តារា - La Reine Media

Ronaldo ថា «Saudi Pro League នៅអារ៉ាប់ ល្អជាង MLS នៅអាម៉េរិក»

(ព័រទុយហ្កាល់) – Cristiano Ronaldo អះអាងថា មិនចូលចិត្តប្រកួតនៅពានរង្វាន់បាល់ទាត់អាជីពអាម៉េរិក MLS ជាទីដែល Lionel Messi ទើបតែបានក្លាយជាសមាជិក។

«Saudi Pro League ល្អជាង MLS» ខ្សែប្រយុទ្ធវ័យ 38 ឆ្នាំ លោក Ronaldo ឆ្លើយដូច្នេះនៅពេលត្រូវបានសួរអំពីលទ្ធភាពទៅទាត់នៅសហរដ្ឋអាម៉េរិកដូច Messi ដែលធ្លាប់ជាគូប្រជែងមួយរយៈពេលរបស់គាត់នៅទ្វីបអឺរ៉ុប។

Ronaldo ក៏និយាយថា មានមោទកភាពនៅពេលបានក្លាយជាអ្នកបើកផ្លូវសម្រាប់ការមកទាត់នៅ Saudi Pro League។ «ពេលនេះ កីឡាករនាំគ្នាសម្រុកមកកាន់ទីនេះ» អតីតកីឡាកររបស់ Real និង Man Utd បន្ថែមដូច្នេះ។

Ronaldo បានចូលមកកាន់ក្លឹប Al Nassr កាលពីខែមករាឆ្នាំ 2023 បន្ទាប់ពីដើរចេញពី Man Utd ព្រោះតែមានបញ្ហាជាមួយគ្រូបង្វឹក។ កីឡាករដែលដើរតាមគន្លងរបស់ CR7 រួមមាន Karim Benzema, Marcelo Brozovic, N’Golo Kante និង Roberto Firmino ជាដើម ទន្ទឹមនឹងវត្តមានរបស់គ្រូបង្វឹកល្បីឈ្មោះជាច្រើនរូបផងដែរ។ សកម្មភាពទាំងនេះបាន និងកំពុងជួយលើកកម្ពស់លំដាប់របស់ពានរង្វាន់ Saudi Pro League នៅអារ៉ាប៊ីសាអូឌីត។

ក៏ប៉ុន្តែ ក្លឹបនៅអារ៉ាប៊ីសាអូឌីត (Al Hilal) មិនអាចបញ្ចុះបញ្ចូល Messi ឱ្យមកកាន់ប្រទេសនេះបាន ក្រោយពី M10 ចប់កិច្ចសន្យាជាមួយនឹងក្លឹប PSG នៅប្រទេសបារាំង។ កំពូលតារាបាល់ទាត់របស់អាហ្សង់ទីន បានសម្រេចចិត្តជ្រើសយកក្លឹប Inter Miami និងត្រូវបានបង្ហាញខ្លួនជាផ្លូវការកាលពីម្សិលមិញ៕

July 18, 2023

សំបុត្រចូលមើល Messi ទាត់ឱ្យក្លឹប Inter Miami ក្នុងការប្រកួតដំបូង កំពុងឡើងថ្លៃខ្ពស់ខ្លាំង

(សហរដ្ឋអាម៉េរិក) – សំបុត្រចូលទស្សនា Lionel Messi ទាត់ក្នុងការប្រកួតដំបូងនៅ Inter Miami ដែលនឹងត្រូវប៉ះក្រុម Cruz Azul ក្នុងក្របខណ្ឌ Leagues Cup នៅថ្ងៃទី 21 កក្កដាខាងមុខ បានឡើងថ្លៃលើសពី 100,000 ដុល្លារអាម៉េរិក។

កាលពីចុងសប្ដាហ៍កន្លង គេហទំព័ររបស់ក្លឹបបាល់ទាត់ Inter Miami បានបញ្ជាក់ថា Messi រួមនឹងកីឡាករថ្មី Sergio Busquets អាចទាត់នៅក្នុងការប្រកួតជាមួយនឹងក្រុម Cruz Azul ក្នុងក្របខណ្ឌ Leagues Cup នៅលើទីលាន DRV PNK ក្នុងថ្ងៃទី 21 កក្កដា 2023។ Leagues Cup គឺជាពានរង្វាន់ប្រចាំឆ្នាំ ដែលត្រូវបានបង្កើតឡើងកាលពីឆ្នាំ 2019 និងមានការចូលរួមពីបណ្ដាក្លឹបមកពីពានរង្វាន់បាល់ទាត់អាជីពអាម៉េរិក (MLS) និង Liga MX របស់ម៉ិចស៊ិច នៅអាម៉េរិកខាងជើង។

