ឆ្នោត - La Reine Media

បេក្ខភាពនាយករដ្ឋមន្ត្រីថៃ ប្រឈមនឹងហានិភ័យត្រូវជម្រុះពីការប្រកួតប្រជែង

គណៈកម្មការរៀបចំការបោះឆ្នោតថៃ (EC) បញ្ជូនសំណុំរឿងលោក Pita បេក្ខភាពនាយករដ្ឋមន្ត្រីថៃ មកពីបក្ស Move Forward ឡើងទៅកាន់តុលាការធម្មនុញ្ញ នាំឱ្យលោកមានហានិភ័យត្រូវគេជម្រុះពីការប្រកួតដណ្ដើមកៅអីនាយករដ្ឋមន្ត្រីថៃ។

EC នៅថ្ងៃទី 12 កក្កដានេះ បានស្នើសូមឱ្យតុលាការធម្មនុញ្ញថៃ ព្យួរសមាជិកភាពសភារបស់លោក Pita Limjaroenrat ដែលជាបេក្ខភាពសម្រាប់កៅអីនាយករដ្ឋមន្ត្រី ក្នុងពេលតុលាការពិនិត្យរឿងក្ដីប្ដឹងអ្នកនយោបាយនេះ ទាក់ទិននឹងការកាន់កាប់ភាគហ៊ុនរបស់ក្រុមហ៊ុនបណ្ដាញផ្សព្វផ្សាយ iTV។

មុននោះ EC បានឯកភាពនឹងការសន្និដ្ឋានដែលថា មានភស្ដុតាងគ្រប់គ្រាន់ដើម្បីបញ្ជាក់ថា លោក Pita កាន់កាប់ភាគហ៊ុនចំនួន 42,000 ហ៊ុននៅ iTV ពេលលោកចុះឈ្មោះជាបេក្ខភាពសម្រាប់ការបោះឆ្នោតនាពេលកន្លង។ ច្បាប់របស់ថៃបានចែងថា បេក្ខភាពសមាជិកសភាមិនត្រូវបានអនុញ្ញាតឱ្យមានក្រុមហ៊ុនបណ្ដាញផ្សព្វផ្សាយ។

ការសម្រេចរបស់ EC ត្រូវបានធ្វើឡើងតែមួយថ្ងៃ មុនពេលសភាថៃបោះឆ្នោតជ្រើសរើសនាយករដ្ឋមន្ត្រីថ្មី ក្នុងនោះមានលោក Pita ជាមេបក្ស Move Forward ដែលកំពុងជាបេក្ខភាពលំដាប់កំពូល។ បើសិនត្រូវបានព្យួរសមាជិកភាពសភា លោក Pita នឹងត្រូវបានជម្រុះចេញពីការប្រកួតដណ្ដើមតំណែងនាយករដ្ឋមន្ត្រីថៃនៅអាណត្តិនេះ។

តុលាការធម្មនុញ្ញថៃ គ្រោងនឹងបើកសវនាការនៅថ្ងៃនេះ ប៉ុន្តែមិនដឹងថាស្ថាប័ននេះនឹងចេញសាលក្រមនៅវេលាណានៅឡើយ៕

July 12, 2023

នាយករដ្ឋមន្ត្រី Prayuth ប្រកាសដកខ្លួនពីឆាកនយោបាយថៃ

នាយករដ្ឋមន្ត្រីថៃ លោក Prayuth Chan-ocha ប្រកាសដកខ្លួនពីឆាកនយោបាយ ព្រមទាំងលាលែងពីតំណែងក្នុងបក្ស ក្រោយពីកាន់អំណាចបាន 9 ឆ្នាំ។

«ចាប់ពីពេលនេះតទៅ ខ្ញុំចង់ដកខ្លួនពីឆាកនយោបាយ លាឈប់ពីសមាជិកគណបក្សថៃរួបរួមជាតិ» បក្សរបស់លោក Prayuth នាថ្ងៃនេះបានដកស្រង់សម្ដីរបស់នាយករដ្ឋមន្ត្រីថៃ ប្រកាសដូច្នេះ។

គណបក្សថៃរួបរួមជាតិរបស់លោក Prayuth បានបរាជ័យក្នុងការឆ្នោតជាតិកាលពីពេលថ្មីៗនេះ គ្រាដែលបក្សប្រឆាំងនានាទទួលបានសំឡេងឆ្នោតគាំទ្រច្រើនខ្លាំង។ លោក Prayuth ដែលមានអាយុ 69 ឆ្នាំ នៅតែជានាយករដ្ឋមន្ត្រីថៃរហូតដល់រាជរដ្ឋាភិបាលថ្មីត្រូវបានបង្កើតឡើង។

លោក Prayuth អតីតមេបញ្ជាការកងទ័ពជើងគោកថៃ ឡើងកាន់អំណាចបន្ទាប់ពីរដ្ឋប្រហារផ្ដួលរំលំរាជរដ្ឋាភិបាលស៊ីវិលរបស់លោកស្រី Yingluck Shinawatra កាលពីឆ្នាំ 2014។ លោកបានដឹកនាំរដ្ឋាភិបាលយោធាប្រាំឆ្នាំ និងបន្តធ្វើជានាយករដ្ឋមន្ត្រីក្រោយការបោះឆ្នោតសកលឆ្នាំ 2019។

ក្រោមការដឹកនាំរបស់លោក Prayuth សេដ្ឋកិច្ចថៃត្រូវបានវាយតម្លៃថា អាក្រក់បំផុតក្នុងរង្វង់ 30 ឆ្នាំមកនេះ ព្រមទាំងបានរងការរិះគន់ច្រើនផងដែរ។

លោក Prayuth ចូលជាសមាជិកគណបក្សថៃរួបរួមជាតិ ដែលទើបត្រូវបានបង្កើតឡើងកាលពីខែមករាឆ្នាំនេះ នៅក្នុងកិច្ចប្រឹងប្រែងដែលត្រូវបានគេយល់ថា ដើម្បីរកវិធីបន្តកាន់អំណាចនៅក្នុងការបោះឆ្នោតដែលបានធ្វើឡើងកាលពីខែឧសភា 2023។ ក៏ប៉ុន្តែ បក្សរបស់លោក Prayuth ដណ្ដើមបានកៅអីតែ 36 ប៉ុណ្ណោះ នៅក្នុងចំណោម 500 កៅអីនៅសភាជាន់ទាប៕

