សភាជាន់ទាបអាមេរិកាំងបានអនុម័តលើសេចក្ដីព្រាងច្បាប់មួយដែលបើកផ្លូវឱ្យរដ្ឋាភិបាលដាក់ទណ្ឌកម្មលើមន្ត្រីចិនដែលមានជាប់ទាក់ទិននឹងអំពើកៀបសង្កត់ទៅលើជនជាតិអ៊ុយហ្គួរ (Uyghur) កាន់សាសនាឥស្លាម ដែលកំពុងរស់នៅក្នុងតំបន់ស៊ីនជាំង(XinJiang) ប្រទេសចិន។
សេចក្ដីព្រាងច្បាប់ “គោលនយោបាយសិទ្ធិមនុស្សរបស់ជនជាតិអ៊ុយហ្គួរ” នេះ ត្រូវបានសភាជាន់ទាបអាមេរិកាំងអនុម័តកាលពីម្សិលមិញ(27ឧសភា) ដោយមានឆ្នោតគាំទ្រចំនួន413សម្លេង និងបដិសេធ1សម្លេង។ ដោយសារតែទទួលបានការអនុម័តយល់ព្រមរួចរាល់ពីសភាជាន់ខ្ពស់ ដូច្នេះសេចក្ដីព្រាងច្បាប់នេះនឹងត្រូវបញ្ជូនទៅកាន់ការិយាល័យប្រធានាធិបតីអាមេរិកាំង ដើម្បីធ្វើការសម្រេចចិត្តចុងក្រោយ។
សេចក្ដីព្រាងច្បាប់នេះ តម្រូវឱ្យសេតវិមានបញ្ជូនរបាយការណ៍ឡើងទៅសភាក្នុងរយៈពេលយ៉ាងយូរ180ថ្ងៃ ដើម្បីកំណត់អត្តសញ្ញាណអ្នកទាំងឡាយណាដែលត្រូវបានចាត់ទុកថាជាអ្នកទទួលខុសត្រូវចំពោះអំពើរំលោភសិទ្ធិមនុស្សទៅលើជនជាតិអ៊ុយហ្គួរ។ អ្នកទទួលខុសត្រូវទាំងនោះនឹងត្រូវបានដាក់ទណ្ឌកម្មតាមរយៈការបង្កកទ្រព្យសម្បត្តិនៅសហរដ្ឋអាមេរិក និងការហាមមិនឱ្យចូលទឹកដីសហរដ្ឋអាមេរិកជាដើម។
អង្គការសហប្រជាជាតិបានរកឃើញថា ជនជាតិអ៊ុយហ្គួរកាន់សាសនាឥស្លាមប្រមាណជាជាង1លាននាក់ត្រូវបានអាជ្ញាធរចិនចាប់ខ្លួន និងបញ្ជូនទៅកាន់ជំរំកែប្រែ ប៉ុន្តែចិនបានច្រានចោលរបាយការណ៍នេះ៕
ប្រភព៖ សារព័ត៌មានបរទេស