យោងតាម Goal សំបុត្រចូលទស្សនាការប្រកួតនៅក្នុងកីឡដ្ឋាន DRV PNK កាន់តែពិបាករកទិញ ហើយតម្លៃក៏កើនឡើងខ្ពស់ខ្លាំងក្នុងប៉ុន្មានថ្ងៃចុងក្រោយនេះ។ Vivid Seats ដែលជាគេហទំព័រជំនាញខាងទិញ-លក់សំបុត្រចូលមើលបាល់ទាត់ បច្ចុប្បន្នកំពុងដាក់លក់សំបុត្រចូលទស្សនា Messi ទាត់ក្នុងការប្រកួតដំបូងនៅ Inter Miami ក្នុងតម្លៃ 110,000 ដុល្លារអាម៉េរិក/សំបុត្រ។

តម្លៃមធ្យមសម្រាប់សំបុត្រចូលមើលការប្រកួតរវាង Inter Miami និង Cruz Azul គឺ 487 ដុល្លារ ពោលគឺខ្ពស់ជាងទ្វេដង បើធៀបនឹងសំបុត្រចូលមើលការប្រកួតមិត្តភាពរវាង Inter Miami និងម្ចាស់ជើងឯក La Liga Barca កាលពីរដូវក្ដៅឆ្នាំមុន។

តម្រូវការសំបុត្រចូលមើល Messi ទាត់ក្នុងប្រកួតដំបូងនៅពានរង្វាន់បាល់ទាត់អាជីពអាម៉េរិក (MLS) ដែល Inter Miami ត្រូវប៉ះនឹងក្រុម Charlotte FC ក្នុងថ្ងៃទី 21 សីហា ក៏កើនឡើងខ្ពស់ផងដែរ និងត្រូវបានដាក់លក់ក្នុងតម្លៃប្រហែល 288 ដុល្លារ/សំបុត្រ។ តួលេខនេះអាចនឹងកើនឡើងខ្ពស់ជាងនេះនាពេលខាងមុខ បើសិន Messi បង្ហាញថ្វីជើងបានល្អនៅ Leagues Cup។

មិនត្រឹមតែសំបុត្រនោះទេ សូម្បីតែអាវរបស់ Messi ក៏ត្រូវបានអ្នកគាំទ្រតាមរកទិញច្រើនផងដែរ។ ដោយសារតែមិនទាន់ត្រូវបានដាក់លក់លើគេហទំព័ររបស់ Inter Miami ដូច្នេះអ្នកគាំទ្រមានតែរកទិញអាវលេខ 10 របស់ Messi នៅឯហាងក្នុងកីឡដ្ឋាន DRV PNK ដែលដាក់លក់ក្នុងតម្លៃ 199 ដុល្លារអាម៉េរិក/អាវ។

ទំព័រ Goal បានឱ្យដឹងថា តម្លៃសំបុត្រចូលមើលការប្រកួតរបស់ក្រុមបាល់ទាត់ Inter Miami បានកើនឡើងជិត 900% ចាប់តាំងពីក្លឹបនេះបានបញ្ជាក់ថា ចុះហត្ថលេខាជាមួយនឹង Messi កាលពីថ្ងៃទី 07 មិថុនា 2023។ នៅក្លឹបថ្មីនេះ កំពូលតារាបាល់ទាត់អាហ្សង់ទីន នឹងទទួលបានប្រាក់បៀវត្សរ៍ពី 50 លាន ដល់ 60 លានដុល្លារ/ឆ្នាំ។ តម្លៃសរុបនៃកិច្ចព្រមព្រៀងរបស់ Messi ក្នុងរយៈពេលពីរឆ្នាំកន្លះ នឹងចាប់ពី 125 លាន ដល់ 150 លានដុល្លារ។

Messi ក៏នឹងទទួលបានប្រាក់ខ្លះពីបណ្ដាគណនីថ្មីដែលចុះឈ្មោះមើល MLS នៅលើ Apple TV ក៏ដូចជាប្រាក់ចំណេញមួយផ្នែករបស់ក្រុមហ៊ុន Adidas នៅសហរដ្ឋអាម៉េរិកផងដែរ។

កាលពីព្រលប់ថ្ងៃទី 16 កក្កដា Messi ត្រូវបាន Inter Miami បង្កើតព្រឹត្តិការណ៍បង្ហាញខ្លួនមួយដែលមានឈ្មោះថា «The Unveil» នៅក្នុងកីឡដ្ឋាន DRV PNK។ នៅទីនេះ ម្ចាស់បាល់មាស 7 គ្រាប់ បានថ្លែងអំណរគុណអ្នកគាំទ្រ មិត្តរួមក្រុមថ្មី និងគណៈគ្រប់គ្រងក្លឹប Inter Miami ចំពោះការទទួលស្វាគមន៍ដ៏អស្ចារ្យនេះ ព្រមទាំងបានសម្ដែងអំពីមហិច្ឆតាចង់យកឈ្នះ ដើម្បីជួយឱ្យក្លឹបនេះរីកចម្រើនបន្តទៀត៕

