យុគសម័យសន្តិភាពនៅលោកខាងលិច រាប់ចាប់តាំងពីក្រោយសង្គ្រាមត្រជាក់ ទំនងជាអាចត្រូវបានបញ្ចប់ បន្ទាប់ពី រុស្ស៊ី ចូលឈ្លានពាន ប្រទេសអ៊ុយក្រែន។
ស្រមោលនៃអតីតសង្គ្រាមកំពុងងើបឡើងនៅ អឺរ៉ុប ក្រោយពី ប្រធានាធិបតីរុស្ស៊ី វ្លឌីមៀ ពូទីន កាលពីថ្ងៃទី ២៤ កុម្ភៈ បានប្រកាសបើកយុទ្ធនាការយោធាពិសេសនៅ អ៊ុយក្រែន។ លោក ពូទីន និយាយថា «មិនអាចមានអារម្មណ៍សុវត្ថិភាព មិនអាចរីកចម្រើន ឬនៅមានជីវិត ជាមួយនឹងការគំរាមកំហែងជាប្រចាំពី អ៊ុយក្រែន»។
មនុស្សជាង ១០០ នាក់ បានស្លាប់ និងជាង ៣០០ នាក់ រងរបួស បន្ទាប់ពី រុស្ស៊ី ចូលឈ្លានពាន អ៊ុយក្រែន បាន ១ ថ្ងៃ។ ទង្វើរបស់ រុស្ស៊ី នេះ កំពុងតែជះឥទ្ធិពលធំធេងដល់ពិភពលោក រួមមាន៖
ការបញ្ជូនទាហានបន្ថែមទៅកាន់ភាគខាងកើតរបស់ ណាតូ (NATO)
អង្គការសន្ធិសញ្ញាអាត្លង់ទិកខាងជើង (NATO) កាលពីថ្ងៃទី ២៤ កុម្ភៈ បានប្រកាសបញ្ជូនទ័ពជំនួយបន្ថែមទៀតទៅកាន់តំបន់ភាគខាងកើតនៃទឹកដីរបស់បណ្ដាប្រទេសក្នុងអង្គការណាតូ ដែលនៅក្បែរ អ៊ុយក្រែន។ ប៉ុន្តែ អាម៉េរិក ថា កម្លាំងរបស់ ណាតូ នេះ នឹងមិនចូលរួមធ្វើសង្គ្រាមនៅ អ៊ុយក្រែន នោះទេ តែគឺដើម្បីការពារ និងផ្ដល់ទំនុកចិត្តដល់សម្ព័ន្ធមិត្តរបស់ ណាតូ។ ទាហានអាម៉េរិក ប្រហែល ៨០០ នាក់, យន្តហោះចម្បាំង និងឧទ្ធម្ភាគចក្ររាប់សិបគ្រឿង ត្រូវបានបញ្ជូនពី អាល្លឺម៉ង់ ទៅកាន់តំបន់សមុទ្របាល់ទិក, ពី ក្រិក ទៅកាន់ ប៉ូឡូញ និងពី អាល្លឺម៉ង់ ទៅកាន់ លីទុយអានី, អេស្ដូនី និង រូម៉ានី។ បច្ចុប្បន្ន វត្តមានរបស់ កងទ័ពអាម៉េរិក នៅ អឺរ៉ុប បានកើនឡើងដល់ជិត ១ សែននាក់។
ការផ្ដល់ជំនួយដល់ អ៊ុយក្រែន
ក្រៅពីការដែល ណាតូ បញ្ជូនទ័ពបន្ថែមទៀតទៅកាន់ អឺរ៉ុប ប្រទេសរុស្ស៊ី ក៏កំពុងនាំឱ្យ អាម៉េរិក ធ្វើការគាំទ្រកាន់តែច្រើនដល់ អ៊ុយក្រែន ក្នុងមានទាំងការផ្គត់ផ្គង់អាវុធផងដែរ។ ជាងនេះទៀត ការឈ្លានពានរបស់ រុស្ស៊ី ទៅលើ ទឹកដីអ៊ុយក្រែន ក៏កំពុងធ្វើឱ្យមានការដាក់ទណ្ឌកម្មធ្ងន់ធ្ងរជាងមុនទៅលើ រុស្ស៊ី ពីសំណាក់បណ្ដាប្រទេសមហាអំណាចលទ្ធិប្រជាធិបតេយ្យ។
ការថ្កោលទោស
ពិភពលោក ពិសេសគឺអង្គការសហប្រជាជាតិ កំពុងប្រមូលសំឡេងដើម្បីធ្វើការថ្កោលទោសចំពោះ រុស្ស៊ី ប៉ុន្តែ រុស្ស៊ី នឹងប្រើប្រាស់សិទ្ធិប្រឆាំង។
វិបត្តិការទូត
ប្រទេសជាច្រើនក៏បាន និងកំពុងរងផលវិបាកដោយសារទង្វើរបស់ រុស្ស៊ី ក្នុងនោះមានដូចជា បណ្ដាប្រទេសត្រូវដកមន្ត្រី និងបុគ្គលិកការទូតចេញពី អ៊ុយក្រែន ឬផ្ដាច់ទំនាក់ទំនងការទូតជាមួយនឹង រុស្ស៊ី។ល។
ពិភាពលោកក៏កំពុងរង់ចាំអន្តរាគមន៍ផ្នែកការទូត ប៉ុន្តែ មកដល់ពេលនេះ មិនដឹងថា ទ្វារសម្រាប់ការទូតនេះបានបិទ ឬនៅ នៅពេល ទីក្រុងមូស្គូ បានចូលឈ្លានពានលើ អ៊ុយក្រែន ពេញទំហឹង។
