កំហុស - La Reine Media

ក្រុមបាល់ទាត់ជប៉ុនបង្កើតបានកំណត់ត្រាថ្មី ពេលដណ្ដើមបានជើងឯក U17 ទ្វីបអាស៊ី

(ប្រទេសថៃ) – បន្ទាប់ពីបានផ្ដួលកូរ៉េខាងត្បូងក្នុងលទ្ធផល 3-0 នៅវគ្គផ្ដាច់ព្រ័ត្រ ក្រុមជម្រើសជាតិជប៉ុនបង្កើតបានកំណត់ត្រាថ្មី ដោយការដណ្ដើមបានតំណែងជើងឯកពានរង្វាន់បាល់ទាត់ U17 ទ្វីបអាស៊ីលើកទីបួន។

ថ្វីបើត្រូវបានវាយតម្លៃថា មានសមត្ថភាពទាបជាង ប៉ុន្តែកូរ៉េខាងត្បូងលេងដោយភាពម្ចាស់ការ និងគ្រប់គ្រងបាល់បានល្អ បន្ទាប់ពីសំឡេងកញ្ចែចាប់ផ្ដើមការប្រកួត។

រហូតដល់ចុងតង់ទីមួយ ទើបជប៉ុនដណ្ដើមបានប្រៀបក្នុងការប្រកួត។ របត់សំខាន់បានកើតឡើងនៅនាទីទី 43 នៅពេល Ko Jong Huyn ទទួលបានកាតលឿងទីពីរ បន្ទាប់ពីបានបង្កកំហុសលើកីឡាករជប៉ុន។ ដោយសារចំនួនកីឡាករមិនស្មើគ្នា ក្រុមជប៉ុនក៏មានប្រៀបជាងឆ្ងាយនៅក្នុងការប្រកួតវគ្គផ្ដាច់ព្រ័ត្រនេះ។

ការទាត់បាល់ពិន័យរកបានមួយគ្រាប់របស់ Nawata ក្រោយពីកីឡាករក្រុមកូរ៉េខាងត្បូងទទួលបានកាតក្រហម គឺជារបត់ដែលហាក់បាន «កម្ទេច» អស់ក្ដីសង្ឃឹមរបស់ក្រុមកូរ៉េខាងត្បូង។ ចូលដល់តង់ទីពីរ ជប៉ុនក៏បានគ្រប់គ្រងការប្រកួតទាំងស្រុង និងវាយសម្រុកលើទីរបស់គូប្រកួតជាបន្តបន្ទាប់។

នាទីទី 67 Nawata ទទួលបានបាល់ពីមិត្តរួមក្រុម និងបានយកឈ្នះលើអ្នកចាំទីកូរ៉េខាងត្បូង ជួយឱ្យជប៉ុននាំមុខ 2-0។ ក្នុងនាទីថែមម៉ោង Michiwaki រកបានមួយគ្រាប់ ជួយឱ្យជប៉ុនឈ្នះ 3-0។

ជ័យជម្នះនេះជួយឱ្យជប៉ុនបង្កើតបានកំណត់ត្រាដណ្ដើមបានតំណែងជើងឯកលើកទីបួននៅ U17 ទ្វីបអាស៊ី ក្រោយពីពានរង្វាន់នេះត្រូវបានប្រារព្ធឡើង 19 លើក រាប់ចាប់ពីឆ្នាំ 1985។ U17 ជប៉ុន ដណ្ដើមបានតំណែងនេះក្នុងឆ្នាំ 1994, 2006, 2018 និង 2023។ U17 ទ្វីបអាស៊ីឆ្នាំ 2023 ត្រូវបានធ្វើឡើងនៅប្រទេសថៃ។

July 3, 2023

បំណែកសាកសពនាវាមុជទឹក Titan ត្រូវបានស្រង់ឡើងគោក

បំណែករបស់នាវាមុជទឹក Titan ដែលបានជួបគ្រោះថ្នាក់កាលពីថ្ងៃទី 18 មិថុនា 2023 ត្រូវបានស្រង់ឡើងគោក និងនាំទៅកាន់កំពង់ផែនៅប្រទេសកាណាដា ក្នុងនោះក៏អាចមានផ្ទុកបំណែកសាកសពរបស់ជនរងគ្រោះ។

ក្រុមហ៊ុនអាម៉េរិក Pelagic Research ដែលមានរ៉ូបូតបញ្ជាពីចម្ងាយ Odysseus ដែលត្រូវបានប្រើប្រាស់ក្នុងការស្វែងរកនាវា Titan បានឱ្យដឹងថា បំណែកនានាពីសាកសពនាវាមុជទឹក Titan ក្នុងនោះអាចមានផ្នែកខាងមុខ និងឧបករណ៍បញ្ជា ត្រូវបាននាំទៅកាន់កំពង់ផែ St. John នៅប្រទេសកាណាដា កាលពីថ្ងៃទី 28 មិថុនា។

«ក្រុមអ្នកស្វែងរកបានធ្វើការទាំងយប់ទាំងថ្ងៃចំនួន 10 ថ្ងៃ នៅក្នុងការស្វែងរកសាកសពនាវា Titan» អ្នកនាំពាក្យរបស់ក្រុមហ៊ុនខាងលើឱ្យដឹងដូច្នេះ និងបន្តថា បេសកកម្មស្រង់ឡើងគោករបស់ពួកគេត្រូវបានបិទបញ្ចប់។

បំណែកពីនាវា Titan នឹងត្រូវបានដឹកទៅកាន់សហរដ្ឋអាម៉េរិក ដើម្បីវិភាគបន្ថែម។ កម្លាំងឆ្មាំសមុទ្រអាម៉េរិក ថ្មីៗនេះក៏បានបញ្ជាក់ថា ប្រហែលជាបានរកឃើញបំណែកសាកសពរបស់ជនរងគ្រោះនៅក្បែរបំណែកនាវា ក្នុងពេលស្រង់ឡើងគោក។

Jason Meubauer ប្រធានក្រុមស្រាវជ្រាវអំពីហេតុកាណ៍គ្រោះថ្នាក់នាវា Titan របស់សហរដ្ឋអាម៉េរិក និយាយថា «នៅមានកិច្ចការត្រូវធ្វើជាច្រើនទៀតដើម្បីស្វែងរកមូលហេតុដែលនាំឱ្យកើតមានហេតុកាណ៍ដ៏សោកសៅរបស់ Titan»។

