(ភ្នំពេញ)៖ វ៉ាក់សាំងបង្ការវីរុស COVID-19 ចំនួន 1 លានដូស ជាជំនួយរបស់ប្រទេស ជប៉ុន ដែលនឹងមកដល់ កម្ពុជា នៅថ្ងៃទី 23 កក្កដា ឆ្នាំ 2021 នឹងត្រូវបាន សម្ដេចតេជោ ហ៊ុន សែន អញ្ជើញទៅទទួលដោយផ្ទាល់។
កាលពីថ្ងៃទី 13 ខែកក្កដា ឆ្នាំ 2021 រាជរដ្ឋាភិបាលជប៉ុន បានប្រកាសផ្តល់ជំនួយជាវ៉ាក់សាំង AstraZeneca ចំនួន 1 លានដូស ដល់រាជរដ្ឋាភិបាល និងប្រជាជនកម្ពុជា ដើម្បីជួយប្រយុទ្ធប្រឆាំងនឹង COVID-19។
ឯកអគ្គរាជទូត ជប៉ុន ប្រចាំ កម្ពុជា លោក MIKAMI Masahiro បានបញ្ជាក់ថា វ៉ាក់សាំង AstraZeneca ដែលត្រូវបានផ្តល់អាជ្ញាបណ្ណផលិតក្នុងប្រទេសជប៉ុន នឹងត្រូវបានដឹកជញ្ជូនមកដល់រាជធានីភ្នំពេញ បន្ទាប់ពីការរៀបចំភ័ស្តុភារដោយ COVAX Facility បានបញ្ចប់។
គិតមកដល់បច្ចុប្បន្ន រាជរដ្ឋាភិបាល ជប៉ុន បានផ្ដល់ជំនួយជាច្រើនដល់ កម្ពុជា ទាក់ទងនឹងការប្រយុទ្ធប្រឆាំងនឹង COVID-19 ក្នុងនោះមានដូចជា បរិក្ខារពេទ្យ ការកែលម្អមន្ទីរពេទ្យ ការគាំទ្រដល់គម្រោងរបស់អង្គការអន្តរជាតិនានាសម្រាប់វិធានការទប់ស្កាត់ការចម្លងជំងឺតាមព្រំដែន ក៏ដូចជាការផ្ដល់បរិក្ខារសម្រាប់ដឹកជញ្ជូន និងរក្សាទុកវ៉ាក់សាំងឱ្យបានត្រឹមត្រូវជាដើម ដែលសរុបជាទឹកប្រាក់ ស្មើនឹងជាង 50 លានដុល្លារអាមេរិក។
ជាងនេះ ជប៉ុន ក៏បានផ្ដល់ប្រាក់កម្ចីប្រមាណ 227 លានដុល្លារអាមេរិក ដល់ កម្ពុជា ផងដែរ សម្រាប់ចាត់ចែកក្នុងកម្មវិធីឧបត្ថម្ភថវិកាដល់ពលរដ្ឋរងផលប៉ះពាល់ដោយសារ COVID-19 និងសម្រាប់កែលម្អប្រព័ន្ធសុខាភិបាល។ នេះបើតាម លោក MIKAMI Masahiro។
កន្លងមក កម្ពុជាទទួលបានជំនួយជាវ៉ាក់សាំងបង្ការវីរុស COVID-19 សរុបចំនួន 2,524,000 ដូស ពីអន្តរជាតិ ក្នុងនោះមានជំនួយពី ប្រទេសចិន ចំនួន 2,200,000 ដូស និងពីយន្តការ COVAX ចំនួន 324,000 ដូស។
