លោក Jurgen Klopp បានបញ្ជាក់កាលពីថ្ងៃអង្គារថា ក្រុម Liverpool កំពុងតែទាញយកអត្ថប្រយោជន៍ផ្សេងៗពីភាពចាស់ទុំផ្នែកកីឡាបាល់ទាត់ដែលតារាឆ្នើម Mohamed Salah មាន អំឡុងពេលនៃការចំណាយពេលរបស់គេនៅឯក្លិប Roma។
ខ្សែប្រយុទ្ធអន្តរជាតិអេហ្ស៊ីបវ័យ 25ឆ្នាំរូបនេះនឹងវិលទៅកាន់កីឡដ្ឋាន StadioOlimpico វិញសម្រាប់ការប្រកួតក្របខ័ណ្ឌ Champions League វគ្គពាក់កណ្តាលផ្តាច់ព្រ័ត្រ ជើងទី2 នៅរាត្រីនេះ ដោយសម្លឹងមើលការរកគ្រាប់បាល់បន្ថែមទៅលើគ្រាប់បាល់សរុប 43គ្រាប់របស់គេនៅរដូវកាលនេះ ក្នុងនោះរាប់បញ្ចូលទាំងការរកបាន 2គ្រាប់ក្នុងការប្រកួតជើងទី1 នាកីឡដ្ឋាន Anfield កាលពីសប្តាហ៍មុននេះ។
Salah រកបានត្រឹមតែ 34គ្រាប់ប៉ុណ្ណោះក្នុងរយៈពេល 2រដូវកាលសម្រាប់ក្រុម Roma របស់អ៊ីតាលី។ លោក Klopp បានប្រាប់សន្និសីទសារព័ត៌មានមួយក្នុងរដ្ឋធានីរបស់អ៊ីតាលីថា៖ «រូបគេមានភាពចាស់ទុំ។ រូបគេមានការជឿជាក់នៅទីនេះ។ រូបគេបានចេញពី Chelsea ទៅកាន់ទីក្រុង Florence និងបានជួបរដូវកាលដ៏ល្អមួយ ប៉ុន្តែមិនល្អដូចស្ថិតនៅជាមួយនឹង Roma ឡើយ ហើយបន្ទាប់មក រូបគេបានអភិវឌ្ឍ ហើយបច្ចុប្បន្នជាកីឡាករដែលរូបគេមានដូចសព្វថ្ងៃ»។
គ្រូបង្វឹកសញ្ជាតិអាល្លឺម៉ង់រូបនេះបានបន្ថែមទៀតថា៖ «យើងគឺជាក្រុមមានសំណាងដែលមានរូបគេនៅពេលនេះ។ ខ្ញុំមិនបានសូម្បីតែពន្យល់រូបគេឱ្យបានជាក់លាក់ទៅលើរបៀបនៃការរកគ្រាប់បាល់បញ្ចូលទី។ រូបគេបានដឹងដោយខ្លួនរួចជាស្រេចហើយ ប៉ុន្តែខ្សែប្រយុទ្ធនីមួយៗ ក្នុងពិភពលោក មិនចាប់ផ្តើមក្នុងនាមជាខ្សែប្រយុទ្ធដ៏ឆ្នើមម្នាក់ក្នុងវ័យត្រឹម 18ឆ្នាំឡើយ»។
Liverpool នឹងនាំយកការនាំមុខ 5-2 ទៅកាន់ការប្រកួតជើងទី2 ខណៈដែលពួកគេសម្លឹងរកការឈានទៅវគ្គផ្តាច់ព្រ័ត្រក្របខ័ណ្ឌកំពូលអឺរ៉ុប ជាលើកទី8 ប៉ុន្តែ ជាលើកទី1បើគិតចាប់តាំងពីឆ្នាំ2007។ ការប្រកួតនេះនឹងចាប់ផ្តើមនៅម៉ោង1:45ទៀបភ្លឺ៕
ប្រភពពី៖ Channel News Asia