នាវាមុជទឹក Titan បានដាច់ទំនាក់ទំនងតាំងពីថ្ងៃទី 18 មិថុនា 2023 ប្រហែលជិតពីរម៉ោងបន្ទាប់ពីបានចាកចេញពីកប៉ាល់មេ Polar Prince ដើម្បីចុះទៅមើលសាកសពកប៉ាល់ Titanic។ កាលពីថ្ងៃទី 22 មិថុនា ក្រុមល្បាតសមុទ្រអាម៉េរិកអះអាងថា នាវា Titan បានបែកបាក់ខ្ទេចខ្ទីនៅបាតសមុទ្រ បណ្ដាលឱ្យមនុស្ស 5 នាក់បាត់បង់ជីវិត។ បំណែករបស់ Titan ត្រូវបានរកឃើញនៅតំបន់ដែលមានចម្ងាយពីក្បាលសាកសពកប៉ាល់ Titanic ប្រហែល 488 ម៉ែត្រ។

មន្ត្រីអាម៉េរិកយល់ថា Titan ត្រូវបានកម្ទេចដោយសម្ពាធទឹកក្នុងជម្រៅជិត 4,000 ម៉ែត្រ ធ្វើឱ្យជនរងគ្រោះហាក់ត្រូវស្លាប់ភ្លាមៗ ប៉ុន្តែមិនទាន់ដឹងច្បាស់ថា គ្រោះថ្នាក់នេះកើតឡើងដោយសារបញ្ហាបច្ចេកទេសក្នុងនាវា ឬដោយសារមនុស្សធ្វើឱ្យមានកំហុស៕

June 29, 2023

ក្រុមថៃត្រូវក្រុមតៃវ៉ាន់តាមទាន់ 2-2 បើទោះគ្រប់គ្រងបាល់បាល់ 76%

(តៃវ៉ាន់) – ខ្សែការពាររបស់ក្រុមបាល់ទាត់ជម្រើសជាតិថៃធ្វើឱ្យមានកំហុស នាំឱ្យម្ចាស់ផ្ទះតៃវ៉ាន់ តាមទាន់ 2-2 បើទោះជាគ្រប់គ្រងសាច់បាល់បានច្រើនលើសលុបនៅក្នុងការប្រកួតមិត្តភាពកាលពីព្រលប់ថ្ងៃទី 16 មិថុនា។

Theerathon Bunmathan អវត្តមាននៅក្នុងការប្រកួតនេះ ប៉ុន្តែក្រុមជម្រើសជាតិថៃនៅមានជើងខ្លាំងច្រើនរូបទៀត មានដូចជា Chanathip Songkrasin, Supachok Sarachat ជាដើម នៅពេលធ្វើជាភ្ញៀវនៅឯកីឡដ្ឋាន Kaohsiung កោះតៃវ៉ាន់។ ម្ចាស់ពានរង្វាន់លេខពីរនៅស៊ីហ្គេមលើកទី 32 ដែលបច្ចុប្បន្នឈរលំដាប់លេខ 114 នៅ FIFA គ្រប់គ្រងបាល់បានច្រើលើសលុបនៅចំពោះមុខក្រុមម្ចាស់ផ្ទះតៃវ៉ាន់ ដែលទាបជាង 42 ថ្នាក់ ធៀបនឹងថៃនៅ FIFA ។

ក្នុងការប្រកួតដែលមានលទ្ធផល 2-2 នេះ Kritsada របស់ថៃ ទាត់ចូលទីខ្លួនឯងនៅនាទីទី 48, Teerasil Dangda របស់ថៃ រកបានមួយគ្រាប់នៅនាទីទី 62, Chen Ting-yang របស់តៃវ៉ាន់ រកបានមួយគ្រាប់នៅនាទីទី 87, Wang Ruei ទាត់ចូលទីខ្លួនឯងនៅនាទីទី 84។

https://www.youtube.com/watch?v=uIIP9iIJbdc

ក្រោយការប្រកួតនេះ ក្រុមដំរីប្រយុទ្ធរបស់ថៃ នឹងធ្វើដំណើរទៅកាន់ហុងកុងដើម្បីទាត់មិត្តភាពលើកទីពីនៅថ្ងៃទី 19 មិថុនា។

June 17, 2023

ទិដ្ឋភាពបាក់ទំនប់វារីអគ្គិសនី Kakhovka ដែលបង្កជាទឹកជំនន់ពន្លិចតំបន់នានានៅអ៊ុយក្រែន

តំបន់ជាច្រើនដែលស្ថិតក្នុងខ្សែទឹកខាងក្រោមនៃទន្លេនៅទីក្រុង Kherson ត្រូវលិចលង់ បន្ទាប់ពីទំនប់ Kakhovka បានបាក់កាលពីថ្ងៃទី 06 មិថុនា។

ទំនប់វារីអគ្គិសនី Kakhovka នៅលើទន្លេ Dnieper ក្នុងតំបន់ដែលរុស្ស៊ីកំពុងកាន់កាប់នៅ Kheron ត្រូវបានបំផ្លាញអស់មួយផ្នែកបន្ទាប់ពីមានករណីផ្ទុះកាលពីព្រឹកថ្ងៃទី 06 មិថុនា បណ្ដាលឱ្យទឹកក្នុងបឹងស្តុកត្រូវហូរមកក្រៅ បង្កការលិចលង់ក្នុងតំបន់ជាច្រើននៅខ្សែទឹកខាងក្រោម។

បឹងស្តុកទឹក Kakhovka មានចំណុះប្រហែល 18 ពាន់លានម៉ែត្រគូប ផ្គត់ផ្គង់ទឹកសម្រាប់ការបញ្ចុះកម្ដៅនៅរោងចក្រអគ្គិសនីដើរដោយថាមពលនុយក្លេអែរ Zaporizhzhia និងព្រែកជីក Crimea។ រុស្ស៊ី និងអ៊ុយក្រែនសុទ្ធតែយល់ថា នេះគឺជាការវាយប្រហារដែលមានគោលដៅ និងបានទម្លាក់កំហុសដាក់គ្នា។

ខាងក្រោមនេះគឺជាទិដ្ឋភាពមួយចំនួនស្ដីពីទឹកជំនន់ដែលបង្កឡើងដោយហេតុការណ៍បាក់ទំនប់វារីអគ្គិសនី Kakhovka នៅតំបន់ Kherson របស់អ៊ុយក្រែន៖

https://www.youtube.com/watch?v=cXVSkxvF4oc

June 7, 2023

ស្ត្រីជាប់ពន្ធនាគារព្រោះសម្លាប់កូនបួននាក់នៅអូស្ត្រាលី ត្រូវបានដោះលែង

Kathleen Folbigg ជាស្ត្រីម្នាក់ដែលធ្លាប់ត្រូវបានកាត់ទោសពីបទសម្លាប់កូនតូចបួននាក់ ត្រូវបានដោះលែងពីពន្ធនាគារ ក្រោយរយៈពេល 20 ឆ្នាំ នៅពេលមានការសង្ស័យថា ត្រូវបានកាត់ទោសដោយអយុត្តិធម៌។

