ទីក្រុង - La Reine Media

យានជំនិះកង់ពីរទន្ទឹមគ្នាឆ្លាតវៃ ប្រើប្រាស់អគ្គិសនី និងរក្សាលំនឹងដោយស្វ័យប្រវត្ត

SHANE អាចដឹកមនុស្សបានប្រាំនាក់ និងអាចរក្សាលំនឹងដោយស្វ័យប្រវត្តនៅពេលរត់លើផ្លូវក្នុងក្រុង ឬលើផ្លូវល្បឿនលឿន។

រចនារូបរាងរបស់យានជំនិះកង់ពីរទន្ទឹមគ្នាដំបូងគេលើពិភពលោកមួយនេះ ត្រូវបានបង្ហាញដោយ Shane Chen ដែលជាអ្នកបង្កើតស្គី hoverboard រក្សាលំនឹងដោយស្វ័យប្រវត្តដ៏ល្បីឈ្មោះ។ Chen បានដាក់ឈ្មោះឱ្យយានជំនិះថ្មីនេះថា SHANE និងអះអាងថា នេះគឺជា «រូបរាងទោចក្រយានយន្តពិតៗ និងមានប្រសិទ្ធភាពដើម្បីប្រើប្រាស់ប្រចាំថ្ងៃនៅក្នុងទីក្រុង និងតាមផ្លូវល្បឿនលឿន»។ នេះបើតាម Interesting Engineering ចុះផ្សាយកាលពីថ្ងៃទី 18 តុលា 2023។

យានជំនិះនេះមានរូបរាងមិនដូចយានជំនិះដទៃ និងអាចដាក់មនុស្សបានប្រាំនាក់បានយ៉ាងស្រួល ព្រមទាំងមានទ្វារចេញចូលដ៏ធំទូលាយនៅខាងមុខ និងខាងក្រោយ។

SHANE ប្រើប្រាស់កង់ធំៗចំនួនពីរ និងអាចរក្សាលំនឹងរបស់ផ្នែកខាងមុខ និងខាងក្រោយ តាមរយៈប្រព័ន្ធអង្គញាណ (សែនស៊ើរ) ឆ្លាតវៃ និងម៉ូទ័រនៅត្រង់គ្រោងយាន។ វាពុំមានចង្កូត ប៉ុន្តែអាចប្ដូរទិសដៅដោយការបង្កើន ឬបន្ថយកម្លាំង និងល្បឿនទៅកាន់កង់មួយគ្រាប់ ឬកង់ទាំងពីរគ្រាប់។

ទោចក្រយានយន្តនេះត្រូវបានអភិវឌ្ឍឡើងដើម្បីអាចរត់ទាំងនៅក្នុងក្រុង ទាំងនៅលើផ្លូវល្បឿនលឿន និងអាចធ្វើដំណើរក្នុងរង្វង់ 160 គីឡូម៉ែត្រ និងល្បឿន 112 គីឡូម៉ែត្រ/ម៉ោង។

បច្ចុប្បន្ន លោក Shane Chen កំពុងធ្វើការជាមួយដៃគូនានាដើម្បីប្រែក្លាយរចនារូបរាងរបស់យាននេះឱ្យទៅជាការពិត៕

October 19, 2023

ប្រទេសថៃបាញ់បង្ហោះផ្កាយរណបសង្កេតមើលផែនដីទីពីរ

ប្រទេសថៃ កាលពីថ្ងៃទី 09 តុលា 2023 បានបាញ់បង្ហោះផ្កាយរណបសង្កេតផែនដីទីពីរ (THEOS-2) ឡើងទៅកាន់គន្លងតារាវិថីផែនដី ពីតំបន់ Guina របស់ប្រទេសបារាំង។

រយៈពេលប្រហែលមួយម៉ោងក្រោយពីបានបាញ់បង្ហោះ THEOS-2 បានផ្ដាច់ខ្លួនពីរ៉ុក្កែត និងហោះចូលគន្លងតារាវិថីកម្រិតទាបរបស់ផែនដី។

