Tag: កុមារ

Ford Ranger ទទួលចំណាត់ថ្នាក់ផ្កាយ៥ ជារថយន្តមានសុវត្ថិភាពបំផុត!
កន្លងទៅថ្មីៗនេះ រថយន្ត Next-Generation Ford Ranger ត្រូវបានផ្លាស់ប្តូររូបរាងថ្មី និងកំណែទម្រង់ថ្មីទាំងស្រុងដែលមានភាពហាប់ណែន រឹងមាំជាមុន និងរួមទាំងបូកបញ្ជូលនូវប្រព័ន្ធសុវត្ថិភាពទំនើបៗជាច្រើនទៀត រហូតដល់បានជាប់ជារថយន្តPick-Up សុវត្ថិភាពបំផុត ក្រោមការធ្វើតេស្តសុវត្ថិភាពកម្រិតខ្ពស់ពីកម្មវិធីវាយតម្លៃរថយន្តថ្មីរបស់សហភាពអឺរ៉ុប EuroNCAP (European New Car Assessment Programme) និង ការធ្វើតេស្តសុវត្ថិភាពកម្រិតខ្ពស់ពីកម្មវិធីវាយតម្លៃរថយន្តថ្មីរបស់អូស្រ្តាលី និងនូវែលសេឡង់ ANCAP (Australasian New Car Assessment Programme) ដោយទទួលបានលទ្ធផលចំណាត់ថ្នាក់ផ្កាយ៥ ទៅលើប្រព័ន្ធសុវត្ថិភាពរបស់រថយន្ត សម្រាប់ប្រព័ន្ធការពារអ្នកបើកបរ ប្រព័ន្ធការពារអ្នករួមដំណើរ និងប្រព័ន្ធបញ្ចៀសគ្រោះថ្នាក់។
រថយន្ត Next-Generation Ford Ranger ត្រូវបានធ្វើតេស្តទៅតាមសុវត្ថិភាពកម្រិតខ្ពស់នៃស្តង់ដារអឺរ៉ុប និងធ្វើតេស្តទៅតាមសុវត្ថិភាពកម្រិតខ្ពស់នៃស្តង់ដារអូស្រា្តលី និងនូវែលសេឡង់ផងដែរ ដូចជាការធ្វើតេស្តសម្រាប់អ្នកធ្វើដំណើរ ការធ្វើតេស្តសម្រាប់កុមារ ការធ្វើតេស្តសម្រាប់សុវត្ថិភាពអ្នកថ្មើរជើង និង ការធ្វើតេស្តសម្រាប់ប្រព័ន្ធសុវត្ថិភាពផ្សេងៗរបស់រថយន្ត។ សម្រាប់ការធ្វើតេស្តសុវត្ថិភាពរបស់អ្នកធ្វើដំណើរ និងការធ្វើតេស្តសុវត្ថិភាពសម្រាប់កុមារ គឺគេធ្វើតេស្តទៅលើការបុកប៉ះ និងគ្រោះថ្នាក់ផ្សេងៗ ដែលអាចកើតឡើងពីគ្រប់ស្ថានភាព ដើម្បីធានានូវសុវត្ថិភាពសម្រាប់អ្នកប្រើប្រាស់រថយន្តរួមទាំងផ្តល់នូវទំនុកចិត្តដល់អ្នកមានបំណងចង់ទិញរថយន្ត។ លើសពីនេះទៅទៀតក៏មាន ការធ្វើតេស្តសម្រាប់ប្រព័ន្ធសុវត្ថិភាពផ្សេងៗរបស់រថយន្ត ដើម្បីបញ្ចៀសគ្រោះថ្នាក់សម្រាប់អ្នកបើកបរ និងឧបសគ្គផ្សេងៗ ក្រោយការធ្វើតេស្តរួច នោះទទួលបានលទ្ធផលល្អបំផុតសម្រាប់ប្រភេទរថយន្ត Pick-Up ដោយលទ្ធផលទាំងអស់នេះ គឺបូករួមទៅលើគ្រប់ម៉ូដែលនៃរថយន្ត Next-Generation Ford Ranger។
មូលហេតុដែលរថយន្ត Next-Generation Ford Ranger ទទួលបានលទ្ធផលល្អបំផុតបែបនេះ ដោយសារតែ រថយន្ត Next-Generation Ford Ranger គឺបានបំពាក់នូវប្រព័ន្ធសុវត្ថិភាពដ៏ឆ្លាតវៃជាច្រើនដូចជា ប្រព័ន្ធផ្តល់សញ្ញាគ្រោះថ្នាក់ពេលមានឧបសគ្គ ឬអ្នកថ្មើរឆ្លងកាត់ និងប្រព័ន្ធចាប់ហ្រ្វាំងបន្ទាន់ដោយស្វ័យប្រវត្ត ប្រព័ន្ធផ្តល់សញ្ញាគ្រោះថ្នាក់ពេលថយក្រោយ និងប្រព័ន្ធចាប់ហ្រ្វាំងបន្ទាន់ពេលថយក្រោយដោយស្វ័យប្រវត្ត ប្រព័ន្ធផ្តល់ដំណឹងគ្រោះថ្នាក់ផ្នែកចំហៀង និងខាងក្រោយរថយន្ត ដោយសេនសឺផ្នែកខាងមុខ និងសេនសឺផ្នែកខាងក្រោយចំនួន ៨គ្រាប់ ដែលផ្តល់នូវទំនុកចិត្តដល់អតិថិជនប្រើប្រាស់ និងសាធារណជនផងដែរ។