ប្រធានតុលាការ New South Wales កាលពីថ្ងៃទី 05 មិថុនា 2023 បានឱ្យដឹងថា បានពិភាក្សាជាមួយអភិបាលរដ្ឋនេះ និងបានស្នើឱ្យមានការដោះលែងដោយគ្មានលក្ខខណ្ឌចំពោះ Kathleen Folbigg ក្រោយពីលទ្ធផលនៃការស្រាវជ្រាវបឋមបង្ហាញថា មានចំណុចខុសប្រក្រតីទាក់ទិននឹងការកាត់ទោសស្ត្រីដែលត្រូវបានចោទថាបានសម្លាប់កូនតូចបួននាក់។ Folbigg ត្រូវបានដោះលែងក្នុងថ្ងៃដដែល។

Kathleen Folbigg អាយុ 55 ឆ្នាំ បានជាប់ពន្ធនាគារកាលពីឆ្នាំ 2003 ដោយត្រូវបានកាត់ទោសពីបទសម្លាប់មនុស្ស បន្ទាប់ពីកូនបួននាក់របស់គាត់បានស្លាប់ជាបន្តបន្ទាប់ក្នុងរង្វង់ជាងមួយទសវត្សរ៍ ចាប់ពីឆ្នាំ 1989។ Folbigg សុទ្ធតែជាអ្នករកឃើញសាកសពរបស់កូនៗ ប៉ុន្តែពុំមានភស្ដុតាងអ្វីដែលបញ្ជាក់ថា ស្ត្រីរូបនេះជាជនដៃដល់។

Kathleen Folbigg ត្រូវជាប់ពន្ធនាគារក្រោយពីតុលាការយល់ថា លទ្ធភាពដែលក្មេងបួននាក់ក្នុងគ្រួសារសុទ្ធតែបានស្លាប់ដោយគ្មានមូលហេតុគឺជារឿង «ពិបាកទៅរួច»។ ការសម្រេចរបស់តុលារក៏យោងទៅលើខ្លឹមសារនៅក្នុងកំណត់ហេតុរបស់ Folbigg ដែលបានសរសេរអំពីការចាកចេញរបស់កូនៗផងដែរ។

កាលពីមានអាយុ 20 ឆ្នាំ Kathleen Folbigg បានរៀបការជាមួយ Craig Folbigg។ ក្នុងរង្វង់មួយឆ្នាំ Folbigg ក៏មានកូននៅក្នុងឆ្នាំ 1989 ប៉ុន្តែកូនច្បងនេះបានស្លាប់ទៅវិញក្រោយការចាប់កំណើតបាន19 ថ្ងៃ។ មួយឆ្នាំបន្ទាប់ Folbigg បង្កើតបានកូនប្រុសឈ្មោះ Patrick តែក៏បានស្លាប់ពេលមានអាយុ 8 ខែ។ ពីរឆ្នាំបន្ទាប់មកទៀត កូនទីបីឈ្មោះ Sarah របស់ Folbigg ក៏បានស្លាប់ក្នុងអាយុ 10 ខែ។ ចំណែកកូនពៅឈ្មោះ Laura កើតឆ្នាំ 1999 ក៏ឃើញពន្លឺថ្ងៃបានតែ 18 ខែ។

ពេល Laura បានស្លាប់ សមត្ថកិច្ចក៏បើកការស៊ើបអង្កេត ហើយពីរឆ្នាំក្រោយមក តុលាការក៏កាត់ទោសដាក់ពន្ធនាគារចំពោះ Folbigs។

Kathleen Folbigg មិនព្រមទទួលកំហុស ប៉ុន្តែនៅតែត្រូវជាប់ពន្ធនាគារ 40 ឆ្នាំ។ កាលពីឆ្នាំ 2019 រឿងក្ដីរបស់ Kathleen Folbigg ក៏ត្រូវបានសមត្ថកិច្ចស៊ើបអង្កេតឡើងវិញ ហើយក៏រកឃើញចំណុចគួរឱ្យសង្ស័យ។ កាលពីឆ្នាំ 2022 ការស៊ើបអង្កេតមួយផ្សេងទៀតក៏ត្រូវបានធ្វើឡើង បន្ទាប់ពីក្រុមអ្នកវិទ្យាសាស្ត្របង្ហាញភស្ដុតាងបញ្ជាក់ថា មូលហេតុនៃការស្លាប់របស់ក្មេងទាំងបូននាក់ខាងលើគឺដោយសារជំងឺតំណពូជ៕

June 5, 2023

រដ្ឋធានីរបស់រុស្ស៊ីរងការវាយប្រហារធ្ងន់ធ្ងរលើកដំបូង ក្រោយសង្គ្រាមលោកលើកទីពីរ

យន្តហោះគ្មានមនុស្សបើកបរ (UAV) ហោះទៅបុកអគារមួយខ្នងនៅរដ្ឋធានីមូស្គូរបស់ប្រទេសរុស្ស៊ី បង្កការខូចខាតស្រាល និងធ្វើឱ្យមនុស្សពីរនាក់រងរបួស។

មន្ត្រីនៅមូស្គូ ថ្ងៃនេះបានឱ្យដឹងថា UAV មួយគ្រឿងបានវាយប្រហារជាន់លើរបស់អគារមួយនៅភាគអាគ្នេយ៍របស់រដ្ឋធានី។ UAV មួយគ្រឿងផ្សេងទៀតក៏ហោះទៅបុកអគារ 24 ជាន់មួយនៅតំបន់ដដែល។ មនុស្សនៅក្នុងអគារទាំងពីរដែលស្ថិតក្នុងក្រុង Profsoyuznaya ភាគអាគ្នេយ៍របស់មូស្គូ ត្រូវបានជម្លៀស។

អភិបាលក្រុងមូស្គូ Sergey Sobyanin ឱ្យដឹងថា អគារមួយចំនួនរងការខូចខាតស្រាល និងមនុស្សពីរនាក់រងរបួស ប៉ុន្តែមិនធ្ងន់ធ្ងរ។

ក្រសួងការពារជាតិរុស្ស៊ី ក្រោយមកបានចោទថា អ៊ុយក្រែនគឺជាអ្នកនៅពីក្រោយករណីវាយប្រហារនេះ បើទោះមិនបានបង្ហាញភស្ដុតាង។ ក្រសួងនេះបញ្ជាក់ថា UAV ចំនួន 8 គ្រឿងបានចូលរួមការវាយប្រហារ ហើយស្ទើរតែទាំងអស់ត្រូវបានរុស្ស៊ីបាញ់ទម្លាក់។

