លោក Jurgen Klopp បានធ្វើការរិះគន់យ៉ាងខ្លាំងក្លា ទៅលើលោកអាជ្ញាកណ្តាល Jon Moss និងមន្ត្រីប្រចាំការប្រកួត ក្រោយពីខ្សែប្រយុទ្ធ Harry Kane បានស៊ុតបាល់ប៉េណាល់ទីដ៏ចម្រូងចម្រាសមួយដែលបានជួយឲ្យក្រុម Tottenham ដណ្តើមបានលទ្ធផលស្មើ 2-2 នៅលើទឹកដីក្រុម Liverpool កាលពីរាត្រីថ្ងៃអាទិត្យ។
លោក Klopp គ្រូបង្វឹកនៃក្រុមហង្សក្រហម Liverpool បានផ្ទុះកំហឹងយ៉ាងខ្លាំង ក្រោយពីឱកាសនៃការដណ្តើមបានជ័យជម្នះដ៏សំខាន់របស់ក្រុមលោកក្នុងការប្រជែងយកចំណាត់ថ្នាក់កំពូលទាំង4 ត្រូវបានរលាយអស់នៅវិនាទីចុងក្រោយ។
គ្រាប់បាល់ស៊ុតបញ្ចូលទីយ៉ាងល្អនៅនាទីទី 90របស់ខ្សែប្រយុទ្ធ Mohamed Salah ដើម្បីរកគ្រាប់បាល់ទី 2នៃការប្រកួតនេះ បានបង្កើតឲ្យមានការអបអរយ៉ាងខ្លាំងក្លាពីសំណាក់អ្នកចាត់ការទូទៅរបស់ពួកគេគឺលោក Klopp និងហាក់ដូចជាផ្តល់ឲ្យក្រុម Liverpool នូវជ័យជម្នះដ៏សំខាន់មួយរួចទៅហើយក្នុងការប្រជែងយកចំណាត់ថ្នាក់កំពូលទាំង4។ ប៉ុន្តែ Kane ដែលបានរងនូវការសង្គ្រោះបាល់ប៉េណាល់ទី 1គ្រាប់រួចហើយពីអ្នកចាំទី Loris Karius នៅរយៈពេល 5នាទីចុងក្រោយនោះ បានស៊ុតបាល់ប៉េណាល់ទីជាលើកទី 2ចូលទីយ៉ាងល្អ ក្រោយពីខ្សែការពារតម្លៃខ្លួន 75លានផោន Virgil van Dijk របស់ក្លិប Liverpool ត្រូវបានកាត់សេចក្តីថា បានធ្វើឲ្យខ្សែប្រយុទ្ធ Erik Lamela ដួលក្នុងប្រអប់គ្រោះថ្នាក់។
លោក Klopp បានឲ្យដឹងថា៖ «ប្រសិនបើខ្ញុំនិយាយពីអ្វីដែលខ្ញុំគិតនៅពេលនេះ ខ្ញុំគិតថា នឹងត្រូវ ពិន័យប្រាក់ដ៏ច្រើនក្នុងកីឡាបាល់ទាត់ពិភពលោក។ នៅនាទីទី 93 អ្នកគួរតែផ្លុំកញ្ចែបញ្ចប់ការប្រកួតជាជាងផ្តល់បាល់ប៉េណាល់ទី នៅពេលដែលអ្នកមានការប្រាកដប្រជា 100ភាគរយហើយនោះ»៕
ប្រភពពី៖ Sport24