សម្រាប់ការទំនាក់ទំនងផ្នែកលក់ និង បើកបរសាកល្បងរថយន្ត Next Generation Ford Ranger សូមទំនាក់ទំនងទៅកាន់លេខទូរស័ព្ទ 078 333 748 និង 016 333 785។
May 4, 2024
ក្រុមហ៊ុនជប៉ុន អ៊ីអន (Aeon) អនុញ្ញាតឱ្យបុគ្គលិកភេទប្រុស សម្រាកដើម្បីមើលថែកូន ប៉ុន្តែទទួលបានប្រាក់ខែដូចដើម
ដើម្បីកាត់បន្ថយការព្រួយបារម្ភអំពីបញ្ហាហិរញ្ញវត្ថុ និងលើកទឹកចិត្តដល់ការបង្កកំណើត ក្រុមហ៊ុនមួយចំនួនរបស់ជប៉ុន បញ្ចេញគោលការណ៍ថ្មីដែលអនុញ្ញាតឱ្យបុគ្គលិកជាឪពុកសម្រាកពីការងារ ប៉ុន្តែទទួលបានប្រាក់ខែ 100%។
ក្រុមហ៊ុនអ៊ីអន (Aeon) នឹងផ្ដល់ប្រាក់ខែដូចមុនដល់បុគ្គលិកភេទប្រុស នៅពេលសុំច្បាប់សម្រាកដើម្បីមើលថែកូនតូចអាយុចាប់ពីមួយឆ្នាំចុះក្រោម។ គោលការណ៍នេះគ្រោងនឹងអនុវត្តក្នុងឆ្នាំ 2024 ដើម្បីចូលរួមកាត់បន្ថយការព្រួយបារម្ភអំពីបញ្ហាហិរញ្ញវត្ថុ និងលើកទឹកចិត្តដល់បុគ្គលិកភេទប្រុសសុំច្បាប់ឈប់សម្រាកដើម្បីមើលថែកូន។
អត្ថប្រយោជន៍ដែលមិនមានការកំណត់អាយុនេះ នឹងត្រូវបានអនុវត្តជាបណ្ដើរៗចាប់ពីខែកុម្ភៈ សម្រាប់ក្រុមហ៊ុនចំនួនប្រហែល 150 ដែលស្ថិតក្រោមការគ្រប់គ្រងរបស់សាជីវកម្មអ៊ីអន។ តាមគម្រោង ក្នុងឆ្នាំដំបូងនឹងមានបុគ្គលិកភេទប្រុស និងភេទស្រីប្រមាណ 2,000 នាក់ នឹងសុំច្បាប់សម្រាកដើម្បីមើលថែកូន ហើយទទួលបានប្រាក់ខែដូចដើម។
បច្ចុប្បន្ន បុគ្គលិកភេទស្រីជិត 100% របស់អ៊ីអន ដែលឆ្លងទន្លេ សុទ្ធតែទទួលបានច្បាប់សម្រាកពីការងារដើម្បីមើលថែកូន ប៉ុន្តែអត្រានេះរបស់បុគ្គលិកភេទប្រុសគឺ 15%។ ប្រាក់ឧបត្ថម្ភសម្រាប់ការសម្រាកដើម្បីមើលថែកូន ត្រូវបានក្រុមហ៊ុនធានារ៉ាប់រងផ្ដល់ជូនប្រហែល 80% ធៀបនឹងប្រាក់ខែ ដូច្នេះហើយទើបបុគ្គលិកនឹងទទួលបានប្រាក់ខែ 20% ទៀតពីអ៊ីអន បន្ទាប់ពីពួកគេត្រឡប់ចូលធ្វើការវិញ។
យោងតាមស្ថាប័នស្រាវជ្រាវរបស់ក្រសួងសុខាភិបាលជប៉ុន ចំនួនប្រជាជនសរុបរបស់ប្រទេសនេះនឹងថយចុះ 17% ចាប់ពីឆ្នាំ 2020 ដល់ 2050 ដោយធ្លាក់មកនៅត្រឹម 104.69 លាននាក់។ ចំណែកវិទ្យាស្ថានជាតិស្រាវជ្រាវសន្តិសុខសង្គម និងចំនួនប្រជាជន (IPSS) វិញ គិតត្រឹមឆ្នាំ 2070 ចំនួនប្រជាជននឹងនៅសល់ 87 លាននាក់។
Japan Times ឱ្យដឹងថា ចំនួនកុមារនៅប្រទេសជប៉ុន បានថយចុះនៅក្នុងរយៈពេលជាង 4 ទសវត្សរ៍កន្លង គ្រាដែលមានប្រជាជនកាន់តែច្រើនមិនចង់រៀបការ និងបង្កើតកូនចៅ ព្រោះតែការព្រួយបារម្ភអំពីបញ្ហាហិរញ្ញវត្ថុ ចេះតែកើនឡើង៕
February 8, 2024
ទារកដំបូងនៅវៀតណាមដែលត្រូវបានព្យាបាលបេះដូងពេលនៅក្នុងផ្ទៃម្ដាយ បានចាប់កំណើតហើយ
ទារកម្នាក់ដែលធ្លាប់ឆ្លងកាត់ការវះកាត់ធំមួយ គ្រាដែលស្ថិតនៅក្នុងផ្ទៃម្ដាយ ព្រោះតែជំងឺបេះដូងពីកំណើត បានចាប់កំណើតហើយ និងមានទម្ងន់ 2.9 គីឡូក្រាម ហើយស្រែកយំដោយសំឡេងធំទៀតផង។ នេះគឺជាទារកដំបូងនៅវៀតណាមដែលត្រូវបានព្យាបាលជំងឺបេះដូងពេលនៅក្នុងផ្ទៃម្ដាយ។