ក្រុមមន្ត្រីថៃឱ្យដឹងថា ប្រព័ន្ធផ្កាយរណបនេះនឹងត្រូវបានដំណើរការសាកល្បងរយៈពេលបីខែ មុននឹងដំណើរការជាផ្លូវការ និងចាប់ផ្ដើមសកម្មភាពសង្កេតមើលផែនដី។ ផ្កាយរណបខាងលើនឹងផ្ដល់ទិន្នន័យចាំបាច់សម្រាប់វិស័យកសិកម្ម ការគ្រប់គ្រងទឹក ការធ្វើផែនការសម្រាប់ទីក្រុង និងការគ្រប់គ្រងធនធានធម្មជាតិ។

ផ្កាយរណបនេះគឺជាជំហានដ៏ធំមួយនៅក្នុងបេសកកម្មទប់ទល់របស់ប្រទេសថៃ នៅចំពោះមុខស្ថានការណ៍បន្ទាន់ ដោយការប្រើប្រាស់ទិន្នន័យថ្មី លំអិត និងត្រឹមត្រូវ ដែលប្រមូលបានដោយឧបករណ៍បច្ចេកវិទ្យាទំនើបៗដែលមាននៅលើ THEOS-2៕

https://www.youtube.com/watch?v=65Sqsho8uWM

October 10, 2023

អូស្ត្រាលីសាងសង់អគារឈើខ្ពស់បំផុតលើពិភពលោក

អាជ្ញាធរទីក្រុង Perth បានអនុម័តគម្រោងសាងសង់អគារកម្ពស់ 191.2 ម៉ែត្រ ដែលប្រើប្រាស់ឈើបន្ទះកុងផ្លាកេផ្សំជាមួយនឹងបេតុងស្នូលដែកថែប។

កាលពីថ្ងៃទី 05 តុលា អាជ្ញាធរទីក្រុង Perth បានអនុម័តសំណើសាងសង់អគារកប់ពពកដែលមានឈ្មោះថា C6 របស់ Grange Development។ យោងតាម CNN អគារនេះនឹងខ្ពស់ជាងជិតពីរដងបើធៀបនឹងអគារឈើ-បេតុងខ្ពស់បំផុតក្នុងលោកនាបច្ចុប្បន្ន។ ម្ចាស់សំណង់នេះឱ្យដឹងថា 42% នៃអគារនេះនឹងសាងសង់ពីឈើ ខណៈសសរធ្វើពីបេតុង និងដែក។

ក្រោយពីបានសាងសង់រួចរាល់ អគរ C6 នឹងបំបែកកំណត់ត្រាអគារឈើ-បេតុងខ្ពស់ជាងគេលើពិភពលោក Ascent នៅទីក្រុង Milwaukee រដ្ឋ Wisconsin សហរដ្ឋអាម៉េរិក ដែលមាន 25 ជាន់ កម្ពស់ 86 ម៉ែត្រ។ C6 នឹងស្ថិតនៅក្នុងក្រុង Charles ភាគខាងត្បូងទីក្រុង Perth និងខ្ពស់ជាងអគារកូនកាត់ឈើ-បេតុង Atlassian Headquarters នៅទីក្រុង Sydney នាពេលខាងមុខ។ Atlassian Headquarters ក៏ត្រូវបានសាងសង់ដើម្បីបំបែកកំណត់ត្រារបស់ Ascent ប៉ុន្តែមិនទាន់រួចរាល់។

ដូចទៅនឹង Atlassian អគារ C6 នឹងមានធ្នឹមធ្វើពីឈើកុងផ្លាកេច្រើនស្រទាប់ដែលមានស៊ុមដែកការពារ។ យោងតាម Grange Development អគារកម្ពស់ 50 ជាន់ និងមានខុនដូជាង 200 នេះ គឺជាអគារស្នាក់នៅដែលមិនបំភាយឧស្ម័នកាបូនដំបូងគេនៅ Western Australia។ C6 នឹងប្រើប្រាស់ឈើ 7,400 ម៉ែត្រគុបដែលបានពីដើមឈើ 600 ដើម។

ក្រៅពីឈើ គម្រោងរបស់ក្រុមហ៊ុនខាងលើក៏រួមមានទាំងតំបន់បៃតងជាច្រើន មានដូចជា សួនរុក្ខជាតិលើដំបូលអគារ កសិដ្ឋានបែបទីក្រុង និងមានការផ្ដល់រថយន្តអគ្គិសនី Tesla Model 3s ចំនួន 80 គ្រឿងដល់អតិថិជនផងដែរ៕

