡេងឱ្យខិតចូលជិតដល់ភាពជាក់ស្ដែង។
ថ្មីៗនេះ ណាសាបានឱ្យដឹងថា កាលពីថ្ងៃទី 19 មិថុនា យន្តហោះ X-59 ត្រូវបាននាំពីរោងចក្រដំឡើងរបស់ Lockheed Martin ទៅកាន់ព្រលានយន្តហោះ។ ក្រោយមក យន្តហោះនេះនឹងត្រូវត្រួតពិនិត្យបច្ចេកទេសនៅលើដីដើម្បីធានាថា បានត្រៀមខ្លួនរួចរាល់សម្រាប់បេសកកម្មហោះហើរនាពេលខាងមុខ។
គោលដៅរបស់ណាសា គឺការបញ្ជាក់ថា យន្តហោះល្បឿនលឿនជាងសំឡេងរបស់ពួកគេអាចហោះបានលឿនជាងល្បឿនរបស់សំឡេង ប៉ុន្តែមិនលាន់ឮខ្លាំងដូចយន្តហោះល្បឿនលឿនជាងសំឡេងដទៃទៀត។
យន្តហោះ X-59 របស់ណាសា ដែលមានបណ្ដោយ 30 ម៉ែត្រ ទទឹង 9 ម៉ែត្រ និងបំពាក់ម៉ាស៊ីនប្រតិកម្មតែមួយគត់ ត្រូវបានរចនាឡើងដោយ General Electric Aviation ដែលជាក្រុមហ៊ុនបុត្រសម្ព័ន្ធរបស់ General Electric។
យន្តហោះ X-59 របស់ណាសា
យន្តហោះនេះត្រូវបានផលិតឡើងដើម្បីអាចហោះក្នុងល្បឿន Mach 1.4 ឬ 1,488 គីឡូម៉ែត្រ/ម៉ោង និងអាចហោះដល់កម្ពស់ 16,764 ម៉ែត្រ។ នៅពេលបញ្ឆេះម៉ាស៊ីន X-59 នឹងបង្កើតជាសំឡេងមួយដ៏តូច ដែលប្រហាក់ប្រហែលនឹងសំឡេងបិទទ្វារឡាន ចំពោះអ្នកដែលស្ដាប់នៅលើដី។ ចំណែកយន្តហោះល្បឿនលឿនជាងសំឡេងដទៃអាចធ្វើឱ្យបែកកញ្ចក់បង្អួច នៅពេលវាហោះឆ្លងកាត់។
ណាសាសង្ឃឹមថា បច្ចេកវិទ្យាខាងលើនេះ អាចឱ្យពួកគេបញ្ចុះបញ្ចូលអាជ្ញាធរគ្រប់គ្រងអាកាសចរណ៍ អនុញ្ញាតឱ្យយន្តហោះល្បឿនលឿនជាងសំឡេង X-59 ហោះហើរពីលើតំបន់ដែលមានមនុស្សរស់នៅ។
បើសិនជាការធ្វើតេស្តនានាទទួលបានជោគជ័យ នោះ X-59 អាចក្លាយជាយន្តហោះល្បឿនលឿនជាងសំឡេងដំបូងគេដែលដឹកអ្នកដំណើរនៅទូទាំងពិភពលោក៕
July 10, 2023
ក្រុមហ៊ុនថ្មីមួយរបស់វៀតនាម គ្រោងនឹងផលិតរថយន្តអគ្គិសនីខ្នាតតូច ប្រជែងនឹង VinFast, Wuling
ម៉ូដែលរថយន្តអគ្គិសនីដំបូងរបស់ក្រុមហ៊ុនវៀតណាម Thai Binh Hung Thinh (Thai Hung) នឹងបង្ហាញវត្តមានក្នុងទីផ្សារនៅឆ្នាំក្រោយ។
កាលពីថ្ងៃទី 28 មិថុនា 2023 ក្រុមហ៊ុន Thai Hung របស់វៀតណាម និងក្រុមហ៊ុន Roding Mobility របស់អាល្លឺម៉ង់ បានចុះកិច្ចព្រមព្រៀងស្រាវជ្រាវ អភិវឌ្ឍ និងផលិតម៉ូតូអគ្គិសនី រថយន្តអគ្គិសនីខ្នាតតូចនៅប្រទេសវៀតណាម។
