ណាតូ (NATO) នាថ្ងៃទី 04 មេសា 2023 បានទទួលយកប្រទេសហ្វាំងឡង់ជាសមាជិកទី 31 របស់សម្ព័ន្ធយោធា។
កាលពីថ្ងៃទី 04 មេសា រដ្ឋមន្ត្រីក្រសួងការបរទេសហ្វាំងឡង់ Pekka Haavisto បានប្រគល់ឯកសារយល់ព្រមចូលជាសមាជិកណាតូ ទៅឱ្យសមភាគីអាម៉េរិក Antony Blinken នៅឯទីស្នាក់ការកណ្ដាលរបស់សម្ព័ន្ធយោធានេះនាទីក្រុងព្រុចសែល ប្រទេសបែលហ្ស៊ិក ក្រោមវត្តមានរបស់អគ្គលេខាធិការ Jens Stotenberg។ «ដោយការទទួលឯកសារចូលជាសមាជិក យើងប្រកាសថា ហ្វាំងឡង់គឺជាសមាជិកទី 31 របស់អង្គការនៃសន្ធិសញ្ញាអាត្លង់ទិចខាងជើង» លោក Blinken ថ្លែងដូច្នេះ។
ចំណែកអគ្គលេខាធិការណាតូ លោក Stoltenberg ក៏បានប្រកាសស្វាគមន៍ហ្វាំងឡង់ដែលបានចូលជាសមាជិករបស់សម្ព័ន្ធយោធា។ លោក Stoltenberg ថ្លែងថា ប្រធានាធិបតីរុស្ស៊ី វ្ល៉ាឌីមៀ ពូទីន ចង់បិទខ្ទប់ច្រកទ្វាររបស់ណាតូ ប៉ុន្តែបានបរាជ័យ។ «ពេលនេះ ហ្វាំងឡង់មានមិត្តភ័ក្តិជាសម្ព័ន្ធមិត្តដែលខ្លាំងក្លាបំផុតលើពិភពលោក»។
ដូចទៅនឹងសមាជិកដទៃទៀតរបស់ណាតូ ហ្វាំងឡង់ ចាប់ពីពេលនេះតទៅត្រូវបានការពារដោយមាត្រាទី 5 ដែលជាគោលនយោបាយការពារជាក្រុមរបស់សម្ព័ន្ធមិត្ត នៅពេលសមាជិកណាមួយត្រូវបានវាយប្រហារ។ ទន្ទឹមនឹងនេះ ហ្វាំងឡង់ក៏ត្រូវត្រៀមខ្លួនសម្រាប់ការការពារសមាជិកដទៃរបស់សម្ព័ន្ធយោធានេះផងដែរ។
ណាតូលើកទង់បញ្ចូលហ្វាំងឡង់ជាសមាជិកទី 31
បណ្ដាប្រទេសជាសមាជិកណាតូ បានអបអរសាទរចំពោះសមាជិកថ្មី ខណៈដែលក្រសួងការបរទេសរុស្ស៊ីឱ្យដឹងថា ហ្វាំងឡង់បានបង្កកំហុសដ៏គ្រោះថ្នាក់ ហើយថា ទំនាក់ទំនងទ្វេភាគីនឹងរងផលវិបាកធ្ងន់ធ្ងរ។
រុស្ស៊ី និងហ្វាំងឡង់មានព្រំដែនជាប់គ្នាប្រវែងប្រហែល 1,300 គីឡូម៉ែត្រ។ ទីក្រុងមូស្គូ មុននោះបានប្រកាសថា នឹងបង្កើនវត្តមានទ័ពនៅតំបន់ភាគខាងលិច និងពាយព្យ ជាប់ព្រំដែនជាមួយហ្វាំងឡង់។
ហ្វាំងឡង់ និងស៊ុយអែត កាលពីខែឧសភា 2022 បានដាក់ពាក្យសុំចូលជាសមាជិកណាតូ។ បច្ចុប្បន្ន ស៊ុយអែតនៅជួបឧបសគ្គពីតួកគី និងហុងគ្រី ក្នុងការចូលជាសមាជិកសម្ព័ន្ធយោធានេះ ព្រោះតែបញ្ហាដែលទាក់ទិននឹងប្រទេសទាំងនេះ៕