October 6, 2023

តែទឹកដោះគោគជ់បង្កហានិភ័យ «ញៀន» និង «វិបត្តិផ្លូវចិត្ត»

(ប្រទេសចិន) – ក្រុមអ្នកជំនាញឱ្យដឹងថា អាការញៀនតែទឹកដោះគោគឺជាមានពិត និងអាចនាំឱ្យមានបញ្ហាថប់អារម្មណ៍ និងផ្លូវចិត្ត។

ការសន្និដ្ឋាននេះត្រូវបានលើកឡើងដោយយោងទៅលើការសិក្សាស្រាវជ្រាវរបស់សាកលវិទ្យាល័យ Tsinghua និងសាកលវិទ្យាល័យជាតិសេដ្ឋកិច្ច និងហិរញ្ញវត្ថុ (CUFE) ចិន ធ្វើឡើងលើនិស្សិតជាង 5,200 នាក់នៅទីក្រុងប៉េកាំង និងប្រកាសលើទស្សនាវដ្ដី Journal of Affective Disorders កាលពីចុងខែកញ្ញា 2023។

«តែទឹកដោះគោកំពុងពេញនិយមខ្លាំងនៅប្រទេសចិន ពិសេសគឺក្នុងស្រទាប់យុវវ័យ។ ការរកឃើញរបស់យើងសង្កត់ធ្ងន់ថា ការប្រើប្រាស់តែទឹកដោះគោអាចនាំឱ្យញៀន ទាក់ទងនឹងបញ្ហាផ្លូវចិត្ត ថប់អារម្មណ៍ និងការចង់ធ្វើអត្តឃាត» ក្រុមអ្នកស្រាវជ្រាវអះអាងដូច្នេះ។

តាមរយៈការប្រើប្រាស់រង្វាស់សម្រាប់វាស់ស្ទង់កម្រិតញៀន (ពិនិត្យទៅលើកត្តានានាមានដូចជាការចង់ខ្លាំង និងចូលចិត្តខ្លាំង) ក្រុមអ្នកស្រាវជ្រាវខាងលើបានរកឃើញភស្តុតាងបង្ហាញថា យុវវ័យមួយចំនួនមានអាការញៀន។ ជិត 50% នៃអ្នកស្ម័គ្រចិត្តក្នុងការសិក្សាស្រាវជ្រាវបានឱ្យដឹងថា ពួកគេផឹកតែទឹកដោះគោយ៉ាងតិចម្ដងក្នុងមួយសប្ដាហ៍។

ក្រៅពីស្ករបន្ថែម ភេសជ្ជៈនេះក៏មានផ្ទុកជាតិកាហ្វេអ៊ីន ដែលអាចនាំឱ្យមានអារម្មណ៍ធុញទ្រាន់ ថប់អារម្មណ៍ និងឯកាក្នុងសង្គម។ នេះគឺជាបញ្ហាលាក់មុខ និងមានច្រើន ដែលត្រូវការពិនិត្យស៊ីជម្រៅ ពិសេសនៅពេលតែទឹកដោះគោគជ់កាន់តែទទួលបានការពេញនិយម។

ក្រុមអ្នកស្រាវជ្រាវសរសេរថា «លទ្ធផលបង្ហាញថា ការប្រើប្រាស់តែទឹកដោះគោអាចនាំឱ្យមានអាការញៀន ដោយសារវាធ្វើឱ្យមានភាពពឹងផ្អែក ការចង់ផឹក កម្រិតនៃការប្រើប្រាស់ខ្ពស់ មិនអាចបញ្ឈប់បាន និងអារម្មណ៍មានកំហុស»។

ការវិភាគដទៃជាច្រើនទៀតបង្ហាញថា យុវវ័យចិន និងតំបន់ជាច្រើនផ្សេងទៀតកំពុងប្រើប្រាស់តែទឹកដោះគោដើម្បីទប់ទល់ និងកែសម្រួលអារម្មណ៍។ ភេសជ្ជៈទាំងនេះមានកម្រិតគ្រោះថ្នាក់ប្រហាក់ប្រហែលនឹងការប្រើប្រាស់បណ្ដាញសង្គមញឹកញាប់ហួស ឬអាភៀន។

