តំណាងរាស្ត្រជាង200នាក់មកពីប្រទេសចំនួន23ក្នុងពិភពលោក បានចេញសេចក្ដីប្រកាសរួម ថ្កោលទោសរដ្ឋាភិបាលចិនដែលបានធ្វើសេចក្ដីព្រាងច្បាប់សន្តិសុខហុងកុង ខណៈដែលពលរដ្ឋរាប់ពាន់នាក់នៅទីក្រុងនេះនាំគ្នាចេញតវ៉ា។
នៅក្នុងសេចក្ដីប្រកាសរួមមួយកាលពីម្សិលមិញ ក្រុមតំណាងរាស្ត្របានសម្ដែងការព្រួយបារម្ភយ៉ាងជ្រាលជ្រៅចំពោះការដែលទីក្រុងប៉េកាំង “ស្នើឱ្យមានច្បាប់សន្តិសុខដោយឯកតោភាគី” សម្រាប់ទីក្រុងហុងកុង។ “នេះគឺជាការវាយលុកគ្រប់ច្រកល្ហកទៅលើសិទ្ធិគ្រប់គ្រងដោយស្វ័យភាព និងសេរីភាពជាមូលដ្ឋានរបស់ទីក្រុង។ សុចរិតភាពនៃ “ប្រទេសមួយ របបពីរ” កំពុងត្រូវបានគំរាមកំហែង”។
តំណាងរាស្ត្រដែលបានចូលរួមចុះហត្ថលេខាលើសេចក្ដីប្រកាសថ្កោលទោសខាងលើ រួមមាន Chris Patten(អភិបាលក្រុងជនជាតិអង់គ្លេសចុងក្រោយរបស់ទីក្រុងហុងកុង) Malcolm Rifkind(អតីតរដ្ឋមន្ត្រីការបរទេសអង់គ្លេស) ក្រុមតំណាងរាស្ត្រមកពីសភាអាមេរិកាំង ក្រុមតំណាងរាស្ត្រអង់គ្លេស ក៏ដូចជាក្រុមតំណាងរាស្ត្រមកពីអឺរ៉ុប នូវែលហ្សេឡង់កាណាដា អូស្ត្រាលី ឥណ្ឌា ឥណ្ឌូនេស៊ី កូរ៉េខាងត្បូង និងម៉ាឡេស៊ី។
Elsie Leung Oi-sie អនុប្រធានគណៈកម្មធិការច្បាប់រដ្ឋធម្មនុញ្ញហុងកុង បានច្រានចោលការរិះគន់ ក៏ដូចជាការប្រកាសថ្កោលទោសពីសំណាក់ក្រុមតំណាងរាស្ត្របរទេស។ លោកស្រីបានឱ្យដឹងថា សិទ្ធិគ្រប់គ្រងដោយស្វ័យភាពរបស់ទីក្រុងហុងកុងនឹងមិនមានការប្ដូរផ្លាស់អ្វីនោះទេ ហើយវាត្រូវបានការពារដោយច្បាប់មូលដ្ឋានដែលជាច្បាប់កំពូលរបស់ទីក្រុងនេះ។
ចំណែកឧបនាយករដ្ឋមន្ត្រីចិន លោក Han Zheng ក៏បានថ្លែងសង្កត់ធ្ងន់ថា ច្បាប់សន្តិសុខថ្មីនេះនឹងផ្ដោតទៅលើតែ “មនុស្សមួយក្ដាប់តូច” ប៉ុណ្ណោះ ដើម្បីបិទប្រហោងតូចមួយនៃច្បាប់ដែលកើតមានឡើងក្រោយបាតុកម្មផ្ទុះឡើងនៅហុងកុងកាលពីឆ្នាំមុន។
សូមរំឭកថា ច្បាប់សន្តិសុខហុងកុងត្រូវបានស្នើឡើងរដ្ឋសភាចិនកាលពីថ្ងៃទី22ឧសភា ក្នុងនោះមានការហាមមិនឱ្យមានសកម្មភាពផ្ដាច់ខ្លួន និងរដ្ឋប្រហារ ក៏ដូចជាការជ្រៀតជ្រែកពីបរទេស និងភេរវកម្មក្នុងទីក្រុង។
យោងតាមកិច្ចព្រមព្រៀងដែលត្រូវបានធ្វើឡើងនៅពេលអង់គ្លេសប្រគល់ហុងកុងទៅឱ្យប្រទេសវិញកាលពីឆ្នាំ1997 ហុងកុងទទួលបានសិទ្ធិគ្រប់គ្រងដោយស្វ័យភាពខ្ពស់ ចំណេកសិទ្ធិសេរីភាព ប្រព័ន្ធច្បាប់ និងប្រព័ន្ធគ្រប់គ្រងពាណិជ្ជកម្មក៏មានដោយឡែក។
តំណាងរាស្ត្រហុងកុងមួយចំនួនក៏បានរិះគន់ទៅលើច្បាប់ខាងលើផងដែរ ដោយពួកគេយល់ថា វាដើរផ្ទុយទៅនឹងគោលការណ៍ “ប្រទេសមួយ របបពីរ” ដែលប្រទេសចិនបានសន្យាថា នឹងរក្សាសិទ្ធិសេរីភាពរបស់ទីក្រុងហុងកុង។
ទាក់ទិននឹងច្បាប់ខាងលើនេះដែរ នៅទីក្រុងហុងកុងកាលពីម្សិលមិញ មានមនុស្សរាប់ពាន់នាក់បានចេញធ្វើបាតុកម្មដើម្បីប្រឆាំងទៅនឹងច្បាប់នេះ។ បាតុករបានប៉ះទង្គិចជាមួយកងកម្លាំងប៉ូលិស។ ក្រុមសមត្ថកិច្ចបានប្រើប្រាស់គ្រាប់បែកផ្សែងបង្ហូរទឹកភ្នែក និងបាញ់ទិកបំបែកហ្វូងបាតុករ៕
ប្រភព៖ សារព័ត៌មានបរទេស