យោងតាមកិច្ចព្រមព្រៀងខាងលើ Roding នឹងទទួលខុសត្រូវក្នុងផ្នែកព្រឹក្សាយោបល់លើបញ្ហាបច្ចេកទេស គ្រប់គ្រងដំណាក់កាលស្រាវជ្រាវ និងអភិវឌ្ឍផលិតផល រហូតដល់ផលិតបានជាស្ថាពរ។ ក្រោយមក បច្ចេកវិទ្យាទាំងមូលរបស់ពួកគេនឹងត្រូវផ្ទេរទៅឱ្យក្រុមហ៊ុនវៀតណាម Thai Hung។
ក្រុមហ៊ុនវៀតណាមនឹងទទួលបច្ចេកវិទ្យាពី Roding ដើម្បីផលិតម៉ូតូអគ្គិសនី និងរថយន្តអគ្គិសនីខ្នាតតូចនៅវៀតណាម ដើម្បីលក់ក្នុងស្រុក។
រោងចក្ររបស់ពួកគេនឹងអាចផលិតម៉ូតូអគ្គិសនី និងរថយន្តអគ្គិសនីសរុបបាន 15,000 គ្រឿង/ឆ្នាំ ក្នុងនោះរថយន្តអគ្គិសនីនឹងមានប្រហែល 5,000 គ្រឿង/ឆ្នាំ។ តាមគម្រោង រោងចក្រខាងលើនឹងដំណើរការចាប់ពីត្រីមាសទីបួន ឆ្នាំ 2023។ ផលិតផលដំបូងរបស់ក្រុមហ៊ុនខាងលើនឹងបង្ហាញខ្លួននៅឆ្នាំ 2024។
ដូច្នេះ Thai Hung នឹងក្លាយជាក្រុមហ៊ុនផលិតរថយន្តអគ្គិសនីទីបីដែលមានរោងចក្រដំឡើងនៅវៀតណាម បន្ទាប់ពី VinFast របស់មហាសេដ្ឋីវៀតណាម និង Wuling របស់ចិន៕
June 30, 2023
អាម៉េរិកអនុម័តលក់យន្តហោះចម្បាំងតម្លៃជាង 5 ពាន់លានដុល្លារឱ្យប្រទេសឆែក
ក្រសួងការបរទេសអាម៉េរិក យល់ព្រមឱ្យលក់យន្តហោះចម្បាំង F-35 រួមនឹងឧបករណ៍យោធា គ្រាប់រំសេវដែលពាក់ព័ន្ធ ឱ្យសាធារណរដ្ឋឆែក ដើម្បីជួយឱ្យប្រទេសនេះលើកកម្ពស់សមត្ថភាពការពារជាតិ។
ដោយចំណាយប្រាក់ 5.62 ពាន់លានដុល្លារ ឆែកនឹងទទួលបានបណ្ដាយន្តហោះចម្បាំងទំនើប F-35 រួមនឹងម៉ាស៊ីនបម្រុង, មីស៊ីលបាញ់ពីអាកាសទៅអាកាស AIM-120C-8 AMRAAM ចំនួន 70 ដើម, រួមនឹងគ្រាប់បែក ឧបករណ៍ទំនាក់ទំនង និងជំនួយផ្នែកបច្ចេកទេស។ នេះបើតាមមន្ទីរបញ្ចកោណ ប្រកាសកាលពីថ្ងៃទី 29 មិថុនា។ ក្រុមហ៊ុនសំខាន់ៗដែលត្រូវផ្គត់ផ្គង់សព្វាវុធទាំងនេះរួមមាន Lockheed Martin, Raytheon និង Boeing។
មន្ទីរបញ្ចោណបានឱ្យដឹងថា ការលក់ដូរសព្វាវុធនេះទទួលបានការយល់ព្រមពីក្រសួងការបរទេសអាម៉េរិករួចហើយ និងកំពុងរង់ចាំការអនុម័តពីសភា។
យោងតាមក្រសួងការបរទេសអាម៉េរិក សព្វាវុធខាងលើនឹងជួយបង្កើនកម្លាំងការពារជាតិរបស់ប្រទេសឆែក ក៏ដូចជាការចូលរួមគាំទ្រយុទ្ធនាការនានារបស់សម្ព័ន្ធមិត្តយោធាណាតូ។