July 11, 2023

Mbappe ថា ខ្លួនស័ក្ដិសមនឹងការទទួលបានបាល់មាសនៅរដូវកាលនេះ

(បារាំង) – ខ្សែប្រយុទ្ធ Kylian Mbappe យល់ថា ដោយបានរួមចំណែកនៅក្នុងក្លឹបបាល់ទាត់ PSG និងក្រុមជម្រើសជាតិបារាំង គាត់ពិតជាបានបំពេញតាមលក្ខខណ្ឌនានាសម្រាប់ពានរង្វាន់គ្រាប់បាល់មាសឆ្នាំ 2023។

កាលពីព្រលប់ថ្ងៃទី 19 មិថុនា បន្ទាប់ពីទាត់ចូលទីបានមួយគ្រាប់ ជួយឱ្យបារាំងឈ្នះក្រិក 1-0 នៅក្នុងវគ្គជម្រុះ Euro 2024 Mbappe ត្រូវបានសួរថា តើមានអារម្មណ៍ថាខ្លួនឯងស័ក្ដិសមជាមួយនឹងគ្រាប់បាល់មាសឆ្នាំ 2023 ឬទេ។ Mbappe ឆ្លើយថា «ខ្ញុំនឹងនិយាយថាមាន។ ខ្ញុំបានបំពេញគ្រប់លក្ខខណ្ឌ។ ប៉ុន្តែពានរង្វាន់នេះអាស្រ័យទៅលើសន្លឹកឆ្នោត»។

ក្នុងការប្រកួតនៅលើទីលាន Stade de France កំពូលកីឡាករ Mbappe បានទាត់បាល់ពិន័យរកបានមួយគ្រាប់គត់នៅនាទីទី 55។ នេះគឺជាគ្រាប់បាល់ទី 54 របស់ Mbappe រាប់ចាប់តាំងពីដើមរដូវកាល 2022-2023 ដែលនេះគ្រប់គ្រាន់ដើម្បីក្លាយជាកីឡាករបារាំងដែលរកបានគ្រាប់បាល់ឈ្នះច្រើនជាងគេបំផុតក្នុងមួយរដូវកាល។

ពានរង្វាន់គ្រាប់បាល់មាសត្រូវបានរៀបចំឡើងដោយទស្សនាវដ្ដីបារាំង France Football។ អ្នកចូលរួមបោះឆ្នោតជ្រើសរើសម្ចាស់គ្រាប់បាល់មាសគឺជាអ្នកសារព័ត៌មានមកពីជុំវិញពិភពលោក។ ថ្ងៃទី 30 តុលា 2023 France Football នឹងប្រគល់ពានរង្វាន់នេះនៅទីក្រុងប៉ារីស។ Messi កំពុងកាន់កាប់កំណត់ត្រាគ្រាប់បាល់មាស ខណៈ Mbappe និង Haaland មិនទាន់ទទួលបានពានរង្វាន់នេះនៅឡើយ៕

Mbappe ទាត់ចូលទីបានមួយគ្រាប់ ជួយឱ្យបារាំងឈ្នះក្រិក 1-0 នៅក្នុងការប្រកួតវគ្គជម្រុះ Euro 2024 កាលពីថ្ងៃទី 19 មិថុនា 2023

https://www.youtube.com/watch?v=Topwjxtlbeo

June 20, 2023

ទាហានណាតូរាប់រយនាក់ទៅកាន់តំបន់ផ្ដាច់ខ្លួនកូសូវ៉ូនៅស៊ែប៊ី

ទាយានរាប់រយនាក់របស់សម្ព័ន្ធមិត្តយោធាណាតូ (NATO) ត្រូវបានបញ្ជូនទៅជួយពង្រឹងការរក្សាសន្តិសុខរបស់សម្ព័ន្ធមិត្តនេះនៅកូសូវ៉ូ (Kosovo) ក្រោយពីមានហេតុការណ៍ប៉ះទង្គិចគ្នានៅភាគខាងជើងនៃតំបន់ផ្ដាច់ខ្លួន។

«កងកម្លាំងបន្ថែមរបស់ណាតូ ចាប់ផ្ដើមធ្វើដំណើរទៅកាន់កូសូវ៉ូ បន្ទាប់ពីមានហេតុការណ៍ប៉ះទង្គិចគ្នាកាលពីសប្ដាហ៍កន្លងដែលបានធ្វើឱ្យទាហានណាតូប្រហែល 30 នាក់រងរបួស។ ទាហានប្រហែល 500 នាក់មកពីទ័ពជើងគោករបស់តួកគី ដើរតួនាទីសំខាន់ជាងគេនៅក្នុងកងកម្លាំងជំនួយបន្ថែម» អ្នកនាំពាក្យរបស់ណាតូ Oana Lungescu កាលពីថ្ងៃទី 05 មិថុនា បានប្រកាសដូច្នេះ។

មុននោះ កាលពីថ្ងៃទី 30 ឧសភា អគ្គលេខាធិការនៃអង្គការណាតូ លោក Jens Stoltenberg បានឱ្យដឹងថា សម្ព័ន្ធយោធានេះនឹងបញ្ជូនទាហាន 700 នាក់បន្ថែមទៀតទៅកាន់កូសូវ៉ូ ដើម្បីពង្រឹងកម្លាំងដែលមានចំនួន 4,000 នាក់នៅតំបន់ផ្ដាច់ខ្លួនកូសូវ៉ូ។ លោក Jens Stoltenberg ប្រកាសថា ណាតូបានត្រៀមខ្លួនរួចហើយសម្រាប់ការផ្ដល់កម្លាំងជំនួយបន្ថែម។

ការប៉ះទង្គិចគ្នារវាងបាតុករដើមកំណើតស៊ែប៊ី ជាមួយប៉ូលិសកូសូវ៉ូ និងកងកម្លាំងរបស់ណាតូ បានកើតឡើងនៅខាងមុខសាលាស្រុក Zvecan នៃតំបន់កូសូវ៉ូ កាលពីថ្ងៃទី 29 ឧសភា។ កងទ័ពណាតូ ដំបូងឡើយបានព្យាយាមបំបែកក្រុមបាតុករចេញពីកម្លាំងប៉ូលិស ហើយក្រោយមកប្រើប្រាស់ខែល និងដំបងឆក់ដើម្បីរំសាយបាតុកម្ម។