តំណាងរាស្ត្ររុស្ស៊ី Maxim Ivanov និយាយថា នេះគឺជា «ការវាយប្រហារធ្ងន់ធ្ងន់បំផុតមកលើមូស្គូ រាប់ចាប់តាំងពីការវាយប្រហាររបស់ហ្វាស៊ីសអាល្លឺម៉ង់ក្នុងសង្គ្រាមលោកលើកទីពីរ»។

មួយរយៈពេលចុងក្រោយនេះ ទឹកដីរបស់រុស្ស៊ី កើតមានការវាយប្រហារមួយចំនួន ហើយរុស្ស៊ីតែងតែទម្លាក់កំហុសលើអ៊ុយក្រែន។ ចំណែកទីក្រុងកៀវវិញ ក៏មិនទទួលស្គាល់ការវាយប្រហារណាមួយនៅខាងក្នុងទឹកដីរបស់រុស្ស៊ី៕

May 30, 2023

ប្រធានរបស់បញ្ញាសិប្បនិម្មិត ChatGPT ថា «មនុស្សនឹងចាញ់ AI ស្ទើរគ្រប់វិស័យក្នុងដប់ឆ្នាំទៀត»

អគ្គនាយកប្រតិបត្តិ Sam Altman និងប្រធាន Greg Brockman របស់ក្រុមហ៊ុន OpenAI វាយតម្លៃថា បញ្ញាសិប្បនិម្មិត (AI) អាចឡើងដល់កម្រិតជាអ្នកជំនាញនៅ «ស្ទើរគ្រប់វិស័យ» រយៈពេលដប់ឆ្នាំខាងមុខ។

«ជាមួយនឹងទិដ្ឋភាពដូចយើងបានឃើញបច្ចុប្បន្ន អាចស្រមៃឃើញថា ក្នុងរង្វង់ដប់ឆ្នាំខាងមុខ ប្រព័ន្ធ AI នឹងយកឈ្នះលើចំណេះជំនាញរបស់អ្នកជំនាញនៅក្នុងវិស័យស្ទើរតែទាំងអស់ និងអនុវត្តសកម្មភាពប្រកបដោយប្រសិទ្ធភាពដូចទៅនឹងក្រុមហ៊ុនធំបំផុតមួយនាបច្ចុប្បន្ន» ក្រុមមេដឹកនាំរបស់ OpenAI ដែលរួមមាន Sam Altman, Greg Brockman និងប្រធានផ្នែកវិទ្យាសាស្ត្រ Ilya Sutskever ចាប់ផ្ដើមអត្ថបទរួមដូច្នេះនៅលើគេហទំព័ររបស់ក្រុមហ៊ុន។

OpenAI សង្កត់ធ្ងន់ថា រូបមន្តកំពូល AI អាចបង្កហានិភ័យដល់មនុស្សជាតិក្នុងមួយទសវត្សរ៍ទៀត។ ដូច្នេះ ត្រូវការបន្ថយហានិភ័យពី AI ប៉ុន្តែមិនត្រូវកាត់បន្ថយសមត្ថភាព តែត្រូវមានការសហការ និងការប្រព្រឹត្តជាពិសេសចំពោះ AI។

អត្ថបទបានលើកឡើងថា «កំពូលបញ្ញាសិប្បនិម្មិតនឹងខ្លាំងជាងបច្ចេកវិទ្យាផ្សេងៗដែលមនុស្សលោកធ្លាប់បានប្រឈម។ ចុងក្រោយ យើងនឹងត្រូវការអង្គការមួយដើម្បីគ្រប់គ្រងកំពូល AI ដូចទៅនឹងទីភ្នាក់ងារថាមពលអាតូមិកអន្តរជាតិនៅក្នុងវិស័យថាមពលបរមាណូ។ ទោះជាការប្រឹងប្រែងក្នុងការអភិវឌ្ឍ AI ណាក៏ដោយ ក៏ត្រូវការគោរពតាមអង្គការអន្តរជាតិដែលមានសមត្ថកិច្ច»។

Sam Altman ធ្លាប់បានព្រមានច្រើនដងទាក់ទងនឹងបញ្ញាសិប្បនិម្មិត។ បច្ចេកវិទ្យានេះគឺជាការរីកចម្រើនមួយ ប៉ុន្តែវាអាចក្លាយជាគ្រោះភ័យ បើសិនធ្លាក់ទៅលើដៃជនទុច្ចរិត ឬ «អាចដើរខុសផ្លូវ ដែលបង្កើតឱ្យមានកំហុស និងបង្កគ្រោះថ្នាក់ធំដល់ពិភពលោក បើមិនបានកែតម្រូវឱ្យបានសមស្រប»។

នៅក្នុងសវនាការនៅសភាអាម៉េរិកកាលពីថ្ងៃទី 16 ឧសភា 2023 លោក Sam Altman បាននិយាយថា ចង់សហការជាមួយរដ្ឋាភិបាលដើម្បីទប់ស្កាត់បញ្ហាអាក្រក់ដែលអាចកើតឡើងដោយសារ AI ក្នុងនោះក៏អាចបង្កើតស្ថាប័នមួយដើម្បីគ្រប់គ្រងបច្ចេកវិទ្យានេះ។

លោក Sam Altman មិនមែនជាបុគ្គលសំខាន់តែម្នាក់ដែលបារម្ភអំពីឥទ្ធិពលរបស់បញ្ញាសិប្បនិម្មិតនោះទេ ប៉ុន្តែ CEO របស់ Google លោក Sundar Pichai, អតីតអ្នកជំនាញខាង AI របស់ Google លោក Geoffrey Hinton ឬ លោក Elon Musk និងលោក Bill Gates ក៏មានការបារម្ភអំពីបញ្ហានេះផងដែរ៕

May 24, 2023

អនាគតបេក្ខភាពប្រធាន FAT របស់ថៃ៖ «បើថៃមិនបានចូលរួម World Cup ខ្ញុំនឹងលាលែងពីតំណែង»

អតីតកីឡាករឆ្នើម Piyapong Pew On ធ្វើឱ្យមានការចាប់អារម្មណ៍បន្ទាប់ពីបានប្រកាសឈរឈ្មោះជាបេក្ខភាពសម្រាប់តំណែងប្រធានសហព័ន្ធកីឡាបាល់ទាត់របស់ប្រទេសថៃ។

