Piyapong Pue-on វ័យ 63 ឆ្នាំ យល់ថា ថៃចាញ់ប្រៀបវៀតណាមនៅក្នុងវគ្គផ្ដាច់ព្រ័ត្រ AFF Cup 2022 ចាប់ពីបញ្ហាធនធានមនុស្សរហូតដល់អាជ្ញាកណ្ដាល។
«វៀតណាមបានសម្រាកច្រើនជាងថៃ។ យើងត្រូវរង់ចាំទទួលលទ្ធផលនៃការពិនិត្យដើម្បីដឹងថា Teerasil Dangda អាចចូលប្រកួតបានដែរ ឬទេ។ ជារួម វៀតណាមមានអំណោយផលជាង។ នេះមិនទាន់និយាយដល់បរិយាកាសខាងក្រៅទីលានប្រកួតដែលអាចជះឥទ្ធិពលមិនល្អ។ រាល់លើកដែលថៃទាត់នៅលើទីលានគូប្រកួត សុទ្ធតែមានបញ្ហា» Piyapong Pue-on អះអាងប្រាប់ Thairath ដូច្នេះ។
ថៃត្រូវទទួលផលមិនល្អសម្រាប់ការប្រកួតឈ្នះម៉ាឡេស៊ី 3-0 នៅវគ្គពាក់កណ្ដាលផ្ដាច់ព្រ័ត្រក្នុងជើងទីពីរដោយការរងរបួសរបស់ Teerasil។ ខ្សែប្រយុទ្ធវ័យ 34 ឆ្នាំនេះបើកឆាកដោយរកបាន 1 គ្រាប់ ប៉ុន្តែត្រូវចាកចេញពីទីលានក្រោយតង់ទីមួយ។ Teerasil រកបាន 6 គ្រាប់ ដែលជាតួលេខច្រើនជាងគេនៅ AFF Cup 2022។ បើសិនកីឡាករនេះមិនអាចចូលប្រកួតលើវាលស្មៅរបស់កីឡដ្ឋាន My Dinh នោះគឺជាការខាតបង់ដ៏ធំរបស់ថៃ។
Piyapong Pue-on និយាយថា «កត្តាសំខាន់បំផុតដែលប៉ះពាល់ដល់ការប្រកួត នោះគឺអាជ្ញាកណ្ដាល (Ko Hyun-jin) ដែលជាជនជាតិកូរ៉េខាងត្បូងដូចគ្រូបង្វឹករបស់វៀតណាម លោក Park Hang-seo។ AFF មិនគួររៀបចំអាជ្ញាកណ្ដាលដូច្នេះទាល់តែសោះ ព្រោះនឹងអាចមានការសង្ស័យ។ យើងត្រូវទទួលស្គាល់ថា ថៃ អន់ជាងគ្រប់ចំណុច»។
វៀតណាមប៉ះនឹងថៃនៅវគ្គផ្ដាច់ព្រ័ត្រគឺជាក្ដីស្រមៃរបស់អ្នកគាំទ្រនៅវៀតណាម។ ទាំងពីរគឺជាក្រុមជើងឯកថ្មីៗបំផុតនៅ AFF Cup។ ឆ្នាំ 2018 វៀតណាម មិនបានប៉ះថៃនៅវគ្គផ្ដាច់ព្រ័ត្រ។ ឆ្នាំ 2020 ថៃយកឈ្នះកូនសិស្ស និងគ្រូបង្វឹក Park Hang-seo 2-0 នៅវគ្គពាក់កណ្ដាលផ្ដាច់ព្រ័ត្រ។
ឆ្នាំនេះ វៀតណាមទាត់នៅវគ្គផ្ដាច់ព្រ័ត្រជាមួយឥណ្ឌូណេស៊ីមុនគេ ទើបបានសម្រាកច្រើនជាងថៃមួយថ្ងៃ។ ទន្ទឹមនឹងនេះ គ្រូបង្វឹក Park ក៏ត្រូវបានគេជឿថា មានកូនសិស្សពូកៗច្រើនផងដែរ។
យោងតាមអតីតខ្សែប្រយុទ្ធថៃ Piyapong Pue-on លទ្ធផលស្មើ 1-1 នៅលើទីលានរបស់វៀតណាម នៅព្រលប់ថ្ងៃទី 13 មករានេះ នឹងជាជោគជ័យសម្រាប់ថៃ។ ក៏ប៉ុន្តែ Piyapong Pue-on ព្យាករថា ក្រុមទាំងពីរនឹងទាត់ដោយប្រុងប្រយ័ត្ន ដូច្នេះឱកាសស៊ុតបញ្ចូលទីអាចនឹងមានតិចតួច៕
