ជើង - La Reine Media

ដើម្បីត្រៀមសម្រាប់ការប្រកួតជាមួយជើងឯក World Cup ឥណ្ឌូណេស៊ីផ្ដល់សញ្ជាតិដល់កីឡាករបរទេសច្រើននាក់

ឥណ្ឌូណេស៊ីបន្តអនុវត្តគោលនយោបាយដែលមានតាំងពីឆ្នាំ 2021 ដោយការផ្ដល់សញ្ជាតិដល់កីឡាករបាល់ទាត់វ័យក្មេងពីររូបដែលកំពុងទាត់នៅប្រទេសហូឡង់ ហើយពួកគេនឹងបង្ហាញខ្លួនក្នុងការប្រកួតមិត្តភាពក្របខណ្ឌ FIFA Days នៅខែមិថុនា 2023។

កីឡាករពីររូបដែលទើបតែទទួលបានសញ្ជាតិឥណ្ឌូណេស៊ី រួមមាន Ivar Jenner អាយុ 19 ឆ្នាំ កំពុងលេងជាខ្សែបម្រើរបស់ក្លឹប FC Utrecht និង Rafael Struick អាយុ 20 ឆ្នាំ កំពុងលេងជាខ្សែប្រយុទ្ធឱ្យក្លឹប ADO Den Haag។ អ្នកទាំងពីរសុទ្ធតែមានជីដូនជីតាជាជនជាតិឥណ្ឌូណេស៊ី និងបានស្បថចូលក្រុមជម្រើសជាតិក្នុងនាមជាពលរដ្ឋឥណ្ឌូណេស៊ី ចាប់ពីថ្ងៃទី 22 ឧសភា។

សហព័ន្ធបាល់ទាត់ឥណ្ឌូណេស៊ី (PSSI) បានត្រៀមផ្ដល់សញ្ជាតិដល់ Jenner និង Struick កាលពីខែមុនដើម្បីឱ្យពួកគេចូលរួមក្នុងក្រុម U20 ទៅទាត់នៅ U20 World Cup លើទីលានដែលឥណ្ឌូណេស៊ីធ្វើជាម្ចាស់ផ្ទះ។ ប៉ុន្តែ ឥណ្ឌូណេស៊ីត្រូវបាន FIFA ដកហូតសិទ្ធរៀបចំការប្រកួត ធ្វើឱ្យក្រុម U20 របស់ពួកគេខកខានមិនបានទាត់នៅពានរង្វាន់នេះ និងបានពន្យារពេលលើការផ្ដល់សញ្ជាតិដល់កីឡាករពីររូបខាងលើ។

ក្រុមបាល់ទាត់ជម្រើសជាតិឥណ្ឌូណេស៊ី គ្រោងនឹងប្រកួតជាមួយប៉ាឡេស្ទីន និងអាហ្សង់ទីន នៅថ្ងៃទី 14 និង 19 មិថុនាខាងមុខ នៅហ្សាការតា។ គ្រូបង្វឹក Shin Tae-yong មិនទាន់បង្ហាញបញ្ជីឈ្មោះកីឡាករចុងក្រោយ ប៉ុន្តែនឹងប្រមូលកម្លាំងចាប់ពីថ្ងៃទី 05 មិថុនា។

ក្រៅពី Jenner និង Struick PSSI ក៏មានគម្រោងផ្ដល់សញ្ជាតិដល់ Justin Hubner អាយុ 19 ឆ្នាំ សញ្ជាតិហូឡង់ ជាខ្សែការពាររបស់ Wolves លេងនៅពានរង្វាន់លីគកំពូលអង់គ្លេសផងដែរ។

ប្រធាន PSSI លោក Erick Thohir (ឆ្វេង), Rafael Struick (កណ្ដាល) និង Ivar Jenner នៅហ្សាការតា កាលពីថ្ងៃទី 24 ឧសភា 2023

PSSI បានជំរុញគោលនយោបាយផ្ដល់សញ្ជាតិដល់កីឡាករមានឈាមជ័រជាជនជាតិឥណ្ឌូណេស៊ី តាំងពីឆ្នាំ 2021។ កីឡាករជាច្រើនរូបដែលត្រូវបានផ្ដល់សញ្ជាតិទៅតាមគោលនយោបាយនេះ មានជាអាទិ៍ Jordi Amat (ធ្លាប់លេងនៅពានរង្វាន់ La Liga), Elkan Baggott លេងឱ្យ Ipswich Town នៅពានរង្វាន់ League One (អង់គ្លេស) ឬ Marc Klok និង Sandy Walsh ។ល។ PSSI ក៏ផ្ដល់សញ្ជាតិដល់កីឡាករដែលមិនមានឈាមជ័រជាជនជាតិឥណ្ឌូណេស៊ីផងដែរ ក្នុងនោះមានដូចជា ខ្សែប្រយុទ្ធ Ilija Spasojevic ជាដើម។