បាតុករមួយចំនួនបានគប់ដុំឥដ្ឋ គ្រាប់បែកសាំងសំដៅទៅកាន់ទាហានណាតូ ប៉ុន្តែ មិនយូរប៉ុន្មាន ក្រុមបាតុករក៏ត្រូវបានរុញច្រានចេញឆ្ងាយពីខាងមុខសាលាស្រុក។ ការប៉ះទង្កិចគ្នានេះបានបណ្ដាលឱ្យទាហានណាតូជាង 30 នាក់ និងបាតុករជាង 50 នាក់ ត្រូវរងរបួស។

ក្រោយហេតុការណ៍កាលពីថ្ងៃទី 29 ឧសភាក្នុងតំបន់ Zvecan បាតុករដើមកំណើតស៊ែប៊ីរាប់រយនាក់ ក៏បន្តប្រមូលផ្ដុំគ្នានៅខាងមុខសាលាក្រុង ជាទីដែលមានការរឹតបន្តឹងសន្តិសុខកម្រិតខ្ពស់។

ប្រជាជនដើមកំណើតស៊ែប៊ី នៅកូសូវ៉ូ នាំគ្នាតវ៉ា មិនទទួលស្គាល់ការបោះឆ្នោតក្នុងតំបន់កាលពីខែមេសានៅភាគខាងជើងនៃតំបន់ផ្ដាច់ខ្លួន ជាទីដែលបានអនុញ្ញាតឱ្យក្រុមមន្ត្រីដើមកំណើតអាល់បានី គ្រប់គ្រងក្រុមប្រឹក្សាក្នុងតំបន់ បើទោះអត្រានៃអ្នកទៅបោះឆ្នោតមានមិនដល់ 3.5%។

កូសូវ៉ូដែលមានផ្ទៃដីទំហំប្រហែល 10,800 គីឡូម៉ែត្រការ៉េ គឺជាតំបន់ផ្ដាច់ខ្លួននៅភាគនិរតីរបស់ប្រទេសស៊ែប៊ី។ កូសូវ៉ូប្រកាសឯករាជ្យកាលពីឆ្នាំ 2008 ប៉ុន្តែ ស៊ែប៊ីមិនទទួលស្គាល់ និងបានប្រកាសថា កូសូវ៉ូជាកម្មសិទ្ធិរបស់ខ្លួន។ កូសូវ៉ូមានប្រជាជន 1.8 លាននាក់ ក្នុងនោះភាគច្រើនគឺជាជនជាតិអាល់បានី។

ជនជាតិស៊ែប៊ីប្រហែល 123,000 នាក់ដែលរស់នៅក្នុងភាគខាងជើងតំបន់កូសូវ៉ូ មិនទទួលស្គាល់អាជ្ញាធរនៅ Pristina។ ពួកគេស្មោះស្ម័គ្រក្នុងផ្នែកនយោបាយជាមួយនឹងស៊ែប៊ី ដែលជាអ្នកផ្គត់ផ្គង់ផ្នែកហិរញ្ញវត្ថុដល់សហគមន៍នេះ។ ចំណែកប្រទេសលោកខាងលិចវិញ ភាគច្រើនទទួលស្គាល់ឯករាជ្យរបស់កូសូវ៉ូ ប៉ុន្តែតំបន់ផ្ដាច់ខ្លួននេះមិនទាន់ទទួលបានកៅអីនៅអង្គការសហប្រជាជាតិ ដោយសារតែមានការជំទាស់ពីរុស្ស៊ី និងចិន៕

June 6, 2023

ខ្សែប្រយុទ្ធរបស់ Man Utd ប្ដេជ្ញារារាំង Man City លើកពានទាំងបីក្នុងរដូវកាលនេះ

(អង់គ្លេស) – ខ្សែប្រយុទ្ធ Marcus Rashford ចាត់ទុកថា ការរារាំង Man City បង្កើតឡើងវិញទិដ្ឋភាពលើកពានជើងឯកទាំងបីនៃរដូវកាល 1998-1999 របស់ Manchester United គឺជារឿងសំខាន់បំផុត នៅមុនវគ្គផ្ដាច់ព្រ័ត្រ FA Cup។

«ការធានាថា Man Utd នៅតែជាក្លឹបអង់គ្លេសតែមួយគត់ដែលដណ្ដើមបានពានជើងឯកទាំងបីក្នុងមួយរដូវកាល (Treble) គឺជារឿងសំខាន់បំផុត» Rashford ថ្លែងដូច្នេះនៅពេលត្រូវបានសួរអំពីការជំរុញទឹកចិត្តរបស់គាត់នៅមុនវគ្គផ្ដាច់ព្រ័ត្រ FA Cup (Football Association Challenge Cup)។

ក្រោយពីដណ្ដើមបានពានរង្វាន់ជើងឯកលិគកំពូលអង់គ្លេសបន្តបន្ទាប់ជាលើកទីបី Man City នៅសល់ពីរប្រកួតទៀតដែលនឹងត្រូវប៉ះ Man Utd ក្នុងវគ្គផ្ដាច់ព្រ័ត្រ FA Cup នៅទីលាន Wembley របស់អង់គ្លេស ថ្ងៃទី 03 មិថុនា រួចប្រកួតជាមួយ Inter Milan ក្នុងវគ្គផ្ដាច់ព្រ័ត្រ Champions League នៅប្រទេសតួកគី ថ្ងៃទី 10 មិថុនា។ គ្រូបង្វឹក Pep Guardiola របស់ក្លឹប Man City ធ្លាប់បានសម្ដែងអំពីមហិច្ឆតាលើកពានទាំងបីនេះដើម្បីបង្កើតឡើងវិញទិដ្ឋភាពនៃជ័យជម្នះរបស់ Man Utd នៅរដូវកាល 1998-1999។

ខ្សែប្រយុទ្ធ Marcus Rashford របស់ Manchester United

សម្រាប់ Man Utd វិញ ការផ្ដួល Man City នៅលើទីលាន Wembley របស់ក្រុងឡុងដ៍នៅចុងសប្ដាហ៍នេះ មិនត្រឹមតែជួយឱ្យពួកគេលើកពានជើងឯកបានពីរបន្ទាប់ពី EFL Cup (League Cup) ក្នុងមួយរដូវកាលនោះទេ ប៉ុន្តែក៏រារាំងគូប្រកួតមកពីទីក្រុងជាមួយគ្នា បង្កើតឡើងជាថ្មីនូវជោគជ័យក្រោមការដឹកនាំរបស់ Sir Alex Ferguson កាលពី 24 ឆ្នាំមុនផងដែរ។