ទារកខាងលើនេះបានចាប់កំណើតដោយការវះកាត់នៅវេលាម៉ោង 9 និង 17 នាទីព្រឹក ថ្ងៃទី 30 មករា 2024។ យោងតាមសារព័ត៌មានវៀតណាម នេះគឺជាករណីដំបូងគេនៅវៀតណាម និងនៅក្នុងតំបន់អាស៊ីអាគ្នេយ៍ ដែលទាក់ទងនឹងព្យាបាលជំងឺបេះដូងរបស់ទារកដែលនៅក្នុងផ្ទៃម្ដាយ។
ក្រោយពីការវះកាត់ផ្ដល់កំណើត មន្ត្រីជំនាញនៅមន្ទីរពេទ្យកុមារក្រុងហូជីមិញ (ព្រៃនគរ) និងមន្ទីរពេទ្យមួយចំនួនទៀត ឱ្យដឹងថា SpO2 ឡើងដល់ 89% ដោយទារកដកដង្ហើមបានតាមធម្មជាតិ។ ម្ដាយ និងទាកសុទ្ធតែមានសុវត្ថិភាព។
មុននោះ កាលពីថ្ងៃទី 4 មករា ក្រុមវេជ្ជបណ្ឌិតនៅទីក្រុងព្រៃនគរ បានទទួលជោគជ័យក្នុងការព្យាបាលបេះដូងទារកក្នុងផ្ទៃម្ដាយដែលមានអាយុ 32 សប្ដាហ៍។ អ្នកម្ដាយដែលស្ថិតក្នុងករណីពិសេសនេះ មានអាយុ 28 ឆ្នាំ មកពីខេត្តដាណាំង។ មូលហេតុដែលនាំឱ្យមានការព្យាបាលជាពិសេសនេះ គឺដោយសារទឹកចិត្តរបស់អ្នកម្ដាយ និងការប្ដេជ្ញាចិត្តរបស់ក្រុមវេជ្ជបណ្ឌិត។
យោងតាមក្រុមអ្នកជំនាញ បច្ចេកទេសព្យាបាលជំងឺបេះដូងរបស់ទារកក្នុងផ្ទៃម្ដាយដូចករណីនេះ គឺទើបតែត្រូវបានអភិវឌ្ឍក្នុងរង្វង់ 5 ឆ្នាំមកនេះតែប៉ុណ្ណោះ។ លើពិភពលោក មានតែប្រទេសតិចតួចប៉ុណ្ណោះដែលធ្វើបានជោគជ័យ ក្នុងនោះមានប្រេស៊ីល និងប៉ូឡូញជាដើម៕
January 30, 2024
រោងចក្រថ្មីចំនួនប្រាំ មានទុនសរុបជាង 35 លានដុល្លារ គ្រោងនឹងបង្កើតឡើងនាពេលខាងមុខ
យោងតាម គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា (CDC) ដែលបានប្រកាសកាលពីថ្ងៃទី 30 វិច្ឆិកា 2023 ក្រុមហ៊ុនចំនួនប្រាំទទួលបានការអនុញ្ញាតឱ្យសាងសង់រោងចក្រថ្មីចំនួនប្រាំ ជាមួយនឹងទុនវិនិយោគ 35.3 លានដុល្លារ នៅខេត្តតាកែវ កំពង់ស្ពឺ កណ្តាល និងភ្នំពេញ។
ក្រុមហ៊ុនទាំងនេះរួមមាន៖
ក្រុមហ៊ុន XIN ANG SHOES (CAMBODIA) MANUFACTURING CO., LTD ៖ គម្រោងបង្កើត រោងចក្រផលិតស្បែកជើង និងគ្រឿងបន្សំស្បែកជើង ដែលមានទីតាំងវិនិយោគស្ថិតនៅភូមិ ត្រពាំងថ្លឹង៣ សង្កាត់ចោមចៅទី1 ខណ្ឌពោធិ៍សែនជ័យ រាជធានីភ្នំពេញ ក្នុងទុនវិនិយោគ ប្រមាណ 13.3 លានដុល្លារអាម៉េរិក និងអាចបង្កើតការងារបានចំនួន 4,370 កន្លែង។
ក្រុមហ៊ុន NEW HUICHEN (CAMBODIA) TEXTILE CO., LTD ៖ គម្រោងបង្កើតរោងចក្រកាត់ដេរ និងចាក់សម្លៀកបំពាក់ ដែលមានទីតាំងវិនិយោគស្ថិតនៅដីឡូតិ៍លេខ 499 ផ្លូវលេខ126 ភូមិស្តុក ឃុំកុមារាជា ស្រុកបាទី ខេត្តតាកែវ ក្នុងទុនវិនិយោគប្រមាណ 5.8 លានដុល្លារអាម៉េរិក និងអាចបង្កើតការងារបានចំនួន 1,896 កន្លែង។
ក្រុមហ៊ុន SIN-TIANCHENG WADDING (CAMBODIA) CO., LTD ៖ គម្រោងបង្កើតរោងចក្រផលិត គ្រឿងបន្សំសម្លៀកបំពាក់ ដែលមានទីតាំងវិនិយោគស្ថិតនៅភូមិព្រៃទទឹង ឃុំព្រះនិព្វាន្ត ស្រុកគងពិសី ខេត្តកំពង់ស្ពឺ ក្នុងទុនវិនិយោគប្រមាណ 5.6 លានដុល្លារអាម៉េរិក និងអាចបង្កើត ការងារបានចំនួន 238 កន្លែង។
ក្រុមហ៊ុន XING KUN DA LEATHER INDUSTRIAL CO., LTD ៖ គម្រោងបង្កើតរោងចក្រផលិត កាបូបគ្រប់ប្រភេទ ដែលមានទីតាំងវិនិយោគស្ថិតនៅភូមិព្រៃទំពូង ឃុំពើក ស្រុកអង្គស្នួល ខេត្តកណ្តាល ក្នុងទុនវិនិយោគប្រមាណ 5.2 លានដុល្លារអាម៉េរិក និងអាចបង្កើតការងារ បានចំនួន 1,790 កន្លែង។