July 18, 2023

Messi លេចមុខជាផ្លូវការក្នុងព្រឹត្តិការណ៍បង្ហាញខ្លួនរបស់ក្លឹប Inter Miami

(សហរដ្ឋអាម៉េរិក) – បើទោះជាមានភ្លៀងធំនាំឱ្យព្រឹត្តិការណ៍បង្ហាញវត្តមានជាផ្លូវការត្រូវបានពន្យារពេល ប៉ុន្តែអ្នកគាំទ្រនៅតែមកចូលរួមពេញទីលានដើម្បីទស្សនាទិដ្ឋភាព Lionel Messi បង្ហាញខ្លួននៅក្លឹបបាល់ទាត់ Inter Miami។

ក្លឹប Inter Miami ប្រារព្ធព្រឹត្តិការណ៍បង្ហាញវត្តមាន Messi កាលពីវេលាម៉ោង 18 ថ្ងៃទី 16 កក្កដា (ម៉ោងនៅភាគខាងត្បូងរបស់សហរដ្ឋអាម៉េរិក) នៅក្នុងកីឡដ្ឋាន DRV PNK។ មុនពេលព្រឹត្តិការណ៍ត្រូវបានធ្វើឡើង ភ្លៀងមួយមេធំបានបង្អុរចុះ បណ្ដាលឱ្យមានការកកស្ទះចរាចរណ៍។

ខ្លោងទ្វារទទួលសំបុត្រក៏ត្រូវបានបិទដើម្បីចៀសវាងបញ្ហា។ ដូច្នេះ ទស្សនិកជនស្ទើរតែទាំងអស់បានជាប់នៅខាងក្រៅកីឡាដ្ឋាន។ ក៏ប៉ុន្តែ ទោះជាភ្លៀងខ្លាំងយ៉ាងណាក៏មិនអាចកាត់បន្ថយភាពសប្បាយរីករាយរបស់អ្នកគាំទ្រ។ យោងតាម Daily Mail ជនជាតិអាហ្សង់ទីនប្រហែល 100,000 នាក់កំពុងរស់នៅក្នុងតំបន់ Miami។

ម៉ោងប្រហែលជិត 19 Messi នាំភរិយា Antonella និងកូនៗមកកាន់កីឡដ្ឋាន។ M10 កាន់ដៃកូនប្រុសច្បងអាយុ 10 ឆ្នាំ នៅក្នុងការការពាររបស់បុគ្គលិកសន្តិសុខ។ Mateo អាយុ 7 និង Ciro អាយុ 5 ឆ្នាំ ដើរពីក្រោយជាមួយម្ដាយ។

នៅក្នុងកីឡដ្ឋាន DRV PNK ដែលមាន 18,000 កៅអី ពុំនៅសល់កន្លែងឈរនោះទេ។ គណៈកម្មការរៀបចំត្រូវដំឡើងកន្លែងទស្សនាបន្ថែមដើម្បីឆ្លើយតបនឹងតម្រូវការរបស់អ្នកគាំទ្រ។

Messi បង្ហាញខ្លួននៅក្នុងសំឡេងហ៊ោរបស់អ្នកគាំទ្រ។ គាត់លើកដៃរាគោរពអ្នកគាំទ្រ និងឈានជើងដើរទៅកាន់កន្លែងដែលក្រុមម្ចាស់ក្លឹបកំពុងឈររង់ចាំ។ ប្រធានក្រុមជម្រើសជាតិអាហ្សង់ទីន ងាកមើលទៅកាន់ទស្សនិកជនជាញឹកញាប់ ហាក់ពេញចិត្តនឹងការគាំទ្រដ៏អស្ចារ្យនេះជាខ្លាំង។

Messi ចុះកិច្ចព្រមព្រៀងពីរឆ្នាំកន្លះជាមួយនឹងក្លឹបអាម៉េរិក Inter Miami។ កំពូលតារាបាល់ទាត់វ័យ 36 ឆ្នាំរូបនេះ អាចនឹងបានទាត់លើទីលានម្ចាស់ផ្ទះក្នុងការប្រកួតដំបូងរបស់ខ្លួន យ៉ាងឆាប់ត្រឹមថ្ងៃទី 21 កក្កដាខាងមុខ ដោយត្រូវប៉ះក្រុម Cruz Azul ក្នុងក្របខណ្ឌ Leagues Cup។ តាមគម្រោង នៅថ្ងៃទី 17 កក្កដា 2023 នេះ ក្លឹប Inter Miami នឹងធ្វើសន្និសីទសារព័ត៌មានមួយសម្រាប់ Messi៕