យោងតាមប្រព័ន្ធផ្សព្វផ្សាយថៃ បើទោះជាការបោះឆ្នោតជ្រើសរើសប្រធានសហព័ន្ធបាល់ទាត់ថៃ (FAT) ត្រូវធ្វើឡើងនៅខែមេសា ឆ្នាំ 2024 ប៉ុន្តែស្ថានការណ៍ប្រែប្រួលនៅមុនការបោះឆ្នោតនេះ កំពុងតែឡើង «កម្ដៅ»។ Piyapong Pew On ដែលជាអតីតកីឡាករឆ្នើមរបស់បាល់ទាត់ថៃ នឹងក្លាយជាបេក្ខភាពសម្រាប់តំណែងនេះ។

ចែករំលែកអំពីការសម្រេចចិត្តខាងលើ លោក Piyapong Pew On បានបង្កការចាប់អារម្មណ៍ខ្លាំងនៅពេលប្រកាសថា នឹងលាលែងពីតំណែង បើសិនមិនអាចជួយឱ្យបាល់ទាត់ថៃបានចូលរួមប្រកួតនៅ World Cup។

«… ខ្ញុំបានត្រៀមខ្លួនរួចហើយសម្រាប់ការកាន់តំណែងប្រធាន FAT។ បើសិនសមាជិក សមាជិកាគាំទ្រ ខ្ញុំសន្យាចំពោះគ្រប់គ្នាថា នឹងបំពេញកាតព្វកិច្ចក្នុងរង្វង់បួនឆ្នាំ។ បើសិនក្រុមជម្រើសជាតិថៃមិនបានចូលរួម World Cup ខ្ញុំនឹងលាលែងពីតំណែង ហើយធ្វើកិច្ចការក្នុងវិស័យបាល់ទាត់ជាមួយនឹងតួនាទីផ្សេង» អតីតកីឡាករឆ្នើមរបស់ប្រទេសថៃ លោក Piyapong Pew On អះអាងដូច្នេះ។

លោក Piyapong Pew On បញ្ជាក់ថា លោកមិនប្រជែងដើម្បីមុខតំណែង ប៉ុន្តែលោកមានភាពម៉ឺងម៉ាត់ដោយរំពឹងថានឹងអភិវឌ្ឍ និងបង្កើតវប្បធម៌បាល់ទាត់ថៃទៅតាមស្មារតី «ភាពត្រឹមត្រូវ ភាពស្មោះត្រង់ តម្លាភាព និងមានការផ្ទៀងផ្ទាត់»។

លោក Piyapong Pew On ក៏ជាអ្នកដែលបានរិះគន់ទៅលើក្រុមគ្រូបង្វឹករបស់ក្រុមបាល់ទាត់ U22 ថៃ នៅក្នុងករណីវាយតប់គ្នាក្នុងការប្រកួតវគ្គផ្ដាច់ព្រ័ត្រនៅស៊ីហ្គេមលើកទី 32 រវាង U22 ថៃ និង U22 ឥណ្ឌូណេស៊ី កាលពីថ្ងៃ 16 ខែឧសភា 2023។

«ករណីហិង្សាកើតឡើងក្នុងវគ្គផ្ដាច់ព្រ័ត្ររវាង U22 ថៃ និង U22 ឥណ្ឌូណេស៊ី។ នោះគឺជារឿងដែលកីឡាករថៃត្រូវរៀនសូត្រ ពិសេសគឺការគ្រប់គ្រងកំហឹង។ ប៉ុន្តែ នោះគឺជាបញ្ហាដែលមិនគួរកើតឡើង និងមិនអាចលើកលែងទោស នៅពេលក្រុមគ្រូបង្វឹកទាំងមូលសម្រុកចូលបង្កហេតុជាមួយឥណ្ឌូណេស៊ី។ ពួកគេគួរណាស់តែរារាំងកីឡាករក្មេងៗ តែបែរជាធ្វើឱ្យមានកំហុសដោយខ្លួនឯងទៅវិញ» លោក Piyapong Pew On ថ្លែងដូច្នេះ។

លោក Piyapong Pew On បន្ថែមថា «ទោះជាយ៉ាងណាក៏ដោយ គេត្រូវតែផ្លាស់ប្ដូរគ្រូបង្វឹក ថៃត្រូវការមនុស្សហ្មត់ចត់ជាងដើម្បីដឹកនាំក្រុមកីឡាករក្មេង មិនដូច្នេះទេ យើងនឹងត្រូវបានបំផ្លាញដូចនៅក្នុងការប្រកួតផ្ដាច់ព្រ័ត្រនៅស៊ីហ្គេមលើកនេះ»។

លោក Piyapong Pew On អាចនឹងត្រូវប្រកួតប្រជែងដណ្ដើមតំណែងប្រធានសហព័ន្ធបាល់ទាត់ថៃ ជាមួយនឹងអតីតប្រធាន FAT លោក Worawee Makudi អាយុ 72 ឆ្នាំ។ កន្លងមក លោក Worawee Makudi ក៏បានបញ្ជាក់ថា នឹងឈរឈ្មោះជាបេក្ខភាពសម្រាប់តំណែងនេះជាថ្មី បើទោះផ្ទុយពីការកំណត់ដែលហាមបេក្ខភាពដែលមានអាយុលើសពី 70 ឆ្នាំ។ ប្រធាន FAT បច្ចុប្បន្នដែលត្រូវចប់អាណត្តិនៅខែកុម្ភៈ ឆ្នាំ 2024 គឺលោក Somyot Poompanmoung៕

May 23, 2023

FIFA ជិតចាប់ផ្ដើមចូលស៊ើបអង្កេត ខណៈ U22 ឥណ្ឌូណេស៊ីប្ដេជ្ញាប្ដឹងប្រឆាំង U22 ថៃ ក្នុងករណីនៅស៊ីហ្គេម 2023

ភាគីខាង U22 ឥណ្ឌូណេស៊ី កំពុងតែមានបំណងពឹង FIFA កាត់ក្ដីករណីអំពើហិង្សារវាងក្រុមបាល់ទាត់បុរសជម្រើសជាតិប្រទេសនេះ និងក្រុមបាល់ទាត់ថៃ នៅក្នុងការប្រកួតវគ្គផ្ដាច់ព្រ័ត្រនៅស៊ីហ្គេមលើកទី 32។

ហេតុការណ៍វាយតប់គ្នារវាង U22 ថៃ និង U22 ឥណ្ឌូណេស៊ី មិនទាន់ត្រូវបានដោះស្រាយរួចរាល់នៅឡើយ បើទោះវគ្គផ្ដាច់ព្រ័ត្រនៅស៊ីហ្គេមឆ្នាំ 2023 បានចប់សព្វគ្រប់។ បន្ទាប់ពីសហព័ន្ធកីឡាបាល់ទាត់អាស៊ី (AFC) ចាប់ផ្ដើមស៊ើបអង្កេត ហើយក្រុមទាំងពីរអាចត្រូវទទួលការពិន័យ ភាគីឥណ្ឌូណេស៊ីក៏បែរជាចង់អញ្ជើញទាំង FIFA មកចូលរួមដោះស្រាយ។