ថ្មីៗនេះ បាល់ទាត់ឥណ្ឌូណេស៊ីទទួលបានជោគជ័យមួយចំនួន រួមមាន មេដាយមាសស៊ីហ្គេមលើកទី 32 និងដណ្ដើមបានជើងឯក U16 អាស៊ីអាគ្នេយ៍ 2022។ បាល់ទាត់ឥណ្ឌូណេស៊ីក៏កំពុងឆ្ពោះទៅរកជោគជ័យធំជាងនេះនៅវគ្គជម្រុះ World Cup 2026, Asian Cup 2023 និង AFF Cup ផងដែរ។

ការអញ្ជើញក្រុមជម្រើសជាតិអាហ្សង់ទីនមកប្រកួតមិត្តភាពនៅថ្ងៃទី 19 មិថុនា គឺជាសកម្មភាពលើកកម្ពស់មុខមាត់របស់វិស័យបាល់ទាត់ឥណ្ឌូណេស៊ី។ PSSI ក៏បានឱ្យដឹងថា រៀងរាល់ឆ្នាំ ប្រទេសនេះនឹងអញ្ជើញក្រុមជម្រើសជាតិល្បីៗមកប្រកួតមិត្តភាព ក្នុងនោះមាន ព័រទុយហ្កាល់ ប្រស៊ីល ឬម៉ារ៉ុក។ល។

May 29, 2023

ម្ចាស់ជើងឯកបាល់ទាត់ SEA Games លើកទី 32 មានមហិច្ចតាប្រកួតជាមួយបណ្ដាក្រុមជើងខ្លាំងលំដាប់ពិភពលោក

ប្រធានសហព័ន្ធកីឡាបាល់ទាត់ឥណ្ឌូណេស៊ី (PSSI) លោក Erick Thohir មានបំណងអញ្ជើញបណ្ដាក្រុមបាល់ទាត់លំដាប់កំពូលៗរបស់ពិភពលោក មកប្រកួតជាមួយក្រុមជម្រើសជាតិនៃប្រទេសដែលមានផ្ទៃដីធំជាងគេនៅអាស៊ីអាគ្នេយ៍។

«យើងអញ្ជើញអាហ្សង់ទីនមកទាត់មិត្តភាពដើម្បីកែលំអស្មារតី និងសមជាមួយនឹងការប៉ះគូប្រកួតធំៗ។ ដើមឡើយ នៅពេលជួបវៀតណាម និងថៃ កីឡាកររបស់យើងក៏ភ័យញ័រខ្លួន។ ប៉ុន្តែ នៅស៊ីហ្គេមលើកទី 32 យើងដណ្ដើមបានជ័យជម្នះ ហើយនេះគឺជាពេលដែលមានការត្រៀមខ្លួនបានល្អសម្រាប់ក្រុមជម្រើសជាតិឥណ្ឌូណេស៊ី» ប្រធាន PSSI លោក Erick Thohir ថ្លែងដូច្នេះ។

ក្រោយពីដណ្ដើមបានមេដាយមាសវិញ្ញាសាបាល់ទាត់បុរសនៅស៊ីហ្គេមលើកទី 32 ចលនាវិជ្ជមានក្នុងវិស័យបាល់ទាត់កំពុងតែផ្ទុះឡើងនៅឥណ្ឌូណេស៊ី។ ក្នុងការប៉ះគ្នាលក្ខណៈអន្តរជាតិនានាក្នុងខែមិថុនា ក្រុមឥណ្ឌូណេស៊ី នឹងប្រកួតមិត្តភាពនៅថ្ងៃទី 14 ជាមួយនឹងក្រុមរបស់ប៉ាឡេស្ទីន។ ប្រាំថ្ងៃបន្ទាប់មក ឥណ្ឌូណេស៊ីនឹងត្រូវប្រកួតជាមួយអាហ្សង់ទីន។

តាមផែនការ PSSI ថែមទាំងមានបំណងអញ្ជើញក្រុមជើងខ្លាំងដូចជា ម៉ារ៉ុក ប្រេស៊ីល ព័រទុយហ្កាល់ និងរុស្ស៊ី មកទាត់មិត្តភាពនៅឥណ្ឌូណេស៊ីទៀតផង។ គម្រោងទាំងនេះកំពុងត្រូវបានអនុវត្ត និងស្ថិតក្នុងដំណាក់កាលដំបូងនៃការចរចា។ ប៉ុន្តែ នឹងមានតែមួយ ឬពីរប្រកួតបែបនេះប៉ុណ្ណោះនៅក្នុងមួយឆ្នាំ។ PSSI ក៏មានមហិច្ឆតារៀបចំការប្រកួតផ្លូវការច្រើនទៀតនៅក្នុងឱកាស FIFA Days ដើម្បីលើកកម្ពស់ចំណាត់របស់ក្រុមបាល់ទាត់ជម្រើសជាតិឥណ្ឌូណេស៊ី នៅក្នុងបញ្ជីចំណាត់ថ្នាក់ FIFA៕