July 17, 2023

យានអវកាសបីគ្រឿងរបស់អាម៉េរិកដែលនឹងត្រូវដឹកមនុស្សឡើងទៅកាន់ឋានព្រះចន្ទ

ក្រុមហ៊ុនការពារជាតិសហរដ្ឋអាម៉េរិក Lockheed Martin កាលពីថ្ងៃទី 14 កក្កដា បានបង្ហាញរូបថតយានអវកាស Orion 3 គ្រឿងដែលនឹងត្រូវប្រើប្រាស់ក្នុងបេសកកម្មឋានព្រះចន្ទ Artemis II, III និង IV។

«អនាគតរបស់យាន Orion ទំនងជាល្អខ្លាំងណាស់។ ម៉ូឌុលទាំងឡាយដែលនឹងដឹកមនុស្សក្នុងបេសកកម្ម Artemis II, Artemis III និង Artemis IV កំពុងឆ្លងកាត់ដំណាក់កាលផលិតខុសៗគ្នានៅក្នុងមជ្ឈមណ្ឌលអវកាស Kennedy របស់អង្គការណាសា ដើម្បីត្រៀមសម្រាប់ការនាំអវកាសចរត្រលប់ទៅកាន់ឋានព្រះចន្ទ» Lockheed Martin សរសេរនៅលើ Twitter កាលពីថ្ងៃទី 14 កក្កដាដូច្នេះ អមនឹងរូបថតរបស់យានអវកាស Orion។ យានទាំងនេះកំពុងត្រូវបានអភិវឌ្ឍក្រោមការគ្រប់គ្រងរបស់ Lockheed Martin។

ក្នុងបេសកកម្ម Artemis II យានអវកាស Orion គ្រោងនឹងត្រូវបានបាញ់បង្ហោះនៅថ្ងៃទី 11 កុម្ភៈ ឆ្នាំ 2024 នាំយកអ្នកអវកាស 4 នាក់ទៅជាមួយ រួមមាន 3 នាក់មកពីណាសារបស់សហរដ្ឋអាម៉េរិក និងម្នាក់មកពីអង្គការអវកាសកាណាដា។ ចំណែកក្រុមអវកាសចរដែលនឹងចូលរួមក្នុងបេសកកម្ម Artemis III និង Artemis IV មិនទាន់ត្រូវបានបង្ហើបឱ្យដឹងនៅឡើយ។ តាមផែនការ Artemis II នឹងត្រូវបានបាញ់បង្ហោះក្នុងឆ្នាំ 2025 ឬ 2026 អាស្រ័យទៅលើយាន Starship របស់ SpaceX។ Artemis IV គ្រោងនឹងបាញ់បង្ហោះនៅចុងទសវត្សរ៍នេះ។

នៅក្នុងរូបថតខាងលើ ពុំមានយានអវកាស Orion របស់ Artemis I ជាយានដែលបានបំពេញបេសកកម្មឡើងទៅកាន់គន្លងតារាវិថីព្រះចន្ទកាលពីចុងឆ្នាំមុន។ ក្នុងរូបថតនេះក៏មិនមានយាន Orion ដែលត្រូវបានផលិតដំបូង និងជាយានដែលបានហោះជុំវិញផែនដីកាលពីឆ្នាំ 2014 នៅក្នុងជើងហោះហើរសាកល្បង។

ណាសាបានចុះកិច្ចព្រមព្រៀងជាមួយនឹងប្រទេសចំនួន 26 ដើម្បីបង្កើតគោលការណ៍សម្រាប់ការធ្វើដំណើរទៅកាន់ឋានព្រះចន្ទប្រកបដោយសន្តិភាព។ អង្គការអវកាសអឺរ៉ុប និងកាណាដាសុទ្ធតែបានសន្យាផ្គត់ផ្គង់ផ្នែករឹងសម្រាប់ Artemis និង Gateway ជាស្ថានីយអវកាសហោះជុំវិញឋានព្រះចន្ទដែលគ្រោងនឹងត្រូវបាញ់បង្ហោះក្នុងទសវត្សរ៍នេះ៕

July 17, 2023

Messi នាំភរិយា និងកូនៗ ដើរផ្សារនៅសហរដ្ឋអាម៉េរិក

(សហរដ្ឋអាម៉េរិក) – Lionel Messi ចាប់ផ្ដើមផ្ស៊ាំនឹងជីវភាពថ្មីនៅ Miami នៅពេលជូនភរិយា Antonella Roccuzzo និងកូនៗដើរផ្សារ។