ក្នុងអនាគត ក្រុមស្រាវជ្រាវខាងលើនឹងបន្តការសិក្សាស៊ីជម្រៅបន្ថែមទៀត ដើម្បីបើកផ្លូវឱ្យមានការរកវិធីដោះស្រាយបញ្ហាដែលអាចកើតឡើងដោយសារការញៀននឹងតែទឹកដោះគោ៕

October 4, 2023

ឥណ្ឌូណេស៊ីសម្ពោធដាក់ឱ្យប្រើប្រាស់ផ្លូវដែកល្បឿនលឿនដំបូងអាស៊ីអាគ្នេយ៍

ផ្លូវដែកល្បឿនលឿនដំបូងរបស់ប្រទេសឥណ្ឌូណេស៊ី ជិតបើកទ្វារទទួលអ្នកដំណើរ ដែលនេះនឹងជួយកាត់បន្ថយពេលវេលានៃការធ្វើដំណើររវាងទីក្រុងពីរធំជាងគេបង្អស់របស់ប្រទេសនេះ។

គម្រោងផ្លូវដែកដែលមានតម្លៃ 7.3 ពាន់លានដុល្លារអាម៉េរិកនេះនឹងត្រូវបានសម្ពោធដាក់ឱ្យដំណើរការក្នុងថ្ងៃទី 02 តុលា 2023 ក្រោយពីបានពន្យារពេលច្រើនលើក។ នេះគឺជាមួយផ្នែកនៃគំនិតផ្ដួចផ្ដើមហេដ្ឋារចនាសម្ព័ន្ធខ្សែក្រវាត់ និងផ្លូវ ដែលទទួលបានជំនួយភាគច្រើនពីបណ្ដាក្រុមហ៊ុនរដ្ឋចិន។

«យើងនឹងសម្ពោធនៅថ្ងៃទី 02 តុលា ដោយសារប្រធានាធិបតីជាប់រវល់នៅក្នុងថ្ងៃទី 01 តុលា» រដ្ឋមន្ត្រីក្រសួងគមនាគមន៍ឥណ្ឌូណេស៊ី Budi Karya Sumadi កាលពីថ្ងៃទី 29 កញ្ញា ថ្លែងដូច្នេះ។

ផ្លូវដែកសម្រាប់រថភ្លើងល្បឿនលឿនប្រវែង 138 គីឡូម៉ែត្រ និងមានឈ្មោះថា WHOOSH នេះ តភ្ជាប់រវាងរដ្ឋធានីហ្សាការតា និង Bandung នៅខេត្តជ្វាខាងលិច ដែលជាទីក្រុងធំជាងគេលំដាប់ទីពីររបស់ឥណ្ឌូណេស៊ី និងជាមជ្ឈមណ្ឌលសិល្បៈ វប្បធម៌ដ៏ធំរបស់ឥណ្ឌូណេស៊ី។

រថភ្លើងដែលរត់លើផ្លូវដែក WHOOSH ដំណើរការដោយអគ្គិសនី និងមានល្បឿនប្រហែល 350 គីឡូម៉ែត្រ/ម៉ោង នឹងជួយកាត់បន្ថយពេលវេលាក្នុងការធ្វើដំណើររវាង ហ្សាការតា និង Bandung ពីបីម៉ោងមកនៅក្រោមមួយម៉ោង។ WHOOSH ក៏ជាផ្លូវដែកល្បឿនលឿនដំបូងនៅតំបន់អាស៊ីអាគ្នេយ៍ផងដែរ។

គម្រោងខាងលើនេះត្រូវបានគ្រប់គ្រងដោយក្រុមហ៊ុនបណ្ដាក់ទុនរួម PT Kereta Cepat ឥណ្ឌូណេស៊ី – ចិន (PT KCIC)។ តំណាងក្រុមហ៊ុននេះក៏បានឱ្យដឹងថា ស្ថាប័នពាក់ព័ន្ធកំពុងចរចាអំពីការពង្រីកផ្លូវដែកល្បឿនលឿនទៅកាន់ Surabaya ដែលជាទីក្រុងកំពង់ផែធំរបស់ខេត្តជ្វាខាងកើត។

