បាក់​អគារ​នៅ លី​បង់ បណ្ដាលឱ្យមាន​មនុស្ស​ស្លាប់ និង​រងរបួស​ច្រើន​នាក់

អគារ​កម្ពស់ ៣ ជាន់​មួយកន្លែង នៅក្នុង​ទីក្រុង Tripoli ភាគ​ខាងជើង​នៃ ប្រទេស​លី​បង់ បាន​បាក់​​ភ្លាមៗ កាលពី​ថ្ងៃទី ២៦ មិថុនា ធ្វើឱ្យ​ក្មេង​ម្នាក់​បាត់បង់​ជីវិត និង​មនុស្ស​ច្រើន​នាក់​ផ្សេងទៀត​រងរបួស។

សារព័ត៌មាន​ក្នុងស្រុក​ឱ្យដឹងថា កម្លាំង​ជួយសង្គ្រោះ បាន​ទៅដល់​កន្លែងកើតហេតុ​ដើម្បី​ស្វែងរក​ជួយ​ជនរងគ្រោះ និង​ជម្លៀស​អ្នករងរបួស។

នាយករដ្ឋមន្ត្រី​របស់ លី​បង់ លោក Najib Mikati ចេញ​បញ្ជា​ឱ្យ​បណ្ដា​មន្ទីរពេទ្យ​ក្នុង​តំបន់ ញាប់ដៃ​ញាប់ជើង​ជួយ​ព្យាបាល​ជង​រងគ្រោះ។

បច្ចុប្បន្ន មូលហេតុ​ដែលនាំឱ្យ​កើតមាន​ហេតុការណ៍​ខាងលើ កំពុង​ត្រូវបាន​សមត្ថកិច្ច​ស៊ើបអង្កេត។