ក្រុមហ៊ុន GOLDEN VESSEL (CAMBODIA) ELECTRONIC AND LIGHTING CO., LTD ៖ គម្រោងបង្កើតរោងចក្រផលិតអំពូលភ្លើងគ្រប់ប្រភេទ ដែលមានទីតាំងវិនិយោគស្ថិតនៅ គីឡូម៉ែត្រលេខ69 ផ្លូវជាតិលេខ2 ភូមិព្រៃព្រហ្ម សង្កាត់រកាក្នុង ក្រុងដូនកែវ ខេត្តតាកែវ ក្នុងទុនវិនិយោគប្រមាណ 5.4 លានដុល្លារអាម៉េរិក និងអាចបង្កើតការងារបានចំនួន 467 កន្លែង។
ជាសរុប បណ្ដាគម្រោងដែលមានសរុប 35.3 លានដុល្លារអាម៉េរិកនេះ អាចបង្កើតការងារបានជាង 8,700 កន្លែង៕
December 2, 2023
រដ្ឋមន្ត្រីការពារជាតិអ៊ីស្រាអែលប្រកាសថានឹង «លុបបំបាត់ក្រុមហាម៉ាស»
រដ្ឋមន្ត្រីក្រសួងការពារជាតិអ៊ីស្រាអែល Gallant ប្រកាសថា កងទ័ពអ៊ីស្រាអែលនឹង «លុបបំបាត់ហាម៉ាសពីផែនដី បន្ទាប់ពីក្រុមនេះបានវាយប្រហារប្រជាពលរដ្ឋនៅលើទឹកដីអ៊ីស្រាអែល។
«ជនជាតិជ្វីហ្វ (Jewish) មិនធ្លាប់ទទួលរងអំពើឃោរឃៅបែបនេះរាប់ចាប់តាំងពីឆ្នាំ 1945» រដ្ឋមន្ត្រីក្រសួងការពារជាតិអ៊ីស្រាអែល Yoav Gallant ថ្លែងលើកញ្ចក់ទូរទស្សន៍កាលពីថ្ងៃទី 11 តុលា ទាក់ទងនឹងការវាយប្រហាររបស់ក្រុមហាម៉ាសប៉ាលេស្ទីនកាលពីថ្ងៃទី 07 តុលា។
លោក Gallant បន្ថែមថា «យើងនឹងលុបបំបាត់ពួកគេពីផ្ទៃផែនដី។ ពួកគេនឹងលែងមានវត្តមាន។ នឹងមិនមានទិដ្ឋភាពកុមារអ៊ីស្រាអែលត្រូវរងការសម្លាប់ ហើយយើងទាំងអស់គ្នានឹងអាចបន្តការងាររបស់ខ្លួន»។
នាយករដ្ឋមន្ត្រី Benjamin Netanyhu ដែលថ្លែងរួមគ្នាជាមួយនឹងលោក Gallant ក៏បង្ហាញបំណង «កម្ទេច» ក្រុមហាម៉ាស ជាលើកដំបូងផងដែរ។ លោក Netanyahum បានប្រដូចក្រុមហាម៉ាសទៅនឹងក្រុមរដ្ឋអ៊ីស្លាម (IS) និងប្រកាសថា នឹង «កិនកម្ទេចពួកនេះ»។
ការប្រយុទ្ធគ្នារវាងកងទ័ពអ៊ីស្រាអែល និងក្រុមហាម៉ាសប៉ាលេស្ទីននៅក្នុងប៉ុន្មានថ្ងៃកន្លងទៅនេះបានសម្លាប់មនុស្សប្រហែល 2,300 នាក់ និងបង្ករបួសដល់មនុស្សជាង 8,000 នាក់៕
October 12, 2023
ដំណើរក្លាយជាតារា Idol នៅ Kpop មិនមែនជារឿងធម្មតាឡើយ
ក្មេងជាច្រើននៅកូរ៉េខាងត្បូង ក្លាយជាអ្នកហាត់ការពេលមានវ័យទើបតែ 10 ឆ្នាំ និងចំណាយប្រហែល 10 ឆ្នាំក្នុងការហាត់ច្រៀង រាំ នៅមុនពេលបង្ហាញខ្លួនក្នុងក្រុមចម្រៀង។
«ដើម្បីក្លាយជា idol Kpop ដែលជោគជ័យ អ្នកត្រូវតែជាមនុស្សក្លាហាន មានចំណូលចិត្តខ្ពស់ មានវិន័យ និងសំណាង» Patti Sunio ឱ្យដឹងនៅលើ SCMP ដែលនិយាយអំពីដំណើរក្លាយជា idol ម្នាក់។
ជាដំបូង កុមារដែលមានទេពកោសល្យត្រូវតែចុះកិច្ចសន្យាធ្វើជាអ្នកហាត់ការរបស់ក្រុមហ៊ុនមួយ។ យោងតាម Koreaboo ក្មេងជាច្រើននៅកូរ៉េខាងត្បូងបានជាប់ក្នុងការជ្រើសរើសតាំងពីអាយុ 10 ឆ្នាំ ដោយពួកគេចូលរួមការសម្ដែងសាកល្បងជាមធ្យម 30 លើក មុនពេលចុះកិច្ចសន្យាហាត់ការ។ តាមនិន្នាការសកលរបស់វិស័យឧស្សាហកម្ម Kpop បណ្ដាក្រុមអ្នកវិនិយោគបានពង្រីកដំណើរការជ្រើសរើសអ្នកហាក់ការនៅក្នុងក្របខណ្ឌទូទាំងសកលលោក ផ្ដល់ឱកាសដល់ក្មេងនៅប្រទេសដទៃក្រៅពីកូរ៉េខាងត្បូង។
