ភ្លេចខ្លួនតែមួយភ្លែត រដូវក្ដៅក៏ឈានចូលមកដល់ជាថ្មីម្ដងទៀត ហើយឆ្នាំនេះមើលទំនងដូចជារាងក្ដៅជាងឆ្នាំមុនៗទៀតផង តែរដូវក្ដៅបែបនេះ ក៏ជាហាយឡាយនៃការធ្វើដំណើរទេសចរណ៍កម្សាន្តទៅក្រៅប្រទេសក្បែរៗប្រទេសយើងដែរ ជាពិសេស 6ខ្សែផ្លូវក្នុងទ្វីបអាស៊ីដែល ឡារ៉ែននឹងនាំទៅស្គាល់ក្នុងពេលនេះតែម្ដង។ ដូច្នេះយើងនាំគ្នាមកមើលថា តើរដូវក្ដៅនេះយើងគួរទៅដើរលេងនៅប្រទេសណាល្អ? ធានាថា លោកអ្នកនឹងរកឃើញចម្លើយមិនខាន។
1 . ទៅមើលផ្ការីកៈ ទស្សនាបុណ្យបាញ់កាំជ្រួចប្រចាំឆ្នាំនៅប្រទេសជប៉ុន
ចាប់ផ្ដើមដំណើរផ្លូវទេសចរណ៍ដ៏កំពូលល្បីល្បាញលំដាប់ជួរមុខគេក្នុងទ្វីបអាស៊ីបែបសប្បាយៗ ទស្សនាធម្មជាតិនៅក្នុងប្រទេសជប៉ុនមុនគេតែម្ដង ដែលក្រៅពីផ្កាសាគុរ៉ា ទឹកកកព្រឹល និងស្លឹកឈើប្រែពណ៌ដែលស្រស់ស្អាតទាក់ទាញអារម្មណ៍ហើយនោះ រដូវក្ដៅរបស់ប្រទេសជប៉ុនក៏មានហាយឡាយល្អៗដែលអ្នកទេសចរគួរតែបានទៅប៉ះពាល់ឱ្យបានមួយដងផងដែរ នោះគឺ ការដើេទស្សនាចម្ការបុប្ផាពណ៌ស្រស់ស្អាត ហ្នឹងឯង។
ក្រៅពីទស្សនាវាលចម្ការផ្កាដ៏ស្អាតៗហើយ រដូវក្ដៅនៅប្រទេសជប៉ុននៅមានពិធីបុណ្យប្រចាំឆ្នាំផងដែរ ជាពិសេស ពិធីបុណ្យបាញ់កាំជ្រួច ដោយពិធីនេះនឹងរៀបចំឡើងទូទាំងប្រទេសជប៉ុនតែម្ដង អ្នកណាដែលបានទៅលេងក្នុងអំឡុងពេលនេះ មិនថាធ្វើដំណើរទៅកាន់ទីណា ក៏នឹងបានរំភើបជាប់ចិត្តជាមួយការបាញ់កាំជ្រួចក្នុងពេលរាត្រីដែលស្រស់ល្អត្រកាលមិនដូចគេជាច្រើន។ ដូច្នេះបើមាននរណាសួរថា រដូវក្ដៅឆ្នាំនេះទៅលេងប្រទេសណាល្អ? ដំណើរទេសចរណ៍នៅប្រទេសជប៉ុន គឺជាជម្រើសមួយដែលមិនគួរខកខានឡើយ។
2 . ប្រឡូកក្នុងសួនទឹកកម្សាន្ត និងដើរទិញអីវ៉ាន់រដូវក្ដៅនៅប្រទេសកូរ៉េ
ដំណើរផ្លូវបន្តទៀត អ្នកណាដែលចង់សប្បាយរីករាយជាមួយការលេងកម្សាន្តបែបត្រជាក់ៗ ត្រូវទៅប្រទេសកូរ៉េ។ រដូវក្ដៅនៅប្រទេសកូរ៉េ អ្នកណាថាគ្មានអ្វីគួរឱ្យទៅលេងនោះ សូមប្រាប់ទៅចុះថា គិតខុសហើយ ព្រោះនៅមានទីកន្លែងកម្សាន្តដ៏គួរឱ្យចាប់អារម្មណ៍ជាច្រើនកំពុងរង់ចាំលោកអ្នក