កិច្ចព្រមព្រៀងអភិវឌ្ឍផ្លូវរថភ្លើងល្បឿនលឿននៅឥណ្ឌូណេស៊ី ត្រូវបានចុះហត្ថលេខាកាលពីឆ្នាំ 2015 និងចាប់ផ្ដើមស្ថាបនាតាំងពីចុងឆ្នាំនោះ។ តាមផែនការដំបូង គម្រោងនេះគ្រោងនឹងត្រូវបានដាក់ឱ្យដំណើរការក្នុងឆ្នាំ 2019 ប៉ុន្តែត្រូវបានពន្យារពេលច្រើនលើកដោយសារតែបញ្ហាកូវីដ-19៕

October 2, 2023

BYD Yangwang U8 បង្ហាញខ្លួនជាផ្លូវការ តម្លៃចាប់ពី 150,600 ដុល្លារអាម៉េរិក

Yangwang ដែលជាយីហោរថយន្តប្រណិតរបស់ក្រុមហ៊ុនចិន BYD ថ្ងៃនេះបានបង្ហាញជាផ្លូវការនូវរថយន្តអគ្គិសនីដំបូងរបស់ខ្លួននៅប្រទេសចិន ដែលមានតម្លៃចាប់ពី 150,600 ដុល្លារអាម៉េរិក ហើយការប្រគល់ទំនិញនឹងធ្វើឡើងចាប់ពីខែតុលាឆ្នាំនេះ។

រថយន្តអគ្គិសនី Yangwang U8 នេះមានបណ្ដោយប្រវែង 5,050 មម និងកម្ពស់ 1,930 មម ខណៈដែលប្រវែងបណ្ដោយជាមូលដ្ឋានគឺ 3,050 មម។

រថយន្តនេះបំពាក់ម៉ាស៊ីនចំនួនបួនដែលបង្កើតកម្លាំង 880 គីឡូវ៉ាត់ ប្រហាក់ប្រហែលនឹងកម្លាំង 1,200 សេះ។ ថ្មរបស់វាផ្ទុកថាមពលបាន 49.05 គីឡូវ៉ាត់ម៉ោង ជួយឱ្យរថយន្តបរបាន 180 គីឡូម៉ែត្រ និងអាចរត់បាន 1,000 គីឡូម៉ែត្រនៅពេលចាក់សាំង និងបញ្ចូលអគ្គិសនីមួយពេញ។

Yangwang បានដាក់ឱ្យបញ្ជាទិញជាមុនរថយន្តអគ្គិសនី U8 នេះ ចាប់ពីថ្ងៃទី 18 មេសា 2023 ជាថ្ងៃដំបូងនៃពិព័រណ៍រថយន្តសៀងហៃ។

យោងតាម CnEVPost ក្រុមហ៊ុន Yangwang ឱ្យដឹងថា នឹងបង្កើតហាងលក់ផ្ទាល់ជាង 90 កន្លែង ដែលគ្របដណ្ដប់ទីក្រុងជាង 40 នៅប្រទេសចិន នៅចុងឆ្នាំនេះ៕

September 21, 2023

មនុស្សស្លាប់ដោយសារទឹកជំនន់នៅលីប៊ីកើនលើសមួយម៉ឺនមួយពាន់នាក់

ក្រុមមន្ត្រីលីប៊ីបានអំពាវនាវឱ្យមានការស៊ើបអង្កេតបន្ទាន់ បន្ទាប់ពីចំនួនមនុស្សស្លាប់ដោយសារទឹកជំនន់នៅទីក្រុងជាប់សមុទ្រ Derna កាលពីថ្ងៃទី 11 កញ្ញា បានកើនឡើងដល់ជាង 11,000 នាក់។