ក្នុងពិធីប្រគល់រង្វាន់ចុងរដូវកាលរបស់ Manchester United កាលពីព្រលប់ថ្ងៃទី 19 ឧសភា ខ្សែប្រយុទ្ធ Rashford ដណ្ដើមបានពានរង្វាន់ប្រចាំរដូវកាលចំនួនពីរសំខាន់ៗ គឺ ពានរង្វាន់កីឡាករឆ្នើមបំផុតដែលបោះឆ្នោតដោយអ្នកគាំទ្រ (Sir Matt Busby Player of the Year) និងពានរង្វាន់កីឡាករឆ្នើមបំផុតដែលបោះឆ្នោតដោយសមាជិកក្នុងក្រុម៕

May 31, 2023

ក្រោយស៊ីហ្គេមលើកទី 32 ឥណ្ឌូណេស៊ីថា នឹងឡើងដល់វគ្គផ្ដាច់ព្រ័ត្រនៅ U23 អាស៊ីអាគ្នេយ៍ឆ្នាំ 2023

ប្រធានសហព័ន្ធកីឡាបាល់ទាត់ឥណ្ឌូណេស៊ីបានប្រកាសថា កីឡាកររបស់ប្រទេសនេះនឹងបញ្ចេញថ្វីជើងដ៏ល្អបន្ថែមទៀតក្នុងការប្រកួតដណ្ដើមពានរង្វាន់បាល់ទាត់យុវជនអាយុក្រោម 23 ឆ្នាំ (U23) នៅតំបន់អាស៊ីអាគ្នេយ៍ឆ្នាំ 2023។

នៅពានរង្វាន់បាល់ទាត់ U23 អាស៊ីអាគ្នេយ៍ឆ្នាំ 2023 (AFF U23 Championship 2023) ក្រុម U23 ឥណ្ឌូណេស៊ីធ្លាក់ទៅក្នុងពូល B ដែលមាន U23 ម៉ាឡេស៊ី និង U23 ទីម័រខាងកើត បន្ទាប់ពីការចាប់ឆ្នោតបានធ្វើឡើងរួចរាល់។ ប្រធានសហព័ន្ធបាល់ទាត់ឥណ្ឌូណេស៊ី (PSSI) លោក Erick Thohir បាននិយាយថា «បើទោះគូប្រកួតជាអ្នកណា យើងក៏ត្រូវតែត្រៀមឱ្យបានហ្មត់ចត់បំផុត»។

លោក Erick Thohir បន្តថា «ខ្ញុំមានសុទិដ្ឋិនិយម ព្រោះថា បរិយាកាសរបស់បាល់ទាត់ឥណ្ឌូណេស៊ីនៅតែល្អ បន្ទាប់ពីដណ្ដើមបានមេដាយមាសនៅស៊ីហ្គេមលើកទី 32។ ខ្ញុំជឿជាក់ថា ប្រការនេះនឹងបន្ថែមថាមពលវិជ្ជមានដើម្បីក្រុមជម្រើសជាតិ U23 បន្តដណ្ដើមបានលទ្ធផលល្អបំផុត និងដណ្ដើមបានសិទ្ធិឡើងទៅវគ្គផ្ដាច់ព្រ័ត្រ»។

ប្រធានសហព័ន្ធបាល់ទាត់ឥណ្ឌូណេស៊ី (PSSI) លោក Erick Thohir (អាវក្រហម)

ពានរង្វាន់ជើងឯកបាល់ទាត់ U23 អាស៊ីអាគ្នេយ៍ឆ្នាំ 2023 នឹងជាឈ្នាន់ដើម្បីក្រុមបាល់ទាត់ឥណ្ឌូណេស៊ីមានការត្រៀមខ្លួនបានល្អបំផុតសម្រាប់មហាព្រឹត្តិការណ៍ប្រកួតកីឡាទ្វីបអាស៊ីឆ្នាំ 2023 (ASIAD លើកទី 19) ក៏ដូចជាវគ្គផ្ដាច់ព្រ័ត្រ U23 ទ្វីបអាស៊ីផងដែរ។

ការប្រកួតបាល់ទាត់នៃពានរង្វាន់យុវជនអាយុក្រោម 23 ឆ្នាំនៅតំបន់អាស៊ាន (AFF U23 Championship 2023) នឹងធ្វើឡើងនៅប្រទេសថៃ ចាប់ពីថ្ងៃទី 17 សីហា ដល់ 26 សីហា។ ក្រុម U23 របស់កម្ពុជា ត្រូវស្ថិតនៅក្នុងពូល A ជាមួយនឹងព្រុយណេ មីយ៉ាន់ម៉ា និងម្ចាស់ផ្ទះថៃ៕

May 30, 2023

U23 កម្ពុជាស្ថិតក្នុងពូលជាមួយថៃ នៅព្រឹត្តិការណ៍បាល់ទាត់បុរសអាយុក្រោម 23 ឆ្នាំ របស់អាស៊ីអាគ្នេយ៍

ក្រុមបាល់ទាត់ជម្រើសជាតិអាយុក្រោម 23 ឆ្នាំ (U23) របស់កម្ពុជា ត្រូវស្ថិតនៅក្នុងពូល A ជាមួយនឹងព្រុយណេ មីយ៉ាន់ម៉ា និងម្ចាស់ផ្ទះថៃ បន្ទាប់ពីការចាប់ឆ្នោតកាលពីព្រឹកថ្ងៃទី 29 ឧសភា 2023 សម្រាប់ព្រឹត្តិការណ៍ប្រកួតបាល់ទាត់ U23 អាស៊ីអាគ្នេយ៍។

នៅឯពូល B វិញ មានបីក្រុម រួមមាន ទីម័រខាងកើត ម៉ាឡេស៊ី និងឥណ្ឌូណេស៊ី ខណៈដែលពូល C រួមមាន វៀតណាម ហ្វ៊ីលីពីន និងឡាវ។

ក្រុមទាំងអស់ត្រូវប្រកួតវិលមួយជុំ រួចបូកពិន្ទុដើម្បីដាក់ចំណាត់ថ្នាក់។ បីក្រុមដែលជាប់លេខមួយក្នុងពូលនីមួយៗ រួមនឹងក្រុមលេខពីរមួយក្រុមដែលមានថ្វីជើងល្អបំផុត នឹងដណ្ដើមបានសិទ្ធិឡើងទៅកាន់វគ្គពាក់កណ្ដាលផ្ដាច់ព្រ័ត្រ។