ក្មេងជាច្រើននៅកូរ៉េខាងត្បូងបានជាប់ក្នុងការជ្រើសរើសតាំងពីអាយុ 10 ឆ្នាំ
Lisa របស់ក្រុម Blackpink គឺជាឧទាហរណ៍មួយសម្រាប់ប្រការខាងលើ។ នាងគឺជាមនុស្សតែម្នាក់គត់ដែលឆ្លងផុតការជ្រើសរើសរបស់ក្រុមហ៊ុនកម្សាន្ត YG នៅប្រទេសថៃ ហើយជាអ្នកហាត់ការជនជាតិបរទេសដំបូងដែលបង្ហាញវត្តមាននៅ YG។ ក្រៅពីសម្ពាធនៃការហ្វឹកហាត់ ក្មេងបរទេសក៏ត្រូវតែឆ្លងកាត់រនាំងភាសា វប្បធម៌ ដើម្បីសម្របខ្លួន។ បណ្ដាក្រុមហ៊ុនគ្រប់គ្រងនឹងទទួលខុសត្រូវលើការចំណាយទាំងអស់របស់អ្នកហាត់ការ។ ខ្ទង់ប្រាក់ចំណាយជាមធ្យមសម្រាប់អ្នកហាត់ការម្នាក់នៅ Kpop គឺប្រហែល 50,000 ដុល្លារ/ឆ្នាំ។
ការធ្វើជាអ្នកហាត់ការគ្រាន់តែជាជំហានដំបូងនៅក្នុងការបើកផ្លូវសម្រាប់ដំណើរដ៏វែងឆ្ងាយ និងប្រកបដោយឧបសគ្គ មុននឹងអាចក្លាយជា idol ម្នាក់។ ក្នុងអំឡុងហាត់ការដែលមានរយៈពេលជាមធ្យម 7 ឆ្នាំ ក្រុមហ៊ុនគ្រប់គ្រងនឹងវាយតម្លៃលើជំនាញ សមត្ថភាពសម្របខ្លួននៅក្នុងក្រុម និងការស៊ូទ្រាំនឹងសម្ពាធរបស់អ្នកហាក់ការម្នាក់ៗ។ ក្រៅពីសំឡេងច្រៀង ក្បាច់រាំ ពួកគេក៏ត្រូវរៀនភាសាបរទេស វិធីសាស្ត្រគ្រប់គ្រងរូបភាព ការឆ្លើយក្នុងកិច្ចសម្ភាស ទំនាក់ទំនងជាមួយមិត្តរួមអាជីព និងការរក្សាទម្ងន់រាងកាយជាដើម។ ជាងនេះ ក្រុមហ៊ុនជាច្រើនក៏ស្នើឱ្យអ្នកហាត់ការសន្យាថាមិនប្រើប្រាស់គ្រឿងញៀន ផឹកគ្រឿងស្រវឹងនៅពេលបើកបរ និងចៀសវាងរឿងអាស្រូវស្នេហាផងដែរ។ Euny Hong អ្នកយកព័ត៌មានអាម៉េរិកដើមកំណើតកូរ៉េខាងត្បូង បានសរសេរលើ The Paris Review ថា «ការបណ្ដុះបណ្ដាលតារា Kpop គឺជាការអប់រំមនុស្សដ៏ពេញលេញ»។
កាលជ្រើសរើសបេក្ខភាពសម្រាប់តំណែងអ្នកហាត់ការរបស់ SM Entertainment នៅជប៉ុន កាលពីឆ្នាំ 2019
កំពូលតារា Kpop ជាច្រើន បានចំណាយស្ទើរពេញមួយយុវវ័យដើម្បីធ្វើជាអ្នកហាត់ការ និងរកឱកាសដើម្បីបង្ហាញខ្លួន។ G-Dragon របស់ Bigbang បានឆ្លងកាត់ការបណ្ដុះបណ្ដាល 11 ឆ្នាំ ក្នុងនោះ 5 ឆ្នាំនៅ SM Entertainment និង 6 ឆ្នាំនៅ YG។ Idol Kpop ជាច្រើនរូបផ្សេងទៀតក៏ធ្លាប់បានឆ្លងកាត់ប្រហាក់ប្រហែលនេះ ក្នុងនោះមានដូចជា Jihyo (TWICE, 10 ឆ្នាំ), Heo Chan Mi (10 ឆ្នាំ), Jennie (Blackpink, 6 ឆ្នាំ), Suho (EXO, 6 ឆ្នាំ)។
ពេលធ្វើជាគណៈកម្មការនៃកម្មវិធី Idol Producer តារាចម្រៀង Lay (EXO) បានបង្ហើបអំពីដំណើរការប្រកួតប្រជែងមុនពេលបានបង្ហាញខ្លួនជាមួយក្រុមថា ក្នុង 120 នាក់ ពួកគេរើសយកតែ 100 នាក់ ហើយបន្តជម្រុះរាប់សិបនាក់ទៀត ដើម្បីយក 24 នាក់។ ចាប់ពី 24 នាក់ ពួកគេក៏ជ្រើសរើស 12 នាក់ចុងក្រោយ។ រៀងរាល់សប្ដាហ៍សុទ្ធតែមានអ្នកហាត់ការម្នាក់ត្រូវចាកចេញ»។