Messi បានទៅដល់សហរដ្ឋអាម៉េរិកកាលពីថ្ងៃទី 11 កក្កដា 2023 ដើម្បីត្រៀមខ្លួនសម្រាប់ការពិនិត្យសុខភាព និងចុះហត្ថលេខាលើកិច្ចព្រមព្រៀងជាផ្លូវការជាមួយនឹងក្លឹបបាល់ទាត់ Inter Miami។ M10 ហាក់ស៊ាំនឹងជីវភាពថ្មីបានលឿនជាង បើធៀបនឹងពេលទាត់ឱ្យក្លឹប PSG និងការរស់នៅក្នុងទឹកដីបារាំង។

កាលពីថ្ងៃទី 14 កន្លងទៅ Messi បានបង្ហាញខ្លួនពេលកំពុងដើរទិញទំនិញក្នុងផ្សារទំនើប Publix។ កំពូលតារាបាល់ទាត់អាហ្សង់ទីនរូបនេះ បានដើរផ្សារជាមួយនឹងភរិយា Antonella និងកូនប្រុសទាំងបីនាក់រួមមាន Thiago, Mateo និង Ciro។

គ្រួសាររបស់ Messi បានបង្ហាញភាពសប្បាយរីករាយនៅពេលដើរឆ្លងកាត់ហាងមួយចំនួនក្នុងផ្សារទំនើប Publix។ ពួកគេក៏បានថតរូបជាមួយនឹងអ្នកគាំទ្រមួយចំនួនដែលបានស្គាល់ផងដែរ។

ក្រោយពីចប់កិច្ចសន្យាជាមួយ PSG លោក Messi ក៏សម្រេចចិត្តមកទាត់ឱ្យ Inter Miami ដោយមានកិច្ចព្រមព្រៀងរយៈពេលពីរឆ្នាំ អមនឹងជម្រើសពន្យារកិច្ចសន្យាថែមពីរឆ្នាំ ដែលនេះមានន័យថា M10 មានសិទ្ធិចាកចេញពីក្លឹបនេះនៅរដូវក្ដៅឆ្នាំ 2024 ឬ 2025 បើសិនគាត់ចង់។

កំពូលតារាបាល់ទាត់អាហ្សង់ទីនរូបនេះនឹងបង្ហាញខ្លួនជាផ្លូវការនៅក្នុងមហាព្រឹត្តិការណ៍មួយដែលមានឈ្មោះថា «The Unveil» នៅឯកីឡដ្ឋានរបស់ Inter Miami នាថ្ងៃទី 16 កក្កដាខាងមុខ៕

July 15, 2023

យានចុះចត Chandrayaan-3 របស់ឥណ្ឌា ឡើងដល់គន្លងតារាវិថិផែនដីដោយជោគជ័យ

អង្គការអវកាសរបស់ប្រទេសឥណ្ឌា បានបាញ់បង្ហោះរ៉ុក្កែតមួយគ្រឿងកាលពីថ្ងៃទី 14 កក្កដា ដើម្បីនាំយានអវកាសឡើងទៅកាន់គន្លងគោចរផែនដី និងនាំយានចុះចតឡើងទៅកាន់ឋានព្រះចន្ទ។

រ៉ុក្កែត LVM3 របស់អង្គការអវកាសឥណ្ឌា (ISRO) ត្រូវបានបាញ់បង្ហោះពីព្រលានអវកាសក្នុងរដ្ឋ Andhra Pradesh នៅភាគខាងត្បូងប្រទេសនេះ កាលពីល្ងាចថ្ងៃទី 14 កក្កដា ឆ្នាំ 2023។

ប្រហែល 16 នាទីបន្ទាប់ពីបានបាញ់បង្ហោះ ISRO ក៏ប្រកាសថា រ៉ុក្កែតបាននាំយានចុះចត Chandrayaan-3 ឡើងដល់គន្លងតារាវិថីផែនដីដោយជោគជ័យ។ យានចុះចតនេះនឹងហោះទៅដល់ឋានព្រះចន្ទនៅខែក្រោយ។

បើសិនជាបេសកកម្មខាងលើប្រព្រឹត្តិទៅដោយរលូន នោះឥណ្ឌានឹងក្លាយជាប្រទេសមួយក្នុងចំណោមប្រទេសដែលបាននាំយានទៅចុះចតលើឋានព្រះចន្ទដោយជោគជ័យ។ បច្ចុប្បន្ន មានប្រទេសចំនួនបីដែលបានទទួលជោគជ័យក្នុងបេសកកម្មដូចគ្នានេះ រួមមាន អាម៉េរិក អតីតសូវៀត និងចិន។

Chandrayaan (ចន្ទ្រយាន) នៅក្នុងភាសាសំស្ក្រឹតមានន័យថា «យានព្រះចន្ទ»។ ចន្ទ្រយានរួមមានយានចុះចតមួយគ្រឿងដែលមានកម្ពស់ពីរម៉ែត្រ ត្រូវបានផលិតឡើងដើម្បីដាក់ពង្រាយយានបើកបរស្វ័យប្រវត្តិមួយគ្រឿងនៅក្បែរប៉ូលខាងត្បូងរបស់ព្រះចន្ទ។