ភាគីឥណ្ឌូណេស៊ីចង់ឱ្យថៃទទួលខុសត្រូវនៅក្នុងករណីនេះ។ ប្រធានគណៈកម្មាធិការអូឡាំពិកឥណ្ឌូណេស៊ី (NOC) Raja Sapta Oktohari បានបើកកិច្ចប្រជុំមួយជាមួយសមាជិករបស់សហព័ន្ធបាល់ទាត់ឥណ្ឌូណេស៊ី (PSSI) ដើម្បីធ្វើការសម្រេចលើការស្នើសុំអន្តរាគមន៍របស់ FIFA ក្នុងករណីហិង្សានៅវគ្គផ្ដាច់ព្រ័ត្រផ្នែកបាល់ទាត់បុរសនៅស៊ីហ្គមលើកទី 32 និងកាត់ក្ដីចុងក្រោយ។

ប្រធាន NOC ឱ្យដឹងថា «ពេលនេះ យើងមិនទាន់បញ្ជូនរបាយការណ៍ឡើងទៅកាន់ FIFA ប៉ុន្តែរឿងនេះនឹងកើតឡើងឆាប់ៗខាងមុខ។ កិច្ចប្រជុំផ្ទៃក្នុងបានបញ្ចប់ ខ្ញុំ និងប្រធាន PSSI – Erick Thohir សុទ្ធតែមិនចង់នៅស្ងៀមក្នុងករណីនេះ។ បើសិនខាងឥណ្ឌូណេស៊ីខុស យើងនឹងទទួលខុសត្រូវ ប៉ុន្តែបើថៃខុស ពួកគេក៏នឹងត្រូវធ្វើដូច្នេះ»។

ភាគីឥណ្ឌូណេស៊ីទំនងជាកំពុងជឿជាក់ថា ខ្លួនមិនមានកំហុសនៅក្នុងការវាយតប់គ្នាជាមួយក្រុមថៃនៅវគ្គផ្ដាច់ព្រ័ត្រនៅស៊ីហ្គេមឆ្នាំ 2023។ ចំណែកថៃវិញ បច្ចុប្បន្នក៏កំពុងមានភាពតានតឹងខ្លាំង ទាក់ទងនឹងបញ្ហានេះ។ អនុប្រធានសហព័ន្ធកីឡាបាល់ទាត់ថៃ Yuttana Yimkarun ថ្មីៗនេះបានសរសេរលិខិតសុំលាលែងពីតំណែង។ ប្រធានសមាគមបាល់ទាត់ថៃ (FAT) យល់ថា ពួកគេត្រូវទទួលខុសត្រូវ បន្ទាប់ពីបានបណ្ដោយឱ្យកីឡាករ U22 ថៃ បាត់បង់ការគ្រប់គ្រងអារម្មណ៍ក្នុងវគ្គផ្ដាច់ព្រ័ត្រ ហើយបង្កើតឱ្យមានរូបភាពអាក្រក់នៅកម្ពុជា។

ការប្រកួតវគ្គផ្ដាច់ព្រ័ត្ររវាង U22 ឥណ្ឌូណេស៊ី និងថៃ ត្រូវបានគេចាត់ទុកថាមានភាពទាក់ទាញបំផុតក្នុងប្រវត្តិសាស្ត្រស៊ីហ្គេម។ ក្នុងការប្រកួតនេះ ឥណ្ឌូណេស៊ីបានឈ្នះថៃ 5-2 ខណៈអាជ្ញាកណ្ដាលបានពិន័យកាតលឿងជាង 10 និងកាតក្រហមចំនួន 7 ដោយសារតែមានការប៉ះទង្គិចគ្នាច្រើន និងការប្រើអំពើហិង្សា៕

May 19, 2023

ថៃធ្វើការសូមទោស តែថានឹងវែករកមុខអ្នកបង្កហេតុ មុននឹងពិន័យក្រុមបាល់ទាត់ជម្រើសជាតិ

សហព័ន្ធកីឡាបាល់ទាត់ថៃ (FAT) បានធ្វើការសូមអភ័យទោសពីសំណាក់អ្នកគាំទ្រ បន្ទាប់ពីមានអំពើហិង្សារវាង U22 ថៃ និង U22 ឥណ្ឌូណេស៊ី ក្នុងវគ្គផ្ដាច់ព្រ័ត្រនៅស៊ីហ្គេមលើកទី 32។

«យើងខ្ញុំសូមអភ័យទោសចំពោះទស្សនិកជននៅទីលានប្រកួត និងអ្នកគាំទ្រនៅទូទាំងពិភពលោក។ ហេតុការណ៍នេះបានបង្កការខូចខាតធ្ងន់ធ្ងរសម្រាប់ក្រុមបាល់ទាត់ជម្រើសជាតិថៃ» FAT សរសេរក្នុងសេចក្ដីប្រកាសមួយដែលចុះផ្សាយនៅរសៀលថ្ងៃទី 17 ឧសភានេះ។

FAT ខកចិត្តនៅពេលសមាជិកក្រុមគ្រូបង្វឹកដែលត្រូវបានចាត់ទុកថាជាតំណាងរបស់សហព័ន្ធ បែរជាចូលរួមក្នុងហេតុការណ៍ប្រវាយប្រតប់ជាមួយឥណ្ឌូណេស៊ី។ FAT នឹងបង្កើតគណៈកម្មការវិន័យដើម្បីស៊ើបអង្កេតឱ្យបានហ្មត់ចត់ វែករកមុខអ្នកបង្កហេតុដំបូង ក៏ដូចជាអ្នកដែលបានចូលរួមក្នុងហេតុការណ៍នេះ មុនពេលលើកឡើងនូវទណ្ឌកម្មធ្ងន់ធ្ងរ។

«នឹងមិនមានការលើកលែងចំពោះអ្នកបង្កកំហុស។ គណៈកម្មការស៊ើបអង្កេតនឹងធ្វើការភ្លាម បន្ទាប់ពី U22 ត្រលប់មកប្រទេស» FAT សង្កត់ធ្ងន់ដូច្នេះ និងបន្ថែមថា បានត្រៀមខ្លួនរួចរាល់ក្នុងការទទួលយកយោបល់ដើម្បីទប់ស្កាត់ហេតុការណ៍អាក្រក់នេះកើតឡើងជាថ្មី។ (ព័ត៌មានស្ដីពីការប្រកួតវគ្គផ្ដាច់ព្រ័ត្រប្រកបដោយអំពើហិង្សានេះ សូមចូលអានទីនេះ)៕

