ឆ្នាំ2023 ប្រទេសកម្ពុជានឹងមានព្រលានយន្តហោះខ្នាតធំដល់ទៅ2 ដែលនឹងសាងសង់រួចរាល់ទាំងស្រុង និងអាចដំណើរការបានសម្រាប់ស្រូបទាញភ្ញៀវរាប់លាននាក់ឱ្យចូលមកកាន់ប្រទេសកម្ពុជា។
ម្សិលម៉ិញនេះ នាយឧត្តមសេនីយ៍ ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល បានចុះហត្ថលេខាលើផែនការមេចុងក្រោយនៃគម្រោងសាងសង់អាកាសយានដ្ឋានអន្តរជាតិសៀមរាបថ្មី (AIAI) ដោយបានកំណត់ពេលយ៉ាងច្បាស់ថា ព្រលានយន្តហោះនេះនឹងបញ្ចប់ការសាងសង់ទាំងស្រុងនៅថ្ងៃទី15 ខែមីនា ឆ្នាំ2023 ដោយប្រើប្រាស់រយៈពេល 36ខែគត់ បើគិតចាប់ពីថ្ងៃសាងសង់ទី15 ខែមីនា ឆ្នាំ2020។ ការបញ្ចប់គម្រោងសាងសង់នៅឆ្នាំ2023នេះ គឺដំណាលគ្នានឹងព្រលានយន្តហោះអន្តរជាតិភ្នំពេញថ្មី ដែលគ្រោងនឹងបញ្ចប់ការសាងសង់នៅឆ្នាំ2023ដូចគ្នា។
គម្រោងព្រលានយន្តហោះអន្តរជាតិទាំង2នេះ នឹងចំណាយថវិកាប្រមាណ 2,400លានដុល្លារអាមេរិក និងមានសមត្ថភាពអាចឱ្យយន្តហោះខ្នាតធំៗឆ្លងទ្វីបចុះចតបាន។ ហេតុនេះក្រោយបញ្ចប់ការសាងសង់ និងដាក់ឱ្យដំណើរការ ភ្ញៀវទេសចរ និងអ្នកវិនិយោគទាំងអស់នឹងកាន់តែមានភាពងាយស្រួលក្នុងការចូលមកកាន់ប្រទេសកម្ពុជា៕
