ដើម្បីពង្រឹងការបណ្តុះបណ្តាលផ្នែកការទូតនៅកម្ពុជា ថ្មីៗនេះស្ថាប័នធំ2 គឺវិទ្យាស្ថានការទូត និងទំនាក់ទំនងអន្តរជាតិ នៃក្រសួងការបរទេស និងសហប្រតិបត្តិការអន្តរជាតិ និងមូលនិធិអាស៊ី បានចាប់ដៃគ្នាកសាងសមត្ថភាពអ្នកការទូត។
គម្រោងដែលស្ថាប័នទាំង2សហការគ្នានេះ មានគោលដៅពង្រឹងលើកកម្ពស់ និងបង្កើតកិច្ចសហប្រតិបត្តិការបណ្តុះបណ្តាលក្នុងវិស័យទំណាក់ទំនងអន្តរជាតិ និងការទូត ដើម្បីគាំទ្រដល់កិច្ចខិតខំប្រឹងប្រែងរបស់រដ្ឋាភិបាល ក្នុងការជំរុញទំនាក់ទំនងរវាងកម្ពុជា និងសហគមន៍អន្តរជាតិ។
វិទ្យាស្ថានការទូតបានបញ្ជាក់ថា រយៈពេល3ឆ្នាំខាងមុខ ខ្លួន និងមូលនិធិអាស៊ី នឹងធ្វើការរួមគ្នាដើម្បីគាំទ្រដល់ការចូលរួមរបស់មន្ត្រីក្រសួងវ័យក្មេង ក្នុងកម្មវិធីបណ្តុះបណ្តាលអ្នកការទូតអាស៊ីវ័យក្មេងនៅអាមេរិក និងការរៀបចំកម្មវិធីផ្លាស់ប្តូរ និងកម្មវិធីទស្សនកិច្ចសិក្សាជាមួយសិក្ខាកាមផ្សេងទៀតនៃកម្មវិធីនេះ។ កម្មវិធីអ្នកការទូតអាស៊ីវ័យក្មេងនេះ គាំទ្រដល់ការអភិវឌ្ឍជំនាញភាពជាអ្នកដឹកនាំរបស់អ្នកជំនាន់ក្រោយនៅអាស៊ី និងការលើកកម្ពស់ទស្សនវិស័យវែងឆ្ងាយសម្រាប់កិច្ចសហប្រតិបត្តិការពហុភាគីក្នុងការដោះស្រាយបញ្ហានានាក្នុងតំបន់។
ស្ថាប័នខាងលើបានបញ្ជាក់ផងដែរថា កិច្ចសហប្រវិបត្តិការនេះក៏នឹងបង្កើតឱ្យមានជាបណ្ណាល័យសាធារណៈ និងគាំទ្រដល់វិទ្យាស្ថានក្នុងការប្រែក្លាយបណ្ណាល័យនេះឱ្យទៅជាធនធានឯកទេសទំនាក់ទំនងអន្តរជាតិសម្រាប់កម្ពុជា សហការរៀបចំបាវចនាសាធារណៈ ចូលរួម និងគាំទ្រដល់ការស្រាវជ្រាវ និងរៀបចំគោលនយោបាយលើវិស័យទំនាក់ទំនងអន្តរជាតិ និងការអភិវឌ្ឍសមត្ថភាព ព្រមទាំងការរៀបចំសិក្ខាសាលា និងសន្និសីទពាក់ព័ន្ធនានា៕