May 17, 2023

កីឡាករថៃ៖ «អាជ្ញាកណ្ដាលគឺជាដើមហេតុនៃភាពច្របូកច្របល់ក្នុងវគ្គផ្ដាច់ព្រ័ត្រនៅស៊ីហ្គេម»

ខ្សែការពាររបស់ក្រុមបាល់ទាត់ជម្រើសជាតិថៃ Jonathan Khemdee យល់ថា អាជ្ញាកណ្ដាលបង្កឱ្យមានកំហុសឆ្គងធំជាច្រើន នាំទៅរកជម្លោះរវាងក្រុមជម្រើសជាតិថៃ និងឥណ្ឌូណេស៊ី នៅវគ្គផ្ដាច់ព្រ័ត្រនៃវិញ្ញាសាបាល់ទាត់បុរសនៅស៊ីហ្គេមលើកទី 32។

កាលពីព្រលប់ថ្ងៃទី 16 ឧសភា នៅលើទីលានបាល់ទាត់របស់ពហុកីឡដ្ឋានជាតិអូឡាំពិក សមាជិកក្រុមកីឡាថៃ និងឥណ្ឌូណេស៊ី បានប៉ះទង្គិចគ្នាពីរលើក។ ពិសេសគឺការប្រវាយប្រតប់គ្នានៅក្រោយការស៊ុតបញ្ចូលទីរបស់កីឡាករ Irfan Jauhari ជួយឱ្យឥណ្ឌូណេស៊ី នាំមុខ 3-2 នៅដើមនារីថែមម៉ោងលើកទីមួយ នាំឱ្យអាជ្ញាកណ្ដាលពិន័យកាត់ក្រហមដោយផ្ទាល់ចំនួនប្រាំចំពោះភាគីទាំងពីរ។

ក្រោយការប្រកួត Jonathan Khemdee បានប្រាប់អ្នកយកព័ត៌មានថា «អាជ្ញាកណ្ដាលបង្កកំហុសធំជាច្រើន ហើយនោះគឺជាមូលហេតុដែលនាំឱ្យមានករណីប្រវាយប្រតប់គ្នា។ អាជ្ញាកណ្ដាលមិនអាចគ្រប់គ្រងការប្រកួត ដូច្នេះគ្រប់គ្នាក៏រុលទៅរកគ្នា និងវាយគ្នា»។

យោងតាមខ្សែការពារកណ្ដាលដើមកំណើតដាណឺម៉ាកខាងលើ កំហុសធំបំផុតរបស់អាជ្ញាកណ្ដាលស្ថិតនៅត្រង់គ្រាប់បាល់ចាញ់ទីពីររបស់ថៃ។ នាទីទីប្រាំនៃការថែមម៉ោងក្នុងតង់ទីមួយ កីឡាករឥណ្ឌូណេស៊ីម្នាក់រងរបួសត្រង់ក្បាល ទើបអាជ្ញាកណ្ដាលផ្លុំកញ្ចែផ្អាកការប្រកួត គ្រាដែលគ្រាប់បាល់មិនបានទៅខាងណា។ បន្ទាប់ពីកីឡាករឥណ្ឌូណេស៊ីត្រូវគេសែងចេញ អាជ្ញាកណ្ដាលក៏ប្រគល់បាល់ឱ្យប្រធានក្រុម Rizky Ridho របស់ឥណ្ឌូណេស៊ី ពេលដែលកីឡាកររបស់ថៃ មិនត្រូវបានអនុញ្ញាតឱ្យដណ្ដើមបាល់ភ្លាម។ Rodho បញ្ជូនបាល់ឡើងដល់ក្បែរតំបន់គ្រោះថ្នាក់របស់ថៃ ហើយខ្សែប្រយុទ្ធ Ramadhan Sananta ក៏ទាត់បាល់រំលងក្បាលអ្នកចាំទី Soponwit Rakyart ធ្វើឱ្យបាល់ហោះចូលទី ជួយឱ្យឥណ្ឌូណេស៊ីនាំមុខ 2-0។

ក្រុមកីឡាករថៃ ភ្លាមនោះក៏បានតវ៉ាទៅកាន់អាជ្ញាកណ្ដាលជនជាតិអូម៉ង់ Kassem Matar Al-Hatmi ព្រោះពួកគេយល់ថា Ridho គួរតែប្រគល់បាល់មកឱ្យថៃ។ ប៉ុន្តែ លោក Al-Hatmi នៅតែទទួលស្គាល់គ្រាប់បាល់នេះបន្ទាប់ពីផ្លាស់ប្ដូរយោបល់ជាមួយអាជ្ញាកណ្ដាលខ្សែបន្ទាត់។

ក្នុងការថែមម៉ោងនៅតង់ទីពីរ សំឡេងកញ្ចែរបស់អាជ្ញាកណ្ដាលក៏បានធ្វើឱ្យក្រុមឥណ្ឌូណេស៊ីយល់ច្រលំថាអស់ម៉ោងប្រកួត ទើបនាំគ្នារត់ចូលទីលានអបអរសាទរ គ្រាដែលសំឡេងកញ្ចែនោះគឺជាការពិន័យចំពោះក្រុមឥណ្ឌូណេស៊ី។ ស្ថានការណ៍នេះបាននាំទៅរកគ្រាប់បាល់ស្មើ 2-2 ដោយកីឡាករថៃបានស៊ុតបញ្ចូលទីរបស់ឥណ្ឌូណេស៊ី។ បន្ទាប់ពីស៊ុតចូលភ្លាម កីឡាករថៃក៏រត់ទៅខាងមុខតំបន់អ្នកគាំទ្រឥណ្ឌូណេស៊ីដើម្បីសំដែងការអបអរ ឌឺដង ហើយក៏មានការប៉ះទង្គិចគ្នាមួយប្រាវ។

ចូលដល់តង់ទីពីរ បន្ទាប់ពីរកបានមួយគ្រាប់ទៀតដែលជួយឱ្យនាំមុខ 3-2 ឥណ្ឌូណេស៊ីក៏អបអរសងសឹក ហើយក៏មានការប្រវាយប្រតប់គ្នាជាថ្មី ធ្វើឱ្យការប្រកួតត្រូវអាក់ខានច្រើននាទី។ ពេលនោះ កាត់ក្រហមជាច្រើនក៏ត្រូវបានហូតចេញជាបន្តបន្ទាប់។