May 26, 2023

យន្តហោះអវកាស Virgin Galactic បន្តដឹកមនុស្សឡើងទៅក្បែរគន្លងតារាវិថីផែនដី

(សហរដ្ឋអាម៉េរិក) – Virgin Galactic បានទទួលជោគជ័យក្នុងការដឹកមនុស្សឡើងទៅកាន់ទីអវកាសក្បែរគន្លងតារាវិថីផែនដីលើកទីប្រាំ មុនពេលចាប់ផ្ដើមធ្វើសកម្មភាពជំនួញនៅខែក្រោយ។

បេសកកម្មកាលពីថ្ងៃទី 25 ឧសភា ដែលមានឈ្មោះថា Unity 25 គឺជាជើងហោះហើរដំបូងរបស់ក្រុមហ៊ុន Virgin Galactic ទៅកាន់ទីអវកាសក្បែរគន្លងគោចរផែនដី គិតចាប់ពីខែកក្កដា 2021 ក្រោយពីក្រុមហ៊ុននេះបានដឹកមហាសេដ្ឋី Richard Branson សហស្ថាបនិករបស់ Virgin Group ដែលជាក្រុមហ៊ុនមេរបស់ Virgin Galactic និងអតិថិជនជាច្រើនរូបផ្សេងទៀត ឡើងទៅទីអវកាស។

Virgin Galactic ប្រើប្រាស់ប្រព័ន្ធបាញ់បង្ហោះក្នុងអាកាសដើម្បីដឹកមនុស្ស និងឧបករណ៍ស្រាវជ្រាវឡើងទៅកាន់ទីអវកាសក្បែរកន្លងតារាវិថិផែនដី។ បច្ចុប្បន្ន ប្រព័ន្ធនេះរួមមានយានចំនួនពីរគ្រឿងគឺយានអវកាសដែលអាចដឹកមនុស្សបាន 8 នាក់ ឈ្មោះ VSS Unity និងយន្តហោះដឹកជញ្ជូន VMS Eve។ Unity ត្រូវបាន Eve នាំឡើងពីព្រលានយន្តហោះ។ ពេល Eve ហោះដល់កម្ពស់ 15,000 ម៉ែត្រ វានឹងទម្លាក់ Unity ដើម្បីឱ្យយាននេះបញ្ឆេះម៉ាស៊ីនរ៉ុក្កែត ហើយបន្តហោះឡើងទៅលំហក្បែរគន្លងគោចរផែនដី។

អតិថិជនដែលហោះក្នុងយាន Unity នឹងបានបណ្ដែតខ្លួនក្នុងស្ថានភាពគ្មានទម្ងន់ច្រើននាទី និងគយគន់ផែនដីពីអវកាស មុនពេលហោះចុះចតលើព្រលានយន្តហោះ។ Unity បានធ្វើការហោះហើរបែបនេះចំនួនប្រាំលើកមកហើយ។ បេសកកម្មថ្មីបំផុតត្រូវបានចាប់ផ្ដើមនៅម៉ោង 23 និង 15 នាទី ថ្ងៃទី 24 ឧសភា (ពេលវេលានៅកម្ពុជា) ពេល Eve ហោះឡើងពីអវកាសយានដ្ឋាន Spaceport America នៅ New Mexico។ Unity ត្រូវបានភ្ជាប់ទៅនឹងគ្រោងឆ្អឹងនៅចន្លោះដងខ្លួនទាំងពីររបស់យន្តហោះដឹកជញ្ជូន Eve។

មនុស្សទាំង 8 នាក់ដែលចូលរួមក្នុងជើងហោះហើរថ្មីបំផុតនេះគឺសុទ្ធតែជាបុគ្គលិករបស់ Virgin Galactic ក្នុងនោះក៏មានប្រធានផ្នែកបណ្ដុះបណ្ដាលអ្នកអវកាស លោកស្រី Beth Moses ផងដែរ។

យោងតាមតំណាងរបស់ Virgin Galactic បន្ទាប់ពីផ្ដាច់ខ្លួន យាន Unity ហោះក្នុងល្បឿនអតិបរមា 3,630 គីឡូម៉ែត្រ/ម៉ោង និងឡើងដល់កម្ពស់ 87.2 គីឡូម៉ែត្រ។ ណាសាឱ្យដឹងថា កម្ពស់នេះអាចចាត់ទុកដូចបានហោះដល់ទីអវកាស។ ក៏ប៉ុន្តែលំហអវកាសចាប់ផ្ដើមពីកម្ពស់ 100 គីឡូម៉ែត្រ។

យាន Unity ត្រលប់មកកាន់ផែនដីនៅម៉ោង 00 និង 37 នាទី ថ្ងៃទី 26 ឧសភា 2023 នៅ Spaceport America។ ចំណែកយន្តហោះ Eve ក៏បានចុះចតដល់ដីប៉ុន្មាននាទីមុននោះ ហើយបេសកកម្ម Unity 25 ក៏បានបញ្ចប់៕

May 26, 2023

ក្រុមបាល់ទាត់ជម្រើសជាតិអាហ្សង់ទីនត្រូវជប៉ុនលុបចោលការប្រកួតមិត្តភាពសម្រាប់រដូវ FIFA Days