អង្គការអវកាសឥណ្ឌាឱ្យដឹងថា ការចុះចតលើដីនៅឋានព្រះចន្ទ គ្រោងនឹងធ្វើឡើងនៅថ្ងៃទី 23 ខែសីហា ឆ្នាំ 2023៕

July 15, 2023

ចិនបង្ហើបពីផែនការនាំមនុស្សឡើងទៅជាន់ដីព្រះចន្ទនៅឆ្នាំ 2030

នៅក្នុងបេសកកម្មថ្មី យានអវកាសហោះជុំវិញគន្លងតារាវិថី និងយានចុះចត នឹងត្រូវបានបាញ់បង្ហោះឡើងទៅកាន់ទីអវកាស ហើយសហការគ្នាដើម្បីនាំមនុស្សទៅចុះចតលើឋានព្រះចន្ទ។

លោក Zhang Hailian អនុប្រធានក្រុមវិស្វកររបស់ទីភ្នាក់ងារអវកាសមានក្រុមហោះហើរចិន (CMSA) បានបង្ហើបឱ្យដឹងអំពីព័ត៌មានថ្មីស្ដីពីផែនការនាំមនុស្សឡើងទៅកាន់ឋានព្រះចន្ទ ក្នុងកិច្ចប្រជុំកំពូលនៃវិស័យអាកាសចរណ៍អវកាសនៅប្រទេសចិនកាលពីថ្ងៃទី 12 កក្កដា 2023។

បេសកកម្មនេះ គ្រោងនឹងធ្វើឡើងឱ្យបានមុនដំណាច់ឆ្នាំ 2030។ វាគឺជាផ្នែកមួយនៃមហាគម្រោងដែលឆ្ពោះទៅរកការស្ថាបនាស្ថានីយស្រាវជ្រាវលើដីនៅឋានព្រះចន្ទ។ លោក Zhang ឱ្យដឹងថា បេសកកម្មនេះនឹងស្វែងរកវិធីល្អបំផុតដើម្បីសាងសង់មជ្ឈមណ្ឌលអវកាស ក៏ដូចជាធ្វើការស្រាវជ្រាវ ការពិសោធន៍ផ្នែកវិទ្យាសាស្ត្រជាច្រើនផ្សេងទៀត នៅលើឋានព្រះចន្ទ។

នៅក្នុងបេសកកម្មខាងលើ ការបាញ់បង្ហោះរ៉ុក្កែតចំនួនពីរលើកនឹងនាំយានចុះចត និងយានអវកាសដឹកមនុស្សឡើងទៅកាន់គន្លងតារាវិថីជុំវិញព្រះចន្ទ។ យានទាំងពីរនេះនឹងតភ្ជាប់គ្នាដើម្បីឱ្យអ្នកអវកាសចិនឆ្លងពីយានអវកាស ចូលទៅក្នុងយានចុះចត មុននឹងទម្លាក់ខ្លួនសន្សឹមៗចុះទៅកាន់ឋានព្រះចន្ទ។ នៅទីនេះ ពួកគេនឹងរើសយកដីលើឋានព្រះចន្ទ និងធ្វើដំណើរសិក្សាស្រាវជ្រាវ។ បន្ទាប់មក ពួកគេនឹងជិះយានចុះចតនេះ ហោះឡើងទៅកាន់យានអវកាសដែលកំពុងស្ថិតនៅលើគន្លងតារាវិថី រួចក៏វិលត្រលប់មកកាន់ផែនដី។

ដើម្បីត្រៀមសម្រាប់ការអនុវត្តផែនការខាងលើ ក្រុមអ្នកស្រាវជ្រាវចិន កំពុងតែប្រឹងប្រែងអភិវឌ្ឍរាល់ឧបករណ៍ដែលចាំបាច់ ក្នុងនោះមានជាអាទិ៍ ឈុតសម្លៀកបំពាក់អវកាស រថយន្តសម្រាប់បើកបរលើឋានព្រះចន្ទ យានអវកាសដឹកមនុស្ស និងយានចុះចត។

បេសកកម្មនាំមនុស្សឡើងទៅឋានព្រះចន្ទគឺជាជំហានថ្មីបំផុតនៅក្នុងមហិច្ឆតាអភិវឌ្ឍកម្មវិធីអវកាសរបស់ប្រទេសចិន។ បច្ចុប្បន្ន វិស័យអវកាសរបស់ប្រទេសនេះ កំពុងតែមានការរីកចម្រើនយ៉ាងឆាប់រហ័ស។ ចិនមានស្ថានីយអវកាសផ្ទាល់ខ្លួន មានរ៉ូបូតនៅលើឋានព្រះចន្ទ និងភពអង្គារផងដែរ៕

