កីឡាករគុនខ្មែរ សំ សុវណ្ណកេសា ដែលជាអាណិកជនខ្មែរ-អាមេរិក 1រូប បានធ្វើឱ្យសង្វៀនលំដាប់ពិភពលោក GLORY បានស្គាល់ពីក្បាច់ប្រដាល់គុនខ្មែរ ដោយសារបានប្រកួតជាមួយនឹងកីឡាករអាមេរិកាំងក្នុងប្រភេទកីឡាប្រដាល់គុនខ្មែរទម្ងន់ 65គីឡូក្រាម។
ទោះជាលើកនេះមិនមែនជាការប្រកួតលើកទី1មែន តែកីឡាកររូបនេះ គឺជាកីឡាករខ្មែរដំបូងគេដែលបានទៅប្រកួតលើសង្វៀនមួយនេះ។ កាលពីពេលមុន រូបគេធ្លាប់ប្រកួតបែបនេះ 4លើករួចមកហើយនៅលើសង្វៀនផ្សេងៗគ្នា ដោយទទួលបានលទ្ធផល ឈ្នះ 1លើក និងចាញ់ 3លើក ចំណែកឯការប្រកួតលើកនេះ កីឡាករកម្ពុជា សំ សុវណ្ណកេសា បានប្រកួតចាញ់ពិន្ទុកីឡាករអាមេរិកាំង Kou Lee ដែលបានឈ្នះជាឯកច្ឆន្ទលើសុវណ្ណកេសា។
គួរបញ្ជាក់ផងដែរថា កីឡាករគុនខ្មែរ សំ សុវណ្ណកេសា មានឈាមជ័រខ្មែរ រស់នៅរដ្ឋ California និងបានឡើងប្រកួតលើសង្វៀនដ៏ធំលំដាប់ពិភពលោក Glory នេះជាលើកទី2 ហើយ ដែលការប្រកួតទី1 របស់គេក៏បានបរាជ័យដែរ៕