អង្គការអឌ្ឍចន្ទក្រហមលីប៊ី កាលពីថ្ងៃទី 14 កញ្ញា បានឱ្យដឹងថា មនុស្ស 11,300 នាក់ត្រូវបានបញ្ជាក់ថាបានស្លាប់ក្នុងគ្រោះមហន្តរាយទឹកជំនន់នេះ ក្នុងនោះមានសាកសពជិត 2,000 នាក់ត្រូវបានទឹកជំនន់គួចចូលទៅសមុទ្រ។ ក្រុមមន្ត្រីនៅទីក្រុង Derna ជឿថា ចំនួនមនុស្សដែលបានស្លាប់អាចកើនដល់ 20,000 នាក់។

អង្គការឧតុនិយមពិភពលោក (WMO) របស់អង្គការសហប្រជាជាតិយល់ថា ការបាត់បង់ជីវិតមនុស្សដ៏ធំធេងអាចចៀសវាងបាន បើសិនលីប៊ីមានស្ថាប័នឧតុនិយមដែលមានប្រសិទ្ធភាព។ «បើសិនស្ថាប័នឧតុនិយមដំណើរការធម្មតា ពួកគេអាចប្រកាសអាសន្ន។ ស្ថាប័នគ្រប់គ្រងស្ថានការណ៍បន្ទាន់គួរណាស់តែបានធ្វើការឈ្លៀសមនុស្ស» Petteri Taalas ប្រធាន WMO ថ្លែងដូច្នេះ។

ភ្លៀងធំដែលកើតឡើងដោយសារព្យុះ Daniel កាលពីដើមសប្ដាហ៍នេះបានធ្វើឱ្យទំនប់ទឹកចំនួនពីរនៅកំណាត់ខាងលើនៃទន្លេដែលហូរឆ្លងកាត់ទីក្រុង Derna ត្រូវបាក់ នាំឱ្យទឹកជំនន់ហូរចូលទីក្រុងដែលមានប្រជាជនប្រមាណ 90,000 នាក់ និងបានបំផ្លាញ និងកួចយកស្ទើរគ្រប់អ្វីៗទាំងអស់ទៅកាន់សមុទ្រ៕

September 15, 2023

ព្រលានយន្តហោះរបស់រុស្ស៊ីរងការវាយប្រហារពី UAV

អភិបាលខេត្ត Pskov ឱ្យដឹងថា ព្រលានយន្តហោះនៅទីក្រុង Pskov បានរងការវាយប្រហារពីយន្តហោះគ្មានមនុស្សបើក (UAV) បណ្ដាលឱ្យយន្តហោះដឹកជញ្ជូនច្រើនគ្រឿងត្រូវខូចខាត។

«ក្រសួងការពារជាតិកំពុងដោះស្រាយការវាយប្រហារពី UAV មកលើព្រលានយន្តហោះ Pskov» Mikhail Vedernikov អភិបាលខេត្ត Pskov នៅភាគពាយព្យប្រទេសរុស្ស៊ី ឱ្យដឹងដូច្នេះ។ លោកក៏បានបង្ហោះវីដេអូស្ដីពីការវាយប្រហារនេះនៅលើបណ្ដាញសង្គមផងដែរ។

ក្រសួងការពារជាតិរុស្ស៊ីមិនទាន់បញ្ចេញប្រតិកម្មអ្វីនៅឡើយ។ «យោងតាមព័ត៌មានដំបូង ពុំមានករណីស្លាប់» លោក Vedernikov និយាយដូច្នេះ និងបន្ថែមថា ទំហំនៃការខូចខាតកំពុងត្រូវបានវាយតម្លៃ។

សារព័ត៌មាន TASS ដកស្រង់ប្រភពព័ត៌មានពីស្ថាប័នសង្គ្រោះបន្ទាន់ឱ្យដឹងថា យន្តហោះដឹកជញ្ជូនធុនធ្ងន់ Ilyushin II-76 ចំនួនបួនគ្រឿង បានរងការខូចខាត។ ចំណែកដែនអាកាសនៅតំបន់ព្រលានយន្តហោះ Vnukovo របស់រដ្ឋធានីមូស្គូ ត្រូវបានបិទខ្ទប់ក្នុងរយៈពេលខ្លី។