កាលពីឆ្នាំ 2022 ឆែកបានឱ្យដឹងថា ពួកគេចង់ទិញ F-35 របស់អាម៉េរិក ចំនួន 24 គ្រឿង ដើម្បីប្រើប្រាស់ជំនួសក្រុមហោះហើរ JAS 39 Gripen ដែលជួលពីក្រុមហ៊ុន Saab AB របស់ស៊ុយអែត។ ឆែកមានបំណងទិញ F-35A ដែលហោះឡើង និងចុះចតតាមធម្មតា (CTOL)។
F-35A គឺជាកំណែបំបាំងកាយដែលត្រូវបានអភិវឌ្ឍសម្រាប់ទ័ពអាកាសអាម៉េរិក និងសម្ព័ន្ធមិត្ត។ នេះគឺជាកំណែតូចជាងគេ និងស្រាលជាងគេរបស់យន្តហោះចម្បាំងត្រកូល F-35៕
June 30, 2023
បំណែកសាកសពនាវាមុជទឹក Titan ត្រូវបានស្រង់ឡើងគោក
បំណែករបស់នាវាមុជទឹក Titan ដែលបានជួបគ្រោះថ្នាក់កាលពីថ្ងៃទី 18 មិថុនា 2023 ត្រូវបានស្រង់ឡើងគោក និងនាំទៅកាន់កំពង់ផែនៅប្រទេសកាណាដា ក្នុងនោះក៏អាចមានផ្ទុកបំណែកសាកសពរបស់ជនរងគ្រោះ។
ក្រុមហ៊ុនអាម៉េរិក Pelagic Research ដែលមានរ៉ូបូតបញ្ជាពីចម្ងាយ Odysseus ដែលត្រូវបានប្រើប្រាស់ក្នុងការស្វែងរកនាវា Titan បានឱ្យដឹងថា បំណែកនានាពីសាកសពនាវាមុជទឹក Titan ក្នុងនោះអាចមានផ្នែកខាងមុខ និងឧបករណ៍បញ្ជា ត្រូវបាននាំទៅកាន់កំពង់ផែ St. John នៅប្រទេសកាណាដា កាលពីថ្ងៃទី 28 មិថុនា។
«ក្រុមអ្នកស្វែងរកបានធ្វើការទាំងយប់ទាំងថ្ងៃចំនួន 10 ថ្ងៃ នៅក្នុងការស្វែងរកសាកសពនាវា Titan» អ្នកនាំពាក្យរបស់ក្រុមហ៊ុនខាងលើឱ្យដឹងដូច្នេះ និងបន្តថា បេសកកម្មស្រង់ឡើងគោករបស់ពួកគេត្រូវបានបិទបញ្ចប់។
បំណែកពីនាវា Titan នឹងត្រូវបានដឹកទៅកាន់សហរដ្ឋអាម៉េរិក ដើម្បីវិភាគបន្ថែម។ កម្លាំងឆ្មាំសមុទ្រអាម៉េរិក ថ្មីៗនេះក៏បានបញ្ជាក់ថា ប្រហែលជាបានរកឃើញបំណែកសាកសពរបស់ជនរងគ្រោះនៅក្បែរបំណែកនាវា ក្នុងពេលស្រង់ឡើងគោក។
Jason Meubauer ប្រធានក្រុមស្រាវជ្រាវអំពីហេតុកាណ៍គ្រោះថ្នាក់នាវា Titan របស់សហរដ្ឋអាម៉េរិក និយាយថា «នៅមានកិច្ចការត្រូវធ្វើជាច្រើនទៀតដើម្បីស្វែងរកមូលហេតុដែលនាំឱ្យកើតមានហេតុកាណ៍ដ៏សោកសៅរបស់ Titan»។
