កីឡាករបាល់ទះជម្រើសជាតិកម្ពុជា និងជាសមាជិកក្លិបវិសាខា គួន មុំ បានចេញទៅប្រទេសឥណ្ឌូនេស៊ីហើយ បន្ទាប់ពីមានក្លិបបាល់ទះលីកកំពូលមួយនៅទីនោះបានចរចាទិញយករូបគេឱ្យទៅជួយលេង។
ក្នុងព្រឹត្តិការណ៍ស៊ីហ្គេមឆ្នាំ2019 នៅប្រទេសហ្វីលីពីនកាលពីពេលកន្លងទៅ កីឡាករ គួន មុំ ក៏ជាសមាជិកសំខាន់ម្នាក់ក្នុងក្រុមជម្រើសជាតិបាល់ទះកម្ពុជាដែរ គេបានជួយកម្ពុជាឱ្យឈ្នះវៀតណាម នៅវគ្គសន្សំពិន្ទុក្នុងពូល ប៉ុន្តែចាញ់ហ្វីលីពីននិងឥណ្ឌូនេស៊ី។
កីឡាករបាល់ទះ គួន មុំ បានចាកចេញពីកម្ពុជាកាលពីរសៀលថ្ងៃច័ន្ទ ទី6 ខែមករា ឆ្នាំ2020 ដើម្បីទៅជួយលេងឱ្យក្លិបបាល់ទះ JAKARTA GARUDA ក្នុងលីកបាល់ទះកំពូលរបស់ប្រទេសឥណ្ឌូនេស៊ី រយៈពេល 3ខែ ទើបវិលត្រឡប់មកកាន់ក្លិបបាល់ទះវិសាខាវិញ៕