សារព័ត៌មានរុស្ស៊ី Readovka បានផ្សាយថា យន្តហោះ UAV ប្រហែល 15 គ្រឿងរបស់អ៊ុយក្រែន ដែលហោះសំដៅទៅកាន់ព្រលានយន្តហោះ Pskov ត្រូវបានបាញ់ទម្លាក់។ ទំព័រ Telegram Mash និយាយថា UAV មួយគ្រឿងទំនងជាបានហោះសំដៅឃ្លាំងឥន្ធនៈ និងបានផ្ទុះឆេះ បង្កើតបានជាផ្សែងខ្មៅក្រាស់នៅលើទីក្រុង។

Pskov មានចម្ងាយពីព្រំដែនអ៊ុយក្រែនប្រហែលជិត 800 គីឡូម៉ែត្រ។ ទីក្រុងនេះមានចម្ងាយពីប្រទេសសមាជិកណាតូចំនួនពីរគឺ អេស្តូនីប្រហែល 30 គីឡូម៉ែត្រ និងឡេតូនី ប្រហែល 60 គីឡូម៉ែត្រ ទៅទិសខាងលិច៕

https://www.youtube.com/watch?v=F63FUYz7_IM

August 30, 2023

ភូមិឋានដាច់ស្រយាលដល់ថ្នាក់អ្នកភូមិត្រូវបើកយន្តហោះទៅផ្សារ

ប្រជាពលរដ្ឋនៅ Port Alsworth ត្រូវបើកបរយន្តហោះទៅកាន់ទីក្រុងនៅជិតបំផុតដែលមានចម្ងាយជាង 300 គីឡូម៉ែត្រដើម្បីដើរផ្សារទិញទំនិញចាំបាច់។

Salina Alsworth អាយុ 25 ឆ្នាំ រស់នៅឯ Port Alsworth ដែលជាភូមិដាច់ស្រយាលបំផុតមួយរបស់ពិភពលោក។ ភូមិនេះស្ថិតក្នុងរដ្ឋ Alaska របស់សហរដ្ឋអាម៉េរិក។ ជីដូន ជីតាទួតរបស់ Salina គឺជាមនុស្សដំបូងៗរបស់ Port Alworth នៅក្នុងទសវត្សរ៍ឆ្នាំ 1940។ បច្ចុប្បន្ន ភូមិនេះមានប្រជាជនប្រហែល 186 នាក់ ឆ្លងកាត់ 5 ជំនាន់មនុស្ស។ ចំនួនប្រជាជនអាចកើនដល់ 400 នាក់នៅក្នុងរដូវកាលទេសចរណ៍។

ភូមិនេះពុំមានផ្លូវធ្វើដំណើរឆ្លងកាត់ ហើយក៏ពុំមានផ្សារ មន្ទីរពេទ្យដូចភូមិដទៃឡើយ។ ទីក្រុងដែលនៅជិតបំផុតគឺ Anchorage ប៉ុន្តែមានចម្ងាយពីភូមិរបស់ Salina រហូតដល់ជាង 300 គីឡូម៉ែត្រ ហើយមធ្យោបាយតែមួយគត់ដែលគេអាចប្រើប្រាស់បានគឺយន្តហោះ និងត្រូវធ្វើដំណើរជាងមួយម៉ោង។ ដូច្នេះ សូម្បីតែទៅផ្សារទិញអីវ៉ាត់ក៏ត្រូវជិះយន្តហោះ។

នៅពេលទិញទំនិញតាមអ៊ីនធើណិត ប្រជាជននៅក្នុងភូមិ Port Alsworth ត្រូវចំណាយលើសេវាដឹកជញ្ជូនពី 2 ទៅ 5 ដុល្លារ/គីឡូក្រាម និងមិនមានការកំណត់ពេលវេលាជាក់លាក់សម្រាប់ការប្រគល់ទំនិញ ព្រោះត្រូវអាស្រ័យលើអាកាសធាតុ។

គ្រួសាររបស់នាង Salina មានតំបន់លំហែកាយមួយនៅ Port Alsworth ដែលមានឈ្មោះថា Lake Clark ជាទីដែលមានភ្ញៀវទេសចរណ៍ជាច្រើនមកកម្សាន្តជារៀងរាល់ឆ្នាំ។ Salina ឱ្យដឹងថា គ្រួសារនាងមានយន្តហោះខ្នាតតូចមួយចំនួនដែលសមស្របនឹងភូមិសាស្ត្រផ្សេងៗគ្នា ក្នុងនោះមានទាំងតំបន់ព្រឹល ទឹកកកផងដែរ។