ទំព័រ Siam Sport ដកស្រង់ប្រភពព័ត៌មានពីជប៉ុន បានឱ្យដឹងថា សហព័ន្ធកីឡាបាល់ទាត់ជប៉ុន (JFA) បានលុបចោលគម្រោងប្រកួតមិត្តភាពជាមួយអាហ្សង់ទីន ព្រោះតែការចំណាយខ្ពស់ពេក។

យោងតាមប្រភពព័ត៌មាន JFA ត្រូវបង្ខំចិត្តបោះបង់គម្រោងអញ្ជើញក្រុមបាល់ទាត់ជម្រើសជាតិអាហ្សង់ទីន មកប្រកួតមិត្តភាពនៅក្នុងឱកាស FIFA Days ក្នុងខែមិថុនា 2023 ព្រោះតែត្រូវចំណាយប្រាក់ច្រើនហួស។ JFA ត្រូវចំណាយប្រាក់ 600 លានយេន (ជាង 4.3 លានដុល្លារអាម៉េរិក) ដើម្បីអញ្ជើញ Messi និងមិត្តរួមក្រុមមកប្រកួតនៅប្រទេសជប៉ុន។

ក្រុមជម្រើសជាតិអាហ្សង់ទីន កំពុងគ្រប់គ្រងតំណែងជើងឯក World Cup និងជាប់ចំណាក់ថ្នាក់លេខមួយលើពិភពលោក ដោយមានកំពូលតារាបាល់ទាត់ Lionel Messi នៅក្នុងក្រុម។ ដូច្នេះ តម្លៃយីហោរបស់ពួកគេពិតជាខ្ពស់។ ក្រុមជម្រើសជាតិដែលចង់អញ្ជើញក្រុមអាហ្សង់ទីនមកទាត់មិត្តភាពនឹងត្រូវចំណាយប្រាក់ច្រើន។

កាលពីឆ្នាំមុន JFA ត្រូវបានគេជឿថា បានចំណាយ 300 លានយេន (ជាង 2.1 លានដុល្លារអាម៉េរិក) ដើម្បីអញ្ជើញក្រុមជម្រើសជាតិប្រេស៊ីលមកទាត់មិត្តភាពជាមួយក្រុមជប៉ុននៅថ្ងៃទី 6 មិថុនា។ ក៏ប៉ុន្តែ ឆ្នាំនេះ JFA មិនអាច «ដៃទូលាយ» ដូចមុននៅក្នុងការអញ្ជើញក្រុមអាហ្សង់ទីន។

ជំនួសឱ្យការប្រកួតជាមួយអាហ្សង់ទីន ឆ្នាំនេះក្រុមជម្រើសជាតិជប៉ុននឹងប្រកួតជាមួយក្រុមជម្រើសជាតិចំនួនពីរមកពីទ្វីបអាម៉េរិក នៅក្នុងខែមិថុនាឆ្នាំនេះ រួមមាន អែលសាល់វ៉ាឌ័រ (15 មិថុនា) និង ប៉េរូ (20 មិថុនា)។ គ្រូបង្វឹក Hajime Moriyasu ក៏បានប្រកាសបង្ហាញបញ្ជីឈ្មោះក្រុមកីឡាករដែលត្រៀមសម្រាប់ការប្រកួតទាំងនេះរួចហើយ។

ចំពោះអាហ្សង់ទីនវិញ ពួកគេនឹងទាត់មិត្តភាពជាមួយអូស្ត្រាលីនៅប្រទេសចិន នៅថ្ងៃទី 15 មិថុនា 2023។ បួនថ្ងៃក្រោយមក ក្រុមអាហ្សង់ទីននឹងប្រកួតជាមួយក្រុមម្ចាស់ផ្ទះឥណ្ឌូណេស៊ី។ យោងតាម New York Times ឥណ្ឌូណេស៊ីត្រូវចំណាយប្រាំលានដុល្លារអាម៉េរិក ដើម្បីអញ្ជើញក្រុមជម្រើសជាតិអាហ្សង់ទីនមកប្រកួតជាលើកដំបូង៕

May 26, 2023

ម្ចាស់ជើងឯកបាល់ទាត់ SEA Games ប្រកួតជាមួយម្ចាស់ជើងឯក World Cup នៅខែក្រោយ

សហព័ន្ធកីឡាបាល់ទាត់ឥណ្ឌូណេស៊ី (PSSI) ប្រកាសថា នឹងប្រកួតមិត្តភាពជាមួយម្ចាស់ជើងឯក World Cup នៅថ្ងៃទី 19 ខែមិថុនា 2023 និងបានអំពាវនាវឱ្យរក្សាសណ្ដាប់ធ្នាប់ ចៀសវាងការប្រកួតត្រូវលុបចោល។

ឥណ្ឌូណេស៊ីបានបញ្ជាក់អំពីការប្រកួតមិត្តភាពជាមួយអាហ្សង់ទីន នៅក្នុងសន្និសីទសារព័ត៌មាននៅឯទីលានបាល់ទាត់ Gelora Bung Karno នារសៀលថ្ងៃទី 24 ឧសភា។

