COVID-19៖ រកឃើញអ្នកឆ្លងមេរោគ 2ករណីទៀតហើយ សរុប 93ករណី

ថ្លែងក្នុងពិធីជួបសំណេះសំណាលជាមួយក្រុមគ្រូពេទ្យសម្តេចតេជោដើម្បីប្រយុទ្ធប្រឆាំងនឹងជំងឺកូវីដ-19 នាព្រឹកថ្ងៃទី25 ខែមីនា នេះ សម្តេចតេជោ ហ៊ុន សែន បានប្រកាសថា អ្នកជំងឺកូវីដនៅក្នុងប្រទេសកម្ពុជាយើង បានកើនឡើងដល់ 93នាក់ ហើយ គិតត្រឹមព្រឹកថ្ងៃទី25 មីនា នេះ ដោយសារតែរកឃើញជនជាតិបារាំង 2នាក់ ទៀតបានឆ្លងមេរោគនេះ នៅខេត្ត ព្រះសីហនុ តែយើងបានព្យាបាលឱ្យជាសះស្បើយបានចំនួន 6ករណី។

សម្តេចតេជោ ហ៊ុន សែន បញ្ជាក់ថា នៅព្រឹកមិញនេះ អភិបាលខេត្តព្រះសីហនុ បានរាយការណ៍មកថា មានជនជាតិបារាំង 2នាក់ទៀត ត្រូវបានរកឃើញថា កើតជំងឺកូវីដ-19 ដែលនាំឱ្យចំនួនអ្នកជំងឺកូវីដ-19 កើតមានសរុបនៅកម្ពុជាយើង កើនឡើងដល់ 93នាក់ ខណៈដែលតួលេខរបស់ក្រសួងសុខាភិបាល មានត្រឹម 91នាក់ គិតត្រឹមយប់ថ្ងៃទី24មីនា(ម្សិលមិញ)៕