មានដូចជា សួនទឹកកម្សាន្តដែលបើកបម្រើសេវាកម្មចំពោះតែរដូវក្ដៅប៉ុណ្ណោះ គឺសួនទឹក Caribean Bay ដែលនៅជាប់នឹងសួនកម្សាន្តដ៏ល្បីល្បាញ Everland ឬក៏ Onemount Water Park ដែលជាសួនទឹកដ៏ធំដែលចែកចេញជាផ្នែកៗ និងឧបករណ៍លេងកម្សាន្តជាច្រើន ធានាថានឹងសប្បាយ និងបាត់ក្ដៅតែម្ដង។
ក្រៅពីនេះ ដំណើរទេសចរណ៍ក្នុងប្រទេសកូរ៉េក្នុងរដូវក្ដៅថែមទាំងត្រូវចិត្តនារីៗអ្នកដើរទិញទំនិញទៀតផង ព្រោះមានទំនិញហ្វាស្សិនរដូវក្ដៅជាច្រើនឱ្យជ្រើសរើសទិញ ទាំងខោអាវ គ្រឿងអលង្ការ រួមទាំងគ្រឿងសម្អាង តម្លៃមិនថ្លៃ ដែលអាចម៉ៅទិញមកស្លៀកនៅស្រុកយើងបានយ៉ាងសប្បាយ ហើយបើរឹតតែទៅដើរនៅតំបន់យុវវ័យដ៏ពេញនិយម ដូចជា អ៊ីហ្វា ហុងឌែ ឬម្យ៉ង់ដុង ផងនោះ មានតែរបស់ស្អាត ល្អៗដែលនាំឱ្យលោកអ្នកអស់លុយអស់កាក់បានយ៉ាងងាយ។
3 . ទៅលេងកោះសប្បាយៗ ទស្សនាសិល្បៈនៅ បាលី
អ្នកណាដែលចូលចិត្តដំណើរកម្សាន្តបែបសប្បាយៗ មានទស្សនីយភាពធម្មជាតិស្អាតៗឱ្យថតរូបនោះ ដំណើរទេសចរណ៍កម្សាន្តក្រៅប្រទេសនារដូវក្ដៅដែលមិនអាចខកខានបាននោះគឺ កោះបាលី ប្រទេសឥណ្ឌូនេស៊ី។ បាលីជាកោះដ៏លេចធ្លោក្នុងផ្នែកសិល្បៈវប្បធម៌ និងស្ថាបត្យកម្មដ៏ស្រស់ស្អាត មានមន្តស្នេហ៍ទាក់ទាញចិត្តជាឯកលក្ខណៈដោយឡែកពីគេ។
សិល្បៈប្រពៃណីរបស់បាលី ជាសិល្បៈបែបលាយផ្សំដែលកើតចេញពីការផ្គុំបញ្ចូលគ្នានៃវប្បធម៌ប្រពៃណីដ៏ច្រើនសម្បូរបែប ទើបមានឯកលក្ខណៈ និងមិនដូចអ្នកណា ទាំងរឿងរូបគំនូរ ម៉ូដក្រណាត់ជនជាតិក្នុងតំបន់ ការសម្ដែង និងស្ថាបត្យកម្មដែលអ្នកទេសចរអាចមើលឃើញនៅតាមតំបន់ទេសចរណ៍ផ្សេងៗនៅលើកោះបាលី ដូចជា របាំបាលីនៅឯ ពុរ៉ាសារ៉ៈវ៉ាទី ស្ថាបត្យកម្មដ៏ល្បីល្បាញនៅវត្ត បេសាគីហ៍ វត្តដែលស័ក្តិសិទ្ធិបំផុត និងស្អាតបំផុតរបស់បាលី ជាដើម។
អ្នកណាដែលឈ្លក់វង្វេងនឹងសិល្បៈប្រពៃណីបុរាណ និងចង់សម្រាកលម្ហែក្នុងទីកន្លែងដ៏មានមន្តស្នេហ៍ធម្មជាតិ ត្រូវទៅកោះបាលីឱ្យបានម្ដង កុំខកខានឱ្យ ជាពិសេសនៅរដូវក្ដៅនេះតែម្ដង៕