ប្រធាន PSSI លោក Erick Thohir ឱ្យដឹងថា ការប្រកួតមិត្តភាពជាមួយគូប្រជែងលំដាប់ខ្ពស់បំផុតដូចអាហ្សង់ទីន គឺជាឱកាសដ៏មានតម្លៃដើម្បីសាកល្បងផ្លូវចិត្ត សមត្ថភាព និងដកបទពិសោធន៍សម្រាប់ក្រុមម្ចាស់ផ្ទះឥណ្ឌូណេស៊ី។

មេដឹកនាំ PSSI ក៏បានបង្ហើបឱ្យដឹងថា នឹងដាក់ពង្រាយកម្លាំងសន្តិសុខទ្រង់ទ្រាយធំបំផុតដើម្បីធានាសុវត្ថិភាពដល់ Lionel Messi, Lautaro Martinez និងមិត្តរួមក្រុម ចៀសវាងហានិភ័យការប្រកួតត្រូវលុបចោល។

Thohir រម្លឹកឡើងវិញនូវមេរៀនឆ្នាំ 2019 នៅពេល Man Utd លុបចោលដំណើរមកប្រកួតនៅឥណ្ឌូណេស៊ី ព្រោះតែករណីបំផ្ទុះគ្រាប់បែកភេរវកម្ម ក្នុងនោះក៏មាននៅសណ្ឋាគារដែលកូនសិស្ស និងគ្រូបង្វឹក Sir Alex Ferguson បានជ្រើសរើសជាកន្លែងស្នាក់នៅ។

PSSI ចំណាយប្រហែល 5 លានដុល្លារអាម៉េរិក ដើម្បីអញ្ជើញក្រុមជម្រើសជាតិអាហ្សង់ទីនមកប្រកួតមិត្តភាពនៅឥណ្ឌូណេស៊ី។ ដូចទៅនឹងបណ្ដាក្លឹបនៅអឺរ៉ុប កិច្ចព្រមព្រៀងរវាង PSSI និងអាហ្សង់ទីន មានលក្ខខណ្ឌបញ្ជាក់ថា ក្រុមភ្ញៀវមានសិទ្ធិលុបចោលការប្រកួត បើសិនសុវត្ថិភាពនៅទីតាំងប្រកួតមិនត្រូវបានធានា ព្រោះតែហេតុការណ៍ចលាចល គ្រោះធម្មជាតិ ឬភេរវកម្ម។ល។ នេះបើតាម New York Times ។

មុនពេលមកកាន់ឥណ្ឌូណេស៊ី ក្រុមបាល់ទាត់ជម្រើសជាតិអាហ្សង់ទីន នឹងទៅកាន់ទីក្រុងប៉េកាំង ប្រទេសចិន ដើម្បីប្រកួតមិត្តភាពជាមួយអូស្ត្រាលីនៅថ្ងៃទី 15 មិថុនា 2023៕

May 25, 2023

បន្ទប់ពិសោធន៍ភពអង្គារ/ព្រះចន្ទ ជម្រៅជាងមួយគីឡូម៉ែត្រក្រោមដី

(អង់គ្លេស) – ផ្លូវរូងជ្រៅក្រោមដីនៅតំបន់ Yorkshire ខាងជើង ផ្ដល់ឱកាសដ៏ពិសេសដើម្បីស្រាវជ្រាវអំពីរបៀបដែលមនុស្សអាចរស់នៅ និងធ្វើសកម្មភាពនៅលើឋានព្រះចន្ទ និងភពព្រះអង្គារ។

ក្រុមអ្នកស្រាវជ្រាវនៅសាកលវិទ្យាល័យ Birmingham អនុវត្តកម្រោង Bio-SPHERE នៅក្នុងមូលដ្ឋានស្រាវជ្រាវជម្រៅ 1.1 គីឡូម៉ែត្រ ដែលស្ថិតក្នុងរូងក្រោមដីជ្រៅបំផុតមួយនៅប្រទេសអង់គ្លេស។ នេះបើតាម Phys.org ចុះផ្សាយកាលពីថ្ងៃទី 23 ឧសភា 2023។

គម្រោងនេះត្រូវបានធ្វើឡើងក្នុងបំណងស្វែងយល់អំពីវិទ្យាសាស្ត្រ និងវេជ្ជសាស្ត្រដែលអាចនឹងប្រព្រឹត្តទៅដោយរបៀបណានៅក្នុងបរិស្ថានពោរពេញដោយការលំបាកនៅលើឋានព្រះចន្ទ និងភពអង្គារ។ នេះគឺជាមូលដ្ឋានដំបូងក្នុងចំណោមមូលដ្ឋានពិសោធន៍ថ្មីដែលស្រាវជ្រាវរកវិធីជួយឱ្យមនុស្សធ្វើការ និងរស់នៅដោយមានសុខភាពល្អក្នុងបេសកកម្មអវកាសយូរអង្វែងរបស់មនុស្ស នៅលើភពដទៃ។