យោងតាមទំព័របណ្ដាញសង្គម Cambodian Premier League ការប្រកួតរបស់កម្ពុជា នឹងចាប់ផ្តើមពីថ្ងៃទី 17 ដល់ ថ្ងៃទី 21 ខែសីហា ឆ្នាំ 2023។

ការប្រកួតបាល់ទាត់នៃពានរង្វាន់យុវជនអាយុក្រោម 23 ឆ្នាំនៅតំបន់អាស៊ាន (AFF U23 Championship 2023) នឹងធ្វើឡើងនៅប្រទេសថៃ ចាប់ពីថ្ងៃទី 17 សីហា ដល់ 26 សីហា។ វៀតណាមគឺជាក្រុមជើងឯក U23 អាស៊ីអាគ្នេយ៍ឆ្នាំ 2022 ដោយបានផ្ដួល U23 ថៃ នៅវគ្គផ្ដាច់ព្រ័ត្រ៕

May 29, 2023

វីដេអូ៖ តំណាងរាស្ត្រប្រហែលម្ភៃនាក់វាយតប់គ្នាក្នុងសភានៅបូលីវី

តំណាងរាស្ត្រច្រើនរូបនៅសភាបូលីវី វាយតប់ បោចសក់គ្នានៅក្នុងសភានៅពេលតំណាងរដ្ឋាភិបាលវាយការណ៍អំពីការដាក់ពន្ធនាគារចំពោះអតីតអភិបាលមួយរូប។

រដ្ឋមន្ត្រី Eduardo del Castillo កាលពីថ្ងៃទី 23 ឧសភា ត្រូវបានសភាបូលីវីកោះហៅឱ្យចូលមករាយការណ៍អំពីករណីលោក Luis Fernando Camacho អតីតអភិបាលតំបន់ Santa Cruz និងជាអ្នកនយោបាយដ៏ល្បីឈ្មោះរបស់បក្សប្រឆាំង ដែលត្រូវបានកាត់ទោសឱ្យជាប់ពន្ធនាគារ 12 ឆ្នាំ ក្រោមការចោទប្រកាន់ថា មានផែនការធ្វើរដ្ឋប្រហារ។

លោក Castillo ការពារសេចក្ដីសម្រេចចំពោះការកាត់ទោសអតីតអភិបាល Camacho ព្រមទាំងបានរិះគន់ថា ក្រុមតំណាងរាស្ត្របក្សរបស់លោក Camacho ជា «ក្រុមជ្រុលនិយម លួចប្លន់ ហិង្សា ចូលចិត្តរឹបអូបទ្រព្យរបស់ប្រជាជនបូលីវី»។

ពេលលោក Castillo កំពុងនិយាយ តំណាងរាស្ត្រមួយក្រុមរបស់បក្សប្រឆាំង នាំគ្នាលើកបដាប្រឆាំងនឹងការដាក់ទោសលើលោក Camacho អមនឹងអក្សរមួយឃ្លា «រដ្ឋមន្ត្រីភេរវកម្ម»។ ក្នុងពេលតំណាងរាស្ត្រមួយក្រុមដែលគាំទ្ររដ្ឋាភិបាលព្យាយាមដណ្ដើមយកបដា ភ្លាមនោះ តំណាងរាស្ត្រប្រហែល 20 នាក់ ភាគច្រើនជាស្ត្រី ក៏ចូលទៅវាយតប់ និងបោចសក់គ្នាក្នុងសភា។

ប៉ុន្មាននាទីក្រោយមក ហេតុការណ៍វាយតប់គ្នាក៏បានបញ្ចប់នៅពេលក្រុមតំណាងរាស្ត្រជាបុរសចូលធ្វើអន្តរាគមន៍។ ក្នុងហេតុការណ៍នេះពុំមានអ្នករងរបួសធ្ងន់ធ្ងរនោះទេ។

នេះគឺជាហេតុការណ៍ថ្មីបំផុតដែលបង្ហាញអំពីស្ថានការណ៍ប្រកាន់បក្សពួកក្នុងរឿងនយោបាយនៅ បូលីវី ជាប្រទេសដែលបក្សប្រឆាំងប្រកាសថា សកម្មជនបក្សប្រឆាំងប្រហែល 180 នាក់កំពុងត្រូវបានឃុំខ្លួន។

រដ្ឋាភិបាលរបស់ប្រធានាធិបតី Luis Arce បានចោទប្រកាន់សកម្មជនទាំងនោះថា បានគាំទ្ររដ្ឋប្រហារប្រឆាំងអតីតប្រធានាធិបតី Evo Morales កាលពីឆ្នាំ 2019 និងជួយឱ្យលោកស្រី Jeanine Anez អ្នកនយោបាយស្ដាំនិយមឡើងកាន់អំណាច។

យោងតាម AFP លោក Arce ធ្លាប់ជារដ្ឋមន្ត្រីសេដ្ឋកិច្ចក្នុងសម័យប្រធានាធិបតី Morales និងត្រូវសុំសិទ្ធិជ្រកកោននៅប្រទេសម៉ិកស៊ិក នៅពេលលោក Morales ត្រូវបានផ្ដួលរំលំ។ ក្រោយមក លោក Arce ក៏បានត្រលប់មកប្រទេស និងត្រូវបានបោះឆ្នោតជាប្រធានាធិបតីបូលីវីកាលពីឆ្នាំ 2020 គ្រាដែលលោកស្រី Anez ត្រូវបានកាត់ទោសឱ្យជាប់ពន្ធនាគារ៕

May 25, 2023

អនាគតបេក្ខភាពប្រធាន FAT របស់ថៃ៖ «បើថៃមិនបានចូលរួម World Cup ខ្ញុំនឹងលាលែងពីតំណែង»

អតីតកីឡាករឆ្នើម Piyapong Pew On ធ្វើឱ្យមានការចាប់អារម្មណ៍បន្ទាប់ពីបានប្រកាសឈរឈ្មោះជាបេក្ខភាពសម្រាប់តំណែងប្រធានសហព័ន្ធកីឡាបាល់ទាត់របស់ប្រទេសថៃ។