បើទោះជាបង្ហាញខ្លួនក្នុងរូបភាពដ៏អស្ចារ្យ ប៉ុន្តែ idol ជាច្រើននៅ Kpop រកប្រាក់ចំណូលមិនបានច្រើនដូចទស្សនិកជនគិតនោះឡើយ។ ទំព័រ Seoulspace បានផ្សាយថា ក្រុមហ៊ុនកន្សាន្តជាច្រើនយកប្រាក់ចំណូលរហូតដល់ 90% ហើយទុកតែ 10% ប៉ុណ្ណោះសម្រាប់តារាម្នាក់ៗ។ សម្រាប់ក្រុមដែលមានសមាជិក 20 នាក់ដូច NCT ជាដើម នឹងទទួលបានប្រាក់ចំណូលកាន់តែទាប។ នេះមិនទាន់និយាយដល់រឿងបង់ពន្ធជូនរដ្ឋនៅឡើយ៕
Jennie (Blackpink) កាលនៅជាអ្នកហាត់ការ
August 7, 2023
អាហ្វ្រិកខាងត្បូងថា «ចាប់លោក ពូទីន គឺស្មើនឹងប្រកាសសង្គ្រាមនឹងរុស្ស៊ី»
ប្រធានាធិបតី Ramaphosa និយាយថា អាហ្វ្រិកខាងត្បូងចាប់ខ្លួនលោក ពូទីន នឹងមានន័យថា ប្រកាសសង្គ្រាមជាមួយនឹងប្រទេសរុស្ស៊ី បន្ទាប់ពីបក្សប្រឆាំងចង់ឱ្យ រដ្ឋធានីព្រីតូរីយ៉ា អនុវត្តបទបញ្ជាតាមចាប់ខ្លួនរបស់តុលាការ ICC។
«រុស្ស៊ីបានប្រកាសហើយថា ការចាប់ខ្លួនប្រធានាធិបតី វ្ល៉ាឌីមៀ ពូទីន គឺស្មើនឹងការប្រកាសសង្គ្រាម» ប្រធានាធិបតីអាហ្វ្រិកខាងត្បូង Cyril Ramaphosa សរសេរលិខិតផ្ញើទៅកាន់តុលាការកំពូល Gauteng ដែលមានយុត្តាធិការលើ ព្រីតូរីយ៉ា ដូច្នេះ។
ការលើកឡើងរបស់ប្រធានាធិបតីអាហ្វ្រិកខាងត្បូងខាងលើ ត្រូវបានធ្វើឡើងបន្ទាប់ពីសម្ព័ន្ធភាពប្រជាធិបតេយ្យ (DA) របស់ក្រុមប្រឆាំង ចង់ឱ្យរដ្ឋធានីព្រីតូរីយ៉ា គោរពតាមបទបញ្ជាតាមចាប់ខ្លួនប្រធានាធិបតី ពូទីន ពីតុលាការព្រហ្មទណ្ឌអន្តរជាតិ (ICC)។ លោក Ramaphosa ពន្យល់ថា ការបង្កសង្គ្រាមជាមួយនឹងរុស្ស៊ី គឺមិនសមស្របនឹងរដ្ឋធម្មនុញ្ញរបស់អាហ្វ្រិកខាងត្បូង ហើយផ្ទុយពីការទទួលខុសត្រូវក្នុងការការពារជាតិរបស់រដ្ឋាភិបាល។
ឆ្លើយតបនឹងប្រធានាធិបតិ Ramaphosa មេដឹកនាំរបស់ DA លោក John Steenhuisen យល់ថា ការបកស្រាយរបស់លោក Ramaphosa គឺគួរឱ្យអស់សំណើច និងរាក់កំភែល ហើយថា «…ប្រការសំខាន់គឺត្រូវរក្សាកាតព្វកិច្ចអន្តរជាតិប្រកបដោយតម្លាភាព»។
អាហ្វ្រិកខាងត្បូង កំពុងតែមានការរារែក ចាប់តាំងពី ICC ចេញបទបញ្ជាតាមចាប់ខ្លួនប្រធានាធិបតី ពូទីន កាលពីខែមីនា ក្រោមបទចោទថា «បានផ្លាស់ទីកុមារអ៊ុយក្រែនដោយខុសច្បាប់»។ យោងតាមគោលការណ៍របស់តុលាការ ICC សមាជិកចំនួន 123 ប្រទេសរបស់តុលាការនេះ ក្នុងនោះមានអាហ្វ្រិកខាងត្បូង មានកាតព្វកិច្ចចាប់ខ្លួនមេដឹកនាំរុស្ស៊ី និងបញ្ជូនទៅកាន់ហូឡង់ ដើម្បីកាត់ទោស បើសិនជាលោក ពូទីន ឈានជើងចូលដល់ទឹកដីរបស់ពួកគេ។
ចំណែកភាគីខាងរុស្ស៊ីវិញ និយាយថា បទបញ្ជាតាមចាប់ខ្លួនរបស់ ICC គឺជារឿងគ្មានន័យ។ រុស្ស៊ីធ្លាប់បានចូលរួមជាសមាជិករបស់ ICC ប៉ុន្តែបានដកខ្លួន និងលែងទទួលស្គាល់ស្ថាប័ននេះ។
អាហ្វ្រិកខាងត្បូងកំពុងតែធ្វើជាប្រធាន BRICS ដែលជាក្រុមប្រទេសមានសេដ្ឋកិច្ចទើបតែលេចធ្លោ ដោយមានសមាជិកចំនួនប្រាំប្រទេស រួមមានទាំង ចិន រុស្ស៊ី ឥណ្ឌា និងប្រេស៊ីល។ អាហ្វ្រិកខាងត្បូងគ្រោងនឹងប្រារព្ធកិច្ចប្រជុំកំពូល BRICS លើកទី 15 ចាប់ពីថ្ងៃទី 22 ដល់ 24 សីហាខាងមុខ។
