អង្គភាពស៊ើបការណ៍សម្ងាត់អាម៉េរិក បានចំណាយពេលច្រើនខែដើម្បីកំណត់អត្តសញ្ញាណ និងគោលការណ៍ធ្វើសកម្មភាព al-Zawahhiri ដែលជាមេដឹកនាំអង្គការភារវកម្ម al-Qaeda មុនពេលបើកការវាយប្រហារតាមអាកាសនៅ អាហ្វហ្គានីស្ថាន។
កងកម្លាំងសហរដ្ឋអាម៉េរិក បានបើកការវាយប្រហារតាមអាកាសនៅ រដ្ឋធានីកាប៊ុល របស់ អាហ្វហ្គានីស្ថាន កាលពីថ្ងៃទី ៣១ កក្កដា និងបានកម្ចាត់មេដឹកនាំ al-Qaeda ឈ្មោះ Ayman al-Zawahiri ដោយជោគជ័យ ទៅតាមបទបញ្ជារបស់លោក ចូ បៃដិន។ មន្ត្រីជាន់ខ្ពស់របស់ រដ្ឋាភិបាលអាម៉េរិក មុននោះបាននិយាយថា យុទ្ធនាការវាយប្រហារពីអាកាសនេះ ត្រូវបានធ្វើឡើងដោយ ទីភ្នាក់ងារស៊ើបការណ៍សម្ងាត់អាម៉េរិក (CIA) និងមិនបានបង្កការស្លាប់ ឬរបួសដល់ជនស៊ីវិល។
កាលពីវេលាទៀបភ្លឺ នៃថ្ងៃទី ៣១ ខែកក្កដា ឆ្នាំ ២០២២ យន្តហោះគ្មានមនុស្សបើក (UAV) របស់ សហរដ្ឋអាម៉េរិក បានបាញ់រ៉ុក្កែត Hellfire ២ គ្រាប់ ក្នុងគ្រា al-Zawahiri ចេញមកកាន់រានហាលរបស់ផ្ទះដ៏មានសុវត្ថិភាព ដែលស្ថិតនៅក្នុង រដ្ឋធានីកាប៊ុល នៃ ប្រទេសអាហ្វហ្គានីស្ថាន ជាទីដែលមេដឹកនាំអង្គការភេរវកម្មនេះកំពុងរស់នៅជាមួយសមាជិកគ្រួសារ។
បន្ទាប់ពីរ៉ុក្កែតត្រូវបានបាញ់ចេញ សំឡេងផ្ទុះយ៉ាងធំក៏លាន់ឮចេញពីតំបន់ Shirpur នៅកណ្ដាល ក្រុងកាប៊ុល។ នេះគឺជាតំបន់ដែលធ្លាប់ត្រូវបានគ្រប់គ្រងដោយ ក្រសួងការពារជាតិអាហ្វហ្គានីស្ថាន មុនពេលត្រូវបានប្រែក្លាយទៅជាតំបន់លំនៅឋានដែលមានភូមិគ្រឹះជាច្រើនសម្រាប់ក្រុមមន្ត្រី និងអ្នកមាននៅប្រទេសនេះ។
ភ្នាក់ងារស៊ើបការណ៍សម្ងាត់អាម៉េរិក បានរកឃើញថា al-Zawahiri ស្ថិតនៅក្នុងផ្ទះនេះ ហើយក្រោយមកពួកគេចំណាយពេលច្រើនខែដើម្បីកំណត់អត្តសញ្ញាណ និងគោលការណ៍ធ្វើសកម្មភាពរបស់បុរសនេះ ក្នុងនោះក៏មានការតាមដានសកម្មភាពដើរហើរ និងការរស់នៅរបស់មេភេរវករនេះ។
រហូតដល់ខែមេសា ទីភ្នាក់ងារស៊ើបការណ៍សម្ងាត់អាម៉េរិក បានរាយការណ៍ប្រាប់ថ្នាក់លើថា al-Zawahiri កំពុងរស់នៅក្នុងផ្ទះនេះ និងមិនដែលចាកចេញពីទីជម្រក។ ប្រធានាធិបតី បៃដិន ទទួលបានរបាយការណ៍នេះក្នុងខែឧសភា និងមិថុនា។
CIA បានសង់ជាទម្រង់ផ្ទះរបស់មេភេរវករ នៅលើកុំព្យូទ័រ ដើម្បីបង្ហាញជូនប្រធានាធិបតីនូវយុទ្ធសាស្ត្រវាយប្រហារ ដែលអាចជួយកាត់បន្ថយការស្លាប់ចំពោះអ្នកនៅខាងក្នុងផ្ទះ និងពលរដ្ឋស៊ីវិល។
ចាប់ពីថ្ងៃទី ០១ ខែកក្កដាតមក លោក បៃដិន បានចូលរួមកិច្ចប្រជុំនៅ សេតវិមាន ជាមួយក្រុមមន្ត្រីជាន់ខ្ពស់អាម៉េរិក ដើម្បីពិភាក្សាអំពីករណីខាងលើ។ ក្រោយមក លោក បៃដិន ក៏បានអនុម័តលើផែនការវាយប្រហារ។
ក្រោយពីយន្តហោះគ្មានមនុស្សបើក បានបាញ់រ៉ុក្កែតសំដៅគោលដៅ ប្រភពព័ត៌មាននៅជុំវិញទីតាំងគោលដៅរបស់អង្គភាពស៊ើបការណ៍សម្ងាត់អាម៉េរិក បានបញ្ជាក់ថា al-Zawahiri ត្រូវបានសម្លាប់។
ក្រុមមន្ត្រីរបស់ អាម៉េរិក យល់ថា អាជ្ញាធរតាលីបង់ បានដឹងច្បាស់ថា al-Zawahiri រស់នៅក្នុងផ្ទះនេះ ហើយបានបញ្ចេញសកម្មភាពជាច្រើនដើម្បីលាក់បាំងដាន បន្ទាប់ពីករណីវាយប្រហារពី សហរដ្ឋអាម៉េរិក ត្រូវបានធ្វើឡើង៕