July 14, 2023

ការបាញ់បង្ហោះយានចុះចតលើឋានព្រះចន្ទរបស់ឥណ្ឌា នឹងធ្វើឡើងនៅថ្ងៃនេះ

យោងតាមអង្គការស្រាវជ្រាវអវកាសឥណ្ឌា (ISRO) បេសកកម្ម Chandrayann 3 បានដោះស្រាយបញ្ហាធំរួចរាល់ហើយនៅមុនកាលបរិច្ឆេទនៃការបាញ់បង្ហោះដែលគ្រោងនឹងធ្វើឡើងនៅល្ងាចថ្ងៃទី 14 កក្កដា 2023។

បេសកកម្ម Chandrayaan 3 កំណត់គោលដៅនាំយានអវកាសរបស់ឥណ្ឌា ទៅចុះចតលើផ្ទៃព្រះចន្ទដោយជោគជ័យជាលើកដំបូង។ «ការវាយតម្លៃចំពោះការត្រៀមខ្លួនសម្រាប់បេសកកម្ម បានចប់សព្វគ្រប់។ ការបាញ់បង្ហោះក៏ទទួលបានការអនុញ្ញាត» ISRO ប្រកាសនៅលើ Twitter ដូច្នេះ។

ការបាញ់បង្ហោះគ្រោងនឹងធ្វើឡើងនៅលើកោះ Sriharikota ក្បែរឆ្នេរសមុទ្រភាគខាងកើតរបស់ប្រទេសឥណ្ឌា នៅវេលាម៉ោង 16 និង 05 នាទី ថ្ងៃទី 14 កក្កដា (ម៉ោងនៅកម្ពុជា) ដោយប្រើប្រាស់រ៉ុក្កែត LVM3។ ក្នុងបេសកកម្ម Chandrayaan 3 យានអវកាស-រ៉ូបូត នឹងចុះចតនៅក្បែរប៉ូលខាងត្បូងរបស់ព្រះចន្ទ នៅចុងខែសីហា 2023។ បើសិនជាគ្រប់យ៉ាងដំណើរការល្អ ឥណ្ឌានឹងក្លាយជាប្រទេសទីបួនដែលចុះចតលើឋានព្រះចន្ទដោយជោគជ័យ បន្ទាប់ពីសហរដ្ឋអាម៉េរិក សូវៀត និងចិន។

យានចុះចតរបស់ឥណ្ឌា នឹងប្រមូលទិន្នន័យច្រើនប្រភេទទាក់ទងនឹងបរិស្ថានជុំវិញ ដោយប្រើប្រាស់ឧបករណ៍វិទ្យាសាស្ត្រទំនើប។

Chandrayaan 3 គឺជាបេសកកម្មព្រះចន្ទទីបីរបស់ប្រទេសឥណ្ឌា និងជាការប្រឹងប្រែងលើកទីពីរដើម្បីអាចចុះចតលើឋានព្រះចន្ទដោយជោគជ័យ។ ការប្រឹងប្រែងលើកដំបូងត្រូវបានធ្វើឡើងកាលពីខែកញ្ញា 2019 និងបញ្ចប់ដោយបរាជ័យ នៅពេលយានចុះចត-រ៉ូបូតរបស់ Chandrayaan 2 ទម្លាក់ខ្លួនទៅបុកនឹងផ្ទៃព្រះចន្ទពេញមួយទំហឹង។

Chandrayaan 2 ក៏មានទាំងយានអវកាសដែលគោចរជុំវិញគន្លងតារាវិថីព្រះចន្ទ ដែលបច្ចុប្បន្នកំពុងប្រមូលទិន្នន័យនៅជុំវិញឋាននេះ។ Chandrayaan 3 មិនមានយានគោចរលើគន្លងតារាវិថី ប៉ុន្តែម៉ូឌុលរុញច្រានរបស់បេសកកម្មនេះនឹងនាំឧបករណ៍ស្រាវជ្រាវផែនដីពីចម្ងាយទៅជាមួយ។ ទិន្នន័យដែលវាប្រមូលបាននឹងមានប្រយោជន៍សម្រាប់បេសកកម្មបន្ទាប់៕

July 14, 2023

អំពូលភ្លើងប្រភេទណាដែលស៊ីភ្លើងច្រើនជាងគេ? LED ឬ Halogen?