ក្រុមស្រាវជ្រាវខាងលើបានសហការជាមួយបន្ទប់ពិសោធន៍ក្រោមដី Boulby របស់ក្រុមប្រឹក្សាមូលដ្ឋានវិទ្យាសាស្ត្រ និងបច្ចេកវិទ្យា ដោយមានការជួយគាំទ្ររបស់ក្រុមហ៊ុនរុករករ៉ែ Boulby, ICL-UK។

គម្រោង Bio-SPHERE ប្រើប្រាស់បណ្ដាញផ្លូវរូងក្រោមដីទំហំ 3,000 ម៉ែត្រការ៉េ នៅក្បែរបន្ទប់ពិសោធន៍ Boulby ឆ្លងកាត់សិលាកម្ទេចកំណក្រោមដីអាយុកាល 205 លានឆ្នាំ៕

May 25, 2023

មនុស្សទី 600 ដែលហោះហើរក្នុងគន្លងតារាវិថីជុំវិញផែនដី

(សហរដ្ឋអាម៉េរិក) – ស្ត្រីអវកាសចរដំបូងរបស់គណៈកម្មការអវកាសអារ៉ាប៊ីសាអូឌីត បានក្លាយជាមនុស្សទី 600 ដែលហោះជុំវិញផែនដីនៅក្នុងយានអវកាស Dragon របស់ SpaceX នៅម៉ោង 4:37 ថ្ងៃទី 22 ឧសភា ឆ្នាំ 2023 (ពេលវេលានៅកម្ពុជា)។

ការបាញ់បង្ហោះយានអវកាសកាលពីថ្ងៃទី 22 ឧសភា គឺជាការចាប់ផ្ដើមសម្រាប់ Ax-2 (Axiom-2) ដែលជាបេសកកម្មហោះហើរឯកជនលើកទីពីររបស់ក្រុមហ៊ុន Axiom Space ឡើងទៅកាន់ស្ថានីយអវកាសអន្តរជាតិ (ISS)។ បេសកកម្មដំបូង គឺ Ax-1 ត្រូវបានធ្វើឡើងកាលពីខែមេសា ឆ្នាំ 2022។

Ax-2 រួមមានអ្នកអវកាសបួននាក់ ក្នុងនោះក៏មានអ្នកស្រាវជ្រាវផ្នែកវេជ្ជសាស្ត្រ លោកស្រី Rayyanah Barnawi ផងដែរ។ Barnawi ដែលជាអ្នកអវកាសដំបូងរបស់គណៈកម្មការអវកាសអារ៉ាប៊ីសាអូឌីត បានក្លាយជាមនុស្សទី 600 ដែលហោះក្នុងគន្លងគោចរជុំវិញផែនដី។

ប៉ុន្តែ បើសិនគិតទាំងមនុស្សដែលបានឡើងផុតខ្សែបន្ទាត់ Karman ដែលជាព្រំដែនអវកាសកម្ពស់ 100 គីឡូម៉ែត្រពីផែនដី ទៅតាមអនុសញ្ញារបស់ក្រុមអ្នកជំនាញអន្តរជាតិច្រើនរូប គេត្រូវតែរាប់មនុស្ស 32 នាក់ទៀតដែលបានហោះហើរលើយានអវកាស New Shepard របស់ Blue Origin។ ជើងហោះហើរទាំងនេះបានឡើងជិតដល់គន្លងតារាវិថីផែនដី និងត្រលប់វិញ ដោយមិនបានហោះជុំវិញផែនដី។

តាមផែនការ Axiom-2 នឹងត្រលប់មកកាន់ផែនដីនៅដើមខែមិថុនា 2023 ដោយចុះចតលើមហាសមុទ្រអាត្លង់ទិក។

ថ្វីបើការហោះហើរមានរយៈពេលតែ12 ថ្ងៃ ប៉ុន្តែ Axiom-2 មានគម្រោងស្រាវជ្រាវជាច្រើន ក្នុងនោះមានដូចជា បាតុភូតបរិយាកាសកម្រជួប ការពិសោធឈុតសម្លៀកបំពាក់អវកាស ក៏ដូចជាការពិសោធពាក់ព័ន្ធនឹងសុខភាព។ល។

May 24, 2023

CR7 បង្ហាញថ្វីជើង ជួយឱ្យ Al Nassr បន្តក្ដីស្រមៃលើកពាននៅអារ៉ាប៊ីសាអូឌីត

Cristiano Ronaldo រកបានគ្រាប់បាល់ដែលសម្រេចឱ្យ Al Shabab ចាញ់ការប្រកួត និងជួយឱ្យ Al Nassr បន្តក្ដីស្រមៃក្លាយជាជើងឯក Saudi Pro League 2022/2023។

នៅវេលាទៀបភ្លឺ ថ្ងៃទី 24 ឧសភា (វេលានៅកម្ពុជា) CR7 និងក្រុម Al Nassr ឈានចូលដល់ជុំទី 27 នៃការប្រកួតបាល់ទាត់ដណ្ដើមពានរង្វាន់ Saudi Pro League 2022/2023 ដោយការប្រកួតជាមួយក្រុម Al Shabab នៅលើទីលានរបស់ Al Nassr។

