ប្រទេសថៃ ទើបតែបានដាក់ឱ្យអនុវត្តច្បាប់ស្ដីពីប្រសិទ្ធភាពអេឡិចត្រូវនិចរបស់ស្ថាប័នរដ្ឋ ដោយសង្ឃឹមថានឹងជំរុញបណ្ដាស្ថាប័នរដ្ឋក្នុងការអនុវត្តដំណើរការអេឡិចត្រូនិចទៅតាមគោលនយោបាយឌីជីថលរបស់រាជរដ្ឋាភិបាល។
យោងតាមប្រភពព័ត៌មានពី បាងកក រាជរដ្ឋាភិបាលនៃប្រទេសថៃ ទើបតែបានដាក់ឱ្យប្រើប្រាស់ច្បាប់ថ្មីមួយដែលមានឈ្មោះថា ច្បាប់ស្ដីពីប្រសិទ្ធភាពអេឡិចត្រូនិចរបស់រដ្ឋបាល ដើម្បីជាការអនុវត្តទៅតាមគោលនយោបាយឌីជីថលរបស់រាជរដ្ឋាភិបាលប្រទេសនេះ។
កាលពីថ្ងៃទី ១៣ តុលា អ្នកនាំពាក្យរងរបស់ រាជរដ្ឋាភិបាលថៃ លោកស្រី Trisulee Trisaranakul បានឱ្យដឹងថា ពលរដ្ឋថៃ នឹងមិនចាំបាច់បង្ហាញអត្តសញ្ញាណប័ណ្ណ ឬសៀវភៅគ្រួសារថតចម្លងដើម្បីទទួលសេវាកម្មពីស្ថាប័នរដ្ឋាភិបាល បន្ទាប់ពីច្បាប់ថ្មីត្រូវបានប្រកាសលើសារាចរ និងមានសុពលភាពចាប់ពីថ្ងៃទី ១២ តុលា ២០២២។
លោកស្រី Trisaranakul សង្កត់ធ្ងន់ថា ឥរិយាបថនេះគឺដើម្បីជំរុញឱ្យបណ្ដាស្ថាប័នរដ្ឋប្រើប្រាស់យន្តការអេឡិចត្រូនិចដើម្បីផ្ដល់សេវាកម្មដល់ប្រជាពលរដ្ឋឱ្យបានសមស្របទៅនឹងទិសដៅរបស់ រាជរដ្ឋាភិបាលថៃ ក្នុងការប្រើប្រាស់ថ្នាលឌីជីថល និងការកែទម្រង់រដ្ឋបាល។
ក៏ប៉ុន្តែ លោកស្រី Trisaranakul បញ្ជាក់ថា ស្ថាប័នដែលស្ថិតក្នុងក្រសួងយុត្តិធម៌ ក៏ដូចជាបណ្ដាអង្គការឯករាជ្យ និងបណ្ដាស្ថាប័នរបស់ការិយាល័យគណៈមេធាវី នឹងមិនស្ថិតក្នុងក្របខណ្ឌនៃច្បាប់ថ្មីនេះ។
យោងតាមច្បាប់ថ្មីនេះ ស្ថាប័នរដ្ឋាភិបាលត្រូវផ្ដល់ព័ត៌មានអំពីគេហទំព័រដើម្បីឱ្យប្រជាពលរដ្ឋអាចទាក់ទង និងកំណត់យកសេវាកម្មដែលត្រូវគេត្រូវការ។ ទន្ទឹមនឹងនេះ ស្ថាប័នរដ្ឋក៏ត្រូវមានថ្នាលបច្ចេកវិទ្យាមួយដើម្បីទាក់ទងនឹងគ្នាផងដែរ។
ស្ថាប័នរដ្ឋដែលស្ថិតក្រោមក្របខណ្ឌនៃច្បាប់ថ្មីនេះ ត្រូវតភ្ជាប់ និងការពារទិន្នន័យលើថ្នាលបច្ចេកវិទ្យាដែលស្ថិតក្នុងដែនសមត្ថកិច្ចរបស់ខ្លួន ដើម្បីផ្ដល់សេវាកម្មដល់ប្រជាពលរដ្ឋឱ្យបានឆាប់រហ័ស មានប្រសិទ្ធភាព និង សុវត្ថិភាពទិន្នន័យ៕