ដើម្បីដោះស្រាយបញ្ហាទាក់ទិននឹងតុលាការ ICC អាហ្វ្រិកខាងត្បូងបានស្នើឱ្យរុស្ស៊ី អនុញ្ញាតឱ្យរដ្ឋមន្ត្រីការបរទេស Sergei Lavrov មកចូលរួមកិច្ចប្រជុំជំនួសលោក ពូទីន ប៉ុន្តែ ទីក្រុងមូស្គូ បានបដិសេធសំណើនេះ៕
July 19, 2023
អាជ្ញាធរចិនប្រហារជីវិតគ្រូបង្រៀនម្នាក់ដែលបានបំពុលសិស្ស 25 នាក់
អាជ្ញាធរចិនប្រហារជីវិត Wang Yun ជាគ្រូបង្រៀនថ្នាក់មតេ្តយ្យដែលបានដាក់ថ្នាំបំពុលសិស្សចំនួន 25 នាក់កាលពីឆ្នាំ 2019 បណ្ដាលឱ្យកុមារម្នាក់បាត់បង់ជីវិត។
Wang Yun អាយុ 40 ត្រូវបានកាត់ទោសពីបទបំពុលសិស្សរបស់ខ្លួនដោយការដាក់សូដ្យូមនីត្រាតទៅក្នុងអាហាររបស់សិស្ស។ ដំបូងឡើយ Wang Yun ត្រូវបានកាត់ទោសឱ្យជាប់ពន្ធនាគារ 9 ខែ ពីបទមានចេតនាបង្កឱ្យខូចសុខភាពរបស់សិស្ស។ ក៏ប៉ុន្តែ ក្រោយមក កាលពីខែកញ្ញាឆ្នាំ 2020 សាលក្រមតុលាការក៏បានកែប្រែ នាំឱ្យអ្នកគ្រូរូបនេះត្រូវទទួលទោសប្រហារជីវិត។
យោងតាមសេចក្ដីប្រកាសកាលពីថ្ងៃទី 14 កក្កដា 2023 Wang Yun ត្រូវបានប្រហារជីវិតកាលពីថ្ងៃទី 13 កក្កដា 2023 នៅក្នុងទីក្រុង Jiaozuo នៃខេត្ត Henan។ សមត្ថកិច្ចចិនមិនបានបង្ហើបឱ្យដឹងអំពីរបៀបនៃការប្រហារជីវិតនោះទេ នៅក្នុងករណីនេះ។
Wang Yun បានដាក់សូដ្យូមនីត្រាតទៅក្នុងបបរសម្រាប់សិស្សកាលពីថ្ងៃទី 27 មីនា 2019 នៅឯសាលាមត្តេយ្យដែលខ្លួនកំពុងបង្រៀន បន្ទាប់ពីបានប្រកែកគ្នាជាមួយនឹងមិត្តរួមការងារអំពីវិធីគ្រប់គ្រងសិស្ស។ យោងតាមទំព័រ Poison Control ការហូបចាំសូដ្យូមនីត្រាតអាចនាំឱ្យមានបញ្ហាខ្វះអុកស៊ីសែន ថប់ដង្ហើម កន្ត្រាក់ដៃជើង ចង្វាក់បេះដូងមិនប្រក្រតី បាត់បង់ស្មារតី និងអាចបាត់បង់ជីវិត។
សារធាតុ សូដ្យូមនីត្រាត (sodium nitrate)
ទង្វើរបស់ Wang Yun បាននាំឱ្យសិស្ស 25 នាក់ពុលអាហារ ប៉ុន្តែស្ទើរតែទាំងអស់បានជាសះស្បើយក្រោយការព្យាបាល។ ក៏ប៉ុន្តែ ក្នុងចំណោមនោះមានសិស្សម្នាក់បានស្លាប់ក្នុងឆ្នាំ 2020 បន្ទាប់ពីការព្យាបាលជំងឺខ្សោយគ្រឿងក្នុងដោយសារតែថ្នាំពុលអស់មួយរយៈពេល។
សិស្ស 25 នាក់របស់ Wang Yun បានក្អួតចង្អោរ និងសន្លប់ក្នុងថ្នាក់រៀន បន្ទាប់ពីបានហូបអាហារដែលមានថ្នាំពុលកាលពីខែមីនា 2019
ករណីបំពុលសិស្សខាងលើនេះមិនមែនជាលើកដំបូងឡើយដែល Wang Yun ប្រើប្រាស់សូដ្យូមនីត្រាត។ កន្លងមក ជនដៃដល់នេះក៏ធ្លាប់ដាក់សារធាតុនេះដើម្បីបំពុលប្ដីខ្លួនឯង បណ្ដាលឱ្យមានអាការពុលកម្រិតស្រាលផងដែរ៕
សិស្ស 25 នាក់របស់ Wang Yun បានក្អួតចង្អោរ និងសន្លប់ក្នុងថ្នាក់រៀន បន្ទាប់ពីបានហូបអាហារដែលមានថ្នាំពុលកាលពីខែមីនា 2019
July 15, 2023
កូឡុំប៊ីផលិតភាពយន្តស្ដីពីកុមារបួននាក់នៅរស់ ក្រោយធ្លាក់យន្តហោះ និងស្ថិតក្នុងព្រៃអាម៉ាហ្សូន 40 ថ្ងៃ
អាជ្ញាធរកូឡុំប៊ី សហការជាមួយផលិតករជនជាតិអង់គ្លេស ផលិតខ្សែភាពយន្តឯកសារស្ដីពីកុមារ 4 នាក់ដែលនៅមានជីវិត ពេលវង្វេង 40 ថ្ងៃ ក្រោយពីធ្លាក់យន្តហោះក្នុងព្រៃអាម៉ាហ្សូន។