យោងតាមប្រព័ន្ធផ្សព្វផ្សាយថៃ បើទោះជាការបោះឆ្នោតជ្រើសរើសប្រធានសហព័ន្ធបាល់ទាត់ថៃ (FAT) ត្រូវធ្វើឡើងនៅខែមេសា ឆ្នាំ 2024 ប៉ុន្តែស្ថានការណ៍ប្រែប្រួលនៅមុនការបោះឆ្នោតនេះ កំពុងតែឡើង «កម្ដៅ»។ Piyapong Pew On ដែលជាអតីតកីឡាករឆ្នើមរបស់បាល់ទាត់ថៃ នឹងក្លាយជាបេក្ខភាពសម្រាប់តំណែងនេះ។

ចែករំលែកអំពីការសម្រេចចិត្តខាងលើ លោក Piyapong Pew On បានបង្កការចាប់អារម្មណ៍ខ្លាំងនៅពេលប្រកាសថា នឹងលាលែងពីតំណែង បើសិនមិនអាចជួយឱ្យបាល់ទាត់ថៃបានចូលរួមប្រកួតនៅ World Cup។

«… ខ្ញុំបានត្រៀមខ្លួនរួចហើយសម្រាប់ការកាន់តំណែងប្រធាន FAT។ បើសិនសមាជិក សមាជិកាគាំទ្រ ខ្ញុំសន្យាចំពោះគ្រប់គ្នាថា នឹងបំពេញកាតព្វកិច្ចក្នុងរង្វង់បួនឆ្នាំ។ បើសិនក្រុមជម្រើសជាតិថៃមិនបានចូលរួម World Cup ខ្ញុំនឹងលាលែងពីតំណែង ហើយធ្វើកិច្ចការក្នុងវិស័យបាល់ទាត់ជាមួយនឹងតួនាទីផ្សេង» អតីតកីឡាករឆ្នើមរបស់ប្រទេសថៃ លោក Piyapong Pew On អះអាងដូច្នេះ។

លោក Piyapong Pew On បញ្ជាក់ថា លោកមិនប្រជែងដើម្បីមុខតំណែង ប៉ុន្តែលោកមានភាពម៉ឺងម៉ាត់ដោយរំពឹងថានឹងអភិវឌ្ឍ និងបង្កើតវប្បធម៌បាល់ទាត់ថៃទៅតាមស្មារតី «ភាពត្រឹមត្រូវ ភាពស្មោះត្រង់ តម្លាភាព និងមានការផ្ទៀងផ្ទាត់»។

លោក Piyapong Pew On ក៏ជាអ្នកដែលបានរិះគន់ទៅលើក្រុមគ្រូបង្វឹករបស់ក្រុមបាល់ទាត់ U22 ថៃ នៅក្នុងករណីវាយតប់គ្នាក្នុងការប្រកួតវគ្គផ្ដាច់ព្រ័ត្រនៅស៊ីហ្គេមលើកទី 32 រវាង U22 ថៃ និង U22 ឥណ្ឌូណេស៊ី កាលពីថ្ងៃ 16 ខែឧសភា 2023។

«ករណីហិង្សាកើតឡើងក្នុងវគ្គផ្ដាច់ព្រ័ត្ររវាង U22 ថៃ និង U22 ឥណ្ឌូណេស៊ី។ នោះគឺជារឿងដែលកីឡាករថៃត្រូវរៀនសូត្រ ពិសេសគឺការគ្រប់គ្រងកំហឹង។ ប៉ុន្តែ នោះគឺជាបញ្ហាដែលមិនគួរកើតឡើង និងមិនអាចលើកលែងទោស នៅពេលក្រុមគ្រូបង្វឹកទាំងមូលសម្រុកចូលបង្កហេតុជាមួយឥណ្ឌូណេស៊ី។ ពួកគេគួរណាស់តែរារាំងកីឡាករក្មេងៗ តែបែរជាធ្វើឱ្យមានកំហុសដោយខ្លួនឯងទៅវិញ» លោក Piyapong Pew On ថ្លែងដូច្នេះ។

លោក Piyapong Pew On បន្ថែមថា «ទោះជាយ៉ាងណាក៏ដោយ គេត្រូវតែផ្លាស់ប្ដូរគ្រូបង្វឹក ថៃត្រូវការមនុស្សហ្មត់ចត់ជាងដើម្បីដឹកនាំក្រុមកីឡាករក្មេង មិនដូច្នេះទេ យើងនឹងត្រូវបានបំផ្លាញដូចនៅក្នុងការប្រកួតផ្ដាច់ព្រ័ត្រនៅស៊ីហ្គេមលើកនេះ»។

លោក Piyapong Pew On អាចនឹងត្រូវប្រកួតប្រជែងដណ្ដើមតំណែងប្រធានសហព័ន្ធបាល់ទាត់ថៃ ជាមួយនឹងអតីតប្រធាន FAT លោក Worawee Makudi អាយុ 72 ឆ្នាំ។ កន្លងមក លោក Worawee Makudi ក៏បានបញ្ជាក់ថា នឹងឈរឈ្មោះជាបេក្ខភាពសម្រាប់តំណែងនេះជាថ្មី បើទោះផ្ទុយពីការកំណត់ដែលហាមបេក្ខភាពដែលមានអាយុលើសពី 70 ឆ្នាំ។ ប្រធាន FAT បច្ចុប្បន្នដែលត្រូវចប់អាណត្តិនៅខែកុម្ភៈ ឆ្នាំ 2024 គឺលោក Somyot Poompanmoung៕

May 23, 2023

ត្រូវឆ្នោតតម្លៃ ១លានដុល្លារអាម៉េរិក ដោយសារអំណោយក្នុងថ្ងៃបុណ្យណូអែល

(សហរដ្ឋអាម៉េរិក)-និស្សិតម្នាក់នៅសាកលវិទ្យាល័យ Virginia បានត្រូវឆ្នោតតម្លៃ ១ លានដុល្លារអាម៉េរិក ពីអំណោយដែលម្ដាយបានឱ្យក្នុងថ្ងៃបុណ្យណែអែល ឆ្នាំ ២០២១។

Brian Donohue ដែលជានិស្សិតម្នាក់នៅសាកលវិទ្យាល័យ Virginia ក្រោកពីគេងក្នុងថ្ងៃបុណ្យណែអែល ក៏ស្រាប់តែបានប្រទះឃើញសន្លឹកឆ្នោត Bank a Million ១ សន្លឹក នៅក្នុងចំណោមកាដូដែលខ្លួនបានទទួលពីម្ដាយ។ ម្ដាយរបស់ Brian បានទិញសន្លឹកឆ្នោតនេះកាលពីថ្ងៃទី ២២ ធ្នូ ២០២១ ពីហាងទំនិញមួយនៅ Okaton។