អំពូលភ្លើងមានច្រើនប្រភេទ ប៉ុន្តែគ្រប់គ្នាពុំមែនសុទ្ធតែដឹងថា ប្រភេទណាស៊ីភ្លើងច្រើន ឬតិចនៅទេ។

ខាងក្រោមនេះគឺជាប្រភេទអំពីភ្លើងដែលត្រូវបានគេប្រៀបធៀបកម្រិតភ្លឺ និងកម្រិតស៊ីភ្លើង៖

មើលទៅលើតារាងនេះក៏ដឹងថា អំពូល LED ស៊ីភ្លើងតិចជាងអំពូលសរសៃដល់ទៅប្រហែល 80%។ អំពី CFL ឈរលំដាប់ទីពីរ បើនិយាយពីកម្រិតនៃការសន្សំសំចៃភ្លើង ខណៈ Halogen ជាប់លេខបី៕

July 13, 2023

រកឃើញភពក្រៅប្រព័ន្ធព្រះអាទិត្យដែលភ្លឺបំផុតក្នុងចក្រវាល

ភព LTT9779b គឺជា «កញ្ចប់» ធំបំផុតក្នុងចក្រវាលនៅក្នុងចំណោមភពដែលក្រុមតារាវិទូធ្លាប់បានរកឃើញពីមុនមក។

ភពក្ដៅខ្លាំងដែលមានឈ្មោះថា LTT9779b មានពពកដែលកកើតពី silicate និងលោហធាតុដូចទៅនឹងទីតានីញ៉ូម អាចចាំងផ្លាតពន្លឺបានយ៉ាងល្អ។ LTT9779b មានចម្ងាយពីផែនដីប្រហែល 262 ឆ្នាំពន្លឺ (មួយឆ្នាំពន្លឺស្មើនឹង 9.46 ទ្រីលានគីឡូម៉ែត្រ) និងមួយឆ្នាំនៅលើភពនេះមានរយៈពេលតែ 19 ម៉ោងប៉ុណ្ណោះ។

ភពខាងលើត្រូវបានរកឃើញកាលពីឆ្នាំ 2022 ដោយអង្គការណាសា ហើយវាត្រូវបានជ្រើសរើសដើម្បីសិក្សាស្រាវជ្រាវស៊ីជម្រៅដោយអង្គការអវកាសអឺរ៉ុប។ លទ្ធផលនៃការសិក្សាស្រាវជ្រាវរបស់អឺរ៉ុបបានបង្ហាញថា LTT9779b អាចចាំងប្លាតពន្លឺពីផ្កាយមេរបស់វារហូតដល់ 80% ខ្លាំងជាងភពសុក្ររបស់ប្រព័ន្ធព្រះអាទិត្យទៅទៀត។ បន្ទាប់ពីព្រះចន្ទ ភពសុក្រគឺជាវត្ថុអវកាសដែលភ្លើងជាងគេបង្អស់នៅពេលរាត្រី ដោយសារវាចាំងផ្លាតពន្លឺពីព្រះអាទិត្យប្រហែល 75%។ ចំណែកផែនដីវិញ អាចចាំងប្លាតពន្លឺពីព្រះអាទិត្យត្រឹមតែ 30% ប៉ុណ្ណោះ។

នៅផ្នែកម្ខាងរបស់ LTT9779b ដែលបែរទៅរកផ្កាយមេ គឺអាចមានកម្ដៅដល់ 2,000 អង្សាសេ។ កម្ដៅខ្ពស់ជាង 100 អង្សាសេគឺពិតជាក្ដៅខ្លាំង មិនអាចឱ្យកើតមានពពកទឹក។ LTT9779b ក្ដៅរហូតដល់ថ្នាក់ គួរតែមិនមានពពកប្រភេទណាទាំងអស់ សូម្បីតែពពកលោហធាតុ ឬត្បូង។ ក៏ប៉ុន្តែ ភពនេះអាចកកើតពពកលោហធាតុបាន ដោយសារតែបរិយាកាសត្រូវបានគ្របដណ្ដប់ដោយ silicate និងចំហាយលោហធាតុ។

ដើមឡើយ ក្រុមអ្នកវិទ្យាសាស្ត្រគិតថា ភព LTT9779b គួរណាស់តែមិនអាចនៅមានវត្តមាន ព្រោះបរិយាកាសគួរតែត្រូវបានផ្កាយមេបំប៉ើងចេញអស់ សល់តែថ្មទទេ។ ជំនួសមកវិញ ពពកលោហធាតុទំនងជាអាចជួយការពារវត្តមានរបស់ LTT9779b។ ពពកលោហធាតុដែលចាំងប្លាតពន្លឺ កំពុងតែជួយការពារភពនេះមិនឱ្យក្ដៅខ្លាំងរហូតដល់ក្លាយជាចំហាយ។ ការផ្ទុកលោហធាតុច្រើនក៏ជួយឱ្យ LTT9779b និងបរិយាកាសរបស់វាកាន់តែធ្ងន់ និងមិនងាយត្រូវបានបំប៉ើងដោយផ្កាយមេ៕

July 11, 2023

Tag: តារា