នៅរដូវរងា ពេលធ្វើដំណើរតាមយន្តហោះ អ្នកភូមិត្រូវស្លៀកពាក់ដូចអ្នកទៅលេងតំបន់ប៉ូលខាងជើង ព្រោះតែអាកាសធាតុត្រជាក់រហូតដល់ជាង -30 អង្សាសេ៕

August 29, 2023

យន្តហោះបុគ្គលមានរាងដូចស៊ុត អាចហោះក្នុងល្បឿនមួយរយគីឡូម៉ែត្រ/ម៉ោង

Airscooter ដែលត្រូវបានរចនាឡើងដើម្បីជំនួសកូនរថយន្ត អាចហោះហើរក្នុងល្បឿន 100 គីឡូម៉ែត្រក្នុងមួយម៉ោង ដោយហោះឡើង និងចុះចតត្រង់ដូចឧទ្ធម្ភាគចក្រ។

អ្នកស្រាវជ្រាវជនជាតិបារាំង Franky Zapata បានបង្ហាញយន្តហោះលក្ខណៈបុគ្គលថ្មីមួយប្រភេទ មានកាប៊ីនសម្រាប់អ្នកបើកបរដែលមានរូបរាងដូចស៊ុត និងអាចហោះក្នុងកម្ពស់ 2,900 ម៉ែត្រ។ យោងតាម Mail ដែលបានចុះផ្សាយកាលពីថ្ងៃទី 21 សីហា 2023 យន្តហោះ Airscooter អាចជួយឱ្យការធ្វើដំណើរប្រហែលពីរម៉ោងតាមរថយន្តនៅក្នុងពេលចរាចរណ៍ចង្អៀត ចុះមកនៅត្រឹម 10 នាទី។

ក្រុមហ៊ុន Zapata ឱ្យដឹងថា យានជំនិះថ្មីនេះកំពុងស្ថិតក្នុងដំណាក់កាលអភិវឌ្ឍ។ Airscooter គឺជាយន្តជំនិះដែលហោះឡើង និងចុះចត់ត្រង់ដូចឧទ្ធម្ភាគចក្រ (VTOL)។ នេះគឺជាយន្តហោះកូនកាត់ (ហាយព្រីដ) ប្រើប្រាស់អគ្គិសនី និងប្រេងឥន្ធនៈ ដើម្បីផ្ដល់ថាមពលដល់រ៉ូទ័រ 6 គ្រឿងដែលបំពាក់ពីខាងលើកាប៊ីន។ Airscooter អាចហោះហើររយៈពេលពីរម៉ោងបន្តបន្តបន្ទាប់ យូរជាងយាន VTOL ដទៃ។

Airscooter មានទម្ងន់ 115 គីឡូក្រាម។ គ្រប់គ្នាអាចបើកបរយន្តហោះនេះបាន បន្ទាប់ពីឆ្លងកាត់ការហ្វឹកហាត់រយៈពេលខ្លី។ បើទោះជាផលិតឡើងក្នុងបំណងជំនួសកូនរថយន្ត ប៉ុន្តែ Airscooter នឹងមិនត្រូវបានដាក់លក់ក្នុងទីផ្សារនោះទេ។ ជំនួសមកវិញ អ្នកប្រើប្រាស់នឹងត្រូវបង់ប្រាក់មួយចំនួនសម្រាប់ការបើកបរ 40 នាទីដោយផ្ទាល់ដៃ និងគយគន់ទេសភាពតាមបង្អួច។

ចាប់ពីដើមឆ្នាំក្រោយ Zapata នឹងបើកមជ្ឈមណ្ឌលហោះហើរនៅសហរដ្ឋអាម៉េរិក ដើម្បីផ្ដល់សេវាកម្មហោះហើរកម្សាន្តដល់អតិថិជន។ មជ្ឈមណ្ឌលដំបូងនឹងមាននៅក្នុងទីក្រុង Lake Havasu រដ្ឋ Arizona៕

August 23, 2023

Tag: ទីក្រុង