លោក Jose Mourinho កំពុងតែទទូចសុំឲ្យប្រធានក្លិប Manchester United របស់លោកដាក់សំណើដេញថ្លៃក្នុងទឹកប្រាក់100លានផោន (ស្មើនឹង130លានដុល្លារអាមេរិក) ដើម្បីទិញតារាឆ្នើម Gareth Bale ពីក្លិប Real Madrid។
បើទោះបីជាលោក Mourinho បានប្រកាសជាសាធារណៈថា «ល្បែងបានបញ្ចប់» ហើយក្នុងការប្រមាញ់ទិញខ្សែប្រយុទ្ធអន្តរជាតិវេលស៍រូបនេះ ក្រោយពីក្រុមរបស់លោកចាញ់ក្រុម Real Madrid ក្នុងលទ្ធផល 2-1 ក្នុងការប្រកួតដណ្តើមពាន UEFA Super Cup ក្នុងទីក្រុង Skopje កាលពីថ្ងៃអង្គារក៏ដោយ ប៉ុន្តែគ្រូបង្វឹករបស់ Man United រូបនេះនៅតែមានអារម្មណ៍ថា ការព្រមព្រៀងគ្នាមួយនៅតែត្រូវឈានដល់។ គ្រូបង្វឹកសញ្ជាតិព័រទុយហ្គាល់រូបនេះរំពឹងថា ការចុះហត្ថលេខាជាមួយ Bale អាចកើតឡើង ប្រសិនបើក្លិបយក្សរបស់អេស្ប៉ាញមានពេលវេលាគ្រប់គ្រាន់ក្នុងការរកកីឡាករមកជំនួស Bale បានក្នុងរយៈពេលប៉ុន្មានសប្តាហ៍ទៀតនេះ។ លោក Mourinho ថា ការផ្តល់កុងត្រាជាមួយនឹងចំណូល50ម៉ឺនផោនក្នុងមួយសប្តាហ៍ នឹងទាក់ទាញការចាប់អារម្មណ៍របស់ Bale ឲ្យវិលទៅកាន់អង់គ្លេសដើម្បីលេងឲ្យក្រុមអតីតម្ចាស់ជើងឯកក្របខ័ណ្ឌ Champions League របស់លោក។ Bale ហាក់ដូចជាបានច្រានចោលចំពោះការលើកឡើងថា រូបគេនឹងចាកចេញពីក្លិប Real នៅរដូវក្តៅនេះ បើទោះបីជាក្លិបយក្សអេស្ប៉ាញមួយនេះ កំពុងតែព្យាយាមទិញខ្សែប្រយុទ្ធវ័យក្មេង Kylian Mbappe ក្នុងតម្លៃខ្លួន160លានផោន ពីក្លិប Monaco ក៏ដោយ។
Bale បានបញ្ជាក់ថា៖ «ខ្ញុំពិតជារីករាយណាស់ក្នុងការប្រជែងដណ្តើមយកកៅអីរបស់ខ្ញុំនេះ។ យើងនឹងប្រជែងដើម្បីកៅអីរបស់យើង។ វាមិនមែនជារឿងថ្មីឡើយក្នុងកីឡាបាល់ទាត់។ វាកើតឡើងនៅរាល់ក្លិបទាំងអស់ ហើយនេះជារឿងធម្មតាសម្រាប់អ្នកទាំងអស់គ្នាទៅហើយ»៕
ប្រភពពី៖ The Sun
