សាកលវិទ្យានានានៅរដ្ឋធានីកាប៊ុល ស្ទើរតែពុំមាននិស្សិតនៅក្នុងថ្ងៃដំបូងនៃឆ្នាំសិក្សាថ្មី បន្ទាប់ពី តាលីបង់ ចូលគ្រប់គ្រង អាហ្វហ្គានីស្ថាន និងចាប់ផ្ដើមដាក់ឱ្យអនុវត្តច្បាប់សាសនាអ៊ីស្លាម។
ស្ថាប័នគ្រប់គ្រងវិស័យអប់រំរបស់ តាលីបង់ កាលពីថ្ងៃទី 5 កញ្ញា បានចេញប្រកាសស្ដីអំពីបទបញ្ជាក្នុងការគ្រប់គ្រងថ្នាក់រៀន ក្នុងនោះសិស្សប្រុស និងសិស្សស្រី ត្រូវរៀនថ្នាក់ផ្សេងពីគ្នា ឬត្រូវឃាំងដោយវាំងនន ឬរបាំង បើសិនមានសិស្សក្រោម 15 នាក់។ បទបញ្ជានេះត្រូវបានដាក់ចេញមួយថ្ងៃមុនសាកលវិទ្យាល័យរបស់ អាហ្វហ្គានីស្ថាន បើកបវេសនកាលថ្មី។
ស្ត្រីត្រូវបាន តាលីបង់ អនុញ្ញាតឱ្យចូលសិក្សានៅមហាវិទ្យាល័យ ប៉ុន្តែត្រូវតែពាក់អាវវែង អាបាយ៉ា (abaya) និងជួតកន្សែង នីកាប (niqab) ដែលបិទមុខជិត។ សម្រាប់ថ្នាក់រៀនដែលមានសិស្សស្រី តាលីបង់ អនុញ្ញាតឱ្យតែអ្នកគ្រូ ឬលោកគ្រូដែលមានវ័យចំណាស់ ជាអ្នកបង្រៀន ហើយសិស្សប្រុស និងសិស្សស្រីត្រូវតែប្រើប្រាស់ផ្លូវដោយឡែក។ តាលីបង់ មិនទាន់និយាយដល់សាកលវិទ្យាល័យរបស់រដ្ឋនៅឡើយ។
Noor Ali Rahmani នាយកសាកលវិទ្យាល័យ Gharjistan នៅរដ្ឋធានីកាប៊ុល ឱ្យដឹងថា សាលាស្ទើរតែមិនមានមនុស្សនៅក្នុងថ្ងៃដំបូងនៃឆ្នាំសិក្សាថ្មី។ «និស្សិតរបស់យើងមិនទទួលយកប្រការនេះ (ប្រការដែលត្រូវបាន តាលីបង់ កំណត់) ហើយយើងនឹងត្រូវបិទទ្វារសាលារៀន។ និស្សិតរបស់យើងជួតកន្សែង ហ៊ីចាប់ (hijab) មិនមែនស្បៃមុខ នីកាប នោះឡើយ» Rahmani ថ្លែងដូច្នេះ។
យ៉ាងនេះក្ដី និស្សិតស្រី អាហ្វហ្គានីស្ថាន មួយចំនួនឱ្យដឹងថា ពួកគេមានអារម្មណ៍ថាស្រាលក្នុងចិត្តបន្តិច នៅពេល តាលីបង់ អនុញ្ញាតឱ្យទៅរៀន។
Jalil Tadjlil អ្នកនាំពាក្យនៃសាកលវិទ្យាល័យ Ibn-e Sina នៅរដ្ឋធានីកាប៊ុល ឱ្យដឹងថា សាលានេះបានបើកច្រកចេញ-ចូលដោយឡែកសម្រាប់និស្សិតប្រុស និងនិស្សិតស្រី។ «យើងមិនមានសិទ្ធិជ្រើសរើស ឬបដិសេធការកំណត់ដែលបានអនុវត្ត» Tadjlil និយាយដូច្នេះ។
Rahmani បានឱ្យដឹងថា ក្នុងចំណោមនិស្សិត 1,000 នាក់ ដែលបានចុះឈ្មោះចូលរៀននៅសាកលវិទ្យា Gharjistan កាលពីឆ្នាំ 2020 មានប្រហែលពី 10-20% ប៉ុណ្ណោះដែលបានចូលសាលា។ Rahmani សន្និដ្ឋានថា និស្សិតប្រមាណ 30% បានចាកចេញពី អាហ្វហ្គានីស្ថាន បន្ទាប់ពី តាលីបង់ បានចូលគ្រប់គ្រងប្រទេស។
Reza Ramazan សាស្ត្រាចារ្យផ្នែកវិទ្យាសាស្ត្រកុំព្យូទ័រប្រចាំសាកលវិទ្យាល័យ Gharjistan ថ្លែងថា និស្សិតស្រីប្រឈមមុខនឹងបញ្ហានៅពេលធ្វើដំណើរមកសាលារៀន។ «ទីតាំងត្រួតពិនិត្យ អាចក្លាយជាទីដ៏គ្រោះថ្នាក់។ តាលីបង់ អាចពិនិត្យមើលទូរស័ព្ទ និងកុំព្យូទ័ររបស់ពួកគេ» Ramazan បញ្ជាក់។
និស្សិតផ្នែកវិទ្យាសាស្ត្រកុំព្យូទ័រ Amir Hussein វ័យ 28 ឆ្នាំ ឱ្យដឹងថា គ្រប់យ៉ាងបានប្រែប្រួលទាំងស្រុងបន្ទាប់ពី តាលីបង់ បានចូលកាន់អំណាចនៅ អាហ្វហ្គានីស្ថាន «និស្សិតជាច្រើនលែងមានអារម្មណ៍រៀន ព្រោះថាពួកគេមិនដឹងអនាគតរបស់ខ្លួននឹងទៅជាយ៉ាងណា។ ពួកគេស្ទើរតែទាំងអស់ សុទ្ធតែចង់ចាកចេញពី អាហ្វហ្គានីស្ថាន»៕