នាវាមុជទឹក Titan បានដាច់ទំនាក់ទំនងតាំងពីថ្ងៃទី 18 មិថុនា 2023 ប្រហែលជិតពីរម៉ោងបន្ទាប់ពីបានចាកចេញពីកប៉ាល់មេ Polar Prince ដើម្បីចុះទៅមើលសាកសពកប៉ាល់ Titanic។ កាលពីថ្ងៃទី 22 មិថុនា ក្រុមល្បាតសមុទ្រអាម៉េរិកអះអាងថា នាវា Titan បានបែកបាក់ខ្ទេចខ្ទីនៅបាតសមុទ្រ បណ្ដាលឱ្យមនុស្ស 5 នាក់បាត់បង់ជីវិត។ បំណែករបស់ Titan ត្រូវបានរកឃើញនៅតំបន់ដែលមានចម្ងាយពីក្បាលសាកសពកប៉ាល់ Titanic ប្រហែល 488 ម៉ែត្រ។
មន្ត្រីអាម៉េរិកយល់ថា Titan ត្រូវបានកម្ទេចដោយសម្ពាធទឹកក្នុងជម្រៅជិត 4,000 ម៉ែត្រ ធ្វើឱ្យជនរងគ្រោះហាក់ត្រូវស្លាប់ភ្លាមៗ ប៉ុន្តែមិនទាន់ដឹងច្បាស់ថា គ្រោះថ្នាក់នេះកើតឡើងដោយសារបញ្ហាបច្ចេកទេសក្នុងនាវា ឬដោយសារមនុស្សធ្វើឱ្យមានកំហុស៕
June 29, 2023
មូលហេតុនាំឱ្យនាវាមុជទឹក Titan បាត់ខ្លួន អាចមកពីកត្តាទាំងនេះ
ក្រុមអ្នកជំនាញយល់ថា នាវាមុជទឹក Titan ប្រហែលជាបានជួបបញ្ហាបច្ចេកទេស ឬខូចសម្បកខាងក្រៅ បណ្ដាលឱ្យបាត់ទំនាក់ទំនងនៅពេលមុជក្រោមសមុទ្រទៅមើលសាកសពកប៉ាល់ Titanic។
កងកម្លាំងល្បាតឆ្នេរសមុទ្រអាម៉េរិក កាលពីថ្ងៃទី 19 មិថុនា ប្រកាសថា ពួកគេកំពុងស្វែងរកដានរបស់នាវាមុជទឹកទេសចរណ៍ Titan ដែលបានបាត់ខ្លួនក្នុងពេលមុជចុះទៅមើលសាកសពកប៉ាល់ Titanic នៅបាតមហាសមុទ្រអាត្លង់ទិក។ នាវាជួបគ្រោះថ្នាក់នេះ ដឹកមនុស្ស 5 នាក់ ក្នុងនោះក៏មានមហាសេដ្ឋីអង់គ្លេស បានមុជចុះក្រោមទឹកសមុទ្រនៅព្រឹកថ្ងៃទី 18 មិថុនា ហើយរយៈពេលជាងមួយម៉ោងកន្លះក្រោយមក វាក៏បានបាត់ទំនាក់ទំនង។
OceanGate Expeditions ដែលជាអ្នកគ្រប់គ្រងនាវាខាងលើឱ្យដឹងថា ខ្លួនកំពុងរកគ្រប់វិធីដើម្បីនាំក្រុមអ្នកទេសចរណ៍នេះឡើងមកដោយសុវត្ថិភាព។ កងកម្លាំងរបស់ប្រទេសកាណាដាក៏ចូលរួមការស្វែងរកនាវានេះដែរ ប៉ុន្តែមិនទាន់បានរកឃើញតម្រុយអ្វីនៅឡើយ។
ក្រុមអ្នកជំនាញបានលើកឡើងនូវមូលហេតុជាច្រើនដែលពួកគេយល់ថា អាចជាកត្តាដែលបណ្ដាលឱ្យនាវា Titan បាត់ខ្លួន។ ក្នុងនោះមានដូចជា បញ្ហាដាច់ប្រភពអគ្គិសនី បញ្ហាទាក់ជាប់នឹងវត្ថុអ្វីមួយរបស់សាកសពកប៉ាល់ Titanic និងបញ្ហាប្រព័ន្ធទំនាក់ទំនងជាដើម។
សាកសពកប៉ាល់ Titanic ស្ថិតក្នុងជម្រៅប្រហែល 3,800 ម៉ែត្រ ខាងក្រោមមហាសមុទ្រអាត្លង់ទិក។ នៅជុំវិញសាកសពកប៉ាល់នេះ មានបំណែកជាច្រើនដែលសេសសល់ពីហេតុការណ៍លិចកាលពីជាងមួយសតវត្សរ៍មុន៕
June 20, 2023