ប្រធានាធិបតីកូឡុំប៊ី Gustavo Petro ដែលកំពុងចូលរួមសន្និសីទកំពូលស្ដីពីអាកាសធាតុនៅទីក្រុងប៉ារីស កាលពីថ្ងៃទី 23 មិថុនា បានឱ្យដឹងថា បានជួបពិភាក្សាជាមួយ Simon Chinn ផលិតករភាពយន្តឯកសារជនជាតិអង់គ្លេស ដែលធ្លាប់ទទួលបានពានរង្វាន់អូស្ការពីរលើក។
លោក Gustavo Petro ឱ្យដងថា ទូរទស្សន៍ជាតិកូឡុំប៊ី (RTVC) នឹងសហការជាមួយ Lightbox ដែលជាក្រុមហ៊ុនផលិតភាពយន្តរបស់ Chinn ដើម្បីរៀបរាប់ដំណើររឿងស្ដីពី «យុទ្ធនាការនៃក្ដីសង្ឃឹម» ក្នុងការស្វែងរក និងសង្គ្រោះកុមារ 4 នាក់ដែលនៅមានជីវិតក្រោយពីយន្តហោះដែលពួកគេជិះ បានធ្លាក់ ហើយពួកគេត្រូវវង្វេង 40 ថ្ងៃក្នុងព្រៃជ្រៅអាម៉ាហ្សូន។
ក្មេង 4 នាក់ដែលរួមមាន Lesly អាយុ 13 ឆ្នាំ, Soleiny អាយុ 9 ឆ្នាំ, Tien Norel អាយុ 5 ឆ្នាំ និង Cristin អាយុ 1 ឆ្នាំ បានរួចពីហានិភ័យបាត់បង់ជីវិត បន្ទាប់ពីម្ដាយ និងមនុស្សពេញវ័យពីរនាក់បានស្លាប់ក្នុងហេតុការណ៍ធ្លាក់យន្តហោះនៅក្នុងព្រៃអាម៉ាហ្សូនកាលពីថ្ងៃទី 01 ឧសភា 2023។
ពេលបានទទួលដំណឹងអំពីករណីខាងលើ កងទ័ពកូឡុំប៊ី ក៏បានចាប់ផ្ដើមយុទ្ធនាការស្វែងរក និងសង្គ្រោះ។ ចុងក្រោយ ពួកគេក៏បានរកឃើញកុមារ 4 នាក់នេះកាលពីថ្ងៃទី 09 មិថុនា 2023៕
June 24, 2023
វិស្វករអាយុ 14 ឆ្នាំរបស់ SpaceX ថា បណ្ដាញសង្គមរបស់ Microsoft រើសអើងវ័យ
Kairan Quazi ដែលជាវិស្វករផ្នែកទន់ទើបតែបានចូលធ្វើការឱ្យក្រុមហ៊ុន SpaceX មិនអាចចូលប្រើប្រាស់បណ្ដាញសង្គមការងារ LinkedIn ដោយសារតែមានអាយុទើបតែ 14 ឆ្នាំ។
កាលពីថ្ងៃទី 14 មិថុនា Kairan Quazi បានបង្ហោះរូបថតអេក្រង់ស្ដីពីប្រកាសរបស់ LinkedIn នៅលើ Instagram។ ប្រកាសនោះប្រាប់ថា គណនីរបស់ Kairan ត្រូវបានរារាំងព្រោះតែមានអាយុតិចជាងលក្ខខណ្ឌរបស់ LinkedIn។ បណ្ដាញសង្គមរបស់ Microsoft នេះ ទាមទារឱ្យអ្នកប្រើប្រាស់ត្រូវមានអាយុចាប់ពី 16 ឆ្នាំឡើងទៅ។
LinkedIn ឱ្យដឹងថា វិស្វករវ័យក្មេងខាងលើនឹងបានចូលប្រើប្រាស់ឡើងវិញ បន្ទាប់ពីមានអាយុគ្រប់ 16 ឆ្នាំ។ Kairan ប្រើប្រាស់បណ្ដាញសង្គមនេះដោយមានការបង់ប្រាក់ ប៉ុន្តែ LinkedIn ថា នឹងសងប្រាក់នោះត្រឡប់មកវិញ។
Kairan Quazi បានសម្ដែងការមិនពេញចិត្តចំពោះគោលការណ៍របស់ LinkedIn។ កុមាររូបនេះចោទថា បណ្ដាញសង្គមរបស់ Microsoft រើសអើងវ័យចំពោះកុមារ។
Kairan Quazi
Kairan Quazi កើតឆ្នាំ 2009 នៅ California សហរដ្ឋអាម៉េរិក។ វ័យ 11 ឆ្នាំ Kairan បានចូលសាកលវិទ្យាល័យ Santa Clara រៀនជំនាញវិទ្យាសាស្ត្រ និងបច្ចេកទេសកុំព្យូទ័រ។
LinkedIn គឺជាបណ្ដាញសង្គមផ្នែកទិន្នន័យអាជីព ការងារ និងផ្សារភ្ជាប់ជាមួយនឹងមុខរបរ ធំជាងគេលើពិភពលោក ហើយក៏ជាកម្មសិទ្ធិរបស់ក្រុមហ៊ុន Microsoft។ គិតត្រឹមខែមីនា 2023 បណ្ដាញសង្គមនេះមានសមាជិកចូលរួមប្រើប្រាស់ជាង 900 លាននាក់ មកពីប្រទេស និងដែនដីជាង 200 ក្នុងនោះក៏មានកម្ពុជាផងដែរ៕
June 15, 2023