ថ្វីបើមានកីឡាករជើងខ្លាំងច្រើននាក់ ប៉ុន្តែ Al Nassr ត្រូវបានក្រុមភ្ញៀវ Al Shabab នាំមុខ 2-0 នៅនាទីទី 25 និង 40 ក្នុងតង់ទីមួយ។ ប៉ុន្តែ ក្រុមម្ចាស់ទីលាន Al Nassr ក៏រកបានមួយគ្រាប់នៅចុងតង់ទីមួយ ដោយថ្វីជើងរបស់ Talisca។

ចូលដល់តង់ទីពីរ កីឡាករ Ghareeb របស់ Al Nassr ក៏ស៊ុតបញ្ចូលទីបានមួយគ្រាប់នៅនាទីទី 51 ជួយឱ្យគ្រាប់បាល់ស្មើ 2-2។

នៅនាទីទី 59 Ronaldo ទទួលបានបាល់ រួចបន្តអូសទៅមុខ ឆ្លងផុតខ្សែការពាររបស់ Al Shabab ហើយទាត់ផ្ដាច់សំដៅជ្រុងទីបានសម្រេច ជួយឱ្យ Al Nassr នាំមុខ 3-2 ហើយនេះក៏ជាលទ្ធផលចុងក្រោយនៃការប្រកួត។

ជ័យជម្នះនេះក៏ជួយឱ្យ Al Nassr បន្តដេញតាមក្រុមកំពូលតារាង Al Ittihad ដោយមានគម្លាត 3 ពិន្ទុ គ្រាដែល Al Nassr នៅសល់ពីរប្រកួតទៀត៕

May 24, 2023

រកឃើញបណ្ដាញ «ផ្លូវល្បឿនលឿន» និងទីក្រុងរាប់រយ អាយុកាលរាប់ពាន់ឆ្នាំ លាក់ខ្លួនក្នុងព្រៃជ្រៅ

(ក្វាតេម៉ាឡា)- ក្រុមអ្នកស្រាវជ្រាវអាម៉េរិក-ក្វាតេម៉ាឡា បានរកឃើញបណ្ដាញ «ផ្លូវល្បឿនលឿន» ដំបូងគេលើពិភពលោក ដែលតភ្ជាប់ទីក្រុងបុរាណរាប់រយរបស់ជនជាតិម៉ាយ៉ា (Maya)។

យោងតាម Business Insider ដែលបានចុះផ្សាយកាលពីថ្ងៃទី 22 ឧសភា បណ្ដាញ «ផ្លូវល្បឿនលឿន» បុរាណនេះមានប្រវែងប្រហែល 177 គីឡូម៉ែត្រ តភ្ជាប់ទីក្រុងចំនួន 417។ ការរកឃើញបណ្ដាញផ្លូវ និងទីក្រុង ក៏ដូចជាប្រព័ន្ធធារាសាស្ត្រ និងហេដ្ឋារចនាសម្ព័ន្ធកសិកម្ម បង្ហាញថា សហគមន៍ជនជាតិដែលរស់នៅតំបន់អាម៉េរិកកណ្ដាល មានភាពរីកចម្រើនជាងអ្វីដែលអ្នកវិទ្យាសាស្ត្រធ្លាប់បានគិត។ លទ្ធផលនៃការស្រាវជ្រាវនេះត្រូវបានចុះផ្សាយលើទស្សនាវដ្ដីរបស់សាកលវិទ្យាល័យ Cambridge។

សំណល់បុរាណដែលស្ថិតនៅលើទីតាំងបុរាណ el Mirador ក្នុងតំបន់ព្រៃមួយនៃប្រទេសក្វាតេម៉ាឡា មានវត្តមានតាំងពី 1,000 ឆ្នាំមុនគ្រិស្តសករាជ រហូតដល់សម័យបុរេប្រវត្តិរបស់ជនជាតិម៉ាយ៉ា។ តំបន់ព្រៃនេះអាចទៅដល់ដោយការធ្វើដំណើរតាមឧទ្ធម្ភាគចក្រ ឬដើរដោយថ្មើរជើង 64 គីឡូម៉ែត្រ។

ក្រុមអ្នកស្រាវជ្រាវអាម៉េរិក-ក្វាតេម៉ាឡា បានគូរផែនទីតំបន់ខាងលើចាប់តាំងពីឆ្នាំ 2015 ដោយប្រើប្រាស់ឧបករណ៍បច្ចេកវិទ្យាស្កេនកាំរស្មីឡាស៊ែរ ដែលហៅថា លីដា (lidar)។ បច្ចេកវិទ្យានេះអាចឱ្យគេរកឃើញវត្ថុបុរាណតូចបំផុត។ លីដាអនុញ្ញាតឱ្យអ្នកស្រាវជ្រាវមើលឃើញប្រឡាយ ព្រែក បឹង បណ្ដាញផ្លូវ ឬ បណ្ដាញប្រាសាទបុរាណ។ល។

