នាយករដ្ឋមន្ត្រីថៃ លោក Prayuth Chan-ocha ប្រកាសដកខ្លួនពីឆាកនយោបាយ ព្រមទាំងលាលែងពីតំណែងក្នុងបក្ស ក្រោយពីកាន់អំណាចបាន 9 ឆ្នាំ។
«ចាប់ពីពេលនេះតទៅ ខ្ញុំចង់ដកខ្លួនពីឆាកនយោបាយ លាឈប់ពីសមាជិកគណបក្សថៃរួបរួមជាតិ» បក្សរបស់លោក Prayuth នាថ្ងៃនេះបានដកស្រង់សម្ដីរបស់នាយករដ្ឋមន្ត្រីថៃ ប្រកាសដូច្នេះ។
គណបក្សថៃរួបរួមជាតិរបស់លោក Prayuth បានបរាជ័យក្នុងការឆ្នោតជាតិកាលពីពេលថ្មីៗនេះ គ្រាដែលបក្សប្រឆាំងនានាទទួលបានសំឡេងឆ្នោតគាំទ្រច្រើនខ្លាំង។ លោក Prayuth ដែលមានអាយុ 69 ឆ្នាំ នៅតែជានាយករដ្ឋមន្ត្រីថៃរហូតដល់រាជរដ្ឋាភិបាលថ្មីត្រូវបានបង្កើតឡើង។
លោក Prayuth អតីតមេបញ្ជាការកងទ័ពជើងគោកថៃ ឡើងកាន់អំណាចបន្ទាប់ពីរដ្ឋប្រហារផ្ដួលរំលំរាជរដ្ឋាភិបាលស៊ីវិលរបស់លោកស្រី Yingluck Shinawatra កាលពីឆ្នាំ 2014។ លោកបានដឹកនាំរដ្ឋាភិបាលយោធាប្រាំឆ្នាំ និងបន្តធ្វើជានាយករដ្ឋមន្ត្រីក្រោយការបោះឆ្នោតសកលឆ្នាំ 2019។
ក្រោមការដឹកនាំរបស់លោក Prayuth សេដ្ឋកិច្ចថៃត្រូវបានវាយតម្លៃថា អាក្រក់បំផុតក្នុងរង្វង់ 30 ឆ្នាំមកនេះ ព្រមទាំងបានរងការរិះគន់ច្រើនផងដែរ។
លោក Prayuth ចូលជាសមាជិកគណបក្សថៃរួបរួមជាតិ ដែលទើបត្រូវបានបង្កើតឡើងកាលពីខែមករាឆ្នាំនេះ នៅក្នុងកិច្ចប្រឹងប្រែងដែលត្រូវបានគេយល់ថា ដើម្បីរកវិធីបន្តកាន់អំណាចនៅក្នុងការបោះឆ្នោតដែលបានធ្វើឡើងកាលពីខែឧសភា 2023។ ក៏ប៉ុន្តែ បក្សរបស់លោក Prayuth ដណ្ដើមបានកៅអីតែ 36 ប៉ុណ្ណោះ នៅក្នុងចំណោម 500 កៅអីនៅសភាជាន់ទាប៕