បន្ទាប់ពីស្ថានការណ៍ត្រូវបានគ្រប់គ្រង ថៃក៏ត្រូវបាត់បង់កីឡាករពីររូបដោយសារកាត់ក្រហម។ ដោយមានគ្នាតែ 9 នាក់ ក្រុមថៃក៏ត្រូវចាញ់ 2 គ្រាប់ទៀត នាំឱ្យឥណ្ឌូណេស៊ីឈ្នះ 5-2 ជាស្ថាពរ។

ភាពច្របូកច្របល់ក្នុងវគ្គផ្ដាច់ព្រ័ត្រនៅស៊ីហ្គេម

«គ្រប់ស្ថានការណ៍ អាជ្ញាកណ្ដាលត្រូវតែរក្សាឥរិយាបថយុត្តិធម៌ ប៉ុន្តែការប្រកួតនេះ អាជ្ញាកណ្ដាលមិនអាចធ្វើបាន» Khemdee អះអាងដូច្នេះ។

ទោះជាយ៉ាងណាក៏ដោយ នៅពេលចប់ការប្រកួត ក្រុមទាំងពីរក៏ពុំមានបញ្ហាអ្វីនឹងគ្នាទៀតនោះដែរ។ នេះគឺជាបទពិសោធន៍ដែលគួរយកជាមេរៀន ដែលយើងមិនគួរឱ្យមានករណីបែបនេះកើតឡើង ព្រោះវាប៉ះពាល់ដល់អ្នកគាំទ្រ និងកីឡាករផងដែរ។ ប៉ុន្តែ បរាជ័យលើកនេះ ធ្វើឱ្យថៃ ខកខានក្នុងការលើកមេដាយមាសនៅស៊ីហ្គេមចំនួនបីជំនាន់បន្តបន្ទាប់ ខណៈដែល U22 ឥណ្ឌូណេស៊ី ដណ្ដើមបានមេដាយមាសលើកទីបីនៅស៊ីហ្គេម៕

May 17, 2023

គ្រូបង្វឹកថៃ មិនភ្ញាក់ផ្អើលនៅពេលឥណ្ឌូណេស៊ីផ្ដួលវៀតណាមបានសម្រេច

យោងតាមគ្រូបង្វឹក Inssara Sritaro ឥណ្ឌូណេស៊ីមានកម្លាំងកាយល្អជាងដោយសារសម្រាកបានច្រើនថ្ងៃ មុននឹងផ្ដួលវៀតណាមនៅវគ្គពាក់កណ្ដាលផ្ដាច់ព្រ័ត្រនៃវិញ្ញាសាបាល់ទាត់បុរសនៅស៊ីហ្គេមលើកទី 32 នៅកម្ពុជា។

«ខ្ញុំមិនភ្ញាក់ផ្អើលនោះទេ នៅពេលឥណ្ឌូណេស៊ីឡើងដល់វគ្គផ្ដាច់ព្រ័ត្រ។ ពួកគេបានសម្រាកពីរថ្ងៃ ដោយសារតែពូល A ទាត់មុន និងរួចរាល់បានមុន។ ពូល B ចប់ក្រោយ ហើយក្រុមនានាសម្រាកបានតែមួយថ្ងៃ រួចក៏ទាត់វគ្គពាក់កណ្ដាលផ្ដាច់ព្រ័ត្រ។ ជាងនេះ នៅក្នុងការប្រកួតចុងក្រោយនៅពូល B ក្រុមថៃប្រកួតជាមួយវៀតណាមនៅលើទីលានមិនល្អ សើម ទើបកីឡាករត្រូវចំណាយកម្លាំងច្រើន» គ្រូបង្វឹកថៃ Sritaro និយាយដូច្នេះក្រោយពីថៃឈ្នះមីយ៉ាន់ម៉ា 3-0 ក្នុងវគ្គពាក់កណ្ដាលផ្ដាច់ព្រ័ត្រនៅពហុកីឡដ្ឋានជាតិអូឡាំពិក កាលពីព្រលប់ថ្ងៃទី 13 ឧសភា។

វៀតណាម និងថៃប៉ះគ្នាក្នុងការប្រកួតចុងក្រោយនៅពូល B កាលពីថ្ងៃទី 11 ឧសភា និងមានលទ្ធផល 1-1។ លទ្ធផលស្មើគ្នានេះ ធ្វើឱ្យវៀតណាមឈរលំដាប់លេខពីរនៅពូល B ហើយត្រូវប៉ះឥណ្ឌូណេស៊ីនៅវគ្គពាក់កណ្ដាលផ្ដាច់ព្រ័ត្រ ដែលនៅទីនេះ ឥណ្ឌូណេស៊ីបានផ្ដួលវៀតណាមដោយលទ្ធផល 3-2។

ជិតពីរម៉ោងក្រោយពីឥណ្ឌូណេស៊ីយកឈ្នះលើវៀតណាម ក្រុម U22 ថៃក៏បានផ្ដួលមីយ៉ាន់ម៉ា ដោយលទ្ធផល 3-0។ ដូច្នេះ ថៃត្រូវប៉ះឥណ្ឌូណេស៊ីនៅវគ្គផ្ដាច់ព្រ័ត្រនៃវិញ្ញាសាបាល់ទាត់បុរសនៅស៊ីហ្គេមលើកនេះ។

«ឥណ្ឌូណេស៊ីគឺជាគូប្រកួតខ្លាំង។ កីឡាកររបស់ពួកគេលឿនណាស់។ យើងនឹងត្រូវប្រុងប្រយ័ត្ន» គ្រូបង្វឹកថៃ Sritaro និយាយអំពីគូប្រកួតរបស់ខ្លួននៅវគ្គផ្ដាច់ព្រ័ត្រ។ គ្រូបង្វឹកវ័យ 43 ឆ្នាំរបស់ U22 ថៃ និយាយថា បើទោះជាឈ្នះមីយ៉ាន់ម៉ា ប៉ុន្តែ ថៃនៅមានកំហុសច្រើន ត្រូវការដកយកជាបទពិសោធន៍ និងកែតម្រូវ។

វៀតណាមមានអ្នកគាំទ្រ (ខាងក្រោយ) ច្រើនលើសលុប

ក្រុមកីឡាករបាល់ទាត់ជម្រើសជាតិអាយុក្រោម 22 ឆ្នាំ (U22) របស់ថៃ នឹងប្រកួតជាមួយក្រុមឥណ្ឌូណេស៊ីនៅវគ្គផ្ដាច់ព្រ័ត្រនាវេលាម៉ោង 20 ថ្ងៃទី 16 ឧសភាខាងមុខ។ បួនម៉ោងមុននោះ វៀតណាម នឹងដណ្ដើមមេដាយសំរឹទ្ធជាមួយមីយ៉ាន់ម៉ា៕

May 14, 2023

Tag: កំហុស