May 23, 2023

SpaceX ធ្វើតេស្តបច្ចេកវិទ្យាខែលការពារប្រព័ន្ធទម្រយាន Starship

(សហរដ្ឋអាម៉េរិក) – SpaceX កំពុងពិសោធបច្ចេកវិទ្យាដែលជួយពង្រឹងផ្ទៃខាងក្រោមនៃប្រព័ន្ធទម្រដើម្បីអាចទ្រាំទ្រកម្លាំងដ៏ខ្លាំងរបស់ម៉ាស៊ីនរុញច្រានរ៉ុក្កែត Starship នៅពេលបាញ់បង្ហោះម្ដងៗ។

ប្រព័ន្ធទម្រនៅមូលដ្ឋាន Starbase របស់ SpaceX ក្នុងតំបន់ Texas ខាងត្បូង បានរងការខូចខាតធ្ងន់ធ្ងរក្នុងការបាញ់បង្ហោះសាកល្បងដំបូងរបស់យាន Starship ដែលជារ៉ុក្កែតកម្លាំងខ្លាំងបំផុត កាលពីថ្ងៃទី 20 មេសា 2023។ កម្លាំងដ៏ខ្លាំងរបស់ម៉ាស៊ីន Raptor ចំនួន 33 គ្រឿងនៅជាន់ក្រោមបង្អស់របស់ Starship បានទម្លុះជារណ្ដៅនៅខាងក្រោមជើងរបស់ប្រព័ន្ធទម្រ ធ្វើឱ្យផ្ទាំងបេតុងត្រូវបែកបាក់ និងប៉ើងចេញឆ្ងាយពីកន្លែងដើម។ មួយថ្ងៃក្រោយការបាញ់បង្ហោះសាកល្បងខាងលើ SpaceX ក៏បានឱ្យដឹងថា ពួកគេកំពុងរកវិធីបង្កើតខែលទប់ទល់នឹងបញ្ហានេះ។

ការប្រឹងប្រែងរកវិធីទប់ទល់ក៏បានចាប់ផ្ដើមតាំងពីបីខែមុន។ ប្រព័ន្ធខែលនេះមិនទាន់បានត្រៀមខ្លួនរួចរាល់នៅឡើយសម្រាប់ការបាញ់បង្ហោះកាលពីថ្ងៃទី 20 មេសា ប៉ុន្តែ SpaceX នៅតែសម្រេចចិត្តធ្វើតេស្ត ព្រោះយល់ថា ស្រទាប់បេតុងខាងក្រោមប្រព័ន្ធជើងទម្រ Starship អាចទ្រាំទ្រការបាញ់បង្ហោះបានពីរលើក។ ក៏ប៉ុន្តែ បញ្ហានៅតែកើតឡើង ដូច្នេះ SpaceX ក៏បង្កើនសកម្មភាពដើម្បីបង្ហើយកិច្ចការបង្កើតខែលការពារដែលធ្វើពីដែកថែប។

ថ្មីៗនេះ SpaceX បានពិសោធកម្លាំងរបស់ខែលទប់ទល់កំណែដំបូង ដោយការប្រើប្រាស់កម្លាំងរបស់ម៉ាស៊ីន Raptor មួយគ្រឿង។ នៅក្នុងវីដេអូ 20 វិនាទី ដែល SpaceX បានចែករំលែកកាលពីថ្ងៃទី 19 ឧសភា គេឃើញថា នៅពេលចំហាយទឹកបានរសាត់អស់ នៅខាងចុងវីដេអូ ខែលនេះហាក់នៅរក្សាបានទម្រង់ដើម។

SpaceX កំពុងតែអភិវឌ្ឍយាន Starship ដើម្បីដឹកអ្នកអវកាសឡើងទៅកាន់ឋានព្រះចន្ទ និងភពអង្គារ។ ណាសាក៏ជ្រើសរើស Starship ធ្វើជាស្ថានីយចុះចតដំបូងដែលនាំមនុស្សទៅជាន់ដីរបស់ឋានព្រះចន្ទនៅក្នុងកម្មវិធី Artemis។

ការធ្វើតេស្តបច្ចេកវិទ្យាខែលការពារប្រព័ន្ធទម្រយាន Starship

បច្ចុប្បន្ន SpaceX កំពុងដុតដៃដុតជើងនៅក្នុងការផលិតយាន Starship ជាច្រើនគ្រឿងនៅឯមូលដ្ឋាន Starbase ហើយគ្រោងនឹងបាញ់បង្ហោះកំណែបន្ទាប់នៅប្រហែលពីរខែទៀត បើសិនប្រព័ន្ធខែលដែកការពារផ្ទៃជើងទម្របានត្រៀមខ្លួនរួចរាល់ និងបន្ទាប់ពីទទួលបានការអនុញ្ញាតពីរដ្ឋបាលអាកាសចរណ៍អាម៉េរិក៕

May 23, 2023

Tag: ជើង