Nanette Cocero ដែលជាមេដឹកនាំមួយរូបរបស់ក្រុមហ៊ុនផលិតឱកាស Pfizer យល់ថា «ជំងឺរាតត្បាតសកល» កូវីដ-១៩ នឹងក្លាយជា «ជំងឺរាតត្បាតអសកល» (ឬហៅថា ជំងឺរាតត្បាតថ្នាក់តំបន់» ដូចទៅនឹងជំងឺគ្រុនផ្ដាសាយធំ ចាប់ពីឆ្នាំ ២០២៤។
ការអះអាងនេះត្រូវបាន Cocero ប្រធានសកលនៃក្រុមហ៊ុន Pfizer Vaccines ដែលជាបុត្រសម្ព័ន្ធរបស់ក្រុមហ៊ុនឱសថ Pfizer របស់ សហរដ្ឋអាម៉េរិក លើកឡើងកាលពីថ្ងៃទី ១៧ ធ្នូ ក្នុងកិច្ចពិភាក្សាជាមួយក្រុមអ្នកវិនិយោគ។ Cocero គឺជាអ្នកទទួលខុសត្រូវលើការអភិវឌ្ឍ ការចែកចាយវ៉ាក់សាំងរបស់ Pfizer នៅទូទាំងពិភពលោក។
យោងតាមក្រុមអ្នកវិទ្យាសាស្ត្រ កូវីដ-១៩ នឹងក្លាយជាជំងឺរាតត្បាតអសកល នៅពេលសមត្ថភាពនៃការការពាររាងកាយរបស់មនុស្ស ដែលកើតឡើងដោយសារការចាក់វ៉ាក់សាំង ឬបន្ទាប់ពីបានជាពីជំងឺកូវីដ-១៩ របស់ប្រជាជនពិភពលោក មានទំហំធំគ្រប់គ្រាន់ដើម្បីគ្រប់គ្រងស្ថានការណ៍ឆ្លងរាលដាល ការចូលពេទ្យ និងការស្លាប់ សូម្បីតែនៅក្នុងគ្រាដែលវីរុសនេះបន្តឆ្លង។
«ប្រការនេះកើតឡើងនៅពេលណា និងរបៀបណាគឺ អាស្រ័យទៅលើស្ថានការណ៍ប្រែប្រួលរបស់ជំងឺរាតត្បាត និងកម្រិតប្រសិទ្ធភាពនៃការដាក់ឱ្យប្រើប្រាស់វ៉ាក់សាំង រួមនឹងថ្នាំព្យាបាល ក៏ដូចជាការបែងចែកវ៉ាក់សាំងដោយស្មើភាពគ្នា ចំពោះតំបន់ដែលមានអត្រាចាក់វ៉ាក់សាំងទាប» Mikael Dolsten ប្រធានផ្នែកវិទ្យាសាស្ត្ររបស់ Pfizer ឱ្យដឹងដូច្នេះ។
លោក Mikael Dolsten បន្ថែមថា «បណ្ដាវីរុសបំប្លែងខ្លួនថ្មីដែលទើបបង្ហាញវត្តមានក៏ជះឥទ្ធិពលដល់វិវត្តន៍របស់រោគរាតត្បាតសកល»។
យោងតាមលោក Dolsten ពេលវេលាដែល កូវីដ-១៩ ប្រែក្លាយទៅជាជំងឺរាតត្បាតអសកល អាចប្រែប្រួលទៅតាមតំបន់។
ការជឿជាក់របស់ក្រុមមេដឹកនាំនៃក្រុមហ៊ុន Pfizer ត្រូវបានលើកឡើងក្នុងគ្រាដែល សហរដ្ឋអាម៉េរិក និងប្រទេសជាច្រើន កំពុងប្រឈមនឹងរលកនៃការឆ្លងរាលដាលខ្លាំងរបស់ជំងឺកូវីដ-១៩ ដោយសារតែ វ៉ារ្យ៉ង់ ដេលតា (Delta) និងការព្រួយបារម្ភអំពី អូមីក្រុង (Omicron)។
វ៉ាក់សាំង និងមធ្យោបាយព្យាបាលនានា ដូចជាថ្នាំប្រឆាំងវីរុស របស់ Pfizer នឹងត្រូវបានគេប្រើប្រាស់ច្រើនជាងបច្ចុប្បន្ន នៅពេល កូវីដ-១៩ ក្លាយជាជំងឺរាតត្បាតអសកល។ នេះបើតាមការអះអាងរបស់អ្នកស្រី Angela Hwang ប្រធានក្រុមហ៊ុន Pfizer Biopharmaceuticals Group៕