Brian បានផ្ទៀងលេខឆ្នោត ហើយក៏ឃើញថា លេខ ៤-៨-២១-២៥-៣២-៣៥ គឺជាលេខត្រូវរង្វាន់តម្លៃ ១ លានដុល្លារក្រោយការបង់ពន្ធ។ កំលោះនេះបានទៅទទួលប្រាក់រង្វាន់កាលពីថ្ងៃទី ២៧ ធ្នូ ២០២១ ប៉ុន្តែ រហូតដល់យប់ថ្ងៃទី ៦ មករា ២០២២ ទើបព័ត៌មាននេះត្រូវបានផ្សព្វផ្សាយ។ Brian ឱ្យដឹងថា នឹងប្រើប្រាស់លុយនេះដើម្បីបង់ថ្លៃសាលារៀន។

ឆ្នោត Bank a Billion ត្រូវបានបោះផ្សាយផ្ដាច់មុខនៅ Virginia និងចាប់រង្វាន់នៅថ្ងៃពុធ និងថ្ងៃសៅរ៍រៀងរាល់សប្ដាហ៍ នៅវេលាម៉ោង ២។ រង្វាន់ធំជាងគេរួមមាន ១ លានដុល្លារ, កន្លះលានដុល្លារ និង ២៥០,០០០ ដុល្លារ ក្រោយការបង់ពន្ធរួច។ អត្រានៃការត្រូវរង្វាន់ធំជាងគេគឺ ១/៣.៨ លាន មានន័យថា ក្នុងចំណោមសន្លឹកឆ្នោតចំនួន ៣,៨០០,០០០ សន្លឹក គឺមាន ១ សន្លឹកជារង្វាន់ធំជាងគេ៕

January 8, 2022

ត្រូវឆ្នោតពិសេស តម្លៃជាង200លានដុល្លារអាមេរិកនៅក្នុងរដ្ឋ New Jersey

ពលរដ្ឋម្នាក់នៅក្នុងរដ្ឋ New Jersey សហរដ្ឋអាមេរិក បានត្រូវឆ្នោតប្រភេទពិសេស ដែលមានតម្លៃដល់ទៅ202លានដុល្លារអាមេរិករបស់ក្រុមហ៊ុនឆ្នោត Mega Millions ប៉ុន្តែសម្រេចចិត្ត សុំមិនបង្ហើបឱ្យដឹងអត្តសញ្ញាណ។

ម្ចាស់សន្លឹកឆ្នោតដ៏មានសំណាងរូបនេះ បានទៅទទួលប្រាក់រង្វាន់កាលពីពេលថ្មីកន្លងទៅនេះ និងបានក្លាយជាពលរដ្ឋដំបូងគេបង្អស់នៅក្នុងរដ្ឋ New Jersey ដែលទទួលប្រាក់ដោយមិនត្រូវបានបញ្ចេញអត្តសញ្ញាណ។ នេះបើតាមមន្ត្រីស្ថាប័នឆ្នោតនៅមូលដ្ឋាន ដែលបានឱ្យដឹងកាលពីថ្ងៃទី29កញ្ញា។

សូមបញ្ជាក់ថា ការអនុញ្ញាតឱ្យអ្នកត្រូវឆ្នោត លាក់បាំងអត្តសញ្ញាណនេះ ត្រូវបានធ្វើឡើងដោយយោងទៅតាមច្បាប់ថ្មីមួយអនុម័តកាលពីខែមករា ដោយបានចែងថា ពលរដ្ឋទាំងអស់់មានសិទ្ធិស្នើសុំមិនបញ្ចេញឈ្មោះ នៅពេលពួកគេត្រូវឆ្នោត Mega Millions នៅក្នុងរដ្ឋ New Jersey ដើម្បីចៀសវាងការចាប់អារម្មណ៍ពីសាធារណជន។ បន្ទាប់ពីការអនុម័តច្បាប់ខាងលើបានជិត1ខែ ឆ្នោត Mega Millions ក៏មានអ្នកត្រូវរង្វាន់ពិសេស ហើយការត្រូវរង្វាន់នោះក៏ត្រូវបានប្រកាសកាលពីថ្ងៃទី12កុម្ភៈ។

មន្ត្រីក្រុមហ៊ុនឆ្នោតនៅ New Jersey បានចេញសេចក្ដីប្រកាសឱ្យដឹងថា អ្នកមានសំណាងបានមើលការចេញឆ្នោតលទ្ធផលឆ្នោតតាមរយៈ Facebook នៅពេលកំពុងធ្វើការ ហើយបានស្វែងរកសន្លឹកឆ្នោតនៅក្នុងរថយន្តដើម្បីផ្ទៀងផ្ទាត់។ “អ្នកត្រូវឆ្នោតពិតជារំភើបជាខ្លាំង ប៉ុន្តែគាត់ព្យាយាមបន្លប់ចិត្តរបស់ខ្លួន ដើម្បីត្រលប់ចូលធ្វើការតាមធម្មតា ខណៈដែលក្នុងចិត្តកំពុងគិតពិចារណា និងការបង្កើតផែនការ”។

ផ្ទាំងឃោសនាពាណិជ្ជកម្មរបស់ក្រុមហ៊ុនឆ្នោត Mega Millions

James Carey ដែលជាប្រធានប្រតិបត្តិនៃក្រុមហ៊ុនឆ្នោតនៅ New Jersey បានធ្វើដំណើរទៅកាន់ហាងលក់អាហារមួយកន្លែងនៅក្នុងទីក្រុង Edison ដែលជាអ្នកលក់សន្លឹកឆ្នោតសំណាងនោះ នៅក្នុងយប់នោះតែម្ដង និងបានផ្ដល់ប្រាក់កម្រៃជើងសាចំនួន 30,000ដុល្លារដល់ម្ចាស់ហាងទាំង2នាក់នោះ។

James Carey បានណែនាំថា៖ “យើងតែងតែនិយាយប្រាប់អ្នកគ្រប់គ្នាថា នៅពេលត្រូវឆ្នោត សូមស៊ីញ៉េឈ្មោះលើផ្នែកខាងក្រោយនៃសន្លឹកឆ្នោតនោះជាបន្ទាន់។ ក្រោយមក ចូររក្សាវាទុកក្នុងទីសុវត្ថិភាពបំផុត រួចពិភាក្សាជាមួយមេធាវី និងទីប្រឹក្សាផ្នែកហិរញ្ញវត្ថុ ហើយមករកយើងខ្ញុំដើម្បីបង្ហាញសន្លឹកឆ្នោតនោះ”។

ពលរដ្ឋមហាសំណាងថ្មីនេះ បានធ្វើតាមការណែនាំរបស់ភាគីក្រុមហ៊ុន ដោយបានចុះហត្ថលេខាលើសន្លឹកឆ្នោត ទៅជួបមេធាវី រួចក៏ទទួលបានការណែនាំអំពីវិធីល្អបំផុតដើម្បីធានាសុវត្ថិភាពទៅលើទ្រព្យសម្បត្តិថ្មីនេះ។

សូមបញ្ជាក់ថា នៅសហរដ្ឋអាមេរិក មានតែរដ្ឋមួយចំនួនប៉ុណ្ណោះដែលអនុញ្ញាតឱ្យអ្នកត្រូវឆ្នោតលាក់អត្តសញ្ញាណរបស់ខ្លួន ក្នុងនោះមានដូចជា រដ្ឋ Delaware, Kansas, Maryland, North Dakota, Ohio និង Carolina ជាដើម៕

ប្រភព៖ NBC News

October 1, 2020

មហាសែនសំណាង! ទិញឆ្នោត 1សន្លឹកតម្លៃ 2ដុល្លារ ត្រូវរង្វាន់ធំ ជាង 200លានដុល្លារអាមេរិក

អ្នកលេងឆ្នោតដ៏មហាសែនសំណាងម្នាក់នៅរដ្ឋ New Jersey សហរដ្ឋអាមេរិក បានទិញឆ្នោត Mega Millions 1សន្លឹក ហើយក៏បានត្រូវរង្វាន់កម្រិតពិសេស តម្លៃ 202លានដុល្លារអាមេរិក។

សន្លឹកឆ្នោតដែលត្រូវរង្វាន់ធំខាងលើនេះ ត្រូវបានលក់ចេញពីហាង Quick Stop នៅក្នុងផ្សារទំនើប Inman Plaza នាទីក្រុង Edison នៃរដ្ឋ New Jersey សហរដ្ឋអាមេរិក។

ខ្ទង់លេខដ៏មហាសែនសំណាងដែលត្រូវបានប្រកាសក្នុងការបង្វិលចាប់រង្វាន់កាលពីយប់ថ្ងៃទី11កុម្ភៈនោះ មានលេខ 4, 6, 32, 52, 64 ដោយមានលេខ Gold Mega Ball 6ខ្ទង់។

ចំពោះប្រាក់រង្វាន់ បើសិនអ្នកឈ្នះរង្វាន់បើកយកតែ 1លើកចប់ នឹងទទួលបានត្រឹមតែ 142លានដុល្លារប៉ុណ្ណោះ តែបើសិនបើកយកប្រាក់រង្វាន់នោះក្នុង1ឆ្នាំម្ដង អ្នកឈ្នះរង្វាន់នោះ នឹងទទួលបានដល់ទៅ 202លានដុល្លារ។

ហាង Quick Stop ធ្លាប់លក់ឆ្នោតដែលបានឈ្នះរង្វាន់ជាច្រើនលើកមកហើយ សូម្បីតែម្ចាស់ហាងខ្លួនឯង គឺលោក Apexaben Patel ក៏ធ្លាប់បានត្រូវរង្វាន់ផងដែរ ហើយដោយសារតែបានលក់សន្លឹកឆ្នោតត្រូវរង្វាន់នេះ ម្ចាស់ហាង Quick Stop ក៏ទទួលបានប្រាក់រង្វាន់ពីក្រុមហ៊ុនឆ្នោតនៃរដ្ឋ New Jersey ចំនួន 30,000ដុល្លារដែរ។

លោក James Carey ដែលជាអគ្គនាយកនៃក្រុមហ៊ុនឆ្នោតរដ្ឋ New Jersey បានឱ្យដឹងថា ៖ “កាលពីឆ្នាំមុន យើងបានផ្ដល់ប្រាក់កម្រៃជើងសាចំនួនជាង 180លានដុល្លារទៅឱ្យក្រុមអ្នកលក់រាយរបស់យើង”។

យោងតាមច្បាប់ថ្មីរបស់រដ្ឋ New Jersey អ្នកដែលបានត្រូវឆ្នោត មានសិទ្ធិលាក់អត្តសញ្ញាណរបស់ខ្លួន ដូច្នេះហើយ ទើបមកដល់ពេលនេះ គេមិនទាន់ស្គាល់ពីអត្តសញ្ញាណរបស់អ្នកត្រូវឆ្នោតនោះនៅឡើយ។

នេះ គឺជារង្វាន់ពិសេសដំបូងរបស់ឆ្នោត Mega Millions ចាប់តាំងពីខែធ្នូ ឆ្នាំ2019មក។ កាលពីខែធ្នូ ឆ្នាំ2019 អ្នកដែលបានក្លាយជាមនុស្សមហាសែនសំណាងម្នាក់ គឺជាអ្នករស់នៅក្នុងរដ្ឋ Ohio ក៏បានត្រូវឆ្នោត Mega Millions នេះដែរ ហើយទទួលបានប្រាក់រង្វាន់ឡើងដល់ 375លានដុល្លារឯណោះ។

ឆ្នោត Mega Millions មានវត្តមាននៅក្នុងរដ្ឋចំនួន 45 និងរដ្ឋធានីវ៉ាស៊ីនតោន និងប្រជុំកោះ Virgin នៃសហរដ្ឋអាមេរិក។ ឆ្នោតនេះ 1សន្លឹក លក់ក្នុងតម្លៃ 2ដុល្លារ ហើយត្រូវបង្វិលចាប់រង្វាន់រៀងរាល់ថ្ងៃអង្គារ និងថ្ងៃសុក្រ។ រង្វាន់ពិសេសធំបំផុតរបស់ឆ្នោត Mega Millions គឺ 1,537ពាន់លានដុល្លារអាមេរិក។ រង្វាន់ពិសេសធំបំផុតនេះ ធ្លាប់បានប្រគល់ជូនអ្នកលេងដ៏មហាសែនសំណាងម្នាក់ នៅឯរដ្ឋ Carolina ខាងត្បូង កាលពីខែតុលា ឆ្នាំ2018 ម្ដងរួចមកហើយ៕

ប្រភព៖ សារព័ត៌មានបរទេស

February 13, 2020

Tag: ឆ្នោត